Read Southern Kisi Cho̍wɛ̄ɛ̄ 3 Bible Online

Cho̍wɛ̄ɛ̄ 3 - Southern Kisi bible

Cho̍wɛ̄ɛ̄ 3

¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “O̍ pālɛ̍i̍ ke̍ŋ ni᷄ŋ, ndu̍yɛ̍ a̍ te̍le̍ŋ ko̍ŋ, tē I̍ to̍sa̍ pɛ̍ mī nyɛ̄ o̍ nyɛ̄ mīīŋgu̍ ō kɛ̄ndɛ̄ Chu̍dā a̍ Chūlu̍sɛ̄lɛ̄m,

²I̍ cho̍ lɛ̄ŋīī chēle̍ŋnde̍ kpo̍u̍ chu̍u̍ŋgīāā nāa̍ pi᷅lɛ̍, mī ku̍ɛ̄ a̍ nda̍ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Chɛ̄hōsi̍a̍fa̍tī. Lo̍ŋ ya̍ I̍ kɔ̍ɔ̍sā ni᷄ŋ a̍ lɛ̄ŋnde̍ he̍ī ni̍, le̍ nyɛ̄ nda̍ tōsa̍ a̍ wānāā nīa̍a̍ wo̍, nyɛ̄m ni᷄ŋ ŋ̄ki̍ɔ̍ŋ. I̍ cho̍ kɔ̍ɔ̍sɔ̍ a̍ nda̍, le̍ mɛ̄ɛ̍ nda̍ sɛ̄ŋi̍ wānāā nīa̍a̍ I̍sɔ̄lūɛ̄ī o̍ lɛ̄ŋīī chēle̍ŋnde̍ ni᷄ŋ, ma̍ lō o̍ ko̍ŋ, ma̍ pīɔ̄ūvi̍āŋ lɛ᷅ŋndē I̍sɔ̄lūɛ̍i̍le̍ŋ yɛ̍.

³Le̍ sīnāa̍ wāna̍ ku̍ā a̍ wānāā nīa̍a̍ o̍ bīyɔ̄ɔ̍ ni᷄ŋ ndo̍, ma̍ wūū kōo̍ŋ nda̍ pi̍la̍ tɛ̄ɛ̄ŋ. Ma̍ pīsī pūa̍a̍mbūāā wānāā nīa̍a̍ o̍ chɛ̄le̍ŋ ni᷄ŋ le̍ mā sɔ̄la̍ wāŋ lāāndūa̍a̍ ke̍ī su̍u̍ndāa̍ le̍ nyɛ̄ sɔ̄lāa̍ wa̍. Ndu̍yɛ̍ ma̍ pīsī chūāāmbūāā lāāndūāā wānāā nīa̍a̍ o̍ chɛ̄le̍ŋ ni᷄ŋ le̍ mā sɔ̄la̍ mūɛ̄īmā mākīle̍pīi̍ya̍ŋ mā ko᷄l.

⁴“Nya̍ wāŋnda̍ Ta̍a̍yā a̍ Sa̍i̍dɔ̄ŋ, a̍ nya̍ wāŋnda̍ o̍ lɛ̄ŋndē Fīli̍i̍tīāāle̍ŋ ni᷄ŋ kpo̍u̍, ō yɛ̄ɛ̍nɛ̍ nya̍ chō yɛ̄ ya̍ ho̍ō tōsāllo̍? Bāā īsɔ̄ɔ̍ ya̍ I̍ to̍sa̍l nya̍ ni̍ mi̍ lā wā ya̍ māa̍ ko̍ŋ mīŋgūllo̍? Tē māa̍ nya̍ chō ya̍ mīŋgūllo̍ ni̍, nyɛ̄ nya̍ tōsa̍l la̍ wo̍, I̍ cho̍ nya̍ māa̍ ko̍ŋ kēlēŋā mīŋgūl chɔ̍ chɔ̍.

⁵Lā chūa̍ ka̍ni̍ŋ nīŋ hu̍mbo᷄ŋ a̍ ko̍o̍līi̍ŋ nūu̍ŋ, sūl nūu̍ kpo̍u̍ mi̍ lā kūānu᷄ŋ a̍ ndu̍ o̍ chīɛ̄īlā nya̍ sōōlūū mɛ̍lɛ̄ka̍a̍ nyāa̍ la̍ŋ ni᷄ŋ.

