Read Southern Kisi Da̍a̍ni̍ɛ̍ɛ̄ 3 Bible Online

Da̍a̍ni̍ɛ̍ɛ̄ 3 - Southern Kisi bible

Da̍a̍ni̍ɛ̍ɛ̄ 3

¹Mi̍ ī yɔ̄nu̍ŋ a̍ te̍le̍ŋ ko̍ŋ, mi̍ Māsā Bɛ̄ndōo̍ Nābi̍u̍kānɛ̍ɛ̍sā to̍o̍sīāā nyɛ̄ pūm a̍ ko̍o̍līi̍ye̍, mbo̍ sīmī ndu̍ o̍ dɛ̍ŋgbɔ̍ɔ̍ ni᷄ŋ Du̍lūā, o̍ būŋgɛ̄ī Ba̍bi̍lɔ̄ŋnde̍ ni᷄ŋ. Nyɔ̄ɔ̍ ho̍ō, bāndēi̍ nɛ̄īyo̍ be̍le̍-ŋɔ̍ma̍hīɔ̍ɔ̍lu̍, tōŋgɔ̄ɔ̍ nɛ̄īyo̍ le̍ ŋɔ̄ma̍hīɔ̍ɔ̍lu̍.

²Mbo̍ vēēlū lāŋgba̍ā kālāā lēlɛ̄ŋnda̍ kpo̍u̍ nāa̍ pi᷅lɛ̍. Chɔ̍ŋ a̍ su̍pūŋtɛ̍nɛ̍i̍ya̍[1] a̍ di̍si̍a̍a̍ a̍ māsāa̍ lākɔ̍lɛ̄i̍ya̍ a̍ wānāā ndāā si̍lāa̍, a̍ wānāa̍ kɛ̍sī nyɛ᷅m sɔ̄la̍ŋ lēlɛ̄ŋndo̍ŋ nda̍, a̍ chɔ̍ɔ̍chi̍a̍a̍ kɔ̍ɔ̍sa̍ a̍ wāŋnda̍ o̍ tōŋgo̍ kɔ̍ɔ̍sɔ̍ lēlɛ̄ŋndo̍ ni᷄ŋ nda̍, a̍ chɛ̄ɛ̍sīpi̍īya̍a̍ kɔ̍ɔ̍sā a̍ wāŋnda̍ o̍ būŋgāŋ yɛ̍ yi̍ɔ̍ɔ̍ŋ ni᷄ŋ nda̍, a̍ lāŋgba̍ā kālāā chēle̍ŋāa̍ cho̍ būŋga̍ŋ yɛ̍ yi̍ɔ̍ɔ̍ŋ bōlle̍ wa̍, mbo̍ vēēlū nda̍ le̍ mā hīŋ le̍ mbo̍ yɔ̄ŋgu̍ nyɔ̄ɔ̍ ho̍ō o̍ lɛ̄ŋnde̍ŋ ndo̍, le̍ mā wā ndu̍ sōōlūū wo̍.

³Ndu̍yɛ̍ mɛ̄ɛ̍ wānāā o̍ ve̍e̍lu̍ ha̍ā wa̍ ā hīŋ kpo̍u̍ na̍a̍ pi᷅lɛ̍, ma̍ sīm nyɛ̄ Māsā Bɛ̍ndōo̍ Nābi̍u̍kānɛ̍ɛ̍sā o̍ si̍mi̍ ho̍ō wo̍ lāchī le̍ mī Nābi̍u̍kānɛ̍ɛ̍sā o̍ yɔ̍ŋgu̍ nyɛ̄ kōŋ nāa̍ nda̍ chūā māā mɛ̄lɛ̄ka̍ ndā.

