Read Southern Kisi Da̍a̍ni̍ɛ̍ɛ̄ 9 Bible Online

Da̍a̍ni̍ɛ̍ɛ̄ 9 - Southern Kisi bible

Da̍a̍ni̍ɛ̍ɛ̄ 9

¹Mi̍ Da̍a̍ni̍ɛ̍ɛ̄ hi̍a̍ū lāchī a̍ pōōnyīa̍a̍ āā, “Da̍līɔ̄ɔ̄, po̍ Āha̍sɔ̍lɔ̄ɔ̄ wo̍ vīōlɔ̄ɔ̍ wāā o̍ lɛ̄ŋndē Mɛ̍dīīle̍ŋ ni᷄ŋ, wɔ̄sī o̍ si̍mnu᷄ŋ ma̍sā bɛ̍ndōo̍ Ba̍bi̍lɔ̄ŋ ndo̍,

²o̍ wɔ̄sī kōŋ ni᷄ŋ, I̍ wa̍ tōfāa̍ o̍ dīo̍m Mɛ̄lɛ̄ka̍a̍ ni̍ŋ le̍ mī si̍na̍ nyɛ̄ cho̍ o̍ yāu̍ Mɛ̄lɛ̄ka̍a̍ ni᷄ŋ ndo̍, mi̍ I̍ sāālu᷄ŋ nyɛ᷅ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Chɛ̄lūīma̍yā, wāna̍ su̍a̍ā le̍ ndu̍ Mɛ̄lɛ̄ka̍ wo̍, māā Chūlu̍sɛ̄lɛ̄m cho̍ wā ō tāmbɛ̍i̍ le̍ wɔ̄sīla̍ŋ be̍le̍-ŋɔ̍mmɛ̍ū (70).

³Le̍ he̍ī, mi̍ mɔ̍nɛ̍i̍ bīī ya̍, mi̍ nyɔ̍ɔ̍lū Mɛ̄lɛ̄ka̍ o̍ pīɛ̄īle̍ŋ ni᷄ŋ. O̍ ko̍ŋ, mi̍ wo̍u̍nu̍ŋ nyɛ̍lā lābɛ̍kīla̍ŋ le̍ kɔ̄l nī ta̍mbɛ̍i̍yo̍ chɔ̄mndo̍, mi̍ cha᷅l o̍ pūlta̍ŋ ni᷄ŋ, mi̍ bi̍ī su᷅mndo̍.

⁴Mi̍ pi̍ɛ̍ī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nu̍u̍, mi̍ chɔ̍ɔ̍mūū yɔ̄ŋndā nāāla̍ wɔ̍ɔ̍ŋnda̍ŋ.” Mi̍ di̍mī ma̍a̍, o̍o̍ Māsānɔ̄ɔ̍ Mɛ̄lɛ̄ka̍, ā chō Mɛ̄lɛ̄ka̍ bɛ̄ndū. Nūm wānā nɔ̍ ni̍ mā wo̍. Nyɛ̄ ŋ̄ dīmi̍ o̍ kpe̍ma̍ ŋ̄ yīi̍ a̍ wānāā nūmnda̍ māā ā chō tōsa̍ wo̍, a̍ fe̍ŋa̍ŋ le̍chōo̍ le̍. Ndu̍yɛ̍ wānāa̍ ka̍a̍lā nu̍m, mā chūā sa̍wāla̍ nu̍mnda̍ŋ nda̍, te̍le̍ŋ o̍ te̍le̍ŋ kāālāa̍ ŋ̄ chɔ̄m nda̍ ni̍.

