Read Southern Kisi Hōōsi̍a̍ā 10 Bible Online

Hōōsi̍a̍ā 10 - Southern Kisi bible

Hōōsi̍a̍ā 10

¹Wāŋnda̍ I̍sɔ̄lūɛ̄ī nda̍ a̍a̍ sūl sūllo̍ pīla̍. Ā wa̍ māwāā mɛ̄ɛ̍ yɔ̄m mākīle̍pīi̍yo̍ ō wā nu̍a̍ā o̍ lɛ̄ŋndē kɛ̄ndɛ̄le̍ŋ mbō kōm ta̍u̍ ta̍u̍ yɛ̍. Kɛ̍ mi̍ sūl ndā ko̍ŋ tōsā ma̍ chɔ̄ɔ̄lū ni̍ko̍ yɔ̍ŋgɔ᷄ŋ o̍ nyɛ̄m chēle̍ŋndo̍ŋ sōōlūūwo̍ ni᷄ŋ, mbo̍ hīāū māā pāāndū. Mɛ̄ɛ̍ nda̍ hīāū la̍chi̍ a̍ dɛ̍nɛ̍ kɛ̍ndɔ̄ɔ̍ sɔ̄lāa̍ yɛ̍, le̍nde̍ nda̍ chɔ̄ɔ̄lū ma̍āŋnda̍ŋ tāŋgūl le̍ sa̍lāla̍ŋ sōlīo̍o̍ o̍ mɛ̄lɛ̄ka̍ā ndāa̍ lo̍ ni̍. Tē chīɔ̄ɔ̄ŋ nda᷄ŋ ŋ̄ na᷄ŋ pɛ̍ mā sɔ̄la̍ nyɛ̄ dīa̍a̍ ta̍u̍ ta̍u̍, ā chɔ̄ɔ̄lu̍ mɛ̄lɛ̄ka̍ā ndāa̍ nda̍ tōōsi̍a̍a̍ māā māsūŋgbu̍ wa̍ bɛ̄ɛ̄ndīāā, ā tōōsi̍a̍a̍ nda̍ nyɛ̄ kɛ̄ndɛ̄ kɛ̍ndɛ̄ le̍ nda̍ sōōlūū wo̍.

²Kɔ̄ltā ndāla̍ŋ le̍ te̍le̍ŋ o̍ te̍le̍ŋ, lā chō lā pīāā a̍ yīya᷄ŋnda̍ hu̍i̍yāā wāŋndā chīe̍e̍ ya̍. Le̍ he̍ī, Mɛ̄lɛ̄ka̍ chō nda̍ dɛ̍nɛ̍ pa̍lāa̍ tūsī chōo̍ le̍ yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nda̍ tōsa̍. Mɛ̄lɛ̄ka̍ Ya̍a̍wɛ̄ɛ̄ chō hūnɔ̄ɔ̄ ma̍āŋndā nda̍ sōlī sa̍lāla̍ŋ o̍ Mɛ̄lɛ̄ka̍a̍ ndāa̍ lo̍ la̍ŋ la̍ŋ pēsī pēsī, o̍ ko̍ŋ kɔ̍ɔ̍lī, mɛ̄lɛ̄ka̍ā ndāa̍ nda̍ tōōsi̍a̍a̍ ka̍ŋ māā māsūŋgbu̍ wa̍, mbō tɛ̄ɛ̄mbu̍u̍ nda̍ kpo̍u̍.

