Read Southern Kisi Da̍a̍ni̍ɛ̍ɛ̄ 5 Bible Online

Da̍a̍ni̍ɛ̍ɛ̄ 5 - Southern Kisi bible

Da̍a̍ni̍ɛ̍ɛ̄ 5

¹Mɛ̄ɛ̍ Bɛ̄tīsi̍a̍sā si̍mnu᷄ŋ ma̍sā bɛ̍ndōo̍ Ba̍bi̍lɔ̄ŋ, wɔ̄sīlā ti᷄ŋ hīōūwɔ̄ɔ̍, mbo̍ vēēlū lāŋgba̍ā ka̍lāā tɔ̍ɔ̍wa̍ o̍ lɛ̄ŋnde̍ lēŋ ni᷄ŋ o̍ bɔ̄ŋa᷅ŋ dīāā nyɛ̄ dīāā bɛ̄ndōo̍. Lāŋgba̍ā kālāā o̍ ve̍e̍lu̍ wa̍ ā wa̍, wāa̍ ō pīlɛ̍.

²Mɛ̄ɛ̍ māsāa̍ Bɛ̄tīsi̍a̍sā o̍ wa̍ mūɛ̄īya̍ŋ kōlɔ̄ɔ̍, mi̍ mā bīī ndu̍, mbo̍ dīmūl bu̍ɛ̍i̍yāā ndūa̍a̍ māā ā kɔ̍ chu̍ū ndu̍ tāālāla̍ wa̍ lā tōōsīāā a̍ ko̍o̍līi̍yo̍ŋ a̍ ka̍ni᷄ŋ hu̍mbo᷄ŋ, mi̍ Nābi̍u̍kānɛ̍ɛ̍sā fi̍nyā ndɔ̄ o̍ chu̍a̍ o̍ chīɛ̍i̍ Mɛ̄lɛ̄ka̍a̍ ni᷄ŋ Chūlu̍sɛ̄lɛ̄m mbō hūŋ a̍ la̍ŋ nda̍ŋ, le̍ mā hu᷄ŋ ko᷅l mūɛ̄īya̍ŋ lēni᷄ŋ nda̍ lāŋgba̍ā ka̍lāā tɔ̍ɔ̍wa̍a̍ o̍ ve̍e̍lu̍ wa̍, a̍ lāāndāā ndūāā bɛ̍ndūa̍a̍, ndu̍yɛ̍ a̍ lāāndāā ndūāā pɔ̍mbūa̍a̍.

³O̍ ko̍ŋ, ma̍ hūŋ a̍ tāālāla̍ wa̍ lā tōōsīāā a̍ ko̍o̍līi̍yo̍ŋ a̍ ka̍ni̍ŋ hu̍mbo᷄ŋ nda̍ŋ, lā nda̍ chu̍a̍ o̍ chīɛ̍i̍ Mɛ̄lɛ̄ka̍a̍ ni᷄ŋ Chūlu̍sɛ̄lɛ̄m ma̍ hūŋ a̍ la̍ŋ nda̍ŋ. Mi̍ māsā bɛ̍ndōo̍ nda̍ lāŋgba̍ā ka̍lāā tɔ̍ɔ̍wa̍a̍ o̍ ve̍e̍lu̍ wa̍, a̍ lāāndāā ndūāā bɛ̍ndūa̍a̍ ndu̍yɛ̍, a̍ lāāndāā ndūāā pɔ̍mbūa̍a̍ ma̍ hu᷄ŋ ko᷅l mūɛ̄īya̍ŋ lēni᷄ŋ.

⁴Mɛ̄ɛ̍ nda̍ wa̍ mūɛ̄īya̍ŋ kōlɔ̄ɔ̍, ma̍ sāā mɛ̄lɛ̄ka̍ā ndāā yɛ̍ yi̍a̍a̍ sāŋgālāa̍, ō nda̍ tōōsi̍a̍a̍ a̍ ko̍o̍līi̍ye̍ wo̍, a̍ ō ka̍ni̍i̍ hu̍mbōo̍, a̍ ō chīli̍ŋi̍i̍ būlɔ᷄ŋsīi̍yo̍, a̍ ō īchīli̍ŋndo̍, a̍ ō yɔ̄mndo̍ ndu̍yɛ̍ a̍ ō nda̍ tōōsīa̍a̍ a̍ pōūta̍ŋ ndo̍.

