Read Southern Kisi Hōōsi̍a̍ā 2 Bible Online

Hōōsi̍a̍ā 2 - Southern Kisi bible

Hōōsi̍a̍ā 2

¹Wāŋnda̍ I̍sɔ̄lūɛ̄ī, lā vēēlu̍ cha̍a̍ŋāā nyāā I̍sɔ̄lūɛ̍i̍ya̍ āā, “Mɛ̄lɛ̄ka̍ wānāā ndūa̍a̍,” lā vēēlu̍ nda̍ āā, “Wānāā Mɛ̄lɛ̄ka̍ tūīīnu̍ŋ i̍nyi̍ɛ̍ɛ̍ ya̍.”

²Mi̍ Mɛ̄lɛ̄ka̍ hīāū lāchī a̍ sūɛ̍i̍ āā, “Wāŋnda̍ I̍sɔ̄lūɛ̄ī, nya̍ chūāūwāā wānā la̍nɔ̍ ti̍a̍māā bɛ̄ndōo̍ ho̍ō, lā sōo̍ nāa̍ kālā nya̍ chūā, ndu̍ yɔ̍nūŋ māā I̍sɔ̄lūɛ̄ī ni̍, lā sīla̍ ka̍lā nya̍ a̍ nyɛ̄ o̍ cho̍ tōsāa̍ wo̍ o̍kɔ̄ɔ̄. Mi̍ chē bɛ̍ɛ̍ ō cho̍ lɛ̍ la̍a̍ nī le̍, ndu̍yɛ̍ ya̍ bɛ̍ɛ̍ I̍ cho̍ lɛ̍ pɔ̍nɔ̍ ndɔ̄ le̍ ni̍, kɛ̍ lā sōo̍ nāa̍ ndu̍ chu̍a̍ ō kālā ka̍lā mbō sōli̍ bāla̍ŋ o̍ tīɔ̄mɔ̄ɔ̍ ni᷄ŋ. Lā dīmu̍l ndu̍ mbō fāŋa̍ŋ ka̍ā sūūndɛ̍i̍yo̍ o̍ hɔ̄l, ndu̍yɛ̍ mbō ma᷄l ndu̍ wa̍ŋ wa̍ŋ.

³Tē ō cho̍ ko̍ŋ te̍, I̍ cho̍ ndu̍ hūnɔ̄ɔ̄ yūŋgā mī mɛ̍i̍ ndu̍ fo̍ndō fu̍u̍ mɛ̄ɛ̍ nda̍ vēlū ndu̍ yɛ̍. I̍ cho̍ tōsā mbō sīmnu᷄ŋ mɛ̄ɛ̍ lɛ̄ŋndē po̍lte̍ŋ lē wā nu̍a̍ā yɛ̍. Mɛ̄ɛ̍ lɛ̄ŋndē vēsɛ̍i̍le̍ŋ lē wā nu̍a̍ā nyɛ̄ o̍ nyɛ̄ ō vi᷅l le̍cho̍ō le̍ yɛ̍, le̍nde̍ o̍ si̍mnūŋ ni̍ŋ ni̍. I̍ cho̍ tōsā mɛ̄ŋndē kōlāā le̍ŋ bɛ̍ɛ̍ ō sɔ̍lā ni̍ŋ nde̍ŋ te̍, o̍ ko̍ŋ, mī to̍sa̍ mbō vī a̍ bo̍lōlā vēsɛ̍i̍la̍ŋ.

⁴Ndu̍yɛ̍ nya̍ chūāūwāā ndūa̍a̍ bɛ̍ɛ̍, īnyīɛ̍ɛ̍ bɛ̍ɛ̍ I̍ tu̍i̍i̍nūŋ ni̍ŋ nya̍ le̍, kāni̍ fo̍ndōle̍, nya̍ ki̍nɛ̍i̍ chūāūwāā wānā la̍nɔ̍ ti̍a̍māa̍ ō vēlū wa̍ nya̍ chō ni̍.

