Read Southern Kisi Hōōsi̍a̍ā 6 Bible Online

Hōōsi̍a̍ā 6 - Southern Kisi bible

Hōōsi̍a̍ā 6

¹Wāŋnda̍ I̍sɔ̄lūɛ̄ī a̍ cho̍ dīmīo̍o̍ āā, “Lā ŋ̄ mīīŋgu᷅ŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍. Ō yɔ̄ŋu̍l na̍a̍, kɛ̍ ō chō vɛ̄lɛ̄ na̍a̍ chīɔ̄ū. Ō bōōlu̍u̍ na̍a̍, kɛ̍ ō chō na̍a̍ kōo̍wa̍ŋ dɔ̄wɔ̄ɔ̄ o̍ pāūvīī kēŋ, mbō yīū yi̍u̍ ndi̍ mbō sīŋgi̍ na̍a̍.

²Tē pālɛ̍i̍ ŋi̍i̍ŋ ī hīōū pɛ̍, ō chō na̍a̍ yōōmū sɛ̄nɛ̄ī kē, o̍ pāa̍le̍ ya̍a̍ ndɔ̄ le̍ŋ ō chō na̍a̍ mīŋgī yōōmū mī ŋ̄ hīōū lāchī a̍ wāa̍ yōōmū ndu̍ o̍ hɔ̄l.

³Le̍la̍ŋ ō bɛ̄ndā mī ŋ̄ sīna̍ Mɛ̄lɛ̄ka̍ Ya̍a̍wɛ̄ɛ̄. Lā ŋ̄ kīndi᷅ŋ o̍ nɛ̄ī o̍ nɛ̄ī ni̍ŋ mī ŋ̄ sīna᷅ŋ ndu̍. Tē ŋ̄ sīna̍ ndu̍ pɛ̍, mɛ̄ɛ̍ pāa̍le̍ŋ lē fūlā nu̍a̍ā le̍ te̍le̍ŋ o̍ te̍le̍ŋ a̍ wɔ̄ɔ̄le̍ŋ lē be̍ŋgā le̍ yɛ̍, le̍nde̍ o̍ sɔ̍ɔ̍ŋgūū na̍a̍ īkɛ̄i̍ le̍ te̍le̍ŋ o̍ te̍le̍ŋ ni̍. Mɛ̄ɛ̍ pīɔ̍ɔ̍ ō sīā nu̍a̍ā a̍ sīālte̍ŋ mbō tōsa̍ mī nyɛ̄ o̍ nyɛ̄ mīīŋgu̍ pūīyo̍ yɛ̍, le̍nde̍ o̍ to̍sā ni̍ mī ŋ̄ sɔ̄la̍ yōōmū sɛ̄nɛ̄īyo̍.”

⁴Kɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋnda̍ I̍sɔ̍lūɛ̄ī, a̍ wāŋnda̍ Chu̍dā, I̍ si̍nā mɛ̄ɛ̍ ya̍ Mɛ̄lɛ̄ka̍ yɔ̄ŋ a̍ nya̍ yɛ̍ le̍. Kāālā nya̍ nɔ̄ le̍ ya̍ wo̍, kāālā kɔ̄l chōo̍ wo̍ o̍ cho̍ ni̍. Mɛ̄ɛ̍ mɔ᷄mndo̍ ō tūāl nu̍a̍ā īchɔ̄l, kɛ̍ tē pāa̍le̍ŋ lē sɛ̄ dɔ̍ɔ̍ pɛ̍ ō kīōlu̍ so̍ yɛ̍, le̍nde̍ kāālā nya̍ nɔ̄ le̍ ya̍ wo̍ ō chō ni̍.

⁵Nyɛ̄ ko̍ŋ to̍sa̍ ni̍, mi̍ di̍ū wānāā bɔ̄ɔ̍ bɔ̍ɔ̍ nya̍ tɛ̄ɛ̄ŋ a̍ dīōmndā nīla̍ ya̍ I̍ dɔ̍ū wānāa̍ su̍a̍ā le̍ ya̍ wa̍ o̍ lāsōndō ma̍ dīmūl nya̍ la̍ŋ. Ndu̍yɛ̍ sa̍bū ko᷄ŋ to̍sa̍ ni̍, mi̍ du̍a̍u̍nu᷄ŋ tu̍mbe̍ a̍ nya̍ o̍ ka̍lā ka̍lā, mi̍ ke̍lēŋā nya̍ nyɛ̄ pālāa̍ tūsī chōo̍.

