Read Southern Kisi Da̍a̍ni̍ɛ̍ɛ̄ 8 Bible Online

Da̍a̍ni̍ɛ̍ɛ̄ 8 - Southern Kisi bible

Da̍a̍ni̍ɛ̍ɛ̄ 8

¹Mi̍ Da̍a̍ni̍ɛ̍ɛ̄ hi̍a̍ū lāchī a̍ pōōnyīa̍a̍ āā, “Wɔ̄sī māsā bɛ̍ndōo̍ Bɛ̄tīsi̍a̍sā o̍ chi̍ŋa̍ wɔ̄sīla̍ŋ lā ya̍a̍ o̍ lēmāsā wo̍, ya̍ Da̍a̍ni̍ɛ̍ɛ̄, mi̍ I̍ cha᷅ vɛ̄lɛ̄ yi̍lāŋ chēle̍ŋ.

²O̍ yi̍lāŋndo̍ ho̍ō ni᷄ŋ, mi̍ cha̍nu᷄ŋ ya̍ pi̍la̍ Su̍sā chi̍e̍e̍, o̍ cho̍ chi̍e̍e̍ le̍bo̍llo̍ le̍ būŋgɛ̄ī Ɛ̍lāmnde̍ mi̍ kpākīo̍o̍ wā ndu̍ ō bālāā si̍lɔ̍ wo̍. I̍ wa̍ īsīsi̍ o̍ Pīo̍o̍ Yu̍lāī i̍kɛ̄i̍.

³Mɛ̄ɛ̍ ya̍ I̍ chūā hɔ̄lla̍ mi̍ to̍fa̍, mi̍ I̍ cha᷅ sāā ko̍ndo̍o̍ īsīsi̍ a̍ lēēla̍ŋ ta̍ŋgāsāā, ō wa̍ o̍ pīo̍o̍ ho̍ō īkɛ̄i̍. Sāā ko̍ndo̍o̍ ho̍ō, līo̍o̍ ō pīlɔ̄ɔ̍ ndu̍ o̍o̍ hi̍o̍ū ī bāndu̍ a̍ ō pīlɔ̄ɔ̍. Kɛ̍ lēe̍ ndu̍ o̍o̍ hi̍o̍ū ko̍ŋ chāa̍ŋndɔ̍ ī bāndu̍ wo̍, ndu̍ mɛ̍ɛ̍lu̍ ndu̍ wūlɔ̄ɔ̄ o̍ lēbōl ni̍.

⁴Mi̍ I̍ cha᷅ mi̍ sāa̍ ho̍ō kūā mbo̍ kɔ̍ ku̍ndū nyɛ̄ o̍ nyɛ̍ fu̍la̍ ndu̍ lāchī o̍ chi̍e̍ēŋndo̍ kpēŋgūŋ sa̍lā ya̍a̍ wo̍ŋ, bā lūāŋndo̍ ni̍, bā tōūwo̍ ni̍, a̍ bā pāa̍le̍ŋ lē dēllo̍. Sāa̍ ho̍ō, vīsī o̍ vīsī ndu̍ o̍o̍ nɔ̍lā ndu̍ sīmūl te̍. Ndu̍yɛ̍ tē ndu̍ o̍o̍ bīī vīsī o̍ vīsī pɛ̍, nyɛ̄ o̍ nyɛ̄ ndu̍ o̍o̍ nɔ̍lā ndu̍ vīsī kōŋ sōlī o̍ ba̍ le̍. Nyɛ̄ sāa̍ ho̍ō ndu̍ o̍o̍ hɛ̍nāŋ le̍ tōsāa̍ wo̍, ndu̍ ko̍ni̍ ndu̍ o̍o̍ to̍sā ni̍. Mbo̍ chūāŋnu᷄ŋ ndu̍ pi̍la̍ vi̍sī tɔ̍ɔ̍ma̍ bɛ̍ndū.