⁵“Ŋ̄ tōsa̍ yɔ̄ŋ wɔ̄ɔ̍ŋndo̍ mi̍ ŋ̄ tɛ̄ɛ̄mbūū a̍ nūm. Ŋ̄ tōsa̍ dɛ̍nɛ̍ wɔ̍ɔ̍ŋ bɛ̄ndū. Nyɛ̄ o̍ nyɛ̄ ŋ̄ dīmu̍l na̍a̍ le̍ tōsāa̍ mi̍ ŋ̄ kɛ̄ɛ̄ le̍ ndu̍ tōsāa̍. Ŋ̄ mūlu̍l sāwāla̍ ŋ̄ ke̍ na̍a̍ la̍ŋ kɔ̄ɔ̍, mi̍ ŋ̄ kɛ̄ɛ̄ le̍ pɛ̄ɛ̄kūlā nūmnda̍ŋ chūa̍a̍.

⁶Ŋ̄ ye᷄ŋ ni᷅la̍ŋ o̍ nyɛ̄ wānāa̍ su̍a̍ā le̍ Mɛ̄lɛ̄ka̍ wa̍ ā dīmi̍ wo̍ le̍, nda̍ yɔ̍nūŋ māā bu̍ɛ̍i̍yāā nūmnda̍ ni̍. Yōōŋgūlā nūmnda̍ nda̍ dīmu̍l māsāa̍ nāā bɛ̍ndūa̍a̍, a̍ wānāā nāā bɛ̍ndūa̍a̍, a̍ fi̍nyāā nāā, ndu̍yɛ̍ a̍ wānā o̍ wāna̍ cho̍ o̍ lɛ̄ŋnde̍ŋ nde᷅ŋ ni᷄ŋ ŋ̄ chu̍e̍ ndu̍ le̍.

⁷Nūm māsānɔ̄ɔ̍, ā chō wānā sa̍kpō. Kɛ̍ na̍a̍ wāŋnda̍ Chu̍dā ni̍, wānāā tūa̍a̍ lo̍ I̍sɔ̄lūɛ̄ī ya̍ ni̍, wāŋnda̍ I̍sɔ̄lūɛ̄ī ā ŋ̄ sɛ̄ŋi̍ o̍ lɛ̄ŋīī kpɛ̍ɛ̍lūŋ nde̍ ni᷄ŋ a̍ ī la̍nda̍ŋ nde̍ le̍ yɔ̄ŋndā wɔ̄ɔ̍ŋndā nda̍ tōsa̍ la̍ŋ ni̍, na̍a̍ kpo̍u̍ bɛ̄ɛ̄la̍ ta̍mbɛ̍i̍la̍ŋ lā chō nāa̍ chōo̍ mɛ̄ɛ̍ na̍a̍ ŋ̄ sūāā nu̍a̍ā yɛ̍.

⁸O̍o̍ Mɛ̄lɛ̄ka̍ Ya̍a̍wɛ̄ɛ̄, na̍a̍ ni̍, māsāa̍ nāā bɛ̍ndūa̍a̍ ni̍, wānāā nāā bɛ̍ndūa̍a̍ ni̍, fi̍nyāā nāā ma̍māa̍ ni̍, na̍a̍ kpo̍u̍ si̍ɔ̍mbu̍la̍ŋ lā chō na̍a̍ lā bīyāā. Kāni̍ fo̍ndōle̍, ŋ̄ tōsa̍ yɔ̄ŋ wɔ̄ɔ̍ŋndo̍ a̍ nūm.

⁹Kɛ̍ nūm māsānɔ̄ɔ̍ Mɛ̄lɛ̄ka̍ nāa̍, mi̍ chē bɛ̍ɛ̍ mi̍ ŋ̄ sīmūl nu̍m, kɛ̍ ā chō na̍a̍ īnyīɛ̍ɛ̍ tūīīnɔ᷄ŋ, mā ma̍l na̍a̍ le̍ yɔ̄ŋndā nāāla̍ wɔ̍ɔ̍ŋnda̍ŋ.

¹⁰Nūm Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍, ŋ̄ lo̍ o̍ ko̍ŋ mi̍ kɛ̄ɛ̄ nu̍m dīōm. Sāwāla̍ ŋ̄ ke̍ na̍a̍ sa̍na̍a̍ a̍ wānāa̍ su̍a̍ā le̍ Mɛ̄lɛ̄ka̍ wa̍ la̍ŋ, nda̍ yɔ̍nūŋ ni̍ māā bu̍ɛ̍i̍yāā nūmnda̍ la̍ŋ, ŋ̄ tōsa̍ nyɛ᷅ sāwāla̍la̍ŋ lā dīmi̍ wo̍ le̍.

