Read Southern Kisi E̍mɔ̍ɔ̍sī 6 Bible Online

E̍mɔ̍ɔ̍sī 6 - Southern Kisi bible

E̍mɔ̍ɔ̍sī 6

¹Dɛ̍nɛ̍ pa̍lāā bɛ̄ndōo̍ ō chō le̍ nya̍, nya̍ cho̍ŋnu̍ŋ ha̍ā Sa̍a̍yɔ̄ŋ chi̍e̍e̍ o̍ kɔ̄l nyūlōo̍ ni᷄ŋ mi̍ nyɛ̄ o̍ nyɛ̄ wānu᷄ŋ bɛ̍ɛ̍ŋ bɛ̍ɛ̍ŋ a̍ nya̍ wa̍, nya̍ cho̍ŋnu̍ŋ ha̍ā o̍ pēmbēi̍ Sāme̍e̍līāā cho̍o̍, mi̍ lā chūāŋnu᷄ŋ māā nyɛ̄ o̍ nyɛ̄ ō yɔ̍nūŋ nya̍ le̍ wa̍, nya̍ wāŋnda̍ chūa̍ ha̍ā māā wānāā tɔ̍ɔ̍wa̍a̍ bɛ̍ndū o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ nda̍, lɛ̄ŋnde̍ hi̍o̍ū lɛ̄ŋnde̍ kpo̍u̍ le̍ŋ, nya̍ wāŋnda̍ I̍sɔ̄lūɛ̄ī a̍ hu᷅ŋ ha̍ā nāa̍ nya̍ chūā le̍ nda̍ mālāa̍ wa̍.

²Lā kɔ̍ wɔ̍ Ka̍li̍nɛ̄ɛ̄ chīe̍e̍ mī lā kɔ̍ mɛ̍ɛ̍nda᷄ŋ. Lā chɛ᷄ŋ lo̍ŋ pɛ̍, lā kɔ̍ mɛ̍ɛ̍nda᷄ŋ vɛ̍lɛ̄ chi̍e̍e̍ tɔ̍ɔ̍ma̍ bɛ̄ndōo̍ Ha̍ma̍tī, o̍ ko̍ŋ kɔ̍ɔ̍lī, mī lā tūūsu̍ vɛ̄lɛ̄ Ka̍a̍tī, chi̍e̍e̍ Fīli̍i̍tīāŋnda̍, mī lā kɔ̍ mɛ̍ɛ̍nda᷄ŋ ndu̍. Chi̍o̍o̍ŋ mu̍ŋ ki̍nɛ̍i̍, o̍ kūɛ̍ɛ̍nɛ̍ cho̍ yɛ̄ bɛ̍ɛ̍ chi̍e̍e̍ kpāāyā māā lɛ̄ŋīī nɛ̄i̍ he̍ī? O̍ kūɛ̍ɛ̍nɛ̍ būŋgɛ̄ī ndūɛ̍i̍ ī chō yɛ̄ bɛ̍ɛ̍ būŋgɛ̄ī sa̍na̍a̍ mī wānā tu̍u̍ ndi̍, a̍ na̍a̍?

³Lā chō kīɔ̍ɔ̍ māā dɛ̍nɛ̍ pa̍lāā o̍ dɛ̍nɛ̍ pa̍lāā ō cho̍ nya̍ kōmāl te̍. Kɛ̍ nyɛ̄ nya̍ chō tōsāa̍ wo̍, ndu̍ cho̍ tōsā ni̍ mī pāa̍le̍ dɛ̍nɛ̍ pa̍lāa̍ ō dēl ni̍ŋ nya̍ chōo̍ le̍ŋ lē kēle̍ŋa̍ fūūlūū.

⁴Dɛ̍nɛ̍ pa̍lāā bɛ̄ndōo̍ chō le̍ nya̍. Lā chō hīni̍ŋnda̍ŋ o̍ kpēlēla̍ ba̍ā kālālā bɛ̄ndūla̍ŋ chōo̍, mī lā hīnī si̍ɛ̍ndi᷄ŋndo̍ o̍ kpe̍ŋgbe̍i̍la̍ di̍fīɛ̄ɛ̄ dīfīɛ̄ɛ̄ la̍ŋ chōo̍, lā cho̍ sāā fɔ̍ŋndu̍a̍a̍, a̍ nāūwāā chēlu̍lɛ̍i̍ya̍a̍ kɛ̍ndɛ̄ kɛ̍ndīa̍a̍ dīūwo̍ mī lā dīā wa̍.