⁵O̍ lēpīlɛ̍ ni᷄ŋ kpe̍, mi̍ māsā bɛ̍ndōo̍ chā mi̍ bā wāna̍ chi̍o̍o̍ chɔ̄mnu᷄ŋ o̍ chīyīī chīɛ̄īyo̍, o̍ chīɛ̄ī lēmāsāa̍ ni᷄ŋ nāa̍ la̍mbūi̍yo̍ ō wa̍ ō kɛ̄sīāā mbo̍ wā dīōndɔ̄ɔ̍ wa̍, mi̍ bāa̍ ho̍ō ō wā pōōnyīa̍a̍.

⁶Mɛ̄ɛ̍ māsā bɛ̍ndōo̍ chē nyɛ̍ wa̍ ho̍ō yɔ̄nɔ᷄ŋndo̍ wo̍, mi̍ sīōōŋnde̍ bīī ndu̍ mi̍ hɔ̄lla̍ māŋga̍ŋ ndu̍ be̍lu᷄ŋ. Dīāllo̍ŋ kpo̍u̍, mi̍ ŋ̄ wū ndu̍ pɔ̍lī pɔ̍lī, mi̍ wūla̍ŋ lā nyīīyā ndu̍ kpa᷅ kpā. Mī pēlo̍ŋ wū ndu̍ do̍o̍ŋ.

⁷O̍ ko̍ŋ, mbo̍ yɔ̄ŋ yōōŋgū chɔ̍ chɔ̍ɔ̍ le̍ mā kɔ̍ ve̍e̍lūl ndu̍ wānāā māŋgālāa̍, a̍ wānāa̍ vīāmāā lāyāwāa̍, a̍ wānāa̍ si̍nā a̍ lo̍o̍ŋ o̍kɔ̄ɔ̄ wa̍. Mɛ̄ɛ̍ nda̍ hīŋ, mbo̍ dīmūl nda̍ āā, “Wānā o̍ wānā si̍na̍ pɛ̍ nyɛ̍ cho̍ ho̍ō ō po̍o̍nyīa̍a̍ wo̍, mbō chɔ᷄m ya̍ tɛ̄ɛ̄sīāā ndɔ̄ɔ̍ pɛ̍, wānā ko̍ŋ, I̍ to̍sa̍ ā wōu̍ ndu̍ dōma̍ lēmāsā ba̍ā kālā bɛ̄ndōo̍,[3] ndu̍yɛ̍ mī I̍ to̍sa̍ mā wōu̍ ndu̍ yɔ̄lɔ̍ŋ ŋ̄ko̍o̍līi̍yo̍ŋ o̍ lābo̍lō, mbō sīmnu᷄ŋ wa̍nā ya̍a̍ ndɔ̄ɔ̍ o̍ kpāāyāa̍ ni᷄ŋ o̍ māsāle̍ nīle̍ŋ ni᷄ŋ.”

⁸O̍ ko̍ŋ, mi̍ wānāā ndūa̍a̍ kɔ̄l kālu̍a̍a̍ ha̍ā kpo̍u̍ a̍ hu̍ŋ si᷅m māsā bɛ̍ndōo̍ o̍ hɔ̄l. Kɛ̍, wāŋndo̍ ō pīlɛ̍ bɛ̍ɛ̍ ō sīna̍ po̍o̍nyi̍a̍a̍ ho̍ō pɛ̄ŋgu̍ le̍, kɛ̄lɛ̄ŋgāā ni᷅ŋ te̍ mbō chɔ᷄m māsā bɛ̍ndōo̍ tɛ̄ɛ̄sīāā ndɔ̄ɔ̍.

