Read Southern Kisi E̍mɔ̍ɔ̍sī 3 Bible Online

E̍mɔ̍ɔ̍sī 3 - Southern Kisi bible

E̍mɔ̍ɔ̍sī 3

¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋnda̍ I̍sɔ̄lūɛ̄ī, lā ya᷄ŋ ni᷅la̍ŋ mī lā tūēī nyɛ̄ ya̍ I̍ di̍mi̍ a̍ nya̍ o̍kɔ̄ɔ̄ wo̍, nya̍ wānāā ya̍ I̍ so̍li̍ o̍ chɛ̄le̍ŋ ni᷄ŋ I̍chi̍pī wa̍ kpo̍u̍.

²Lɛ̄ŋnde̍ o̍ chi̍e̍ēŋndo̍ ni᷄ŋ kpo̍u̍, nya̍ pīlɛ̍ kpe̍ ya̍ I̍ hɛ̍li̍ ni̍ mi̍ si̍i̍ŋgūū nya̍ wānāā nī, ndu̍yɛ̍ mi̍ wa᷅ nya̍ hɔ̄lte̍ŋ chōo̍. Le̍ he̍ī, yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nya̍ tōsa̍, I̍ cho̍ nya̍ hūnɔ̄ɔ̄ nyɛ̄ pālāa̍ tūsī chōo̍ le̍ ndu̍ kpo̍u̍.”

³Tē wānāā ŋīɔ̍ɔ̍ŋ ā chɛ̄la᷅ŋ te̍, vɛ̄ɛ̄ ā ke̍lā pa̍ di̍ōm pīlɛ̍ le̍?

⁴Kpɔ̍kūŋndo̍ ō pɛ̍ɛ̍līāā fu̍u̍ o̍ būndɔ̍ɔ̍ ni̍ŋ, te̍ ō cho̍ mbō chē nyɛ̄, mbō yēēma̍ le̍ nyɛ̄ kōŋ dēlɔ̄ɔ̍ chōo̍ le̍? Kpɔ̍kūŋ fɔ̍ŋndɔ̍ɔ̍ ō chāŋ fu̍u̍ o̍ bɛ̄mbɛ̍la̍ ndɔ̄ɔ̍, tē ō cho̍ mbō bīī nyɛ᷅ le̍?

⁵Yōūwo̍ nɔ̄lā mbō hāu̍ o̍ yāŋɔ̄ɔ̄le̍ŋ lɛ̄ŋ, nāa̍ yāŋɔ̄ɔ̄lē cho̍ le̍ wa̍? Yāŋɔ̄ɔ̄le̍ŋ lē bīōndū fu̍u̍, tē ō cho̍ mī nyɛ̄ bīndi̍ le̍ŋ te̍?

⁶Tē bu̍lu̍ chɔ̄ūwo̍ ō sōō o̍ chi̍e̍e̍ o̍ chi̍e̍e̍ ni̍ŋ pɛ̍, ō nɛ̄ɛ̍nɛ̍ lo᷅ yɛ̍ lo̍ŋ, mī sīōōŋnde̍ ī kɛ̄ɛ̍ ndu̍ bīyɔ̄ɔ̄? Dɛ̍nɛ̍ pa̍lāa̍ ō tūāl fu̍u̍ chi̍o̍o̍ chōo̍, tē ō cho̍ mī Mɛ̄lɛ̄ka̍ Ya̍a̍wɛ̄ɛ̄ o̍ tu̍si̍ ndu̍ chi̍o̍o̍ chōo̍ le̍?

⁷Mɛ̄lɛ̄ka̍ Ya̍a̍wɛ̄ɛ̍ kpu̍lu̍ŋgūma̍ bɛ̄ndōo̍, ō ve᷅m i̍sɔ̍ɔ̍ o̍ īsɔ̄ɔ̍ to̍sā, mbō kɛ̄ɛ̍ fɛ̍lɛ̍ŋ bu̍ɛ̍i̍yāā ndūa̍a̍ su̍a̍ā le̍ ndu̍ wa̍ nyɛ̄ o̍ kɛ̍ɛ̍si̍a̍a̍ wo̍ chɔ̄m te̍.

