Read Southern Kisi E̍mɔ̍ɔ̍sī 4 Bible Online

E̍mɔ̍ɔ̍sī 4 - Southern Kisi bible

E̍mɔ̍ɔ̍sī 4

¹Lā ya᷄ŋ ni᷅la̍ŋ nya̍ wāŋ lāāndūa̍a̍ Sāme̍e̍līāā, nya̍ cho̍ ha̍ā ā chēlu̍lɛ̍i̍ māā nāūvāā chēlu̍lɛ̍i̍ya̍a̍ bɛ̍ndūa̍a̍ Ba̍sīāŋ nda̍, nya̍ cho̍ ha̍ā wānāā tāmbɛ̍i̍ya̍ nyɛ̄ pālāa̍ tūsīo̍o̍ chōo̍, ndu̍yɛ̍ mī lā lūēī wa̍nāa̍ nɔ̍ nyɛ᷅ o̍ nyɛ̄ o̍ bā le̍ wa̍ mɔ̍nɛ̍i̍, mī lā dīmūl pi̍a̍a̍ndāā nyāa̍ āā, “Lā chūu̍ na̍a̍ mūɛ̄īya̍ŋ ŋ̄ kōl,” la̍.

²Mɛ̄lɛ̄ka̍ Ya̍a̍wɛ̄ɛ̍ kpu̍lu̍ŋgūma̍ bɛ̄ndōo̍, ō mēna̍ŋ po̍, mbo̍ dīmī āā, “Te̍le̍ŋ cho̍ hūnɔ̄ɔ̄ fūūlūū, mɛ̄ɛ̍ nda̍ sōlī nu̍a̍ā sūūwa̍ o̍ pēēlo̍ a̍ do̍li̍ŋnde̍ yɛ̍, le̍nde̍ nda̍ wā ni̍ŋ nya̍ sōōlūūwo̍ ā pīlɛ̍ŋ pi̍lɛ̍ŋ nda̍ Sāme̍e̍līāā le̍ kɔ̄la̍ŋ a̍ nya̍ ni̍. Nya̍ kpo̍u̍ le̍nde̍ nda̍ lō ni̍ŋ nya̍ sōlīo̍o̍ ā do̍li̍ŋndo̍ŋ ni̍, mā chīi̍ nya̍ sōlī kpo̍u̍.

³Ā chō hūnɔ̄ɔ̄ nɛ̄īla̍ŋ tīū o̍ sāāsāla̍ŋ kpo̍u̍ mā hu᷄ŋ wa᷅ nya̍ sɛ̄ɛ̄sūūwo̍ le̍ fūlāa̍ a̍ nya̍. Ndu̍yɛ̍ wānā o̍ wānā, nāa̍ nda̍ bīī nu̍m ni̍ŋ nda̍, lo̍ŋ nda̍ fūlā ni̍ŋ a̍ nūm ni̍, mā vīōū nu̍m o̍ bɛ̍ɛ̄.”

⁴Mɛ̄lɛ̄ka̍ Ya̍a̍wɛ̄ɛ̍ kpu̍lu̍ŋgūma̍ bɛ̄ndōo̍ ō dīmi̍ āā, “Wāŋnda̍ I̍sɔ̄lūɛ̄ī, lā kɔ̍ o̍ fo̍ndā dīāndāa̍ Bɛ̍tɛ̄ɛ̄l, mī lā kɔ̍ chɔ̍ɔ̍lū yɔ̄ŋndā wɔ̄ɔ̍ŋnda̍ŋ tōsā mɛ̄ɛ̍ nya̍ yēēma̍ yɛ̍. Lā kɔ̍ Ki̍lkāl chi̍e̍e̍ mī lā kɔ̍ hi̍o̍ū lāchī a̍ sɔ̄ɔ̍ŋ wɔ̍ɔ̍ŋndo̍ŋ tōsāa̍. Lā hīo̍u̍ la̍chi̍ a̍ yɔ̄ŋndā wɔ̄ɔ̍ŋnda̍ŋ tōsāa̍, o̍ ko̍ŋ kɔ̍ɔ̍lī, mi̍ lā hūŋ sa̍lāla̍ŋ sōlīo̍o̍ īdīi̍ o̍ īdīi̍ o̍ ya̍ lo̍, ndu̍yɛ̍ mī lā yɔ̄ŋgū ke̍lā nyāla̍ lēbōlta̍ŋ, tē pālɛ̍i̍ ya̍a̍ o̍ pālɛ̍i̍ ya̍a̍ i̍ hi̍o̍ū pɛ̍.