³Wāŋnda̍ I̍sɔ̄lūɛ̄ī a̍ cho̍ hūnɔ̄ɔ̄ dīmī āā, “Le̍ mɛ̄ɛ̍ na̍a̍ ŋ̄ kɛ̄ɛ̍ sīōōŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍ nɔ̄ɔ̍ yɛ̍, nyɛ̄ kōŋ o̍ ma̍l na̍a̍ o̍ bā nāa̍ chōo̍ ni̍, ŋ̄ nɔ̍ lɛ̍ ma̍sā o̍ māsā na̍a̍ chōo̍ le̍. Kɛ̍ ndu̍yɛ̍ nda̍ a̍a̍ yɔ̍ŋ bɛ̍ɛ̍ mī na̍a̍ ŋ̍ nɔ̍ māsāa̍ nāa̍ chōo̍, mālā yɛ̄ɛ̍nɛ̍ māsā ko̍ŋ ndu̍ o̍o̍ ma̍lā yɛ̍ ni̍ŋ na̍a̍?”

⁴Wāŋnda̍ I̍sɔ̄lūɛ̄ī a̍ cho̍ wāŋnda̍ chōōla̍ŋ dīmūllo̍, o̍ ko̍ŋ kɔ̍ɔ̍lī, mā chūēl wa᷅ŋnda̍ būŋgāŋ lāchōōwa᷄ŋ, ndu̍yɛ̍ mā yīī kpe̍ma̍la̍ lāchōōwā la̍ŋ a̍ wāŋnda̍. Ma̍ lō o̍ ko̍ŋ ma̍ mūlī tōnya̍a̍ bāla̍ŋ a̍ mākɔ̄ɔ̄ o̍ kɔ̍ɔ̍sɔ̍la̍ ndāla̍ŋ ni᷄ŋ. Mɛ̄ɛ̍ wāŋndo̍ ō tūāl nu̍a̍ā tɔ̄lɔ̄ɔ̄ kɛ̄ndɔ̄ɔ̍ o̍ chīɛ̄ī ndūɛ̍i̍ ni᷄ŋ mī bīl ŋ̄yɔ̄ɔ̍ hɛ̄lū tɔ̄lɔ̄ɔ̄ kōŋ mbō tāmbu̍ yɛ̍, le̍nde̍ nda̍ mūli̍ tōnya̍a̍ ni̍.

⁵Sīōōŋīī bɛ̄ndūe̍i̍ chō hūnɔ̄ɔ̄ wāŋnda̍ Sāme̍e̍līāā chi̍e̍e̍ bi̍yɔ̄ɔ̄, ndu̍yɛ̍ o̍ ko̍ŋ kɔ̍ɔ̍lī, mī mɔ̍nɛ̍i̍ bīī nda̍ le̍ mɛ̄lɛ̄ka̍ nda̍ nda̍ tūūla̍ māā nāū fɔ̍ŋndɔ̍, mbo̍ wā Bɛ̍ta̍vīŋ chi̍e̍e̍ wo̍. Wānā o̍ wāna̍ so̍o̍lūū mɛ̄lɛ̄ka̍ ndā ko̍ŋ, o̍ ko̍ŋ kɔ̍ɔ̍lī, a̍ wānāa̍ so̍lī sa̍lāla̍ŋ o̍ ndu̍ lo̍ wa̍, nda̍ kpo̍u̍ ā chō hūnɔ̄ɔ̄ cha᷄ŋ mā kōŋu̍l chōo̍ cho̍o̍ kpe̍le̍ŋ. Kāni̍ fo̍ndōle̍, bɛ̄ɛ̄le̍ mɛ̄lɛ̄ka̍ ndā ko̍ŋ ndu̍ o̍o̍ nɔ̍ le̍ŋ, bɛ̄ɛ̄le̍ le̍ŋ lē chō hūnɔ̄ɔ̄ chūwɔ̄ɔ̄.