⁵Chōndu̍ŋ sɛ̍nɛ̄īyo̍ŋ, ŋ̄ wāŋnda̍ tūi̍i̍ yɔ̍ bɛ̍ɛ̍ le̍ pi᷅lɛ̍ le̍ wo̍ŋ, mu̍ŋ nya̍ sōlī ni̍, mɛ̄ɛ̍ Dēēve̍ ndu̍ o̍o̍ to̍sā yɛ̍, mī lā lūāā to̍wāla̍ŋ.

⁶Mūɛ̄īya̍ŋ tē lā wa̍ ma̍ŋ kōlɔ̄ɔ̍ pɛ̍, o̍ he᷄mnda̍ bɛ̍ndūla̍ŋ ni᷄ŋ nya̍ kōl ma̍ŋ ni̍. Chūɛ̄īmā sūūna᷄ŋ ma̍ ba̍ā kālā mā bɛ̄ndūa̍ŋ, ma̍ŋ nya̍ sūūnūŋ le̍ te̍le̍ŋ o̍ te̍le̍ŋ ni̍. Kɛ̍ būūla᷄ŋ o̍ būūla᷄ŋ bɛ̍ɛ̍ cho̍ nya̍, mī mɔ̍nɛ̍i̍ wa̍ o̍ kɔ̄ltā nyāla̍ŋ ni̍ŋ, le̍ tɛ̄ɛ̄mbūū nda̍ tɛ̄ɛ̄mbūū ni̍ŋ pūlāle̍ Chōo̍sɛ̍ le̍ŋ ndo̍ le̍.

⁷Le̍la̍ŋ, nya̍ wa᷅ ni̍ŋ wa̍nāā tāsi̍a̍a̍ le̍ kɔ̄la̍ŋ a̍ nya̍ o̍ bīyɔ̄ɔ̍ ni᷄ŋ ni̍. Yōōmū kɛ̄ndɛ̄ kɛ̍ndɛ̄ nya̍ chō ho̍ō ni᷄ŋ, ndu̍yɛ̍ mī lā tōsā bɔ᷅ŋa᷅ŋndā dīāā nyɛ̄ dīāālā bɛ̄ndūla̍ŋ ndo̍ kpo̍u̍, ō chō hūnɔ̄ɔ̄ mɛ̄ɛ̄lū.

⁸Mɛ̄lɛ̄ka̍ Ya̍a̍wɛ̄ɛ̍ kpu̍lu̍ŋgūma̍ bɛ̄ndōo̍, o̍ nɔ̍ kpāāyāa̍ kpo̍u̍ wo̍, ō sōō ō kālā ka̍lā mbo̍ dīmī āā, “I̍ tu̍l bɔ̄ɔ̍ yo᷅ŋga̍ wānāa̍ fu̍la̍ o̍ pūlāle̍ Che̍kɔ̍pūle̍ŋ chōo̍ wa̍ lēyɛ̄. Chīɛ̄īlā tɔ̍ɔ̍ma̍lā bɛ̄ndūlā nda̍ chō tāŋgūllo̍ la̍ŋ, I̍ ye̍e̍ma̍ bɛ̍ɛ̍ mī tu̍e̍ī a̍ la̍ŋ o̍kɔ̄ɔ̄ le̍. Ndu̍yɛ̍, I̍ cho̍ hūnɔ̄ɔ̄ chi̍e̍e̍ ndā bɛ̍ndōo̍ mālɔ̄ɔ̄ ya̍a̍mɔ̍ɔ̍wa̍ o̍ bā, lātūlu̍ a̍ nyɛ̄ o̍ nyɛ̍ cho̍ lēni᷄ŋ.”

⁹“O̍ chīɛ̄ī o̍ chīɛ̄ī ni᷄ŋ, tē ŋ̄wāŋ tɔ̍ a̍ lo̍ yōōmū ni̍, I̍ cho̍ tōsā mī ŋ̄wāŋ tɔ̍ wa̍ ka̍ŋ bɛ̍ɛ̍ mā chūu̍.