¹¹Na̍a̍ wāŋnda̍ I̍sɔ̄lūɛ̄ī kpo̍u̍, ŋ̄ kɛ̄ɛ̍ nu̍m dīōm. Nyɛ̄ o̍ nyɛ̄ sāwāla̍ nu̍mnda̍ŋ lā dīmi̍ ŋ̄ kɛ̄ɛ̍ ndu̍ tōsāa̍. Le̍ sābū kōŋ, dɛ̍nɛ̍ pa̍lāā o̍ dɛ̍nɛ̍ pa̍lāā cho̍ ō pōōnyīāā o̍ yāu̍ lāsāwa̍ bu̍ɛ̍ī nūmndo̍ Mūu̍sē wo̍ ni᷄ŋ, ma̍ tōsā, mi̍ lā tūāl nāa̍ chōo̍. Kāni̍ fo̍ndōle̍, ŋ̄ tōsa̍ yɔ̄ŋ wɔ̄ɔ̍ŋndo̍ a̍ nūm.

¹²Na̍a̍ ni̍, māsāa̍ bɛ̍ndūa̍a̍ cho̍ na̍a̍ chīla̍ŋnda̍ ni̍, nyɛ̄ ŋ̄ dīmi̍ māā ā chō tōsā a̍ na̍a̍ wo̍, a̍ to̍sa̍ mbo̍ pīā lāsōndō. Nyɛ̄ pālāā ŋ̄ tūsi̍ na̍a̍ chōo̍ Chūlu̍sɛ̄lɛ̄m ndo̍, o̍ chi̍e̍ēŋndo̍ ni᷄ŋ kpo̍u̍ ō yɔ̄nu̍ŋ ndɔ̍ o̍ lēlɛ̄ŋ o̍ lēlɛ̄ŋ ni᷄ŋ te̍.

¹³Dɛ̍nɛ̍la̍ pa̍lāālā cho̍ lā pōōnyīāā o̍ yāu̍ lāsāwa̍ Mūu̍sē wo̍ ni᷄ŋ nda̍ŋ kpo̍u̍, ō pīlɛ̍ bɛ̍ɛ̍ bi̍ndu̍ na̍a̍ le̍. Kɛ̍ a̍ ko̍ŋ kpo̍u̍, Mɛ̄lɛ̄ka̍ Ya̍a̍wɛ̄ɛ̄, ŋ̄ me᷄l lɔ̍ yɔ̄ŋndā nāāla̍ wɔ̄ɔ̍ŋnda̍ mī ŋ̄ tōl dīōmndā nūmnda̍ tōnya̍la̍ŋ kɔ̄ɔ̄lī le̍.

¹⁴O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ na̍a̍, mɛ̄ɛ̍ ŋ̄ bɛ̄ɛ̄ndi̍a̍ŋ le̍ na̍a̍ nyɛ̄ pālāa̍ tūsīo̍o̍ chōo̍, a̍ ma̍ŋga̍la̍ kɔ̍l nūmndo̍ le̍, ma̍ tūsī na̍a̍ ndu̍ chōo̍. Kāni̍ fo̍ndōle̍, nūm Mɛ̄lɛ̄ka̍ Ya̍a̍wɛ̄ɛ̄ o̍ nyɛ̄ o̍ nyɛ̄ ni᷄ŋ wānā sa̍kpōo̍ ŋ̄ chō ni̍. Ndu̍yɛ̍, nyɛ᷄ bɛ̍nda̍ le̍ na̍a̍ wo̍, ndu̍ kpe̍e̍kpe̍i̍ ŋ̄ tōsa̍ ko̍ŋ ni̍. Kɛ̍ a̍ ko̍ŋ kpo̍u̍ ŋ̄ ye᷄ŋ nu̍m lānī le̍.

¹⁵“O̍o̍ Māsānɔ̄ɔ̍ Mɛ̄lɛ̄ka̍ nāa̍, a̍ kpāāyā nu̍m bɛ̄ndōo̍ ŋ̄ sōli̍ sīndɛ̄ wānāā nūmnda̍ I̍sɔ̄lūɛ̄ī o̍ lɛ̄ŋndē I̍chi̍pīle̍ŋ ni᷄ŋ ni̍, ma̍ tōsā mi̍ wānāā bɔ̍ɔ̍ bɔ̍ɔ̍ a̍ tu̍ɛ̍ī a̍ dīōlā nūmnda̍ŋ o̍kɔ̄ɔ̄, ndu̍yɛ̍ ha̍a̍a̍ mbo̍ bi̍ya᷅ŋ a̍ pāa̍le̍ hāūle̍ŋ nde᷅ŋ ā pu̍ɛ̍ɛ̍nūŋ a̍ dīōlā nūmnda̍ŋ te̍. Kɛ̍ na̍a̍ na̍a̍ hāū a̍ hāū, ŋ̄ chō wɔ̄ hīōūwɔ̄ɔ̍ lāchī a̍ yɔ̄ŋndā nāāla̍ wɔ̄ɔ̍ŋnda̍ŋ, ndu̍yɛ̍ a̍ dɛ̍nɛ̍ wɔ̄ɔ̍ŋndo̍ tōsāa̍ kɛ᷅.

¹⁶O̍o̍ Mɛ̄lɛ̄ka̍ Ya̍a̍wɛ̄ɛ̄, mɛ̄ɛ̍ ŋ̄ chō wāna̍ sa̍kpō yɛ̍, yāndi̍i̍ pɔ̍lu̍l kɔ᷅l nūmndo̍, du̍a̍u̍ŋnu᷄ŋ tu̍mbe̍ o̍ ka̍lā ka̍lā a̍ Chūlu̍sɛ̄lɛ̄m te̍. Chi̍e̍e̍ nu̍m cho̍ ō tāŋgūlāā o̍ pēmbīī nūm i̍ di̍a̍ndɛ̄i̍ chōo̍ wo̍ o̍ cho̍ ni̍. Wānāa̍ cho̍ o̍ lɛ̄ŋīi̍ ba̍lu̍ na̍a̍ ve̍ ni᷄ŋ nda̍ kpo̍u̍, ā sīīŋgu̍u̍ Chūlu̍sɛ̄lɛ̄m a̍ na̍a̍ ŋ̍ cho̍ wānāā nūmnda̍ wa̍ nyɛ̄ māmāa̍. Kāni̍ fo̍ndōle̍, le̍ yɔ̄ŋndā nāāla̍ wɔ̍ɔ̍ŋnda̍ŋ a̍ yɔ̄ŋndā wɔ̄ɔ̍ŋndā fi̍nyāā nāa̍.

¹⁷O̍o̍ Mɛ̄lɛ̄ka̍ nāa̍, I̍ nyɔ̍ɔ̍lu̍ nu̍m a̍ yāndi̍i̍, bu̍ɛ̍ī nūmndo̍ ya̍ I̍ cho̍ ni̍, tūe̍i̍ pi̍ɛ̍īlē nīle̍ŋ, ndu̍yɛ̍ mā to̍sa̍ a̍ sa̍bū mī wāŋnda̍ ke̍ nu̍m bɛ̄ɛ̄le̍ŋ. Yi̍ya̍ŋ chi̍ɛ̍ī nūmndo̍ chōo̍, chīɛ̄ī nūm so̍līāā lāsa̍lā cho̍ ho̍ō ō tāmbɛ̍i̍yo̍.

¹⁸O̍o̍ Mɛ̄lɛ̄ka̍ nu̍u̍, ya̍ŋ ni᷅la̍ŋ mā tūēī pīɛ̄īlē nāāle̍ŋ, to̍fa̍ mā chē dɛ̍nɛ̍ pa̍lāa̍ cho̍ Chūlu̍sɛ̄lɛ̄m chōo̍ wo̍, chi̍e̍e̍ dīōlā nūmnda̍ŋ lā chō chōo̍ wo̍. A̍ cho̍ na̍a̍ īnyīɛ̍ɛ̍ tūīīnɔ᷄ŋ le̍ sa̍kpōyɛ̍ī nāā le̍, kɛ̍ le̍ mɛ̄ɛ̍ ŋ̄ chō wāna̍ īnyīɛ̍ɛ̍ bɛ̄ndū yɛ̍.

¹⁹O̍o̍ Māsānɔ̄ɔ̍, tūe̍i̍ na̍a̍ dīōm. Mā ma̍l na̍a̍ le̍ yɔ̄ŋndā nāāla̍ wɔ̄ɔ̍ŋnda̍ŋ māsānɔ̄ɔ̍. Ya̍ŋ na̍a̍ nīla̍ŋ māsānɔ̄ɔ̍, mā ke̍le̍ŋa̍ īsɔ̄ɔ̍ to̍sā chɔ̍ chɔ̍ le̍ sa̍bū nūmndo̍. Kāni̍, wāŋnda̍ ha̍ā, wānāā nūmnda̍ nda̍ chō ni̍, ndu̍yɛ̍, chi̍o̍o̍ ho̍ō bɛ̍ɛ̍ chi̍e̍e̍ cho̍ le̍ nu̍m ndo̍ o̍ cho̍ ni̍.”

²⁰Mi̍ Da̍a̍ni̍ɛ̍ɛ̄ hi̍a̍ū lāchī a̍ pōōnyīa̍a̍ āā, “I̍ wa̍ yɔ̄ŋnda̍ nīla̍ wɔ̄ɔ̍ŋnda̍ŋ a̍ yɔ̄ŋndā wɔ̄ɔ̍ŋnda̍ wānāā nīa̍a̍ I̍sɔ̄lūɛ̄ī chɔ̄ɔ̄mūūwo̍ o̍ pīɛ̄īle̍ŋ ni᷄ŋ ndu̍yɛ̍, mi̍ wa᷅ Mɛ̄lɛ̄ka̍ Ya̍a̍wɛ̄ɛ̄ nyɔ̄ɔ̄lōo̍ le̍ mbō mūli̍ vɛ̄lɛ̄ hɔ̄lla̍ o̍ Chūlu̍sɛ̄lɛ̄m, chi̍e̍e̍ cho̍ o̍ pēmbīī dīāndɛ̄i̍ Mɛ̄lɛ̄kɛ̍i̍ chōo̍ wo̍.

²¹I̍ wa̍ pīɛ̄īlē lēŋ, mi̍ Ke̍e̍bi̍lɛ̄ ō ya̍ I̍ che᷅ o̍ yi̍lāŋ tāso̍o̍ ni᷄ŋ ndo̍, ō hūŋ nāa̍ ya̍ chu̍a̍ o̍ lēpīlɛ̍ ni᷄ŋ kpe̍, a̍ te̍le̍ŋ nda̍ sōlī sa̍lālā pāa̍le̍ cha̍lāāle̍ŋ ndo̍ ki̍nɛ̍i̍.

²²Mbo̍ dīmūl la̍ āā, ‘Da̍a̍ni̍ɛ̍ɛ̄, I̍ hi᷅ŋ le̍ mī I̍ hu̍ŋ ke᷅ nu̍m kɔ̄l kālo̍o̍ mā sɔ̍la̍ sīnā pɛ̄ŋgo̍o̍ a̍ sɔ̄ɔ̍ŋ ŋ̄ chē mu᷅ŋ ndo̍ŋ o̍kɔ̄ɔ̄.

