Read Southern Kisi Hōōsi̍a̍ā 13 Bible Online

Hōōsi̍a̍ā 13 - Southern Kisi bible

Hōōsi̍a̍ā 13

¹I̍sɔ̄lūɛ̍i̍ya̍ ki̍nɛ̍i̍, yu̍ŋgu̍ E̍fi̍lūēm ndo̍, ndu̍ nda̍ a̍a̍ chu̍a̍ ni̍ māā yu̍ŋgu̍ kpāāyā bɛ̍ndū. Tē yu̍ŋgu̍ E̍fi̍lūēm ndo̍ ndu̍ o̍o̍ so̍ō pɛ̍, yu̍ŋgu̍la̍ tɔ᷅la̍ I̍sɔ̄lūɛ̍i̍ya̍ kpo̍u̍ sīōōŋnde̍ ndi̍ i̍i̍ bi̍ī nda̍ ni̍. Kɛ̍ mi̍ yu̍ŋgu̍ E̍fi̍lūēmndo̍ ā lō o̍ ko̍ŋ ma̍ kɛ̄ɛ̄ Mɛ̄lɛ̄ka̍, ma̍ mūli᷄ŋ Bāāl sōōlūūwo̍ māā mɛ̄lɛ̄ka̍ nda̍. Le̍ he̍ī, nda̍ kpo̍u̍ ā chō hūnɔ̄ɔ̄ pīɔ̍mndo̍ sɔ̄lā.

²Ndu̍yɛ̍ ma̍ wā wɔ̄ bɛ̍ɛ̍ hi̍o̍u̍wɔ̄ɔ̍ lāchī kɛ᷅ a̍ yɔ̄ŋndā wɔ̄ɔ̍ŋnda̍ŋ tōsāa̍, ka̍ni̍o̍ŋ tēēŋgīa̍a̍ mā tūūlīāā nyɔ̍ɔ̍ŋ, mā sōōlūū mu̍ŋ māā mɛ̄lɛ̄ka̍ā ndā. Ā bīī pɛ̍ ā tēēŋgi̍a̍a̍ ka̍ni̍ŋ hu̍mbo᷄ŋ nda̍ pi̍la̍ tōōsi̍a̍a̍ nyɔ̄ɔ̍ŋ a̍ bālā ndāla̍ŋ nyɛ̄ kɛ̄ndɛ̄ kɛ̍ndɛ̄, ā sīīŋgu̍u̍ mu̍ŋ māā mɛ̄lɛ̄ka̍ā ndā. Mi̍ wāŋnda̍ dīmī āā, “Wāŋnda̍ ha̍ā, wāŋndā chīe̍e̍ya̍ nda̍ sōlī sa̍lāla̍ŋ o̍ mɛ̄lɛ̄ka̍ā ndāa̍ lo̍ ni̍. Ndu̍yɛ̍ o̍ ko̍ŋ kɔ̍ɔ̍lī, mɛ̄lɛ̄ka̍ā ndāa̍ nda̍ tōōsi̍a̍a̍ māā lānāū wa̍, tē ā wa̍ nda̍ sōōlūūwo̍ pɛ̍, sōndōla̍ŋ nda̍ sɔ̄sā nda̍ ni̍.

³Le̍ he̍ī, wāŋnda̍ ha̍ā ā chō hūnɔ̄ɔ̄ lō o̍ lēpīlɛ̍ ni᷄ŋ pɛ̍, mɛ̄ɛ̍ mɔ᷄mndo̍ ō wā nu̍a̍ā tōlɔ̄ɔ̍ mbō kīōlu̍ sɔ̍ yɛ̍. Mɛ̄ɛ̍ yu̍mbu̍ yu̍mbo̍o̍ ō lo̍ nu̍a̍ā o̍ lēpīlɛ̍ ni᷄ŋ wānā chi᷅ lɛ̍ ndu̍ le̍ yɛ̍, le̍nde̍ i̍ yɔ̍nūŋ ni̍ŋ a̍ nda̍ ni̍. Ya̍a̍mɔ̍ɔ̍wa̍ chō nda̍ hūnɔ̄ɔ̄ bāsɔ̄ɔ̄ tɛ̍ɛ̍, mɛ̄ɛ̍ hūēīye̍ ī bāsū nu̍a̍ā fu̍e̍ēŋnde̍ lɛ̄ŋ mī ī kūɛ̄ɛ̄nu᷄ŋ a̍ ndi̍ yɛ̍. Mɛ̄ɛ̍ ku᷄mnde̍ ī nu̍a̍ā lēpīlɛ̍ pɛ̍, wānā chi᷅ lɛ̍ ndi̍ le̍ yɛ̍, le̍nde̍ nda̍ lō ni̍ŋ ni̍.”

