Read Southern Kisi Da̍a̍ni̍ɛ̍ɛ̄ 6 Bible Online

Da̍a̍ni̍ɛ̍ɛ̄ 6 - Southern Kisi bible

Da̍a̍ni̍ɛ̍ɛ̄ 6

¹Mi̍ ī yɔ̄nu̍ŋ a̍ te̍le̍ŋ ko̍ŋ, mi̍ māsā bɛ̍ndōo̍ Da̍līɔ̄ɔ̄ o̍ pi̍ɔ̍ū lɛ̄ŋndē o̍ wa̍ chōo̍ le̍ŋ būŋga᷄ŋ kɛ̄mɛ̄ a̍ bi̍di̍i̍ŋ, mbo̍ kɛ̄sī su̍pūŋtɛ̍nɛ̍i̍nɔ̍ɔ̍ o̍ ībūŋgā o̍ ībūŋgā chōo̍.

²O̍ ko̍ŋ kɔ̍ɔ̍lī, mbo̍ kɛ̄sī māsāā che᷅le̍ŋ ā ya̍a̍ su̍pūŋtɛ̍nɛ̍i̍ya̍ ha̍ā chōo̍ le̍ nda̍ wāa̍ hɔ̄lte̍ŋ, ndu̍yɛ̍ mī su̍pūŋtɛ̍nɛ̍i̍ya̍ ha̍ā ā wa̍ nda̍ ko̍na̍a̍ dɔ̄ɔ̄nɔ᷄ŋndo̍ o̍ bā. Ko̍ŋ to̍sā ni̍ būūla̍ŋ o̍ būūla̍ŋ ve᷅m māsā bɛ̍ndōo̍ le̍ ndu̍ lāka̍fā tōsāl te̍. Ndu̍yɛ̍, māsāā ya̍a̍wa̍a̍ o̍ hɛ̍li̍ ha̍ā wa̍, Da̍a̍ni̍ɛ̍ɛ̄ wa̍ ō pīlɛ̍.

³Ndu̍yɛ̍ o̍ māsāā ya̍a̍wa̍ ha̍ā tɛ̍ɛ̄ŋ, mi̍ Da̍a̍ni̍ɛ̍ɛ̄ to̍sā wa̍li̍ kɛ̍ndɔ̄ɔ̍ mbo̍ hīāū chāāŋāā ndūa̍a̍ kpo̍u̍. Le̍ wa̍li̍ ndɔ̄ kɛ̍ndɔ̄ɔ̍ ho̍ō, mi̍ māsā bɛ̍ndōo̍ tūū le̍ ndu̍ sīīŋgūūwo̍ wānā bɛ̍ndōo̍ o̍ māsāle̍ ndɔ̄le̍ŋ.

⁴Mɛ̄ɛ̍ Chāa̍ŋāā ndūāā ma̍sāa̍ ā tūēī sūɛ̍i̍ he̍ī, ma̍ sāā ndu̍ sōndōo̍ nūūvīa̍a̍ o̍ wa̍li̍ ndɔ̄ɔ̍ ni᷄ŋ, le̍ mā hāli̍ kpe̍ŋ mā ho᷄l ndu̍ sūɛ̍i̍. Kɛ̍ ā sēēlu̍ŋ nyɛ᷅ o̍ nyɛ̄ o̍ tɛ̍ɛ̍mbu̍u̍ le̍. Kāni̍ ō wa̍ sa̍kpō o̍ wa̍li̍ ndɔ̄ɔ̍ ni᷄ŋ.

⁵O̍ ko̍ŋ, ma̍ dīmu̍la᷅ŋ āā, “Ŋ̄ cho̍ nɛ̍ī o̍ nɛ̄ī sāālɔ᷄ŋ le̍ Da̍a̍ni̍ɛ̍ɛ̄ wo̍ ho̍ō īsɔ̄ɔ̍ ho̍lɔ̄ɔ̄ le̍, mɛ̄ɛ̍ mbō wa̍ dɔ̍ɔ̍ a̍ Mɛ̄lɛ̄ka̍ ndɔ̄ pi̍ɛ̍i̍yāā o̍kɔ̄ɔ̄.”

⁶O̍ ko̍ŋ kɔ̍ɔ̍lī, ma̍ chɛ̄la᷅ŋ mā kūā ku̍ndā nāa̍ māsā bɛ̍ndōo̍ chūā, ma̍ kɔ̍ di̍mūl ndu̍ āā, “O̍o̍ māsā bɛ̍ndōo̍ Da̍līɔ̄ɔ̄, vi̍o̍u̍ na̍a̍ chōo̍ kɛ̍ndīa̍a̍.

⁷Na̍a̍ kpo̍u̍, chɔ̍ŋ a̍ na̍a̍ ŋ̍ cho̍ su̍pūŋtɛ̍nɛ̍i̍ya̍ bōlle̍ŋ o̍ māsāle̍ nu̍mnde̍ŋ ni᷄ŋ nda̍, mbo̍ kūā a̍ su̍pūŋtɛ̍nɛ̍i̍ya̍, a̍ di̍si̍a̍a̍, a̍ māsāa̍ lākɔ̍lɛ̄i̍ya̍, ā māsāa̍ lāpātīa̍a̍, na̍a̍ kpo̍u̍ ŋ̄ chɛ̄la᷅ŋ māā nūm dɔ̍u̍ sāwāa̍ mā ki̍ndi̍la̍ ndu̍, māā le̍ pālɛ̍i̍ be̍le̍-ya̍a̍, wānā o̍ wānā pi̍ɛ̍i̍ mɛ̄lɛ̄ka̍ o̍ mɛ̄lɛ̄ka̍ā chēle̍ŋ pɛ̍, kɛ̄lɛ̄ŋgāā, mbō pīɛ̍i̍ wānā ō wānā chi̍e̍e̍ pɛ̍, ō fūla̍ o̍ nūm māsā bɛ̍ndōo̍ kɔ̄ɔ̄lī, māā ā ma̍l ndu̍ o̍ so̍o̍ŋ kpɔ̍kūŋnda̍ ni᷄ŋ.

⁸Le̍la̍ŋ yāndi̍i̍ māsā bɛ̍ndōo̍, dɔ̍u̍ sa̍wāa̍ ho̍ō mā po̍o̍nyi̍a̍a̍ ndu̍ o̍ yāu̍ chōo̍, mī nūm pi̍la̍ ho̍l sūe̍i̍ le̍ chɔ̄mndo̍ māā nūm pi̍la̍ kɛ̍sɛ̍ kɛ̍sɛ̍ di̍mi̍ ni̍. Ko̍ŋ to̍sa̍ ni̍, sāwa̍ ŋ̄ dɔ̄ū wo̍ ō fe̍ŋāŋ le̍chōo̍ le̍, mɛ̄ɛ̍ sāwa̍ nāa̍ Mɛ̍dɛ̍sīi̍ya̍ a̍ Pa̍a̍sīāŋnda̍ ō fe̍ŋāŋ le̍cho̍o̍ le̍ yɛ̍.”

⁹O̍ ko̍ŋ, mi̍ māsā bɛ̍ndōo̍ Da̍līɔ̄ɔ̄ du̍a̍ū sāwā ko̍ŋ o̍ yāu̍ chōo̍ mbo̍ hōl sūe̍i̍ le̍ chɔ̄mndo̍ māā, ndu̍ kɛ̍sɛ̍ kɛ̍sɛ̍ di̍mi̍ ni̍.

¹⁰Mi̍ chē bɛ̍ɛ̍ mi̍ māsā bɛ̍ndōo̍ ō dūāū sāwāa̍ ndu̍yɛ̍, mbo̍ hōl sūe̍i̍ o̍ sāwa̍ ō dɔ̍ū wo̍, mi̍ Da̍a̍ni̍ɛ̍ɛ̄ o̍ hi̍a̍ū lāchī a̍ Mɛ̄lɛ̄ka̍ ndɔ̄ɔ̍ pīɛ̄īyo̍ māā pāāndū. Mi̍ Da̍a̍ni̍ɛ̍ɛ̄ o̍ he᷅l o̍ chīɛ̄ī ndɔ̄ chōo̍ cho̍o̍ wo̍, mbo̍ lūɛ̄ī o̍ lu̍mūi̍yo̍ ni᷄ŋ, mbo̍ mūlī hɔ̄lla̍ o̍ wu̍ndɛ̄i̍ wa̍ bā Chūlu̍sɛ̄lɛ̄m ndo̍ wo̍. Mbo̍ bāŋ wūla̍ŋ mbo̍ pīɛ̄ī Mɛ̄lɛ̄ka̍ māā pāāndū. Ndu̍yɛ̍ ndu̍ o̍o̍ pi̍ɛ̍ī Mɛ̄lɛ̄ka̍ lēya̍a̍ o̍ pāa̍le̍ŋ ni᷄ŋ.

¹¹A̍ te̍le̍ŋ ko̍ŋ, mi̍ pūa̍a̍ pi᷅li̍a̍a̍ ha̍ā ā kūā ku̍ndā, ma̍ sāālu᷄ŋ Da̍a̍ni̍ɛ̍ɛ̄ o̍ wa̍ Mɛ̄lɛ̄ka̍ ndɔ̄ɔ̍ pīɛ̄īyo̍ mbō nyūnā ndu̍ le̍ mālāa̍.

¹²O̍ ko̍ŋ, ma̍ kūā nāa̍ māsā bɛ̍ndōo̍ chūā ma̍ kɔ̍ di̍mūl ndu̍ āā, “Fāllo̍, nūm te̍ dɔ̍ū sāwāa̍ ma̍ dīmī māā le̍ pālɛ̍i̍ be̍le̍-ya̍a̍, māā wānā o̍ wānā pi̍ɛ̍i̍ mɛ̄lɛ̄ka̍ o̍ mɛ̄lɛ̄ka̍ pɛ̍, kɛ̄lɛ̄ŋgāā mbō pīɛ̍i̍ wānā o̍ wānā chi̍e̍e̍ pɛ̍ ō fūla̍ o̍ nūm kɔ̍ɔ̍lī, māā ā ma᷄l ndu̍ o̍ so̍o̍ŋ kpɔ̍kūŋnda̍ ni᷄ŋ te̍?” Mi̍ māsā bɛ̍ndōo̍ chɛ̄l āā, “E̍ī, nyɛ̄ ya̍ I̍ di̍mi̍ wo̍ cho̍ ko̍ŋ, ndu̍yɛ̍ I̍ cho̍ lēchōo̍, mɛ̄ɛ̍ sāwa̍ nāa̍ Mɛ̍dɛ̍sīi̍ya̍ a̍ Pa̍a̍sīāŋnda̍, ō fe̍ŋāŋ le̍ chōo̍ le̍ yɛ̍.”

¹³O̍ ko̍ŋ, ma̍ dīmūl māsā bɛ̄ndōo̍ āā, “Da̍a̍ni̍ɛ̍ɛ̄, wānāā nda̍ bīī Chu̍dā ma̍ hūŋ a̍ nda̍ na̍nu᷄ŋ nda̍ ō pīlɛ̍, ō chu̍e̍ sa᷅wa̍ wa̍ ŋ̄ dɔ̄ū mbo̍ wā ō pōōnyīāā o̍ yāu̍ chōo̍ wo̍ le̍. Ō chō wɔ̄ Mɛ̄lɛ̄ka̍ ndɔ̄ɔ̍ pīɛ̄īle̍ŋ lē ya̍a̍ o̍ pāa̍le̍ŋ ni᷄ŋ māā pāāndū.”

