Read Southern Kisi Hōōsi̍a̍ā 7 Bible Online

Hōōsi̍a̍ā 7 - Southern Kisi bible

Hōōsi̍a̍ā 7

¹“Wāŋnda̍ I̍sɔ̄lūɛ̄ī nāa̍ cho̍ nda̍ wo̍, ō cho̍ na̍a̍ chi̍ɔ̍u̍nu̍ŋ te̍. I̍ wa᷅ ki̍ndīo̍o̍ le̍ nda̍ chīɔ̄ūwo̍ le̍ mī to̍sa̍ mā mīīŋgu̍ māā pāāndū, mī yɔ̄ŋndā wɔ̄ɔ̍ŋndā nda̍ chō tōsāa̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, a̍ Sāme̍e̍līāā chi̍e̍e̍ la̍ŋ lā chɔ̄mnu᷄ŋ de᷅ŋ. Wāŋnda̍ chō wāŋnda̍ hūīyo̍ mā dīā nyɛ᷅m nda᷄ŋ a̍ lāka̍fā. O̍ ko̍ŋ kɔ̍ɔ̍lī, mi̍ vīīya̍ nda̍ bīī ma̍ tīū I̍sɔ̄lūɛ̄ī kpo̍u̍, kēīyo̍ chīɛ̄īlā wāŋnda̍ pēsīo̍o̍ mā chɔ̄ɔ̄vīāā nyɛ᷅m nda᷄ŋ, o̍ ko̍ŋ kɔ̍ɔ̍lī, mā kēī wa᷅ŋnda̍ dēlɔ̄ɔ̍ chōo̍ o̍ nɛ̄īla̍ŋ, mā pōōndīāā nda̍ nyɔ̄ɔ̍ŋ o̍ lābā.

²Wāŋnda̍ I̍sɔ̄lūɛ̄ī a̍ wa̍ yīya᷄ŋndo̍ māā yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nda̍ chō tōsāa̍ māā ya̍ Mɛ̍lɛ̄ka̍ I̍ si̍nā a̍ ndu̍ o̍kɔ̄ɔ̄ le̍. Kɛ̍ ndu̍yɛ̍ tē ō wa̍ māā yɔ̄ŋɔ̄ɔ̄ pɛ̍, yɔ̄ŋndā ndāla̍ wɔ̄ɔ̍ŋnda̍ŋ lā chō nda̍ lābālāā si̍lɔ̍, mɛ̄ɛ̍ o̍ mɛ̄ɛ̍ cho̍ mī ya̍ Mɛ̍lɛ̄ka̍ kɛ̄ɛ̍ la̍ŋ chɔ̄ le̍.”

³Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Māsā bɛ̍ndōo̍ I̍sɔ̄lūɛ̄ī ni̍, wānāā ndūāā bɛ̍ndūa̍a̍ ni̍, wāŋnda̍ chō nda̍ hūīyo̍, ma̍ wā nda̍ chōōla̍ŋ dīmūllo̍, le̍ hāli̍kpe̍ŋ mī māsāa̍ nda̍ wānāā ndūāā bɛ̍ndūa̍a̍ na᷄ŋ kɔ̍l a̍ nda̍ kāŋ.

⁴Wānā o̍ wāna̍ cho̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, nda̍ kpo̍u̍ sīmnu᷄ŋ wa̍nāā sūūndɛ̍i̍. Le̍ te̍le̍ŋ o̍ te̍le̍ŋ kɔ̄ltā ndāla̍ŋ lā chō lā pīāā a̍ yēēma̍ŋ wɔ̍ɔ̍ŋndo̍ŋ. Mɛ̄ɛ̍ wānā lu̍a̍māā bēe̍dīi̍yo̍ ō dūāū nu̍a̍ā yīŋnde̍ŋ o̍ fo̍ndāŋ lūāmāā bēe̍dīi̍yo̍, mī yīŋnde̍ŋ lē kīndu᷄ŋ ki̍ndɔ᷄ŋndo̍ pi̍la̍ yɛ̍, le̍nde̍ kɔ̄ltā ndāla̍ŋ lā chō lā pīāā le̍ te̍le̍ŋ o̍ te̍le̍ŋ le̍ sɔ̄ɔ̍ŋ wɔ̍ɔ̍ŋndo̍ŋ tōsāa̍ ni̍.

