Read Southern Kisi Da̍a̍ni̍ɛ̍ɛ̄ 4 Bible Online

Da̍a̍ni̍ɛ̍ɛ̄ 4 - Southern Kisi bible

Da̍a̍ni̍ɛ̍ɛ̄ 4

¹Ō wa̍ a̍ te̍le̍ŋ pi᷅lɛ̍, mi̍ Nābi̍u̍kānɛ̍ɛ̍sā o̍ yɔ̍ŋgū yōōŋgōo̍ ho̍ō nāa̍ wāŋnda̍ chūā o̍ chi̍e̍ēŋndo̍ chōo̍ kpo̍u̍, wāŋnda̍ lēkāa̍ o̍ lēkāa̍, a̍ lēlɛ̄ŋ o̍ lēlɛ̄ŋ, a̍ īsɔ̄ɔ̍ o̍ īsɔ̄ɔ̍ ma̍ŋgālāā. Mbo̍ dīmī āā, “I̍ yi̍l nya̍, I̍ yi̍l nya̍ lāpi̍.

²I̍ cho̍ a̍ kɔ̄l kɛ̄ndɛ̄ le̍ mī I̍ chɔ̍m nya̍ sɔ̄ɔ̍ŋ kpālūŋ a̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndūŋ Mɛ̄lɛ̄ka̍ Bɛ̄ndōo̍ Kpo̍u̍ ō tōsa̍l la̍ wo̍ŋ.

³Mɛ̄lɛ̄ka̍ kpālōla̍ ndɔ̄la̍ŋ, lā chō kpālōla̍ bɛ̍ndū. Ndu̍yɛ̍, kɔ̄ndɔ̄fi̍ltā ndɔ̄la̍ŋ lā chō kɔ̄ndɔ̄fi̍ltā kpāāyā bɛ̍ndū. Kpāāya̍ ndɔ̍ lēmāsāa̍ ō nɔ̍ la̍mɛ̍ɛ̍lu̍ le̍, ō chō le̍ fɛ̍ɛ̍ŋ a̍ fɛ̍ɛ̍ŋ. Māsāle̍ ndɔ̄le̍ŋ lē chō le̍ fɛ̍ɛ̍ŋ a̍ fɛ̍ɛ̍ŋ.

⁴“I̍ wa̍ŋnu̍ŋ o̍ chīɛ̄ī ni̍ lēmāsāa̍ ni᷄ŋ a̍ kɔ̄l nyūlū, ndu̍yɛ̍ nyɛ̄ o̍ nyɛ̄ ve̍ ya̍ lēpɛ̄ŋ te̍.

⁵Ō wa̍ īchɔ̄l pīlɛ̍, mi̍ I̍ sɔ᷅l lūa̍a̍ŋ. Lu̍a̍a̍ŋ ma᷅ŋ mi̍ sīōōŋīī bɛ̄ndūe̍i̍ bīī ya̍ ta̍u̍ a̍ ma̍ŋ. I̍ wa̍ īhīni̍ o̍ kpēlē, mī I̍ chānu᷄ŋ nyɔ̍ɔ̍ o̍ hɔ̄l. Wānā a̍a̍ cha᷅ ko̍ bɛ̍ɛ̍ āā sūɛ̍i̍ wa̍ā chi̍e̍ēŋ ni̍. Nyɛ̄ ya̍ I̍ wa̍ ho̍ō chɔ̄ŋnɔ᷄ŋndo̍ o̍ hɔ̄l lo̍, mi̍ sīōōŋīī bɛ̄ndū bɛ̍ndūe̍i̍ I̍ bīī ya̍.

⁶Le̍ sa̍bōo̍ ho̍ō, mi̍ I̍ yɔ᷅ŋ dīōmnde̍ŋ māā ā chūū ya̍ wa̍nāa̍ kɔ̄l kālu̍a̍a̍ Ba̍bi̍lɔ̄ŋ kpo̍u̍, le̍ mā hu᷄ŋ chɔ᷅m ya̍ tɛ̄ɛ̄sīāā lu̍a̍a̍ŋ ma᷅ŋ.

⁷O̍ ko̍ŋ, wānāā māŋgālāa̍ ni̍, a̍ wānāā vīāmāā lāyāwāa̍, a̍ wānāā ŋ̄wāŋ vīlɛ̍i̍ya̍, a̍ wānāā kɔ̄l kālu̍a̍a̍[2] pɛ̍ɛ̍ku̍ a̍ lōo̍ŋ o̍kɔ̄ɔ̄ wa̍, nda̍ kpo̍u̍ ma̍ hūŋ. Mɛ̄ɛ̍ nda̍ hīŋ, mi̍ I̍ chɔ᷅m nda̍ lɔ̄mā ya̍ I̍ sɔ̍lla̍ŋ. Kɛ̍ ā nɔ̄la̍ mā chɔ᷄m ya̍ tɛ̄ɛ̄sīāā lūa̍ŋ māŋ te̍.

⁸O̍ mɛ̄ɛ̄lu̍la̍ŋ, mi̍ Da̍a̍ni̍ɛ̍ɛ̄ hu᷅ŋ, ō mɛ̄lɛ̄ka̍a̍ dīāndāa̍ nyi̍nā ndāa̍ chō kɔ̄ɔ̄lī wo̍. Da̍a̍ni̍ɛ̍ɛ̄ ko̍ŋ ndu̍ nɔ̍ vɛ̄lɛ̄ dīōla̍ŋ ni̍ āā Bɛ̄tīsi̍a̍sā, mɛ̄lɛ̄ka̍ nūu̍ dīōlā ndɔ̄la̍ŋ la̍ cho̍ la̍ŋ ni̍. Mɛ̄ɛ̍ o̍ hi᷅ŋ, mi̍ chɔ᷅m ndu̍ lɔ̄mā ya̍ I̍ sɔ̍l la̍ŋ.

⁹Mi̍ di̍mūl ndu̍ ma̍a̍, Bɛ̄tīsi̍a̍sā, māsa̍ wānāā māŋgālāa̍, I̍ si̍nā māā mɛ̄lɛ̄ka̍ā dīāndāa̍, nyi̍nā ndāa̍ chō nu̍m kɔ̄ɔ̄lī. Ndu̍yɛ̍, I̍ si̍nā māā īsɔ̄ɔ̍ o̍ īsɔ̄ɔ̍ kɔ̄ndɔ̄fi̍li̍ I̍ cho̍ i̍ ka̍lā ka̍lā mā bu̍mba̍ ndi̍ sīnā le̍. Le̍la̍ŋ ya̍ŋ ni᷅la̍ŋ o̍ lɔ̄mā ya̍ I̍ sɔ̍l la̍ŋ, mā chɔ᷄m ya̍ tɛ̄ɛ̄sīāā ndɔ̄ɔ̍.

¹⁰“I̍ wa̍ īhīni̍ mi̍ I̍ sɔ᷅l lūa̍a̍ŋ. O̍ lɔ̄mā nī ma̍ sɔ̍la᷄ŋ ni᷄ŋ, mi̍ I̍ cha᷅ yɔ̄m tɔ̍ɔ̍ma̍ bɛ̄ndōo̍ īsīsi̍ o̍ chi̍e̍ēŋndo̍ tɛ̍ɛ̄ŋ. Yɔ̄mndo̍ ho̍ō bānde̍i̍ pīla̍ ndu̍ o̍o̍ ba̍ndu̍ ni̍.

¹¹Yɔ̄mndo̍ ho̍ō, mbo̍ lō bānde̍i̍ ha̍a̍a̍, mbo̍ fūūlūū o̍ ha̍la̍a̍ di̍. Wānā a̍a̍ lo᷅ bā o̍ bā fe̍e̍ o̍ chi̍e̍ēŋndo̍ chōo̍ mā chē ndu̍. Ō wa̍ yɔ̄m tɔ̍ɔ̍ma̍ bɛ̍ndu̍.

¹²Yɔ̄mndo̍ ho̍ō, ō wa̍ ō pūīyāā nyɛ̄ kɛ̄ndɛ̄ yɔ̍kūŋ. Ndu̍yɛ̍, ō wa̍ ō kūāmāā ta̍u̍ ta̍u̍. Nyɛ̄ dīa̍a̍ wānu̍ŋ ndo̍ŋ ta̍u̍ ta̍u̍. Vīsīāā yōndūa̍a̍ kpo̍u̍ hūnɔ̄ɔ̍ hīni̍la̍ŋ o̍ wūndu̍ma̍ yɔ̄mndo̍ ho̍ō bɛ̄ŋgu̍. Ndu̍yɛ̍, o̍ lɛ̄ūwūŋ yɔ̄mndo̍ ho̍ō chōo̍ yōūwa̍ nda̍ a̍a̍ ta̍ŋgūl wa̍a̍ŋīī ndɛ̄i̍ ni̍. Wāŋnda̍ chi̍e̍ēŋndo̍ ho̍ō kpo̍u̍, a̍ nyɛ̄ o̍ nyɛ̄ yōōmāā chēle̍ŋ o̍ yɔ̄mndo̍ ho̍ō nda̍ a̍a̍ ku̍ā le̍ nyɛ̄ di̍a̍a̍ ni̍.