¹⁴Mɛ̄ɛ̍ māsā bɛ̍ndōo̍ tūēī nyɛ̄ nda̍ dīmu̍l ndu̍ a̍ Da̍a̍ni̍ɛ̍ɛ̄ o̍kɔ̄ɔ̄ wo̍, mbo̍ tāmbū kɔ̄l ta̍u̍ ta̍u̍. Mbo̍ kāndū nɛ̄īla̍ŋ nūūvi̍a̍a̍ le̍ mbō fāŋa̍ Da̍a̍ni̍ɛ̍ɛ̄ nyɛ̄ pālāā ndu̍ o̍o̍ nɔ̍ le̍ sɔ̄lāa̍ wo̍ kūēē. Chɔ̍ŋ i̍dīi̍yo̍ ha̍a̍a̍ mi̍ pāa̍le̍ŋ lē dēl le̍nde̍ do̍o̍ŋ ō wa̍ nɛ̄īla̍ŋ nūūvīa̍a̍.

¹⁵Kɛ̍ mi̍ pūa̍a̍ ha̍ā ā mīīŋgū dīōm pīlɛ̍ nāa̍ māsā bɛ̍ndōo̍ chu̍a̍, ma̍ dīmūl ndu̍ āā, “Fāllo̍, nūm pi̍la̍ si̍nā a̍ mɛ̄ɛ̍ sāwa̍ nāa̍ Mɛ̍dɛ̍sīi̍ya̍ a̍ Pa̍a̍sīāŋnda̍ ō dīmi̍ yɛ̍, māā sāwā o̍ sāwā māsā bɛ̍ndo̍o̍ o̍ dɔ̄ū pɛ̍ mbō pōōnyi̍a̍a̍ ndu̍ o̍ yāu̍ chōo̍, māā sāwā ko̍ŋ ō fe̍ŋāŋ le̍chōo̍ le̍.”

¹⁶O̍ ko̍ŋ, mi̍ māsā bɛ̄ndōo̍ dīmī ma̍ hūŋ a̍ Da̍a̍ni̍ɛ̍ɛ̄ ma̍ hu᷄ŋ māl ndu̍ o̍ so̍o̍ŋ kpɔ̍kūŋnda̍ ni᷄ŋ. Mi̍ māsā bɛ̍ndōo̍ ō dīmūl Da̍a̍ni̍ɛ̍ɛ̄ āā, “Mbɔ̄ māā Mɛ̄lɛ̄ka̍ nu̍m ŋ̄ chō pīɛ̄īyo̍ ma̍ wā sa̍kpo̍ o̍ ndu̍ lo̍ wo̍, ō sōli̍ nu̍m lēni᷄ŋ Da̍a̍ni̍ɛ̍ɛ̄.”

¹⁷O̍ ko̍ŋ kɔ̍ɔ̍lī, ma̍ hūŋ a̍ pōū bɛ̄ndōo̍, ma̍ hāndū ndu̍ o̍ so̍o̍ŋndo̍ ho̍ō sōndōo̍. O̍ ko̍ŋ, mi̍ māsā bɛ̍ndōo̍ hāndū kēlɛ̄i̍ ndūɛ̍i̍ īsu̍ nɔ̍ ta̍mbūe̍i̍ lēlɛ̄ŋndo̍ ve̍ o̍ pōū kōŋ, a̍ ta̍mbūe̍i̍la̍ kēla᷄ŋ ŋ̄sū wānāā ndūāā si̍lāa̍, le̍ chɔ̄mndo̍ māā wānā o̍ wānā so̍lī Da̍a̍ni̍ɛ̍ɛ̄ o̍ so̍o̍ŋ ko̍ŋ ni᷄ŋ te̍.

¹⁸O̍ ko̍ŋ kɔ̍ɔ̍lī, mi̍ māsā bɛ̍ndōo̍ mīīŋgū o̍ chīɛ̄ī ndɔ̍ lēmāsāa̍. Īchɔ̄l kōŋ pi̍i̍, ō chɛ᷄l mbō dē nyɛ̄ di̍a̍a̍ o̍ nyɛ̄ dīāā ndu̍yɛ̍, mī nyɛ̄ chāā o̍ nyɛ̄ chāā sōō o̍ ndu̍ lo̍ chi̍ɛ̍ī ni᷄ŋ kpu̍lu̍ŋ te̍. Ndu̍yɛ̍ nyūmmā māŋ pi̍i̍ pi̍i̍ ō lɔ᷄l te̍.

