Read Southern Kisi Hōōsi̍a̍ā 12 Bible Online

Hōōsi̍a̍ā 12 - Southern Kisi bible

Hōōsi̍a̍ā 12

¹“Nyɛ̄ o̍ nyɛ̄ wāŋnda̍ I̍sɔ̄lūɛ̄ī a̍ cho̍ nūūvīa̍a̍, hūēīyīī fo̍ndūe̍i̍ ko̍ni̍ o̍ cho̍ ni̍. Ndu̍yɛ̍ nyɛ̄ o̍ nyɛ̄ nda̍ nīīlū kɔ̄lta̍ŋ kɔ̄ɔ̄lī, ō chō māchūāā mɛ̄ɛ̍ wāŋndo̍ ō wā nu̍a̍ā hūēīye̍ kīlta̍ŋ kɔ̄ɔ̄lī yɛ̍. Le̍ te̍le̍ŋ o̍ te̍le̍ŋ ā chō hīōūwɔ̄ɔ̍ lāchī a̍ wāŋnda̍ hūīyo̍, ndu̍yɛ̍ o̍ ko̍ŋ kɔ̍ɔ̍lī, mā dēl wa᷅ŋnda̍ chōo̍ le̍ nda̍ nyɛ̄m nda᷄ŋ pōōndi̍a̍a̍ o̍ lābā. Ā bīī pɛ̍ ā tōsa̍ chɛ̄la᷅ŋ lēyākōo̍ a̍ wāŋnda̍ Āsi̍i̍līāā, kɛ̍, mā mālnu᷄ŋ, mā kūā chu̍ɛ̍i̍mā ɔ̍līfīi̍ma̍ nda᷄ŋ pīsīo̍o̍ wāŋnda̍ I̍chi̍pī o̍ bā.”

²Mɛ̄lɛ̄ka̍ Ya̍a̍wɛ̄ɛ̄ o̍ nɔ̍ sūɛ̍i̍ īkālā ka̍lā a̍ wāŋnda̍ Chu̍dā. Ndu̍yɛ̍ ō dīmi̍ māā ō chō yu̍ŋgu̍ Che̍kɔ̍pū wo̍ nyɛ̄ pālāa̍ tūsī chōo̍, fo̍ndōle̍, le̍ yɔ̄ŋndā wɔ̄ɔ̍ŋndā nda̍ chō tōsāa̍ la̍ŋ. Yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nda̍ tōsa̍, ā chō hūnɔ̄ɔ̄ pāāwā kōŋ chūā.

³Wāŋnda̍ I̍sɔ̄lūɛ̄ī, ka̍a̍ Che̍kɔ̍pū fi̍nyā ndā ma̍mā wo̍, ndu̍ nda̍ tōl kɔ̄ɔ̄lī ni̍. Che̍kɔ̍pū ndu̍ o̍o̍ vi̍lu̍ŋ ndɔ̍ bɛ̍ɛ̍ le̍, mbo̍ kāndū sɔ̍ŋgɔ̄ɔ̍ a̍ I̍īsɔ̄ bɛ̍ ndɔ̄ kālā nda̍ o̍ dēmbē.[9] Ndu̍yɛ̍ mɛ̄ɛ̍ o̍ ve̍lu᷄ŋ mbo̍ sūl lāŋu̍nɔ̄ ka̍lā, mbo̍ sɔ̄ŋgā vɛ̄lɛ̄ a̍ Mɛ̄lɛ̄ka̍.

⁴Mbo̍ sɔ̄ŋgā a̍ ki̍i̍la̍nɔ̍ Mɛ̄lɛ̄ka̍a̍, ndu̍yɛ̍ mbo̍ yām ki̍i̍la̍nɔ̍ Mɛ̄lɛ̄ka̍ kōŋ. O̍ ko̍ŋ kɔ̍ɔ̍lī, mbo̍ chāŋ nāa̍ Mɛ̄lɛ̄ka̍ chūā, mbo̍ nyūnā Mɛ̄lɛ̄ka̍ le̍ mbō dɔ̄ū ndu̍ sa̍lā. Mi̍ Mɛ̄lɛ̄ka̍ hūŋ nāa̍ ndu̍ chu̍a̍ Bɛ̍tɛ̄ɛ̄l, mbo̍ hu᷄ŋ so̍ō nāa̍ ndu̍ chu̍a̍ lo̍ŋ.[10]

⁵Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ndu̍ so̍ō sūɛ̍i̍ ke̍ŋ nāa̍ ndu̍ chu̍a̍ ni̍. Ndu̍yɛ̍ Mɛ̄lɛ̄ka̍ kōŋ, dīōlā ndɔ̄la̍ na̍a̍ ŋ̄ nɔ̄ mī ŋ̄ vēēlu̍ ndu̍ o̍ sōōlūūwo̍ ni᷄ŋ nda̍ŋ, la̍ŋ la̍ cho̍ ni̍, āā Mɛ̄lɛ̄ka̍ Ya̍a̍wɛ̄ɛ̄.