⁸Tē kpɔ̍kūŋndo̍ ō wa̍ pɛ̄ɛ̄līa̍a̍ pɛ̍, ō nɛ̄ɛ̍nɛ̍ wa᷅ yɛ̍ o̍ fo̍ndāŋ kōŋ mī sīōōŋnde̍ ī kɛ̄ɛ̍ ndu̍ bīyɔ̄ɔ̄? Tē Mɛ̄lɛ̄ka̍ Ya̍a̍wɛ̄ɛ̍ kpu̍lu̍ŋgūma̍ bɛ̄ndōo̍ ō sōō pɛ̍, ō nɛ̄ɛ̍nɛ̍ cha᷅l lɛ̍ le̍ kɔ̄la̍ŋ yōōŋgū ndɔ̄ɔ̍ dīmīo̍o̍?

⁹Lā kɔ̍ I̍chi̍pī, a̍ A̍si̍dɔ̍dī chi̍e̍e̍, mī lā kɔ̍ di̍mūl wānāa̍ cho̍ o̍ fo̍ndāŋndā lēmāsāla̍ŋ lo̍ŋ nda̍ āā, “Lā chūūŋgi̍āŋ o̍ pēmbo᷄ŋ Sāme̍e̍līāā cho̍o̍, mī lā kɔ̍ chɔ᷅ sɔ̍ŋgɔ̄la̍ cho̍ tōsa᷄ŋndo̍ Sāme̍e̍līāā chi̍e̍e̍ la̍ŋ, ndu̍yɛ̍ a̍ mɛ̄ɛ̍ nda̍ chō wāŋnda̍ nyɛ̄ pālāa̍ tūsīo̍o̍ chōo̍ lo̍ŋ yɛ̍.”

¹⁰Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋnda̍ ha̍ā ā si̍nā lɛ̍ bɛ̍ɛ̍ le̍ sɔ̄ɔ̍ŋ cho̍ sɔ̄ɔ̍ŋ tōnya̍ŋ ndo̍ŋ tōsāa̍ le̍. Fo̍ndāŋndā vīlɛ̄īlā nda̍ tāŋgu̍l le̍ wānāa̍ māndāā chi̍e̍e̍ wa̍ cha᷄lle̍ lo̍ŋ nda̍ŋ, ma̍ lō o̍ ko̍ŋ ma̍ pēī la̍ŋ cha̍ cha̍ a̍ nyɛ̄m nda̍ chō wāŋnda̍ pōōndi̍a̍a̍ o̍ lābā o̍ sɔ̄ŋgɔ̄la̍ŋ ni᷄ŋ, a̍ o̍ ka̍fāla̍ŋ ni᷄ŋ ndo̍ŋ.

¹¹Le̍la̍ŋ, I̍ cho̍ tōsā mī ya̍a̍mɔ̍ɔ̍wa̍ hu᷄ŋ ba̍lū lɛ̄ŋndē ndāle̍ŋ mā dɔ̄ū le̍ŋ o̍ pi̍ŋndo̍ ni᷄ŋ kpɔ̍kɔ̍su̍. Fo̍ndāŋndā kālā ka̍lālā nda̍ tāŋgu̍l le̍ nda̍ māndāa̍ la̍ŋ kpo̍u̍, ya̍a̍mɔ̍ɔ̍wa̍ chō la̍ŋ hūnɔ̄ɔ̄ tɛ̄ɛ̄mbūū, ndu̍yɛ̍, nyɛ̄ o̍ nyɛ̄ nda̍ nɔ̄ o̍ fo̍ndāŋndā lāŋ, mā pūŋga̍ mu̍ŋ kpo̍u̍ mā kūɛ̄nu᷄ŋ a̍ mu̍ŋ.”

¹²Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Mɛ̄ɛ̍ wānā māndāā lāsāa̍ ō kūā nu̍a̍ā le̍ sāa̍ ndɔ̄ɔ̍ pōōndāa̍ kpɔ̍kūŋndo̍ o̍ sōndō, kɛ̍ mɛ̄ɛ̍ lɔ̄lūlā ti̍ɔ̍ɔ̍ŋnda̍ŋ ɔ̄ɔ̄ nīle̍ŋ mbō pōōnda̍ ndu̍ o̍ sōndō yɛ̍, le̍nde̍ I̍sɔ̄lūɛ̍i̍ya̍a̍ cho̍ Sāme̍e̍līāā chi̍e̍e̍ wa̍ a̍ chi̍ndā ni̍ŋ nyɛ̍ pɔ̄mbɔ̄ ni̍. Nyɛ̍ lo᷅ ni̍ŋ nda̍ o̍ lābā wo̍, mɛ̄ɛ̍ le̍ pɛ̄ŋgɔ̍ŋ kpe̍ŋgbe̍i̍la̍ nda̍la̍ŋ a̍ pɛ̄ŋgɔ̍ŋ kpēlēla̍.”

¹³Mɛ̄lɛ̄ka̍ Ya̍a̍wɛ̄ɛ̍ kpu̍lu̍ŋgūma̍ bɛ̄ndōo̍, o̍ nɔ̍ kpāāyāa̍ kpo̍u̍ wo̍, ō dīmī āā, “Lā ya᷄ŋ ni᷅la̍ŋ o̍ nyɛ̄ ya̍ I̍ cho̍ dīmīo̍o̍ wo̍, mī lā si̍lā yu̍ŋgu̍ Che̍kɔ̍pū wo̍.

¹⁴Lā sīla̍ nda̍ māā pāa̍le̍ ya̍ I̍ chō I̍sɔ̄lūɛ̍i̍ya̍ nyɛ̄ pālāa̍ tūsī chōo̍ le̍ yɔ̄ŋndā ndāla̍ wɔ̍ɔ̍ŋnda̍ŋ nde̍ŋ, ma̍āŋnda̍ cho̍ Bɛ̍tɛ̄ɛ̄l chi̍e̍e̍ la̍ŋ, I̍ cho̍ la̍ŋ hūnɔ̄ɔ̄ tɛ̄ɛ̄mbūū kpo̍u̍. I̍ cho̍ tōsā mā pēsi̍ pe̍si̍ sɔ̍ŋgi̍la̍ ma̍āŋ kōŋ kpo̍u̍ mā nyīndū lɛ̄ŋ.

¹⁵Chīɛ̄īlā wāŋnda̍ I̍sɔ̄lūɛ̄ī a̍ ta̍ŋgu̍l le̍ te̍le̍ŋ īhūēīyo̍ la̍ŋ ni̍, a̍ lā nda̍ tāŋgu̍l le̍ te̍le̍ŋ hāŋgu̍llo̍ la̍ŋ, I̍ cho̍ la̍ŋ hūnɔ̄ɔ̄ tɛ̄ɛ̄mbūū kpo̍u̍. Chīɛ̄īlā nda̍ tāŋgu̍l ma̍ bɛ̄ɛ̄ndīāā la̍ŋ nyɛ̄ kɛ̄ndɛ̄ kɛ̍ndɛ̄ la̍ŋ, la̍ŋ kpo̍u̍ lā chō hūnɔ̄ɔ̄ sīmnɔ᷄ŋ be̍mbe̍la̍ŋ. Chīɛ̄ī o̍ chīɛ̄ī tɔ̍ɔ̍ma̍ nda̍ tāŋgu̍l, la̍ŋ kpo̍u̍ lā chō hūnɔ̄ɔ̄ ītāmu̍.”