Read Southern Kisi E̍mɔ̍ɔ̍sī 7 Bible Online

E̍mɔ̍ɔ̍sī 7 - Southern Kisi bible

E̍mɔ̍ɔ̍sī 7

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̍ kpu̍lu̍ŋgūma̍ bɛ̄ndōo̍, ō chɔ̄m ya̍ yi̍lāŋndo̍. O̍ yi̍lāŋndo̍ ho̍ō ni᷄ŋ, mi̍ cha᷅ mbo̍ wā so̍o̍nu̍a̍a̍ bɛ̄ɛ̄ndīa̍a̍ ku̍ndā bɛ̄ndōo̍. Ndu̍yɛ̍ a̍ te̍le̍ŋ ko̍ŋ, nda̍ a̍a̍ chi̍i̍ ni᷅ŋ bīl su̍a̍a̍ ā dīā wo̍ ō tāso̍o̍ kīōlɔ̄ɔ̄ le̍ māsā bɛ̍ndōo̍ su̍a̍ā ndūa̍a̍, mi̍ bīllo̍ ho̍ō ō kāndū vɛ̄lɛ̄ pūīyo̍.

²O̍ yi̍lāŋndo̍ ho̍ō ni᷄ŋ, bīl pūīyāā o̍ bīl pūīyāa̍ cho̍ o̍ lɛ̄ŋnde̍ŋ nde᷅ŋ ni᷄ŋ, mi̍ cha᷅ mi̍ so̍o̍nu̍a̍a̍ ha̍ā ā chīī ndu̍ di̍o̍ pa̍ku̍. O̍ ko̍ŋ, mi̍ nyɔ̍ɔ̍lū Mɛ̄lɛ̄ka̍ mi̍ di̍mūl ndu̍ a̍a̍, “Yāndi̍i̍ Mɛ̄lɛ̄ka̍ Ya̍a̍wɛ̄ɛ̍ kpu̍lu̍ŋgūma̍ bɛ̄ndōo̍, ma̍l wa̍nāā nūmnda̍ le̍ nyɛ̄ nda̍ tōsa̍ wo̍. Tē a̍ tu̍si̍ yu̍ŋgu̍ Che̍kɔ̍pū wo̍ nyɛ̄ pālāā wāā nu̍a̍ā chōo̍ pɛ̍, wānā pīlɛ̍ bɛ̍ɛ̍ ō lo᷅ ni̍ŋ yo̍o̍mū le̍, kāni̍ fo̍ndōle̍, ō cho̍ yu̍ŋgu̍ bɔ̍ɔ̍ le̍.”

³O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ma̍ŋgālā kɔ̄llo̍, mbo̍ dīmī āā, “Nyɛ̄ ŋ̄ chē wo̍ ō cho̍ lɛ̍ yɔ̍nɔ᷄ŋ te̍.”

⁴O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̍ kpu̍lu̍ŋgūma̍ bɛ̄ndōo̍, ō chɔ̄m ya̍ yi̍lāŋ chēle̍ŋ. O̍ yi̍lāŋndo̍ ho̍ō ni᷄ŋ, mi̍ cha᷅ mbo̍ wā bɛ̄ɛ̄ndīa̍ŋndo̍ le̍ wānāā ndūa̍a̍ nyɛ̄ pālāa̍ tūsīo̍o̍ chōo̍ a̍ yīŋnde̍ŋ. Mi̍ cha᷅ mi̍ yīŋnde̍ŋ lē vēēsīāā mɛ̄ŋnda̍ŋ o̍ fo̍ndāŋndā yīŋgi̍lɛ̍i̍la̍ bɛ̍ndūla̍ŋ kpo̍u̍, o̍ ko̍ŋ kɔ̍ɔ̍lī, mi̍ lē kāndū lɛ̄ŋnde̍ŋ tɛ̄ɛ̄mbūūwo̍.

