Read Southern Kisi Hōōsi̍a̍ā 11 Bible Online

Hōōsi̍a̍ā 11 - Southern Kisi bible

Hōōsi̍a̍ā 11

¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Ō cho̍ ha̍ū le̍, ya̍ I̍ ka̍ndu̍ I̍sɔ̄lūɛ̍i̍ kāālāa̍ chɔ̄mndo̍ le̍, sīndɛ̄ pa̍, bōōndi̍i̍ o̍ wa̍ wɔ̄ chūāāmbɔ̄ pɔ̄mbɔ̄ ve̍. Mi̍ chu̍ā ndu̍ māā po̍ ni̍, mi̍ lo᷅ o̍ ko̍ŋ mi̍ so̍lī ndu̍ nāa̍ o̍ wa̍ I̍chi̍pī wa̍.

²Kɛ̍ ma̍ lō o̍ ko̍ŋ ma̍ kɛ̄ɛ̄ ya̍, mɛ̄ɛ̍ ya̍ I̍ ve̍e̍lu̍ nda̍ kpo̍u̍ le̍ mī to̍sa̍ mā nāŋnu̍ŋ ya̍ o̍ ībūŋ, le̍nde̍ nda̍ chɔ̄ɔ̄lū ya̍ fāŋa᷄ŋ o̍ ŋ̄dīāl ni̍. Ma̍ lō o̍ ko̍ŋ, ma̍ mūli᷄ŋ sa̍lāla̍ŋ sōlīo̍o̍ o̍ Bāāl lo̍, o̍ ko̍ŋ kɔ̍ɔ̍lī, mā lūām nyɛ᷅m chūŋ kɛ̄ndɔ᷄ŋ o̍ nyɛ̄m chēle̍ŋ nda̍ sōōlūū māā mɛ̄lɛ̄ka̍ā nda̍ wo̍ŋ ndo̍.

³Ya̍ ma̍nda̍ I̍sɔ̄lūɛ̍i̍ ni̍, mi̍ so̍lī ndu̍ lēni᷄ŋ. Tē ō wa̍ māā īsɔ̄ɔ̍ pɛ̍, mɛ̄ɛ̍ wāŋndo̍ pɛ̄ɛ̄kū nu̍a̍ā chūā ndɔ̄ɔ̍ kɔ̄la̍ŋ, mbō lo̍ ndu̍ māndāa̍ ha̍a̍a̍, mbō fūla̍ lēni᷄ŋ yɛ̍, le̍nde̍ ya̍ I̍ ma̍nda̍ ndu̍ ni̍. Kɛ̍ mbo̍ kɛ̄ɛ̄ le̍ sīnāa̍ māā ya̍ Mɛ̍lɛ̄ka̍, ya̍ ma̍nda̍ ndu̍ ni̍ mi̍ so̍lī nda̍ lēni᷄ŋ.

⁴Mi̍ lo̍ o̍ ko̍ŋ, mi̍ na̍nu᷄ŋ ndu̍ o̍ ībūŋ a̍ ndu̍ sɔ̄ɔ̍ŋ kɛ̍ndɔ᷄ŋ tōsāllo̍, o̍ ko̍ŋ kɔ̍ɔ̍lī mī chɔ᷅m ndu̍ kāālāa̍. Mɛ̄ɛ̍ kāla̍ chūa̍a̍ ō wā nu̍a̍ā a̍ chūā ndɔ̄ɔ̍, tē ō wa̍ cha᷄ŋndo̍ pɛ̍, ō chūa̍ ndu̍ ō hāndu̍ŋ ndu̍ o̍ chōŋgu̍, o̍ ko̍ŋ kɔ̍ɔ̍lī, tē yīa̍a̍ŋ mā wa̍ ndu̍ nɛ̄īyo̍ pɛ̍, ō cha᷄l ō ke̍ ndu̍ nyɛ̄ dīa̍a̍ yɛ̍, le̍nde̍ ya̍ I̍ bi̍ī I̍sɔ̄lūɛ̍i̍ ni̍.”