⁹Le̍ he̍ī, mi̍ sīōōŋnde̍ chɔ̄ɔ̄lū māsā bɛ̍ndōo̍ Bɛ̄tīsi̍a̍sā bīyɔ̄ɔ̄ ta̍u̍, mbo̍ hīāū māā pāāndū. Mi̍ hɔ̄lla̍ chɔ̄ɔ̄lū ndu̍ ītāmu̍ pɛ̍sɛ̄kɛ̍, pɛ̍sɛ̄kɛ̍. Lāŋgba̍ā ndūāā ka᷅lla̍ tɔ̍ɔ̍ wa̍ bɛ̍ɛ̍ ma̍ tāmbū kɔ̄l pɛ̍. Nda̍ a̍a̍ si̍nā nyɛ̄ o̍ nyɛ̄ nda̍ a̍a̍ to̍sā le̍.

¹⁰O̍ ko̍ŋ kɔ̍ɔ̍lī, mɛ̄ɛ̍ māsā bɛ̍ndōo̍ nda̍ lāŋgba̍ā ndūāā ka᷅lla̍ ā wā sūūki̍āŋndo̍ a̍ sūɛ̍i̍ he̍ī o̍kɔ̄ɔ̄, mi̍ kālā ndɔ̄ tu̍ɛ̍ī nda̍ dīōmnda̍ŋ, mbo̍ kūā o̍ chīɛ̄ī wāŋnda̍ wa̍ ko̍ŋ nyɛ̄ dīāā kɔ̄l kɛ̄ndɛ̄ bɛ̄ndōo̍ dīo̍o̍ a̍ mūɛ̄īya̍ŋ kōlɔ̄ɔ̍ wo̍. Mbo̍ kɔ̍ dīmūl māsāa̍ āā, “O̍o̍ māsā bɛ̍ndōo̍, vi̍o̍u̍ na̍a̍ chōo̍ kɛ̍ndi̍a̍a̍. Ta̍mbū kɔ̄l a̍ sūɛ̍i̍ he̍ī mī sīōōŋīī bīī nu̍m te̍.

¹¹Po̍ pi᷅lɛ̍ cho̍ o̍ lɛ̄ŋndē nūmnde̍ŋ ni᷄ŋ, mɛ̄lɛ̄ka̍ā nāā di̍a̍ndāa̍ nyi̍nā ndāa̍ ō chō ndu̍ kɔ̄ɔ̄lī. Bōōndi̍i̍ Nābu̍kānɛ̍ɛ̍sā, fi̍nyā nūm o̍ wa̍ māsā bɛ̍ndōo̍ ve̍, mbo̍ sāālu̍ŋ māā pōo̍ ho̍ō nɔ̄ kɔ̄l kālo̍o̍ ta̍u̍, a̍ tāāsi̍o̍o̍ a̍ sīnā pɛ̄ŋgo̍o̍, mɛ̄ɛ̍ mɛ̄lɛ̄ka̍ā nāa̍ ā chō yɛ̍. Le̍ he̍ī, mbo̍ hāndū ndu̍ wānāā māŋgālāa̍ kpo̍u̍ lāchī, a̍ wānāā vīāmāā lāyāwāa̍, a̍ wānāa̍ nɔ̍ si̍nā pɛ̄ŋgo̍o̍ a̍ lo̍o̍ŋ o̍kɔ̄ɔ̄ wa̍.

¹²Pōo̍ ho̍ō dīōla̍ŋ āā Da̍a̍ni̍ɛ̍ɛ̄, kɛ̍ mi̍ māsā bɛ̍ndōo̍ ō kē ndu̍ vɛ̄lɛ̄ dīōla̍ŋ āā Bɛ̄tīsi̍a̍sā. Wāna̍ kɔ̄l kālo̍o̍ pīla̍ pōo̍ ho̍ō o̍ cho̍ ni̍, mɛ̄lɛ̄ka̍ā chō ndu̍ kɔ̄ɔ̄lī, ndu̍yɛ̍, ō nɔ̄ tāāsi̍o̍o̍ le̍ lɔ̄mā sɔ̄la᷄ŋ tɛ̄ɛ̄sīa̍a̍, a̍ ka̍a̍ma̍āla̍ŋ pīɔ̄lɔ̄ɔ̍, a̍ sɔ̄ɔ̍ŋ vi̍a̍ŋna᷄ŋndo̍ŋ tɛ̄ɛ̄sīa̍a̍. Le̍la̍ŋ, yo̍o̍ŋgu̍ le̍ ndu̍. Tē ō hīŋ pɛ̍, ō chō nu̍m hūnɔ̄ɔ̄ tɛ̄ɛ̄sīāl sūɛ̍i̍ he̍ī chɔ̄m.”

