Read Southern Kisi E̍mɔ̍ɔ̍sī 9 Bible Online

E̍mɔ̍ɔ̍sī 9 - Southern Kisi bible

E̍mɔ̍ɔ̍sī 9

¹O̍ ko̍ŋ kɔ̍ɔ̍lī, mi̍ cha᷅ Mɛ̄lɛ̄ka̍ Ya̍a̍wɛ̄ɛ̍ īsīsi̍ o̍ ma̍āŋndo̍ īkɛ̄i̍ o̍ yi̍lāŋndo̍ ni᷄ŋ. Mi̍ tu̍ɛ̍ī mbo̍ dīmī āā, “Lɔ̍ɔ̍ su̍ŋgbu̍ma̍ chīɛ̍i̍ Mɛ̄lɛ̄ka̍a̍ ō kālā ka̍lā, chīɛ̄īyo̍ kpo̍u̍ mbō hi̍i̍lu̍ŋ, mbō kōmba̍ wānāa̍ cho̍ chīɛ̄ī ni̍ŋ nda̍ chōo̍ mā vī. Ndu̍yɛ̍ wānāā tūa̍a̍ lo᷅ ni̍ŋ yo̍o̍mū wa̍, I̍ cho̍ nda̍ di̍u̍ o̍ chɔ̄ūwo̍ ni᷄ŋ, wāŋndo̍ ō pīlɛ̍ bɛ̍ɛ̍ ō nɔ̍lā ni̍ŋ mbō nyāānu̍ŋ te̍. Ndu̍yɛ̍ wāŋndo̍ ō pīlɛ̍ bɛ̍ɛ̍ ō nɔ̍lā ni̍ŋ mbō hɛ̄lu᷄ŋ te̍.

²Ā yɔ᷄ŋ bɛ̍ɛ̍ mā kīndi̍ mā kūɛ̄ o̍ wāŋ vīlɛ̍i̍ya̍ lo̍ chi̍e̍e̍ le̍ mā kɔ̍ vi̍o̍ŋnu᷄ŋ lo̍ŋ, kɔ̄la̍ŋ nda̍ bīyɔ̄ɔ̍ a̍ bā kpa̍ mī so̍li̍ nda̍ lo̍ŋ. Ā yɔ̍ŋ bɛ̍ɛ̍ mā he᷄l o̍ ha̍la̍a̍ ni᷄ŋ cho̍o̍ cho̍o̍, tūsīo̍o̍ nda̍ lɛ̄ŋ.

³Ā kɔ̍ vi̍ŋi᷄ŋ bɛ̍ɛ̍ o̍ Pēmbīī Ka̍mɛ̄lve̍ chōo̍, lōo̍ nda̍ nūūwāa̍ tɛ̍ɛ̄ tɛ̍ɛ̄ mī so̍li̍ nda̍ lo̍ŋ. Yālāā nda̍ nyāānūŋ ya̍, mā tōl o̍ Pēe̍ Mɛ̄ŋmā Īhɛ᷄llo̍ bɛ̄ŋgu̍ mā kɔ̍ vi̍o̍ŋnu᷄ŋ lo̍ŋ te̍, I̍ di̍mu̍l kɛ̄ū bɛ̄ndū pīo̍o̍ ō lɔ̄ɔ̄vi̍a̍a̍ nda̍.

⁴Tē ya̍a̍mɔ̍ɔ̍wa̍a̍ ndāa̍ bi̍ī nda̍ ni̍, mā kūɛ̄ a̍ nda̍ o̍ chɛ̄le̍ŋ ni᷄ŋ, I̍ di̍mu̍l ya̍a̍mɔ̍ɔ̍wa̍a̍ ka̍ŋ ā dīu̍ nda̍ lo̍ŋ a̍ mɔ̄ɔ̄ŋ fāŋndo̍ŋ. Bā o̍ bā nda̍ kɔ̍, I̍ wa᷅ ni̍ŋ nda̍ hɔ̄lte̍ŋ kɔ̄ɔ̄lī, ndu̍yɛ̍ ō ve᷅m ni̍ŋ le̍ nda̍ dɛ̍nɛ̍ kɛ̍ndɛ̄ tōsāl te̍, kɛ̍ le̍ nda̍ tɛ̄ɛ̄mbūūwo̍.”