²³Dīmīo̍o̍ nu̍a̍ā ma̍ kāndū pīɛ̄īle̍ŋ, mi̍ Mɛ̄lɛ̄ka̍ mūlī pīɛ̄īlē nūmnde̍ŋ. Ndu̍yɛ̍ nyɛ̄ o̍ mu̍li̍ wo̍ ndu̍ ya̍ I̍ hi᷅ŋ ho̍ō nu̍m dīmūl ni̍. Mɛ̄lɛ̄ka̍ kāāla̍ nu̍m ta̍u̍ ta̍u̍. Le̍la̍ŋ ya̍ŋ ni᷅la̍ŋ, mī I̍ chɔ̍m nu̍m tɛ̄ɛ̄sīa̍a̍ a̍ yi̍lāŋ ŋ̄ chē ho̍ō wo̍ o̍kɔ̄ɔ̄.

²⁴“ ‘Mɛ̄lɛ̄ka̍ kɛ̄ɛ̄si̍a̍a̍ māā le̍ yɔ̄ŋ wɔ̄ɔ̍ŋ wānāā nūmnda̍ ā to̍sa̍ wo̍ mɛ̄ɛ̍ mī wɔ̄sīla̍ŋ lā hīōū kɛ̄mɔ̄ɔ̍ le̍ hīɔ̍ɔ̍lu̍ a̍ be̍le̍-ŋɔ̍ma̍hīɔ̍ɔ̍lu̍ (490) ma̍lāŋ o̍ ba̍ŋā wa̍nāā nūmnda̍, a̍ chi̍e̍e̍ nyā di̍a̍ndāa̍ Chūlu̍sɛ̄lɛ̄m, mbō tōsa̍ mā pɛ̄ŋgi̍ yɔ̄ŋ wɔ̄ɔ̍ŋndo̍ tōsāa̍, mbō ma᷄l nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ, mbō chīi̍ dɛ̍nɛ̍ wɔ̄ɔ̍ŋndo̍ nda̍ tɛ̄ɛ̄ŋ, ndu̍yɛ̍ mbō tōsa̍ mī sa̍kpōyɛ̍i̍ wa̍ nda̍ tɛ̍ɛ̄ŋ le̍ fɛ̍ɛ̍ŋ a̍ fɛ̍ɛ̍ŋ, o̍ ko̍ŋ kɔ̍ɔ̍lī mbō tōsa̍, mī nyɛ̄ wāna̍ su̍a̍ā le̍ Mɛ̄lɛ̄ka̍ wo̍ ō dīmi̍ wo̍ o̍ yɔ̄nu̍ŋ, ndu̍yɛ̍, mbō tōsa̍ mā dīndi̍ fo̍ndāŋ cho̍ ō dīāndāā mbo̍ hīāū kpo̍u̍ o̍ chīɛ̍i̍ Mɛ̄lɛ̄ka̍a̍ ni᷄ŋ ndo̍.

²⁵I̍ ye̍e̍ma̍ nu̍m mā si̍na̍ he̍ī pɛ̄ŋgu̍ māā, chɔ̍ŋ a̍ te̍le̍ŋ Mɛ̄lɛ̄ka̍ dīmi̍ le̍ Chūlu̍sɛ̄lɛ̄m mīŋgī tāŋgūllo̍ wo̍, wɔ̄sīla̍ŋ lā chō hīōūwɔ̄ɔ̄ be̍le̍-hi̍ɔ̍ɔ̍lu̍ a̍ lā ŋɔ̄ma̍hīɔ̍ɔ̍lu̍, ndu̍yɛ̍ mī wɔ̄sīla̍ŋ lā hīōū vɛ̄lɛ̄ kɛ̄mɔ̄ɔ̍ lē hi̍ɔ̍ɔ̍lu̍ a̍ be̍le̍-ya̍a̍ a̍ lā hi̍ɔ̍ɔ̍lu̍ (434), ma̍lāŋ wāna̍ Mɛ̄lɛ̄ka̍ chūa̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ ō hūŋ. Chūlu̍sɛ̄lɛ̄m cho̍ hūnɔ̄ɔ̄ wā ō tāŋgūlāā a̍ nɛ̄īla̍ŋ lā kēyāā chi̍o̍o̍ tɛ̄ɛ̄ŋ, ndu̍yɛ̍ a̍ kpākīla̍ ka̍lā ka̍lā la̍ŋ ndu̍ lā bālāā. Kɛ̍ te̍le̍ŋ ko̍ŋ ō wā ni̍ŋ te̍le̍ŋ dɛ̍nɛ̍ pa̍lāā bɛ̄ndū.