⁵“I̍ lo̍ yīya᷄ŋndo̍ a̍ sāa̍ ho̍ō o̍kɔ̄ɔ̄, mi̍ I̍ cha᷅ chūīŋ tōōyōo̍ ā lēē kpāāyā bɛ̄ndōo̍ ndu̍ o̍ hɔ̄lta̍ŋ tɛ̄ɛ̄ŋ, mbo̍ fūlā a̍ kīlta̍ŋ fa̍ŋ bā pāa̍le̍ŋ lē dēllo̍, mbo̍ kīālū chi̍e̍ēŋndo̍ tɛ̄ɛ̄ŋ kpa̍li̍ a̍ kīlta̍ŋ, wānā a̍a̍ che᷅ pɛ̍, āā pēlēi̍ bɛ̍ɛ̍ ō ve̍ ndi̍ pīlā lɛ̄ŋ te̍.

⁶Mbo̍ hūŋ le̍nde̍ a̍ kɔ̄l tūū wɔ̄ɔ̍ŋ wɔ̍ɔ̍ŋndo̍, mbo̍ kūēl sāā ko̍ndo̍ ya̍ I̍ che᷅ ko̍ŋ i̍si̍si̍ o̍ pīo̍o̍ īkɛ̄i̍ a̍ lēēla̍ŋ ndo̍ kpɔ̍ɔ̍ū bɛ̄ndū.

⁷Mi̍ cha᷅ mbo̍ kūā a̍ kɔ̄l tūū bɛ̄ndū bɛ̍ndōo̍ mbo̍ dēl sāa̍ ho̍ō chōo̍ a̍ sɔ̍ŋgɔ̄ɔ̍, mbo̍ yām ndu̍ lēēlā tīɔ̍ɔ̍ŋ ndālāŋ. Chūīŋndo̍ ho̍ō, ndu̍ o̍o̍ hīōū sāa̍ ho̍ō po̍lo̍ŋ a̍ sɔ̍ŋgɔ̄ɔ̍. Sāa̍ ho̍ō ndu̍ o̍o̍ nɔ̍ kpa̍a̍yā o̍ kpāāyā ndu̍ o̍o̍ si̍mu̍l chūīŋndo̍ ho̍ō le̍. Mɛ̄ɛ̍ chūīŋndo̍ o̍ vīɔ̍l sāa̍ ho̍ō lɛ̄ŋ kpɔ᷅l, mbo̍ nīɔ̄ū nīɔ̄ū ndu̍ chōo̍, nyɛ̄ o̍ nyɛ̄ ndu̍ o̍o̍ ti̍u̍ ba̍ mbō sōli̍ ndu̍ sāa̍ ho̍ō o̍ bā le̍.

⁸“Mi̍ chūīŋ tōōyōo̍ ho̍ō sīmnu̍ŋ chūīŋ kpāāyā bɛ̍ndū bɛ̍ndū. A̍ bōōndi̍i̍ o̍ sɔ̍la̍ kpāāyāa̍ sɔ̄lā bɛ̄ndōo̍ ve̍, mi̍ lēe̍ ndɔ̍ kpāāyā bɛ̍ndū kōŋ ō yōm. Kɛ̍ mi̍ lēēla̍ŋ lā wu᷅l ndu̍ vɛ̄lɛ̄ lā hi̍ɔ̍ɔ̍lu̍, la̍ŋ bɛ̍ɛ̍ lā wa̍ lēēlā kpe̍e̍kpe̍i̍, sɔ̍ŋgɔ̍ lēē kōŋ. Ndu̍yɛ̍ lēēla̍ŋ nda᷅ŋ kūmbūŋ hi̍ɔ̍ɔ̍lo̍ŋ o̍ chi̍e̍ēŋndo̍ ni᷄ŋ, mi̍ ō kɛ᷅ o̍ kɛ᷅ mūlī hɔ̄lla̍ o̍ kūmbūe̍i̍ ī pīlɛ̍.