¹³O̍ lēpīlɛ̍ ni᷄ŋ kpe̍, ma̍ kɔ̄ hu᷅ŋ a̍ Da̍a̍ni̍ɛ̍ɛ̄ nāa̍ māsā bɛ̍ndōo̍ chūā. Mɛ̄ɛ̍ o̍ hi᷅ŋ, mi̍ māsā bɛ̍ndōo̍ nyūnā ndu̍ āā, “Mɛ̄ɛ̍ nu̍m cho̍ Da̍a̍ni̍ɛ̍ɛ̄ ni̍, ā chō wāŋndo̍ ō pīlɛ̍ wānāā nda̍ chɛ᷄ŋ Chu̍dā wa̍ tɛ̄ɛ̄ŋ, ā māsā bɛ̍ndōo̍ fi̍nyā nī o̍ bi̍ī o̍ chɔ̄ūwo̍ Chu̍dā mbo̍ hūŋ a̍ nda̍ wa̍?

¹⁴I̍ tu̍e̍ī māā nyi̍nā mɛ̄lɛ̄ka̍ā nāā di̍a̍ndāa̍ ō chō nu̍m kɔ̄ɔ̄lī. Ndu̍yɛ̍ māā ā nɔ̄ kɔ̄l kālo̍o̍, a̍ tāāsi̍o̍o̍ a̍ sīnā pɛ̄ŋgo̍o̍.

¹⁵Wānāa̍ kɔ̄l kālu̍a̍a̍ tɛ̍ɛ̍sīāā sɔ̄ɔ̍ŋ vi̍a̍ŋna᷄ŋndo̍ŋ nda̍ ni̍, wānāā vīāmāā lāyāwāa̍ ni̍, nda̍ kpo̍u̍ I̍ ve̍e̍lu̍ ni᷅ŋ nda̍ le̍ mā hu᷄ŋ to̍fāl la̍ nyɛ̍ cho̍ ho̍ō ō pōōnyi̍a̍a̍ wo̍, mā chɔ᷄m ya̍ tɛ̄ɛ̄sīāā ndɔ̄ɔ̍, kɛ̍ ā nɔ̄la̍ le̍.

¹⁶Kɛ̍ I̍ tu̍e̍ī māā nūm ā nɔ̄lā mā tɛ̍ɛ̍si̍a̍a̍ lɔ̄mā sɔ̄la᷄ŋ ndu̍yɛ̍, mā tɛ̍ɛ̍si̍a̍a̍ sɔ̄ɔ̍ŋ vi̍a̍ŋna᷄ŋndo̍ŋ. Le̍la̍ŋ, tē ā nɔ̍la̍ pɛ̍ mā to̍fa̍ dīōmnda̍ cho̍ la᷅ŋ lā pōōnyīāā o̍ chīɛ̄īyo̍ la̍ŋ, mā tɛ̍ɛ̍si̍a̍l la̍ sa̍bū la̍ŋ si̍mndo̍ pɛ̍, I̍ to̍sa̍ ā wōu̍ nu̍m dōma̍ lēmāsā ba̍ā kālā bɛ̄ndōo̍, ndu̍yɛ̍ mī I̍ to̍sa̍ mā wōu̍ nu̍m yɔ̄lɔ̍ŋ ŋ̄ko̍o̍līi̍yo̍ŋ o̍ lābo̍lō, yɔ̄lɔ̍ŋ lēbɛ̄ɛ̄ wo̍ŋ, ndu̍yɛ̍ mī i̍ si̍i̍ŋgu̍u̍ nu̍m wānā ya̍a̍ndɔ̄ɔ̍ o̍ māsāle̍ŋ nde᷅ŋ ni᷄ŋ.”