⁵“Kɛ̍ a̍ ko̍ŋ kpo̍u̍, ā chɛ᷄l mā mīīŋgu̍ ya̍ o̍ ībūŋ te̍. Le̍ he̍ī, I̍ cho̍ tōsā mā mīīŋgu̍ a̍ nda̍ o̍ chɛ̄le̍ŋ ni᷄ŋ I̍chi̍pī, ndu̍yɛ̍ o̍ ko̍ŋ kɔ̍ɔ̍lī, mī to̍sa̍ mā wa̍ Āsi̍i̍līāŋnda̍ o̍ bā bɛ̄ŋgu̍.

⁶I̍ cho̍ tōsā mī ya̍a̍mɔ̍ɔ̍wa̍ hu᷄ŋ de᷅l chi̍e̍e̍ŋ nda᷄ŋ chōo̍, ma̍ pēsi̍ pe̍si̍ dīōlā sāāsāla̍ ba̍lu̍ chi̍e̍e̍ŋ nda᷄ŋ nda̍ŋ, ndu̍yɛ̍ o̍ ko̍ŋ kɔ̍ɔ̍lī mā tɛ̄ɛ̄mbu̍u̍ nda̍ kpo̍u̍. Tūūlā ndāla̍ŋ kpo̍u̍ lā chō hūnɔ̄ɔ̄ tāmbu̍.

⁷Mi̍ chu̍ā wāŋnda̍ I̍sɔ̄lūɛ̄ī māā wānāā nīa̍a̍ nda̍ chō ni̍, kɛ̍ ma̍ kɛ̄ɛ̄sīāā a̍ kɔ̄ltā ndāla̍ŋ kpo̍u̍ le̍ ya̍ Mɛ̍lɛ̄ka̍ kīɔ̍ɔ̍. Kɛ̍ te̍le̍ŋ cho̍ hūnɔ̄ɔ̄ fūūlūū, ā chāŋ ni̍ŋ le̍ mālāa̍ le̍ wāna̍ fa̍ŋa̍ nda̍ wōlɔ̄ɔ̄lā lūsūlāāla̍ cho̍ nda̍ o̍ lēbōl ta̍ŋ, kɛ̍ ā sɔ̍lā ni̍ŋ wa̍nā o̍ wa̍nā o̍ fa̍ŋā nda̍ la̍ŋ ni̍ŋ o̍ lēbōl te̍ la̍ŋ.

⁸“Wāŋnda̍ I̍sɔ̄lūɛ̄ī, mi̍ chē bɛ̍ɛ̍ mi̍ lā kɛ̄ɛ̄ ya̍, kɛ̍ I̍ me̍l nya̍ le̍nde̍ wa̍ŋ wa̍ŋ te̍. I̍ nɔ̍lā mī fa̍ŋa̍ nya̍ bāa̍ chōo̍ le̍nde̍ mī chi̍i̍ ni̍ko̍ a̍ nya̍ le̍. I̍ ve̍sā kōllo̍ mī tɛ̍ɛ̍mbu̍u̍ nya̍ mɛ̄ɛ̍ ya̍ I̍ tɛ̍ɛ̍mbu̍u̍ wāŋnda̍ A̍di̍māā yɛ̍ le̍. I̍ nɔ̍lā mī bi̍ī nya̍ mɛ̄ɛ̍ ya̍ I̍ bi̍ī wāŋnda̍ Sɛ̍bo̍yīm yɛ̍ le̍. I̍ bi̍ī kɔ᷅llo̍ mī to̍sa̍ ke̍ŋ a̍ nya̍ le̍, fo̍ndōle̍, kāālā ya̍ I̍ nɔ̍ le̍ nya̍ wo̍ ō chō ō bɔ̄ɔ̍.