⁹Ndu̍yɛ̍ lēēlā hi̍ɔ̍ɔ̍lu̍la̍ŋ nda᷅ŋ, mi̍ lēē pɔ̄mbɔ̄ɔ̍ wūl o̍ līo̍o̍ ō pīlɔ̍ɔ̍, mbo̍ hīndū mbo̍ sīmnu̍ŋ le̍e̍ kpāāyā bɛ̍ndū bā tōūwo̍, a̍ bā pāa̍le̍ŋ lē chāŋndo̍, a̍ bā lɛ̄ŋndē kɛ̄ndɛ̄lē bɛ̄ndūle̍ŋ.[5]

¹⁰Mī līo̍o̍ ho̍ō sɔ̄lā kpāāyāa̍ ha̍a̍a̍, mi̍ kpāāya̍ ndɔ̄ɔ̍ ō fūūlūū o̍ ha̍la̍ di̍. Ndu̍yɛ̍ lōo̍ŋ chōo̍ cho̍o̍ bɛ̍ɛ̍ mbo̍ tūsī mu̍ŋ ŋ̄ ti᷄ŋ chi̍e̍ēŋ na̍nu᷄ŋ mbo̍ nīɔ̄ū nīɔ̄ū mu̍ŋ chōo̍ fɔ᷅ fɔ̄.

¹¹Mbo̍ sīīŋgūū ndu̍ pi̍la̍ wāna̍ kpāāyā bɛ̍ndū, ndu̍yɛ̍, mbo̍ sīmūl wāna̍ cho̍ bōllē pūa̍a̍ chɔ̄ūwa̍ o̍ fo̍nda᷄ŋ mɛ̄lɛ̄ka̍a̍ wo̍. Mbo̍ kūūnā sa̍lālā nda̍ sōlī o̍ Mɛ̄lɛ̄ka̍ lo̍ le̍pa̍a̍ o̍ le̍pāa̍ la̍ŋ. O̍ ko̍ŋ kɔ̍ɔ̍lī mbo̍ tɛ̄ɛ̄mbūū chīɛ̍i̍ Mɛ̄lɛ̄ka̍a̍.

¹²Le̍ kɛ̄ɛ̄ wāŋnda̍ a̍ kɛ̄ɛ̍ Mɛ̄lɛ̄ka̍a̍ dīōm ndo̍, mi̍ Mɛ̄lɛ̄ka̍ chɛ̄l mi̍ lēē pɔ̄mbɔ̄ɔ̍ ho̍ō ō sɔ̄lā kpāāyāa̍ wānāa̍ Mɛ̄lɛ̄ka̍a̍ chōo̍, ndu̍yɛ̍ a̍ sa̍lālā nda̍ sōlī le̍pa̍a̍ o̍ lēpāa̍ la̍ŋ. Mi̍ lēē pɔ̄mbɔ̄ɔ̍ ho̍ō tūsī tōnya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ tōōlō. Nyɛ̄ o̍ nyɛ̄ lēē pɔ̄mbɔ̄ɔ̍ ho̍ō ndu̍ o̍o̍ kɛ̍ɛ̍si̍a̍a̍ le̍ tōsāa̍ mbo̍ tīū bā.

¹³“O̍ ko̍ŋ kɔ̍ɔ̍lī, mi̍ tu̍ɛ̍ī ki̍i̍la̍a̍ Mɛ̄lɛ̄ka̍a̍ sūūki̍āŋndo̍ nda̍ ŋi̍ɔ̍ɔ̍ŋ. O̍ ko̍ŋ mi̍ ō pīlɔ̄ɔ̍ ō nyūnā chāa̍ŋndɔ̍ āā, ‘Sɔ̄ɔ̍ŋ che̍nu᷄ŋ mu᷅ŋ o̍ yi̍lāŋndo̍ ni᷄ŋ ki̍nɛ̍i̍ yo̍ŋ, sa̍lāla̍ Mɛ̄lɛ̄ka̍ la̍ so̍līŋ le̍pa̍a̍ o̍ lēpāa̍ la̍ŋ kūūnāa̍, a̍ Mɛ̄lɛ̄ka̍ kīɔ̍ɔ̍ dīōm mī dɛ̍nɛ̍ ta̍mbɛ̍i̍yo̍ ō yɔ̄nu̍ŋ, a̍ chīɛ̍i̍ Mɛ̄lɛ̄ka̍a̍ pīɔ̄lɔ̄ɔ̍, a̍ pūa̍a̍ chɔ̄ūwāa̍ Mɛ̄lɛ̄ka̍a̍ yōmɔ̄ɔ̍ mā nīɔ̄ū ni̍ɔ̍u̍ nda̍ fɔ᷅fɔ̄, vɛ̄ɛ̍nɛ̍ kpɛ̍ sɔ̄ɔ̍ŋ mu᷅ŋ ŋ̄ hīāū yɛ̍ ni᷄ŋ la̍chi̍ a̍ yɔ̄nɔ᷄ŋndo̍?’