⁴O̍ ko̍ŋ, mi̍ wānā yo̍ndāa̍ sīm mbo̍ yōndā chōo̍ cho̍o̍ kpe̍le̍ŋ āā, “Nya̍ wānā o̍ wāna̍ cho̍ ya̍ nīla̍ŋ yāŋɔ̄ɔ̄, fūlāa̍ bā o̍ bā fe̍e̍ o̍ chi̍e̍ēŋndo̍ chōo̍, a̍ lēlɛ̄ŋ o̍ lēlɛ̄ŋ o̍ chi̍e̍ēŋndo̍ chōo̍, a̍ īsɔ̄ɔ̍ o̍ īsɔ̄ɔ̍ ma̍ŋgālāa̍ o̍ chi̍e̍ēŋndo̍ chōo̍, lā tūe̍i̍ nyɛ᷅ māsā bɛ̍ndōo̍ dīmī māā lā nɔ̄ mī lā tōsa̍ wo̍.

⁵Dīmīo̍o̍ nu̍a̍ā mī lā tūēī bu̍lu̍la̍ŋ sūɛ̍i̍, a̍ sɛ̄ŋnde̍, a̍ tōwāla̍ŋ, a̍ nyɛ̄m chāāŋ yɛ̍ yɛ̍ŋ che̍le̍ŋ ndo̍ŋ, lā bāŋ wu᷅la̍ŋ nyɛ᷅ ŋ̄ko̍o̍līi̍ Māsā Bɛ̍ndōo̍ Nābi̍u̍kānɛ̍ɛ̍sā o̍ si̍mi̍ ho̍ō wo̍ o̍ lābɛ̄ŋgu̍ ni᷄ŋ, mī lā sōōlu̍u̍ ndu̍.

⁶Ndu̍yɛ̍, wānā o̍ wānā kɛ̍ɛ̍ le̍ wūla̍ŋ bāŋɔ̄ɔ̍ le̍ nyɔ̄ɔ̍ ho̍ō sōōlu̍u̍ wo̍ pɛ̍, wānā ko̍ŋ, ta̍ma̍la̍ bɛ̍ɛ̍, mālɔ̄ɔ̍ ndu̍ o̍ to̍ndo̍ lēyīŋ bɛ̄ndū bɛ̍ndōo̍ ni᷄ŋ”

⁷Ndu̍yɛ̍, dīmīo̍o̍ nu̍a̍ā mi̍ wāŋnda̍ tūɛ̄ī nyɛ̄m chāa̍ŋ yɛ̍ yi̍ɔ̍ɔ̍ŋ sūɛ̍i̍, ma̍ bāŋ wūla̍ŋ ma̍ sōōlūū nyɛ̄ ŋ̄ko̍o̍līi̍ Māsā Bɛ̍ndōo̍ Nābi̍u̍kānɛ̍ɛ̍sā o̍ si̍mi̍ ho̍ō wo̍.

⁸Mɛ̄ɛ̍ Ba̍bi̍lɔ̄ŋnda̍ ā tūēī sāwa̍ māsā bɛ̍ndōo̍ ō dɔ̄ū ho̍ō wo̍, ma̍ sɔ̄lā fo̍ndāa̍ le̍ mā kɔ̍ di̍mūl Māsā Bɛ̍ndōo̍ Nābi̍u̍kānɛ̍ɛ̍sā sɔ̄ɔ̍ŋ wɔ̍ɔ̍ŋndo̍ŋ a̍ Chu̍ūwa̍ o̍kɔ̄ɔ̄.

⁹Ma̍ kɔ̍ di̍mūl ndu̍ āā, “Ōo̍ māsā bɛ̍ndōo̍ vīo̍u̍ na̍a̍ chōo̍ kɛ̍ndīa̍a̍.

¹⁰Fāllo̍, nūm te̍ dɔ̍ū sāwāa̍ māā tē nyɛ̄m cha̍a̍ŋ ŋ̄ sōō pɛ̍, māā wānā o̍ wānā nɔ̍ mbō ba᷄ŋ wūla̍ŋ, mbo̍ sōōlu̍u̍ nyɛ̄ ŋ̄ko̍o̍līi̍ ŋ̄ sīmi̍ ho̍ō wo̍ le̍?

¹¹Ndu̍yɛ̍, māā wānā o̍ wānā kɛ̍ɛ̍ le̍ wūla̍ŋ bāŋɔ̄ɔ̍ le̍ ndu̍ sōōlūūwo̍ pɛ̍, māā wānā ko̍ŋ ā wu̍u̍ ndu̍ o̍ to̍ndo̍ lēyīŋ tūū bɛ̄ndū bɛ̍ndōo̍ ni᷄ŋ te̍?

¹²Kɛ̍ fāllo̍, pūa̍a̍ Chu̍ūwāā pūm chō ma̍ hāndū nda̍ o̍ būŋgāŋ yɛ̍ yi̍ɔ̍ɔ̍ŋ bōlle̍ŋ Ba̍bi̍lɔ̄ŋ na̍nu᷄ŋ, nda̍ yɔ̍nūŋ māā Si̍ɛ̍du̍lā a̍ Mɛ̍si̍a̍kī a̍ Ābɛ̄ni̍kō ni̍, pūa̍a̍ ha̍ā, ā kɛ̄ɛ̍ nūm dīōm. Ā chɛ᷄l mā sāāŋgi̍a̍l mɛ̄lɛ̄ka̍a̍ nūmnda̍ le̍, kɛ̄lɛ̄ŋgāā ni᷅ŋ te̍ mā sōōlu̍u̍ nyɛ̄ ŋ̄ko̍o̍līi̍ ŋ̄ sīmi̍ māā mɛ̄lɛ̄ka̍ nūm ndo̍.”

¹³Mɛ̄ɛ̍ Māsā Bɛ̍ndōo̍ Nābu̍kānɛ̍ɛ̍sā o̍ tu̍e̍ī ko̍na̍ Ba̍bi̍lɔ̄ŋnda̍ ā dōōnu̍ŋ ndu̍ a̍ pūa̍a̍ ya̍a̍wa̍ ha̍ā o̍kɔ̄ɔ̄ wo̍, mbo̍ tāmbū kɔ̄l ta̍u̍ ta̍u̍ bɛ̍ndū. O̍ ko̍ŋ, mbo̍ yōōŋgū le̍ Si̍a̍du̍lūā, a̍ Mɛ̍si̍a̍kī, a̍ Ābɛ̄ni̍kō.

¹⁴Mɛ̄ɛ̍ nda̍ hi᷄ŋ, mbo̍ nyūnā nda̍ āā, “A̍ tōnya̍ i̍ cho̍ ni̍ māā nūm Si̍a̍du̍lūā, a̍ nūm Mɛ̍si̍a̍kī, a̍ nu̍m Ābɛ̄ni̍kō, māā lā kɛ̄ɛ̍ le̍ mɛ̄lɛ̄ka̍ā nīa̍a̍ sāāŋgīāllo̍ ndu̍yɛ̍ mi̍ lā kɛ̄ɛ̄ le̍ nyɛ̄ ŋ̄ko̍o̍līi̍ ya̍ to̍o̍si̍a̍a̍ ho̍ō māā mɛ̄lɛ̄ka̍ wo̍ sōōlūūwo̍?

¹⁵Mɛ̄ɛ̄lu̍la̍ŋ kpɔ̍ŋ la̍ cho̍ la᷅ŋ ni̍. Tē lā tūēī ni᷅ŋ nyɛ̄m chāāŋ yɛ̍ yi̍ɔ̍ɔ̍ŋ sūɛ̍i̍ pɛ̍, lā ba᷄ŋ wu᷅la̍ŋ, tē ō cho̍ ko̍ŋ te̍, ī bɛ̍ndā ni̍ŋ a̍ nya̍ le̍. Mālɔ̄ɔ̍ nya̍ o̍ to̍ndo̍ lēyīŋ bɛ̄ndōo̍ ni᷄ŋ. Mī che᷅ wɔ̄ Mɛ̄lɛ̄ka̍ cho̍ ko̍ŋ mbō bāŋa̍ nya̍ ya̍ o̍ bā wo̍.”

¹⁶O̍ ko̍ŋ, mi̍ Si̍ɛ̍du̍lā a̍ Mɛ̍si̍a̍kī a̍ Ābɛ̄ni̍kō mu̍lī āā, “Māsā bɛ̄ndōo̍, ŋ̄ nɔ̍lā mī ŋ̄ sūŋgū le̍ na̍a̍ pīla̍ o̍ sūɛ̍i̍ he̍ī ni᷄ŋ te̍.

