Read Southern Kisi E̍mɔ̍ɔ̍sī 5 Bible Online

E̍mɔ̍ɔ̍sī 5 - Southern Kisi bible

E̍mɔ̍ɔ̍sī 5

¹Wāŋnda̍ I̍sɔ̄lūɛ̄ī, lā ya᷄ŋ ni᷅la̍ŋ mī lā tūēī chōndi̍i̍ bīīsi̍ ya̍ E̍mɔ̍ɔ̄ cho̍ he̍ī sōlī a̍ nya̍ o̍kɔ̄ɔ̄ ve̍. Chōndi̍i̍ ke̍ŋ cho̍ he̍ī ni̍ āā,

²“I̍sɔ̄lūɛ̄ī, o̍ cho̍ ho̍ō māā chūāāmbɔ̄ lāāndū yūfu̍a̍a̍nɔ̍ wo̍ ō de᷄l. Ō de᷄l, ndu̍yɛ̍ ō nɔ̄lā lɛ̍ mbō si᷄m le̍ fɛ̍ɛ̍ŋ a̍ fɛ̍ɛ̍ŋ te̍. Wāŋnda̍ kɛ̄ɛ̍ ndu̍, mbo̍ wā īhīni̍ lɛ᷅ŋ o̍ lɛ̄ŋndē ndɔ̄le̍ŋ ni᷄ŋ. Wānā o̍ wānā cho̍ mbō māla̍ ndu̍ mbō si᷄m te̍.”

³Mɛ̄lɛ̄ka̍ Ya̍a̍wɛ̄ɛ̍ kpu̍lu̍ŋgūma̍ bɛ̄ndōo̍ ō dīmi̍ āā, “Chi̍o̍o̍ŋ I̍sɔ̄lūɛ̄ī, chi̍o̍o̍ ō pīlɛ̍ ō yɔ̄ŋ ni̍ŋ so̍vɛ̄i̍ya̍ wāa̍ ō pīlɛ̍ o̍ chɔ̄ūwo̍, mɛ̄ɛ̍ wāŋnda̍ kɛ̄mɛ̄ mā mīīŋgu̍ yōōmū. Ō pīlɛ̍ yɔ̄ŋ ni̍ŋ so̍vɛ̄i̍ya̍ kɛ̄mɛ̄ o̍ chɔ̄ūwo̍, mɛ̄ɛ̍ tɔ̍ mā mīīŋgu̍ yōōmū.”

⁴Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l wāŋnda̍ I̍sɔ̄lūɛ̄ī yo̍ ndu̍ cho̍ ho̍ō ni̍. Ō dīmi̍ āā, “Wāŋnda̍ I̍sɔ̄lūɛ̄ī, lā mīīŋgu̍ ya̍ Mɛ̍lɛ̄ka̍ o̍ ībūŋ, ko̍ŋ to̍sā ni̍ mī lā wa̍ yōōmū.

⁵Lā ku̍ā ya̍ nūūvīa̍a̍ Bɛ̍tɛ̄ɛ̄l le̍. Lā ku̍ā vɛ̄lɛ̄ Ki̍lkāl le̍. Lā ta᷅ŋ vɛ̄lɛ̄ Bīɛ̄ɛ̄si̍ɛ̍bā le̍, kāni̍ fo̍ndōle̍, wāŋnda̍ Ki̍lkāl bɛ̍ɛ̍ ā chō lākɔ̄ a̍ nda̍ o̍ bīyɔ̄ɔ̍ ni̍ŋ. Ndu̍yɛ̍, Bɛ̍tɛ̄ɛ̄l cho̍ hūnɔ̄ɔ̄ sīmnɔ᷄ŋ nyɛ᷅ fo̍ndō fu̍u̍.”

⁶Wāŋnda̍ I̍sɔ̄lūɛ̄ī, lā mīīŋgu̍ Mɛ̍lɛ̄ka̍ Ya̍a̍wɛ̄ɛ̄ o̍ ībūŋ, ko̍ŋ to̍sā ni̍ mī lā wa̍ yōōmū. Tē ō cho̍ ko̍ŋ te̍, ō chō hūnɔ̄ɔ̄ mɛ̄ɛ̍ yīŋndē bɛ̄ndūle̍ŋ lē hūŋ nu̍a̍ā yɛ̍, mbō hu᷄ŋ tɛ̍ɛ̍mbūū nya̍ yu̍ŋgu̍ Chōo̍sɛ̍ wo̍. Yīŋndē bɛ̄ndūle̍ŋ lē chō hūnɔ̄ɔ̄ mī lē hu᷄ŋ tɛ̄ɛ̄mbu̍u̍ Bɛ̍tɛ̄ɛ̄l. Ndu̍yɛ̍, wānā o̍ wānā nɔ̍lā ni̍ŋ mbō nyūmi̍ le̍ŋ te̍.