¹⁷Kɛ̍ mi̍ Da̍a̍ni̍ɛ̍ɛ̄ di̍mūl māsā bɛ̍ndōo̍ āā, “Fāllo̍, kɛ̍si̍ nyɛ̄m nūm ndo̍ŋ, tē ko̍ŋ te̍ a̍ fa̍nda̍ wānā chēle̍ŋ a̍ mu̍ŋ. Kɛ̍ I̍ cho̍ nu̍m nyɛ̍ cho̍ ho̍ō ō pōōnyīāā wo̍ chɔ̄m a̍ tɛ̄ɛ̄sīāā ndɔ̄ɔ̍.

¹⁸“Le̍la̍ŋ māsā bɛ̍ndōo̍, ya̍ŋ nīla̍ŋ, Mɛ̄lɛ̄ka̍ Bɛ̄ndōo̍ Kpo̍u̍ mbo̍ kē Nābi̍u̍kānɛ̍ɛ̍sā fi̍nyā nūm māsāle̍ŋ, a̍ kpāāyāa̍, a̍ bɛ̄ɛ̄le̍ŋ, a̍ tɔ̍ɔ̍.

¹⁹Kpāāyā bɛ̍ndū Mɛ̄lɛ̄ka̍ ndu̍ o̍o̍ ke̍ ndu̍ wo̍, mbo̍ tōsā wāŋnda̍ su̍u̍ o̍ su̍u̍, a̍ lēlɛ̄ŋ o̍ lēlɛ̄ŋ, a̍ īsɔ̄ɔ̍ o̍ īsɔ̄ɔ̍ ma̍ŋgālāā o̍ chi̍e̍ēŋndo̍ chōo̍ kpo̍u̍ ma̍ nɔ̄ sīōōŋīī ndūɛ̍i̍. Ndu̍ o̍o̍ nɔ̍ kpāāyāa̍, wānā o̍ wānā ndu̍ o̍o̍ ye̍e̍ma̍ le̍ dīyɔ̄ɔ̍ pɛ̍ ō dīī. Wāna̍ ndu̍ o̍o̍ ye̍e̍ma̍ chīīndīa̍a̍ pɛ̍, ō chīīndīa̍a̍. Wāna̍ ndu̍ o̍o̍ ye̍e̍ma̍ lēbɛ̄ɛ̄ kē pɛ̍, o̍ ke̍ ndu̍ bɛ̄ɛ̄le̍ŋ. Wāna̍ ndu̍ o̍o̍ ye̍e̍mā le̍ hēēlū pɛ̍ ō hēēlu̍, wāna̍ ndu̍ o̍o̍ ye̍e̍ma̍ le̍ tūsī tōōlō pɛ̍, ō tūsi̍ ndu̍ tōōlō.

²⁰Kɛ̍ mɛ̄ɛ̍ kɔ̄l ndɔ̄ɔ̍ pɛ̄ a̍ yōŋgāa̍, mbo̍ kāndū bōllē kālāle̍ŋ tōsāa̍. O̍ ko̍ŋ, mi̍ Mɛ̄lɛ̄ka̍ tōsā mbo̍ fāŋa᷄ŋ o̍ māsāle̍ŋ chōo̍. Mi̍ bɛ̄ɛ̄le̍ŋ lē fāŋa᷄ŋ ndu̍ chōo̍, mbo̍ chūū bɛ̄ɛ̄.