²⁶Tē wɔ̄sīlā kɛ̄mɛ̄ le̍ hi̍ɔ̍ɔ̍lu̍, a̍ be̍le̍-ya̍a̍ a̍ lā hīɔ̍ɔ̍lu̍la̍ŋ lā chūū pɛ̍, ā chō wāna̍ Mɛ̄lɛ̄ka̍ pi̍la̍ o̍ hɛ̍li̍ wo̍ dīyɔ̄ɔ̄, ndu̍yɛ̍ ō mɛ̍ī ni̍ŋ wa᷅nā o̍ wānā mbō mīīŋgu̍ o̍ fōōfo̍ ndɔ̄ɔ̍ le̍. O̍ mɛ̄ɛ̄lu̍la̍ŋ, māsa̍ cho̍ hūnɔ̄ɔ̄ wā wāŋnda̍ chīla̍ŋndo̍, pūa̍a̍ ndūa̍a̍ chɔ̄ūwa̍ ā chō hūnɔ̄ɔ̄ Chūlu̍sɛ̄lɛ̄m a̍ chīɛ̍i̍ cho̍ le̍ Mɛ̄lɛ̄ka̍ wo̍ tɛ̄ɛ̄mbūū a̍ chɔ̄ūwo̍, mɛ̄ɛ̍ mɛ̄ŋmā hūna᷄ŋ mā tɛ̄ɛ̄mbūū nu̍a̍ā nyɔ̄ɔ̍ŋ yɛ̍. Dɛ̍nɛ̍ pa̍lāā Mɛ̄lɛ̄ka̍ kɛ̄ɛ̄si̍a̍a̍ wo̍, ndu̍ cho̍ ho̍ō ni̍.

²⁷Māsa̍ cho̍ ko̍ŋ wa᷅ wāŋnda̍ chīla̍ŋndo̍ ō chō kpe̍ma̍ ka̍lā ka̍lāa̍ yīī a̍ wānāā bɔ̍ɔ̍ bɔ̍ɔ̍ le̍ wɔ̄sīla̍ŋ lā ŋɔ᷄mmɛ̍ū. Tē wɔ̄sīlā ŋɔ᷄mmɛ̍ūla̍ŋ lā pīɔ̍u̍ pɛ̍ tɛ̍ɛ̄ŋ kpa̍la̍, ō chō sūɛ̍i̍ sa̍lāla̍ŋ a̍ kēlā wāŋnda̍ yɔ̄ŋgū la̍ŋ kūūnā. Mbō lo̍ kōŋ mbō hāndu̍ nyɛ̄ wɔ̄ɔ̍ŋ wɔ̄ɔ̍ŋ bɛ̄ndu̍ tɛ̍ɛ̍mbūū ni̍ŋ chi̍ɛ̍i̍ Mɛ̄lɛ̄ka̍a̍ mbō sōli̍ ndu̍ o̍ ba̍a̍ ni᷄ŋ ndo̍[6] o̍ chīɛ̍i̍ Mɛ̄lɛ̄ka̍a̍ tūllo̍ pɔ̍ pɔ̍, mī nyɛ̄ kōŋ lo̍ lo̍ŋ ha̍a̍a̍, mbō lo̍ o̍ ko̍ŋ mī Mɛ̄lɛ̄ka̍ o̍ ha̍ndu̍ māsāa̍ ho̍ō wo̍ ō chīi̍ a̍ māsā ka̍lāa̍ mɛ̄ɛ̍ ndu̍ pi̍la̍ Mɛ̍lɛ̄ka̍ dīmi̍ yɛ̍.’ ”