⁷Dɛ̍nɛ̍ pa̍lāa̍ ō chō le̍ nya̍, nya̍ mi̍ŋgi̍ ha̍ā sa̍kpōyɛ̍i̍ bāla̍ŋ a̍ mākɔ̄ɔ̄, ndu̍yɛ̍, mi̍ lā wā wānāā tōnya̍a̍ fūlīo̍o̍ a̍ nda̍ nyɛ̄ pālāa̍ tūsīo̍o̍ chōo̍ wa̍.

⁸Mɛ̄lɛ̄ka̍ Ya̍a̍wɛ̄ɛ̄ ndu̍ to̍o̍si̍a̍a̍ lōo̍ŋ chōo̍ cho̍o̍ ni̍, lōo̍ŋ lēwɔ̄ɔ̄ wo̍ŋ a̍ lōo̍ŋ lēsīāllo̍ŋ. Ndu̍ to̍sā ni̍ mī nyūmmā tīŋgīsi̍ma̍ bɛ̍ndūa̍ŋ mā sīmnu᷄ŋ pa̍a̍le̍ si̍a̍āle̍ŋ, ndu̍yɛ̍ mbō tōsa̍ mī nyɛ̄ wa̍wo̍ŋ wa᷅ i̍pa̍la̍ wo̍ ō sīmnu᷄ŋ ma̍nyu̍m. Mbō chūa̍ mɛ̄ŋnda̍ŋ o̍ Pēe̍ Mɛ̄ŋmā Īhɛ᷄llo̍, mbō tōsa̍ mī mā sīmnu᷄ŋ pi̍ɔ̍ɔ̍, ndu̍yɛ̍ mbō yɔ᷄ŋ pīɔ̄ɔ̄ kōŋ o̍ chi̍e̍ēŋndo̍ chōo̍. Mɛ̄lɛ̄ka̍ kōŋ, dīōlā ndɔ̄la̍ŋ la̍ cho̍ ni̍ āā, Mɛ̄lɛ̄ka̍ Ya̍a̍wɛ̄ɛ̄.

⁹Wānāā kpāāyāā bɛ̍ndūa̍a̍ mbō tɛ̄ɛ̄mbu̍u̍ nda̍ o̍ lēpīlɛ̍ ni᷄ŋ kpe̍. Fo̍ndāŋndā ka̍lā ka̍lā lā nda̍ tīīnda̍ŋ le̍ nda̍ māndāa̍ la̍ŋ kpo̍u̍ mbō tɛ̄ɛ̄mbu̍u̍ la̍ŋ.

¹⁰Wānāa̍ si̍mūl ka̍fāla̍ŋ, ndu̍yɛ̍ mā dīmī to᷅nya̍a̍ o̍ ko̍tīi̍la̍ŋ ni᷄ŋ nda̍, wānāā kāŋ nda̍ nyā tūl yɛ᷅le̍ŋ ni̍, mī lā pɛ̄ɛ̄sīāā nda̍.

¹¹Wānāā tāmbɛ̍i̍ya̍a̍ nɔ̍ nyɛ᷅ o̍ nyɛ̄ le̍ wa̍, lā chō nda̍ fūlīo̍o̍ a̍ nda̍ nyɛ̄ pālāa̍ tūsīo̍o̍ chōo̍, ndu̍yɛ̍, nyɛ̄ dīāā pɔ̄mbɔ̄ nda̍ nɔ̄ o̍ lābā wo̍, mī lā pōōndīāā ndu̍ nda̍ o̍ lābā. Le̍la̍ŋ, mi̍ chē bɛ̍ɛ̍ mi̍ lā tāŋgūl chīɛ̄īlā lāpōūtā kɛ̄ndɛ̄ kɛ̍ndɛ̄la̍ŋ, kɛ̍ lā cho̍ hu̍nɔ̄ɔ̄ wā lēni᷄ŋ te̍. Lā tōsa̍ kpe̍le̍la̍ mākīle̍pīi̍la̍ŋ kɛ̍ndɛ̄ kɛ̍ndɛ̄la̍ŋ, kɛ̍ lā ko᷅l ni̍ŋ mu̍ɛ̍īmā ndūa̍a̍ŋ te̍.

