Read Southern Kisi Hōōsi̍a̍ā 4 Bible Online

Hōōsi̍a̍ā 4 - Southern Kisi bible

Hōōsi̍a̍ā 4

¹Nya̍ wāŋnda̍ I̍sɔ̄lūɛ̄ī, lā ya᷄ŋ ni᷅la̍ŋ mī lā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ nɔ̍ le̍ dīmīo̍o̍ wo̍. Mɛ̄lɛ̄ka̍ Ya̍a̍wɛ̄ɛ̄ o̍ nɔ̍ īsɔ̄ɔ̍ a̍ nya̍ īkālā ka̍lā, nya̍ wānā o̍ wāna̍ cho̍ o̍ lɛ̄ŋnde̍ŋ I̍sɔ̄lūɛ̍i̍le̍ŋ ni᷄ŋ. Ō dīmi̍ āā, “Lɛ̄ŋndē I̍sɔ̄lūɛ̍i̍le̍ŋ lē tāmbu̍ a̍ sɔ̄ɔ̍ŋ wɔ̍ɔ̍ŋ wāŋnda̍ chō tōsāa̍ wo̍ŋ. Wānā o̍ wānā cho̍ lɛ̍ o̍ lɛ̄ŋnde̍ŋ nde᷅ŋ ni᷄ŋ mbo̍ wā wānā sa̍kpō, ndu̍yɛ̍ mbō wa̍ wāna̍ īkɛ̄ndɛ̄ ya̍ Mɛ̄lɛ̄ka̍ o̍ hɔ̄l te̍. O̍ lɛ̄ŋnde̍ŋ nde᷅ŋ ni᷄ŋ ki̍nɛ̍i̍ wānā o̍ wānā cho̍ lɛ̍ na̍nu᷄ŋ mbō chūa̍ ya̍ māā Mɛ̄lɛ̄ka̍ ndɔ̄ le̍.

²Wāŋnda̍ kpo̍u̍ ā sīmnu᷄ŋ wa̍nāā dɛ̍nɛ̍ wɔ̍ɔ̍ŋāā bɛ̄ndū o̍ lɛ̄ŋnde̍ŋ nde᷅ŋ ni᷄ŋ. Sɔ̄ɔ̍ŋ cho̍ ni᷅ŋ o̍ lɛ̄ŋnde̍ŋ nde᷅ŋ ni᷄ŋ ndo̍ŋ, mu̍ŋ cho̍ mu᷅ŋ ni̍. Mēēni̍āŋnda̍ŋ, a̍ sa̍kpōyɛ̍ī lēpɛ̄ŋnde̍, a̍ dīūwa᷅ŋndo̍, a̍ vīīle̍ŋ, o̍ ko̍ŋ kɔ̍ɔ̍lī, a̍ sūūndīāāla̍ŋ. Yɔ̄ŋndā wɔ̄ɔ̍ŋnda̍ŋ hīōūwɔ̄ɔ̍ tu̍ŋ nda̍ hīāū la̍chi̍ a̍ la̍ŋ tōsāa̍ ni̍, mīīŋga᷅ŋ kɔ̄ɔ̄lī bɛ̍ɛ̍. Wānāa̍ nɔ̍ kpāāyāla̍ŋ nda̍ dīūwo̍ tu̍ŋ nda̍ chō wāŋndā chīe̍e̍ya̍ ni̍, mīīŋga᷅ŋ bɛ̍ɛ̍ ā mi̍īŋga᷅ŋ kɔ̍ɔ̍lī le̍.

³Le̍ sa̍bōo̍ ho̍ō, lɛ̄ŋnde̍ŋ kpo̍u̍ lē tāmbu̍ mi̍ lē sīmnu᷄ŋ po̍llo̍. Nyɛ̄ o̍ nyɛ̄ yōōmāa̍ cho̍ o̍ lɛ̄ŋnde̍ŋ nde᷅ŋ ni᷄ŋ dɛ̍nɛ̍ pa̍lāā bɛ̄ndōo̍ ō tōl nda̍ chōo̍. Vīsīāā yōndō ni̍, yōū ni̍, sūū ni̍, nda̍ kpo̍u̍ ā chūu̍.”