¹³“O̍ lɔ̄mā nīma̍ sɔ̍la᷄ŋ ma᷅ŋ ni᷄ŋ, mi̍ cha᷅ ki̍i̍la̍nɔ̍ mɛ̍ŋgɛ̄lāa̍ Mɛ̄lɛ̄ka̍a̍ ō dīāndāa̍ pīlɔ̍ɔ̍ chɔ̄nɔ᷄ŋndo̍ chōo̍ cho̍o̍ mbo̍ wā tōlɔ̄ɔ̍.

¹⁴Mi̍ ki̍i̍la̍nɔ̍ɔ̍ ho̍ō ō yōndā chōo̍ cho̍o̍ kpe̍le̍ŋ āā, Lā kīo̍ŋ yɔ᷅mndo̍ ho̍ō mbō de̍l. Ndu̍yɛ̍ mī lā kīli̍ ki̍li̍ lɛ̄ūwūŋ ndɔ̍ŋ kpo̍u̍. O̍ ko̍ŋ kɔ̍ɔ̍lī, mī lā sōōndi̍a̍a̍ pēi̍ ndūɛ̍i̍ kpo̍u̍ mī ī chīɛ̄ɛ̄lu̍ŋ, mī kɔ̄mndē ndɔ̄le̍ŋ lē sɛ̄ŋi̍ŋ. Vīsīa̍a̍ hu᷅ŋ hi̍ni̍la̍ŋ o̍ yɔ̄mndo̍ ho̍ō bɛ̄ŋgu̍ wa̍, mī lā tōsa̍ mā pīōū. Yōūwāa̍ hu᷅ŋ o̍ yɔ̄m kōŋ nda̍ bɛ̍ɛ̍ mī lā tōsa̍ mā pīōū.

¹⁵Kɛ̍ mī lā ma᷄l chīyīī yɔ̄mndo̍ ho̍ō a̍ pūūndu̍ŋ ndɔ᷄ŋ ŋ̄ lūɛ̄īyāā lɛ̄ŋ le̍nde̍ a̍ bīl pūīyāa̍ ndi̍ ō bālāā. Ndu̍yɛ̍ mī lā tōōsi̍a̍a̍ nyɔ̄ɔ̍ŋ māā ŋ̄do̍lu̍ŋ a̍ chīli̍ŋi̍i̍ būlɔ̍ŋsīi̍ye̍, le̍ chīyīī yɔ̄mndo̍ ho̍ō dɔ̄wɔ̄ɔ̍ o̍ kpi̍ɔ̍ɔ̍. “Wāŋndo̍ ho̍ō, ō chō hūnɔ̄ɔ̄ wa̍ ke̍lāa̍ o̍ mɔ᷄mndo̍ bɛ̄ŋgu̍ yo̍ndōo̍ ni᷄ŋ māā vīsī.

¹⁶Wāŋndo̍ ho̍ō le̍ wɔ̄sīla̍ŋ lā ŋɔ᷄mmɛ̍ū, yīya̍ŋ īwāna̍ chi̍e̍e̍ya̍a̍ chō ndu̍ fūla᷄ŋ ni᷄ŋ, mī yīya̍ŋ īvīsīya̍a̍ ō mīīŋgu̍ ndu̍ ni᷄ŋ.