⁵Pāa̍le̍ māsā bɛ̍ndōo̍ ō vēēlū bɔ̍ŋa᷅ŋ kɔ̄l kɛ̄ndɛ̄ bɛ̄ndōo̍ le̍ŋ, māsā bɛ̍ndōo̍ pīla̍ ni̍, wāŋ bɛ̄ndūa̍a̍ cho̍ ndu̍ wa̍llo̍ o̍ bā bɛ̄ŋgu̍ wa̍ ni̍, mi̍ wāŋnda̍ pīmī nda̍ mūɛ̄īya̍ŋ cha̍ cha̍, ma̍ yɔ̄nu᷄ŋ māā lādīɔ̄m.

⁶Wāŋnda̍ ha̍ā kɔ̄ltā ndāla̍ tu̍ūla̍ŋ, mɛ̄ɛ̍ yīŋnde̍ŋ lē chō nu̍a̍ā yɛ̍, le̍nde̍ la̍ cho̍ ni̍. Mɛ̄ɛ̍ yīŋnde̍ŋ lē lɔ̄l nu̍a̍ā kūlā kūla᷄ŋndo̍ o̍ sa᷄llo̍ ni᷄ŋ tē pāa̍le̍ŋ lē sɛ̄ pɛ̍, lē kīndu᷄ŋ ki̍ndɔ᷄ŋndo̍ pīla̍ yɛ̍, le̍nde̍ kɔ̄ltā ndāla̍ tu̍ūla̍ŋ lā chō ni̍. Māsa̍ ndā bɛ̍ndōo̍ ma̍ lō o̍ ko̍ŋ ma̍ yīī ndu̍ de̍fo̍o̍ a̍ kɔ̄ltā ndāla̍ tu̍ūla̍ŋ.

⁷“Nda̍ kpe̍nde̍ kɔ̄ltā ndāla̍ŋ, le̍ te̍le̍ŋ o̍ te̍le̍ŋ mɛ̄ɛ̍ yīŋnde̍ŋ lē chō nu̍a̍ā yɛ̍ le̍nde̍ la̍ cho̍ ni̍. Wānāa̍ cho̍ nda̍ chīla̍ŋ nda̍, ma̍ chīī nda̍ dīū kpo̍u̍ a̍ kɔ̄ltā ndāla̍ tu̍ūla̍ŋ. Māsāa̍ ndāā bɛ̍ndūa̍a̍ kpo̍u̍ ō pīlɛ̍ bɛ̍ɛ̍ o̍ cho̍ lɛ̍ le̍. Ndu̍yɛ̍ nda̍ ki̍nɛ̍i̍, ō pīlɛ̍ bɛ̍ɛ̍ ō nyūna̍ ya̍ dīōm le̍ ndu̍ mālā le̍.”

⁸O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “Wāŋnda̍ I̍sɔ̄lūɛ̄ī a̍ bi̍ī ma̍ tūāl lɛ̄ŋīī chēle̍ŋnde̍ kɔ̄ɔ̄lī, ma̍ mūūli̍āŋ a̍ lɛ̄ŋīī kēŋ. Tē ō wa̍ māā yɔ̄ŋɔ̄ɔ̄ pɛ̍, mɛ̄ɛ̍ dɛ̄ɛ̄ kɔ̄ɔ̄vɛ̍i̍yo̍ ō wā nu̍a̍ā ō lūāwāa̍ wā le̍ni̍ŋ, o̍ lo̍u̍ le̍ wo̍ ō wā le̍ni̍ŋ yɛ̍, le̍nde̍ wāŋnda̍ i̍sɔ̄lūɛ̄ī a̍ cho̍ ni̍.