⁴Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Nya̍ wānāā sōlīāā lāsa̍lāa̍ ha̍ā, lā yu̍lū wānā o̍ wānā i̍su̍ o̍ mūndū le̍ nyɛ̍ yɔ̍nu̍ŋ I̍sɔ̄lūɛ̄ī yo̍ le̍. Lā ha̍ndū wānā o̍ wānā tɔ̍ɔ̍ya̍ŋ chōo̍ le̍ nyɛ̍ yɔ̍nu̍ŋndo̍ le̍. Nya̍ wānāā sōlīāā lāsa̍lāa̍ I̍sɔ̄lūɛ̄ī, na̍a̍ nya̍ tɛ̄ɛ̄ŋ sūɛ̍i̍ ī chō ni̍.

⁵Le̍ te̍le̍ŋ o̍ te̍le̍ŋ, sɔ̄ɔ̍ŋ bɛ̍nda̍ ya̍ Mɛ̍lɛ̄ka̍ o̍ hɔ̄l te̍ wo̍ŋ mu̍ŋ ko̍ nya̍ hīāū la̍chi̍ a̍ tōsāa̍ ni̍. Ndu̍yɛ̍ wānāa̍ su̍a̍ā le̍ ya̍ Mɛ̄lɛ̄ka̍ wa̍ bɛ̍ɛ̍, ma̍ bīī ma̍ tūāl nya̍ kɔ̄ɔ̄lī a̍ nyɛ̄ nya̍ chō tōsāa̍ wo̍. Le̍ he̍ī, I̍sɔ̄lūɛ̄ī, o̍ cho̍ māā kālā nya̍ wo̍, ō chō hūnɔ̄ɔ̄ tāmbu̍.

⁶Dɛ̍nɛ̍ pa̍lāā bɛ̄ndōo̍ ō kōma̍l wānāā nīa̍a̍ I̍sɔ̄lūɛ̄ī le̍ mɛ̄ɛ̍ nda̍ kɛ̄ɛ̄ sīnā pɛ̍ŋgo̍o̍ nɔ̄ɔ̍ yɛ̍. Le̍ mɛ̄ɛ̍ nya̍ wānāā sōlīāā lāsa̍lāa̍ lā kɛ̄ɛ̍ sīnā pɛ̄ŋgo̍o̍ nɔ̄ɔ̍ a̍ ya̍ Mɛ̍lɛ̄ka̍ o̍kɔ̄ɔ̄ yɛ̍, ya̍ bɛ̍ɛ̍ I̍ kɛ̍ɛ̍ nya̍ māā lā cho̍ lɛ̍ wānāā nīāā so̍līāā lāsa̍lā le̍. Ndu̍yɛ̍ ha̍a̍a̍ mi̍ lā kɛ̄ɛ̄ ya̍ Mɛ̍lɛ̄ka̍ nyāa̍ sāwāla̍ nīla̍ŋ chūa̍a̍, I̍ cho̍ hūnɔ̄ɔ̄ chūāūwāā nyāa̍ kɛ̄ɛ̄.

⁷“Wānāā sōlīāā lāsa̍lāa̍ bīī ma̍ kūī kūīyo̍ pīla̍ o̍ lɛ̄ŋnde̍ŋ ni᷅ŋ. Ndu̍yɛ̍ mɛ̄ɛ̍ nda̍ kūī fa̍ū, le̍nde̍ nda̍ hīāū la̍chi̍ a̍ yɔ̄ŋndā wɔ̄ɔ̍ŋnda̍ŋ tōsāa̍ o̍ ya̍ Mɛ̍lɛ̄ka̍ lo̍. Le̍ he̍ī, I̍ cho̍ tōsā bɛ̄ɛ̄le̍ nda̍ a̍a̍ nɔ̍ mī nda̍ a̍a̍ sɔ̍la̍ māā wānāā sōlīāā lāsa̍lā le̍ŋ, mī bɛ̄ɛ̄le̍ le̍ŋ lē sīmnu᷄ŋ si̍ɔ̍mbu̍la̍ŋ le̍ nda̍.

⁸Nda̍ wānāā sōlīāā lāsa̍lāa̍, yēēmɛ̍i̍ ndɛ̄i̍ bɛ̍ndūe̍i̍ to̍sa̍ ni̍, mi̍ wānāā nīa̍a̍ ā sīmnu᷄ŋ wa̍nāā dɛ̍nɛ̍ wɔ̍ɔ̍ŋ. Nyɛ̄m wānāā nīa̍a̍ ā sɔ̄lā o̍ nɛ̄īla̍ wɔ̍ɔ̍ŋnda̍ŋ ni᷄ŋ ndo̍ŋ, o̍ nyɛ̄m mu᷅ŋ ni᷄ŋ nda̍ wānāā sōlīāā lāsa̍lāa̍ ā dīā ni̍.

⁹Le̍ he̍ī, nyɛ̍ yɔ̍nūŋ ni̍ŋ a̍ wāŋnda̍ I̍sɔ̄lūɛ̄ī yo̍, ndu̍ ko̍ yɔ̍nūŋ ni̍ŋ a̍ wānāā sōlīāā lāsa̍lāa̍ ha̍ā ni̍. Nda̍ kpo̍u̍, I̍ cho̍ nda̍ hūnɔ̄ɔ̄ dɛ̍nɛ̍ pa̍lāa̍ tūsī chōo̍ ve̍llāa̍ vēllē, le̍ nyɛ̄ nda̍ tōsa̍ wo̍. Nyɛ̄ o̍ nyɛ̄ nda̍ tōsa̍ ā chō hūnɔ̄ɔ̄ pāāwā kōŋ sɔ̄lā ō pīāā cha̍.

¹⁰Ā wā ni̍ŋ nyɛ̍ dīa̍a̍ dīo̍o̍, kɛ̍ ā pi᷅m ni̍ŋ te̍, ā wā ni̍ŋ nyɛ᷅m chēle̍ŋndo̍ŋ sōōlūūwo̍ le̍ mī nyɛ̄m mu᷅ŋ ŋ̄ ke̍ nda̍ chūāūwa̍, kɛ̍ ā sɔ̍lā ni̍ŋ ŋ̍chu̍a̍ū o̍ ŋ̄chūāū le̍, fo̍ndōle̍, le̍ mɛ̄ɛ̍ nda̍ kɛ̄ɛ̍ ya̍ Mɛ̍lɛ̄ka̍ ndāa̍ ma̍ mūli᷄ŋ nyɛ᷅m chēle̍ŋndo̍ sōōlūūwo̍ māā mɛ̄lɛ̄ka̍ā ndā yɛ̍.”

¹¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Mūɛ̄īya̍ŋ a̍ tīɔ̄mɔ̄ɔ̄la̍ŋ lā bīī mi̍ lā tɛ̄ɛ̄mbūū wānāā nīa̍a̍ bōlle̍, ma̍ sīmnu᷄ŋ di̍ɔ̄mnda̍, mūɛ̄īya̍ŋ mā pāāndū ni̍, mā sɛ̄nɛ̄ī nī, ā nɔ̍ hɛ̍lī o̍ hɛ̄lī le̍ mā kɛ᷅ o̍ kɛ᷅ ā kōl.

¹²Nda̍ kpo̍u̍ ā kɛ̄ɛ̍ ya̍, ma̍ mūli᷄ŋ nyɛ᷅m chēle̍ŋndo̍ŋ pīɛ̄īyo̍ māā mɛ̄lɛ̄ka̍ā ndā. Mɛ̄ɛ̍ wānā la̍nɔ̍ɔ̍ ō lūɛ̄ī nu̍a̍ā tīɔ̄mɔ̄ɔ̍ mbō yɔ̄ŋgu̍ŋ o̍ wāŋ pīāāndūāā chēle̍ŋnda̍ lo̍ yɛ̍, le̍nde̍ nda̍ bīī ni̍ ma̍ kɛ̄ɛ̄ ya̍, ma̍ yɔ̄ŋgu᷄ŋ o̍ nyɛ̄m chēle̍ŋndo̍ŋ sōōlūūwo̍ ni̍ŋ. Tē ā hāu̍ bā le̍ īsɔ̄ɔ̍ o̍ īsɔ̄ɔ̍ pɛ̍, nyɛ̄m nda̍ tōōsi̍a̍a̍ a̍ yɔ̄mnde̍ māā mɛ̄lɛ̄ka̍ā ndā wo̍ŋ, mu̍ŋ nda̍ kūā di̍ōmndo̍ nyūnāa̍ ni̍. Yɔ̄mīi̍ cho̍ nda̍ o̍ lābā māā lātīnda̍ ve̍, ndi̍ nda̍ tīīnda̍ŋ le̍ nda̍ sɔ̄ɔ̍ŋ wa̍ā lāchīo̍ŋ dīmūllo̍ ni̍.