¹⁷Nyɛ̄ na̍a̍ ki̍i̍la̍a̍ mɛ̍ŋgɛ̄lāa̍ Mɛ̄lɛ̄ka̍a̍ ŋ̄ dīmi̍ wo̍ ndu̍ cho̍ ho̍ō ni̍. Na̍a̍ ki̍i̍la̍a̍ di̍a̍ndāa̍ Mɛ̄lɛ̄ka̍a̍ na̍a̍ ŋ̍ di̍mi̍ yōōŋgōo̍ ho̍ō ni̍. Ndu̍yɛ̍, le̍ sa̍bū he̍ī chō yɔ̄nɔ᷄ŋ a̍ wāŋndo̍ ho̍ō wo̍ cho̍ ni̍ māā, le̍ mī wāŋnda̍ o̍ chi̍e̍ēŋndo̍ chōo̍ kpo̍u̍ a̍ si̍na̍ māā Mɛ̄lɛ̄ka̍ Bɛ̄ndōo̍ Kpo̍u̍ ndu̍ nɔ̍ kpāāyāa̍ lɛ̄ŋnde̍ chōo̍ o̍ chi̍e̍ēŋndo̍ chōo̍ kpo̍u̍ ni̍. Māā wāna̍ o̍ ye̍e̍mā le̍ sīīŋgūūwo̍ māsā wo̍, ndu̍ o̍ sīīŋgūū ma̍sā ni̍. A̍ yɔ᷄ŋ bɛ̍ɛ̍ mī wāŋndo̍ ō wa̍ wāna̍ bālā fo̍ndō fu̍u̍, Mɛ̄lɛ̄ka̍ ndu̍ nɔ̍lā mbō sīīŋgu̍u̍ ndu̍ māsā bɛ̍ndōo̍.

¹⁸“Mi̍ hi̍a̍ū lāchī a̍ sūɛ̍i̍ nāa̍ Da̍a̍ni̍ɛ̍ɛ̄ chu̍a̍ ma̍a̍, le̍la̍ŋ, lɔ̄mā ya̍ sɔ̍l la̍ŋ ma̍ŋ ma̍ cho̍ ma᷅ŋ ni̍. Wānāā kɔ̄l kālu̍a̍a̍ o̍ lɛ̄ŋnde̍ŋ nde᷅ŋ ni᷄ŋ kpo̍u̍ a̍ tɛ̍ɛ̍sīāā sɔ̄ɔ̍ŋ vi̍a̍ŋna᷄ŋndo̍ŋ nda̍ kpo̍u̍, ā tīu̍ ba̍ mā tɛ̄ɛ̄si̍a̍l la̍ ma̍ŋ te̍. Kɛ̍ nūm I̍ si̍nā māā ā nɔ̄lā mā tɛ̍ɛ̍si̍a̍l la̍ ma̍ŋ, kāni̍ mɛ̄lɛ̄ka̍ā dīāndāa̍ nyi̍na̍ ndāa̍ cho̍ nu̍m kɔ̄ɔ̄lī. Le̍la̍ŋ I̍ ye̍e̍ma̍ mā tɛ̍ɛ̍si̍a̍l la̍ lūa̍a̍ŋ ma᷅ŋ.

¹⁹“Mɛ̄ɛ̍ ya̍ I̍ chɔ̍m Da̍a̍ni̍ɛ̍ɛ̄ ō nda̍ vēēlū vɛ̍lɛ̄ āā Bɛ̄tīsi̍a̍sā wo̍ lūa̍a̍ŋ ma᷅ŋ, mi̍ sīōōŋnde̍ bīī ndu̍ le̍ mɛ̄ɛ̍ ndu̍ o̍o̍ tɛ̍ɛ̍sīāā lu̍a̍a̍ŋ ma᷅ŋ yɛ̍. Kɛ̍ mi̍ di̍mūl ndu̍ māā sīōōŋīī bi̍ī ndu̍ a̍ lu̍a̍a̍ŋ ma᷅ŋ te̍, kɛ̄lɛ̄ŋgāā tɛ̄ɛ̄sīāā ndɔ̄ɔ̍ le̍.” “O̍ ko̍ŋ, mi̍ Da̍a̍ni̍ɛ̍ɛ̄ mu̍li᷄ŋ mbo̍ dīmūl la̍ māā, fāllo̍, yɔ̄m ŋ̄ chē ho̍ō o̍ lūa̍a̍ŋ ni᷄ŋ ndo̍, sūɛ̍i̍ he̍ī ndi̍ i̍i̍ bɛ̍ndā bɔ̍ɔ̍ mī ndi̍ i̍i̍ yɔ̍nu̍ŋ a̍ ya̍a̍mɔ̍ɔ̍wa̍a̍ nu̍mnda̍.