⁶Lā pīsi̍ wāŋnda̍ Chu̍dā, a̍ wāŋnda̍ Chūlu̍sɛ̄lɛ̄m Kīli̍kīi̍ya̍ o̍ bā, ma̍ fāŋā nda̍ o̍ fo̍ndāŋndā ndāla̍ŋ ma̍ kūā a̍ nda̍ pɔ̍ɔ̍li̍ o̍ lɛ̄ŋndē ndāle̍ŋ ni᷄ŋ.

⁷Kɛ̍ I̍ cho̍ lākɔ̄ wānāā nīa̍a̍ sōlī o̍ lɛ̄ŋīī nya̍ pīsi̍ nda̍ ke̍ŋ nde̍ ni᷄ŋ, mī mi̍ŋgi̍ nda̍ o̍ lɛ̄ŋndē ndāle̍ŋ ni᷄ŋ. Ndu̍yɛ̍ nyɛ̄ o̍ nyɛ̄ nya̍ tōsa̍l nda̍, I̍ cho̍ nya̍ māa̍ ko̍ŋ mīŋgūl.

⁸I̍ cho̍ chūāūwāā nyāā pīāāndūa̍a̍ a̍ chūāūwāā nyāā lāāndūa̍a̍ pīsī wāŋnda̍ Chu̍dā o̍ ba̍, mi̍ nda̍ mūli̍ŋ mā pīsi̍ nda̍ Sɛ̍bi̍āŋnda̍ o̍ bā, kāa̍le̍ lēvīltē bɛ̍ndūle̍ŋ. Ya̍ Mɛ̄lɛ̄ka̍ Ya̍a̍wɛ̄ɛ̄, ya̍ so̍ō ni̍.

⁹“Le̍la̍ŋ lā yōnda̍ sūɛ̍i̍ he̍ī lɛ̄ŋnde̍ tɛ̄ɛ̄ŋ mī lā dīmu̍l nda̍ āā, ‘Lā bɛ̄ɛ̄ndi̍a̍ŋ le̍ chɔ̄ūwo̍. Lā vēēlu̍ ku̍u̍ba̍a̍ nyāa̍ chɔ̄ūwa̍. Lā chūūŋgi̍a̍a̍ so̍vɛ̄i̍ya̍a̍ nyāa̍ kpo̍u̍ nāa̍ pi᷅lɛ̍, mī lā sīmi̍ nda̍ le̍ chɔ̄ūwo̍.

¹⁰Lā chɔ̄u̍ dɛ̍ndɛ̄lā nyāla̍ wāā la̍ŋ mɔ̄ɔ̄ŋ fāŋndo̍ŋ, ndu̍yɛ̍ mī lā chɔ̄ū mɔ̄ɔ̄ŋ nya̍ bɛ̄ɛ̄ndīāā tɔ̍lɔ̄ɔ̄la̍ŋ ndo̍ŋ ba̍lta̍ŋ le̍ kɔ̄la̍ŋ sɔ̍ŋgɔ̄ɔ̍. Wānāa̍ cho̍ bɛ̍ɛ̍ ā nɔ̍ di̍a̍llūŋ kālā nya̍ tɛ̄ɛ̄ŋ te̍ wa̍, ā bɛ̄ɛ̄ndi̍a̍ŋ le̍ sɔ̍ŋgɔ̄ɔ̍.

¹¹Lā kēle̍ŋa̍ hu̍nɔ̄ɔ̄ chɔ̍ chɔ̍, nya̍ lɛ̄ŋīi̍ ba̍lu̍ na̍a̍ ve̍ chɛ̍ chɛ̍. Lā chūūŋgi̍āŋ o̍ lɛ̄ŋndē dɛ̍ŋgbɛ̍le̍ŋ ni᷄ŋ.’ ” O̍o̍ Mɛ̄lɛ̄ka̍ Ya̍a̍wɛ̄ɛ̄, hu᷄ŋ ni̍ko̍ a̍ ku̍u̍ba̍a̍ nu̍m ā chɔ̄ūwa̍ mā hu᷄ŋ chīŋa̍la᷅ŋ lɛ᷅ŋnde̍ he̍ī.