¹⁹Mɛ̄ɛ̍ pāa̍le̍ŋ lē sɛ̄ īdīi̍yo̍ pu̍u̍ŋ, mi̍ māsā bɛ̍ndōo̍ cha᷄ŋ mbo̍ kūā o̍ so̍o̍ŋ kpɔ̍kūŋnda̍ chɔ̍ chɔ̍.

²⁰Mɛ̄ɛ̍ o̍ fu̍u̍lu̍u̍ o̍ so̍o̍ŋndo̍ īkɛ̄i̍ kpɛ̍ɛ̍la̍ŋ, mbo̍ vēēlū chōo̍ cho̍o̍ kpe̍le̍ŋ a̍ nyīīyāa̍ āā, “Da̍a̍ni̍ɛ̍ɛ̄, bu̍ɛ̍i̍ Mɛ̄lɛ̄ka̍ cho̍ yōōmū wo̍, Mɛ̄lɛ̄ka̍ nu᷄m ŋ̄ chō pīɛ̄īyo̍ ndu̍yɛ̍ ma̍ wā sa̍kpō o̍ ndu̍ lo̍ wo̍, ō nɔ̄la̍ pa̍ nu̍m chīīndīāā kpɔ̍kūŋnda̍ o̍ sōndō nɛ᷅?”

²¹Mi̍ Da̍a̍ni̍ɛ̍ɛ̄ mu̍lī āā, “O̍o̍ māsā bɛ̄ndōo̍, vi̍o̍u̍ na̍a̍ chōo̍ kɛ̍ndi̍a̍a̍.”

²²Mɛ̄lɛ̄ka̍ nu̍u̍ ō yɔ̄ŋgu̍ ki̍i̍la̍nɔ̍ ndɔ̄ɔ̍, mbo̍ hu᷄ŋ ki̍i̍ndīāā kpɔ̍kūŋnda̍ sōndōla̍ŋ kpɔ̍kū, yɔ̍ŋi̍ nda̍ a̍a̍ yɔ̍ŋ ya̍ nyɛ̄. Kāni̍, ō sīnā māā tɛ̄ɛ̄mbūū nī cho̍ o̍ sūɛ̍i̍ he̍ī ni᷄ŋ te̍. Ndu̍yɛ̍ nūm bɛ̍ɛ̍ I̍ tɛ̍ɛ̍mbu̍u̍ wɔ̍ i̍sɔ̄ɔ̍ o̍ īsɔ̄ɔ̍ a̍ nūm te̍, fāllo̍.

²³Mɛ̄ɛ̍ māsā bɛ̍ndōo̍ tūēī Da̍a̍ni̍ɛ̍ɛ̄ dīōm, mbo̍ nāŋ kɔ̄l ta̍u̍ ta̍u̍, o̍ ko̍ŋ mbo̍ yɔ̄ŋgū kpāāyāa̍ le̍ mā sōlī Da̍a̍ni̍ɛ̍ɛ̄ o̍ so̍o̍ŋ ko̍ŋ ni᷄ŋ. Mɛ̄ɛ̍ nda̍ so̍li̍ Da̍a̍ni̍ɛ̍ɛ̄ o̍ so̍o̍ŋ ko̍ŋ ni᷄ŋ, nyāsɔ̄ɔ̍ bɛ̍ɛ̍ ve̍ ndu̍ lēkɔ̄ɔ̍ le̍, kāni̍ fu̍u̍le̍, ndu̍ o̍o̍ dɔ̍ū tīīnda᷄ŋndo̍ o̍ Mɛ̄lɛ̄ka̍ ndɔ̄ɔ̍ ni᷄ŋ.