¹⁷Tē ā ma᷄l na̍a̍ o̍ to̍ndo̍ lēyīŋ tūū bɛ̄ndū bɛ̍ndōo̍ ni᷄ŋ pɛ̍, Mɛ̄lɛ̄ka̍ ō na̍a̍ ŋ̄ chō pīɛ̄īyo̍ wo̍ ō nɔ̄lā mbō bāŋa̍ na̍a̍ o̍ yīŋndē le̍ŋ ni᷄ŋ. Ndu̍yɛ̍, mbo̍ bāŋa̍ na̍a̍ nu̍m o̍ bā, fāllo̍.

¹⁸Kɛ̍ ndu̍yɛ̍, ŋ̄ dīmūl lɔ̍ɔ̄ nu̍m fāllo̍ mā si̍na̍ ndi̍ pɛ̄ŋgu̍, ā yɔ᷄ŋ bɛ̍ɛ̍ mī Mɛ̄lɛ̄ka̍ na̍a̍ o̍ bāŋa̍ na̍a̍ le̍, ŋ̄ yēēma̍ nu̍m mā sīna̍ māā ŋ̄ sa̍a̍ŋgīāl mɛ̄lɛ̄ka̍a̍ nūmnda̍ le̍, kɛ̄lɛ̄ŋgāā ni᷅ŋ te̍ mī ŋ̄ sōōlu̍u̍ nyɛ̄ ŋ̄ko̍o̍līi̍ ŋ̄ sīmi̍ ho̍ō māā mɛ̄lɛ̄ka̍ wo̍.”

¹⁹Mɛ̄ɛ̍ Si̍ɛ̍du̍lā, a̍ Mɛ̍si̍a̍kī, a̍ Ābɛ̄ni̍kō a̍ so̍ō dīōmnda̍ŋ nda᷅ŋ, mi̍ Māsā Bɛ̍ndōo̍ Nābi̍u̍kānɛ̍ɛ̍sā o̍ tu̍u̍lū kɔ̄l ta̍u̍ ta̍u̍ a̍ nda̍. Mbo̍ yīīlūl nda̍ hɔ̄lla̍ po᷅ŋ. Mbo̍ dīmūl wāŋnda̍ māā ā kɔ̍ mā kɔ̍ tu̍u̍lū to̍ndo̍ lēyīŋndo̍ mbō tūūlu̍ mbō hīōū māā pa̍a̍ndū sālā ŋɔ᷄mmɛ̍ū.

²⁰O̍ ko̍ŋ, mbo̍ dīmūl pūa̍a̍ ndūāā chɔ̄ūwāā dīāllūŋ kālāa̍ ā pūm māā ā yīi̍ Si̍ɛ̍du̍lā, a̍ Mɛ̍si̍a̍kī, a̍ Ābɛ̄ni̍kō mā wūu̍ nda̍ o̍ yīŋnde̍ to̍ndo̍le̍ lēŋ ni᷄ŋ.

²¹Ndu̍yɛ̍ pūa̍a̍ ya̍a̍wa̍ ha̍ā, nyɛ̄lā ndāla̍ŋ lā lo̍ nda̍ le̍kɔ̄ɔ̍ le̍nde̍, dōmā ni̍, lɛ̄mbɛ̄ ni̍, mɔ̍si̍l ni̍, mā yīī nda̍ ma̍ wūū nda̍ o̍ to̍ndo̍ lēyīŋ tūū bɛ̄ndū kōŋ ni᷄ŋ.

²²Ndu̍yɛ̍ mɛ̄ɛ̍ māsā bɛ̍ndōo̍ ō dīmi̍ yɛ̍ le̍nde̍ nda̍ tūūlu̍ to̍ndo̍ lēyīŋndo̍ ho̍ō ni̍. Mɛ̄ɛ̍ o̍ tu̍u̍lū te̍i̍ pūa̍a̍ chɔ̄ūwāa̍ wu̍u̍ pu̍a̍a̍ ya̍a̍wa̍ ha̍ā o̍ to̍ndo̍ lēyīŋ kōŋ ni᷄ŋ nda̍, mi̍ hāŋgu̍l lēyīŋ kōŋ ō dīū nda̍.