⁶Ya̍a̍mɔ̍ɔ̍wa̍ chō mɛ̄lɛ̄ka̍ ndā ko̍ŋ hūnɔ̄ɔ̄ chūā mā kūɛ̄ a̍ ndu̍ A̍ si̍i̍līāā, mā kɔ̍ ke᷅ māsā bɛ̍ndōo̍ Āsi̍i̍līāā māā kē, mbō wa̍ māā nyɛ̄ ndɔ̄. Tē wāŋnda̍ I̍sɔ̄lūɛ̄ī a̍ hu̍ŋ chɔ᷅ nyɛ᷄ yɔ̍nūŋ ni̍ŋ a̍ mɛ̄lɛ̄ka̍ nda̍ nda̍ tōl kɔ̄ɔ̄lī ma̍ tīīnda᷄ŋ ndu̍ wo̍ pɛ̍, si̍ɔ̍mbu̍la̍ bɛ̄ndūla̍ŋ lā chō nda̍ hūnɔ̄ɔ̄ bīyɔ̄ɔ̄, ā nɔ̍lā ni̍ŋ mā chūa̍ bōlle̍ŋ yu̍kpɛ̄ɛ̄ le̍.

⁷Wāŋnda̍ Sāme̍e̍līāā ni̍, māsa̍ ndā bɛ̍ndōo̍ ni̍, ya̍a̍mɔ̍ɔ̍wa̍ chō nda̍ hūnɔ̄ɔ̄ bāsɔ̄ɔ̄ tɛ̍ɛ̍ mā chīi̍ a̍ nda̍, mɛ̄ɛ̍ mɛ̄ŋmā hūna᷄ŋ mā hīāūnūŋ nu̍a̍ā a̍ nyāānda̍a̍ wānā de᷅l lɛ̍ ndu̍ lēhɔ̄l te̍ yɛ̍.

⁸Fo̍ndāŋndā lāsōōlu̍u̍la̍ cho̍ o̍ fo̍ndāŋ nda̍ vēēlū āā, A̍vīŋ,[7] mī wāŋnda̍ I̍sɔ̄lūɛ̄ī a̍ ku̍ā mɛ̍lɛ̄ka̍a̍ ndāa̍ sōōlūūwo̍ lo̍ŋ nda̍ŋ, fo̍ndāŋndā lāŋ kpo̍u̍ ā chō la̍ŋ hūnɔ̄ɔ̄ tɛ̄ɛ̄mbūū. Ma̍āŋndā nda̍ sōlī sa̍lāla̍ŋ o̍ mɛ̄lɛ̄ka̍ā ndāa̍ lo̍ la̍ŋ kpo̍u̍, lā chō hūnɔ̄ɔ̄ tāmbu̍, mī lā sīmnu᷄ŋ bi᷅l ŋ̄yɔ̄ɔ̍ kpo̍so̍ŋ. A̍ te̍le̍ŋ ko̍ŋ, wāŋnda̍ I̍sɔ̄lūɛ̄ī a̍ di̍mūl ni̍ŋ pēmbūŋ bɛ̄ndo̍ŋ āā, “Hu̍ŋ ku̍mbū na̍a̍,” o̍ ko̍ŋ kɔ̍ɔ̍lī, mā dīmu̍l pēmbūŋ pɔ̄mbɔ᷄ŋ āā, “Hu̍ŋ de᷅l na̍a̍ chōo̍.”[8]

⁹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋnda̍ I̍sɔ̄lūɛ̄ī, kāni̍ mi̍ lā kāndū yɔ̄ŋ wɔ̄ɔ̍ŋndo̍ tōsāa̍ Ki̍bīāā chi̍e̍e̍, lēni᷄ŋ nya̍ chō wɔ̄ kɛ᷅ ni̍, mīīŋga᷅ŋ bɛ̍ɛ̍ lā cho̍ kɔ̍ɔ̍lī le̍, hīōūwɔ̄ɔ̍ tu̍ŋ nya̍ chō lāchī a̍ la̍ŋ tōsāa̍ ni̍. Le̍ he̍ī, I̍ cho̍ tōsā mī ya̍a̍mɔ̍ɔ̍wa̍ ā hu᷄ŋ chi᷅ŋa̍la᷅ŋ nya̍ Ki̍bīāā chi̍e̍e̍.