¹⁴“O̍ ko̍ŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍a̍ ō pīlɔ̍ɔ̍ ō chāa̍ŋndɔ̍ nyu̍na̍ ko̍ŋ ndo̍ mūlī āā, ‘Ō chō chūā pālɛ̍i̍ a̍ nyūmnda̍ŋ wāa̍la̍ŋ lā tīɔ̍ɔ̍ŋ a̍ kɛ̄mɔ̄ɔ̍ lē yāa̍ (2, 300) mālāŋ chīɛ̍i̍ Mɛ̄lɛ̄ka̍a̍ mīīŋgu̍ o̍ di̍a̍ndāā māā pāāndū.’ ”

¹⁵Mi̍ Da̍a̍ni̍ɛ̍ɛ̄ hi̍a̍ū lāchī a̍ pōōnyīa̍a̍ āā, “Mɛ̄ɛ̍ ya̍ I̍ che᷅ yi̍lāŋndo̍ ho̍ō, I̍ wa̍ kɔ̄llo̍ kēēlīa̍a̍ le̍ mī si̍na̍ nyɛ̄ ya̍ I̍ che᷅ ho̍ō o̍ yi̍lāŋndo̍ ni᷄ŋ ndo̍ pɛ̄ŋgu̍, ki̍nɛ̍i̍ mi̍ I̍ cha᷅ wāŋndo̍ ya̍ īsīsi̍ la̍chi̍ māā wānā pɔ̍nɔ̍.

¹⁶Mi̍ tu̍ɛ̍ī dīōm wānā pɔ̍nɔ̍ɔ̍ mbo̍ wā vēēlōo̍ o̍ Pīo̍o̍ Yu̍lāī kɔ̍ŋgɔ̍, mbō dīmī āā, ‘Ke̍e̍bi̍lɛ̄, tɛ̍ɛ̍si̍a̍l Da̍a̍ni̍ɛ̍ɛ̄ yi̍lāŋndo̍ ho̍ō mbō sīna̍ ndu̍ pɛ̄ŋgu̍.’

¹⁷Mɛ̄ɛ̍ Ke̍e̍bi̍lɛ̄ sɔ̍ɔ̍ŋgu̍u̍ ya̍ īkɛ̄i̍ nāa̍ ya̍ I̍ wa̍ i̍si̍si̍ wa̍, mi̍ I̍ de᷅l lɛ̄ŋ ō kūūmba᷄ŋ a̍ sīōōŋnde̍, mi̍ wo̍ū kpa̍nɛ̍i̍. “Mbo̍ dīmūl lā āā, ‘Nūm wāna̍ chi̍o̍o̍ Da̍a̍ni̍ɛ̍ɛ̄, si̍na̍ ndi̍ pɛ̄ŋgu̍ māā yi̍lāŋndo̍ ho̍ō a̍ pālɛ̍i̍ mɛ̍ɛ̍lɛ̄i̍ o̍kɔ̄ɔ̄ o̍ cho̍ ni̍.’