¹²I̍ si̍nā mɛ̄ɛ̍ yɔ̄ŋndā nyāla̍ wɔ̍ɔ̍ŋnda̍ŋ lā chō fāŋgā yɛ̍. I̍ si̍nā mɛ̄ɛ̍ yɔ̄ŋndā wɔ̄ɔ̍ŋndā nya̍ tōsa̍ la̍ŋ lā chō lā bɛ̄ndū yɛ̍. Wānāā tōnya̍a̍, mi̍ lā lō o̍ ko̍ŋ mi̍ lā wā nda̍ dɛ̍nɛ̍ pa̍lāa̍ tūsīo̍o̍ chōo̍. Lā chō wāŋnda̍ lūɛ̄īyɔ̄ɔ̄lā ni᷄ŋ nda̍ŋ bīyɔ̄ɔ̍ o̍ lābā o̍ ko̍tīi̍la̍ŋ ni᷄ŋ, mī lā mɛ̄ī wa̍nāā tāmbɛ̍i̍ya̍ di̍la̍ ndāla̍ŋ kīo̍o̍, mī lā kē wa̍nāā kāŋ.

¹³Ndu̍yɛ̍ wānā o̍ wāna̍ cho̍ wāna̍ tāāsi̍, ā chō kɔ̄l kālu̍ to̍sā mā mēīnu̍ŋ do̍ŋ, kāni̍ fo̍ndōle̍, te̍le̍ŋndo̍ ho̍ō ō chō te̍le̍ŋ dɛ̍nɛ̍ wɔ̍ɔ̍ŋ bɛ̄ndū.

¹⁴Wāŋnda̍ I̍sɔ̄lūɛ̄ī, lā kīndi̍ o̍ nɛ̄ī o̍ nɛ̄ī ni̍ŋ mī lā mīīŋgu̍ sɔ̄ɔ̍ŋ tōnya̍ŋ tōsāa̍, mī lā pɛ̄ŋgi̍ dɛ̍nɛ̍ wɔ̍ɔ̍ŋndo̍ŋ tōsāa̍. Ko̍ŋ to̍sā ni̍ mī lā wa̍ yōōmū, ndu̍yɛ̍, mī Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō wa̍ a̍ nya̍ la̍tu̍lu̍, mɛ̄ɛ̍ nya̍ pi̍la̍ dīmi̍ māā ō chō a̍ nya̍ la̍tu̍lu̍ yɛ̍.

¹⁵Lā tu᷄l dɛ̍nɛ̍ wɔ̍ɔ̍ŋndo̍ lēyɛ̄, ndu̍yɛ̍ mī lā kāāla̍ o̍ cho̍ tōnya̍a̍ wo̍, o̍ ko̍ŋ kɔ̍ɔ̍lī, mi̍ lā tōsa̍ mī tōnya̍a̍ wa̍ wāŋnda̍ dīmi᷄ŋndo̍ tɛ̄ɛ̄ŋ o̍ ko̍tīi̍la̍ŋ ni᷄ŋ. Tē lā tōsa̍ le̍nde̍ pɛ̍, kɛ̄lɛ̄ŋgāā dɔ̍ɔ̍ mī Mɛ̄lɛ̄ka̍ Ya̍a̍wɛ̄ɛ̍ kpāāyāa̍ kpo̍u̍ wo̍, ō tūīīnu̍ŋ nya̍ īnyīɛ̍ɛ̍, nya̍ yu̍ŋgu̍ tɔ᷅ Chōo̍sɛ̍ lo̍ ho̍ō yōōmū wo̍.

¹⁶Le̍la̍ŋ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ āā, “Te̍le̍ŋ cho̍ hūnɔ̄ɔ̄ fūūlūū, wāŋnda̍ wā ni̍ŋ cha̍ŋnda̍ŋ, mā kōŋūl cho̍o̍ cho̍o̍ kpe̍le̍ŋ o̍ fo̍ndāŋndā wāŋnda̍ ā nɔ̄ chūūŋgi̍āŋndo̍ la̍ŋ kpo̍u̍, ndu̍yɛ̍ a̍ o̍ bɛ̍ɛ̄ o̍ bɛ̍ɛ̄. Wānāa̍ cho̍ o̍ chīɔ̍ɔ̍ŋ ni᷄ŋ nda̍ kpo̍u̍, ā chō nda̍ hūnɔ̄ɔ̄ vēēlū, o̍ ko̍ŋ kɔ̍ɔ̍lī, mā vēēlu̍ vɛ̄lɛ̄ wānāa̍ nda̍ pāāwā le̍ cha̍ŋndo̍ wa̍, le̍ nya̍ hūnɔ̄ɔ̍ cha᷄ŋndo̍.

¹⁷O̍ kpe̍le̍la̍ mākīle̍pīi̍la̍ŋ ni᷄ŋ kpo̍u̍, kɔ̄ltā kɛ̄ndɛ̄lā wāŋnda̍ nda̍ a̍a̍ to̍sā lo̍ŋ nda̍ŋ kpo̍u̍, lā chō chūwɔ̄ɔ̄ mī wāŋnda̍ wa̍ ni᷅ŋ ko̍ŋu̍llo̍ chōo̍ cho̍o̍ kpe̍le̍ŋ, kāni̍ fo̍ndōle̍, te̍le̍ŋ cho̍ fūūlūū, I̍ cho̍ nya̍ hūnɔ̄ɔ̄ nyɛ̄ pālāā bɛ̄ndōo̍ tūsī chōo̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.

¹⁸Nya̍ wānāa̍ cho̍ ha̍ā yēēmɛ̍i̍ māā pāa̍le̍ Mɛ̄lɛ̄ka̍ Ya̍a̍wɛ̄ɛ̄ o̍ ki̍lūl ni̍ŋ wa᷅ŋnda̍ yāmɛ̍i̍ le̍ŋ lē kēle̍ŋa̍ ni᷅ŋ bɛ̍ɛ̍ ko̍ fūūlūū wa̍, pāa̍le̍ le̍ŋ lē wā ni̍ŋ pa̍a̍le̍ kɔ̄l tāmbɛ̍i̍ le̍ nya̍. Ō yɛ̄ɛ̍nɛ̍ kɛ̍ndɛ̄ wāŋnda̍ ha̍ā ā nɔ̄ yɛ̄ o̍ lākɔ̄l, māā tē pāa̍le̍ le̍ŋ lē fūūlu̍u̍ pɛ̍ ā chō ndu̍ sɔ̄la̍? Pāa̍le̍ le̍ŋ lē wā ni̍ŋ pa̍a̍le̍ mānyūm le̍ wāŋnda̍ ha̍ā, lē ve᷅m ni̍ŋ pa̍a̍le̍ nyɛ̄ wa̍wo̍ŋ te̍.

¹⁹Lē wā ni̍ŋ ma̍wa̍ā mɛ̄ɛ̍ wāŋndo̍ ō wā nu̍a̍ā kpɔ̍kūŋndo̍ nyāānɔ᷄ŋndo̍ mā bɔ̄ŋa᷅ŋ nda̍ vīsī bīyāa̍ yɛ̍. Ɔ̄ɔ̄ mɛ̄ɛ̍ wāŋndo̍ ō fūlā nu̍a̍ā īnɛ̍, mbō mīīŋgu̍ chīɛ̄ī ni̍ŋ mbō sɛ̄ɛ̄ŋu̍u̍ bāa̍ o̍ chi̍ɛ̍īyo̍, mī kɛ̄ūwo̍ hu᷄ŋ lɔ̄wa̍ ndu̍ yɛ̍.

²⁰Pāa̍le̍ Mɛ̄lɛ̄ka̍ Ya̍a̍wɛ̄ɛ̄le̍ŋ, lē wā ni̍ŋ pa̍a̍le̍ mānyūm, lē ve᷅m ni̍ŋ pa̍a̍le̍ nyɛ̄ wa̍wo̍ŋ te̍, nyūmnda̍ŋ mā wa̍ ni̍ŋ ti̍ŋgīsi̍, wānā chi᷅ ni̍ŋ nyɛ᷅ wa̍wo̍ŋndo̍ pu̍e̍e̍ŋ bɛ̍ɛ̍ le̍.

²¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋnda̍ I̍sɔ̄lūɛ̄ī, I̍ tu̍l bɔ̄ŋa᷅ŋndā nyāla̍ pi̍ɛ̍i̍yāā Mɛ̄lɛ̄ka̍ la̍ŋ lēyɛ̄. I̍ ye̍e̍ma̍ bɛ̍ɛ̍ mī tu̍e̍ī a̍ chūūŋgi̍āŋndā nyāla̍ nya̍ chūūŋgi̍āŋ nda̍ŋ le̍ ya̍ sōōlūūwo̍ la̍ŋ o̍kɔ̄ɔ̄ le̍.

