Read Southern Kisi Hōōsi̍a̍ā 8 Bible Online

Hōōsi̍a̍ā 8 - Southern Kisi bible

Hōōsi̍a̍ā 8

¹Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “Lā hɔ᷄ŋ bu̍lu̍ chɔ̄ūwo̍, mī lā bɛ̄ɛ̄ndi̍a̍ŋ le̍ sɔ̍ŋgɔ̄ɔ̍. Ya̍a̍mɔ̍ɔ̍wa̍ hīŋ lɛ̄ŋndē nīle̍ŋ I̍sɔ̄lūɛ̍i̍ dēlɔ̄ɔ̄ chōo̍, mɛ̄ɛ̍ kōwɔ̍ɔ̍ ō dēl nu̍a̍ā nyɔ̄ɔ̍ chōo̍ le̍ kɔ᷄ŋnda̍ŋ a̍ ndu̍ yɛ̍, fo̍ndōle̍, le̍ mɛ̄ɛ̍ wāŋnda̍ I̍sɔ̄lūɛ̄ī a̍ tɛ̍ɛ̍mbu̍u̍ kpe̍ma̍ cho̍ na̍a̍ tɛ̄ɛ̄ŋ na̍a̍ nda̍ā wo̍, ndu̍yɛ̍ ma̍ kɛ̄ɛ̄ le̍ nyɛ̄ sāwāla̍ nīla̍ŋ lā dīmi̍ wo̍ tōsāa̍ yɛ̍.

²Wāŋnda̍ I̍sɔ̄lūɛ̄ī a̍ cho̍ dīmīo̍o̍ māā ya̍ Mɛ̍lɛ̄ka̍, māā ya̍ cho̍ Mɛ̄lɛ̄ka̍ ndāa̍ ni̍, ndu̍yɛ̍ māā ā sīnā ya̍.

³Kɛ̍ ndu̍yɛ̍ I̍ ye᷅ŋ nda̍ bɛ̍ɛ̍ la̍ni̍ le̍. Wāŋnda̍ ha̍ā sūɛ̍i̍ cho̍ sūɛ̍i̍ tōnyɛ̍i̍ ye̍, ndi̍ nda̍ kɛ̄ɛ̍ ni̍. Le̍ he̍ī, mɛ̄ɛ̍ mī to̍sa̍ mī ya̍a̍mɔ̍ɔ̍wa̍a̍ ndāa̍ hu᷄ŋ de᷅l nda̍ chōo̍ mā tīsa̍ nda̍ kīlta̍ŋ kɔ̄ɔ̄lī.

⁴“Ya̍ Mɛ̍lɛ̄ka̍, ya̍ cho̍ Mɛ̄lɛ̄ka̍ ndāa̍ ni̍, kɛ̍ tē ā wa̍ māsāa̍ ndāā bɛ̍ndūa̍a̍ chūa̍a̍ pɛ̍, nyūnā bɛ̍ɛ̍ ā nyu̍nā yā dīōm te̍. Tē ā wa̍ wānāa̍ cho̍ nda̍ chīla̍ŋnda̍ hɛ̄līo̍o̍ pɛ̍, nyūnā o̍ nyūnā ā nyu̍nā ya̍ a̍ ndi̍ o̍kɔ̄ɔ̄ le̍, hɛ̄līo̍o̍ ko̍ nda̍ hɛ̄lī nda̍ ni̍. Ka̍ni̍ŋ ndāŋ hu̍mbo̍ŋ, a̍ ka̍ni̍ŋ si̍a̍ŋa᷄ŋ, mu̍ŋ nda̍ chūā ni̍ mā kūā te̍e̍ŋgīāā mā tōōsīāā nyɛ᷅m chēle̍ŋndo̍ŋ māā mɛ̄lɛ̄ka̍ā ndā. Kɛ̍ ndu̍yɛ̍ le̍ nyɛ̄m nda̍ chō mu̍ŋ tōōsīa̍a̍ māā mɛ̄lɛ̄ka̍a̍ ndā wo̍ŋ nda̍ pi̍la̍ ā vēēlū dɛ̍nɛ̍ pa̍lāā bɛ̄ndu̍ tɛ̍ɛ̍mbūū ni̍ŋ nda̍ kpo̍u̍ wo̍ chōo̍.

⁵Wāŋnda̍ Sāme̍e̍līāā, I̍ ye̍e̍ma̍ mī che᷅ nāū fɔ̍ŋndɔ̍[6] nya̍ nya̍ tūūla̍ ko̍ŋ, mī lā sōōlūū ndu̍ māā mɛ̄lɛ̄ka̍ nyā wo̍ le̍. Le̍ he̍ī I̍ dɔ̍u̍nu᷄ŋ tu̍mbe̍ a̍ nya̍ o̍ ka̍lā ka̍lā, nya̍ wāŋnda̍ Sāme̍e̍līāā. A̍ a̍a̍ nya̍ wāŋnda̍ Sāme̍e̍līāā, I̍ si̍nā bo̍o̍ndi̍i̍ kpe̍e̍kpe̍i̍ nya̍ nɔ̄lā ni̍ŋ mī lā ma᷄l nyɛ̄m chēle̍ŋndo̍ŋ sōōlūūwo̍, mī lā sīmnu᷄ŋ a̍ di̍a̍ndāā ya̍ Mɛ̍lɛ̄ka̍ o̍ hɔ̄l lo̍ le̍.

