Read Southern Kisi E̍mɔ̍ɔ̍sī 2 Bible Online

E̍mɔ̍ɔ̍sī 2 - Southern Kisi bible

E̍mɔ̍ɔ̍sī 2

¹Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mī wo̍ cho̍ ho̍ō ni̍. Ō dīmi̍ āā, “Wāŋnda̍ Mo̍wa̍bī a̍ to̍sa̍ yɔ̄ŋndā wɔ̄ɔ̍ŋnda̍ŋ bɛ̄mbɔ̄ɔ̍ lēdīi̍ŋ di̍i̍ŋ. Kɛ̍ I̍ cho̍ nda̍ mālɔ̄ɔ̄ le̍ yɔ̄ŋndā ndāla̍ wɔ̍ɔ̍ŋndā lāŋ te̍, kāni̍ fo̍ndōle̍, le̍ nyɛ̄ nda̍ tōsa̍ a̍ māsāa̍ I̍dɔ̄m ndo̍. Pāālā ndɔ̄la̍ŋ ma̍ sōlī la̍ŋ o̍ sɛ̄īyo̍ ni᷄ŋ ma̍ lūām nda̍ŋ chi̍li̍kɔ̍, mi̍ lā sīmnu᷄ŋ pu᷅lta̍ŋ.

²Le̍la̍ŋ, I̍ cho̍ tōsā mī lɛ̄ŋndē Mo̍wa̍bīle̍ŋ lē sāa̍ o̍ yīŋ, ndu̍yɛ̍ mī to̍sa̍ mī fo̍ndāŋndā kālā ka̍lālā nda̍ tāŋgu̍l Kɛ̍li̍ɔ̍ɔ̍tī chi̍e̍e̍ le̍ nda̍ māndāa̍ la̍ŋ lā ŋūɛ̄ kpo̍u̍. Ya̍a̍mɔ̍ɔ̍wa̍a̍ chi̍ŋa̍la᷅ŋ ni̍ŋ nda̍ wa̍, so̍vɛ̄i̍ya̍a̍ ndāa̍ ā wā ni̍ŋ de̍ŋīo̍o̍ chōo̍ cho̍o̍, ndu̍yɛ̍ mā hɔ̄ŋ pūtɛ̍nɛ̍i̍la̍ŋ, ndu̍yɛ̍ mī wāŋnda̍ Mo̍wa̍bī a̍ vi᷅ o̍ chɔ̄ū kōŋ ni᷄ŋ.

³Wāna̍ cho̍ wāŋnda̍ chīla̍ŋ Mo̍wa̍bī wo̍ ni̍, wāŋ bɛ̄ndūāā lēlɛ̄ŋ nda̍ ni̍, nda̍ kpo̍u̍ I̍ cho̍ nda̍ hūnɔ̄ɔ̄ dīū mī chi̍i̍ a̍ nda̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.

⁴Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, “Wāŋnda̍ Chu̍dā a̍ to̍sa̍ yɔ̄ŋndā wɔ̄ɔ̍ŋnda̍ŋ bɛ̄mbɔ̄ɔ̍ lē dīi̍ di̍i̍ŋ. Kɛ̍ I̍ cho̍ mālɔ̄ɔ̄ le̍ yɔ̄ŋndā ndāla̍ wɔ̍ɔ̍ŋndā lāŋ te̍, kāni̍ fo̍ndōle̍, le̍ mɛ̄ɛ̍ nda̍ kɛ̄ɛ̍ sāwāla̍ ya̍ Mɛ̍lɛ̄ka̍ Ya̍a̍wɛ̄ɛ̄ la̍ŋ tōlɔ̄ɔ̍ kɔ̄ɔ̄lī, ndu̍yɛ̍ ma̍ kɛ̄ɛ̄ le̍ nyɛ̄ ya̍ I̍ di̍mu̍l nda̍ wo̍ tōsāa̍ yɛ̍. Mɛ̄lɛ̄ka̍ā lāchōōwāā fi̍nyāā ndāā ma̍māa̍ ā wa̍ sōōlūūwo̍ wa̍, nda̍ bɛ̍ɛ̍ ma̍ mūli᷄ŋ mɛ̍lɛ̄ka̍a̍ kāŋ sōōlūūwo̍. O̍ ko̍ŋ, mi̍ nda̍ bɛ̍ɛ̍ a̍ fa̍ŋa᷄ŋ o̍ nɛ̄i̍ tōnya̍a̍ chōo̍.

⁵Le̍la̍ŋ, I̍ cho̍ lɛ̄ŋndē Chu̍dāle̍ŋ mālɔ̄ɔ̄ o̍ yīŋ, ndu̍yɛ̍ mī to̍sa̍ mī fo̍ndāŋndā kālā ka̍lālā nda̍ tāŋgu̍l Chūlu̍sɛ̄lɛ̄m le̍ ndu̍ māndāa̍ la̍ŋ lā ŋūɛ̄ kpo̍u̍.”