⁹Wānāā lēkāa̍ wa̍ ā chō nda̍ kpāāyāa̍ pōōndāa̍ o̍ bā ō pɔ̄m pɔ̍mbɔ̄, kɛ̍ ā cho̍ bɛ̍ɛ̍ o̍ sīnā chōo̍ le̍. Mɛ̄ɛ̍ wāŋndo̍ ō hūŋ nu̍a̍ā yūwāa̍ mī yūlu̍ŋnde̍ ī hīŋ le̍ ndu̍ bōlle̍ŋ kūmbɔ̄ɔ̍ kpo̍u̍, ō ve᷅m si̍nā le̍ yɛ̍, le̍nde̍ i̍ yɔ̍nu̍ŋ a̍ wāŋnda̍ I̍sɔ̄lūɛ̄ī ni̍.

¹⁰Wāŋnda̍ I̍sɔ̄lūɛ̄ī yōŋga̍ ndāa̍ chɔ̄ɔ̍ ndu̍ nda̍ o̍ lāhɔ̄l de᷅ŋ. A̍ nyɛ̄ pālāā ya̍ I̍ tu̍si̍ nda̍ ho̍ō chōo̍ le̍ yɔ̄ŋndā ndāla̍ wɔ̍ɔ̍ŋnda̍ŋ ndo̍ kpo̍u̍, ā chɛ᷄l mā mūli̍ŋ nāa̍ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̍lɛ̄ka̍ ndāa̍ chūā le̍, kɛ̄lɛ̄ŋgāā ni᷅ŋ te̍ mā nūūwa̍ lānɛ̄ī le̍ mɛ̄ɛ̍ nda̍ mīīŋgū ya̍ o̍ ībūŋ yɛ̍.

¹¹Wāŋnda̍ I̍sɔ̄lūɛ̄ī a̍ cho̍ māchūāā mɛ̄ɛ̍ yōū īdīɔ̄mndo̍ chō nu̍a̍ā ō nɛ̍ī hu̍ī le̍ yɛ̍. Tē nyɛ̄ pālāa̍ kōma̍l nda̍ pɛ̍, bā o̍ bā ko̍ fe̍e̍ a̍ kūā le̍ mālāa̍, ā nyūnā wa᷅ŋnda̍ I̍chi̍pī le̍ mālāa̍, ā nyūnā wa᷅ŋnda̍ Āsi̍i̍līāā le̍ mālāa̍.

¹²Kɛ̍ ndu̍yɛ̍ bōōndi̍i̍ nda̍ chō wā kɔ̄la̍ŋ le̍ mālāa̍ ve̍, I̍ cho̍ nda̍ yāŋɔ̄ɔ̄le̍ŋ yēŋ nda̍ kpo̍u̍ mā hāu̍. Mɛ̄ɛ̍ nda̍ tūāndū nu̍a̍ā yāla̍ yōūwa̍ o̍ fo̍ndā yōūwa̍ ā hīāū wo̍ mī yōūwa̍ hāu̍ yɛ̍, le̍nde̍ ya̍ I̍ ye᷅ŋ ni̍ŋ nda̍ yāŋɔ̄ɔ̄le̍ŋ ni̍ mā hāu̍. Yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nda̍ tōsa̍, I̍ cho̍ nda̍ hūnɔ̄ɔ̄ nyɛ̄ pālāa̍ tūsī chōo̍ le̍ ndu̍.

