Read Southern Kisi Hōōsi̍a̍ā 14 Bible Online

Hōōsi̍a̍ā 14 - Southern Kisi bible

Hōōsi̍a̍ā 14

¹Wāŋnda̍ I̍sɔ̄lūɛ̄ī, lā pɛ̄ŋgi̍ yɔ̍ŋndā wɔ̄ɔ̍ŋnda̍ŋ tōsāa̍, mī lā mīīŋgu̍ Mɛ̄lɛ̄ka̍ Ya̍a̍wɛ̄ɛ̄ Mɛ̄lɛ̄ka̍ nyāa̍ o̍ ībūŋ. Yɔ̄ŋndā nyāla̍ wɔ̍ɔ̍ŋnda̍ŋ lā tōsa̍ mi̍ lā fāŋa᷄ŋ o̍ nɛ̄i̍ ndɔ̄ɔ̍ chōo̍.

²Lā mīīŋgu̍ Mɛ̍lɛ̄ka̍ Ya̍a̍wɛ̄ɛ̄ o̍ ībūŋ ndu̍yɛ̍ mī lā nyūna̍ ndu̍ le̍ mbō ma᷄l nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ. Lā dīmu̍l ndu̍ āā, “Yāndi̍i̍ Mɛ̄lɛ̄ka̍, ma̍l na̍a̍ le̍ yɔ̄ŋndā nāāla̍ wɔ̍ɔ̍ŋnda̍ŋ. Tu̍e̍i̍ pi̍ɛ̍īlē nāāle̍ŋ Mɛ̄lɛ̄ka̍ nāa̍, ko̍ŋ to̍sā ni̍, mī ŋ̄ hīōū lāchī a̍ nu̍m sāŋgālāa̍ mɛ̄ɛ̍ na̍a̍ ŋ̄ chūe̍l nu̍m būŋgɛ̄i̍ yɛ̍.

³Ŋ̄ sīna̍ ni᷅ŋ māā wāŋnda̍ Āsi̍i̍līāā a̍ nɔ̍lā mā chīīndi̍a̍a̍ yōōmūlā nāāla̍ŋ te̍. Su̍a̍ā chɔ̄ūwa̍ bɛ̍ɛ̍ ā nɔ̍lā lɛ̍ mā mānda̍ na̍a̍ le̍. Nu᷄m pīlɛ̍ kpe̍ na̍a̍ ŋ̄ tīīnda̍ŋ ni᷅ŋ ni̍. Le̍ he̍ī, ō fūla̍ o̍ nūm kɔ̍ɔ̍lī, ŋ̄ so̍o̍lūū lɛ̍ nyɛ̄ o̍ nyɛ̄ chēle̍ŋ mī ŋ̄ chūa̍ ndu̍ māā mɛ̄lɛ̄ka̍ nāā le̍. Le̍la̍ŋ yāndi̍i̍ Mɛ̄lɛ̄ka̍ Ya̍a̍wɛ̄ɛ̄, tūīīnu̍ŋ na̍a̍ īnyīɛ̍ɛ̍, fo̍ndōle̍, nu̍m tu̍i̍i̍nūŋ wa̍nāa̍ nɔ̍ ŋ̄fi̍nyā le̍ wa̍ īnyīɛ̍ɛ̍ ni̍.”

⁴Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Mi̍ chē bɛ̍ɛ̍ mi̍ wāŋnda̍ I̍sɔ̄lūɛ̄ī a̍ kɛ̍ɛ̄ ya̍, kɛ̍ I̍ cho̍ vɛ̄lɛ̄ tōsā mā nāŋnu̍ŋ ya̍ o̍ ībūŋ, ndu̍yɛ̍ mī ka̍a̍la̍ nda̍ a̍ kɔ̄l nūu̍ kpo̍u̍. Tu̍mbe̍ o̍ tu̍mbe̍ ya̍ i̍ dɔ̍u̍nu᷄ŋ a̍ nda̍, ō chō hūnɔ̄ɔ̄ mɛ̄ɛ̄lū.

⁵Mɛ̄ɛ̍ mɔ᷄mndo̍ ō chu̍ chu̍ nu̍a̍ā o̍ tɔ̄lɔ̄ɔ̄la̍ŋ chōo̍, le̍ te̍le̍ŋ o̍ te̍le̍ŋ tɔ̄lɔ̄ɔ̄lā lāŋ lā wā pu̍īyo̍ tɛ̍ɛ̍ tɛ̍ɛ̍ yɛ̍, le̍nde̍ ya̍ I̍ wa᷅ ni̍ŋ a̍ wāŋnda̍ I̍sɔ̄lūɛ̄ī ni̍. Mɛ̄ɛ̍ pɔ̄mbīa̍ŋ mā chūūlū nu̍a̍ā sɛ̄nɛ̄ī, mī mā wa̍ nāŋɔ̄ɔ̄ bɛ̄ndōo̍ yɛ̍, le̍nde̍ wāŋnda̍ I̍sɔ̄lūɛ̄ī a̍ wa᷅ ni̍ŋ ni̍. Wāŋnda̍ I̍sɔ̄lūɛ̄ī a̍ wa᷅ ni̍ŋ ma̍wa̍ā māā yɔ̄mīī si̍dāāve̍ o̍ Pēmbīī Le̍ba̍nɔ̄ŋnde̍ chōo̍, ī pūūndu᷅ŋ ndɔ᷄ŋ ŋ̄ tūāl mu᷅ŋ lɛ̄ŋ di̍ di̍ ve̍.

