Read Southern Kisi Hōōsi̍a̍ā 3 Bible Online

Hōōsi̍a̍ā 3 - Southern Kisi bible

Hōōsi̍a̍ā 3

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl ya̍ Hōōsi̍a̍ā āā, “Kɔ̍ mā kɔ̍ chu̍ā vɛ̄lɛ̄ chūā kōŋ mā mi̍ŋgi̍ŋ ndu̍ o̍ bā māā la̍nɔ̍, mi̍ chē bɛ̍ɛ̍ mbo̍ tūāl wāŋ pīāāndūāā chēle̍ŋ nda̍ kɔ̄ɔ̄lī, mbo̍ sīmnu᷄ŋ wa̍nā la̍nɔ̍ su̍u̍ndɛ̍i̍. Tē ō wa̍ māā yɔ̄ŋɔ̄ɔ̄ pɛ̍, mɛ̄ɛ̍ ŋ̄ chō chūā sūūndɛ̍i̍ ko̍ŋ mīŋgī kāālā, mā chu̍a̍ ndu̍ vɛ̄lɛ̄ māā la̍a̍ nu̍m yɛ̍, le̍nde̍ i̍ yɔ̍nu̍ŋ na̍a̍ tɛ̄ɛ̄ŋ na̍a̍ wāŋnda̍ I̍sɔ̄lūɛ̄ī ni̍. Wāŋnda̍ i̍sɔ̄lūɛ̄ī a̍ bi̍ī ma̍ kɛ̄ɛ̄ ya̍, ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍ā ndā. Sa̍lālā nda̍ wa̍ sōlīo̍o̍ o̍ nyɛ̄m mu᷅ŋ ndo̍ a̍ kīle̍pīi̍ma̍ vēsɛ̍i̍ya̍ŋ nda̍ŋ, sa̍lālā lo̍ŋ nda̍ a̍a̍ ka̍a̍la̍ ni̍. Kɛ̍ a̍ ko̍ŋ kpo̍u̍, mi̍ mi̍ŋgī nda̍ kāālā, mi̍ chu̍ā nda̍ māā wānāā nī.”

²Mɛ̄ɛ̍ Mɛ̄lɛ̄ka̍ dīmūl la̍ le̍nde̍, mi̍ chu̍ā nyɛ̄ sɔ̄lāa̍ ka̍ni̍ŋ hu̍mbo̍ŋ tɔ̍ a̍ ŋ̄ ŋūɛ̍ɛ̍nu̍, o̍ ko̍ŋ kɔ̍ɔ̍lī, a̍ Ba̍a̍līi̍yo̍ŋ mu̍ŋ o̍o̍ wa᷅ le̍ bu̍sɔ̄ɔ̍ tɔ̍, mi̍ kɔ̍ dɔ̍ū chūa̍a̍ ho̍ō fu̍lu̍ le̍ mbō sīmnu᷄ŋ vɛ̍lɛ̄ la̍a̍ nī.

³Mi̍ lo᷅ o̍ ko̍ŋ mi̍ di̍mūl chūa̍a̍ ho̍ō āā, “Mīāl nī ŋ̄ chō ni᷅ŋ ni̍. Chɔ̍ŋ ni᷅ŋ a̍ ha̍ū le̍ ya̍ pīlɛ̍ kpe̍ ŋ̄ chō ni᷅ŋ ni̍, a̍ nɔ̍ lɛ̍ mā tɛ̄m a̍ wānā pɔ̍nɔ̍ o̍ wānā pɔ̍nɔ̍ che᷅le̍ŋ te̍. Ndu̍yɛ̍ ō fūla̍ o̍ ko̍ŋ kɔ̍ɔ̍lī, chɔ̍ŋ a̍ te̍le̍ŋndo̍ ho̍ō mbo̍ kūɛ̄ a̍ te̍le̍ŋ vi̍lɛ̄ī, na̍a̍ nūm bɛ̍ɛ̍ dɛ̍nɛ̍ o̍ dɛ̍nɛ̍ o̍ nɔ̍ mbō kēēku̍ na̍a̍ tɛ̄ɛ̄ŋ te̍, ha̍a̍a̍ mbō lo̍ o̍ ko̍ŋ mī te̍le̍ŋ o̍ hu̍ŋ fu̍u̍lūū. Ndu̍yɛ̍ ya̍ bɛ̍ɛ̍ I̍ cho̍ nu̍m chūm ha̍a̍a̍ mī te̍le̍ŋ ko̍ŋ ō fūūlu̍u̍.

⁴Tē ō wa̍ māā yɔ̄ŋɔ̄ɔ̄ pɛ̍, nu̍a̍ā ko̍ i̍ yɔ̍nūŋ ni̍ŋ a̍ wāŋnda̍ I̍sɔ̄lūɛ̄ī ni̍. Ō kūā ni̍ŋ a̍ te̍le̍ŋ vi̍lɛ̄ī wāŋnda̍ I̍sɔ̄lūɛ̄ī a̍ nɔ᷅ ni̍ŋ ma̍sā o̍ māsā nda̍ chōo̍ le̍, kɛ̄lɛ̄ŋgāā ni᷅ŋ te̍ mā nɔ̄ wāna̍ wa᷅ nda̍ chīla̍ŋ ndo̍. Sa̍lālā wāŋnda̍ sōlī la̍ŋ kpo̍u̍, ō pīlɛ̍ bɛ̍ɛ̍ wānā tu̍i̍ī lɛ̍ ni̍ŋ a̍ ndu̍ o̍kɔ̄ɔ̄ le̍, kɛ̄lɛ̄ŋgāā ni᷅ŋ te̍, mī wānā tu̍e̍ī bɛ̍ɛ̍ a̍ nyɛ̄m nda̍ tūūli̍a̍a̍ māā māsūŋgbu̍, mā sōōlūū mu̍ŋ māā mɛ̄lɛ̄ka̍ā ndā wo̍ŋ o̍kɔ̄ɔ̄. Nyɛ̄lā wānāa̍ so̍lī sa̍lāla̍ŋ nda̍ ā wōōnūŋ le̍ mɛ̄lɛ̄ka̍ā ndāa̍ dīōmndo̍ nyūnāa̍ la̍ŋ kpo̍u̍ lā chō hūnɔ̄ɔ̄ lō. Nyɛ̄ o̍ nyɛ̄ nda̍ sōōlūū māā mɛ̄lɛ̄ka̍ā ndā, mu̍ŋ kpo̍u̍ ō pīlɛ̍ bɛ̍ɛ̍ ō ve᷅m lɛ̍ ni̍ŋ te̍.

⁵Kɛ̍ ndu̍yɛ̍, tē te̍le̍ŋ ko̍ŋ ō hīōū pɛ̍, te̍le̍ŋ cho̍ fūūlūū mī wāŋnda̍ I̍sɔ̄lūɛ̄ī a̍ mi̍i̍ŋgu̍ vɛ̄lɛ̄ Mɛ̄lɛ̄ka̍ Ya̍a̍wɛ̄ɛ̄ mɛ̄lɛ̄ka̍ ndāa̍ o̍ ībūŋ. Ndu̍yɛ̍ a̍ te̍le̍ŋ ko̍ŋ, wāna̍ fu̍la̍ o̍ pūlāle̍ māsāa̍ Dēēve̍le̍ŋ chōo̍ wo̍, ndu̍ wa᷅ ni̍ŋ nda̍ māsāa̍ chōo̍ kpo̍u̍ ni̍. Sīōōŋnde̍ chō nda̍ hūnɔ̄ɔ̄ bīyɔ̄ɔ̄ a̍ Mɛ̄lɛ̄ka̍ Ya̍a̍wɛ̄ɛ̄, mā mīīŋgu̍ ndu̍ o̍ ībūŋ a̍ nyīīyāa̍ kpa᷅kpā. A̍ te̍le̍ŋ ko̍ŋ, dɛ̍nɛ̍ kɛ̍ndɛ̄ o̍ dɛ̍nɛ̍ kɛ̍ndɛ̄ Mɛ̄lɛ̄ka̍ ndu̍ o̍o̍ nɔ̍ le̍ nda̍, ō chō nda̍ ndu̍ hūnɔ̄ɔ̄ kē kpo̍u̍ o̍ mɛ̄ɛ̄lu̍la̍ŋ.”