²⁰Yɔ̄m ŋ̄ chē ho̍ō mbo̍ bāndū, mbo̍ hēlnu̍ŋ chōo̍ cho̍o̍ pɔ̍ pɔ̍ o̍ ha̍la̍, wānā a̍a̍ lo᷅ bā o̍ bā o̍ chi̍e̍ēŋndo̍ chōo̍ mā chē ndu̍, ndu̍yɛ̍ mbo̍ sīmnu̍ŋ yɔ᷅m tɔ̍ɔ̍ma̍ bɛ̄ndū wo̍, nu̍m cho̍ yɔ̄m kōŋ ni̍ fāllo̍. Yɔ̄mndo̍ ho̍ō ma̍ chā ndu̍ ō pūīyāā nyɛ̄ kɛ̄ndɛ̄ yu̍kɔ̄ŋ, mbo̍ wā ō kūāmāā ta̍u̍ ta̍u̍, mi̍ nyɛ̄ dīa̍a̍ ō wānu̍ŋ ndo̍ŋ ta̍u̍ ta̍u̍ le̍ wānā o̍ wānā, mī vīsīāā yōndūa̍a̍ kpo̍u̍ ā hūŋ hi̍ni̍la̍ŋ o̍ wūndu̍ma̍ ndūa̍ŋ bɛ̄ŋgu̍, o̍ ko̍ŋ kɔ̍ɔ̍lī, mī yōūwa̍ ā tāŋgūl wa̍a̍ŋīī ndɛ̄i̍ o̍ lɛ̄ūwūŋ ndɔ᷄ŋ. Mɛ̄ɛ̍ ŋ̄ chē nu̍a̍ā mi̍ yɔ̄mndo̍ ho̍ō bāndū mbo̍ fūūlūū o̍ ha̍la̍ di̍, mbo̍ sīmnu̍ŋ yɔ᷅m tɔ̍ɔ̍ma̍ bɛ̄ndū yɛ̍, le̍nde̍ ŋ̄ sīmnu᷄ŋ wa᷅na̍ kpāāyā ni̍, ma̍ sīmnu̍ŋ wa᷅na̍ tɔ̍ɔ̍ bɛ̍ndū, mi̍ kpāāyā nu̍m lēmāsāa̍ ō kūūmbu᷄ŋ chi̍e̍ēŋndo̍ chōo̍ kpo̍u̍.

²¹

²²

²³O̍ ko̍ŋ kɔ̍ɔ̍lī, ma̍ cha᷅ ki̍i̍la̍nɔ̍ mɛ̍ŋgɛ̄lāa̍ Mɛ̄lɛ̄ka̍a̍ ō dīāndāa̍ pīlɔ̍ɔ̍ chɔ̄nɔ᷄ŋndo̍ chōo̍ cho̍o̍ mbo̍ wā tōlɔ̄ɔ̍. Mbo̍ wā dīmīo̍o̍ māā, lā kīo̍ŋ yɔ᷅mndo̍ ho̍ō mbō de̍l mī lā tɛ̄ɛ̄mbu̍u̍ ndu̍. Kɛ̍ mī lā ma᷄l chīyīī yɔ̄mndo̍ ho̍ō a̍ pūūndu᷅ŋ ndɔ᷄ŋ ŋ̄ lūɛ̄īyāā lɛ̄ŋ le̍nde̍ a̍ bīl pūīyāa̍ ndi̍ ō bālāā. Ndu̍yɛ̍ mī lā tōōsi̍a̍a̍ nyɔ̄ɔ̍ŋ māā ŋ̄do̍lu̍ŋ a̍ chīli̍ŋi̍i̍ būlɔ̍ŋsīi̍ye̍, le̍ chīyīī yɔ̄mndo̍ ho̍ō dɔ̄wɔ̄ɔ̍ o̍ kpi̍ɔ̍ɔ̍. Wāŋndo̍ ho̍ō, ō chō hūnɔ̄ɔ̄ wa̍ ke̍lāa̍ o̍ mɔ᷄mndo̍ bɛ̄ŋgu̍ yo̍ndōo̍ ni᷄ŋ māā vīsī. Wāŋndo̍ ho̍ō le̍ wɔ̄sīla̍ŋ lā ŋɔ᷄mmɛ̍ū, yīya̍ŋ īwāna̍ chi̍e̍e̍ya̍a̍ chō ndu̍ fūla᷄ŋ ni᷄ŋ, mī yīya̍ŋ īvīsīya̍a̍ ō mīīŋgu̍ ndu̍ ni᷄ŋ.

²⁴Nyɛ̄ o̍ nyɛ̄ ŋ̄ chē o̍ lɔ̄mā sɔ̄la᷄ŋ ma᷅ŋ ni᷄ŋ tɛ̄ɛ̄sīāā ndɔ̄ɔ̍ cho̍ ho̍ō ni̍. Nyɛ̄ Mɛ̄lɛ̄ka̍ Bɛ̄ndōo̍ Kpo̍u̍ o̍ di̍mi̍ māā ō chō hūnɔ̄ɔ̄ yɔ̄nɔ᷄ŋ a̍ nūm ndo̍, ndu̍ ŋ̄ chē ko̍ŋ ni̍ māsānɔ̄ɔ̍.

²⁵Ā chō nu̍m hūnɔ̄ɔ̄ sōlī wāŋndā chīe̍e̍ya̍ tɛ̍ɛ̄ŋ mā sɔ̍nda̍ŋ yōndōo̍ ni᷄ŋ, mī lā kɔ̍ wa̍ lātūlu̍ nya̍ vīsīāā yōndūa̍a̍, mī mɔ᷄mndo̍ ō wa̍ nu̍m chūchɔ̄ɔ̍ chōo̍. Le̍ wɔ̄sīla̍ŋ lā ŋɔ᷄mmɛ̍ū, ā chō wā bīllo̍ dīo̍o̍ māā nāū. Tē he̍ī ī hīōū pɛ̍, o̍ ko̍ŋ ŋ̄ chō sīnā ni̍ māā Mɛ̄lɛ̄ka̍ Bɛ̄ndōo̍ Kpo̍u̍, ndu̍ cho̍ māsɛ̄i̍ o̍ chi̍e̍ēŋndo̍ chōo̍ kpe̍de̍ bo᷅lle̍ŋ ni̍. Ndu̍yɛ̍ māā wānā o̍ wānā o̍ ye̍e̍ma̍ le̍ māsāle̍ŋ kīo̍o̍ pɛ̍, ndu̍ o̍ ke᷅ ni̍.

²⁶Tūēīyɔ̄ɔ̄ ŋ̄ tūēī mi̍ ki̍i̍la̍nɔ̍ Mɛ̄lɛ̄ka̍a̍ ō dīmī māā ā ma᷄l chīyīī yɔ᷅mndo̍ ho̍ō o̍ bā ndɔ̄ɔ̍ chōo̍ le̍nde̍ wo̍, tɛ̄ɛ̄sīāā ndɔ̄ɔ̍ cho̍ ni̍ māā tē sɔ̄ɔ̍ŋ mu᷅ŋ kpo̍u̍ ŋ̍ ke̍e̍ku̍ nu̍m chōo̍ pɛ̍, mā hīŋ o̍ nūm pi̍la̍ ni᷄ŋ mā si̍na̍ māā Mɛ̄lɛ̄ka̍ cho̍ chi̍e̍ēŋndo̍ ho̍ō kpo̍u̍ bo᷅lle̍ŋ ni̍, māsāle̍ nu̍m nde̍ŋ Mɛ̄lɛ̄ka̍ chō nu̍m nde̍ŋ hūnɔ̄ɔ̄ mīīŋgū o̍ bā.

²⁷Le̍la̍ŋ yāndi̍i̍ fāllo̍, chu̍a̍ sīlā ya̍ I̍ cho̍ nu̍m ho̍ō wo̍. Ma̍l yɔ᷅ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ ŋ̄ chō tōsāa̍ ma̍ to̍sa̍ nyɛ̍ bɛ̍nda̍ le̍ tōsāa̍ wo̍. Pɛ̍ŋgi̍ dɛ̍nɛ̍ wɔ̄ɔ̍ŋ nūm o̍o̍ to̍sā pa̍a̍ndū wo̍ tōsāa̍, mā ka̍ndu̍ wa̍nāā tāmbɛ̍i̍ya̍ nyīɛ̍ɛ̍ye̍ tūīīnɔ᷄ŋndo̍. Tē ā to̍sa̍ he̍ī pɛ̍, ā chō hīōūwɔ̄ɔ̄ lāchī a̍ dɛ̍nɛ̍ kɛ̍ndɔ̄ɔ̍ sɔ̄lāa̍.

²⁸“Ndu̍yɛ̍, nyɛ̄ o̍ nyɛ̄ Da̍a̍ni̍ɛ̍ɛ̄ o̍ di̍mi̍ māā ō chō yɔ̄nɔ̍ŋ a̍ ya̍ Ma̍sāa̍ Nābi̍u̍kānɛ̍ɛ̍sā, mi̍ ī yɔ̄nu̍ŋ le̍nde̍.