¹⁰O̍ ko̍ŋ, wānāā kāŋ, wānāyɛ̍ī ndɛ̄i̍ ī kūā ni̍ŋ, le̍ dīāllūŋ ndāŋ vi̍lɛ̍i̍yo̍ŋ chūa̍a̍ mbō kɔ̍ lo᷅m mu̍ŋ, o̍ nɔ̍ le̍ dīāllūŋ ndāŋ vi̍lɛ̍i̍yo̍ŋ lōmɔ̄ɔ̍ ndu̍yɛ̍ mbo̍ wā dɛ̍nɛ̍la̍ ndāla̍ bīīsi̍la̍ŋ chīla̍ŋndo̍. Tē ō kūɛ̄ dīāllūŋ mu᷅ŋ chūa̍a̍ pɛ̍, ō chō wāna̍ o̍ cho̍ kōmāl yōōmū chīɛ̄ī ni̍ŋ lo̍ŋ ndo̍ nyūnā āā vɛ̄ɛ̄, ō fūla̍ o̍ nūm kɔ̍ɔ̍lī, wānā che᷅le̍ŋ ō chō pā lo̍ŋ mbo̍ lō yōōmū?” Tē wānā ko̍ŋ ō dīmi̍ pɛ̍ āā, “Sāko̍, wānā che᷅le̍ŋ ndɛ̄ bɛ̍ɛ̍,” ō dīmu̍l wānā ko̍ŋ āā, “Mɛ̄ɛ̍ ō wa̍ le̍nde̍ ki̍nɛ̍i̍. Ŋ̄ pɛ̄ŋgi̍ su̍ɛ̍i̍, yɔ̄ŋi̍ na̍a̍ ŋ̄ lo̍ su̍ɛ̍i̍ mī ŋ̄ pɛ̄l Mɛ̄lɛ̄ka̍ Ya̍a̍wɛ̄ɛ̍ dīōla̍ŋ.”

¹¹Tē Mɛ̄lɛ̄ka̍ Ya̍a̍wɛ̄ɛ̄ o̍ yɔ̍ŋgu̍ dīōmndē kpāāyāle̍ŋ pɛ̍, chīɛ̄īlā tɔ̍ɔ̍ma̍la̍ŋ kpo̍u̍, pēsī pēsīo̍o̍ wɔ̍ wɔ̍, o̍ ko̍ŋ kɔ̍ɔ̍lī, chīɛ̄īlā pɔ̄mbɔ̄la̍ŋ kpo̍u̍ mī lā chūīīnu̍ŋ mu̍lu̍lu̍.

¹²Vɛ̄ɛ̄ su̍a̍a̍ ā nɔ̄lā pa̍ mā nyāānu̍ŋ o̍ pōūtā fe̍ke̍ fe̍ke̍ la̍ŋ chōo̍? Bāā wānā chu̍ā na̍u̍vāā wāa̍ mā kɔ̍ si̍mī nda̍ wāa̍ o̍ Pēe̍ Mɛ̄ŋmā Īhɛ᷄llo̍ ni᷄ŋ? Kɛ̍ nya̍ mi̍ lā lō o̍ ko̍ŋ mi̍ lā sīīŋgūū sa̍kpōyɛ̍i̍ nyɛ̄ wɔ̄ɔ̍ŋ bɛ̄ndū, o̍ ko̍ŋ kɔ̍ɔ̍lī, mi̍ lā sīīŋgūū tōnya̍a̍ māā nyɛ̄ lōlɛ̍i̍ bɛ̍ndū.

¹³Le̍ yōmɔ̄ɔ̄ nya̍ yēm Lo̍dɛ̍bāā[2] chi̍e̍e̍ wo̍, mi̍ lā lō o̍ ko̍ŋ mi̍ lā wā yōŋgāa̍ kīōlɔ̄ɔ̍, mi̍ lā hēēlū hɔ᷅lla̍ chōo̍. O̍ ko̍ŋ kɔ̍ɔ̍lī, mī lā dīmī āā, “Dīāllūŋ nāāŋ ka̍la᷄ŋ to̍sa̍ ni̍ mi̍ ŋ̄ bīī Ka̍a̍nēm[3] chi̍e̍e̍.”

¹⁴Kɛ̍ ndu̍yɛ̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ āā, “Wāŋnda̍ I̍sɔ̄lūɛ̄ī, I̍ cho̍ tōsā mī lɛ̄ŋnde̍ chēle̍ŋ lē hu᷄ŋ de᷅l nya̍ chōo̍, mī lē chūa̍ lɛ̄ŋndē nyāle̍ŋ. Lɛ̄ŋnde̍ŋ nde᷅ŋ lē tūsī ni̍ŋ lɛ᷅ŋndē nyāle̍ŋ kpo̍u̍ nyɛ᷅ pālāa̍ chōo̍. Chɔ̍ŋ a̍ Lɛ̄bō Hāmātī Pa̍a̍sī bā lūāŋndo̍, mbō kūɛ̄ a̍ pēē pɔ̍mbɔ̄ɔ̍ A̍ lu̍a̍ba̍, o̍ cho̍ o̍ lɛ̄ŋnde̍ŋ bā tōūwo̍ wo̍.”