Read Southern Kisi Hōōsi̍a̍ā 5 Bible Online

Hōōsi̍a̍ā 5 - Southern Kisi bible

Hōōsi̍a̍ā 5

¹“Lā ya᷄ŋ ya̍ nīla̍ŋ, nya̍ wānāā sōlīāā lāsa̍lāa̍ I̍sɔ̄lūɛ̄ī. Lā tūe̍i̍ nyɛ᷅ ya̍ I̍ hi᷅ŋ dīmīo̍o̍ wo̍, nya̍ wāŋnda̍ I̍sɔ̄lūɛ̄ī. Lā ya᷄ŋ ni᷅la̍ŋ nyɛ̄ kɛ̄ndɛ̄ kɛ̍ndɛ̍ī, nya̍ fu̍la̍ o̍ yu̍ŋgu̍ lēmāsāa̍ chōo̍ wa̍. Nya̍ nya̍ a̍a̍ nɔ̍ ni̍, mī nya̍ a̍a̍ chɔ̍m wāŋnda̍ mɛ̄ɛ̍ nda̍ tōsā sɔ̍ɔ̍ŋ o̍ nɛ̄ī sa̍kpo̍o̍ chōo̍ yɛ̍. Kɛ̍ tē ō wa̍ māā yɔ̄ŋɔ̄ɔ̄ pɛ̍, nya̍ kpe̍e̍kpe̍i̍ ye̍ŋ wāŋnda̍ yāŋɔ̄ɔ̄lē yɔ̄ŋ wɔ̄ɔ̍ŋnde̍ŋ Mi̍si̍pā chi̍e̍e̍ ni̍ ma̍ hāū. Nya̍ to̍ndū yāla̍ yɔ̄ŋ wɔ̄ɔ̍ŋndo̍ wāŋnda̍ lāchī o̍ Pēmbīī Ta̍bɔ̄ɔ̄ve̍ chōo̍ ni̍ ma̍ hāū.

²Nya̍ tu̍u̍lu̍l wāŋnda̍ so̍o̍ŋ yɔ̄ŋ wɔ̄ɔ̍ŋndo̍ Āke̍e̍sīāā chi̍e̍e̍ ni̍ ma̍ dēl lēni᷄ŋ. Le̍ he̍ī, nya̍ kpo̍u̍ I̍ cho̍ nya̍ nyɛ̄ pālāā bɛ̄ndōo̍ tūsī chōo̍.

³I̍ si̍nā wa̍nāā wāŋnda̍ E̍fi̍lūēm a̍ cho̍ wa̍. Wāŋnda̍ I̍sɔ̄lūɛ̄ī a̍ cho̍ wa̍nāā ya̍ I̍ pɔ̍u̍ le̍. Ā bīī ma̍ kɛ̄ɛ̄ ya̍ ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍ā nda̍. Le̍ he̍ī, ma̍ tōsā mi̍ lɛ̄ŋndē I̍sɔ̄lūɛ̍i̍le̍ŋ lē tāmbū, mi̍ lē sīmnu᷄ŋ lɛ᷅ŋndē nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l.”

⁴“Wāŋnda̍ I̍sɔ̄lūɛ̄ī a̍ to̍sa̍ ni᷅ŋ yɔ̄ŋ wɔ̄ɔ̍ŋndo̍ te̍i̍, ā kīndi̍ ni᷅ŋ bɛ̍ɛ̍ le̍ mā pɛ̄ŋgi̍ yɔ̄ŋ wɔ̄ɔ̍ŋndo̍ tōsāa̍ mā mūli̍ŋ nāa̍ Mɛ̄lɛ̄ka̍ ndāa̍ chūā, ā nɔ̍lā lɛ̍ le̍. Yɔ̄ŋ wɔ̄ɔ̍ŋ sūūndɛ̍i̍yo̍ ō pɛ̄ ni᷅ŋ nda̍ o̍ kɔ̄l te̍i̍, ā nɔ̍lā lɛ̍ mā hɛ̄lu᷄ŋ ndu̍, mā kīndi̍ le̍ mā si̍nā lɛ̍ mā Mɛ̄lɛ̄ka̍ Ya̍a̍wɛ̄ɛ̄ le̍ cho̍ Mɛ̄lɛ̄ka̍ ndāa̍ le̍.

⁵Wānā che᷅ nda̍ dɔ̍ɔ̍ pɛ̍, a̍ si̍na̍ māā wānāā yōŋgāā bɛ̍ndū bɛ̍ndūa̍a̍ nda̍ chō ni̍. Yɔ̄ŋ wɔ̄ɔ̍ŋndo̍ tōsa̍ mi̍ yu̍ŋgu̍ E̍fi̍lūēmndo̍ a̍ kɛ̄ɛ̄ Mɛ̄lɛ̄ka̍, ma̍ fāŋa᷄ŋ o̍ nɛ̄i̍ tōnya̍a̍ chōo̍. Ndu̍yɛ̍ wāŋnda̍ Chu̍dā bɛ̍ɛ̍ ma̍ bīī ma̍ tūāl nda̍ kɔ̄ɔ̄lī.