²¹Mi̍ Mɛ̄lɛ̄ka̍ sōlī ndu̍ wāŋndā chīe̍e̍ya̍ tɛ̍ɛ̄ŋ mbo̍ sīmnu᷄ŋ māā vīsī yōndō. Nda̍ sōfɛ̍li̍a̍a̍ yōndūa̍a̍ wa̍ ni᷅ŋ lātūlu̍ ni̍, mbo̍ dīā bīllo̍ māā nāū, ndu̍yɛ̍, o̍ mɔ᷄mndo̍ bɛ̄ŋgu̍ ndu̍ o̍o̍ lɔ᷅l ni̍. O̍ mɛ̄ɛ̄lu̍la̍ŋ kpɔ̍ŋ, mbo̍ sīnā māā Mɛ̄lɛ̄ka̍ Bɛ̄ndōo̍ Kpo̍u̍, o̍ nɔ̄ kpāāyāa̍ māsɛ̄i̍ kpo̍u̍ chōo̍ o̍ chi̍e̍ēŋndo̍ cho̍o̍, māā wāna̍ o̍ hɛ̍na̍ŋ mbō sīīŋgu̍u̍ māsā wo̍ ndu̍ o̍ si̍i̍ŋgūū ma̍sā ni̍.

²²“Ndu̍yɛ̍ o̍ ko̍ŋ kɔ̍ɔ̍lī, nūm māsā bɛ̍ndōo̍ Bɛ̄tīsi̍a̍sā po̍ ndɔ̄, a̍ si̍na̍ mu᷅ŋ kpe̍nde̍, kɛ̍ a̍ ko̍ŋ kpo̍u̍ ma̍ kɛ̄ɛ̄ le̍ tūsi᷄ŋndo̍ ndu̍ Mɛ̄lɛ̄ka̍ o̍ lābɛ̄ŋgu̍ ni᷄ŋ.

²³Ma̍ lō o̍ ko̍ŋ ma̍ tɛ̄ɛ̄nda᷄ŋ māsānɔ̄ɔ̍ Mɛ̄lɛ̄ka̍ o̍ cho̍ chōo̍ cho̍o̍ wo̍. Tāālāla̍ nda̍ chu̍a̍ o̍ chīɛ̍i̍ Mɛ̄lɛ̄ka̍a̍ ni᷄ŋ nda̍ŋ, ma̍ bīī kɔ̄llo̍ ma̍ kɔ̍ chu̍ū nu̍m nda̍ŋ, nūm ni̍, lāŋgba̍ā nūm a̍ ka᷅lla̍ ni̍, lāāndāā nūm a̍ bɛ̍ndūa̍a̍ ni̍, lāāndāā nūm a̍ pɔ̍mbūa̍a̍ ni̍, mī lā kōl mu̍ɛ̍īya̍ŋ o̍ tāālāla̍ la̍ŋ ni᷄ŋ. O̍ ko̍ŋ kɔ̍ɔ̍lī, mi̍ lā sāŋgālā mɛ̄lɛ̄ka̍ā nyāā yɛ̍ yi̍a̍a̍, ō nda̍ tōōsi̍a̍a̍ a̍ ka̍ni̍i̍ hu̍mbūe̍i̍yo̍, a̍ ō ŋ̄ko̍o̍līi̍yo̍, a̍ ō īchīli̍ŋi̍i̍ būlɔ᷄ŋsīi̍yo̍, a̍ ō īchīli̍ŋndo̍, a̍ ō yɔ̄mndo̍, a̍ ō nda̍ tōōsi̍a̍a̍ a̍ pōūta̍ŋ ndo̍. Mɛ̄lɛ̄ka̍a̍ ha̍ā ā chi᷅ le̍, ā tu̍i̍ī le̍, ndu̍yɛ̍ ā nɔ̍ si̍nā pɛ̄ŋgu̍ le̍. Kɛ̍ Mɛ̄lɛ̄ka̍, o̍ nɔ̍ kpāāyāa̍ yōōmūlā nyāla̍ŋ chōo̍ a̍ nyɛ̄ o̍ nyɛ̄ wo̍, mi̍ lā kɛ̄ɛ̄ le̍ Mɛ̄lɛ̄ka̍ kōŋ bɛ̄ɛ̄le̍ŋ kīo̍o̍.

