Read Southern Kisi Da̍a̍ni̍ɛ̍ɛ̄ 2 Bible Online

Da̍a̍ni̍ɛ̍ɛ̄ 2 - Southern Kisi bible

Da̍a̍ni̍ɛ̍ɛ̄ 2

¹Mɛ̄ɛ̍ māsā bɛ̍ndōo̍ Nābi̍u̍kānɛ̍ɛ̍sā sīmnu᷄ŋ māsā bɛ̍ndōo̍, ō tōsa̍ wɔ̄sīo̍o̍ ō pīlɛ̍, o̍ dīi̍ŋ ndɔ̄ɔ̍, mbo̍ sɔ̄l lu̍a̍a̍ŋ nyūmmā pīlɛ̍. Kɛ̍ ndu̍ o̍o̍ si̍nā lu̍a̍a̍ŋ ma̍ŋ pɛ̄ŋgu̍ le̍. Le̍ he̍ī, mi̍ sīōōŋnde̍ bīī ndu̍, mbo̍ būūla̍ŋ ta̍u̍ ta̍u̍ bɛ̍ndū.

²O̍ ko̍ŋ, mbo̍ yōōŋgū wānāā ndūāā di̍mī sɔ̄ɔ̍ŋ wa̍ā lāchīo̍ŋ nda̍, a̍ wānāā ndūāā ma̍ŋgālāa̍, a̍ wānāā ndūāā vi̍a̍māā lāyāwāa̍, a̍ wānāā ŋ̄wāŋ vīlɛ̍i̍ya̍, ma̍ hūŋ. Mɛ̄ɛ̍ nda̍ hīŋ, ma̍ hu᷄ŋ si᷅m ndu̍ o̍ hɔ̄l,

³mbo̍ dīmūl nda̍ āā, “Lɔ̄mā pīlɛ̍ ya̍ I̍ sɔ᷄l wa̍a̍li̍o̍ō ni̍, I̍ cho̍ bɔ̄ɔ̍ bu̍u̍la᷄ŋndo̍ a̍ ma̍ŋ o̍kɔ̄ɔ̄. Le̍la̍ŋ, I̍ ye̍e̍ma̍ nya̍ mī lā tɛ̄ɛ̄si̍a̍lla̍ la̍ ma̍ŋ mī i̍ si̍na̍ ma̍ŋ pɛ̄ŋgu̍.”

⁴O̍ ko̍ŋ, ma̍ dīmu̍l māsā bɛ̍ndōo̍ o̍ A̍lu̍a̍ma̍i̍kīi̍ye̍ ni᷄ŋ āā, “O̍o̍ fāllo̍ māsā bɛ̍ndōo̍, vi̍o̍u̍ na̍a̍ chōo̍ kɛ̍ndīa̍a̍. Chɔ̍m na̍a̍ lɔ̍mā ŋ̄ sɔ᷄l la̍ŋ su̍e̍e̍, ŋ̄ chō nu̍m tɛ̄ɛ̄sīāā ndɔ̄ɔ̍ chɔ̄m.”

⁵O̍ ko̍ŋ kɔ̍ɔ̍lī, mi̍ māsā bɛ̍ndōo̍ dīmūl nda̍ āā, “Sāko̍, nya̍ cho̍ ya̍ lɔ̄mā ya̍ I̍ sɔ᷄l la̍ŋ chɔ̄m ni̍, ndu̍yɛ̍ mī lā mūli᷄ŋ mī lā tɛ̄ɛ̄si̍a̍a̍ la̍ ma̍ŋ pa̍ku̍. Tē ō cho̍ ko̍ŋ te̍, mī I̍ di̍mu̍l nya̍ tōnya̍a̍ wa̍la̍ŋ, I̍ cho̍ tōsā mā kīli̍ ki̍li̍ nya̍ ve̍e̍ ve̍e̍, mī chīɛ̄īlā nyāla̍ŋ lā lo̍ fo̍ndō.

⁶Kɛ̍ tē lā dīmu̍l la̍ pɛ̍ lɔ̍mā ya̍ sɔ᷄l la̍ŋ, ndu̍yɛ̍ mī lā tɛ̄ɛ̄si̍a̍l la̍ ma̍ŋ nyɛ̄ kɛ̄ndɛ̄ wa̍la̍ŋ, I̍ fa̍nda̍ nya̍ nyɔ̄ɔ̍ŋ ta̍u̍. Ndu̍yɛ̍, mī to̍sa̍ mī lā sɔ̄la̍ bɛ̄ɛ̄le̍ŋ ta̍u̍ ta̍u̍. Le̍la̍ŋ, lā chɔ᷄m ya̍ lɔ̄mā ya̍ I̍ sɔ᷄l la̍ŋ a̍ tɛ̄ɛ̄sīāā ndɔ̄ɔ̍.”

⁷Ma̍ dīmūl vɛ̄lɛ̄ māsā bɛ̍ndōo̍ āā, “Yāndi̍i̍ fāllo̍, bu̍ɛ̍i̍yāā nūmnda̍ na̍a̍ ŋ̄ chō ni̍. Kɛ̍, chɔ̍m na̍a̍ lɔ̄mā ŋ̄ sɔ᷄l la̍ŋ mī ŋ̄ tɛ̄ɛ̄si̍a̍l nu̍m ma̍ŋ.”

⁸O̍ ko̍ŋ, mi̍ māsā bɛ̍ndōo̍ dīmūl nda̍ āā, “Ta̍ma̍la̍a̍ ko̍ni̍ nya̍ chō a̍ sūɛ̍i̍ he̍ī ni̍, kɛ̍ lā sīnā māā sūɛ̍i̍ ya̍ I̍ di̍mi̍ ve̍ a̍ kɔ̄l nu̍u̍ kpo̍u̍ ya̍ di̍mi̍ ndi̍ ni̍.”

⁹Kāni̍ I̍ di̍mi̍ māā, tē lā chɔ᷄m ya̍ lɔ̄mā ya̍ I̍ sɔ᷄l la̍ŋ a̍ tɛ̄ɛ̄sīāā ndɔ̄ɔ̍ le̍, I̍ tu̍si̍ nya̍ nyɛ̄ pālāa̍ chōo̍. Mɛ̄ɛ̍ le̍la̍ŋ nya̍ chɛ̄la᷅ŋ ni̍ mī lā dīmūl lā chōōla̍ŋ mī I̍ to̍sā sɔ̄ɔ̍ŋ wɔ̍ɔ̍ŋndo̍ŋ? Lā chɔ̄m ya̍ lɔ̄mā ya̍ I̍ sɔ̍l la̍ŋ. Tē o̍ cho̍ ko̍ŋ te̍, lā chō pīɔ̍mndo̍ sɔ̍lā.

¹⁰Ma̍ mūlūl ndu̍ āā, “Fāllo̍, wānā o̍ wānā cho̍ o̍ chi̍e̍ēŋndo̍ ho̍ō chōo̍, o̍ nɔ̍lā mbō tōsa̍l nu̍m ī wāā le̍nde̍ wo̍ le̍. Ndu̍yɛ̍, kāni̍ bɛ̍ɛ̍, māsā bɛ̍ndōo̍ ō nyūna̍ wɔ̍ wa̍nā o̍ wānā ma̍ŋgālāā, kɛ̄lɛ̄ŋgāā wānā vi̍a̍māā yāwāa̍, ɔ̄ɔ̄ wāna̍ ŋ̄wāŋ vīlɛ̍i̍yo̍ le̍ mbō tōsa̍l ndu̍ ī wāā le̍nde̍ ve̍ le̍.

¹¹Nyɛ̄ ŋ̄ chō ko̍ŋ nyūnāa̍ wo̍ fāllo̍, ī kēndū bɔ̍ɔ̍. Wānā o̍ wānā nɔ̍lā ndi̍ le̍, mɛ̄ɛ̍ mɛ̄lɛ̄ka̍a̍. Ndu̍yɛ̍, nda̍ nda̍, ā cho̍ wānāa̍ cha̍l chi̍e̍ēŋ na̍nu᷄ŋ ŋ̍wa̍ŋndā chi̍e̍e̍ tɛ̍ɛ̄ŋ te̍ nda̍ cho̍ le̍.”

¹²O̍ ko̍ŋ, mɛ̄ɛ̍ māsā bɛ̍ndōo̍ ō tūēī nyɛ̄ pūa̍a̍ ha̍ā ā dīmi̍ wo̍, mbo̍ dūāūnu᷄ŋ tu̍mbe̍ a̍ nda̍. O̍ lē pīlɛ̍ ni᷄ŋ kpe̍, mbo̍ yɔ̄ŋgū kpāāyāa̍ Ba̍bi̍lɔ̄ŋ māā ā dīu̍ wānāā kɔ̄l kālu̍a̍a̍ tɛ̍ɛ̍sīāā ha̍ā sɔ̄ɔ̍ŋ vi̍a̍ŋna᷄ŋndo̍ŋ nda̍ kpo̍u̍.

¹³Ndu̍yɛ̍, sāwa̍ māsā bɛ̍ndōo̍ yɔ̄ŋgu̍ ho̍ō wo̍, ō wa̍ le̍ wānāā kɔ̄l kālu̍a̍a̍ tɛ̍ɛ̍sīāā sɔ̄ɔ̍ŋ vi̍a̍ŋna᷄ŋndo̍ŋ nda̍ kpe̍de̍. Da̍a̍ni̍ɛ̍ɛ̄ nda̍ chāa̍ŋāā ndūāā ya̍a̍wa̍ bɛ̍ɛ̍, ā wa̍ lēchōo̍.

¹⁴O̍ ko̍ŋ kɔ̍ɔ̍lī, mɛ̄ɛ̍ Ālīo̍o̍chī, wāna̍ wa̍ wānāā wa̍lla̍ bōlle̍ŋ o̍ chīɛ̄ī lēmāsāa̍ ni᷄ŋ ndō ō wa̍ kɔ̄la̍ŋ le̍ wānāā kɔ̄l kālu̍a̍a̍ Ba̍bi̍lɔ̄ŋ dīūwo̍, mi̍ Da̍a̍ni̍ɛ̍ɛ̄ o̍ wa̍ wānā pi̍lɛ̍ le̍ pīɔ̍mndo̍ sɔ̄lāa̍ wo̍ ō ku̍ā nāa̍ ndu̍ chu̍a̍ o̍ nɛ̄i̍ kɔ̄l kālu̍ bɛ̍ndū ni᷄ŋ.

¹⁵Mbo̍ kɔ̍ nyu̍nā ndu̍ āā, “Fāllo̍, yɛ̄ɛ̄nɛ̍ yɔ̍nu̍ŋ yɛ̍ mi̍ māsā bɛ̍ndōo̍ ō yɔ̄ŋgū kpāāyā cho̍ŋ cho̍ŋ wa̍ā nu̍a̍ā?” O̍ ko̍ŋ, mi̍ Ālīo̍o̍chī chɔ᷅m Da̍a̍ni̍ɛ̍ɛ̄ lēni᷄ŋ nyɛ᷄ yɔ̍nu̍ŋndo̍.

¹⁶Mɛ̄ɛ̍ Da̍a̍ni̍ɛ̍ɛ̄ tu̍e̍ī nyɛ̍ yɔ̍nu̍ŋndo̍, mbo̍ kūā lē pīlɛ̍ kpe̍ o̍ māsā bɛ̍ndōo̍ lo̍, mbo̍ kɔ̍ di̍mūl ndu̍ āā, “Fāllo̍, ke̍ ya̍ te̍le̍ŋ ti᷄ŋ mī chɔ᷄m nu̍m lɔ̄mā ŋ̄ sɔ᷄l la̍ŋ ndu̍yɛ̍, a̍ tɛ̄ɛ̄sīa̍a̍ cho̍ lēni᷄ŋ ndo̍.”

¹⁷O̍ ko̍ŋ, mi̍ Da̍a̍ni̍ɛ̍ɛ̄ mi̍i̍ŋgū mbo̍ kɔ̍ di̍mūl chāa̍ŋāā ndūāā ya̍a̍wa̍, Hānāni̍yā, a̍ Mɛ̍si̍a̍kī, a̍ Āsālu̍i̍yā āā,

¹⁸“Pūa̍a̍, lā pīɛ̍i̍ le̍ mī Mɛ̄lɛ̄ka̍ o̍ cho̍ ɛ̄chɛ̍nɛ̄ wo̍ ō tūīīnu̍ŋ na̍a̍ īnyīɛ̍ɛ̍, mbō chɔ᷄m na̍a̍ sɔ̍ɔ̍sɔ̍ɔ̍yɛ̍ī lɔ̄mā sɔ̄la᷄ŋ ma᷅ŋ. Yɔ̍ŋi̍ nda̍ dīu̍ na̍a̍ lātūlu̍ a̍ wānāā kɔ̄l kālu̍a̍a̍ tɛ̍ɛ̍sīāā sɔ̄ɔ̍ŋ vi̍a̍ŋna᷄ŋndo̍ŋ Ba̍bi̍lɔ̄ŋ nda̍.”

¹⁹Mi̍ ī yɔ̄nu̍ŋ i̍ chɔ᷅l kōŋ, mi̍ Mɛ̄lɛ̄ka̍ chɔ̄m Da̍a̍ni̍ɛ̍ɛ̄ sɔ̍ɔ̍sɔ̍ɔ̍yɛ̍ī lɔ̄mā sɔ̄la᷄ŋ ma᷅ŋ o̍ yīla᷅ŋndo̍ ni᷄ŋ. O̍ ko̍ŋ, mi̍ Da̍a̍ni̍ɛ̍ɛ̄ sāŋgālā Mɛ̄lɛ̄ka̍ cho̍ o̍ fo̍ndāŋ ndɔ̍ɔ̍ chōo̍ cho̍o̍ wo̍.

²⁰Mbo̍ dīmī āā, “Mɛ̄lɛ̄ka̍ na̍a̍, sāŋgālāa̍ chō le̍ dīōlā nūmnda̍ŋ le̍ fɛ̍ɛ̍ŋ a̍ fɛ̍ɛ̍ŋ. Nu᷄m cho̍ Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ni̍. Ndu̍yɛ̍, nu᷄m si̍nā nyɛ̄ o̍ nyɛ̄ fe̍e̍ ni̍.

²¹Nu᷄m te̍le̍ŋnda̍ŋ lā chō o̍ bā ni̍. Ndu̍yɛ̍, wɔ̄ɔ̄le̍ŋ ni̍, sīālte̍ŋ ni̍, te̍le̍ŋ ŋ̄ yēēmā māā le̍ wa̍ wo̍, lē wa̍. Nu᷄m to̍sā ni̍ mā ha̍ndū ma̍sāā bɛ̍ndūa̍a̍, ndu̍yɛ̍, nu᷄m to̍sā ni̍ mā fa̍ŋā nda̍. Mā ke̍ wānāa̍ kɔ̄l kālu̍a̍a̍ sīnā pɛ̄ŋgo̍o̍. Ndu̍yɛ̍ mā ke̍ wānāa̍ nɔ̍ sīnā pɛ̄ŋgo̍o̍ wa̍ tāāsi̍o̍o̍.