¹²Mi̍ Mɛ̄lɛ̄ka̍ Ya̍a̍wɛ̄ɛ̄ hi̍a̍ū lāchī a̍ sūɛ̍i̍ āā, “Wāŋnda̍ o̍ lɛ̄ŋnde̍ ni᷄ŋ ā bɛ̄ɛ̄ndi̍a̍ŋ le̍ sɔ̍ŋgɔ̄ɔ̍, ā hu᷄ŋ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ le̍ sɔ̍ŋgɔ̄ɔ̍. Kāni̍ fu̍u̍le̍, lo̍ŋ ya̍ Mɛ̄lɛ̄ka̍ Ya̍a̍wɛ̄ɛ̄ cho̍ wā īchāli̍ le̍ kɔ̍ɔ̍sɔ̍ɔ̍ a̍ lɛ̄ŋnde̍ kpo̍u̍ ni̍.

¹³“Lā kīli̍ ki̍li̍ wa᷅ŋnda̍ ha̍ā mɛ̄ɛ̍ chīɛ̍i̍ ī vēsā nu̍a̍ā le̍ kōwɔ̄ɔ̍ mā kōū ndi̍ yɛ̍. Lā nīɔ̍u̍ nda̍ mɛ̄ɛ̍ nda̍ pēī nu̍a̍ā kīle̍pīi̍ya̍ŋ o̍ nyɛ̄ nɛ̄īyāā mākīle̍pīi̍yo̍ ni᷄ŋ mā nīɔ̍u̍ ma̍ŋ le̍ mūɛ̄īmā kīle̍pīi̍ya̍ŋ tōōsīa̍a̍ yɛ̍. Kāni̍ fu̍u̍le̍, wāŋnda̍ ha̍ā dɛ̍nɛ̍ ndā wɔ̍ɔ̍ŋndo̍ ō pɛ̄ mbo̍ chōŋ wa̍ā.

¹⁴“Wāŋnda̍ ā chō chūmndo̍ o̍ lɛ̄ŋndē dɛ̍ŋgbɛ̍le̍ kɔ̍ɔ̍sɔ̍ le̍ŋ ni᷄ŋ wāa̍la̍ o̍ wāa̍la̍ŋ ni᷄ŋ. Kāni̍ fu̍u̍le̍, pāa̍le̍ kpūndɛ̍lē bɛ̄ndūle̍ Mɛ̄lɛ̄ka̍ Ya̍a̍wɛ̄ɛ̄ le̍ŋ lē chō ni᷅ŋ kpɛ̍ɛ̍lūŋ, pāa̍le̍ Mɛ̄lɛ̄ka̍ kɔ̄ɔ̄sā ni̍ŋ a̍ wāŋnda̍ le̍ŋ.

¹⁵Pāa̍le̍ le̍ŋ, pāa̍le̍ŋ a̍ pāŋge̍i̍ ŋ nyūm ni̍ŋ mī nyūmnda̍ŋ mā tōl kpi᷅ŋgbi̍. Lo̍o̍ŋ bɛ̍ɛ̍ o̍ ha̍lāa̍ ni᷄ŋ mī ŋ̄ pɛ̄ŋgī di̍o̍ndɔ̄ɔ̍.”

¹⁶Mɛ̄lɛ̄ka̍ Ya̍a̍wɛ̄ɛ̄ o̍ cho̍ dēŋīo̍o̍ o̍ Pēmbīī Sa̍a̍yɔ̄ŋnde̍ chōo̍, dīōm ndɔ̄ɔ̍ chō fūlāa̍ Chūlu̍sɛ̄lɛ̄m mɛ̄ɛ̍ ta᷅ŋnda̍ŋ mā dēŋī nu̍a̍ā yɛ̍. Ha̍la̍a̍ a̍ chi̍e̍ēŋndo̍ ā hīīlu̍ŋ a̍ dīōm ndɔ̄ɔ̍. Kɛ̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ wānāā ndūa̍a̍ I̍sɔ̄lūɛ̍i̍ māndā. Ndu̍ cho̍ fo̍ndā kālā ka̍la̍ ma̍ndā wānāā ndūa̍a̍ wo̍ ni̍.