¹⁸I̍ wa̍ īhīni̍ le̍nde̍ o̍ wo̍wɛ̍i̍yo̍ mbō sūāā nāa̍ ya̍ chu̍a̍. O̍ ko̍ŋ mbo̍ chūā ya̍, mbo̍ sīmī ya̍.

¹⁹Mbo̍ dīmūl la̍ āā, ‘I̍ cho̍ nu̍m chɔ̄m nyɛ̍ yɔ̍nūŋ ni̍ŋ a̍ te̍le̍ŋ Mɛ̄lɛ̄ka̍ o̍ dūāūnūŋ ni̍ŋ tu̍mbe̍ wo̍ o̍kɔ̄ɔ̄. Kāni̍ yi̍lāŋ ŋ̄ chē ho̍ō wo̍, ō chō māchūāā a̍ te̍le̍ŋ kpe̍e̍kpe̍i̍ Mɛ̄lɛ̄ka̍ dūāūnūŋ ni̍ŋ tu̍mbe̍ o̍ chi̍e̍ēŋndo̍ mɛ̄ɛ̄lu̍la̍ŋ ndo̍ o̍kɔ̄ɔ̄.

²⁰“ ‘Sāa̍ ŋ̄ chē ko̍ŋ a̍ lēēla̍ŋ lā tīɔ̍ɔ̍ŋ ndo̍, lēēlālāŋ lā si᷄m le̍ māsāā bɛ̍ndūa̍a̍ Mi̍dīāā a̍ ha̍ā Pa̍a̍sīāā.

²¹Chūīŋ tōōyē ŋ̄ ko̍ŋ ndo̍, ō si᷄m le̍ māsā bɛ̍ndōo̍ o̍ lɛ̄ŋndē Ki̍li̍sīle̍ŋ ni᷄ŋ. Lēe̍ kpāāyā bɛ̄ndū ŋ̄ chē ndu̍ ko̍ŋ o̍ hɔ̄lta̍ŋ tɛ̄ɛ̄ŋ ndo̍, ndu̍ si̍m le̍ māsā bɛ̍ndū tāse̍ su̍l pe̍kēkē o̍ lɛ̄ŋndē Ki̍li̍sīle̍ŋ ni᷄ŋ ndo̍ ni̍.

²²Lēēlā hi̍ɔ̍ɔ̍lu̍la̍ mi̍i̍ŋgu̍ sɔ̍ŋgɔ̍ lēē ndu̍ o̍o̍ yo̍m ko̍ŋ ndo̍ la̍ŋ, lā si᷄m le̍ māsɛ̄ī bɛ̍ndūī hi̍ɔ̍ɔ̍lu̍i̍ fu̍lā ni᷄ŋ fɛ̍ɛ̍ŋ o̍ lɛ̄ŋndē lēŋ ni᷄ŋ nde̍. Kɛ̍ ndi̍ ī nɔ᷅ ni̍ŋ kpa̍a̍yā māā māsāle̍ tāse̍le̍ŋ te̍.

²³“ ‘Māsɛ̄i̍ he̍ī, māsāa̍ ndāā bɛ̍ndūa̍a̍ a̍ chō lō o̍ kpāāyāa̍ chōo̍ mā sīmnu̍ŋ wānāā yɔ̄ŋ wɔ̄ɔ̍ŋ, mā pɛ̄ a̍ kɔ̄l vēsɛ̍i̍ bɛ̍ndōo̍. A̍ te̍le̍ŋ ko̍ŋ, mī māsa̍ che̍le̍ŋ ō su᷄l o̍ nɔ᷅ ni̍ŋ kɔ᷅l vēsɛ̍i̍ bɛ̍ndū bɛ̍ndōo̍, mbō chāā wa᷅ŋnda̍ hūī bɛ̄ndū bɛ̍ndōo̍ wo̍.