¹⁰I̍ cho̍ ya̍a̍mɔ̍ɔ̍wa̍ yɔ̄ŋ mā hu᷄ŋ chi᷅ŋa̍la᷅ŋ nya̍, mī to̍sa̍ mā tūsi̍ nya̍ nyɛ̄ pālāa̍ chōo̍, kāni̍ fo̍ndōle̍, le̍ yɔ̄ŋndā nyāla̍ wɔ̍ɔ̍ŋnda̍ŋ. I̍ cho̍ tōsā mī lɛ̄ŋnde̍ ī yīīna᷅ŋ na̍a̍ pi᷅lɛ̍ mī ī hu᷄ŋ de᷅l nya̍ chōo̍, mā tūsi̍ nya̍ nyɛ̄ pālāa̍ chōo̍, fo̍ndōle̍, le̍ yɔ̄ŋndā wɔ̄ɔ̍ŋndā nya̍ chō hīōūwɔ̄ɔ̍ lāchī a̍ tōsāa̍ la̍ŋ.

¹¹“I̍sɔ̄lūɛ̄ī o̍ wa̍ māwāā mɛ̄ɛ̍ nāū nda̍ pɛ̄ɛ̄kū ho̍ō nyɛ̄ kɛ̄ndɛ̄ kɛ̍ndɛ̄ le̍ mālūŋ ku̍a̍u̍wa̍ŋ nɛ̄īyo̍, le̍ te̍le̍ŋ o̍ te̍le̍ŋ ō chō ō bɛ̄ɛ̄ndīa̍ŋ, a̍ kɔ̄l ndɔ̄ɔ̍ kpo̍u̍ le̍ māālo̍ŋ nɛ̄īyo̍ wo̍ ō wā yɛ̍. Kɛ̍ I̍ cho̍ tōsā mī I̍sɔ̄lūɛ̄ī o̍ si̍mnu᷄ŋ mɛ̄ɛ̍ nāūvāā nda̍ wōū ha̍ā yɔ̄mnde̍ o̍ ŋ̄kɛ̄su̍, mā bɛ̄ɛ̄ndi̍a̍a̍ nda̍ le̍ wāa̍ wa̍ ā wā yɛ̍. Chu̍dā nda̍ I̍sɔ̄lūɛ̄ī a̍ cho̍ sīmnɔ᷄ŋ mɛ̄ɛ̍ nāūvāā nda̍ bɛ̄ɛ̄ndīāā ha̍ā le̍ wāa̍ wa̍ ā wā yɛ̍.

¹²Mi̍ di̍mūl nya̍ ma̍a̍, wāŋnda̍ I̍sɔ̄lūɛ̄ī, lā tīu̍ to᷅nya̍a̍ tōsāa̍ mɛ̄ɛ̍ wāŋndo̍ ō sāŋ nu̍a̍ā tɔ̄lɔ̄ɔ̄ ndɔ̄ɔ̍ o̍ chīɛ̍i̍ ni᷄ŋ yɛ̍. O̍ ko̍ŋ, mī lā kōū dɛ̍nɛ̍ kɛ̍ndɛ̄ nya̍ nɔ̄ mī lā sɔ̄la̍ le̍ tūsi᷄ŋndo̍ o̍ dīōm nūu̍ bɛ̄ŋgu̍ wo̍. Te̍le̍ŋndo̍ ho̍ō nya̍ nɔ̄ ni̍, mī lā mīīŋgu̍ ya̍ o̍ ībūŋ, ya̍ Mɛ̍lɛ̄ka̍ nyāa̍ Ya̍a̍wɛ̄ɛ̄. Tē lā mīīŋgu̍ ya̍ o̍ ībūŋ pɛ̍, I̍ cho̍ tōsā mī sa̍lā nī bɛ̍ndōo̍ ō tōl nya̍ chōo̍, mɛ̄ɛ̍ pīɔ̍ɔ̍ ō tūāl nu̍a̍ā yɛ̍, ndu̍yɛ̍ mī chi̍i̍ndi̍a̍a̍ nya̍.