²⁹Chɔ̍ŋ a̍ te̍le̍ŋ Da̍a̍ni̍ɛ̍ɛ̄ o̍ tɛ̍ɛ̍si̍a̍a̍ lūa̍a̍ŋ māŋ ndo̍, wɔ̄sīo̍o̍ ō pīlɛ̍ ko̍ni̍ hi̍o̍ū ni̍, mi̍ sūɛ̍i̍ he̍ī yɔ̄nu᷄ŋ ya̍. Pāa̍le̍ pi᷅lɛ̍, I̍ wa̍ bālɔ̄ɔ̍ o̍ chīɛ̄īyo̍ chōo̍ o̍ bɛ̍ɛ̄ chīɛ̄ī ni̍ lēmāsāa̍ Ba̍bi̍lɔ̄ŋ,

³⁰mi̍ di̍mī a̍a̍, ‘To̍fa̍ wɔ̍ mɛ̄ɛ̍ Ba̍bi̍lɔ̄ŋ o̍ cho̍ chi̍e̍e̍ bɛ̍ndū yɛ̍ se᷅, chi̍e̍e̍ nī lēmāsā bɛ̍ndū ya̍ I̍ ta̍ŋgu̍l a̍ kpāāya̍ nī bɛ̍ndōo̍ wo̍. Chi̍o̍o̍ ho̍ō chɔ᷄m māā I̍ cho̍ wāna̍ tɔ̍ɔ̍ bɛ̍ndū.’ ”

³¹“Lɔ̍ɔ̍pa̍ mi̍ chi̍ī dīōmnda̍ŋ nda᷅ŋ dīmi̍, mi̍ tu̍ɛ̍ī mi̍ dīōmndo̍ fūla̍ o̍ ha̍lāa̍ ni᷄ŋ mbo̍ dīmī māā, māsāa̍ Nābi̍u̍kānɛ̍ɛ̍sā, ya̍ŋ ni᷅la̍ŋ mā tūēī nyɛ̄ ya̍ cho̍ dīmi̍ wo̍. Kpāāyā nu̍m lēmāsāa̍ ō hɛ̄lu̍ŋ nu̍m hāū.

³²Chɔ̍ŋ a̍ hāū, ā chō nu̍m sōlī wāŋndā chi̍e̍e̍ya̍ tɛ̍ɛ̄ŋ, mā sɔ̍nda̍ŋ yōndōo̍ ni᷄ŋ, nya̍ vīsīāā yōndūa̍a̍ mī lā kɔ̍ wa᷅ lo̍ŋ la̍tu̍lu̍. Ā chō wā bīllo̍ dīo̍o̍ māā nāū. Le̍ wɔ̄sīla̍ŋ lā ŋɔ᷄mmɛ̍ū he̍ī chō nu̍m wā yɔ̄nɔ᷄ŋndo̍ ni̍. Tē he̍ī ī hīōū pɛ̍, o̍ ko̍ŋ ŋ̄ chō sīnā ni̍ māā Mɛ̄lɛ̄ka̍ Bɛ̄ndōo̍ Kpo̍u̍, ndu̍ cho̍ māsɛ̄i̍ o̍ chi̍e̍ēŋndo̍ chōo̍ kpe̍de̍ bo᷅lle̍ŋ ni̍. Ndu̍yɛ̍ māā wānā o̍ wānā o̍ ye̍e̍ma̍ māsāle̍ŋ kīo̍o̍ pɛ̍, ndu̍ o̍ ke᷅ ni̍.”

³³O̍ lē pīlɛ̍ ni᷄ŋ kpe̍, mi̍ nyɛ̄ o̍ nyɛ̄ Da̍a̍ni̍ɛ̍ɛ̄ di̍mi̍ a̍ ya̍ o̍kɔ̄ɔ̄ ō yɔ̄nu᷄ŋ. Ma̍ tūāū ya̍ wāŋndā chi̍e̍e̍ya̍ tɛ̍ɛ̄ŋ mi̍ sɔ̍nda᷄ŋ yōndōo̍ ni᷄ŋ, mi̍ kɔ̍ wa᷅ bīllo̍ dīo̍o̍ māā nāū, mī li̍wā o̍ mɔ᷄mndo̍ bɛ̄ŋgu̍. Mi̍ yi̍mbū, mi̍ yīīŋnde̍ bāndū ya̍ o̍ lēbōl wānā a̍a̍ che᷅ pɛ̍ āā vīsīo̍o̍ ni̍. Mi̍ yɛ̍mbɔ̍ŋ ŋ̄ bāndu̍ ya̍ sa̍a̍kāā nu̍a̍ā ŋ̄ chā āā yɛ̍mbɔ̄ŋ kōwɔ̄ɔ̍ ni̍.