²⁴Ō chō hūnɔ̄ɔ̄ sīmnɔ᷄ŋ wa᷅na̍ dīāllūŋ kālā bɛ̄ndū bɛ̍ndū, kɛ̍ ō ve᷅m ni̍ŋ a̍ kpa̍āya̍ ndɔ̍ ndu̍ pi̍la̍ le̍. Ō chō tōsa̍ mī dɛ̍nɛ̍ ta̍mbū ta̍u̍ ta̍u̍ bɛ̍ndū, mbō dīu̍ wānāā kpāāyāā bɛ̍ndūa̍a̍, a̍ wānāa̍ Mɛ̄lɛ̄ka̍a̍. Ndu̍yɛ̍, nyɛ̄ o̍ nyɛ̄ o̍ hu̍ŋ ye̍e̍ma̍ le̍ tōsāa̍ pɛ̍, ō chō bā tīū mbō tōsa̍ ndu̍.

²⁵Ō chō tōsā mbō sɔ̄la̍ nyɛ̄ o̍ nyɛ̄, mbō su᷄l a̍ ka̍ā ndɔ̄ hu̍i̍yāa̍ ho̍ō. O̍ ko̍ŋ, mbō chūāŋnu̍ŋ ndu̍ pi̍la̍ ō bɛ̄ndū. A̍ te̍le̍ŋ wāŋnda̍ yīyāŋ nu̍a̍ā māā ā chōŋnu᷄ŋ o̍ bā ndāa̍ chōo̍ yɛ̍lɛ̍kɛ̍lɛ̍ɛ̍ wo̍, a̍ te̍le̍ŋ ko̍ŋ, ō chō wānāā ka̍ ka̍ tɛ̍ɛ̍mbūū, mbō sīmu̍l māsā bɛ̍ndu̍ hi̍o̍ū māsāa̍ kpo̍u̍ wo̍. Kɛ̍ o̍ mɛ̄ɛ̄lu̍la̍ŋ mbō hu᷄ŋ wa᷅ ō tɛ̄ɛ̄mbāā, kɛ̍ ō ve᷅m ni̍ŋ wa᷅na̍ chi̍e̍e̍ le̍ tɛ̍ɛ̍mbāā ndu̍ ni̍ŋ te̍.

²⁶Ndu̍yɛ̍, yi̍lāŋ ŋ̄ chē ho̍ō a̍ te̍le̍ŋ wāŋnda̍ ā so̍lī ni̍ŋ sa̍lālā īdīi̍la̍ŋ a̍ sa̍lālā īchɔ̄l ta̍ŋ te̍ wo̍, ī chō hūnɔ̄ɔ̄ yɔ̄nɔ᷄ŋ. Kɛ̍ di̍mūl wānā o̍ wānā le̍, kāni̍, ō cho̍ sūɛ̍i̍ cho̍ hūnɔ̄ɔ̄ yɔ̍nu̍ŋ o̍ su̍ŋ su̍ŋ ni̍ŋ te̍.’

²⁷“Mɛ̄ɛ̍ ki̍i̍la̍nɔ̍ Mɛ̄lɛ̄ka̍a̍ ho̍ō ō chīi̍ sūɛ̍i̍ nāa̍ ya̍ Da̍a̍ni̍ɛ̍ɛ̄ chūā, mi̍ dīāllo̍ŋ wū ya̍ pɔ̍lī pɔ̍lī. Le̍ pālɛ̍i̍ ī ti᷄ŋ, I̍ cho̍ a̍ nāa̍. O̍ ko̍ŋ kɔ̍ɔ̍lī, mi̍ I̍ cha᷄ŋ mi̍ I̍ mi̍i̍ŋgū wa̍li̍ nu̍u̍ tōsāa̍ māsā bɛ̍ndōo̍ o̍ bā bɛ̄ŋgu̍. Kɛ̍ dīāllo̍ŋ wa̍ ya̍ ŋ̄ vīlɛ̍i̍ pɛ̍ a̍ nyɛ̄ ya̍ I̍ che̍nu᷄ŋ o̍ hɔ̄l o̍ yi̍lāŋndo̍ ho̍ō ni᷄ŋ ndo̍. Kāni̍ i̍i̍ si̍nā ndu̍ pɛ̄ŋgu̍ le̍.”