⁵O̍ ko̍ŋ, mi̍ nyɔ̍ɔ̍lū Mɛ̄lɛ̄ka̍ a̍a̍, “Yāndi̍i̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, to̍sā ke̍ŋ te̍. Tē a̍ tu̍si̍ yu̍ŋgu̍ Che̍kɔ̍pū wo̍ nyɛ̄ pālāā wāā le̍nde̍ cho̍o̍ pɛ̍, wānā pīlɛ̍ bɛ̍ɛ̍ ō lo᷅ ni̍ŋ yo̍o̍mū le̍, kāni̍ fo̍ndōle̍, ō cho̍ yu̍ŋgu̍ bɔ̍ɔ̍ le̍.”

⁶O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ma̍ŋgālā vɛ̄lɛ̄ kɔ̄llo̍, mbo̍ dīmī āā, “He̍ī bɛ̍ɛ̍ Ī cho̍ yɔ̍nɔ᷄ŋ te̍.”

⁷O̍ ko̍ŋ kɔ̍ɔ̍lī, mi̍ Māsānɔ̄ɔ̍ Mɛ̄lɛ̄ka̍ o̍ chɔ᷅m ya̍ yi̍lāŋ chēle̍ŋ. O̍ yi̍lāŋndo̍ ho̍ō ni᷄ŋ, mi̍ cha᷅ Mɛ̄lɛ̄ka̍ īsīsi̍ o̍ kpākīo̍o̍ īkɛ̄i̍, ō nda̍ tūu̍ a̍ yōōlē tūwāāle̍ŋ o̍ ndu̍ tāŋgūllo̍ ni᷄ŋ le̍ mbō wa᷄ sa̍kpō wo̍, yōōlē tūwāāle̍ŋ lē wa̍ ndu̍ o̍ bā.

⁸Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ nyūnā ya̍ āā, “E̍mɔ̍ɔ̄, ō yɛ̄ɛ̍nɛ̍ ŋ̄ chō yɛ̄ ya̍ chɔ̄ɔ̍ o̍ bā?” Mi̍ mu̍lī a̍a̍, “Yōōlē tūwāālē nda̍ tūū nyɔ̍ɔ̍ le̍ mbō wa᷄ sa̍kpō le̍ŋ ya̍ I̍ cho̍ nu̍m chɔ̄ɔ̍ o̍ bā ni̍.” Mbo̍ dīmūl la̍ āā, “Yōōlē tūwāāle̍ŋ nde᷅ŋ lē chō māchūāā ya̍ o̍ bā, mɛ̄ɛ̍ wānāā tāŋgūlāa̍ ā wā nu̍a̍ā kpākīo̍o̍ tāŋgūllo̍, mā tūu̍ ndu̍ a̍ yōōlē tūwāāle̍ŋ mā sāālu̍ŋ māā ō sēndu̍ le̍ yɛ̍, mɛ̄ɛ̍ le̍nde̍ wānāā nīa̍a̍ I̍sɔ̄lūɛ̄ī a̍ kɛ̍ɛ̍ sānde̍i̍ ni̍. Le̍la̍ŋ, ya̍ Mɛ̍lɛ̄ka̍ I̍ ma̍ŋgālā lɛ̍ kɔ̄llo̍ a̍ nda̍ le̍, mɛ̄ɛ̍ mī tu̍si̍ nda̍ nyɛ̄ pālāa̍ chōo̍.

⁹Bā o̍ bā wānāa̍ fu̍la̍ ha̍ā o̍ pūlāle̍ Āa̍se̍le̍ŋ chōo̍ wa̍ ā sōōlūū Mɛ̍lɛ̄ka̍ā ndāa̍, fo̍ndāŋndā lāŋ kpo̍u̍, lā chō wa̍ lā tɛ̄ɛ̄mbāā. Fo̍ndā o̍ fo̍ndā dīāndāa̍ cho̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, la̍ŋ kpo̍u̍ lā chō hūnɔ̄ɔ̄ sīmnɔ᷄ŋ pɔ᷅mnda̍ŋ, ndu̍yɛ̍, mī to̍sa̍ mī ya̍a̍mɔ̍ɔ̍wa̍a̍ ā hu᷄ŋ chi᷅ŋa̍la᷅ŋ Ma̍sāa̍ Chɛ̄lōbo̍wām a̍ yu̍ŋgu̍ ndɔ̄ɔ̍ mā chīi̍ nda̍.”

¹⁰O̍ ko̍ŋ kɔ̍ɔ̍lī, mi̍ Āmāsi̍yā, wāna̍ so̍līāā lāsa̍lāa̍ o̍ wa̍ Bɛ̍tɛ̄ɛ̄l chi̍e̍e̍ wo̍ ō yɔ̄ŋ dīōmnde̍ŋ nāa̍ Māsāa̍ Chɛ̄lōbo̍wām chu̍a̍, o̍ wa̍ māsāa̍ le̍ I̍sɔ̄lūɛ̄ī yo̍. Mbo̍ dīmūl ndu̍ āā, “Māsāa̍, E̍mɔ̍ɔ̄ o̍ cho̍ nu̍m de̍fo̍o̍ yīīyo̍ o̍ lɛ̄ŋndē I̍sɔ̄lūɛ̍i̍le̍ŋ nde᷅ŋ ni᷄ŋ na̍ŋ kpe̍e̍kpe̍i̍. Ō cha᷄l le̍ lɛ̄ŋnde̍ŋ nde᷅ŋ kpo̍u̍ tɛ̍ɛ̍mbūū a̍ nyɛ̄ o̍ cho̍ nda̍ fūlāa̍ o̍ sōndō wo̍.

¹¹E̍mɔ̍ɔ̄ cho̍ dīmīo̍o̍ māā nūm Māsāa̍ Chɛ̄lōbo̍wām, ā chō nu̍m hūnɔ̄ɔ̄ dīyɔ̄ɔ̄ a̍ mūɛ̄ī fāŋnde̍, ndu̍yɛ̍, māā ā chō hūnɔ̄ɔ̄ wāŋnda̍ I̍sɔ̄lūɛ̍i̍ sōlī o̍ lɛ̄ŋnde̍ŋ nde᷅ŋ ni᷄ŋ mā kūɛ̄ a̍ nda̍ o̍ bīyɔ̄ɔ̍ ni᷄ŋ.”

¹²O̍ ko̍ŋ kɔ̍ɔ̍lī, mi̍ Āmāsi̍yā o̍ di̍mūl E̍mɔ̍ɔ̄ āā, “Nūm wāna̍ su̍a̍ā ho̍ō le̍ Mɛ̄lɛ̄ka̍ wo̍, di̍mī lɛ̄ sɔ̄ɔ̍ŋ nu̍m wāā lāchīŋ mu᷅ŋ o̍ lɛ̄ŋnde̍ŋ nde᷅ŋ ni᷄ŋ te̍. Mi̍i̍ŋgu̍ Chu̍dā mā kɔ̍ wa᷅ wāŋnda̍ sɔ̄ɔ̍ŋ wa̍ā lāchīo̍ŋ dīmūllo̍ lo̍ŋ, le̍ mā pāāwa̍ nu̍m.

¹³Kɛ̍ di̍mī lɛ̄ sɔ̄ɔ̍ŋ wa̍ā lāchīo̍ŋ Bɛ̍tɛ̄ɛ̄l na̍ŋ te̍, kāni̍ fo̍ndōle̍, fo̍ndā māsā bɛ̍ndōo̍ ō hūŋ Mɛ̍lɛ̄ka̍ sōōlūūwo̍ wo̍ cho̍ ho̍ō ni̍. Na̍nu᷄ŋ chīɛ̍i̍ Mɛ̄lɛ̄ka̍ cho̍ le̍ lɛ̄ŋnde̍ŋ kpo̍u̍ wo̍ ō chō ni̍.”