¹³Kɛ̍ mi̍ lā lō o̍ ko̍ŋ mi̍ lā sāŋ dɛ̍nɛ̍ wɔ̍ɔ̍ŋndo̍. Ndu̍yɛ̍ mɛ̄ɛ̍ nya̍ sa᷄ŋ dɛ̍nɛ̍ wɔ̍ɔ̍ŋndo̍, mi̍ lā kūāū ka̍fāla̍ŋ, ndu̍yɛ̍ o̍ ko̍ŋ kɔ̍ɔ̍lī, mi̍ lā dīā kɔ̄mndē nya̍ sɔ̄la̍ o̍ chōōlā nyāla̍ŋ ni᷄ŋ nde̍ŋ. “Yɔ̄ŋi̍ nya̍ a̍a̍ ti̍i̍nda̍ŋ ya̍ Mɛ̍lɛ̄ka̍ yɛ̍, mi̍ lā tīīnda᷄ŋ nyɛ᷅m nya̍ŋ chɔ̄ūwo̍ŋ, o̍ ko̍ŋ kɔ̍ɔ̍lī, a̍ so̍vɛ̄i̍ya̍a̍ nyāa̍ kpāāyāā bɛ̍ndūa̍a̍ le̍ nya̍ māndāa̍.

¹⁴Le̍ he̍ī, I̍ cho̍ tōsā mī ya̍a̍mɔ̍ɔ̍wa̍ ā hu᷄ŋ chi᷅ŋa̍la᷅ŋ wa̍nāā nyāa̍ a̍ sɔ̍ŋgɔ̄ɔ̍, ndu̍yɛ̍ kpākīla̍ nyāla̍ ka̍lā ka̍lālā bɛ̄ŋnda̍ŋ kpo̍u̍, mā pēsi̍ pe̍si̍ la̍ŋ. Ī yɔ̄nūŋ ni̍ŋ ko̍ a̍ nya̍, mɛ̄ɛ̍ i̍ yɔ̍nu̍ŋ a̍ chi̍e̍e̍ bɛ̍ndōo̍ Bɛ̄ta̍a̍bɛ̄l, bōōndi̍i̍ Māsāa̍ Si̍a̍li̍māŋ o̍ kɔ̍ de᷅l ndu̍ chōo̍ a̍ sɔ̍ŋgɔ̄ɔ̍ mbo̍ tɛ̄ɛ̄mbūū ndu̍ kpo̍u̍ ve̍ yɛ̍. O̍ sɔ̍ŋgɔ̍ kōŋ ni᷄ŋ, wāŋ lāāndūāā nda̍ a̍a̍ nɔ̍ chɛ̄lɛ̄kpi̍a̍a̍ o̍ lābā wa̍ ni̍, chɛ̄lɛ̄kpi̍a̍a̍ ndāā ka̍ŋ ni̍, ma̍ dīū nda̍ kpo̍u̍, ō nda̍ bīī ko̍, ā vīɔ̄l ndu̍ lɛ̄ŋ ō wū.

¹⁵Nu̍a̍ā ko̍ i̍ yɔ̍nūŋ ni̍ŋ a̍ nya̍ ni̍, nya̍ wāŋnda̍ Bɛ̍tɛ̄ɛ̄l, kāni̍ fo̍ndōle̍, yɔ̄ŋndā wɔ̄ɔ̍ŋndā nya̍ chō tōsāa̍ la̍ŋ lā chō lā bɔ̄ɔ̍. Ndu̍yɛ̍ tē pāa̍le̍ le̍ŋ lē fūūlu̍u̍ pɛ̍, māsā bɛ̍ndōo̍ I̍sɔ̄lūɛ̄ī o̍ nɔ̍lā ni̍ŋ mbō hɛ̄lu᷄ŋ te̍, ā chō ndu̍ dīyɔ̄ɔ̄.”