⁵Kāla̍ so̍li̍ŋ nya̍ o̍ īpūlu̍ wo̍, wānā la̍nɔ̍ ti̍a̍māa̍ o̍ cho̍ ni̍. Wānā la̍nɔ̍ ke̍ŋnu̍ŋ ndu̍ pi̍la̍ lēbɛ̄ɛ̄ le̍ wo̍, ndu̍ chu̍a̍ yo᷄lta̍ nyāla̍ŋ ni̍.” Mbo̍ lō o̍ ko̍ŋ mbo̍ dīmī āā, “Sa̍ma̍a̍ nda̍ hi̍a̍ū wa̍nā nyɛ᷅ kē. Nyɛ̄ dīāā ni̍, mɛ̄ŋmā kōlāā ni̍, kōlāla̍ īhūēī ni̍, kōlāla̍ kɛ̍ndɛ̄ kɛ̍ndɛ̄lā chēle̍ŋ ni̍, chūɛ̄īmā ɔ̄li̍fīi̍ ni̍, māmūɛ̄ī ni̍, mu̍ŋ kpo̍u̍ nda̍ ke᷅ ya̍ ni̍. Le̍la̍ŋ, nda̍ ya̍ I̍ cho̍ tōlɔ̄ɔ̄ kɔ̄ɔ̄lī ni̍.”

⁶Le̍ he̍ī, I̍ cho̍ ndu̍ dɔ̄wɔ̄ɔ̄ o̍ kpāki̍ ŋ̄yɔ̄ɔ̍ ni᷄ŋ, mī ba̍lu̍ ndu̍ kpɔ̍kɔ̍su̍. I̍ cho̍ ndu̍ dɔ̄wɔ̄ɔ̄ o̍ pi̍ŋndo̍ ni᷄ŋ ō nɔ̍lā ni̍ŋ mbō fūla̍ le̍.

⁷Ō nyāānūŋ ni̍ŋ sa̍ma̍a̍ ndūa̍a̍ kɔ̄ɔ̄lī, kɛ̍ ō pīlɛ̍ bɛ̍ɛ̍ ō bi̍ī ni̍ŋ o̍ pūmbu̍ le̍. Ō bālū ni̍ŋ nda̍ nūūwāa̍, kɛ̍ ō se̍e̍lūŋ ni̍ŋ o̍ pi̍lɛ̍ bɛ̍ɛ̍ le̍. O̍ ko̍ŋ, ndu̍ pi̍la̍ cho̍ īchāli̍ mbō dīmi̍ āā, “Ō bɛ̄nda̍ mī mi̍i̍ŋgu̍ pɔ̍nɔ̍ nī pa̍a̍ndōo̍ o̍ bā. Bōōndi̍i̍ ya̍ I̍ wa̍ŋnu̍ŋ pɔ̍nɔ̍ nūu̍ ō bā ve̍, nyɛ̄ o̍ nyɛ̄ ve̍ nu̍a̍ā ō kālā a̍ ya̍ le̍.”

⁸Mbo̍ pūɛ̄ɛ̄nu᷄ŋ le̍ sīnāa̍ māā nyɛ̄ o̍ nyɛ̄ dīāā o̍ nɔ̍, ŋ̄sūā ni̍, māmūɛ̄ī ni̍, māchūɛ̄ī ni̍, māā ya̍ ke̍ ndu̍ mu̍ŋ kpo̍u̍ ni̍. Nyɛ̄ o̍ nyɛ̄ sɔ̄lāā o̍ sɔ̍la̍ mbo̍ wā ni᷅ŋ ha̍ū kpe̍ku̍ so̍li̍ŋ a̍ ndu̍ le̍ mɛ̄lɛ̄ka̍ ndɔ̄ɔ̍ Bāāl sōōlūūwo̍, ka̍ni̍ŋ si̍a̍ŋā ni̍, ka̍ni̍ŋ hu̍mbū ni̍, ya̍ o̍ bā o̍ sɔ̍la̍ mu̍ŋ kpo̍u̍ ni̍, mi̍ to̍sā mbo̍ sūl sūllo̍ pīla̍ a̍ mu̍ŋ. Kɛ̍ mbo̍ kɛ̄ɛ̄ le̍ sīnā pɛ̄ŋgu̍ ko̍ŋ sɔ̄lāa̍ māā ya̍ ke̍ ndu̍ mu̍ŋ ni̍.