⁴Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋnda̍ I̍sɔ̄lūɛ̄ī, ya̍ Mɛ̍lɛ̄ka̍ Ya̍a̍wɛ̄ɛ̄, ya̍ cho̍ Mɛ̄lɛ̄ka̍ nyāa̍ ni̍, o̍ so̍li̍ nya̍ o̍ chɛ̄le̍ŋ ni᷄ŋ I̍chi̍pī wo̍. Lā nɔ̍ mɛ̍lɛ̄ka̍ o̍ mɛ̄lɛ̄ka̍ chēle̍ŋ o̍ ya̍ kɔ̍ɔ̍lī le̍. Ya̍ Mɛ̍lɛ̄ka̍, ya̍ pīlɛ̍ kpe̍ cho̍ wāna̍ nyā pi̍ŋīa̍a̍ ni̍.

⁵Bōōndi̍i̍ nya̍ wa̍ o̍ lɛ̄ŋndē po̍lte̍ŋ ni᷄ŋ o̍ fo̍ndāŋ vēsɛ̍i̍ bɛ̍ndōo̍ ve̍, ya̍ lo̍ nya̍ māndāa̍ ni̍, ha̍a̍a̍ mi̍ lā fāŋa᷄ŋ ndo̍ŋ.

⁶Kɛ̍ mɛ̄ɛ̍ nya̍ hīŋ o̍ lɛ̄ŋndē kɛ̄ndɛ̄le̍ŋ ni᷄ŋ, mi̍ lā wā dīo̍o̍ mī lā pūm, o̍ ko̍ŋ kɔ̍ɔ̍lī, mī lā sɔ̄lā nyɛ̍ nya̍ hāū bā wo̍, mi̍ lā lō o̍ ko̍ŋ mi̍ lā dūāūnu᷄ŋ yo̍ŋgāa̍, mi̍ lā pūɛ̄ɛ̄nu᷄ŋ a̍ ya̍ o̍kɔ̄ɔ̄.

⁷Le̍ he̍ī, I̍ cho̍ nya̍ hūnɔ̄ɔ̄ chīŋa̍la᷅ŋ mɛ̄ɛ̍ kpɔ̍kūŋndo̍ ō chīŋa̍la᷅ŋ nu̍a̍ā vīsīo̍o̍ le̍ ndu̍ sɛ̄ɛ̄sīa̍a̍ yɛ̍. Mɛ̄ɛ̍ tāmbi̍llo̍ ō hīnī nu̍a̍ā mɛ̄ŋgɛ̄lāa̍ o̍ kāŋ vīsīo̍o̍, tē ō chē ndɔ̍ɔ̍ vīsīo̍o̍ pɛ̍, ō de᷄l ndu̍ chōo̍ yɛ̍, le̍nde̍ ya̍ I̍ cho̍ nya̍ wā mɛ̄ŋgɛ̄lāa̍, le̍ nya̍ dēlɔ̄ɔ̍ chōo̍ ni̍.

⁸Mɛ̄ɛ̍ vīsī bīyāa̍ chūālē ndɔ̄le̍ŋ lē lāāsīāŋ nu̍a̍ā mbō cha᷄l mɛ̄ŋgɛ̄lāa̍ a̍ hi̍i̍lɛ̍i̍ ke̍ŋ tē ō chē dɔ̍ɔ̍ vīsīo̍o̍ pɛ̍, ō de᷄l ndu̍ chōo̍ ō sɛ̄ɛ̄si̍a̍a̍ ndu̍ yɛ̍, le̍nde̍ ya̍ I̍ chīŋa̍la᷅ŋ nya̍ ni̍ŋ ni̍. Mɛ̄ɛ̍ kpɔ̍kūŋndo̍ ō dēl nu̍a̍ā vīsīo̍o̍ chōo̍, mbō yēm ndu̍ kɛ̄se̍i̍ o̍ fōōfōo̍ chōo̍ yɛ̍, le̍nde̍ ya̍ I̍ de᷅l ni̍ŋ nya̍ chōo̍ ni̍, ndu̍yɛ̍ mī sɛ̍ɛ̍si̍a̍a̍ nya̍, mɛ̄ɛ̍ vīsī bīyāa̍ ō sɛ̄ɛ̄sīāā nu̍a̍ā vīsīo̍o̍ yɛ̍.