⁶Mɛ̄ɛ̍ yɔ̄mndo̍ ō wā nu̍a̍ā o̍ pīo̍o̍ kɔ̄ŋgɔ̍, le̍ te̍le̍ŋ o̍ te̍le̍ŋ ō chō pēī sɛ̍nɛ̄īye̍ sōlīo̍o̍ yɛ̍, le̍nde̍ nda̍ wā ni̍ŋ ni̍. Mɛ̄ɛ̍ yɔ̄mīī ɔ̄li̍fīi̍ve̍ ī wā nu̍a̍ā, le̍ te̍le̍ŋ o̍ te̍le̍ŋ tē wānā che᷅ ndi̍ pɛ̍, nyɔ̄ɔ̍ hɛ̄na̍ŋ nu̍m yɛ̍, le̍nde̍ nda̍ wā ni̍ŋ ni̍. Ā wā ni̍ŋ ma̍wa̍ā mɛ̄ɛ̍ yɔ̄mīī si̍dāāve̍ ī wā nu̍a̍ā yɛ̍, yɔ̄mīī chūŋ kɛ̄ndɛ̄ī bɛ̄ndūe̍i̍ Le̍ba̍nɔ̄ŋ.

⁷I̍ cho̍ tōsā mī wāŋnda̍ I̍sɔ̄lūɛ̄ī a̍ mi̍i̍ŋgu̍ vɛ̄lɛ̄ o̍ bā nūu̍ bɛ̄ŋgu̍, mī mi̍i̍ŋgu̍ vɛ̄lɛ̄ nda̍ māndāa̍ māā pāāndū. Mɛ̄ɛ̍ tɔ̄lɔ̄ɔ̄la̍ŋ lā wā nu̍a̍ā o̍ pīo̍o̍ kɔ̄ŋgɔ̍ le̍ te̍le̍ŋ o̍ te̍le̍ŋ lā wā pu̍īyo̍ tɛ̍ɛ̍ tɛ̍ɛ̍ yɛ̍, le̍nde̍ nda̍ wā ni̍ŋ ni̍. Ā wā ni̍ŋ ma̍wa̍ā, mɛ̄ɛ̍ kpe̍le̍ yɔ̄mīī kūāmāa̍ ō wā nu̍a̍ā, le̍ te̍le̍ŋ o̍ te̍le̍ŋ ō be̍ŋgā le̍ kōmɔ̄ɔ̍ le̍ yɛ̍. Tɔ̍ɔ̍ ndāa̍ ō tīū ni̍ŋ ko̍ o̍ lɛ̄ŋnde̍ ni᷄ŋ, mɛ̄ɛ̍ mūɛ̄īmā nda̍ tōōsīāā ma᷅ŋ Le̍ba̍nɔ̄ŋ nda̍ŋ, mā kēlā nu̍a̍ā tɔ̍ɔ̍ a̍ nāŋɔ̄ɔ̍ yɛ̍.

⁸Wāŋnda̍ I̍sɔ̄lūɛ̄ī, lā pɛ̄ŋgi̍ nyɛ᷅m chēle̍ŋndo̍ŋ sōōlūūwo̍, māā mɛ̄lɛ̄ka̍ā nyā. I̍ cho̍ pīɛ̄īlē nyāle̍ŋ mūlī ndu̍yɛ̍, mī hi̍o̍ū lāchī a̍ nya̍ māndāa̍ le̍ te̍le̍ŋ o̍ te̍le̍ŋ. Mɛ̄ɛ̍ yɔ̄m pūīyāā bɛ̄ndōo̍ ō wā nu̍a̍ā, mī wāŋnda̍ tīīnda̍ŋ ndu̍ le̍ te̍le̍ŋ o̍ te̍le̍ŋ le̍ nda̍ wūndu̍a̍ŋ kīo̍o̍ yɛ̍, le̍nde̍ ya̍ I̍ cho̍ a̍ nya̍ ni̍. Dɛ̍nɛ̍ kɛ̍ndɛ̄ o̍ dɛ̍nɛ̍ kɛ̍ndɛ̍ ko̍ma̍l nya̍, o̍ ya̍ Mɛ̍lɛ̄ka̍ lo̍ o̍ cha᷅ŋ ni̍.”

⁹Wānā o̍ wāna̍ cho̍ wāna̍ kɔ̄l kālu̍, lā kīndi̍ ki̍ndi̍ mī lā sīna̍ sɔ̄ɔ̍ŋ di̍mi̍ŋ mu᷅ŋ o̍ yāu̍wo̍ ho̍ō ni᷄ŋ ndo̍ŋ pɛ̄ŋgu̍. Wānā o̍ wāna̍ cho̍ wāna̍ tāāsi̍, lā ya᷄ŋ sɔ̍ɔ̍ŋ mu᷅ŋ nīla̍ŋ nyɛ̄ kɛ̄ndɛ̄ kɛ̍ndɛ̄, mī lā bīī mu̍ŋ bīlā.[12] Kāni̍ fu̍u̍le̍, Mɛ̄lɛ̄ka̍ Ya̍a̍wɛ̄ɛ̄, nɛ̄i̍ ndɔ̄ɔ̍, nɛ̄i̍ cho̍ sa̍kpō wo̍ o̍ cho̍ ni̍. Ndu̍yɛ̍ wānāa̍ cho̍ sa̍kpō ndu̍ o̍ hɔ̄l la̍, nda̍ ko̍ni̍ nɔ̍lā ni̍, mā wa̍ o̍ nɛ̄i̍ ndɔ̄ɔ̍ ho̍ō chōo̍. Kɛ̍ wānāa̍ kɛ̄ɛ̄ ndu̍ dīōm nda̍ ki̍nɛ̍i̍, ā nɔ̍lā mā kūɛ̄ sa̍kpō o̍ nɛ̄i̍ ndɔ̄ɔ̍ ho̍ō chōo̍ le̍, kāni̍ ā wā kɔ᷅la̍ŋ a̍ bōŋī bōŋīo̍o̍ mā dēlī.