¹³O̍ ko̍ŋ kɔ̍ɔ̍lī, o̍ lūāŋndo̍ŋ chōo̍ lo̍ŋ nda̍ kūā sa̍lāla̍ŋ sōlīo̍o̍ o̍ nyɛ̄m mu᷅ŋ ndo̍ ni̍. O̍ pēmbo᷄ŋ chōo̍, a̍ o̍ yɔ̄mīī bɛ̄ndūe̍i̍ bɛ̄ŋgu̍, yɔ̄mīī nda̍ sāālūŋ wu̍ndu̍ma̍ kɛ̍ndɛ̄ kɛ̍ndīa̍ŋ lēbɛ̄ŋgu̍ ve̍, lo̍ŋ nda̍ kēī sa̍lālā lūāmāāla̍ŋ sōlīo̍o̍ o̍ mɛ̄lɛ̄ka̍ā ndāā ka̍ŋ lo̍ ni̍.” “Le̍ he̍ī, chūāā nyāā la̍a̍ndūa̍a̍ kpo̍u̍ ma̍ bīī ma̍ sīmnu᷄ŋ wa᷅ŋ lāāndūāā tīāmāā. Lāāndāā pūa̍a̍ nyāa̍ bɛ̍ɛ̍ ma̍ sīmnu᷄ŋ wa᷅ŋ lāāndūāā sūūndɛ̍i̍.

¹⁴Kɛ̍ ndu̍yɛ̍, mi̍ chē bɛ̍ɛ̍ mi̍ chūāūwāā nyāā la̍a̍ndūa̍a̍ ā sīmnu᷄ŋ wa̍nāā tīāmāā, ndu̍yɛ̍ lāāndāā pūa̍a̍ nyāa̍ bɛ̍ɛ̍, ma̍ sīmnu᷄ŋ wa̍ŋ lāāndūāā sūūndɛ̍i̍, kɛ̍ I̍ tu̍sī nda̍ nyɛ̄ pālāā o̍ nyɛ̄ pālāā chōo̍ le̍, kāni̍ fo̍ndōle̍, tē ō wa̍ māā yɔ̄ŋɔ̄ɔ̄ pɛ̍, nya̍ pūa̍a̍ nya̍ ve᷅m nda̍ ni̍. Nya̍ pi̍la̍ chō kēīyo̍ hīni̍la̍ŋ a̍ wāŋ lāāndūāā tīāmāa̍, ndu̍yɛ̍ o̍ ko̍ŋ kɔ̍ɔ̍lī, mī lā sōlī sa̍lāla̍ŋ o̍ mɛ̄lɛ̄ka̍ā nyāa̍ lo̍, nya̍ wāŋ lāāndūāā tīāmāa̍ wa᷅ o̍ fo̍ndāŋndā lāsōōlu̍u̍ la̍ŋ nda̍ lātūlu̍. Ndu̍yɛ̍ ha̍a̍a̍ mi̍ lā kɛ̄ɛ̄ sīnā pɛ̄ŋgo̍o̍ sɔ̄lāa̍ a̍ nyɛ̄ nya̍ chō tōsāa̍ wo̍, dɛ̍nɛ̍ pa̍lāā bɛ̄ndōo̍ ō chō le̍ nya̍.