⁹“Wāŋnda̍ I̍sɔ̄lūɛ̄ī, bōōndi̍i̍ ya̍ Mɛ̄lɛ̄ka̍ hīŋ nya̍ tɛ̄ɛ̄mbūū ve̍ ī fūūlu̍u̍, kāni̍ fo̍ndōle̍, le̍ mɛ̄ɛ̍ nya̍ kɛ̄ɛ̍ ya̍ dīōm, ya̍ wa᷅na̍ nyā ma̍lāa̍ yɛ̍.

¹⁰Kūɛ̍ɛ̍nɛ̍ māsa̍ nyā bɛ̍ndū nya̍ tīīnda̍ŋ māā ō mālā nya̍ wo̍ ō chō yɛ̄ ō ma̍lā nya̍ le̍? Lā nyūna̍ ya̍ māā ya̍ I̍ ke̍ nya̍ māsā bɛ̍ndōo̍, a̍ wānāā bɛ̄ndūa̍a̍, ndu̍yɛ̍ mi̍ ke᷅ nya̍.[11] Kūɛ̍ɛ̍nɛ̍ wānāā nyāā bɛ̍ndūāā kāŋ kpo̍u̍ a̍ cho̍ yɛ̄, ā ma̍lā nya̍ le̍?

¹¹A̍ tu̍mbo̍o̍ ya̍ I̍ ke̍ nya̍ māsāā bɛ̍ndūa̍a̍ kāŋ ni̍. Ndu̍yɛ̍ mɛ̄ɛ̍ ya̍ I̍ ke̍ nya̍ nda̍ a̍ tu̍mbo̍o̍ yɛ̍, le̍nde̍ ko̍ ya̍ I̍ fa̍ŋa̍ vɛ̄lɛ̄ nda̍ nya̍ chōo̍ a̍ tu̍mbo̍o̍ ni̍.

¹²“Yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ wāŋnda̍ I̍sɔ̄lūɛ̄ī a̍ to̍sa̍, dɛ̍nɛ̍ wɔ̍ɔ̍ŋ o̍ dɛ̍nɛ̍ wɔ̍ɔ̍ŋ nda̍ tōsa̍, ō chō ō pōōnyīāā o̍ yāu̍ ni᷄ŋ.

¹³Wāŋnda̍ I̍sɔ̄lūɛ̄ī nda̍ a̍a̍ nɔ̍ fo̍ndāa̍, le̍ mī nda̍ a̍a̍ hi̍o̍ū lāchī a̍ wāa̍ yōōmū, tē nda̍ a̍a̍ chɛ̍l pɛ̍. Kɛ̍ dīɔ̄mīī ndɛ̄i̍ tōsa̍, ā nɔ̄la̍ mā chɛ᷄l te̍. Ī yɔ̄nu̍ŋ ko̍ a̍ nda̍, mɛ̄ɛ̍ nda̍ wā nu̍a̍ā chɛ̄lɛ̄kpɔ̍ɔ̍ vīōlɔ̄ɔ̍ mī vīōlɔ̄ɔ̍ ndɔ̄ɔ̍ ō wa̍ bɛ̍ɛ̍ŋ bɛ̍ɛ̍ŋ, kɛ̍ mī chɛ̄lɛ̄kpɛ̍ ko̍ŋ ndu̍ pīla̍ o̍ to̍sa̍ mī vīōlɔ̄ɔ̍ ndɔ̄ɔ̍ ō sīmnu᷄ŋ vi̍o̍lɔ̄ɔ̄ kālā ka̍lā bɛ̄ndū yɛ̍.