⁹Le̍ he̍ī, nyɛ̄ o̍ nyɛ̄ ya̍ I̍ ke̍ ndu̍, I̍ cho̍ ndu̍ mu̍ŋ pōōndīāā o̍ bā kpo̍u̍. I̍ cho̍ fɛ̍ɛ̍ŋ chu᷅m mī chīɛ̄ī ndūɛ̍i̍ ī fu̍u̍lu̍u̍ te̍le̍ŋ ku̍a̍u̍wāā ki̍nɛ̍i̍ mī po̍o̍nda̍ ndu̍ mu̍ŋ o̍ bā. Mūɛ̄īmā nī ma̍ ya̍ I̍ ke̍ ndu̍ wa̍ŋ, bōōndi̍i̍ o̍ kɔ᷅l ma̍ŋ nde̍ ī chō fɛ̍ɛ̍ŋ fu̍u̍lūū ki̍nɛ̍i̍ mī po̍o̍nda̍ ndu̍ ma̍ŋ o̍ bā. Nyɛ̄ o̍ nyɛ̄ chūɛ̄ɛ̄na᷄ŋ ya̍ I̍ ke̍ ndu̍ le̍ mbō yīīnu̍ŋ, mbo̍ kūmbū ndu̍ pi̍la̍ īsūla̍, nyɛ̄lā īhūēī ni̍, nyɛ̄lā kɛ̄ndɛ̄ kɛ̍ndɛ̄lā chēle̍ŋ ni̍, I̍ cho̍ ndu̍ la̍ŋ pōōndīāā o̍ bā kpo̍u̍.

¹⁰I̍ cho̍ ndu̍ yūŋgā mī mɛ̍i̍ ndu̍ tūū fo̍ndō fu̍u̍ sa̍ma̍a̍ ndūa̍a̍ o̍ hɔ̄l. Ndu̍yɛ̍ tē te̍le̍ŋ ko̍ŋ fūūlu̍u̍ pɛ̍, wānā o̍ wānā o̍ nɔ̍lā ni̍ŋ mbō sōli̍ ndu̍ ya̍ o̍ bā mbō pīŋi̍ ndu̍ le̍.

¹¹Bɔ̄ŋa᷅ŋndā ndɔ̄la̍ kɔ̄l kɛ̄ndɛ̄ la̍ŋ ki̍nɛ̍i̍, bɔ̄ŋa᷅ŋ īwɔ̄sī ni̍, bɔ̄ŋa᷅ŋndā pāŋgi̍i̍ sɛ̍nɛ̄ī ni̍, bɔ̄ŋa᷅ŋ pāa̍le̍ pɛ̍ŋgīa̍a̍ ni̍, o̍ ko̍ŋ kɔ̍ɔ̍lī, a̍ bɔ̄ŋa᷅ŋndā dīāā nyɛ̄ dīāālā chēle̍ŋ nda̍ŋ, I̍ cho̍ tōsā la̍ŋ kpo̍u̍ mī lā mɛ̄ɛ̄lu̍.

¹²Yɔ̄mīī ndūɛ̍i̍ mā kīle̍pīi̍ye̍ ni̍, yɔ̄mīī māfi̍kīi̍ye̍ ni̍, I̍ cho̍ tōsā ndi̍ kpo̍u̍ mī ī hu᷄ŋ ta̍mbū mī ī sīmnu᷄ŋ yɔ̍mīī fo̍ndūe̍i̍. Yɔ̄mīī kēŋ o̍ di̍mi̍ ni̍ māā ndi̍ sa̍ma̍a̍ ndūa̍a̍ ā ke̍ ndu̍ ni̍ le̍ wā nda̍ wa̍ a̍ ndu̍ wo̍, kɛ̍ I̍ cho̍ tōsā ndi̍ kpo̍u̍ mī ī sīmnu᷄ŋ bu̍ndɛ̍ bɛ̍ndū. Vīsīāā yōndūa̍a̍ nda̍ di̍ā ni̍ŋ ko̍mɔ̄ɔ̄ yɔ̄mīī kēŋ ni̍.

¹³I̍ cho̍ ndu̍ nyɛ̄ pālāa̍ tūsī chōo̍, fo̍ndōle̍, le̍ mɛ̄ɛ̍ o̍ kɛ̍ɛ̍ ya̍ le̍ Bāāl, mbo̍ mūli᷄ŋ nyɛ᷅m chūŋ kɛ̄ndɔ̍ŋ lōmɔ̄ɔ̍ o̍ ndu̍ lo̍ yɛ̍. Sa̍ma̍a̍ ndūa̍a̍ nda̍ o̍ chu̍a̍ ni̍ māā pīāāndūāā ndɔ̄, ō bīī pɛ̍ ō chu̍a̍ ke̍la᷄ŋ a̍ nyɛ̄m yīīna᷄ŋ che᷅le̍ŋ ndo̍ŋ, ō pēēnu̍ŋ mu̍ŋ lēkɔ̄ɔ̍ cha̍ le̍ sa̍ma̍a̍ ndūa̍a̍ bālɔ̄ɔ̍ kɔ̄ɔ̄lī. Kɛ̍ ya̍ ya̍ mbo̍ pūɛ̍ɛ̍ŋ a̍ ya̍. Kɛ̍ te̍le̍ŋndo̍ fūūlu̍u̍, te̍le̍ŋ ya̍ I̍ hi᷅ŋ ndu̍ nyɛ̄ pālāa̍ tūsī chōo̍ wo̍, fo̍ndōle̍ le̍ nyɛ̄ o̍ to̍sa̍ wo̍. Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ ndu̍ cho̍ ho̍ō ni̍.

¹⁴Mi̍ Mɛ̄lɛ̄ka̍ hīāū lāchī a̍ sūɛ̍i̍ āā, “Te̍le̍ŋ cho̍ fūūlūū I̍ cho̍ tōsā mī I̍sɔ̄lūɛ̄ī o̍ mi̍ŋgi̍ vɛ̄lɛ̄ kɔ̄llo̍ o̍ ya̍ lo̍ māā pāāndū. Ndu̍yɛ̍ tē te̍le̍ŋ ko̍ŋ ō fūūlu̍u̍ pɛ̍, I̍ cho̍ fɛ̍ɛ̍ŋ to̍sā mī I̍sɔ̄lūɛ̄ī o̍ si̍mnu᷄ŋ, to̍fa̍ ko̍ mɛ̄ɛ̍ wāŋndo̍ ō wā nu̍a̍ā o̍ lɛ̄ŋndē po̍lte̍ŋ ni᷄ŋ ō nɔ᷅ nyɛ᷅ o̍ nyɛ̄ o̍ ti̍i̍nda̍ŋ te̍ yɛ̍. A̍ bōōndi̍i̍ ke̍ŋ, I̍ cho̍ dīōmndā kāālāā la̍ŋ īsɔ̄ɔ̍ nāa̍ ndu̍ chu̍a̍ mī to̍sa̍ mī kɔ̄l ndɔ̄ɔ̍ mīīŋgu̍ vɛ̄lɛ̄ o̍ ya̍ lo̍.

¹⁵Yɔ̄mīī mākīle̍pīi̍ ya̍ i̍i̍ po̍o̍nda̍ ndu̍ pāāndū o̍ bā ve̍, a̍ te̍le̍ŋ ko̍ŋ ya̍ I̍ cho̍ ndi̍ mīŋgī ndu̍ o̍ bā ni̍. I̍ cho̍ tōsā mī I̍sɔ̄lūɛ̄ī o̍ mi̍i̍ŋgu̍ vɛ̄lɛ̄ mbō na᷄ŋ māā pāāndū. Dɛ̍ŋgbɛ̍ nda̍ vēēlū āā A̍ kɔ̄ wo̍, ko̍ŋ cho̍ ni̍, dɛ̍ŋgbɛ̍ dɛ̍nɛ̍ pa̍lāa̍, I̍ cho̍ tōsā mbō sīmnu᷄ŋ ni᷅ŋ di̍ō tīīnda᷄ŋ. Tē te̍le̍ŋ ko̍ŋ ō fūūlu̍u̍ pɛ̍, I̍ cho̍ tōsā mī I̍sɔ̄lūɛ̄ī o̍ tu̍e̍ī ya̍ vɛ̄lɛ̄ dīōm māā pāāndū. Mɛ̄ɛ̍ ndu̍ o̍o̍ tu̍ɛ̍ī ya̍ dīōm a̍ bōōndi̍i̍ o̍ wa̍ chūāāmbɔ̄ fɔ̍ŋndɔ̍ mbo̍ fu̍la̍ o̍ lɛ̄ŋndē I̍chi̍pīle̍ŋ ni᷄ŋ nde̍ yɛ̍, le̍nde̍ o̍ wa᷅ ni̍ŋ vɛ̍lɛ̄ ya̍ dīōmndo̍ tūēīyɔ̄ɔ̍ ni̍.”

¹⁶Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ māā, I̍sɔ̄lūɛ̄ī, te̍le̍ŋ cho̍ fūūlūū ā vēēlū ni̍ŋ ya̍ vɛ̄lɛ̄ āā, “Pɔ̍nɔ̍ nūu̍.” I̍ cho̍ tōsā fɛ̍ɛ̍ŋ a̍ fɛ̍ɛ̍ŋ a̍ mɛ̍ī lɛ̍ dīōlā nīla̍ŋ vēēlū mā ve̍e̍lu̍ āā, “Māsānɔ̍ nūu̍ Bāāl” le̍.[3]

¹⁷I̍ cho̍ tōsā fɛ̍ɛ̍ŋ a̍ fɛ̍ɛ̍ŋ I̍sɔ̄lūɛ̄ī o̍ de᷅l lɛ̍ kɔ̄l o̍ mɛ̄lɛ̄ka̍ā ndūāā Bāāl wa̍, mbō vēēlu̍ bɛ̍ɛ̍ di̍o̍lā ndā le̍. Dīōlā ndāla̍ŋ lā chō ndu̍ hūnɔ̄ɔ̄ nyūm o̍ sōndō mbō pu̍ɛ̍ɛ̍ŋ a̍ la̍ŋ pɔ̍lī.

¹⁸“Tē te̍le̍ŋ ko̍ŋ ō fūūlu̍u̍ pɛ̍, I̍ cho̍ tōsā mī I̍sɔ̄lūɛ̄ī nda̍ vīsīāā yōndūa̍a̍, a̍ yōūwāa̍ ba̍lū cho̍o̍ cho̍o̍ wa̍, o̍ ko̍ŋ kɔ̍ɔ̍lī, a̍ nyāā yōōmāā chēle̍ŋnda̍, mā wa̍ nāa̍ pi᷅lɛ̍, ā yɔ᷅na᷅ŋ nyɛ᷅ o̍ nyɛ̄ le̍. Wōlɔ̄ɔ̄ o̍ wōlɔ̄ɔ̄ chɔ̄ū, lāchīɔ̄ū ni̍, mɔ̄ɔ̄ŋ fāŋ ni̍, la̍ŋ kpo̍u̍ I̍ cho̍ la̍ŋ hūnɔ̄ɔ̄ tɛ̄ɛ̄mbūū, mī to̍sa̍ wānā tu̍i̍ī lɛ̍ a̍ chɔ̄ū o̍ chɔ̄ū o̍kɔ̄ɔ̄ o̍ lɛ̄ŋnde̍ŋ nde᷅ŋ ni᷄ŋ te̍. I̍ cho̍ tōsā mī wānā o̍ wānā o̍ wa̍ŋnu̍ŋ o̍ bā ndɔ̄ɔ̍ chōo̍ yɛ̍lɛ̍kɛ̍lɛ̍ɛ̍ nyɛ̄ o̍ nyɛ̄ yɔ̍nūŋ a̍ ndu̍ le̍.”