⁶Le̍la̍ŋ nya̍ yu̍ŋgu̍ Che̍kɔ̍pū wo̍, lā mīīŋgu̍ nāa̍ Mɛ̄lɛ̄ka̍ nyāa̍ chūā, mī lā dɔ̄ū tīīnda̍ŋ nyāa̍ o̍ ndu̍ ni̍ŋ. Lā tūsi̍ŋ o̍ dīōm ndɔ̄ɔ̍ bɛ̄ŋgu̍, ndu̍yɛ̍ mī lā wa̍ ndu̍ o̍ hɔ̄l sa̍kpō, o̍ ko̍ŋ kɔ̍ɔ̍lī, mī lā chu᷄m ndu̍ o̍ īsɔ̄ɔ̍ o̍ īsɔ̄ɔ̍ ni᷄ŋ, le̍ te̍le̍ŋ o̍ te̍le̍ŋ.

⁷Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wānāā lēyākūa̍a̍ I̍sɔ̄lūɛ̄ī a̍ cho̍ wāŋnda̍ ka̍fālā tōsāllo̍ o̍ wɔ̄ŋgūla̍ŋ ni̍ŋ. Ā chɛ᷄ŋ pɛ̍ ā chūa̍ sēke̍lēi̍la̍ wɔ̍ɔ̍ŋnda̍ŋ le̍ wāŋnda̍ dīo̍o̍ o̍ wɔ̄ŋgūla̍ŋ ni᷄ŋ,

⁸o̍ ko̍ŋ kɔ̍ɔ̍lī, mā dīmī āā, ‘Yākōle̍ŋ lē nɔ̄ tɔ̄nɔ̄ɔ̍ bɔ̄ɔ̍. Yākōle̍ŋ lē tōsa̍, mi̍ ŋ̄ sūl, mi̍ ŋ̄ pīālnu᷄ŋ la̍di̍o̍. Ndu̍yɛ̍ o̍ yākōle̍ nāāle̍ŋ nde᷅ŋ ni᷄ŋ, wānā o̍ wānā nɔ̍lā mbō dīmi̍ māā ka̍fālā wāā nu̍a̍ā le̍ nda̍ tōsa̍l la̍ le̍.’

⁹Kɛ̍ ndu̍yɛ̍ nya̍ wāŋnda̍ I̍sɔ̄lūɛ̄ī, ya̍ Mɛ̍lɛ̄ka̍ Ya̍a̍wɛ̄ɛ̄ ya̍ cho̍ Mɛ̄lɛ̄ka̍ nyāa̍ ni̍, o̍ so̍li̍ nya̍ o̍ lɛ̄ŋndē I̍chi̍pīle̍ŋ ni᷄ŋ ndo̍. Le̍ nyɛ̄ nya̍ chō tōsāa̍ wo̍, I̍ cho̍ tōsā mī lā mīīŋgu̍ vɛ̄lɛ̄ lūa̍a̍ŋ o̍ tɛ̍ndɛ̄i̍la̍ŋ ni᷄ŋ, mɛ̄ɛ̍ nya̍ lɔ̄l o̍ tɛ̍ndīi̍la̍ŋ ni᷄ŋ a̍ te̍le̍ŋnda̍ nyāla̍ lābɔ̄ŋa᷅ŋnda̍ŋ yɛ̍.

¹⁰“Mi̍ vi̍ām wānāa̍ su̍a̍ā le̍ ya̍ wa̍ nāa̍ nya̍ chūā a̍ yōōŋgūlā nīla̍ŋ, mi̍ chɔ᷅m nda̍ yi̍lāŋndā bɔ̄ɔ̍ bɔ̍ɔ̍, ndu̍yɛ̍ o̍ ko̍ŋ kɔ̍ɔ̍lī, mi̍ ke᷅ vɛ̄lɛ̄ nda̍ sīlālā bɔ̄ɔ̍ bɔ̍ɔ̍ o̍ tāle̍la̍ŋ ni᷄ŋ le̍ nyā.