¹⁴Le̍ he̍ī, nyɛ̄ o̍ nyɛ̄ to̍sā mī so̍li̍ wāŋnda̍ ha̍ā chi̍e̍e̍ pīɔ̍m o̍ bā le̍. Nyɛ̄ o̍ nyɛ̄ to̍sā, mī pi̍ŋi̍ nda̍ pīɔ̍mndo̍ o̍ bā le̍. I̍ cho̍ pīɔ̍mndo̍ dīmūl le̍ mbō hīŋ a̍ kpūndɛ̍lā ndɔ̄la̍ŋ nda̍ chōo̍, ndu̍yɛ̍ o̍ ko̍ŋ kɔ̍ɔ̍lī, mī di̍mu̍l chi̍e̍e̍ wāŋ vīlɛ̍i̍ya̍, mbō hu᷄ŋ tɛ̍ɛ̍mbūū yōōmūlā ndāla̍ŋ. Īnyīɛ̍ɛ̍ bɛ̍ɛ̍ i̍ nɔ̍lā lɛ̍ mī tūīīnu̍ŋ nda̍ le̍.

¹⁵Mi̍ chē bɛ̍ɛ̍ mi̍ nyɛ̄ o̍ nyɛ̄ wā ō kɛ̄ndɛ̄ a̍ wāŋnda̍ I̍sɔ̍lūɛ̄ī, ma̍ yɔ̄nu᷄ŋ mɛ̄ɛ̍ bīl pūīyāa̍ ō wā nu̍a̍ā o̍ pīo̍o̍ kɔ̄ŋgɔ̍, le̍ te̍le̍ŋ o̍ te̍le̍ŋ ō chō pūīyo̍ tɛ̍ɛ̍ tɛ̍ɛ̍ yɛ̍, kɛ̍ ya̍ Mɛ̍lɛ̄ka̍ Ya̍a̍wɛ̄ɛ̄ I̍ cho̍ hūēīyīī tūvīī bɛ̄ndūe̍i̍ yɔ̄ŋ fūlāa̍ kūmbūī po̍llo̍, bā pāa̍le̍ŋ lē chāŋndo̍, mī ī hu᷄ŋ ve̍e̍sīāā pēēla̍ ndāla̍ pɔ̍mbɔ̄la̍ŋ kpo̍u̍, a̍ so̍o̍ŋnda̍ ndāla̍ māmɛ̄ŋnda̍ŋ. Ndu̍yɛ̍ o̍ ko̍ŋ kɔ̍ɔ̍lī, nyɛ̄ o̍ nyɛ̄ ba̍ā kālā nda̍ chūūŋgi̍a̍a̍ o̍ fo̍ndāŋndā ndāla̍ nda̍ kɛ̄sī nyɔ̍ɔ̍ŋ nda̍ŋ, wāŋnda̍ chō mu̍ŋ hūnɔ̄ɔ̄ pūŋgā kpo̍u̍ mā kūɛ̄nu᷄ŋ a̍ mu̍ŋ.

¹⁶Mɛ̄ɛ̍ mī tu̍si̍ wāŋnda̍ Sāme̍e̍līāā nyɛ̄ pālāā bɛ̄ndōo̍ chōo̍, fo̍ndōle̍, le̍ kɛ̄ɛ̄ nda̍ kɛ̄ɛ̍ ya̍ dīōm, ya̍ Mɛ̍lɛ̄ka̍ ndāa̍ yɛ̍. I̍ cho̍ tōsā mī ya̍a̍mɔ̍ɔ̍wa̍ hu᷄ŋ di̍ū nda̍ a̍ mɔ̄ɔ̄ŋ fāŋndo̍ŋ. Chɛ̄lɛ̄kpi̍a̍a̍ ndāā le̍ndīa̍a̍ kpo̍u̍ ā chō nda̍ hūnɔ̄ɔ̄ dīū, ō nda̍ chūā ko̍ ā vīɔ̄l ndu̍ lɛ̄ŋ kpɔ᷅l ō wū. O̍ ko̍ŋ kɔ̍ɔ̍lī, wānāā ndāa̍ lā yo᷄lla̍ kpo̍u̍ ā chō nda̍ hūnɔ̄ɔ̄ dīū, ō nda̍ bīī ko̍, ā būlī ndu̍ dēmbōo̍.”