²²Nu᷄m chɔ̍ɔ̍mūū sɔ̄ɔ̍ŋ yīŋgi̍lɛ̍i̍ ŋ̍ cho̍ ŋ̄ vīāŋna᷄ŋ ndo̍ŋ ni̍. Ā sīnā nyɛ̍m cho̍ o̍ nyūmnda̍ŋ ni᷄ŋ ndo̍ŋ. Ndu̍yɛ̍, nu᷄m nɔ̍ nyɛ̄ wa̍wo̍ŋndo̍ o̍ bā ni̍.

²³O̍o̍ Mɛ̄lɛ̄ka̍, I̍ me̍l nu̍m ba̍li̍ka̍, ndu̍yɛ̍, I̍ sa̍ŋga̍la̍ nu̍m. Nu᷄m cho̍ Mɛ̄lɛ̄ka̍ fi̍nyāā nīāā ma̍māa̍ nda̍ a̍a̍ pi̍ɛ̍īyo̍ ni̍. Ā bīī ma̍ ke̍ ya̍ sīnā pɛ̄ŋgo̍o̍ a̍ kpāāyāa̍. Nyɛ̄ na̍a̍ ŋ̄ nyūna̍ nu̍m le̍ ndu̍ wo̍, ndu̍ ŋ̄ chɔ᷄m ya̍ ho̍ō ni̍. A̍ chɔ̍m na̍a̍ lɔ̄mā sɔ̄lāāmā māsā bɛ̍ndōo̍ ō sɔ᷄l la̍ŋ.”

²⁴O̍ ko̍ŋ kɔ̍ɔ̍lī, mi̍ Da̍a̍ni̍ɛ̍ɛ̄ ku̍ā nāa̍ Ālīo̍o̍chī chūā, wāna̍ māsā bɛ̍ndōo̍ yūlū le̍ wānāā kɔ̄l kālu̍a̍a̍ tɛ̍ɛ̍sīāā sɔ̄ɔ̍ŋ vi̍a̍ŋna᷄ŋndo̍ŋ Ba̍bi̍lɔ̄ŋ nda̍ dīūwo̍ wo̍ chūā. Mbo̍ kɔ̍ di̍mūl ndu̍ āā, “Di̍ū wāŋnda̍ ha̍ā le̍. Kɔ̍ a̍ ya̍ nāa̍ māsā bɛ̍ndōo̍ chūā, mi̍ kɔ̍ chɔ᷅m ndu̍ tɛ̄ɛ̄sīāā lɔ̄mā o̍ sɔ̍l la̍ŋ.”

²⁵O̍ lē pīlɛ̍ ni᷄ŋ kpe̍, mi̍ Ālīo̍o̍chī ku̍ā a̍ Da̍a̍ni̍ɛ̍ɛ̄ nāa̍ Māsā Bɛ̍ndōo̍ Nābi̍u̍kānɛ̍ɛ̍sā chūā. Mbo̍ kɔ̍ di̍mūl ndu̍ āā, “Fāllo̍, vīo̍u̍ na̍a̍ chōo̍ kɛ̍ndīa̍a̍. I̍ sa̍a̍lu̍ŋ wa᷅ŋndo̍, wānāā nda̍ chɛ᷄ŋ Chu̍dā o̍ bīyɔ̄ɔ̍ ni᷄ŋ nda̍ tɛ̍ɛ̄ŋ, o̍ nɔ̍lā mbō tɛ̄ɛ̄si̍a̍l nu̍m lɔ̄mā ŋ̄ sɔ̄la᷄ŋ ndo̍.”

²⁶O̍ ko̍ŋ kɔ̍ɔ̍lī, mi̍ māsā bɛ̍ndōo̍ nyūnā Da̍a̍ni̍ɛ̍ɛ̄, ō nda̍ a̍a̍ ve̍e̍lū vɛ̍lɛ̄ āā Bɛ̄tīsi̍a̍sā wo̍ āā, “Ā nɔ̄lā mā chɔ̍m ya̍ lɔ̄mā ya̍ I̍ sɔ᷄l la̍ŋ, ndu̍yɛ̍ mā tɛ̍ɛ̍si̍a̍l la̍ ma̍ŋ?”