²²Ā yɔ᷄ŋ bɛ̍ɛ̍ mī lā sōli̍ sa̍lālā lūāāmāā la̍ŋ, a̍ sa̍lālā lātɔ̄lɔ̄ɔ̄la̍ŋ o̍ ya̍lo̍, I̍ bi̍ī sa̍lālā nyāla̍ŋ te̍. Lā sōli̍ bɛ̍ɛ̍ sa̍lālā kɔ̄l nyūlū la̍ŋ o̍ ya̍lo̍ a̍ nāūwāā chēlu̍lɛ̍i̍ya̍a̍ kɛ̍ndɛ̄ kɛ̍ndīa̍a̍, I̍ to̍fā la̍ŋ bɛ̍ɛ̍ le̍.

²³Lā pɛ̄ŋgi̍ ya̍ bɔ̍ɔ̍lūūwo̍ o̍ lānī a̍ chōndu̍ŋ nyāa̍ŋ mu̍ŋ. I̍ ye̍e̍ma̍ bɛ̍ɛ̍ mī ya̍ŋ nīla̍ŋ o̍ tōwāla̍ nyāla̍ nya̍ chō la̍ŋ lɔ̍ɔ̍ la̍ŋ te̍.

²⁴Nyɛ̄ ya̍ I̍ ye̍e̍ma̍ wo̍ cho̍ ni̍, I̍ ye̍e̍ma̍ mī sa̍kpōyɛ̍i̍ ī wa̍ nya̍ tɛ̄ɛ̄ŋ, mī ī tīu̍ bā o̍ bā fe̍e̍, mɛ̄ɛ̍ mɛ̄ŋnda̍ŋ mā tīū nu̍a̍ā o̍ fo̍ndāa̍ yɛ̍, ndu̍yɛ̍ mī tōnya̍a̍ ō hīōū lāchī a̍ nya̍ wāa̍ tɛ̄ɛ̄ŋ, le̍ te̍le̍ŋ o̍ te̍le̍ŋ, mɛ̄ɛ̍ pīo̍o̍ ō hīāū nu̍a̍ā ō ki̍o̍lū kɔ̍ɔ̍lī le̍ yɛ̍.

²⁵“Wāŋnda̍ I̍sɔ̄lūɛ̄ī, wɔ̄sīlā be̍le̍-hi̍ɔ̍ɔ̍lu̍la̍ nya̍ chīi̍ la̍ŋ o̍ lɛ̄ŋndē po̍lte̍ŋ ni̍ŋ nda̍ŋ, I̍ nyu̍na̍ nya̍ le̍ lāsa̍lā sōlī o̍ ya̍ lo̍, ndu̍yɛ̍ mī nyu̍na̍ nya̍ le̍ mī lā chūu̍ ya̍ nyɔ̄ɔ̍ŋ māā lākē?

²⁶Kɛ̍ mi̍ lā hu᷄ŋ to̍o̍sīāā nyɛ̄la̍ŋ māā vēla᷅ŋ mɛ̄lɛ̄ka̍ nyāa̍ Sa̍ku̍tī, o̍ cho̍ mɛ̄lɛ̄ka̍ nyā māsāa̍ wo̍, ndu̍yɛ̍ mi̍ lā tōōsīāā vɛ̄lɛ̄ ho̍ō māā vēla᷅ŋ mɛ̄lɛ̄ka̍ nyāa̍ Ka̍yi̍wāŋ, mɛ̄lɛ̄ka̍ nya̍ īlōo̍ mī lā sōōlūū nda̍. Le̍la̍ŋ, lā chō hūnɔ̄ɔ̄ mɛ̄lɛ̄ka̍a̍ nyāā ka̍ŋ chūā mī lā kūɛ̄ a̍ nda̍

²⁷o̍ bīyɔ̄ɔ̍ ni̍ŋ, nāa̍ ya̍ I̍ cho̍ tōsā mā kūɛ̄ a̍ nya̍ Dāma̍si̍kɔ̍ɔ̄ le̍kɔ̍ɔ̍lī wa̍.” Mɛ̄lɛ̄ka̍ Ya̍a̍wɛ̄ɛ̍ nɔ̍ dīōla̍ŋ āā, Mɛ̄lɛ̄ka̍ nɔ̍ kpāāyāa̍ kpo̍u̍ wo̍ wo̍, nyɛ̄ o̍ di̍mi̍ wo̍ cho̍ ko̍ŋ ni̍.