⁵Tē Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ nɔ̍ kpāāyāa̍ kpo̍u̍ wo̍, ō pīla̍ŋ chi̍e̍ēŋndo̍ pɛ̍, tēŋgāa̍ chi̍e̍ēŋndo̍ ō tēŋgā ni̍, ndu̍yɛ̍ wānā o̍ wāna̍ cho̍ lēni᷄ŋ, mā bīī mɔ̍nɛ̍i̍. Chi̍e̍ēŋndo̍ kpo̍u̍ hīīlɔ᷄ŋndo̍, hēlɔ̄ɔ̍ du̍ŋgu̍lta̍ŋ mbō tūāl mɛ̄ɛ̍ mɛ̄ŋnda̍ŋ o̍ Pēē Bɛ̍ndōo̍ Na̍īl ho̍ō I̍chi̍pī ma̍ to̍sā nu̍a̍ā yɛ̍.

⁶Mbo̍ lō o̍ ko̍ŋ, mbo̍ tōōsīāā nāa̍ ndūāā cha̍lāa̍ o̍ ha̍la̍a̍ ni᷄ŋ cho̍o̍ cho̍o̍. O̍ ko̍ŋ kɔ̍ɔ̍lī, mbo̍ tōōsīāā ha̍la̍a̍, mbo̍ wā ō lānda᷄ŋ o̍ chi̍e̍ēŋndo̍ chōo̍. Mbō chu̍a̍ mɛ̄ŋnda̍ŋ o̍ Pēe̍ Mɛ̄ŋmā Īhɛ᷄llo̍, mī mā sīmnu᷄ŋ pi̍ɔ̍ɔ̍, ndu̍yɛ̍ mbō mīŋgi̍ ma̍ŋ o̍ chi̍e̍ēŋndo̍ chōo̍. Mɛ̄lɛ̄ka̍ kōŋ, dīōlā ndɔ̄la̍ŋ la̍ cho̍ ni̍ āā Mɛ̄lɛ̄ka̍ Ya̍a̍wɛ̄ɛ̄.

⁷Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋnda̍ I̍sɔ̄lūɛ̄ī, mɛ̄ɛ̍ ya̍ I̍ chē nya̍ yɛ̍, le̍nde̍ ko̍ni̍ ya̍ I̍ che᷅ wāŋnda̍ Īto̍o̍pīāā ni̍. Mɛ̄ɛ̍ ya̍ I̍ so̍li̍ nya̍ o̍ chɛ̄le̍ŋ ni᷄ŋ I̍chi̍pī yɛ̍, wāŋnda̍ Fīli̍i̍tīāŋ bɛ̍ɛ̍ le̍nde̍ ko̍ni̍ ya̍ I̍ so̍li̍ nda̍ o̍ lɛ̄ŋndē Ki̍le̍tīle̍ŋ ni᷄ŋ ni̍, ndu̍yɛ̍ le̍nde̍ ko̍ni̍ ya̍ I̍ so̍li̍ vɛ̄lɛ̄ wāŋnda̍ Si̍i̍līāā o̍ lɛ̄ŋndē Ki̍ɛ̍ɛ̄le̍ŋ ni᷄ŋ ni̍.

⁸Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, hɔ̄ltē nīle̍ŋ lē chō lɛ̄ŋndē dɛ̍nɛ̍ wɔ̍ɔ̍ŋnde̍ŋ nde᷅ŋ kɔ̄ɔ̄lī kpi̍ŋ. I̍ cho̍ le̍ŋ hūnɔ̄ɔ̄ tɛ̄ɛ̄mbūū, mī chi̍i̍ a̍ le̍ŋ o̍ chi̍e̍ēŋndo̍ chōo̍. Kɛ̍ ndu̍yɛ̍ ō wa̍ bɛ̍ɛ̍ le̍nde̍ ni̍, I̍ chi̍ī ni̍ŋ yu̍ŋgu̍ Che̍kɔ̍pū wo̍ tɛ̄ɛ̄mbūū kpo̍u̍ le̍.