²⁷O̍ ko̍ŋ, mi̍ Da̍a̍ni̍ɛ̍ɛ̄ mu̍lī āā, “Fāllo̍, sūɛ̍i̍ ŋ̄ nyūna̍ he̍ī ye̍, mɛ̄ɛ̍ o̍ mɛ̄ɛ̍ wāŋndo̍ nɔ̍ kɔ̄l kālo̍o̍, ō nɔ̍lā mbō chɔ᷄m nu̍m ndi̍ le̍. Ā yɔ᷄ŋ bɛ̍ɛ̍ āā wānāā kɔ̄l kālu̍a̍a̍ tɛ̍ɛ̍sīāā sɔ̄ɔ̍ŋ vi̍a̍ŋna᷄ŋndo̍ŋ nda̍, ɔ̄ɔ̄ wānāā si̍nā sɔ̄ɔ̍ŋ wa᷅ hu̍nɔ̄ɔ̄ yɔ̄nɔ᷄ŋ sīɔ̄dīi̍ yo̍ wo̍ŋ nda̍ ni̍, kɛ̄lɛ̄ŋgāā wānāā māŋgālāa̍, ā nɔ̍lā mā chɔ᷄m nu᷄m ndi̍ le̍.

²⁸Kɛ̍ Mɛ̄lɛ̄ka̍, o̍ cho̍ ɛ̄chɛ̍nɛ̄ mbō chɔ̄ɔ̄mūū sɔ̄ɔ̍ŋ sɔ̍ɔ̍sɔ̍ɔ̍ wo̍ŋ ndo̍, Mɛ̄lɛ̄ka̍ ko̍ŋ, ndu̍ chɔ̍m nūm Nābi̍u̍kānɛ̍ɛ̍sā nyɛ̍ nɔ̍ le̍ hūnɔ̄ɔ̄ fɛ̍ɛ̍ŋ yɔ̍nɔ᷄ŋndo̍ wo̍ ni̍. Nyɛ̄ Mɛ̄lɛ̄ka̍ chɔ᷄m nu̍m o̍ lɔ̄mā sɔ̄lla᷄ŋ ni᷄ŋ ndo̍ ndu̍ cho̍ ho̍ō ni̍.

²⁹“Te̍le̍ŋ ŋ̄ wā ī hīnī o̍ lūa̍a̍ŋndo̍, mi̍ kɔ̄l nūmndo̍ kūā o̍ sɔ̄ɔ̍ŋ wa̍ hūnɔ̄ɔ̄ yɔ̄nɔ᷄ŋndo̍ wo̍ŋ. Ndu̍yɛ̍, mi̍ Mɛ̄lɛ̄ka̍ o̍ chɔ᷅m sɔ̄ɔ̍ŋ sɔ̍ɔ̍sɔ̍ɔ̍ wo̍ŋ ndo̍ ō chɔ̄m nu̍m nyɛ̍ nɔ̍ le̍ hūnɔ̄ɔ̄ yɔ̄nɔ᷄ŋndo̍ o̍ sīɔ̄dīi̍ lāchīo̍o̍ ni᷄ŋ ndo̍.

³⁰Kɛ̍ ya̍ ya̍ le̍ sa̍bū Mɛ̄lɛ̄ka̍ chɔ᷄m ya̍ sɔ̍ɔ̍sɔ̍ɔ̍yɛ̍ī he̍ī yo̍, ō cho̍ ma̍chu̍a̍ā māā I̍ nɔ̍ tāāsi̍o̍o̍ mi̍ hi̍a̍ū chāāŋnda̍ le̍, kɛ̍ ō chɔ᷄m ya̍ ndi̍ māchɔ̄māā le̍ hāli̍kpe̍ŋ mī nu̍m māsā bɛ̍ndōo̍ mā si̍na̍ tɛ̄ɛ̄sīa̍a̍ cho̍ o̍ lɔ̄mā sɔ̄la᷄ŋ ma᷅ŋ ni᷄ŋ ndo̍, a̍ le̍ mā si̍na̍ sɔ̄ɔ̍ŋ ŋ̄ wa̍ kɔ̄llo̍ kēēlīa̍a̍ wo̍ŋ pɛ̄ŋgu̍.

³¹“Nyɛ̄ ŋ̄ chēnu᷄ŋ o̍ hɔ̄llo̍, ndu̍ cho̍ ho̍ō ni̍. A̍ wa̍ īhīni̍, ma̍ chā nyɔ̄ɔ̍ īsīsi̍ ō bɛ̄ndū bɛ̍ndū. Nyɔ̄ɔ̍ ho̍ō, ō wa̍ ŋɛ̍lɛ̄ŋgi̍ ŋɛ̍lɛ̄ŋgi̍ bɛ̍ndū, ndu̍yɛ̍ wūēēnɔ᷄ŋndo̍ pi̍la̍ ndu̍ o̍o̍ wu̍e̍e̍nūŋ ni̍.

³²Bōllē nyɔ̄ɔ̍ ho̍ō, a̍ ko̍o̍līi̍ kɛ̍ndɛ̄ kɛ̍ndɛ̄i̍ kpo̍so̍ŋ le̍ wa̍ ni̍. Tākpāa̍ ni̍, bāla̍ŋ ni̍, a̍ ka̍ni̍i̍ hu̍mbūe̍i̍ kpo̍so̍ŋ la̍ wa̍ ni̍. Dēmbōo̍, a̍ lɔ̄lūla̍ŋ, a̍ chīli̍ŋi̍i̍ būlɔ̍ŋsīi̍ye̍ kpo̍so̍ŋ la̍ wa̍ ni̍.