²³Pūa̍a̍ ya̍a̍wa̍ ha̍ā, Si̍a̍du̍lūā a̍ Mɛ̍si̍a̍kī a̍ Ābɛ̄ni̍kō, ā lo̍ ā yīyāā le̍nde̍ ma̍ wūū nda̍ o̍ yīŋndē to̍ndo̍le̍ bɛ̍ndūlē lēŋ ni᷄ŋ.

²⁴Māsa̍ bɛ̍ndōo̍ lo̍ tōfāa̍ o̍ yīŋndē lēŋ ni᷄ŋ, o̍ lē pīlɛ̍ ni᷄ŋ kpe̍, mi̍ māsā bɛ̍ndōo̍ cha᷄ŋ nya̍ mbo̍ dēŋī chōo̍ cho̍o̍, mbo̍ nyūnā lāŋgba̍ā ndūāā ka᷅lla̍ āā, “Ō cho̍ pūa̍a̍ ā ya̍a̍ le̍ na̍a̍ ŋ̄ yīi̍ mi̍ ŋ̄ wūū nda̍ o̍ yīŋnde̍ŋ ni᷄ŋ te̍?” Ma̍ chɛ̄l āā, “E̍ī fāllo̍, pūa̍a̍ nda̍ ya̍a̍ na̍a̍ ŋ̄ yīi̍ ni̍ mi̍ ŋ̄ wūū nda̍ o̍ yīŋnde̍ŋ ni᷄ŋ.”

²⁵Mi̍ māsā bɛ̍ndōo̍ dīmi̍ āā, “Kɛ̍ lā tōfa̍ wɔ̍, I̍ cho̍ pūa̍a̍ chɔ̄ɔ̍ ā hīɔ̍ɔ̍lu̍ ma̍ wā bālɔ̄ɔ̍ o̍ yīŋnde̍ŋ ni᷄ŋ. Ō pīlɛ̍ bɛ̍ɛ̍ cho̍ o̍ yi̍yāā le̍ kɛ̄lɛ̄ŋgāā mī nyɛ̄ yɔ̄nu᷄ŋ o̍ pi̍lɛ̍. Ndu̍yɛ̍ wānāā hi̍ɔ̍ɔ̍lu̍a̍a̍ ha̍ā, ō pīlɔ̄ɔ̍ chō nda̍ tɛ̍ɛ̄ŋ nu̍a̍ā ŋ̄ chā āā ki̍i̍la̍nɔ̍ mɛ̄lɛ̄ka̍a̍ ni̍.”

²⁶O̍ ko̍ŋ kɔ̍ɔ̍lī, mi̍ Nābi̍u̍kānɛ̍ɛ̍sā o̍ sɔ̍ɔ̍ŋgūū o̍ to̍ndo̍ lēyīŋ tūū bɛ̄ndū kōŋ hɔ̄lndɔ̄, mbo̍ vēēlū chōo̍ cho̍o̍ kpe̍le̍ŋ āā, “Si̍ɛ̍du̍lā, Mɛ̍si̍a̍kī, a̍ Ābɛ̄ni̍kō, bu̍ɛ̍i̍yāa̍ Mɛ̄lɛ̄ka̍ Bɛ̄ndōo̍ Kpo̍u̍, lā fūla̍ mī lā hīŋ na̍nu᷄ŋ.” Ō lēpīlɛ̍ ni᷄ŋ kpe̍, mā fūlā o̍ yīŋndē le̍ŋ ni᷄ŋ ma̍ hūŋ.