⁹“I̍ cho̍ hūnɔ̄ɔ̄ dīōmndē kpāāyāle̍ŋ yɔ̄ŋgū, mī lɛ̄ŋndē I̍sɔ̄lūɛ̍i̍le̍ŋ lē hīīlu̍ŋ mɛ̄ɛ̍ nda̍ chāchū nu̍a̍ā si̍o̍ōŋnde̍ a̍ nyɛ̄ chāchūāā īsi̍o̍ōŋndo̍ yɛ̍, le̍ mī so̍li̍ wānāā wɔ̄ɔ̍ŋnda̍ nda̍ tɛ̄ɛ̄ŋ, ndu̍yɛ̍ I̍sɔ̄lūɛ̍i̍ya̍a̍ tu̍a̍a̍ cho̍ lō yōōmū wa̍ mā sɛ̄ŋi̍ŋ o̍ lɛ̄ŋīī chēle̍ŋnde̍ ni᷄ŋ.

¹⁰Wānāā dɛ̍nɛ̍ wɔ̍ɔ̍ŋnda̍ ki̍nɛ̍i̍ wa̍nāā nīa̍a̍ tɛ̄ɛ̄ŋ, a̍ cho̍ ha̍ā dīmīo̍o̍ māā, mbɔ̄ Mɛ̄lɛ̄ka̍ chɛ᷅l mī nyɛ̄ o̍ nyɛ̄ wɔ̄ɔ̍ŋ ō yɔ̄nu̍ŋ a̍ na̍a̍ le̍, wa̍, ā chō nda̍ hūnɔ̄ɔ̄ dīū kpo̍u̍ o̍ chɔ̄ūwo̍ ni᷄ŋ.”

¹¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Te̍le̍ŋ cho̍ hūnɔ̄ɔ̄ fūūlūū, I̍ cho̍ tōsā mī Māsāle̍ Dēēve̍le̍ŋ lē mīīŋgu̍ māā pāāndū. Mɛ̄ɛ̍ chīɛ̄īyo̍ ō pīɔ̄l nu̍a̍ā mī nyɛ̄ o̍ nyɛ̄ mīīŋgu̍ lɛ̄ŋ yɛ̍, le̍nde̍ lɛ̄ŋndē I̍sɔ̄lūɛ̍i̍le̍ŋ lē yɔ̄nūŋ ni̍. Kɛ̍ I̍ cho̍ le̍ŋ hūnɔ̄ɔ̄ mīŋgī tāŋgūl ndu̍yɛ̍, mī mi̍ŋgi̍ sāāsāla̍ ndɔ̄la̍ŋ bɛ̄ɛ̄ndīāā. I̍ cho̍ le̍ŋ mīŋgī sīmī, mī to̍sa̍ mi̍ lē mīīŋgu̍ vɛ̄lɛ̄ o̍ bā ndɔ̄ɔ̍ chōo̍ māā pāāndū.

¹²O̍ ko̍ŋ, wāŋnda̍ I̍sɔ̄lūɛ̄ī a̍ hu᷅ŋ ni̍ŋ mā pōōnda̍ lɛ̄ŋndē I̍dɔ̄mndē tɔ̄le̍ lo̍ ya̍a̍mɔ̍ɔ̍wa̍ o̍ bā le̍ŋ, ndu̍yɛ̍ a̍ lɛ̄ŋnde̍ ī pīlɛ̍i̍ kpo̍u̍, lɛ̄ŋīi̍ wa̍ le̍ ya̍ pa̍a̍ndū ve̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̄ di̍mi̍ wo̍ cho̍ ko̍ŋ ni̍, o̍ cho̍ sɔ̄ɔ̍ŋ mu᷅ŋ hūnɔ̄ɔ̄ tōsā wo̍.

