Read Southern Kisi E̍mɔ̍ɔ̍sī 8 Bible Online

E̍mɔ̍ɔ̍sī 8 - Southern Kisi bible

E̍mɔ̍ɔ̍sī 8

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ Kpu̍lu̍ŋgūma̍ bɛ̄ndōo̍, ō chɔ̄m ya̍ vɛ̄lɛ̄ yi̍lāŋ chēle̍ŋ. O̍ yi̍lāŋndo̍ ho̍ō ni᷄ŋ, mi̍ cha᷅ kāmbɛ̍i̍yo̍ a̍ yɔ̄mīī kūāmɛ̄ī lēni᷄ŋ.

²Mi̍ Mɛ̄lɛ̄ka̍ Ya̍a̍wɛ̄ɛ̄ o̍ nyu̍nā ya̍ āā, “E̍mɔ̍ɔ̄, ō yɛ̄ɛ̍nɛ̍ ŋ̄ chō yɛ̄ chɔ̄ɔ̍?” Mi̍ mu̍lī a̍a̍, “I̍ cho̍ kāmbɛ̍i̍yo̍ chɔ̄ɔ̍ a̍ yɔ̄mīī kūāmɛ̄ī lēni᷄ŋ.” Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Mɛ̄ɛ̄lu̍la̍ŋ lā fūūlu̍u̍ le̍ wānāā nīa̍a̍ I̍sɔ̄lūɛ̄ī. I̍ ma̍ŋgālā lɛ̍ kɔ̄llo̍ a̍ nda̍ mī ma̍l nda̍, I̍ tu̍sī nda̍ nyɛ̄ pālāā chōo̍ le̍ le̍.

³Tē te̍le̍ŋ ko̍ŋ ō fūūlu̍u̍ pɛ̍, chōndu̍ŋ kɔ̄l kɛ̄ndɛ̄ŋ wāŋnda̍ nda̍ a̍a̍ so̍lī pa̍a̍ndū o̍ chīɛ̄ī Mɛ̄lɛ̄ka̍a̍ ni᷄ŋ ndo̍ŋ, ŋ̄ chō hūnɔ̄ɔ̄ sīmnɔ᷄ŋ cha̍ŋnda̍ kɔ̄ltā tāmbɛ̍i̍. Wānāā vīlɛ̍i̍ya̍ ā wā ni̍ŋ a̍ ti̍u̍wāā bā o̍ bā fe̍e̍. Ā wā ni̍ŋ nda̍ chūa̍a̍ mā kūā nda̍ vīōūwɔ̄ɔ̍, wānā o̍ wānā ve᷅ ni̍ŋ cha̍ŋ te̍.”

⁴Lā ya᷄ŋ ya̍ nīla̍ŋ, nya̍ cho̍ ha̍ā wānāa̍ bāhāvɛ̍i̍ya̍ fūlīo̍o̍ a̍ nda̍ nyɛ̄ pālāa̍ tūsīo̍o̍ chōo̍ wa̍, ndu̍yɛ̍ mī lā tɛ̄ɛ̄mbūū wa̍nāā tāmbɛ̍i̍ya̍a̍ cho̍ o̍ lɛ̄ŋnde̍ŋ nde᷅ŋ ni᷄ŋ nda̍.

⁵Lā chō dīmīo̍o̍ āā, “Te̍le̍ŋ kūɛ̍ɛ̍nɛ̍ pāa̍le̍ pāŋgi̍i̍ sɛ̍nɛ̄īle̍ŋ lē hīāū yɛ̍ ni̍ŋ, mī ŋ̄ pīsi̍ tɔ̄lɔ̄ɔ̄lā nāāla̍ŋ? Te̍le̍ŋ kūɛ̍ɛ̍nɛ̍ pāa̍le̍ nāāle̍ pɛ̍ŋgīāāle̍ŋ lē hīāū yɛ̍ ni̍ŋ, mī ŋ̄ sōli̍ wi̍tīi̍ŋ nāa̍ŋ le̍ pīsīo̍o̍. Ī kēle̍ŋa̍ ni᷅ŋ hīōūwɔ̄ɔ̄, mī ŋ̄ kūɛ̄ lɛ̄ wāŋnda̍ dīo̍o̍ o̍ wɔ̄ŋgūla̍ŋ ni᷄ŋ, nyɛ̄ dīa̍a̍ nda̍ tūūlūl lāka̍fāa̍ ndu̍yɛ̍, mī ŋ̄ hēēlū nyɛ̍ dīa̍a̍ ba̍āla̍ŋ, ndu̍yɛ̍, mī ŋ̄ yīī Sēke̍lēi̍la̍ŋ po᷅ŋ le̍ nda̍ dīo̍o̍.

⁶Wi̍tīi̍ŋ wɔ̍ɔ̍ŋndo̍ŋ kpo̍u̍ pīsīo̍o̍ mu̍ŋ o̍ ba̍ālā bɛ̄ndūla̍ŋ, mī ŋ̄ pīāndū wa̍nāā tāmbɛ̍i̍ya̍. Ndu̍yɛ̍ wānāā bāhāvɛ̍i̍ya̍ nda̍, mī ŋ̄ pīāndū nda̍ māā lāchɛ̄ a̍ ba̍ā wɔ̄ŋgū lākɔ̄ɔ̄vɛ̄i̍ ki̍nɛ̍i̍.”

⁷Mɛ̄lɛ̄ka̍ Ya̍a̍wɛ̄ɛ̄, ō yu̍ŋgu̍ Che̍kɔ̍pū wo̍ ō kēlū yōŋgāa̍ a̍ ndu̍ wo̍ ō tēŋnu᷄ŋ, mbo̍ dīmī āā, “I̍ me᷅l lɛ̍ wāŋnda̍ ha̍ā le̍ yɔ̄ŋndā wɔ̄ɔ̍ŋndā nda̍ tōsa̍ la̍ŋ te̍.

⁸Le̍la̍ŋ, lɛ̄ŋnde̍ŋ nde᷅ŋ lē chō hūnɔ̄ɔ̄ nyīīyā, a̍ nyɛ̍ yɔ̍nūŋ ni̍ŋ ndo̍, ndu̍yɛ̍ wānā o̍ wāna̍ cho̍ o̍ lɛ̄ŋnde̍ŋ nde᷅ŋ ni᷄ŋ mā bīī mɔ̍nɛ̍i̍. Lɛ̄ŋnde̍ŋ kpo̍u̍ lē wā ni̍ŋ hi̍i̍lɔ᷄ŋndo̍ īyōŋgba᷄ŋ yo̍ŋgba᷄ŋnde̍, mī lē hēl, mī lē tūāl, mɛ̄ɛ̍ mɛ̄ŋnda̍ŋ o̍ Pēē Bɛ̍ndōo̍ Na̍īl ho̍ō I̍chi̍pī to̍sā nu̍a̍ā yɛ̍.

⁹Tē pāa̍le̍ le̍ŋ lē fūūlu̍u̍ pɛ̍, I̍ cho̍ tōsā, pāa̍le̍ŋ si᷄mnda̍ŋ o̍ bōlle̍ŋ chōo̍ ki̍nɛ̍i̍, mī lē nyu᷄m pɔ̍lī, mī tu̍si̍ nyūmnda̍ŋ o̍ chi̍e̍ēŋndo̍ chōo̍ i̍pa̍la̍ de̍ŋ. Ya̍ Mɛ̄lɛ̄ka̍ Ya̍a̍wɛ̄ɛ̄ Kpu̍lu̍ŋgūma̍ Bɛ̄ndōo̍, ya̍ so̍ō ni̍.

¹⁰Bɔ̄ŋa᷅ŋndā dīāā nyɛ̄ dīāā bɛ̄ndūlā nya̍ bīī la̍ŋ kpo̍u̍, I̍ cho̍ tōsā mī lā sīmnu᷄ŋ bɔ᷅ŋa᷅ŋndā lābīīsi̍, ndu̍yɛ̍ mī to̍sa̍ mī chōndu̍ŋ nyāa̍ kɔ̄l kɛ̄ndɔ᷄ŋ ŋ̍ sīmnu᷄ŋ cha̍ŋnda̍ īmɔ̍nɛ̍. I̍ cho̍ tōsā mī lā sēndi̍ yu̍ŋgu̍lta̍ŋ, ndu̍yɛ̍ mī wānā o̍ wānā wo̍u̍nu̍ŋ nyɛ᷅lā lābɛ̍kīla̍ŋ le̍ kɔ̄ltā nyāla̍ ta̍mbɛ̍i̍la̍ŋ chɔ̄mndo̍. Mɛ̄ɛ̍ wāŋndo̍ ō nɔ̄ nu̍a̍ā po̍le̍ŋ le̍ŋ pīlɛ̍ kpe̍, mī lē vīŋnu᷄ŋ mbō wa̍ cha᷄ŋ īmɔ̍nɛ̍ bɛ̍ndū ko̍ŋ yɛ̍, le̍nde̍ i̍ yɔ̍nūŋ ni̍ŋ a̍ nya̍ o̍ pāa̍le̍ le̍ŋ chōo̍ ni̍. Nyɛ̄ o̍ nyɛ̍ yɔ̍nūŋ ni̍ŋ nya̍ o̍ pāa̍le̍ le̍ŋ chōo̍, mɛ̄ɛ̄lu̍la̍ ndɔ̄la̍ŋ lā wɔ̄ū ni̍ŋ bɔ̍ɔ̍.”

¹¹Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ō hīāū lāchī a̍ sūɛ̍i̍, mbo̍ dīmī āā, “Te̍le̍ŋ cho̍ hūnɔ̄ɔ̄ fūūlūū, mī to̍sa̍ mī yīmā bɛ̄ndūa̍ŋ mā de᷄l o̍ lɛ̄ŋnde̍ŋ nde᷅ŋ ni᷄ŋ, kɛ̍ ndu̍yɛ̍ ō ve᷅m ni̍ŋ yi̍mā nyɛ̄ dīāā le̍. Yīa̍a̍ŋ mā wā ni̍ŋ wa᷅ŋnda̍ nɛ̄īyo̍, ndu̍yɛ̍ mī kōlɔ̄ɔ̍ ō bīī wāŋnda̍, kɛ̍ ō ve᷅m ni̍ŋ yi̍mā nyɛ̄ dīāā kɛ̄lɛ̄ŋgāā kōlɔ̄ɔ̄ bīyāā le̍ māmɛ̄ŋ te̍. Yīa̍a̍ŋ mā wā ni̍ŋ nda̍ nɛ̄īyo̍, ndu̍yɛ̍ mī kōlɔ̄ɔ̍ bīī nda̍, le̍ yōōŋgu̍ Mɛ̍lɛ̄ka̍ Ya̍a̍wɛ̄ɛ̄ wo̍ tūēīyɔ̄ɔ̍.

¹²Wāŋnda̍ ā chāŋ ni̍ŋ ba᷅ o̍ bā fe̍e̍e̍ o̍ lɛ̄ŋndē lēŋ ni᷄ŋ mā hīŋ le̍ wāna̍ di̍mūl ni̍ŋ nda̍ yōōŋgu̍ Mɛ̍lɛ̄ka̍ Ya̍a̍wɛ̄ɛ̄ wo̍ wo̍. Ā wā ni̍ŋ he̍e̍lōo̍ mā tūūsū, kɛ̍ ā sɔ̍lā ni̍ŋ wa᷅na̍ di̍mūl nda̍ ndu̍ wo̍ le̍.

¹³O̍ pāa̍le̍ le̍ŋ chōo̍, chūāā lāāndūa̍a̍, a̍ chūāā pīāāndūa̍a̍, a̍ cho̍ŋnu̍ŋ kɛ̍ndi̍a̍a̍ nyɛ̄ kɛ̄ndɛ̄ kɛ̍ndɛ̍ī ya̍, ā wōū ni̍ŋ kpa̍nɛ̍i̍ a̍ bo̍lōlā vēsɛ̍i̍la̍ŋ.

¹⁴Wānāa̍ wa᷅ bu̍ŋga᷄ŋ chūa̍a̍, mā mēnāŋ o̍ mɛ̄lɛ̄ka̍ā ndāa̍ cho̍ Sāme̍e̍līāā chi̍e̍e̍, a̍ Da᷅ŋ chi̍e̍e̍, a̍ Bīɛ̄ɛ̄si̍ɛ̍bā chi̍e̍e̍ wa̍ lo̍ wa̍, ā chō hūnɔ̄ɔ̄ dēlɔ̄ɔ̍, ndu̍yɛ̍ le̍ fɛ̍ɛ̍ŋ a̍ fɛ̍ɛ̍ŋ, ā nɔ̍lā lɛ̍ ni̍ŋ mā chɛ᷄ŋ te̍.”