³³Pēlūŋ ndɔ̄ŋ mūu̍ŋ ndo̍ŋ vēllāa̍ vēllē, chɔ̍ŋ o̍ pēlīī ti̍i̍ndīi̍ye̍ mbo̍ kūā o̍ sōōŋ mɛ̄so̍ŋ, pēlēi̍ ī pīlɛ̍i̍ bāa̍ pīlɔ̍ɔ̍ chīli̍ŋnde̍ kpo̍so̍ŋ, bāa̍ ō pīlɔ̍ɔ̍ pūūlōo̍. Ī pīlɛ̍i̍ bɛ̍ɛ̍, bāa̍ ō pīlɔ̍ɔ̍ chīli̍ŋnde̍, bāa̍ ō pīlɔ̍ɔ̍ pūūlōo̍.

³⁴A̍ lo̍ tōfāa̍ ma̍ chā mi̍ pōūwo̍ fūlā fa̍ŋ, mbo̍ hu᷄ŋ de᷅l o̍ nyɔ̄ɔ̍ ho̍ō pēlūŋ ndɔ᷄ŋ cho̍ mu̍ŋ bāa̍ ō pīlɔ̄ɔ̍ chīli̍ŋnde̍, bāa̍ ō pīlɔ̍ɔ̍ pūūlōo̍ wo̍ŋ chōo̍, mbo̍ pēsī pēsī mu̍ŋ vɛ̍ vɛ̍. Pōūwo̍ ho̍ō yɛ̍, ō cho̍ wa̍nā chi̍e̍e̍ le̍ nyi̍ndū ndu̍ le̍.

³⁵O̍ ko̍ŋ, chīli̍ŋnde̍ ni̍, pūūlōo̍ ni̍, chīli̍ŋi̍i̍ būlɔ̍ŋsīi̍ye̍ ni̍, ka̍ni̍i̍ hu̍mbūe̍i̍ ni̍, a̍ ko̍o̍līi̍ye̍, mi̍ ŋ̄ chūīīnu̍ŋ mu̍lu̍lu̍, mɛ̄ɛ̍ mɛ̄ɛ̍ fu̍e̍e̍ŋīī ŋ̄mālle̍ o̍ fo̍ndāŋ nda̍ nɛ̄ī ma̍ālo̍ŋ a̍ wɔ̄ɔ̄le̍ŋ ndo̍ ī chūīīnūŋ nu̍a̍ā yɛ̍. O̍ ko̍ŋ, mi̍ hūēīye̍ hu᷄ŋ ba̍su̍ mu̍ŋ tɛ̍ɛ̍, nyɛ̄ bɛ̍ɛ̍ o̍ lo̍ le̍. Kɛ̍ mi̍ pōū pɛ᷅l ko̍ŋ nyɛ̍ kōŋ ndo̍, ō sīmnu̍ŋ po̍ū bɛ̄ndū bɛ̍ndū, mbo̍ chūā chi̍e̍ēŋndo̍ kpo̍u̍.”

³⁶Mi̍ Da̍a̍ni̍ɛ̍ɛ̄ hi̍a̍ū lāchī a̍ sūɛ̍i̍ āā, “Māsā bɛ̍ndōo̍, lɔ̄mā ŋ̄ sɔ᷄l la̍ŋ, ma̍ŋ ma̍ cho̍ ma᷅ŋ ni̍. Le̍la̍ŋ, ŋ̄ tɛ̄ɛ̄sīāl lɔ̍ nu̍m ni̍ko̍ ma̍ŋ.

³⁷O̍o̍ māsā bɛ̍ndōo̍. Nu᷄m cho̍ māsā bɛ̍ndū hi̍o̍ū māsāa̍ kpo̍u̍ wo̍ ni̍. Mɛ̄lɛ̄ka̍ cho̍ chōo̍ cho̍o̍ wo̍, ō ke̍ nu̍m māsāle̍ŋ, a̍ kpāāyāa̍, a̍ dīāllūŋ kāla᷄ŋ, a̍ bɛ̄ɛ̄le̍ŋ.

³⁸Ŋ̄wāŋndā chīe̍e̍ ni̍, vīsīāā yōndūa̍a̍ ni̍, yōūwa̍ chōo̍ cho̍o̍ ni̍, Mɛ̄lɛ̄ka̍ bīī mbo̍ kē nu̍m nda̍. Bā o̍ bā nda̍ chō, mi̍ Mɛ̄lɛ̄ka̍ hāndū nu̍m nda̍ bōlle̍ŋ. Ndu̍yɛ̍, nu᷄m cho̍ ko̍o̍līi̍yo̍ŋ bōlle̍ŋ ni̍.