⁶Le̍ he̍ī, ā yɔ᷄ŋ bɛ̍ɛ̍ mā kūɛ̄ a̍ sāa̍ ndāa̍, a̍ nāūwāā ndāa̍, mā sōli̍ nda̍ sa̍lāla̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍, ō ye᷅ŋ nda̍ lānī le̍, kāni̍ fo̍ndōle̍, yɔ̄ŋ ndā wɔ̍ɔ̍ŋndo̍ tōsa̍ mi̍ Mɛ̄lɛ̄ka̍ fāŋa᷄ŋ nda̍ kɔ̄ɔ̄lī.

⁷Ā bīī ma̍ kɛ̄ɛ̄ Mɛ̄lɛ̄ka̍ Ya̍a̍wɛ̄ɛ̄ ma̍ mūli᷄ŋ nyɛ᷅m chēle̍ŋ sōōlūūwo̍ māā mɛ̄lɛ̄ka̍ā ndā. Ndu̍yɛ̍ chūāūwāā ndāa̍ nda̍ vēlū wa̍ ki̍nɛ̍i̍, ō pīlɛ̍ bɛ̍ɛ̍ o̍ cho̍ mbō wa̍ le̍ Mɛ̄lɛ̄ka̍ le̍. Le̍ he̍ī, nda̍ kpo̍u̍ ā chō hūnɔ̄ɔ̄ wā ā tɛ̄ɛ̄mbāā, bɔ̄ŋa᷅ŋndā ndāla̍ pāŋgi̍i̍ sɛ̍nɛ̄ī la̍ŋ, la̍ŋ la̍ cho̍ nda̍ hūnɔ̄ɔ̄ tɛ̄ɛ̄mbūū a̍ chīɔ̄ɔ̄ŋ nda᷄ŋ lātūlu̍ ni̍.”

⁸Lā hɔ᷄ŋ bu̍lu̍la̍ chɔ̄ūla̍ŋ Ki̍bīāā chi̍e̍e̍, mī lā bɛ̄ɛ̄ndi̍a̍ŋ le̍ sɔ̍ŋgɔ̄ɔ̍. Lā hɔ᷄ŋ bu̍lu̍ chɔ̄ūwo̍ Lu̍a̍mā chi̍e̍e̍. Lā vēēlu̍ pu̍a̍a̍ chɔ̄ūwa̍ Bɛ̍ta̍vīŋ chi̍e̍e̍ ve̍e̍lū chɔ̄ūwo̍. Pūa̍a̍ chɔ̄ūwa̍ Bɛ̍ŋnja̍mīŋ, lā bɛ̄ɛ̄ndi̍a̍ŋ le̍ kɔ̄la̍ŋ o̍ chɔ̄ūwo̍.

⁹Dɛ̍nɛ̍ pa̍lāā bɛ̄ndōo̍ hīŋ le̍ yu̍ŋgu̍ E̍fi̍lūēm ndo̍. I̍sɔ̄lūɛ̄ī o̍ hi᷅ŋ tāmbu̍, mbō sīmnu᷄ŋ pɔ᷅m. Wāŋnda̍ I̍sɔ̄lūɛ̄ī, nya̍ wānā o̍ wāna̍ cho̍ o̍ lɛ̄ŋnde̍ŋ nde᷅ŋ ni᷄ŋ, dɛ̍nɛ̍ pa̍lāā bɛ̄ndōo̍ ō hīŋ le̍ nya̍. Ndu̍yɛ̍ nyɛ̄ ya̍ I̍ di̍mi̍ wo̍ chō yɔ̄nɔ᷄ŋ mɛ̄ɛ̍ ya̍ I̍ di̍mi̍ yɛ̍.

¹⁰Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋ bɛ̄ndūa̍a̍ Chu̍dā a̍ si̍mnu᷄ŋ mɛ̄ɛ̍ wānāa̍ po̍o̍ndīāā wa᷅ŋnda̍ lɛ̄ŋīī ndɛ̄i̍ o̍ lābā a̍ lēdīɔ̄ɔ̄mū wa̍ ā chō yɛ̍. Le̍ he̍ī, ya̍ Mɛ̍lɛ̄ka̍ dɔ̄ɔ̄nu᷄ŋ tu̍mbe̍ a̍ nda̍ o̍ ka̍lā ka̍lā. I̍ cho̍ nda̍ nyɛ̄ pālāā bɛ̄ndōo̍ tūsī chōo̍ mbō fūūlu̍u̍ nda̍ mɛ̍ɛ̄.

¹¹Dɛ̍nɛ̍ pa̍lāā bɛ̄ndōo̍ ō tōl wāŋnda̍ E̍fi̍lūēm chōo̍, nda̍ yɔ̍nūŋ māā wāŋnda̍ I̍sɔ̄lūɛ̄ī ni̍, fo̍ndōle̍, le̍ mɛ̄ɛ̍ nda̍ kɛ̄ɛ̍ ya̍ ma̍ mūli᷄ŋ nyɛ᷅m fo̍ndo᷄ŋ sōōlūūwo̍ yɛ̍. Yɔ̄ŋ wɔ̄ɔ̍ŋ wāŋnda̍ I̍sɔ̄lūɛ̄ī a̍ to̍sa̍ wo̍, pāāwā kōŋ nda̍ chō ho̍ō sɔ̄lāa̍ ni̍.