¹⁴Mɛ̄ɛ̍ Āmāsi̍yā di̍mi̍ le̍nde̍, mi̍ E̍mɔ̍ɔ̄ lo᷅ o̍ ko̍ŋ mbo̍ di̍mūl ndu̍ āā, “Ya̍ I̍ cho̍ wa᷅na̍ su̍a̍ā le̍ Mɛ̄lɛ̄ka̍ su̍u̍ di̍mi̍ yo̍o̍ŋgūla̍ŋ le̍ mā pāāwa̍ ndu̍ wo̍ le̍. Ndu̍yɛ̍ I̍ fu̍la̍ bɛ̍ɛ̍ o̍ ku̍nda̍ wānāa̍ su̍a̍ā le̍ Mɛ̄lɛ̄ka̍ wa̍ chōo̍ le̍. Wānā ma̍ndāā lāsāa̍ ya̍ I̍ cho̍ ni̍, ndu̍yɛ̍ mi̍ nɔ᷅ vɛ̄lɛ̄ kpe̍le̍ yɔ̄mīī māfi̍kīi̍yo̍.

¹⁵Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ ō fāŋā ya̍ sāā ka̍ŋ māndāa̍, mbo̍ dīmūl la̍ āā, ‘Kɔ̍ mā kɔ̍ di̍mūl wānāā nīa̍a̍ I̍sɔ̄lūɛ̄ī nyɛ̄ ya̍ I̍ cho̍ nu̍m dɔ̄wɔ̄ɔ̄ o̍ sōndō le̍ nda̍ dīmūllo̍ wo̍.’

¹⁶A̍ di̍mu̍l la̍ māā ya̍ I̍ di̍mūl wāŋnda̍ I̍sɔ̄lūɛ̍i̍ yōōŋgūlā wɔ̄ɔ̍ŋndā Mɛ̄lɛ̄ka̍ chō ya̍ kīo̍o̍ le̍ nda̍ la̍ŋ te̍, ndu̍yɛ̍ māā ya̍ I̍ su̍a̍ā a̍ sɔ̄ɔ̍ŋ wɔ̍ɔ̍ŋ wāŋnda̍ ha̍ā ā chō tōsāa̍ wo̍ŋ te̍, nda̍ yɔ̍nūŋ ni̍ māā wāŋnda̍ I̍sɔ̄lūɛ̍i̍. Le̍la̍ŋ ya̍ŋ ni᷅la̍ŋ mā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍.

¹⁷Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, ‘Nūm Āmāsi̍yā, la̍a̍ nu̍m cho̍ hūnɔ̄ɔ̄ sīmnɔ᷄ŋ wa̍nā la̍nɔ̍ ti̍a̍māā bɛ̄ndōo̍ o̍ chi̍o̍o̍ ho̍ō ni᷄ŋ, ndu̍yɛ̍, mī chūāūwāā nūm a̍ wa᷅ŋ pīāāndūa̍a̍, a̍ chūāūwāā nūm a̍ wa᷅ŋ lāāndūa̍a̍ ā sɔ̄la̍ pīɔ̍mndo̍ o̍ chɔ̄ūwo̍ ni᷄ŋ. Wāŋnda̍ chō hūnɔ̄ɔ̄ lɛ̄ŋndē nūmnde̍ŋ chūā mā pīɔ̄ūvi̍āŋ nde̍ŋ, ndu̍yɛ̍, mī nūm pi̍la̍ kɔ̍ sɔ̍lā pīɔ̍mndo̍ o̍ lɛ̄ŋndē chēle̍ŋ ni᷄ŋ. Ndu̍yɛ̍ wāŋnda̍ I̍sɔ̄lūɛ̄ī nda̍ nda̍, ā chō nda̍ hūnɔ̄ɔ̄ sōlī o̍ lɛ̄ŋndē ndāle̍ŋ ni᷄ŋ, mā kūɛ̄ a̍ nda̍ o̍ bīyɔ̄ɔ̍ ni᷄ŋ, nyɛ̄ o̍ nyɛ̄ tɛ̍ɛ̍mbūū ke̍ŋ te̍.’ ”