⁵Lā hīo̍u̍ la̍chi̍ a̍ hūnɔ̄ɔ̍ a̍ bēe̍dīi̍la̍ nyāla̍ nya̍ tōōsīāā a̍ yi̍i̍sīi̍yo̍ la̍ŋ o̍ ya̍ Mɛ̄lɛ̄ka̍ lo̍ māā sa̍lā ba̍li̍ka̍, ndu̍yɛ̍ mī lā hēēlūŋ a̍ sa̍lālā te̍ŋge̍le̍ŋnda̍ nya̍ nɔ̍ bɛ̍ɛ̍ mī sōli̍ le̍ la̍ŋ. Kāni̍ fo̍ndōle̍, I̍ si̍nā māā nyɛ̄ nya̍ kāāla̍ le̍ tōsāa̍ wo̍ cho̍ ko̍ŋ ni̍.

⁶“Mi̍ lo᷅ o̍ ko̍ŋ, mi̍ to̍sā mi̍ yīmā bɛ̄ndūa̍ŋ mā dēl o̍ chi̍e̍e̍ŋ nyāa̍ŋ kpo̍u̍. Mi̍ to̍sā mi̍ nyɛ̄ dīa̍a̍ chūū o̍ fo̍ndālā nyāla̍ŋ kpo̍u̍. Kɛ̍ a̍ ko̍ŋ kpo̍u̍, lā chɛ᷄l mī lā mīīŋgu̍ ya̍ o̍ ībūŋ te̍.

⁷O̍ ko̍ŋ kɔ̍ɔ̍lī, te̍le̍ŋ tɔ̄lɔ̄ɔ̄lā nyāla̍ŋ lā yēēma̍ pīɔ̍ɔ̍ o̍ chīɔ̍ɔ̍ŋ nyāa̍ŋ ni᷄ŋ ndo̍ ki̍nɛ̍i̍, mi̍ lo᷅ o̍ ko̍ŋ mi̍ tu᷅ŋ nya̍ pīɔ̍ɔ̍ le̍ pāŋgo̍ŋ ŋgāa̍. Tē I̍ yɔ̍ŋ pɛ̍ pi̍ɔ̍ɔ̍ o̍ chi̍o̍o̍ pīlɔ̍ɔ̍, I̍ yɔ᷅ŋ o̍ chi̍o̍o̍ pīlɔ̍ɔ̍ le̍. Mī yɔ̍ŋgu̍ pīɔ̍ɔ̍ o̍ chīɛ̍i̍ ī pīlɛ̍ ni᷄ŋ, mī tɔ̄lɔ̄ɔ̄la̍ŋ o̍ chīɛ̍i̍ ī pīlɛ̍i̍ ni᷄ŋ la̍ŋ la̍ ve̍sā.

⁸Mī kōlɔ̄ɔ̍ ndu̍ o̍o̍ bi̍ī wāŋnda̍ o̍ chi̍o̍o̍ŋ, mā mālnu̍ŋ mā kūɛ̄ o̍ chi̍o̍o̍ŋ ŋ̄ pīlɔ̍ŋ kēlā mɛ̄ŋnda̍ŋ kɛ̍, ā kɔ̍ bɛ̍ɛ̍ ā sɔ̍lā mɛ᷅ŋmā lētūu̍ le̍ kōlɔ̄ɔ̄ le̍. Ko̍ŋ kpo̍u̍, le̍ mī nya̍ a̍a̍ mi̍i̍ŋgu̍ ya̍ o̍ ībūŋ, kɛ̍ lā chɛ᷄l mī lā mīīŋgu̍ ya̍ o̍ ībūŋ te̍.

⁹“Mi̍ lo᷅ o̍ ko̍ŋ mi̍ yɔ᷅ŋ hūēīyīī tūū bɛ̄ndūe̍i̍ a̍ nāā lātɔ̄lɔ̄ɔ̍ o̍ chīɔ̄ɔ̄ŋ nyāa̍ŋ ni᷄ŋ, le̍ mī tɔ̄lɔ̄ɔ̄lā nyāla̍ŋ lā vēēsi̍a̍a̍. Ndu̍yɛ̍, mi̍ yɔ᷅ŋ so̍o̍nu̍a̍a̍ ma̍ dīā yɔ̄mīī nyɛ̄i̍ mākīle̍pīi̍ye̍, a̍ yɔ̄mīī fi̍kīi̍ye̍, a̍ yɔ̄mīī ɔ̄li̍fīi̍ nyɛ̄i̍ o̍ kpe̍le̍la̍ nyāla̍ŋ ni᷄ŋ. Kɛ̍ a̍ ko̍ŋ kpo̍u̍, lā chɛ᷄l mī lā mīīŋgu̍ ya̍ o̍ ībūŋ te̍.