¹²I̍ cho̍ tōsā mī lɛ̄ŋndē I̍sɔ̄lūɛ̍i̍le̍ŋ lē tāmbu̍, mɛ̄ɛ̍ kāāŋgūa̍a̍ ā tɛ̄ɛ̄mbūū nu̍a̍ā nyɔ̄ɔ̍ mā sīɔ̄ŋi̍ ndu̍ yɔ̍ɔ̍sī yɔ̍ɔ̍sī yɛ̍, ndu̍yɛ̍ o̍ ko̍ŋ kɔ̍ɔ̍lī, mī to̍sa̍ mī wāŋnda̍ I̍sɔ̄lūɛ̄ī a̍ hu̍ŋ ta̍mbū mɛ̄ɛ̄ nyɔ̄ɔ̍ ō tāmbū nu̍a̍ā mbō sɛ̄ yɔ̍ yɔ̍ yɛ̍.

¹³“Mɛ̄ɛ̍ yu̍ŋgu̍ E̍fi̍lūēm ndo̍ o̍ chē mɛ̄ɛ̍ kpɛ̍ o̍ na̍a̍ yɛ̍, o̍ ko̍ŋ kɔ̍ɔ̍lī, mi̍ Chu̍dā o̍ cha᷅ mɛ̄ɛ̍ o̍ yɔ̍ŋu̍lu̍ŋ yɛ̍, ma̍ lō o̍ ko̍ŋ ma̍ kūā Āsi̍i̍līāā, ma̍ kɔ̍ nyu̍nā māsa̍ kpāāyā bɛ̍ndu̍ cho̍ lo̍ŋ ndo̍ le̍ mbō māla̍ nda̍. Kɛ̍ māsāa̍ ho̍ō ō nɔ̄la̍ mbō chīɔ̍u̍ nda̍ nāā kōŋ, a̍ yɔ̄ŋūlɔ᷄ŋ ko̍ŋ te̍.

¹⁴Wāŋnda̍ I̍sɔ̄lūɛ̄ī ni̍, wāŋnda̍ Chu̍dā ni̍, I̍ cho̍ nda̍ hūnɔ̄ɔ̄ chīŋa̍la᷅ŋ mɛ̄ɛ̍ kpɔ̍kūŋ fɔ̍ŋndɔ̍ɔ̍ ō dēl nu̍a̍ā vīsīo̍o̍ chōo̍ mbō sɛ̄ɛ̄si̍a̍a̍ ndu̍ yɛ̍, mī tɛ̍ɛ̍mbu̍u̍ nda̍ kpo̍u̍. Ya̍ pi̍la̍ kɛ̍sɛ̍ kɛ̍sɛ̍ cho̍ nda̍ hūnɔ̄ɔ̄ dēlɔ̄ɔ̄ chōo̍ ni̍, mī sɛ̍ɛ̍si̍a̍a̍ nda̍ kpo̍u̍, mī mɛ̍i̍ dīāllūŋ nda᷄ŋ lɛ̄ŋ ndo̍ŋ mī I̍ ku̍ɛ̍ŋnu᷄ŋ. Ndu̍yɛ̍ te̍ te̍le̍ŋ ko̍ŋ ō fūūlu̍u̍ pɛ̍ mī wa̍ nda̍ sɛ̄ɛ̄sūūwo̍, wānā o̍ wānā nɔ̍lā ni̍ŋ mbō so̍li̍ nda̍ ya̍ o̍ bā le̍.

¹⁵“Ndu̍yɛ̍ o̍ ko̍ŋ kɔ̍ɔ̍lī, I̍ cho̍ nda̍ hūnɔ̄ɔ̄ mālɔ̄ɔ̄ o̍ bā ndāa̍ chōo̍, mī fa̍ŋa̍ nda̍ hɔ̄ltē nīle̍ŋ kɔ̄ɔ̄lī ba̍ū, mbō lo̍ o̍ ko̍ŋ ha̍a̍a̍ mā hīŋ o̍ nda̍ pi̍la̍ ni᷄ŋ, mā cha᷄l mā yīya̍ŋ a̍ nyɛ̄ nda̍ tōsa̍ wo̍, mā mīīŋgu̍ ya̍ o̍ ībūŋ. Nda̍ pi̍la̍ chō hūnɔ̄ɔ̄ sāŋga̍ cho̍ nda̍ wā chōo̍ wo̍ chɔ̄, ndu̍yɛ̍ mā yīya̍ŋ a̍ nyɛ̄ nda̍ tōsa̍ wo̍, o̍ ko̍ŋ mā kīndi̍ le̍ mā tōsa̍ nyɛ̄ ya̍ I̍ hɛ̍na̍ŋndo̍.”