⁶Wāŋnda̍ I̍sɔ̄lūɛ̄ī, ō cho̍ la̍sa̍lā le̍ ya̍ Mɛ̍lɛ̄ka̍ I̍ yēēma̍ nya̍ o̍ lābā le̍, kāālā kpe̍e̍kpe̍i̍yo̍ nɔ̄ɔ̍ le̍ ya̍, ndu̍ ya̍ Mɛ̍lɛ̄ka̍ yēēma̍ ni̍. Sīnāa̍ ya̍ māā Mɛ̄lɛ̄ka̍ nya̍ ndu̍ hi̍o̍ū bɛ̍ndā, a̍ sa̍lālā lūāmāāla̍ŋ sōlīo̍o̍ o̍ ya̍ lo̍.

⁷“Kɛ̍ nya̍ wāŋnda̍ I̍sɔ̄lūɛ̄ī mi̍ lā bīī mi̍ lā sōlī ya̍ Mɛ̍lɛ̄ka̍ dīōm. Mɛ̄ɛ̍ A̍dām o̍ so̍li̍ ya̍ Mɛ̍lɛ̄ka̍ dīōm yɛ̍, le̍nde̍ nya̍ sōli̍ ya̍ dīōm ni̍.

⁸Wānā o̍ wāna̍ cho̍ Ki̍li̍a̍a̍dī chi̍e̍e̍, nda̍ kpo̍u̍ ā sīmnu᷄ŋ wa̍nāā yɔ̄ŋ wɔ̄ɔ̍ŋ ma̍ sīmnu᷄ŋ wa̍nāā dīyāā ŋ̄wāŋndā chi̍e̍e̍.

⁹Mɛ̄ɛ̍ vīīya̍ ā wā nu̍a̍ā wāŋndo̍ mɛ̄ŋgɛ̄lāa̍ le̍ ndu̍ dēlɔ̄ɔ̍ chōo̍ mā pōōndi̍a̍a̍ nyɛ̄m ndɔ᷄ŋ yɛ̍, le̍nde̍ wānāā sōlīāā lāsa̍lāa̍ ā hīnī wa᷅ŋnda̍ mɛ̄ŋgɛ̄līa̍a̍ o̍ nɛ̄īla̍ŋ ni̍, le̍ nyɛ̄m nda̍ŋ pōōndi̍a̍a̍. Nɛ̄i̍ ku̍ɛ̄ Si̍ɛ̍kɛ̄m chi̍e̍e̍ o̍ fo̍ndā nī di̍a̍ndāa̍ wo̍, o̍ nɛ̄ī ko̍ŋ kpe̍e̍kpe̍i̍ nda̍ kūā wa᷅ŋnda̍ dīūwo̍ ni̍. Ndu̍yɛ̍ tē ā wa̍ ndi̍ tōsāa̍ pɛ̍, ā to̍sā ndi̍ bɛ̍ɛ̍ o̍ vīōŋnɔ᷄ŋ ni̍ŋ te̍, tōsāa̍ ndi̍ kpe̍nde̍ke̍le̍ a̍ hɔ̄ltā vēsɛ̍i̍.

¹⁰Yɔ̄ŋ wɔ̄ɔ̍ŋ ya̍ I̍ che᷅ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ ndo̍, ō wɔ̄u̍ ō bɔ̄ɔ̍. Wānāā nīa̍a̍ I̍sɔ̄lūɛ̄ī a̍ kɛ̍ɛ̍ ya̍, ma̍ mūli᷄ŋ nyɛ᷅m chēle̍ŋ ndo̍ŋ sōōlūūwo̍ māā Mɛ̄lɛ̄ka̍a̍ nda̍. Le̍ he̍ī, nda̍ kpo̍u̍ ma̍ sīmnu᷄ŋ a̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l.

¹¹“Ndu̍yɛ̍ nya̍ wāŋnda̍ Chu̍dā, nya̍ bɛ̍ɛ̍ pāa̍le̍ nyāle̍ŋ lē chō o̍ nɛ̄ī, pāa̍le̍ ya̍ I̍ tu̍sī ni̍ŋ nya̍ nyɛ̄ pālāa̍ chōo̍ le̍ŋ lē nyɛ̄ nya̍ cho̍ tōsāa̍ wo̍.”