⁹Ā yɔ̍ŋ bɛ̍ɛ̍ mī dɔ̍ɔ̍nu᷄ŋ tu̍mbe̍ a̍ nya̍ o̍ ka̍lā ka̍lā, I̍ tu̍sī nya̍ nyɛ̄ pālāa̍ chōo̍ mɛ̄ɛ̍ ya̍ I̍ dɔ̍u̍nu᷄ŋ tu̍mbe̍ yɛ̍ le̍. I̍ bi̍ī lɛ̍ kɔ̄llo̍ mī tɛ̍ɛ̍mbu̍u̍ I̍sɔ̄lūɛ̍i̍ le̍nde̍ le̍, kāni̍ fo̍ndōle̍, ya̍ Mɛ̍lɛ̄ka̍ ya̍ cho̍ ni̍, yīya᷄ŋ nūu̍ o̍ cho̍ māā yīya᷄ŋ wāna̍ chi̍e̍e̍ le̍. Mi̍ chē bɛ̍ɛ̍ mi̍ wa᷅ nya̍ tɛ̄ɛ̄ŋ, kɛ̍ wānā di̍a̍ndāa̍ ya̍ chō nya̍ tɛ̄ɛ̄ŋ ni̍. I̍ nɔ̍lā mī dɔ̍u̍nu᷄ŋ tu̍mbe̍ a̍ nya̍ mī tɛ̍ɛ̍mbu̍u̍ nya̍ le̍nde̍ kpo̍u̍ le̍.

¹⁰“Te̍le̍ŋ cho̍ fūūlūū, mī hu̍ŋ wa᷅ ya̍a̍mɔ̍ɔ̍wa̍a̍ wānāā nīa̍a̍ pɛ̄ɛ̄līa̍a̍ chōo̍, mɛ̄ɛ̍ kpɔ̍kūŋ fɔ̍ŋndɔ̍ɔ̍ ō bīī nu̍a̍ā nyɔ̄ɔ̍ mbō wa̍ ndu̍ pɛ̄ɛ̄līa̍a̍ chōo̍ yɛ̍. A̍ te̍le̍ŋ ko̍ŋ, chūāūwāā nīa̍a̍ kpo̍u̍ ā chō mīīŋgū nāa̍ ya̍ Mɛ̄lɛ̄ka̍ Ya̍a̍wɛ̄ɛ̄ chu̍a̍. Ā chō chɔ̄nɔ᷄ŋ ba᷅ pāa̍le̍ŋ lē dēllo̍, mā hīŋ a̍ nyīīyāa̍ kpa᷅kpā.

¹¹Mī ha̍ā chɛ᷄ŋ vɛ̍lɛ̄ o̍ lɛ̄ŋndē I̍chi̍pīle̍ŋ ni᷄ŋ ku̍ndā bɛ̄ndōo̍ mā hīŋ a̍ nyīīyāa̍, o̍ ko̍ŋ kɔ̍ɔ̍lī, mī ha̍ā chɛ᷄ŋ vɛ̍lɛ̄ o̍ lɛ̄ŋndē Āsi̍i̍līāāle̍ŋ ni᷄ŋ ku̍ndā bɛ̄ndōo̍ mā hīŋ a̍ kīlta̍ŋ. O̍ ko̍ŋ, nda̍ kpo̍u̍ mī mi̍ŋgi̍ nda̍ vɛ̄lɛ̄ o̍ chi̍e̍e̍ŋ nda᷄ŋ. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ di̍mi̍ ni̍.”

¹²Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋnda̍ I̍sɔ̄lūɛ̄ī a̍ lo̍ o̍ ko̍ŋ ma̍ sīmnu᷄ŋ wa̍nāā lāchōōwā ya̍ Mɛ̍lɛ̄ka̍ o̍ hɔ̄l, ndu̍yɛ̍ ma̍ sīmnu᷄ŋ wa̍nāā hūīyāā ŋ̄wāŋ. O̍ ko̍ŋ kɔ̍ɔ̍lī, mi̍ wāŋnda̍ Chu̍dā nda̍ wā hīōūwɔ̄ɔ̍ lāchī a̍ ya̍ Mɛ̍lɛ̄ka̍ cho̍ sa̍kpō, ndu̍yɛ̍ mi̍ wa᷅ Mɛ̄lɛ̄ka̍ dīāndāa̍ wo̍ dīōmndo̍ sōlīo̍o̍.”