Read Southern Kisi Da̍a̍ni̍ɛ̍ɛ̄ 12 Bible Online

Da̍a̍ni̍ɛ̍ɛ̄ 12 - Southern Kisi bible

Da̍a̍ni̍ɛ̍ɛ̄ 12

¹“Mi̍ ki̍i̍la̍nɔ̍ Mɛ̄lɛ̄ka̍a̍ hīāū lāchī a̍ sūɛ̍i̍ nāa̍ ya̍ Da̍a̍ni̍ɛ̍ɛ̄ chu̍a̍, mbo̍ dīmūl la̍ māā, a̍ te̍le̍ŋ ko̍ŋ, Ma̍i̍kɛ̄l, o̍ cho̍ ki̍i̍la̍a̍ Mɛ̄lɛ̄ka̍a̍ bōlle̍ŋ, mbo̍ wā wānāā nūmnda̍ māndāa̍ wo̍, ō chō hūnɔ̄ɔ̄ a̍ te̍le̍ŋ dɛ̍nɛ̍ pa̍lāā bɛ̍ndōo̍, mbō hu᷄ŋ ma̍lā wānāā nūmnda̍. Dɛ̍nɛ̍ pa̍lāa̍ wa᷅ ni̍ŋ ndo̍, kāni̍ bɛ̍ɛ̍ mi̍ chi̍e̍ēŋndo̍ kāndu᷄ŋ, dɛ̍nɛ̍ pa̍lāā wāā le̍nde̍ o̍ yɔ̍nu̍ŋ ndɔ̍ le̍. Kɛ̍ Mɛ̄lɛ̄ka̍ chō hūnɔ̄ɔ̄ wānāā nūmnda̍ bāŋā, wānāā dīōlā ndāla̍ŋ lā chō lā pōōnyīāā o̍ yāu̍ dīōlā wānāa̍ Mɛ̄lɛ̄ka̍a̍ lā chō lā pōōnyīāā lēni᷄ŋ nda̍.

²Wānāā ka̍ ka̍, a̍ vi᷅ ni᷅ŋ ma̍ chɔ̄ nda̍ wa̍, ā chō hūnɔ̄ɔ̄ chɔ̄nɔ᷄ŋ mā mīīŋgu̍ yōōmū. Ā pūm mā sɔ̄la̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍, ā pūm yɛ̍, mā sɔ̄la̍ si̍ɔ̍mbu̍la̍ fɛ̍ɛ̍ŋ fɛ̍ɛ̍ŋ nda̍ŋ, a̍ bɛ̄ɛ̄la̍ ta̍mbɛ̍i̍la̍ŋ.

³Ndu̍yɛ̍ wānā o̍ wānā cho̍ wāna̍ tāāsi̍, ā chō hūnɔ̄ɔ̄ wā dīōndɔ̄ɔ̍ mɛ̄ɛ̍ ha̍lāa̍ ō dīāndū nu̍a̍ā fo̍ fo̍ yɛ̍. Ndu̍yɛ̍ wānā o̍ wānā cho̍ tōsā mī wāŋnda̍ tōsa̍ nyɛ̍ cho̍ sa̍kpō Mɛ̄lɛ̄ka̍ o̍ hɔ̄llo̍, ā chō hūnɔ̄ɔ̄ wā dīōndɔ̄ɔ̍ le̍ fɛ̍ɛ̍ŋ a̍ fɛ̍ɛ̍ŋ mɛ̄ɛ̍ lo̍o̍ŋ ŋ̄ dīāndū nu̍a̍ā o̍ ha̍lāa̍ ni᷄ŋ chōo̍ cho̍o̍ yɛ̍.”