⁶Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, “Wāŋnda̍ I̍sɔ̄lūɛ̄ī a̍ to̍sa̍ yɔ̄ŋndā wɔ̄ɔ̍ŋnda̍ŋ bɛ̄mbɔ̄ɔ̍ lē dīi̍ŋ di̍i̍ŋ. Kɛ̍ I̍ cho̍ nda̍ mālɔ̄ɔ̄ le̍ yɔ̄ŋndā ndāla̍ wɔ̍ɔ̍ŋndā lāŋ te̍, kāni̍ fo̍ndōle̍, le̍ mɛ̄ɛ̍ nda̍ chō wānāa̍ cho̍ sa̍kpō wa̍ pīsīo̍o̍ o̍ nyɛ̄ sɔ̄lāa̍ bɛ̄ŋgu̍, ndu̍yɛ̍ ma̍ wā wānāa̍ bāhāvɛ̍i̍ya̍ pīsīo̍o̍ le̍ wɔ̄ŋgū lākɔ̄ɔ̄vɛ̄i̍yo̍ yɛ̍.

⁷Ma̍ wā wānāā tāmbɛ̍i̍ya̍ fūlīo̍o̍ a̍ nda̍ nyɛ̄ pālāa̍ tūsīo̍o̍ chōo̍, mɛ̄ɛ̍ wāŋnda̍ ā nīɔ̄ū nu̍a̍ā chu̍ndo̍o̍ lɛ̄ŋ yɛ̍. Ma̍ wā wānāa̍ nɔ̍ kpa̍a̍yā le̍ wa̍ nyīīndūūwo̍, le̍ nda̍ fāŋa᷄ŋndo̍ o̍ nɛ̄ī. Pōo̍ nda̍ nda̍ fi̍nyā ndɔ̄, mā hīvi᷄ŋ chɛ᷄ lāāndu̍ cho̍ nda̍ o̍ bā chīɛ̄ī ni̍ŋ ndo̍ kɔ̄ɔ̄lī. O̍ ko̍ŋ, ma̍ wā dīōlā nīla̍ di̍a̍ndāā la̍ŋ bɛ̄ɛ̄la̍ŋ tɛ̄ɛ̄mbūūwo̍.

⁸Tē wāŋnda̍ lēndu̍l nda̍ kōlāla̍ŋ o̍ bā pɛ̍, o̍ kōlāla̍ la̍ŋ chōo̍ nda̍ kūā hi̍ni̍ŋnda̍ŋ o̍ ma̍āŋnda̍ŋ īkɛ̄i̍ ni̍. Mūɛ̄īmā nda̍ fɛ̄ɛ̄nī wa᷅ŋnda̍ wa̍ŋ, o̍ chīɛ̍i̍ Mɛ̄lɛ̄ka̍ ndāa̍ ni᷄ŋ kpe̍e̍kpe̍i̍ nda̍ kūā ma̍ŋ kōlɔ̄ɔ̍ ni̍.

⁹“Le̍ sa̍bū nya̍ I̍sɔ̄lūɛ̍i̍ya̍, mi̍ I̍ tɛ̍ɛ̍mbūū Āmɔ̄lu̍a̍a̍tīi̍ya̍a̍ wa̍ nya̍ lāchī wa̍, wānāā nda̍ a̍a̍ ba̍ndu̍ ha̍ā māā yɔ̄mīī si̍dāā, ndu̍yɛ̍ ma̍ kīāndū dīāllo̍ŋ māā yɔ̄mīī ɔ̍kū ī kālā ka̍lā wa̍. Mɛ̄ɛ̍ wāŋndo̍ tɛ̄ɛ̄mbūū nu̍a̍ā yɔ̄mndo̍ a̍ kōmɔ̄ɔ̍ ndɔ̄ɔ̍ lātūlu̍, ndu̍yɛ̍ a̍ pūūndu̍ŋ ndɔ̄ɔ̍ŋ kpo̍u̍ yɛ̍, le̍nde̍ ya̍ I̍ tɛ̍ɛ̍mbu̍u̍ nda̍ ni̍.

¹⁰Ya̍ so̍li̍ nya̍ I̍chi̍pī o̍ chɛ̄le̍ŋ ni᷄ŋ ni̍. Wɔ̄sīlā be̍le̍-hi̍ɔ̍ɔ̍lu̍la̍ nya̍ chīi̍ o̍ lɛ̄ŋndē po̍lte̍ŋ ni᷄ŋ nda̍ŋ kpo̍u̍, ya̍ wa̍ bālɔ̄ɔ̍ a̍ nya̍ ni̍, le̍ mī hu̍ŋ ke᷅ nya̍ lɛ̄ŋndē A̍mɔ̍lu̍a̍i̍tīi̍ya̍ māā nyɛ̄ nyā.

¹¹Mi̍ hɛ̍lī pūa̍a̍ nyāā vi̍a̍lāa̍ ā ti᷄ŋ mi̍ si̍i̍ŋgūū nda̍ wānāa̍ su̍a̍ā le̍ Mɛ̄lɛ̄ka̍ wa̍, o̍ ko̍ŋ kɔ̍ɔ̍lī, mi̍ hɛ̍lī a̍ ti᷄ŋ mi̍ si̍i̍ŋgūū nda̍ Na̍a̍sālūɛ̍i̍ya̍.[1] Ō cho̍ le̍nde̍ le̍ ya̍ I̍ to̍sa̍ le̍ wāŋnda̍ I̍sɔ̄lūɛ̍i̍? Nyɛ̄ ya̍ Mɛ̍lɛ̄ka̍ Ya̍a̍wɛ̍ɛ̄ di̍mi̍ wo̍ cho̍ ko̍ŋ ni̍.

¹²Kɛ̍ mi̍ lā tōsā mi̍ Na̍a̍sālūɛ̍i̍ya̍a̍ kāŋ ā kōl mūɛ̄īya̍ŋ ma̍ sīmnu᷄ŋ wa̍nāā yɔ̄ŋ wɔ̄ɔ̍ŋ, ndu̍yɛ̍, mi̍ lā dīmūl wānāā ya̍ I̍ hɛ̍li̍ ka̍ŋ māā wānāa̍ su̍a̍ā le̍ Mɛ̄lɛ̄ka̍ wa̍ māā ā di̍mūl wāŋnda̍ yōōŋgūlā nīla̍ŋ te̍.

¹³Kɛ̍ ndu̍yɛ̍, I̍ cho̍ nya̍ nyɛ̄ pālāā bɛ̄ndōo̍ tūsī chōo̍ mbō fūūlu̍u̍ nya̍ mɛ̍ɛ̄. Mɛ̄ɛ̍ nda̍ hīū nu̍a̍ā tɔ̄lɔ̄ɔ̄ ku̍llo̍ pēīyo̍ o̍ kāmbɛ̍i̍yo̍ ni᷄ŋ, mbō fūūlu̍u̍ lɛ̄ŋ mɛ̍ɛ̄ yɛ̍.

¹⁴Tē te̍le̍ŋ ko̍ŋ ō fūūlu̍u̍ pɛ̍, wānāa̍ nya̍a̍nūŋ bɛ̍ɛ̍ nya̍a̍nɔ᷄ŋ bɛ̍ndōo̍ nya̍ tɛ̄ɛ̄ŋ nda̍, ā nɔ̍lā lɛ̍ ni̍ŋ mā nyāānu̍ŋ mā hɛ̄lu᷄ŋ te̍. Wānāā kpāāyāa̍ cho̍ nya̍ tɛ̄ɛ̄ŋ nda̍ bɛ̍ɛ̍, kpāāya̍ ndāa̍ chō chūwɔ̄ɔ̄. Ku̍u̍ba̍a̍ chɔ̄ūwa̍ nya̍ tɛ̄ɛ̄ŋ bɛ̍ɛ̍, ā nɔ̄lā lɛ̍ ni̍ŋ mā chīīndi̍a̍a̍ nda̍ pi̍la̍ le̍.

¹⁵So̍vɛ̄i̍ya̍a̍ sɔ̍ŋgā a̍ chīɔ̄ūla̍ŋ nda̍ bɛ̍ɛ̍, ā nɔ̍lā ni̍ŋ mā si᷄m te̍. Ndu̍yɛ̍ a̍ nya̍a̍nūŋ nya̍a̍nɔ᷄ŋ bɛ̍ndōo̍ wa̍ bɛ̍ɛ̍, ō pīlɛ̍ bɛ̍ɛ̍ ō nɔ̍lā lɛ̍ ni̍ŋ mbō hɛ̄lu᷄ŋ mbō chīīndi̍a̍a̍ ndu̍ pi̍la̍ le̍. Wānāa̍ nya̍a̍nūŋ o̍ su̍a̍ā chɔ̄ūwa̍ chōo̍ wa̍ bɛ̍ɛ̍, ā nɔ̍lā lɛ̍ ni̍ŋ mā hɛ̄lu᷄ŋ pa̍a̍le̍ le̍ŋ te̍.

¹⁶Tē pāa̍le̍ le̍ŋ lē fūūlu̍u̍ pɛ̍, ku̍u̍ba̍a̍ ve̍sa̍ bɛ̍ɛ̍ hɔ᷅lla̍ le̍ sɔ̍ŋgɔ̄ɔ̍ wa̍, ā chō wōlɔ̄ɔ̄lā ndāla̍ chɔ̄ūla̍ŋ mɛ̄lī lɛ̄ŋ mā nyāānu̍ŋ le̍ yōōmūlā ndāla̍ŋ chīīndīa̍a̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.