¹³Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ mbo̍ dīmī āā, “Te̍le̍ŋ cho̍ hūnɔ̄ɔ̄ fūūlūū, tɔ̄lɔ̄ɔ̄la̍ŋ lā nāŋ ni̍ŋ o̍ chīɔ̍ɔ̍ŋ ni̍ŋ wa᷅ŋnda̍ o̍ lābā ha̍a̍a̍, wāŋnda̍ ā lō ni̍ŋ chi̍ɔ̍ɔ̍ŋ kūīyo̍ mī te̍le̍ŋ tōsāā ŋ̄chīɛ̄ɛ̄ chēle̍ŋ ō fūūlu̍u̍. Ndu̍yɛ̍, kīle̍pīi̍ya̍ŋ mā nāŋ ni̍ŋ ha̍a̍a̍, wāŋnda̍ ā lō ni̍ŋ ma᷅ŋ wāāyīa̍a̍ le̍ mūɛ̄īya̍ŋ tōōsīa̍a̍ mī ma᷅ŋ mā dīū kɔ̍ɔ̍lī. Kīle̍pīi̍ya̍ŋ mā wā ni̍ŋ de̍līo̍o̍ o̍ pēmbūŋ bɛ̄ndo᷄ŋ chōo̍, ndu̍yɛ̍, mī mɛ̄ŋmā ndūa̍ŋ mā kūā ko᷅ŋgi̍la̍ŋ o̍ pēmbūŋ pɔ̄mbɔ᷄ŋ chōo̍.

¹⁴I̍ cho̍ tōsā mī wānāā nīa̍a̍ I̍sɔ̄lūɛ̄ī a̍ mi̍i̍ŋgu̍ māā pāāndū. Ā chō hūnɔ̄ɔ̄ chi̍e̍e̍ŋ ndāa̍ŋ ta̍mbu̍ mi̍ ŋ̄ sīmnu᷄ŋ pɔ᷅mnda̍ŋ ndo̍ŋ mīŋgī tāŋgūl, ndu̍yɛ̍ mā cha᷄l lo̍ŋ. Wāŋnda̍ I̍sɔ̄lūɛ̄ī a̍ tu̍āl ni̍ŋ vɛ̍lɛ̄ yɔ̄mīī ndɛ̄i̍ mākīle̍pīi̍ye̍, ndu̍yɛ̍ mā ko᷄l mūɛ̄īmā kīle̍pīi̍ma̍ ma̍ŋ mā sōlī wa̍ŋ, o̍ ko̍ŋ kɔ̍ɔ̍lī, mā tōsa̍ kpe̍le̍la̍ ndāla̍ŋ ndu̍yɛ̍, mā dē kɔ̄mndē tɔ̄lɔ̄ɔ̄lā ndāla̍ŋ.

¹⁵I̍ cho̍ tōsā mā mīīŋgu̍ mā cha᷄l o̍ lɛ̄ŋndē ndāle̍ŋ ni᷄ŋ, mɛ̄ɛ̍ wāŋndo̍ ō tūāl nu̍a̍ā yɔ̄mndo̍ o̍ fo̍ndāa̍ yɛ̍. Ā wā ni̍ŋ o̍ lɛ̄ŋnde̍ŋ nde᷅ŋ ni᷄ŋ, lɛ̄ŋndē ya̍ I̍ ke̍ nda̍ le᷅ŋ nde᷅ŋ le̍ fɛ̍ɛ̍ŋ a̍ fɛ̍ɛ̍ŋ, I̍ to̍sā lɛ̍ mā sōli̍ nda̍ o̍ lɛ̄ŋnde̍ŋ nde᷅ŋ ni᷄ŋ te̍.” Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, nyɛ̄ o̍ di̍mi̍ wo̍ ko̍ŋ ni̍.