¹³“Kpūndɛ̍ bɛ̄ndōo̍ ō wā ni̍ŋ le̍ wāŋnda̍ I̍sɔ̄lūɛ̄ī, fo̍ndōle̍, le̍ mɛ̄ɛ̍ nda̍ sīmu̍l la̍, ndu̍yɛ̍ ma̍ kɛ̄ɛ̄ ya̍ yɛ̍. Wāŋnda̍ I̍sɔ̄lūɛ̄ī a̍ cho̍ hūnɔ̄ɔ̄ wā ā tɛ̄ɛ̄mbāā kpo̍u̍. Nyīɛ̍ɛ̍ye̍ ī wa̍ ya̍ le̍ nda̍, mi̍ ya̍ i̍i̍ ye̍e̍mā le̍ nda̍ chīīndīa̍a̍. Kɛ̍ ndu̍yɛ̍ le̍ sōōlūū nda̍ wa̍ ya̍ o̍ chōōla̍ŋ chōo̍ wo̍, I̍ nɔ̍la̍ mī chi̍i̍ndi̍a̍a̍ nda̍ le̍.

¹⁴Ya̍ cho̍ Mɛ̄lɛ̄ka̍ ndāa̍ ni̍, kɛ̍ ndu̍yɛ̍ tē nyɛ̄ pālāa̍ kōma̍l nda̍ pɛ̍, yɔ̄ŋi̍ nda̍ cha᷄ŋ nāa̍ ya̍ chu̍a̍, mā nyūna̍ ya̍ a̍ kɔ̄ltā ndāla̍ŋ kpo̍u̍, mī ma̍la̍ nda̍ yɛ̍, o̍ kpēlēla̍ ndāla̍ŋ chōo̍ nda̍ hīnī ko̍ŋu̍llo̍ ni̍ le̍ wāna̍ ma̍lā nda̍ wo̍. Tē ā tūēī pɛ̍ chūūŋgi̍āŋndā nyɛ̄ dīāāla̍ŋ, a̍ chūūŋgi̍āŋndā māmūɛ̄īla̍ŋ, lo̍ŋ nda̍ kūā vi̍īli̍āŋndo̍ ni̍. Kɛ̍ ya̍ ya̍ ma̍ lō o̍ ko̍ŋ ma̍ sīmūl la̍, ā ye̍e̍mā bɛ̍ɛ̍ mā tūēī a̍ ya̍ o̍kɔ̄ɔ̄ le̍.

¹⁵Ya̍ lo̍ o̍ ko̍ŋ ni̍ mi̍ pɛ̍ɛ̍kū nda̍, ndu̍yɛ̍ mi̍ to̍sā ma̍ sīmnu᷄ŋ wa̍nāā kpāāyā. Kɛ̍ ndu̍yɛ̍, nda̍ kpo̍u̍ ma̍ yīī ya̍ de̍fo̍o̍.

¹⁶Ya̍ cho̍ Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ni̍, kɛ̍ ma̍ kɛ̄ɛ̄ ya̍. Tē ō wa̍ māā yɔ̄ŋɔ̄ɔ̄ pɛ̍, mɛ̄ɛ̍ chīɔ̄ūwo̍ ō yɔ̄njɔ̄lā nu̍a̍ā, mbō fūla̍ yōōmūa̍ŋ mbō hūī wānā o̍ chɔ̄ūwo̍ ni᷄ŋ yɛ̍, le̍nde̍ wāŋnda̍ I̍sɔ̄lūɛ̄ī a̍ cho̍ ni̍, ā cho̍ wa̍nāā wānā dɔ̍ū tīīnda᷄ŋ o̍ nda̍ ni̍ŋ te̍. Wānāā ndāa̍ cho̍ nda̍ chīla̍ŋ nda̍ kpo̍u̍, a̍ mɔ̄ɔ̄ŋ fāŋndo̍ŋ ya̍a̍mɔ̍ɔ̍wa̍ chō nda̍ hūnɔ̄ɔ̄ dīū ni̍, fo̍ndōle̍, le̍ dīōmndā wɔ̄ɔ̍ŋnda̍ fu̍lā nda̍ o̍ lāsōndō la̍ŋ. Wāŋnda̍ I̍chi̍pī a̍ cho̍ nda̍ hūnɔ̄ɔ̄ sīīŋgūū nyɛ̄ māmāā, mā chē nda̍ nyɛ̄ fo̍ndō fu̍u̍.”