³⁹Tē a̍ hu᷄ŋ fa̍ŋa᷄ŋ pɛ̍, māsāle̍ che᷅le̍ŋ lē chō hūnɔ̄ɔ̄ mīīŋgū. Kɛ̍, lē nɔ᷅ ni̍ŋ kpa̍a̍yā māā māsāle̍ nu̍mnde̍ŋ te̍. Tē le̍ŋ le̍ hi̍o̍ū pɛ̍, māsāle̍ ya̍a̍ndɔ̄le̍ŋ lē chō chɔ̄nɔ᷄ŋ. Lē chō wā mɛ̄ɛ̍ chīli̍ŋi̍i̍ būlɔ᷄ŋsīi̍ ī chō nu̍a̍ā yɛ̍. Māsāle̍ le̍ŋ, lē chō wā chi̍e̍ēŋndo̍ kpo̍u̍ bōlle̍ŋ.

⁴⁰O̍ mɛ̄ɛ̄lu̍la̍ŋ, mī māsāle̍ hīɔ̍ɔ̍lu̍le̍ŋ lē chɛ᷄ŋ. Lē chō wā lē kālā ka̍lā mɛ̄ɛ̍ chīli̍ŋnde̍ ī wā nu̍a̍ā yɛ̍. Kāni̍ chīli̍ŋnde̍ ndi̍, pēsīo̍o̍ i̍ pe̍sī nyɔ̍ɔ̍ ni̍ mī ī chūi̍ ndu̍ mu̍lu̍lu̍. Ndu̍yɛ̍, mɛ̄ɛ̍ chīli̍ŋnde̍ ī pēsī pēsī nu̍a̍ā nyɔ̄ɔ̍ mī ī chūi̍ ndi̍ mu̍lu̍lu̍ yɛ̍, le̍nde̍ ko̍ni̍ māsāle̍ le̍ŋ lē chō hūnɔ̄ɔ̄ māsɛ̄i̍ ī pīlɛ̍i̍ dēlɔ̄ɔ̄ chōo̍ ni̍ mī lē pēsi̍ ndi̍ tu᷅.

⁴¹Ndu̍yɛ̍, mɛ̄ɛ̍ ŋ̄ chē nu̍a̍ā pēlūŋ nyɔ̄ɔ̍ ho̍ō a̍ sōōŋ ndɔ̄ŋ mɛ̍so̍ŋ pūūlōo̍ a̍ chīli̍ŋnde̍ vēlāa̍ vēllē yɛ̍, le̍nde̍ ko̍ni̍ māsāle̍ŋ nde᷅ŋ lē chō wā lē pīɔ̄wāā ni̍. Lē chō ti᷄ŋ kpāāya̍ īchīli̍ŋndo̍ nɔ̄, mɛ̄ɛ̍ ŋ̄ chē nu̍a̍ā chīli̍ŋnde̍ ī mūūli̍āŋ a̍ pūūlōo̍ yɛ̍.

⁴²Ndu̍yɛ̍, mɛ̄ɛ̍ ŋ̄ chē nu̍a̍ā nyɔ̄ɔ̍ ho̍ō pēlūŋ ndɔ᷄ŋ a̍ sōōŋ ndɔ᷄ŋ mɛ̍so̍ŋ, a̍ chīli̍ŋnde̍, a̍ pūūlōo̍ vēllāa̍ vēllē yɛ̍, le̍nde̍ māsāle̍ŋ nde᷅ŋ le̍ chō hūnɔ̄ɔ̄ wā ni̍. Lē ti᷄ŋ lē chō dīāllūŋ kāla᷄ŋ nɔ̍, mī lē ti᷄ŋ lē wā le̍ nɔ᷅ di̍a̍llūŋ kālā le̍.

⁴³Ndu̍yɛ̍, mɛ̄ɛ̍ ŋ̄ chē nu̍a̍ā chīli̍ŋnde̍ ī mūūli̍āŋ a̍ pūūlōo̍ ī ve̍ i̍ bi̍īla᷅ŋ te̍ yɛ̍, le̍nde̍ wāŋnda̍ wā ni̍ŋ cha̍lle̍ o̍ nɔ̄la̍ŋ ni᷄ŋ ni̍ kɛ̍, mā pīɔ̄ūvi̍āŋ, ā lo᷅ ni̍ŋ na̍a̍ pi᷅lɛ̍ le̍.

⁴⁴Ndu̍yɛ̍ a̍ te̍le̍ŋ māsāā yɛ̍ yi̍a̍a̍ ha̍ā chō wā wo̍, Mɛ̄lɛ̄ka̍ cho̍ chōo̍ cho̍o̍ wo̍ chō hūnɔ̄ɔ̄ māsāle̍ŋ che᷅le̍ŋ hɛ̄lī. Māsāle̍ te̍mbū le̍ fɛ̍ɛ̍ŋ a̍ fɛ̍ɛ̍ŋ te̍ le̍ŋ. Ndu̍yɛ̍, fɛ̍ɛ̍ŋ a̍ fɛ̍ɛ̍ŋ, wānā nɔ̍lā le̍ŋ hīɔ̄lɔ̄ɔ̄ le̍. Māsɛ̄ī pa̍a̍ndūe̍i̍ ki̍nɛ̍i̍, māsāle̍ŋ nde᷅ŋ lē chō ndi̍ hūnɔ̄ɔ̄ pēsī pēsī, ī ve᷅m lɛ̍ le̍. Mī māsāle̍ sɛ̍nɛ̄īle̍ŋ nde᷅ŋ lē lo̍ le̍ fɛ̍ɛ̍ŋ a̍ fɛ̍ɛ̍ŋ.