²⁴Le̍ sa̍bū kōŋ o̍ yɔ̍ŋgu̍ bāa̍ ni̍ mbō pōōnyi̍a̍a̍ dīōmnda̍ŋ nda᷅ŋ.

²⁵“Dīōmndā la᷄ŋ la̍ cho̍ yɛ̄ la᷅ŋ ni̍ āā, Mɛ̍nɛ̍, Mɛ̍nɛ̍, Tīkɛ̄l Pa̍a̍sīŋ.[4]

²⁶Ndu̍yɛ̍ tɛ̄ɛ̄sīāā dīōmnda̍ŋ nda᷅ŋ la̍ cho̍ la᷅ŋ ni̍. Mɛ̍nɛ̍, ko̍ŋ cho̍ ni̍, chɔ̄mndo̍. Mɛ̄lɛ̄ka̍ chɔ̄m pālɛ̍i̍ nu̍m ī lēmāsɛ̄i̍, māā ī hīŋ o̍ mɛ̄ɛ̄lu̍la̍ŋ.

²⁷Tīkɛ̄l, ko̍ŋ cho̍ ni̍, hāndɔ̄ɔ̍ o̍ sēke̍lēi̍yo̍ chōo̍. Mɛ̄lɛ̄ka̍ hāndu̍ nu̍m o̍ sēke̍lēi̍yo̍ chōo̍ le̍ lūsu̍l nu̍mndo̍ sīnāa̍, kɛ̍ mbo̍ sāālu᷄ŋ māā a̍ fu̍u̍lu̍u̍ lu̍su̍llo̍ mɛ̄ɛ̍ ŋ̄ nɔ̄ mā lu̍su̍l lɛ̍ le̍.

²⁸Pa̍a̍sīŋ, ko̍ŋ cho̍ ni̍, pīɔ̄ūwo̍. Mɛ̄lɛ̄ka̍ pīɔ̍u̍ māsāle̍ nu̍mnde̍ŋ tɛ̄ɛ̄ŋ, mbo̍ kē wāŋnda̍ Mi̍dīāā, a̍ ha̍ā Pa̍a̍sīāā.

²⁹“O̍ lēpīlɛ̍ ni᷄ŋ kpe̍, mi̍ māsāa̍ Bɛ̄tīsi̍a̍sā di̍mūl bu̍ɛ̍i̍yāa̍ ndūa̍a̍ māā ā wōu̍ Da̍a̍ni̍ɛ̍ɛ̄ dōma̍ lēmāsā ba̍ā kālā bɛ̄ndōo̍, ndu̍yɛ̍ ma̍ wōū ndu̍ yɔ̄lɔ̍ŋ ŋ̍ko̍o̍līi̍yo̍ŋ o̍ lābo̍lō le̍ ndu̍ bɛ̍ɛ̍le̍ŋ kīo̍o̍. O̍ ko̍ŋ kɔ̍ɔ̍lī, mbo̍ sīīŋgūū ndu̍ wānā ya̍a̍ndɔ̄ɔ̍ o̍ māsāle̍ ndɔ̄le̍ŋ ni᷄ŋ.

³⁰Īchɔ̄l kōŋ kpe̍e̍kpe̍i̍, nda̍ dīī ndu̍ ma̍sāa̍ Bɛ̄tīsi̍a̍sā māsā bɛ̍ndōo̍ Ba̍bi̍lɔ̄ŋ ni̍.

³¹O̍ ko̍ŋ, mi̍ Da̍līɔ̄ɔ̄ wānā wa̍ā Mɛ̍dīī o̍ si̍mnu᷄ŋ ma̍sāa̍ le̍ Ba̍bi̍lɔ̄ŋ o̍ fōōfo̍ ndɔ̄ɔ̍. Da̍līɔ̄ɔ̄ wa̍ wɔ̄sīla̍ŋ be̍le̍-ŋɔ̍mpu᷅m a̍ lā tīɔ̍ɔ̍ŋ (62) mbo̍ sīmnu᷄ŋ ma̍sāa̍.”