Read Southern Kisi Cho̍nā 1 Bible Online

Cho̍nā 1 - Southern Kisi bible

Cho̍nā 1

¹Po̍ pi᷅lɛ̍ wa̍ dīōla̍ŋ āā Cho̍nā, fi̍nyā ndɔ̄ dīōla̍ŋ āā, A̍mi̍tāī. Ō wa̍ a̍ te̍le̍ŋ pi᷅lɛ̍, mi̍ Mɛ̄lɛ̄ka̍ Ya̍a̍wɛ̄ɛ̍ o̍ ke᷅ ndu̍ yōōŋgōo̍.

²Mbo̍ dīmūl ndu̍ āā, “Chɔ̍ŋ mā kūɛ̄ o̍ chi̍e̍e̍ bɛ̍ndōo̍ ni᷄ŋ Ni̍ni̍vɛ̄ɛ̄ mā kɔ̍ si̍lā nda̍ a̍ nyɛ̄ nda̍ chō tōsāa̍ wo̍ o̍kɔ̄ɔ̄. Kāni̍ fu̍u̍le̍ I̍ cho̍ sɔ̄ɔ̍ŋ wɔ̍ɔ̍ŋ nda̍ chō tōsāa̍ wo̍ŋ chɔ̄ɔ̍ kpo̍u̍.”

³Kɛ̍ mi̍ Cho̍nā nya̍a̍nu᷄ŋ Mɛ̍lɛ̄ka̍ Ya̍a̍wɛ̄ɛ̄, le̍ kɔ᷄ŋnda̍ŋ Ta̍a̍sī chi̍e̍e̍. Mbo̍ kūā Cho̍pā chi̍e̍e̍ nāa̍ dɛ̄ndɛ̄la̍ bɛ̍ndūla̍ŋ lā hūŋ si̍mnda̍ŋ nda̍. Mbo̍ chā dɛ̄ndɛ̍ wa̍ kɔ̄la̍ŋ Sīpe᷅ŋ ndo̍. O̍ ko̍ŋ, mbo̍ yɔ̄ŋgū pāāwā dɛ̄ndɔ̄ɔ̍, mbo̍ lūɛ̄ī, le̍ mā kūɛ̄nu᷄ŋ nda̍ wānāa̍ wa̍ kɔ̄la̍ŋ Ta̍a̍sī wa̍. Ndu̍ o̍o̍ ye̍e̍ma̍ mī ndu̍ o̍o̍ nya̍a̍nu̍ŋ Mɛ̍lɛ̄ka̍ Ya̍a̍wɛ̄ɛ̄.

⁴Kɛ̍ mɛ̄ɛ̍ nda̍ wa̍ kɔ̄la̍ŋ o̍ Pēe̍ Mɛ̄ŋmā Īhɛ᷄llo̍ chōo̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ yɔ᷅ŋ hūēīyīī bɛ̄ndū bɛ̍ndūe̍i̍. Hūēīye̍ he̍ī wa̍ ni᷅ŋ le̍ dɛ̄ndɔ̄ɔ̍ pūūsīāā.

⁵Mi̍ sīōōŋnde̍ bīī wānāa̍ wa̍ kɔ̄la̍ŋ a̍ dɛ̄ndɔ̄ɔ̍ wa̍. Nda̍ kpo̍u̍ ma̍ kāndū Mɛ̄lɛ̄ka̍ā ndāā yɛ̍ yi̍a̍a̍ vēēlōo̍ chōo̍ cho̍o̍ le̍ mā chīīndi̍a̍a̍ yōōmūlā ndāla̍ŋ. O̍ ko̍ŋ kɔ̍ɔ̍lī, ma̍ sōōlūū wōlɔ̄ɔ̄la̍ wa̍ o̍ dɛ̄ndɔ̄ɔ̍ ni᷄ŋ nda̍ŋ ma̍ vīī o̍ pēēlo̍, le̍ mī dɛ̄ndɔ̄ɔ̍ ndu̍ o̍o̍ yɔ̍nu̍ŋ ti̍ŋ fe̍fe̍le̍. Ho̍ō kpo̍u̍ Cho̍nā ndu̍ wa̍ŋnu̍ŋ o̍ dɛ̄ndɔ̄ɔ̍ lēbɛ̄ŋgo̍o̍ o̍ lūa̍a̍ŋ yi᷅kpi̍.