²⁴O̍ ko̍ŋ kɔ̍ɔ̍lī, mi̍ māsā bɛ̍ndōo̍ ō yɔ̄ŋgū kpāāyāa̍ ma̍ kɔ̍ bi̍ī pūa̍a̍ ye̍ŋ ka̍ŋ Da̍a̍ni̍ɛ̍ɛ̄ yāŋɔ̄ɔ̄le̍ŋ nda̍, ma̍ māl nda̍ o̍ so̍o̍ŋ ko̍ŋ ni᷄ŋ, lātūlu̍ a̍ lāāndāā ndāa̍, a̍ chūāūwāā ndāa̍ kpo̍u̍. Mɛ̄ɛ̍ nda̍ ma᷄l nda̍ o̍ so̍o̍ŋ ko̍ŋ ni᷄ŋ, ā fūūlu̍u̍ bɛ̍ɛ̍ lɛ᷅ŋ te̍, mi̍ kpɔ̍kūŋnda̍ dēl nda̍ chōo̍ ma̍ sɛ̄ɛ̄sīāā nda̍, ma̍ dīā nda̍ a̍ pāālā ndāla̍ŋ kpo̍u̍.

²⁵O̍ ko̍ŋ kɔ̍ɔ̍lī, mi̍ māsā bɛ̍ndōo̍ Da̍līɔ̄ɔ̄ o̍ po̍o̍nyīāā yāu̍la̍ŋ nāa̍ wānā o̍ wānā chu̍a̍ o̍ lēlɛ̄ŋ o̍ lēlɛ̄ŋ ni᷄ŋ, a̍ īsɔ̄ɔ̍ o̍ īsɔ̄ɔ̍ ma̍ŋgālāa̍ cho̍ o̍ chi̍e̍ēŋndo̍ ni᷄ŋ kpo̍u̍ āā, “Lā vi̍o̍u̍ kɛ̍ndīa̍a̍ mī lā sɔ̄la̍ dɛ̍nɛ̍ kɛ̍ndɛ̄ fɔ̍.

²⁶I̍ dɔ̍ū sa̍wāa̍ māā wānā o̍ wānā cho̍ o̍ māsāle̍ nīle̍ŋ ni᷄ŋ, māā lā nɔ̄ mī lā ke̍ Mɛ̄lɛ̄ka̍ Da̍a̍ni̍ɛ̍ɛ̄ wo̍ bɛ̄ɛ̄le̍ŋ, ndu̍yɛ̍ mī lā nɔ̄ sīōōŋīī ndūɛ̍i̍. Kāni̍ fu̍u̍le̍, ndu̍ cho̍ Mɛ̄lɛ̄ka̍ cho̍ yōōmū wo̍ ni̍. Ndu̍yɛ̍ ō chō le̍ fɛ̍ɛ̍ŋ a̍ fɛ̍ɛ̍ŋ. Kpāāya̍ ndɔ̍ lēmāsāa̍ ō chō le̍ fɛ̍ɛ̍ŋ a̍ fɛ̍ɛ̍ŋ, ndu̍yɛ̍ ō nɔ̍ la̍mɛ̍ɛ̍lu̍ le̍.

²⁷Ndu̍yɛ̍ ndu̍ chi̍i̍ndīāā wa̍nā o̍ dɛ̍nɛ̍ pa̍lāa̍ ni᷄ŋ, mbō bāŋa̍ wa̍nā ni̍. Ndu̍ to̍sā ka̍a̍ma̍āla̍ŋ a̍ kpālōla̍ŋ, chōo̍ cho̍o̍ a̍ o̍ chi̍e̍ēŋndo̍ chōo̍ ni̍. Ndu̍ chi̍i̍ndi̍a̍a̍ Da̍a̍ni̍ɛ̍ɛ̄ kpɔ̍kūŋnda̍ o̍ sōndō ni̍, ō vi̍ le̍.”

²⁸O̍ ko̍ŋ kɔ̍ɔ̍lī, mi̍ Da̍a̍ni̍ɛ̍ɛ̄ sɔ̍la̍ kpāāyāa̍ ta̍u̍ ta̍u̍ o̍ māsāle̍ Da̍līɔ̄ɔ̄ le̍ŋ ni᷄ŋ, ndu̍yɛ̍ vɛ̍lɛ̄ a̍ o̍ māsāle̍ Sa̍a̍līɔ̄ɔ̄ le̍ŋ ni᷄ŋ ho̍ō Pa̍a̍sīāā.