²⁷O̍ ko̍ŋ, chɔ̍ŋ a̍ di̍si̍a̍a̍, a̍ māsāa̍ lākɔ̍lɛ̄i̍ya̍ a̍ māsāa̍ lāpātīa̍a̍, a̍ māsā bɛ̍ndōo̍ lāŋgba̍ā ndūāā ka᷅lla̍, ma̍ hu᷄ŋ bɔ̍ŋā pūa̍a̍ ha̍ā le̍ nda̍ tōfāa̍, mā sāālu̍ŋ māā pūa̍a̍ ha̍ā, nyɛ̄ o̍ nyɛ̄ yɔ̄nu̍ŋ a̍ dīāllūŋ nda᷄ŋ o̍ yīŋnde̍ŋ nde᷅ŋ ni᷄ŋ te̍. Yīīŋnde̍ŋ bɛ̍ɛ̍ le̍ ŋu̍e̍ o̍ pi̍lɛ̍ o̍ lēbōl tē, kɛ̄lɛ̄ŋgāā mī dōma̍ ndɔ̍ ŋu̍ɛ̄. Nda̍ kpo̍u̍, ō pīlɛ̍ bɛ̍ɛ̍ chūŋ īku᷄m ve̍ le̍kɔ̍ɔ̍ le̍.

²⁸Mi̍ Nābi̍u̍kānɛ̍ɛ̍sā di̍mī āā, “I̍ sa̍ŋga̍la̍ Mɛ̄lɛ̄ka̍, o̍ yɔ̄ŋgu̍ ki̍i̍la̍nɔ̍ ndɔ̄ɔ̍ le̍ bu̍ɛ̍i̍yāā ndūa̍a̍ ya̍a̍wa̍a̍ dɔ̍ū tīīnda᷄ŋ ndāa̍ o̍ ndu̍ ni᷄ŋ nda̍ bāŋāa̍ wo̍. Ma̍ kɛ̄ɛ̄ sāwa̍ ya̍ I̍ dɔ̍ū wo̍, ma̍ dīmī māā ā sɔ̄la̍ bɛ̍ɛ̍ pi̍ɔ̍mndo̍, kɛ̍ ā so̍o̍lūū mɛ̄lɛ̄ka̍ o̍ mɛ̄lɛ̄ka̍ chēle̍ŋ te̍, mɛ̄ɛ̍ Mɛ̄lɛ̄ka̍ ndāa̍.

²⁹“Le̍la̍ŋ sāwa̍ ya̍ I̍ dɔ̍ū wo̍, ndu̍ cho̍ ho̍ō ni̍. Wānā o̍ wāna̍ cho̍ o̍ māsāle̍ nīle̍ŋ bɛ̄ŋgu̍, ō wa̍ le̍lɛ᷅ŋ o̍ lēlɛ᷄ŋ ō wa̍ le̍ka̍a̍ o̍ lēkāa̍, ō wa̍ wa̍nā ma̍ŋgālāā īsɔ̄ɔ̍ che᷅le̍ŋ, tē a̍ di̍mi̍ dīōmndē wɔ̄ɔ̍ŋnde̍ŋ a̍ Mɛ̄lɛ̄ka̍ Si̍ɛ̍du̍lā, a̍ Mi̍si̍a̍kī, a̍ Ābɛ̄ni̍kō a̍ pi̍ɛ̍ī yo̍ pɛ̍, tōsāa̍ ya̍ I̍ to̍sā ni̍ mī pūa̍a̍ nīa̍a̍ ā kīli̍ ki̍li̍ nu̍m ve̍e̍ ve̍e̍. O̍ ko̍ŋ kɔ̍ɔ̍lī, mī to̍sa̍ mī chīɛ̄īlā nūmnda̍ŋ lā sīmnu᷄ŋ fo̍ndō fōndo̍la̍ŋ. Kāni̍, mɛ̄lɛ̄ka̍ o̍ mɛ̄lɛ̄ka̍ nɔ̍ kpa̍a̍yā wa̍ā nu̍a̍ā mbō bāŋa̍ wānā le̍, mɛ̄ɛ̍ Mɛ̄lɛ̄ka̍ pūa̍a̍ ha̍ā.”

³⁰O̍ ko̍ŋ kɔ̍ɔ̍lī, mi̍ māsā bɛ̍ndōo̍ ō chɔ̄ɔ̄lū pūa̍a̍ ya̍a̍wa̍ ha̍ā hēēlū o̍ wa̍lta̍ ndāla̍ŋ ni᷄ŋ o̍ būŋgāŋ yɛ̍ yi̍ɔ̍ɔ̍ŋ ni᷄ŋ o̍ lɛ̄ŋndē Ba̍bi̍lɔ̄ŋnde̍ŋ ni᷄ŋ.