¹⁵“Wāŋnda̍ I̍sɔ̄lūɛ̄ī, lā bīī mi̍ lā kɛ̄ɛ̄ ya̍, mi̍ lā mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍ā nya̍, kɛ̍ ndu̍yɛ̍, I̍ cho̍ wāŋnda̍ Chu̍dā dīmūl, ā tu̍āl nya̍ kɔ̄ɔ̄lī mī nda̍ bɛ̍ɛ̍ a̍ si̍mnu᷄ŋ wa̍nāā yɔ̄ŋ wɔ̄ɔ̍ŋ māā nya̍ le̍. Wāŋnda̍ Chu̍dā, lā ku̍ā Ki̍lkāl chi̍e̍e̍ le̍ mɛ̄lɛ̄ka̍ā chēle̍ŋnda̍ sōōlūū le̍. Lā ku̍ā vɛ̄lɛ̄ Bɛ̍ta̍vīŋ[5] chi̍e̍e̍ le̍. Ndu̍yɛ̍ tē lā wa̍ īsɔ̄ɔ̍ o̍ īsɔ̄ɔ̍ to̍sā pɛ̍, wānā me̍na᷄ŋ mā di̍mi̍ māā, le̍ Mɛ̄lɛ̄ka̍ Ya̍a̍wɛ̄ɛ̄ I̍ cho̍ he̍ī tōsāa̍ le̍.

¹⁶Lā tu̍āl wāŋnda̍ I̍sɔ̄lūɛ̍i̍ kɔ̄ɔ̄lī le̍, wānāā bōlīī kālāa̍ nda̍ chō ni̍. Mɛ̄ɛ̍ nāū bōllē kālāa̍ ō wā nu̍a̍ā yɛ̍, le̍nde̍ wāŋnda̍ I̍sɔ̄lūɛ̄ī a̍ cho̍ ni̍. Tē nda̍ a̍a̍ wa̍ wānāa̍ tu̍e̍ī ya̍ dīōm pɛ̍, mɛ̄ɛ̍ wānā ma̍ndāā lāsāa̍ ō māndā nu̍a̍ā sāa̍ ndūa̍a̍ o̍ fo̍ndā māndāā lāsāa̍ yɛ̍, le̍nde̍ ya̍ Mɛ̍lɛ̄ka̍ Ya̍a̍wɛ̄ɛ̄ ya̍ i̍i̍ ma̍ndā ni̍ŋ nda̍ ni̍, kɛ̍ ā tūi̍i̍ ya̍ dīōm te̍.

¹⁷Yu̍ŋgu̍ E̍fi̍lūēm ndo̍ bīī ma̍ kɛ̄ɛ̄ ya̍, ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍ā ndā. Le̍la̍ŋ ā wānu̍ŋ o̍ bā ndāa̍ chōo̍ mā tōsa̍ nyɛ̄ nda̍ yēēma̍ wo̍.

¹⁸Nda̍ kpo̍u̍ ā sīmnu᷄ŋ wa̍nāā kōlāā, ndu̍yɛ̍ ma̍ lō o̍ ko̍ŋ ma̍ chūā ni̍ko̍ ti̍ɔ̍mɔ̄ɔ̍ māā wa̍li̍ nda̍. Sɔ̄ɔ̍ŋ lāsi̍ɔ̍mbo̍ŋ, mu̍ŋ nda̍ hīōū ni᷅ŋ hɛ̄na᷄ŋ to̍sāa̍, a̍ sɔ̄ɔ̍ŋ lēbīɔ̍ɔ̍ŋ.

¹⁹Le̍ he̍ī, nda̍ kpo̍u̍ ā chō nda̍ hūnɔ̄ɔ̄ bāsɔ̄ɔ̄ tɛ̍ɛ̍, mɛ̄ɛ̍ hūēīye̍ ī bāsū nu̍a̍ā nyɔ̄ɔ̍ mī ī kūɛ̄nu᷄ŋ a̍ ndu̍ yɛ̍, ndu̍yɛ̍ o̍ ko̍ŋ kɔ̍ɔ̍lī, mī si̍ɔ̍mbu̍la̍ bɛ̄ndūla̍ŋ lā hu᷄ŋ bi̍ī nda̍ a̍ sōōlu̍u̍la̍ ndā la̍ŋ.”