⁶Nyɛ̄m nya̍ chō mu᷅ŋ so̍o̍lūūwo̍ māā mɛ̄lɛ̄ka̍ā nyā wo̍ŋ, ŋ̄ cho̍ mɛ̍lɛ̄ka̍a̍ kpe̍e̍kpe̍i̍ le̍ ŋ̍ cho̍ le̍. Nyɛ̄m wāŋndā chīe̍e̍ya̍ tōōsi̍a̍a̍ a̍ bālā ndāla̍ŋ ndo̍ŋ, mu̍ŋ nya̍ chu̍a̍ ni̍ māā mɛ̄lɛ̄ka̍ā nyā. Mɛ̄lɛ̄ka̍ nya̍ nya̍ tūūla̍ ko̍ŋ a̍ ko̍o̍līi̍yo̍ŋ māā nāū fɔ̍ŋndɔ̍ mi̍ lā wā ndu̍ sōōlūūwo̍ Sāme̍e̍līāā wo̍, I̍ cho̍ tōsā mā hu᷄ŋ pe̍sī pēsī ndu̍ kpo̍u̍.

⁷Nyɛ̄ o̍ nyɛ̄ wāŋnda̍ I̍sɔ̄lūɛ̄ī a̍ to᷅l kɔ̄ɔ̄lī, nyɛ̄ fo̍ndō fu̍u̍ o̍ cho̍ ni̍, nu̍a̍ wɔ̍ ko̍ mɛ̄ɛ̍ wāŋndo̍ ō wā nu̍a̍ā hūēīye̍ kīlta̍ŋ kɔ̄ɔ̄lī yɛ̍. Ndu̍yɛ̍ tɔ̄nɔ̍ nda̍ sɔ̄lā ni̍ŋ le̍ni̍ŋ ndo̍, ndu̍ cho̍ nyɛ̄ pālāā bɛ̄ndōo̍ ni̍. Ī yɔ̄nūŋ ni̍ŋ ko̍ a̍ wāŋnda̍ I̍sɔ̄lūɛ̄ī, mɛ̄ɛ̍ wāŋndo̍ ō tōsā nu̍a̍ā kpe̍le̍ ŋ̄sūa̍a̍, kɛ̍ mī sūāāŋ mu᷅ŋ ŋ̄ fōōfi̍ŋ kpo̍u̍, ō sɔ̍lā nyɛ᷅ o̍ nyɛ̄ o̍ mu̍ŋ ni̍ŋ te̍ yɛ̍. Ndu̍yɛ̍ nda̍ a̍a̍ yɔ̍ŋ bɛ̍ɛ̍ mī nda̍ a̍a̍ wa̍ wānāā sɔ̄lāā nyɛ̄ o̍ fāfa̍la̍ ndāa̍ ni᷄ŋ, nyɛ̄ o̍ nyɛ̄ nda̍ a̍a̍ sɔ̍la̍ wānāā lēkāa̍ wa̍ nda̍ nda̍ a̍a̍ ku̍a̍ŋnūŋ ni̍ŋ a̍ mu̍ŋ kpo̍u̍ ni̍.

⁸I̍sɔ̄lūɛ̄ī o̍ chu̍ū bɛ̍ɛ̄. Ō sīmnu᷄ŋ nyɛ᷅ fo̍ndō fu̍u̍ lɛ̍ŋīi̍ ba̍lu̍ ndu̍ ve̍ tɛ̄ɛ̄ŋ.

⁹Wāŋnda̍ I̍sɔ̄lūɛ̄ī a̍ yɔ̍nu̍ŋ mɛ̄ɛ̍ sōfɛ̍li̍a̍a̍ yōndūa̍a̍ ā chō nu̍a̍ā, ā hēēlū ā tūūsū yɛ̍. Ā chɛ᷄ŋ ma̍ kōmāl wāŋnda̍ Āsi̍i̍līāā le̍ mā māla̍ nda̍, ā hīni̍ vɛ̍lɛ̄ kɔ̄l te̍, ma̍ mālnu᷄ŋ ma̍ kɔ̍ hi̍o̍ū lɛ̄ŋīī chēle̍ŋ kɔ̄ɔ̄lī le̍ mā mānda̍ nda̍.

¹⁰Kɛ̍ ndu̍yɛ̍ mi̍ chē bɛ̍ɛ̍ ma̍ yɔ̄ŋgu᷄ŋ o̍ lɛ̄ŋīī kēŋ ndo̍, ndu̍yɛ̍ ma̍ wā ā sɛ̄ŋīa̍ŋnda̍ o̍ lɛ̄ŋīī kēŋ ni᷄ŋ kpo̍u̍, kɛ̍ I̍ cho̍ nda̍ hūnɔ̄ɔ̄ chūūŋgīāā kpo̍u̍ na̍a̍ pi᷅lɛ̍ mī hu̍ŋ tu̍sī nda̍ nyɛ̄ pālāa̍ chōo̍. Ndu̍yɛ̍ ō bēndu̍ lɛ̍ bɛ̍ɛ̍ ti᷅ŋ te̍. Māsā bɛ̍ndu̍ cho̍ māsāa̍ kpo̍u̍ bo᷅lle̍ŋ o̍ lɛ̄ŋndē Āsi̍i̍līāāle̍ŋ ni᷄ŋ ma̍ tīīnda᷄ŋ ndu̍ le̍ nda̍ mālāa̍ wo̍, māsā ko̍ŋ chō nda̍ hūnɔ̄ɔ̄ nyɛ̄ pālāa̍ tūsī chōo̍ mī nyɛ̄ pālāā kōŋ ō fūūlu̍u̍ nda̍ mɛ̍ɛ̄.

¹¹“Ma̍āŋndā wāŋnda̍ I̍sɔ̄lūɛ̄ī a̍ tīu̍ tāŋgūllo̍ le̍ sa̍lāla̍ŋ sōlīo̍o̍ o̍ ya̍ lo̍ le̍ mī ma̍l nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ nda̍ŋ, ma̍āŋndā lāŋ, o̍ la̍ŋ cho̍o̍ kpe̍e̍kpe̍i̍ nda̍ kūā ni᷅ŋ yɔ̄ŋndā wɔ̄ɔ̍ŋnda̍ŋ tōsāa̍ ni̍.

¹²Sāwā o̍ sāwā ya̍ I̍ ke̍ nda̍, mi̍ lo᷅ o̍ ko̍ŋ mi̍ po̍o̍nyīāl nda̍ la̍ŋ kpo̍u̍, le̍ mā wa̍ tōfāa̍ o̍ la̍ŋ cho̍o̍ le̍ te̍le̍ŋ o̍ te̍le̍ŋ. Kɛ̍ sāwāla̍ la̍ŋ ma̍ chūā la̍ŋ māā sāwāla̍ īsūmīāl, ā chūe̍ la̍ŋ nyɛ̄ kpe̍e̍kpe̍i̍ le̍.

¹³Ā chō sa̍lālā wāŋnda̍ hūŋ nda̍ŋ sōlīo̍o̍ o̍ ya̍ lo̍, ndu̍yɛ̍ o̍ ko̍ŋ kɔ̍ɔ̍lī mā dīā vīsīŋ lāsa̍lāŋ mu᷅ŋ o̍ fo̍ndāŋndā nīla̍ŋ. Kɛ̍ a̍ ko̍ŋ kpo̍u̍, ya̍ Mɛ̍lɛ̄ka̍ Ya̍a̍wɛ̄ɛ̄ kɔ̄l nūu̍ cho̍ o̍ hi̍nīāā a̍ nda̍ le̍. Ndu̍yɛ̍ yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nda̍ chō tōsāa̍, I̍ me᷅l nda̍ le̍ ndu̍ le̍, I̍ cho̍ nda̍ nyɛ̄ pālāa̍ tūsī chōo̍ le̍ ndu̍. I̍ cho̍ tōsā mā hu᷄ŋ mi̍i̍ŋgū vɛ̄lɛ̄ o̍ chɛ̄le̍ŋ ni᷄ŋ I̍chi̍pī.

¹⁴“Wāŋnda̍ I̍sɔ̄lūɛ̄ī a̍ pu̍ɛ̍ɛ̍nu̍ŋ a̍ ya̍ Mɛ̍lɛ̍ka̍, ya̍ wa᷅na̍ to̍o̍si̍a̍a̍ nda̍ wo̍, ma̍ sāā fo̍ndāŋndā lēmāsālā bɛ̄ŋnda̍ŋ tāŋgūllo̍, le̍ nda̍ pi̍la̍. Wāŋnda̍ Chu̍dā chi̍e̍e̍ŋ ndāŋ bɛ̍ndūŋ bɔ̄ɔ̍ bɔ̍ɔ̍ ma̍ dūāū mu̍ŋ o̍ kpākīla̍ ka̍lā ka̍lālā bɛ̄ŋnda̍ŋ ni᷄ŋ kpɔ̍kɔ̍su̍ le̍ nda̍ pi̍la̍ māndāa̍. Kɛ̍ ndu̍yɛ̍ I̍ cho̍ hūnɔ̄ɔ̄ yīŋnde̍ŋ yɔ̄ŋ mī lē hu᷄ŋ lo᷅m fo̍ndāŋndā ndāla̍ lēmāsālā lāŋ, a̍ chi̍e̍e̍ŋ nda̍ŋ lākpākīŋ mu᷅ŋ kpo̍u̍.”