¹⁹“I̍sɔ̄lūɛ̄ī, I̍ cho̍ nu̍m mīŋgī chūā māā la̍a̍ nī le̍ fɛ̍ɛ̍ŋ a̍ fɛ̍ɛ̍ŋ, mī kāāla̍ nu̍m a̍ kɔ̄l nūu̍ kpo̍u̍, ndu̍yɛ̍ mī wa̍ sa̍kpō a̍ nūm. Le̍ te̍le̍ŋ o̍ te̍le̍ŋ I̍ wa᷅ ni̍ŋ nu̍m kāālā nūu̍ chɔ̄mndo̍, ndu̍yɛ̍ mī hi̍o̍ū lāchī a̍ nyīɛ̍ɛ̍ye̍ nɔ̄ɔ̍ le̍ nūm pɛ̄ŋgu̍ o̍ pɛ̄ŋgu̍.

²⁰I̍ cho̍ nu̍m mīŋgī kāālā, mī to̍sa̍ mā sīmnu᷄ŋ vɛ̍lɛ̄ la̍a̍ nī, ndu̍yɛ̍ mī wa̍ sa̍kpō a̍ nūm. Ībūŋgā o̍ ībūŋgā ya̍ I̍ chu̍e̍l nu̍m, mī pe̍e̍lu̍ mu̍ŋ kpo̍u̍. O̍ ko̍ŋ, mā si̍na̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

²¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ māā, tē te̍le̍ŋ ko̍ŋ ō fūūlu̍u̍ pɛ̍, I̍ cho̍ wāŋnda̍ I̍sɔ̄lūɛ̍i̍ dīōm mūlī. I̍ cho̍ ha̍la̍a̍ dīmūl mī ha̍la̍a̍ yɔ᷄ŋ pīɔ̍ɔ̍ o̍ lɛ̄ŋnde̍ŋ chōo̍,

²²ndu̍yɛ̍ mī lɛ̄ŋnde̍ŋ lē tōsa̍ mī tɔ̄lɔ̄ɔ̄la̍ŋ lā na᷄ŋ ta̍u̍ ta̍u̍ o̍ chīɔ̍ɔ̍ŋ ni᷄ŋ, yɔ̄mīī mākīle̍pīi̍ye̍ bɛ̍ɛ̍, a̍ yɔ̄mīī ɔ̄li̍fīi̍ve̍ mī ī na᷄ŋ ta̍u̍. O̍ ko̍ŋ, mī to̍sa̍ mī Chɛ̍si̍lūɛ̄ɛ̄ o̍ sɔ̍la̍ nyɛ̄ dīa̍a̍ ta̍u̍ ta̍u̍, a̍ mūɛ̄īmā sɛ̄nɛ̄īya̍ŋ, o̍ ko̍ŋ kɔ̍ɔ̍lī, a̍ chūɛ̄īmā ɔ̄li̍fīi̍ya̍ŋ.

²³I̍ cho̍ wāŋnda̍ I̍sɔ̄lūɛ̍i̍ mīŋgī nɛ̄ŋī o̍ lɛ̄ŋnde̍ŋ nde᷅ŋ ni᷄ŋ, mī to̍sa̍ mā mīīŋgu̍ vɛ̄lɛ̄ māā pāāndū.[4] Wānāā ya̍ I̍ ke̍ dīōla̍ŋ āā, Īnyīɛ̍ɛ̍ bɛ̍ɛ̍ wa̍, I̍ cho̍ nda̍ hūnɔ̄ɔ̄ īnyīɛ̍ɛ̍ tūīīnɔ᷄ŋ. Wānāā ya̍ I̍ ve̍e̍lu̍ māā, ā cho̍ wa̍nāā nī le̍ wa̍, I̍ cho̍ nda̍ vēēlū māā, wānāā nīa̍a̍, ndu̍yɛ̍ mī nda̍ bɛ̍ɛ̍ a̍ ve̍e̍lu̍ ya̍ māā, Mɛ̄lɛ̄ka̍ nāa̍”