¹⁰“O̍ ko̍ŋ kɔ̍ɔ̍lī, mi̍ tu̍sī nya̍ dɛ̍nɛ̍ pa̍lāa̍ chōo̍, mɛ̄ɛ̍ ya̍ I̍ tu̍si̍ wāŋnda̍ I̍chi̍pī chōo̍ yɛ̍. “Mi̍ to̍sā ma̍ dīū chūāūwāā nyāā pi̍a̍a̍ndūa̍a̍ ā ti᷄ŋ o̍ chɔ̄ūwo̍ ni᷄ŋ, ndu̍yɛ̍ o̍ ko̍ŋ kɔ̍ɔ̍lī, mi̍ to̍sā ma̍ bīū su̍a̍ā nyāa̍ chɔ̄ūwa̍ ma̍ kūānu᷄ŋ a̍ nda̍. Mɛ̄ɛ̍ wāŋndā chīe̍e̍ya̍ ā sɔ̄la̍ pīɔ̍mnda̍ŋ nya̍ tɛ̄ɛ̄ŋ te̍i̍, mi̍ dɔ̍ɔ̍ŋgɔ̍ nyāa̍ ō fūlā chūŋ a̍ wāŋ vīlɛ̍i̍ya̍. Kɛ̍ a̍ ko̍ŋ kpo̍u̍, lā chɛ᷄l mī lā mīīŋgu̍ ya̍ o̍ ībūŋ te̍.

¹¹“O̍ ko̍ŋ kɔ̍ɔ̍lī, mi̍ tu̍sī nya̍ nyɛ̄ pālāa̍ chōo̍, mi̍ tɛ̍ɛ̍mbūū wānāā bɔ̄ɔ̍ bɔ̍ɔ̍ nya̍ tɛ̄ɛ̄ŋ, mɛ̄ɛ̍ ya̍ I̍ tɛ̍ɛ̍mbu̍u̍ So̍dɔ̄m a̍ Kōmo̍o̍lūā yɛ̍. Nya̍ lo̍ yōōmū wa̍, mɛ̄ɛ̍ kīlī lēyīŋndo̍ ō hūŋ ni᷅ŋ nu̍a̍ā chūwɔ̄ɔ̍ ŋɔ̄ɔ̍ mā sōli̍ ndu̍ o̍ yīŋ yɛ̍, le̍nde̍ nya̍ sɔ̄la̍ chīndāa̍ ni̍. Kɛ̍ a̍ ko̍ŋ kpo̍u̍, lā chɛ᷄l mī lā mīīŋgu̍ ya̍ o̍ ībūŋ te̍. Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.

¹²Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmī māā, nya̍ wāŋnda̍ I̍sɔ̄lūɛ̄ī, I̍ chō nya̍ nyɛ̄ pālāā bɛ̄ndōo̍ tūsī chōo̍. Lā bɛ̄ɛ̄ndi̍a̍ŋ pɔ̍ɔ̍ le̍ ya̍ Mɛ̍lɛ̄ka̍ kōmāllo̍ le̍ mī ki̍lu̍l nya̍ yāmɛ̍i̍ mī tu̍si̍ nya̍ nyɛ̄ pālāa̍ chōo̍.”

¹³Mɛ̄lɛ̄ka̍ to̍o̍si̍a̍a̍ lūāŋūŋ bɛ̄ndo̍ŋ ni̍, ndu̍yɛ̍ mbo̍ tōōsīāā vɛ̄lɛ̄ hūēīye̍. Mbō tōsa̍ mī wāna̍ chi̍o̍o̍ ō sīna̍ nyɛ̍ cho̍ ndu̍ Mɛ̍lɛ̄ka̍ o̍ kɔ̄l lo̍. Ndu̍ Mɛ̍lɛ̄ka̍, ndu̍ to̍sā ni̍ mī pāa̍le̍ŋ lē sīmnu᷄ŋ ma̍nyu̍m. Ndu̍ cho̍ māsāa̍ o̍ chi̍e̍ēŋndo̍ ho̍ō chōo̍ kpo̍u̍ ni̍. Mɛ̄lɛ̄ka̍ kōŋ, dīōlā ndɔ̄la̍ŋ la̍ cho̍ ni̍ āā, Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍.