Read Southern Kisi Hōōsi̍a̍ā 9 Bible Online

Hōōsi̍a̍ā 9 - Southern Kisi bible

Hōōsi̍a̍ā 9

¹Wāŋnda̍ I̍sɔ̄lūɛ̄ī, lā du̍a̍u̍nu᷄ŋ nya̍a̍le̍ le̍. Lā to̍sā kɔ̄l kɛ̄ndɛ̄ māā lɛ̄ŋnde̍ ī pīlɛ̍i̍ le̍. Lā kɛ̄ɛ̍ Mɛ̄lɛ̄ka̍ nyāa̍, mi̍ lā sīmnu᷄ŋ wa̍nāā tīāmāā bɛ̄ndū. Nyɛ̄ dīāā nya̍ sɔ̄lā o̍ tīɔ̄mɔ̄ɔ̄la̍ŋ ni᷄ŋ ndo̍ŋ, nyɛ̄ dīāā kōŋ ndu̍ nya̍ lūɛ̄ī hɔ̄lte̍ŋ ni̍ mi̍ lā kɛ̄ɛ̄ Mɛ̄lɛ̄ka̍ nyāa̍.

²Kɛ̍ ndu̍yɛ̍ ō be̍ndū lɛ̍ ni̍ŋ a̍ ti᷅ŋ te̍, mī yīa̍a̍ŋ mā hu᷄ŋ bi̍ī nya̍. Lā wā ni̍ŋ wa̍lta̍ īchīɛ̄ɛ̄la̍ŋ tōsāa̍ ndu̍yɛ̍ o̍ ko̍ŋ kɔ̍ɔ̍lī, mī lā tōōsīāā mu̍ɛ̍īya̍ŋ, kɛ̍ ndu̍yɛ̍ mī yīa̍a̍ŋ mā wā nya̍ chōo̍, ndu̍yɛ̍ o̍ ko̍ŋ kɔ̍ɔ̍lī, mī pɛ̄ŋndē māmūɛ̄īle̍ŋ lē bīī nya̍.

³I̍sɔ̄lūɛ̍i̍ya̍ ki̍nɛ̍i̍, wāŋndo̍ ō pīlɛ̍ bɛ̍ɛ̍ ō lo᷅ ni̍ŋ o̍ lɛ̄ŋnde᷅ŋ nde᷅ŋ ni᷄ŋ te̍, le̍ŋ le̍ yɔ̍nūŋ ni̍, māā lɛ̄ŋnde̍ cho̍ le᷅ŋ le̍ Mɛ̄lɛ̄ka̍ Ya̍a̍wɛ̄ɛ̄ le̍ŋ. Ā chō nda̍ hūnɔ̄ɔ̄ kɔ̄ndɔ̄ɔ̄ kpo̍u̍, mā mīīŋgu̍ a̍ ā ti᷄ŋ o̍ chɛ̄le̍ŋ ni᷄ŋ I̍chi̍pī, o̍ ko̍ŋ kɔ̍ɔ̍lī mā kūɛ̄ a̍ ha̍ā o̍ lɛ̄ŋndē Āsi̍i̍līāāle̍ŋ ni᷄ŋ. Lo̍ŋ nda̍ chō lākɔ̄ wā ni̍, mā dīā nyɛ̍ dīa̍a̍ cho̍ ō nɔ̄ɔ̄lɛ̍i̍ Mɛ̍lɛ̄ka̍ o̍ hɔ̄l lo̍.

⁴Sa̍lālā māmūɛ̄īlā nda̍ sōlī o̍ Mɛ̄lɛ̄ka̍ Ya̍a̍wɛ̄ɛ̄ lo̍ la̍ŋ, ā nɔ̍lā lɛ̍ ni̍ŋ mā so̍li̍ la̍ŋ lo̍ŋ o̍ ndu̍ lo̍ le̍. Sa̍lālā ndāla̍ŋ ki̍nɛ̍i̍, ō pīlɛ̍ bɛ̍ɛ̍ ō hi̍nī ni̍ŋ Mɛ̍lɛ̄ka̍ kɔ̄l te̍. Lā wā ni̍ŋ ma̍wa̍ā mɛ̄ɛ̍ nyɛ̄ dīāā nda̍ kē wāŋ vīlɛ̍i̍ya̍ wo̍ ō wā nu̍a̍ā yɛ̍. Wānā o̍ wāna̍ di̍ā ni̍ŋ nyɛ̍ dīāā ndā ko̍ŋ, nda̍ kpo̍u̍ ā chō sīmnɔ᷄ŋ a̍ nɔ̍ɔ̍lɛ̍i̍ Mɛ̍lɛ̄ka̍ o̍ hɔ̄l. Le̍ nda̍ pi̍la̍ ko̍ni̍ nyɛ̄ dīāā ndā ko̍ŋ ō wā ni̍ŋ ni̍. Nyɛ̄ dīāā ndā ko̍ŋ, ō pīlɛ̍ bɛ̍ɛ̍ ō chi᷅ ni̍ŋ chi̍ɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ le̍.

⁵Ndu̍yɛ̍ tē ko̍ŋ o̍ yɔ̍nu̍ŋ pɛ̍, tē pāa̍le̍ kpe̍e̍kpe̍i̍ le̍ŋ lē fūūlu̍u̍ pɛ̍, pāa̍le̍ di̍a̍ā nyɛ̄ dīāā lē bɛ̄ŋnde̍ŋ, le̍ŋ le̍ yɔ̍nūŋ ni̍ māā pāa̍le̍ cho̍ le̍ Mɛ̄lɛ̄ka̍ Ya̍a̍wɛ̄ɛ̍ bɛ̄ɛ̄le̍ŋ kīo̍o̍ le̍ŋ, ō yɛ̄ɛ̍nɛ̍ nda̍ yɔ̄ŋ yɛ̍ ni̍ŋ?

⁶Ndu̍yɛ̍ tē pāa̍le̍ nyɛ̄ pālāā bɛ̄ndōo̍ ō tūāl ni̍ŋ nda̍ chōo̍ le̍ŋ lē fūūlu̍u̍ pɛ̍, ā yɔ̍ŋ bɛ̍ɛ̍ mā hɛ̄lu᷄ŋ wa᷅ŋnda̍ I̍chi̍pī mā nyāānu̍ŋ, wāŋnda̍ I̍chi̍pī a̍ cho̍ nda̍ mīŋgī chūūŋgīāā kpo̍u̍ na̍a̍ pi᷅lɛ̍, le̍ nda̍ nyɛ̄ pālāa̍ tūsīo̍o̍ chōo̍ mā dīu̍ nda̍. Ā chō nda̍ chūūŋgīāā kpo̍u̍ mā chɔ̍ nda̍ Mɛ̍mfi̍sī chi̍e̍e̍, o̍ lɛ̄ŋndē I̍chi̍pīle̍ŋ ni᷄ŋ lo̍ŋ. Fo̍ndāŋndā ndāla̍ nda̍ a̍a̍ kɛ̍sī nyɛ᷅ ndā sɔ̍lāa̍ la̍ŋ kpo̍u̍, lā chō hūnɔ̄ɔ̄ sīmnɔ᷄ŋ yo̍ndōo̍. Tɛ̍ndīi̍la̍ ndāla̍ nda̍ a̍a̍ lɔ᷅l le̍ni̍ŋ nda̍ŋ kpo̍u̍, ā chō la̍ŋ hūnɔ̄ɔ̄ tɛ̄ɛ̄mbūū, mī fo̍ndāŋndā lāŋ lā sīmnu᷄ŋ fo̍ndāŋndā ŋ̄yɔ̄.

⁷Wāŋnda̍ I̍sɔ̄lūɛ̄ī, te̍le̍ŋndo̍ fūūlu̍u̍, te̍le̍ŋ dɛ̍nɛ̍ pa̍lāā bɛ̄ndōo̍ ō hīŋ nya̍ tōlɔ̄ɔ̄ chōo̍ wo̍. Nyɛ̄ o̍ nyɛ̄ nya̍ tōsa̍, lā hīŋ pāāwā kōŋ sɔ̄lā. I̍ ye̍e̍ma̍ nya̍ I̍sɔ̄lūɛ̍i̍ya̍ kpo̍u̍ mī lā sīna̍ he̍ī pɛ̄ŋgu̍. Le̍ mɛ̄ɛ̍ yɔ̄ŋndā nyāla̍ wɔ̍ɔ̍ŋnda̍ŋ lā chō sɛ̍lɛ̍, ndu̍yɛ̍ o̍ ko̍ŋ kɔ̍ɔ̍lī, mi̍ lā tūl wānāa̍ su̍a̍ā le̍ Mɛ̄lɛ̄ka̍ wa̍ yɛ̄le̍ŋ tūl bɛ̄ndōo̍ yɛ̍, nyɛ̄ kōŋ nya̍ dīmi̍ ni̍ māā, wāna̍ su̍a̍ā le̍ Mɛ̄lɛ̄ka̍ wo̍, dīɔ̄mndo̍ o̍ cho̍ ni̍. Wāna̍ sɔ̍lā ho̍ō yōōŋgūla̍ Mɛ̄lɛ̄ka̍ la̍ŋ ndo̍, ō nɔ̍ kɔ᷅l kālu̍ le̍.

⁸Ya̍ Mɛ̄lɛ̄ka̍ hɛ̄li̍ ni̍ māā wāna̍ su̍a̍ā le̍ ndu̍ wo̍, ndu̍yɛ̍ mbo̍ sīīŋgūū ya̍ māā wānā mɛ̍ŋgɛ̄lāā le̍ nya̍ wāŋnda̍ I̍sɔ̄lūɛ̄ī, nya̍ o̍ chu̍a̍ ha̍ā māā wānāā ndɔ̄ wa̍. Kɛ̍ ndu̍yɛ̍ bā o̍ bā ya̍ I̍ hi̍o̍u̍, lā chō ya̍ yāŋɔ̄ɔ̄la̍ŋ yēŋndo̍ le̍ ya̍ mālɔ̄ɔ̍ o̍ sūɛ̍i̍ ni᷄ŋ. Wānāa̍ cho̍ bɛ̍ɛ̍ o̍ chīɛ̍i̍ Mɛ̄lɛ̄ka̍a̍ ni᷄ŋ nda̍, nda̍ kpo̍u̍, ma̍ sīmnu᷄ŋ ya̍a̍mɔ̍ɔ̍wa̍ le̍ wāna̍ su̍a̍ā le̍ Mɛ̄lɛ̄ka̍ wo̍.

⁹Ndu̍yɛ̍ o̍ ko̍ŋ kɔ̍ɔ̍lī, nda̍ kpo̍u̍ ma̍ chɔ̄ɔ̄lū yīŋnɔ᷄ŋ o̍ sɔ̄ɔ̍ŋ wɔ̍ɔ̍ŋndo̍ŋ tōsāa̍ ni᷄ŋ, sɔ̄ɔ̍ŋ wɔ̍ɔ̍ŋ nda̍ wa̍ chōo̍ Ki̍bīāā chi̍e̍e̍ o̍ pālɛ̍i̍ ke̍ŋ ni᷄ŋ ndo̍ŋ. Kɛ̍ ndu̍yɛ̍, yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nda̍ chō tōsāa̍, Mɛ̄lɛ̄ka̍ cho̍ pu̍ɛ̍ɛ̍ŋ a̍ ndu̍ le̍. Ō chō nda̍ hūnɔ̄ɔ̄ nyɛ̄ pālāa̍ tūsī chōo̍ le̍ yɔ̄ŋndā ndāla̍ wɔ̍ɔ̍ŋnda̍ lāŋ.

¹⁰Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Bōōndi̍i̍ ya̍ I̍ hɛ̍li̍ I̍sɔ̄lūɛ̍i̍ya̍ sīndɛ̄ mi̍ si̍i̍ŋgūū nda̍ māā wānāā nī ve̍, tē ō wa̍ māā yɔ̄ŋɔ̄ɔ̄ pɛ̍, ō wa̍ māwāā, mɛ̄ɛ̍ wāŋndo̍ ō lō nu̍a̍ā bālɔ̄ɔ̍ o̍ lɛ̄ŋndē po̍lte̍ŋ ni᷄ŋ mbō sāālu̍ŋ yɔ᷅m mākīle̍pīi̍yo̍ yɛ̍. Mɛ̄ɛ̍ te̍le̍ŋ māfi̍kīi̍yo̍ ō fūūlūū nu̍a̍ā, mī wāŋndo̍ sāālu̍ŋ fi̍kīi̍ma̍ dīūwāā mā tāsi̍a̍ŋ o̍ yɔ̄m māfi̍kīi̍yo̍ chōo̍ yɛ̍, le̍nde̍ ya̍ I̍ sa̍a̍lu̍ŋ fi̍nyāā nyāā ma̍māa̍ ni̍. Kɛ̍ mɛ̄ɛ̍ nda̍ hīŋ o̍ Pēmbīī Pi̍ɔ̍ɔ̄ve̍, ma̍ kɛ̄ɛ̄ ya̍ lo̍ŋ ma̍ mūli᷄ŋ Bāāl sōōlūūwo̍ māā mɛ̄lɛ̄ka̍ nda̍. O̍ ko̍ŋ, ma̍ sīmnu᷄ŋ a̍ nɔ̍ɔ̍lɛ̍i̍ ya̍ o̍ hɔ̄l, mɛ̄ɛ̍ mɛ̄lɛ̄ka̍ ndāa̍ Ba̍a̍l o̍ sīmnu᷄ŋ ō nɔ̍ɔ̍lɛ̍i̍ ya̍ o̍ hɔ̄l lɛ̍.

¹¹I̍sɔ̄lūɛ̍i̍ya̍, kpāāya̍ ndāa̍ ō chō hūnɔ̄ɔ̄ mɛ̄ɛ̄lū. Mɛ̄ɛ̍ yōūwo̍ ō chāŋ nu̍a̍ā o̍ hūēīye̍ ni᷄ŋ mbo̍ kūɛ̄nu᷄ŋ yɛ̍, le̍nde̍ kpāāya̍ ndāa̍ ō fāŋāŋ ni̍ŋ ni̍. I̍ cho̍ tōsā chɛ̄lɛ̄kpɛ̍ o̍ chɛ̄lɛ̄kpɛ̍ o̍ vi̍lūŋ ndɛ̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ te̍, kɛ̄lɛ̄ŋgāā ni᷅ŋ te̍ mī wānā la̍nɔ̍ o̍ chu̍a̍ yo᷄l, kɛ̄lɛ̄ŋgāā le̍, mī yo᷄l o̍ tu̍u̍nda̍ŋ bɛ̍ɛ̍ wa̍nā la̍nɔ̍.

¹²Ndu̍yɛ̍ nda̍ a̍a̍ yɔ̍ŋ bɛ̍ɛ̍ mī nda̍ a̍a̍ ve̍lū ŋ̄chūāū mī chūāūwāā kāŋ nda̍ a̍a̍ fu̍la̍ lēni᷄ŋ, I̍ wa̍ nda̍ hūnɔ̄ɔ̄ dīū kpo̍u̍, ō pīlɛ̍ bɛ̍ɛ̍ ya̍ i̍i̍ mɛ̍ī yo̍o̍mū le̍. Mī ya̍ i̍i̍ mɛ̍i̍ nda̍ ā nɔ᷅ chu̍a̍ le̍. Tē I̍ hu̍ŋ fa̍ŋā I̍sɔ̄lūɛ̍i̍ya̍ bāa̍ chōo̍ pɛ̍, mī ma̍l nda̍ o̍ bā ndāa̍ chōo̍, kpūndɛ̍ tu̍āl ni̍ŋ nda̍ chōo̍ wo̍, ō wā ni̍ŋ o̍ bɔ̍ɔ̍.”

¹³I̍ cho̍ chɔ̄ŋnɔ᷄ŋndo̍ o̍ lāhɔ̄l kpe̍nde̍ke̍le̍ mɛ̄ɛ̍ nda̍ dīū ni̍ŋ I̍sɔ̄lūɛ̍i̍ya̍ chūāā ndāa̍ yɛ̍. Wāŋnda̍ I̍sɔ̄lūɛ̄ī, nda̍ pi̍la̍ kɛ̍sɛ̍ kɛ̍sɛ̍ a̍ ku̍ā ni̍ŋ a̍ chūāūwāā ndāa̍ o̍ wāŋnda̍ lo̍ ni̍ mī wānāā kāŋ ā dīū nda̍.

¹⁴Mɛ̄lɛ̄ka̍ Ya̍a̍wɛ̄ɛ̄, nyɛ̄ ya̍ I̍ ye̍e̍ma̍ mā to̍sa̍ a̍ wāŋnda̍ ha̍ā wo̍, ndu̍ cho̍ ho̍ō ni̍. To̍sa̍ lāāndāā ndāa̍ ki̍nɛ̍i̍, mā sīmnu᷄ŋ wa̍nāā vīīkāā. O̍ ko̍ŋ kɔ̍ɔ̍lī, lāāndāā ndāa̍ cho̍ wɛ̄sīo̍o̍ wa̍ ki̍nɛ̍i̍, mā to̍sa̍ mī mɛ̄ɛ̄ya̍ŋ mā ve̍sa̍ nda̍ o̍ ŋ̄būŋ, ā nɔ̍lā mā wɛ̄si̍ chūāā ndāa̍ le̍.

¹⁵Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ wāŋnda̍ I̍sɔ̄lūɛ̄ī a̍ cho̍ tōsāa̍, Ki̍lkāl chi̍e̍e̍ o̍ ka̍ndu̍ŋ ni̍. Lo̍ŋ ya̍ Mɛ̍lɛ̄ka̍ kāndu̍ nda̍ yɛ̄le̍ŋ tūllo̍ ni̍. Ndu̍yɛ̍ le̍ yɔ̄ŋndā wɔ̄ɔ̍ŋndā nda̍ chō la̍ŋ to̍sāa̍ la̍ŋ, I̍ cho̍ nda̍ hūnɔ̄ɔ̄ tōūwɔ̄ɔ̄, mī so̍li̍ nda̍ kpo̍u̍ o̍ ya̍ lo̍ chi̍ɛ̍ī ni̍ŋ. Le̍ fɛ̍ɛ̍ŋ a̍ fɛ̍ɛ̍ŋ, kɔ̄l nūu̍ ō mi̍i̍ŋgū lɛ̍ o̍ I̍sɔ̄lūɛ̍i̍ya̍ lo̍ mī ka̍a̍la̍ nda̍ le̍. Wānāā ndāā bɛ̍ndūa̍a̍ cho̍ nda̍ chīla̍ŋ nda̍ kpo̍u̍, ma̍ lō o̍ ko̍ŋ ma̍ sīmūl la̍.

¹⁶Tē ō wa̍ māā īsɔ̄ɔ̍ pɛ̍, wāŋnda̍ I̍sɔ̄lūɛ̄ī, a̍ cho̍ ni᷅ŋ māchūāā, mɛ̄ɛ̍ yɔ̄mndo̍ pūūndu᷅ŋ ndɔ᷄ŋ ŋ̄ vēsāŋ nu̍a̍ā lēbɛ̄ŋgu̍ mī yɔ̄m kālāa̍ vī, ō nɔ̍lā lɛ̍ mbō kōm te̍ yɛ̍. I̍ cho̍ tōsā, wāŋnda̍ I̍sɔ̄lūɛ̄ī a̍ sɔ̍lā ni̍ŋ ŋ̍chu̍a̍ū o̍ ŋ̄chūāū le̍. Ndu̍yɛ̍ nda̍ a̍a̍ yɔ̍ŋ bɛ̍ɛ̍ mī nda̍ a̍a̍ ve̍lū ŋ̄chūāū, ndu̍yɛ̍ mī nda̍ a̍a̍ ka̍a̍la̍ nda̍ kāālāa̍ pīla̍, I̍ wa̍ nda̍ dīū kpo̍u̍, ō pīlɛ̍ bɛ̍ɛ̍ ya̍ i̍i̍ mɛ̍ī yo̍o̍mū le̍.”

¹⁷Wāŋnda̍ I̍sɔ̄lūɛ̄ī a̍ so̍li̍ Mɛ̄lɛ̄ka̍ nūu̍ dīōm. Le̍ he̍ī, Mɛ̄lɛ̄ka̍ chō nda̍ hūnɔ̄ɔ̄ kɛ̄ɛ̄ māā ā cho̍ lɛ̍ wānāā ndɔ̄ le̍, mbō ma᷄l nda̍ o̍ bā ndāa̍ chōo̍ mā sīmnu᷄ŋ wa̍nāā bālāā o̍ lɛ̄ŋnde̍ ni᷄ŋ.