¹¹Kɛ̍ a̍ ko̍ŋ kpo̍u̍, mi̍ lā wā wɔ̄ hīōūwɔ̄ɔ̍ lāchī a̍ nyɛ̄m fo̍ndo᷄ŋ sōōlūūwo̍ Ki̍li̍a̍a̍dī chi̍e̍e̍, o̍ ko̍ŋ kɔ̍ɔ̍lī, mī lā sōlī na̍u̍vāā fɔ̍ŋndu̍a̍a̍ sa̍lāla̍ŋ o̍ nyɛ̄m mu᷅ŋ ndo̍. Kɛ̍ ndu̍yɛ̍ wānāa̍ cho̍ ka̍ŋ nyɛ᷅m mu᷅ŋ sōōlūūwo̍ wa̍ ki̍nɛ̍i̍, ā chō hūnɔ̄ɔ̄ pīɔ̍mndo̍ sɔ̄lā. Ndu̍yɛ̍ ma̍āŋndā nda̍ chō la̍ŋ sa̍lāla̍ŋ sōlīo̍o̍ lēchōo̍ la̍ŋ, la̍ŋ kpo̍u̍ lā chō hūnɔ̄ɔ̄ sīmnɔ᷄ŋ mɛ̄ɛ̍ pōūta̍ŋ lā wā nu̍a̍ā ku̍ndāla̍ŋ o̍ hōo̍la̍ŋ ni᷄ŋ yɛ̍.” Nyɛ̄ Mɛ̄lɛ̄ka̍ dīmi̍ wo̍ cho̍ ko̍ŋ ni̍.

¹²Bōōndi̍i̍ Che̍kɔ̍pū fi̍nyā nāā ma̍mā o̍ wa̍ bɛ̄ ndɔ̍ nyāānɔ᷄ŋndo̍ ve̍, mbo̍ kūānu᷄ŋ o̍ lɛ̄ŋndē Mɛ̄sōpōte̍e̍mīāāle̍ŋ ni᷄ŋ. Le̍ mbō sɔ̄la̍ la̍nɔ̍ɔ̍ mɛ̄ɛ̍ mbo̍ sāŋgā fɛ̍ɛ̍ŋ sa̍ŋgāa̍ pīla̍. Le̍ wɔ̄sīlā fāŋgā ō chō sāa̍ wānā ko̍ŋ māndāa̍ le̍ mī wānā ko̍ŋ ō ke̍ ndu̍ chūā ndɔ̄ɔ̍ māā la̍nɔ̍.

¹³O̍ ko̍ŋ kɔ̍ɔ̍lī, mi̍ ī yɔ̄nu᷄ŋ mi̍ wāŋnda̍ I̍sɔ̄lūɛ̄ī a̍ ku̍ā I̍chi̍pī, ma̍ kɔ̍ si̍mnu᷄ŋ chīa̍a̍ lo̍ŋ. Mi̍ Mɛ̄lɛ̄ka̍ Ya̍a̍wɛ̄ɛ̄ o̍ yɔ᷅ŋ wāna̍ su̍a̍ā le̍ ndu̍ wo̍, le̍ mbō kɔ̍ so̍lī nda̍ o̍ chɛ̄lē lēŋ ni᷄ŋ, ndu̍yɛ̍ mbō mānda̍ nda̍.

¹⁴Kɛ̍ mi̍ wāŋnda̍ I̍sɔ̄lūɛ̄ī tɛ̍ɛ̍mbūū Mɛ̄lɛ̄ka̍ Ya̍a̍wɛ̄ɛ̍ kɔ̄l, ma̍ tōsā mbo̍ dūāūnu᷄ŋ tu̍mbe̍ a̍ nda̍ o̍ ka̍lā ka̍lā. Le̍ he̍ī, ā chō hūnɔ̄ɔ̄ dɛ̍nɛ̍ pa̍lāa̍ sɔ̄lā le̍ yɔ̄ŋndā ndāla̍ wɔ̍ɔ̍ŋnda̍ŋ. Māsānɔ̄ɔ̍ Mɛ̄lɛ̄ka̍ ndāa̍ chō nda̍ hūnɔ̄ɔ̄ nyɛ̄ pālāa̍ tūsī chōo̍, mbō pāāwa̍ nda̍ le̍ dīōlā ndɔ̄la̍ nda̍ tɛ̄ɛ̄mbu̍u̍ lābɛ̄ɛ̄ la̍ŋ. Ā nɔ̄ mā sɔ̄la̍ pīɔ̍mndo̍ le̍ nyɛ̄ nda̍ tōsa̍ wo̍.