⁴⁵Ndu̍yɛ̍, mɛ̄ɛ̍ o̍ mɛ̄ɛ̍ ŋ̄ chē nu̍a̍ā mi̍ pōū bɛ̄ndōo̍ fūlā o̍ pēmbēi̍ chōo̍ wānā nyi̍ndu̍ ndu̍ le̍, mbo̍ hu᷄ŋ pe̍sī pēsī chīli̍ŋnde̍, a̍ būlɔ̍ŋsīi̍ye̍, a̍ pūūlōo̍, a̍ ka̍ni̍i̍ hu̍mbūe̍i̍, a̍ ko̍o̍līi̍ye̍ vɛ̍ vɛ̍ yɛ̍, ndu̍ Mɛ̄lɛ̄ka̍ Bɛ̄ndōo̍, ō chɔ᷄m nūm nyɛ᷄ cho̍ hūnɔ̄ɔ̄ yɔ̄nɔ᷄ŋ o̍ sīɔ̄dīi̍ lāchīo̍o̍ ni᷄ŋ ndo̍ ni̍. Fāllo̍, lɔ̄mā ŋ̄ sɔ᷄l la̍ŋ mā chō tōnya̍. Ndu̍yɛ̍, tɛ̄ɛ̄sīāā ndɔ̄ɔ̍ kpe̍e̍kpe̍i̍ cho̍ ho̍ō ni̍.”

⁴⁶O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Nābi̍u̍kānɛ̍ɛ̍sā o̍ ba᷅ŋ wūla̍ŋ lɛ̄ŋ. Ndu̍yɛ̍, mbo̍ dīmī māā ā sōli̍ sa̍lāla̍ŋ a̍ nyɛ̄m chūŋ kɛ̄ndɔ᷄ŋ o̍ Da̍a̍ni̍ɛ̍ɛ̄ lo̍ le̍ ndu̍ bɛ̄ɛ̄le̍ŋ kīo̍o̍ mā sāŋga̍la̍ ndu̍.

⁴⁷Mi̍ māsā bɛ̍ndōo̍ dīmūl Da̍a̍ni̍ɛ̍ɛ̄ āā, “A̍ tōnyā kpe̍e̍kpe̍i̍, Mɛ̄lɛ̄ka̍ nūmndo̍, ō hīōū mɛ̄lɛ̄ka̍ā chēle̍ŋnda̍. Ndu̍yɛ̍, ndu̍ cho̍ māsānɔ̄ɔ̍ le̍ māsāā bɛ̍ndūa̍a̍ ni̍. Ndu̍ chɔ̍ɔ̍mūū sɔ̍ɔ̍ŋ kɔ̄ndɔ̄fi̍llo̍ŋ ni̍. Fo̍ndōle̍, a̍ nɔ̍la̍ ma̍ chɔ̄m ya̍ lūa̍a̍ŋ ma᷅ŋ.”

⁴⁸O̍ ko̍ŋ kɔ̍ɔ̍lī, mi̍ māsā bɛ̍ndōo̍ kē Da̍a̍ni̍ɛ̍ɛ̄ fo̍ndāŋ bɛ̄ndū bɛ̍ndōo̍. Ndu̍yɛ̍, mbo̍ kē ndu̍ vɛ̄lɛ̄ nyɔ̄ɔ̍ŋ ta̍u̍ ta̍u̍. Mbo̍ hāndū ndu̍ būŋga̍ŋ yɛ̍ yi̍ɔ̍ɔ̍ŋ Ba̍bi̍lɔ̄ŋ bōlle̍ŋ a̍ wānāā kɔ̄l kālu̍a̍a̍ tɛ̍ɛ̍sīāā sɔ̄ɔ̍ŋ vi̍a̍ŋna᷄ŋ ndo̍ŋ nda̍ kpo̍u̍.

⁴⁹O̍ ko̍ŋ, mi̍ Da̍a̍ni̍ɛ̍ɛ̄ nyu̍nā māsā bɛ̍ndōo̍ māā ō hāndu̍ Si̍ɛ̍du̍lā, a̍ Mɛ̍si̍a̍kī a̍ Ābɛ̄ni̍kō o̍ īsɔ̄ɔ̍ o̍ īsɔ̄ɔ̍ cho̍ Ba̍bi̍lɔ̄ŋ chīla̍ŋ. Ndu̍yɛ̍ mi̍ māsā bɛ̍ndōo̍ chɛ̄l mbo̍ hāndū nda̍ chīla̍ŋ. Mi̍ Da̍a̍ni̍ɛ̍ɛ̄ pi̍la̍ lo᷅ o̍ tōŋgo̍ kɔ̍ɔ̍sɔ̍ māsā bɛ̍ndōo̍ dīmī sɔ̄ɔ̍ŋ ndo̍ ni᷄ŋ.