¹⁷Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Tē he̍ī nyɔ̄ŋnu᷄ŋ pɛ̍, o̍ ko̍ŋ nya̍ cho̍ sīnā ni̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍, māā I̍ cho̍ īchāli̍ o̍ Pēmbīī Sa̍a̍yɔ̄ŋnde̍ chōo̍, pēmbīī nīī di̍a̍ndɛ̄i̍. Chūlu̍sɛ̄lɛ̄m cho̍ hūnɔ̄ɔ̄ mīīŋgū sīmnɔ᷄ŋ fo̍ndāŋ dīāndāā le̍ fɛ̍ɛ̍ŋ a̍ fɛ̍ɛ̍ŋ. Ndu̍yɛ̍, fɛ̍ɛ̍ŋ a̍ fɛ̍ɛ̍ŋ wānāā lēkāa̍wa̍ ā ku̍ē lɛ̍ ni᷄ŋ lo̍ŋ mā yēm ndu̍ le̍.

¹⁸“A̍ te̍le̍ŋ ko̍ŋ, mūɛ̄īmā mākīle̍pīi̍ma̍ yēēlɛ̍i̍ya̍ŋ mā wā ni̍ŋ wa̍chāko̍ o̍ pēmbo᷄ŋ chōo̍. Chɔ̄lūa̍a̍ ā kūī ni̍ŋ nya̍ o̍ bā o̍ pēmbo᷄ŋ chōo̍, ndu̍yɛ̍ mī lā sɔ̄la̍ mɛ̄ɛ̄mā chɔ̄lu̍a̍ŋ ta̍u̍ ta̍u̍. Pēēla̍ pɔ̍mbɔ̄la̍ŋ Chu̍dā kpo̍u̍, mɛ̄ŋnda̍ŋ mā wā ni̍ŋ fu̍lāa̍ lo̍ŋ mī mā hīāū. Pīo̍o̍ chō pīɔ̄l fūlāa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, mī mɛ̄ŋmā ndūa̍ŋ mā kūɛ̄ o̍ lɛ̄ŋndē dɛ̍ŋgbɛ̍le̍ŋ Āke̍e̍sīāā.

¹⁹“Lɛ̄ŋndē I̍chi̍pīle̍ŋ lē chō ītāmu̍, mī lē sīmnu᷄ŋ po̍llo̍. Lɛ̄ŋndē I̍dɔ̄mnde̍ŋ bɛ̍ɛ̍ lē chō sīmnɔ᷄ŋ po̍llo̍. Kāni̍ fo̍ndōle̍, le̍ mɛ̄ɛ̍ nda̍ chīŋa̍la᷅ŋ lɛ᷅ŋndē Chu̍dāle̍ŋ, ma̍ dīū wānāa̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ wa̍ yɛ̍.

²⁰Kɛ̍ wāŋndā chīe̍e̍ya̍ ā wā ni̍ŋ a̍ pi̍a̍ā Chu̍dā le̍ fɛ̍ɛ̍ŋ a̍ fɛ̍ɛ̍ŋ, ndu̍yɛ̍ mī wāŋnda̍ yu̍ŋgu̍la̍ŋ o̍ yu̍ŋgu̍la̍ŋ ni᷄ŋ ā wa̍ Chūlu̍sɛ̄lɛ̄m.

²¹Wānāa̍ di̍u̍ wānāā nīa̍a̍ o̍ fo̍ndō fu̍u̍wo̍ chōo̍ wa̍, I̍ me᷅l nda̍ le̍ nyɛ̄ nda̍ tōsa̍ wo̍ le̍, I̍ cho̍ nda̍ māa̍ mīŋgūl. Ndu̍yɛ̍, ya̍ Mɛ̄lɛ̄ka̍ Ya̍a̍wɛ̄ɛ̄, I̍ wa᷅ ni̍ŋ o̍ Pēmbīī Sa̍a̍yɔ̄ŋnde̍ chōo̍ Chūlu̍sɛ̄lɛ̄m wānāā nīa̍a̍ tɛ̄ɛ̄ŋ.”