³⁴“Mɛ̄ɛ̍ wɔ̄sīlā ŋɔ᷄mmɛ̍ūla̍ŋ lā hīōū, mi̍ pi̍ɛ̍ī Mɛ̄lɛ̄ka̍, mi̍ mi̍i̍ŋgū o̍ kɔ̄l kālu̍ ni̍ īwāna̍ chi̍e̍e̍ya̍a̍ ni᷄ŋ. Mi̍ sa̍ŋgālā Mɛ̄lɛ̄ka̍ Bɛ̄ndōo̍ Kpo̍u̍, o̍ chō yōōmū le̍ fɛ̍ɛ̍ŋ a̍ fɛ̍ɛ̍ŋ ndo̍, mi̍ yɔ̍ŋgū bɛ̄ɛ̄le̍ŋ nāa̍ ndu̍ chu̍a̍. Mi̍ di̍mī ma̍a̍, kpāāyā nu̍m lēmāsāa̍ ō chō le̍ fɛ̍ɛ̍ŋ a̍ fɛ̍ɛ̍ŋ, ndu̍yɛ̍ māsāle̍ nu̍mnde̍ŋ lē nɔ̍ la̍mɛ̍ɛ̍lu̍ le̍. Ā chō wā māsā bɛ̍ndōo̍ ŋ̄wāŋndā chi̍e̍e̍ chōo̍ le̍ fɛ̍ɛ̍ŋ a̍ fɛ̍ɛ̍ŋ ku̍nɔ̍.

³⁵Wānā o̍ wānā cho̍ o̍ chi̍e̍ēŋndo̍ ho̍ō chōo̍, ā cho̍ nu̍m o̍ hɔ̄l nyɛ̄ o̍ nyɛ̄ le̍. Ki̍i̍la̍a̍ nu̍mnda̍ chōo̍ cho̍o̍ ni̍, wānāa̍ cho̍ o̍ chi̍e̍ēŋndo̍ chōo̍ wa̍ ni̍, nyɛ̄ ŋ̄ hɛ̍nāŋ le̍ tōsāa̍ a̍ nda̍ wo̍, ndu̍ ŋ̄ to̍sā ni̍. Wānā o̍ wānā nɔ̍lā mbō kūūna̍ nūm Mɛ̄lɛ̄ka̍ nyɛ̄ ŋ̄ hɛ̄na᷄ŋndo̍ tōsā le̍, kɛ̄lɛ̄ŋgāā mbō nyūna̍ nu̍m māā, vɛ᷅ he̍ī ndo̍ō tōsāa̍ le̍.

³⁶“Mɛ̄ɛ̍ ya̍ mi̍i̍ŋgu̍ o̍ kɔ̄l kālu̍ ni̍ īwāna̍ chi̍e̍e̍ya̍a̍ ni᷄ŋ, mi̍ Mɛ̄lɛ̄ka̍ mīŋgī ya̍ bɛ̄ɛ̄le̍ nīle̍ŋ, a̍ māsāle̍ nīle̍ŋ, a̍ tɔ̍ɔ̍ ni̍ ya̍ i̍i̍ nɔ̍ wo̍ o̍ bā. Mi̍ lāŋgba̍ā nīāā ka᷅lla̍ a̍ wānāā nīāā si̍lāa̍ ā mīīŋgū ya̍ wa̍llo̍ o̍ ba̍ mi̍ sɔ̍lā kpāāyāa̍ a̍ bɛ̄ɛ̄le̍ŋ mbo̍ hīāū māā pāāndū.

³⁷“Le̍ he̍ī, mi̍ ya̍ Nābi̍u̍kānɛ̍ɛ̍sā sa̍ŋga̍la̍ Mɛ̄lɛ̄ka̍ o̍ cho̍ māsā bɛ̍ndōo̍ chōo̍ cho̍o̍ wo̍, mi̍ hēēlū dīōlā ndɔ̄la̍ŋ te̍mā, mi̍ di̍mī māā nyɛ̄ o̍ nyɛ̄ Mɛ̄lɛ̄ka̍ to̍sa̍ o̍ nɛ̄ī sa̍kpo̍o̍ chōo̍ o̍ to̍sa̍ ndu̍ nī. Kūɛ̍ɛ̍la̍ ndɔ̄la̍ŋ kpe̍de̍ lā chō sa̍kpō. Ndu̍yɛ̍, wānā o̍ wānā he̍e̍lu̍ŋ pɛ̍ māā Mɛ̄lɛ̄ka̍ nɔ̄lā mbō tūsi̍ ndu̍ tōōlō.”