⁴“Le̍la̍ŋ nūm Da̍a̍ni̍ɛ̍ɛ̄, yōōŋgūlā ŋ̄ tūēī la᷅ŋ mi̍ lā wā lā pōōnyīāā o̍ yāu̍wo̍ ni᷄ŋ nda̍ŋ, vi̍o̍ŋ nda̍ŋ kpi̍ŋ, di̍mūl wānā o̍ wānā a̍ la̍ŋ o̍kɔ̄ɔ̄ le̍, ha̍a̍a̍ mbō lo̍ ko̍ŋ mī mɛ̄ɛ̄lu̍la̍ chi̍e̍ēŋndo̍ lā fūūlu̍u̍. Wānāā ka̍ ka̍ a̍ cho̍ wā kīndīo̍o̍, hēēlōo̍ mā tūūsū le̍ kɔ̄l kālo̍o̍ sɔ̄lāa̍. Ndu̍yɛ̍ a̍ te̍le̍ŋ ko̍ŋ wāŋnda̍ ā sɔ̄lā ni̍ŋ kɔ̍l kālo̍o̍ ta̍u̍ ta̍u̍.”

⁵“O̍ ko̍ŋ kɔ̍ɔ̍lī, mi̍ Da̍a̍ni̍ɛ̍ɛ̄ o̍ hi̍a̍ū lāchī a̍ pōōnyīa̍a̍ māā, I̍ wa̍ tōfāa̍, mi̍ I̍ cha᷅ ki̍i̍la̍a̍ Mɛ̄lɛ̄ka̍a̍ ā ŋīɔ̍ɔ̍ŋ, ā wa̍ īsīsi̍ o̍ pīo̍o̍ kɔ̄ŋgɔ̍la̍ŋ vēllāa̍ vēllē, ho̍ō wa̍ kɔ̄ŋgɔ̍ɔ̍ ō pīlɔ̄ɔ̍, mi̍ ho̍ō wa̍ kɔ̄ŋgɔ̍ɔ̍ ō pīlɔ̄ɔ̍.

⁶Mi̍ ki̍i̍la̍a̍ Mɛ̄lɛ̄ka̍a̍ ŋi̍ɔ̍ɔ̍ŋāa̍ wa̍ ha̍ā īsīsi̍ o̍ pīo̍o̍ kɔ̄ŋgɔ̍la̍ŋ vēllāa̍ vēllē wa̍, ō pīlɔ̄ɔ̍ nyūnā ki̍i̍la̍nɔ̍ Mɛ̄lɛ̄ka̍ so̍ō ho̍ō nāa̍ ya̍ chu̍a̍, mbo̍ wā ō dōvīa̍ŋ o̍ nyɛ̄lā hūmbūla̍ŋ ni᷄ŋ, mbo̍ wā īsīsi̍ pi̍o̍ō mālūāŋ ndo̍ māā, vɛ̄ɛ̍nɛ̍ kpɛ̍ o̍ cho̍ yɛ̄ te̍le̍ŋnda̍ŋ chūā mī sɔ̄ɔ̍ŋ kɔ̄ndɔ̄fi̍llo̍ŋ mu᷅ŋ ŋ̄ mɛ̄ɛ̄lu̍?

⁷“O̍ ko̍ŋ, mi̍ ki̍i̍la̍nɔ̍ Mɛ̄lɛ̄ka̍ wa̍ ho̍ō o̍ nyɛ̄lā hūmbūla̍ŋ ni᷄ŋ, mbo̍ wa̍ pīo̍o̍ mālūāŋ ndo̍ ō hēēlū bāla̍ŋ chōo̍ cho̍o̍, mi̍ tu̍ɛ̍ī mbo̍ tīānu̍ŋ o̍ dīōlā wāna̍ cho̍ yōōmū le̍ fɛ̍ɛ̍ŋ fɛ̍ɛ̍ŋ ndo̍, mbo̍ dīmī māā, I̍ me̍na̍ŋ po̍, ō chō chūā wɔ̄sīla̍ŋ lā yāa̍ a̍ tɛ̄ndāa̍ tɛ̄ɛ̄ŋ. Tē nyɛ̄ pālāa̍ cho̍ wānāa̍ Mɛ̄lɛ̄ka̍a̍ chōo̍ wo̍ ō mɛ̄ɛ̄lu̍ pɛ̍, sɔ̄ɔ̍ŋ mu᷅ŋ kpo̍u̍ mɛ̄ɛ̍ ŋ̄ chūū yɔ̄nɔ᷄ŋ.

⁸“Mi̍ tu̍ɛ̍ī nyɛ̄ ki̍i̍la̍nɔ̍ Mɛ̄lɛ̄ka̍a̍ ho̍ō ō dīmi̍ wo̍ kɛ̍, I̍ si̍na̍ ndu̍ pɛ̄ŋgu̍ le̍. O̍ ko̍ŋ, mi̍ I̍ nyu̍nā ndu̍ māā, māsānɔ̄ɔ̍, vɛ̄ɛ̍nɛ̍ mɛ̄ɛ̄lu̍la̍ sūɛ̍i̍ he̍ī lā wā yɛ̍ ni̍ŋ?

⁹“Mbo̍ mūlūl la̍ māā, bu̍u̍la᷄ŋ te̍ Da̍a̍ni̍ɛ̍ɛ̄, kɔ̍ŋnu̍ŋ. Nyɛ̄ o̍ nyɛ̄ chō lō ō vīāŋāā le̍nde̍ ha̍a̍a̍ mī mɛ̄ɛ̄lu̍la̍ chi̍e̍ēŋndo̍ lā fūūlu̍u̍.

¹⁰Wānāā ka̍ ka̍ Mɛ̄lɛ̄ka̍ chō tōsā mā wa̍ ā dīāndāā ndu̍ pi̍la̍ o̍ hɔ̄l ā nɔ᷅ sɔ̍ŋ o̍ sɔ̄ŋ te̍. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, ā chō wā hīōūwɔ̄ɔ̍ lāchī a̍ dɛ̍nɛ̍ ndā wɔ̍ɔ̍ŋndo̍ tōsāa̍, ndu̍yɛ̍ ā sɔ̍lā ni̍ŋ si̍nā pɛ̄ŋgu̍ a̍ sɔ̄ɔ̍ŋ mu᷅ŋ o̍kɔ̄ɔ̄ le̍. Wānāā tāsi̍a̍a̍ ko̍ni̍ a̍ si̍nā ni̍ŋ sɔ̍ɔ̍ŋ mu᷅ŋ ni̍.

¹¹“Chɔ̍ŋ a̍ te̍le̍ŋ nda̍ kūūnā ni̍ŋ sa̍lālā wāŋnda̍ so̍lī lēpāla̍ o̍ lēpāla̍ la̍ŋ ndo̍, ndu̍ yɔ̍nūŋ ni̍ māā bōōndi̍i̍ nyɛ̄ wɔ̄ɔ̍ŋ wɔ̄ɔ̍ŋ tɛ̍ɛ̍mbūū ni̍ŋ chi̍ɛ̍i̍ Mɛ̄lɛ̄ka̍a̍ mbō sōli̍ ndu̍ o̍ ba̍a̍ ni᷄ŋ ndo̍ ō wā ni̍ŋ ndo̍, ō chō chūā pālɛ̍i̍ wāa̍ ō pīlɛ̍, a̍ kɛ̄mɔ̄ɔ̍ lē dīi̍ŋ a̍ be̍le̍-ŋɔ̍ma̍hīɔ̍ɔ̍lu̍ (1, 290).

¹²Wānāa̍ cho̍ lō bīūwɔ᷄ŋndo̍ mā chu̍m ha̍a̍a̍, mī pālɛ̍i̍ ī fūūlu̍u̍ wāa̍ pi᷅lɛ̍ a̍ kɛ̄mɛ̄ le̍ ya̍a̍ a̍ be̍le̍-ya̍a̍ a̍ ī ŋūɛ̍ɛ̍nu̍ (1, 335) wa̍, ā pɛ̄l tɔ̄nɔ̄ɔ̍.

¹³“Le̍la̍ŋ nūm Da̍a̍ni̍ɛ̍ɛ̄, lo̍ o̍ tīīnda᷄ŋ nu̍mndo̍ chōo̍ ha̍a̍a̍, mā fu̍u̍lu̍u̍ o̍ mɛ̄ɛ̄lu̍la̍ŋ. A̍ chō hūnɔ̄ɔ̄ wu̍. Kɛ̍ tē pālɛ̍i̍ mɛ̍ɛ̍lɛ̄i̍ le̍ chi̍e̍ēŋndo̍ ī hu᷄ŋ fu̍u̍lūū pɛ̍, ā chō mīīŋgū yōōmū ndu̍yɛ̍ mā sɔ̍la̍ fānda̍ cho̍ le̍ nūmndo̍.”