⁶Mi̍ wānāa̍ wa̍ kɔ̄la̍ŋ a̍ dɛ̄ndɔ̄ɔ̍ wa̍ wāna̍ ndā bɛ̍ndōo̍ ō kūā nāa̍ ndu̍ chu̍a̍. Mbo̍ dīmūl ndu̍ āā, “Lūa̍a̍ŋ ŋ̄ hīni̍ ni̍? Chɔ̍ŋ, nūm bɛ̍ɛ̍ mā pi̍ɛ̍i̍ Mɛ̄lɛ̄ka̍ nūmndo̍, kɛ̄lɛ̄ŋgāā mbō yīya̍ŋ na̍a̍ chōo̍ mbō chīīndi̍a̍a̍ yōōmūlā nāāla̍ŋ.”

⁷O̍ ko̍ŋ kɔ̍ɔ̍lī, mi̍ wānāa̍ wa̍ kɔ̄la̍ŋ a̍ dɛ̄ndɔ̄ɔ̍ wa̍ ā dīmu̍la᷅ŋ, āā, “Ŋ̄ tōsa᷅ŋ ndɔ̄ mī ŋ̄ sīna̍ wāna̍ to̍sa̍ mi̍ dɛ̍nɛ̍ pa̍lāa̍ ho̍ō ō tūāl na̍a̍ chōo̍ wo̍.” Ma̍ wūū kōo̍ŋ le̍ sūɛ̍i̍ he̍ī sīnāa̍. Mi̍ kōo̍ŋ bīī Cho̍nā.

⁸Ma̍ nyūnā ndu̍ āā, “Chɔ̍m ndɔ̍ na̍a̍ le̍ sa̍bū dɛ̍nɛ̍ pa̍lāa̍ ho̍ō ō tōl na̍a̍ chōo̍ wo̍? Wa̍li̍ yɛ̄ɛ̍nɛ̍ ŋ̄ tōsā yɛ̍. Lɛ̄ŋnde̍ kūɛ̍ɛ̍nɛ̍ ŋ̄ fūla̍ yɛ̍? Kāa̍le̍ māāvɛ̄ɛ̍ ŋ̄ chō yɛ̄?”

⁹Mbo̍ dīmūl nda̍ āā, “Hi̍būlūi̍nɔ̍ɔ̍ ya̍ I̍ cho̍ ni̍. Mɛ̄lɛ̄ka̍ Ya̍a̍wɛ̄ɛ̄, o̍ cho̍ o̍ fo̍ndāŋ ndɔ̄ɔ̍ chōo̍ cho̍o̍, mbo̍ tōōsīāā lɛ̄ŋnde̍ŋ a̍ Pēe̍ Mɛ̄ŋmā Īhɛ᷄llo̍ wo̍, ndu̍ ya̍ I̍ pi̍ɛ̍ī ni̍.” O̍ ko̍ŋ kɔ̍ɔ̍lī, mbo̍ dīmūl nda̍ māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ nyāānɔ᷄ŋndo̍ ni̍. Mɛ̄ɛ̍ pūa̍a̍ tūēī le̍nde̍ mi̍ sīōōŋnde̍ bīī nda̍. Ma̍ dīmūl ndu̍ āā, “Vɛ᷅ ma̍ tōsā sūɛ̍i̍ wɔ̄ɔ̍ŋ ī wāā le̍nde̍.”

¹¹Mi̍ hūēīye̍ ī chɔ̄ɔ̄lū hɔ̄ŋ mbo̍ hīāū ī tāse̍i̍. O̍ ko̍ŋ, ma̍ nyūnā ndu̍ āā, “Ō yɛ̄ɛ̍nɛ̍ na̍a̍ ŋ̄ tōsa̍ yɛ̍ ni᷅ŋ a̍ nūm mī hūēīye̍ he̍ī ī pɛ̄ŋgi̍ hɔ̄ŋndo̍?”

¹²Mi̍ Cho̍nā di̍mūl nda̍ āā, “Lā chu̍a̍ ya̍ mī lā ma᷄l la̍ o̍ pēēlo̍. Ko̍ŋ to̍sā ni̍ mī hūēīye̍ pɛ̄ŋgi̍ hɔ̄ŋndo̍. Kāni̍ fu̍u̍le̍, I̍ si̍nā māā le̍ nyɛ̄ ya̍ I̍ to̍sa̍ wo̍ hūēīye̍ he̍ī ī chō hɔ̄ŋndo̍ ni̍.”

¹³Kɛ̍ mi̍ pūa̍a̍ kīndī mɛ̄ɛ̍ o̍ mɛ̄ɛ̍ fe̍e̍e̍ le̍ mī nda̍ a̍a̍ mi̍ŋgi̍ dɛ̄ndɔ̄ɔ̍ bā kɔ̄ŋgɔ̍ɔ̍. Kɛ̍ ā nɔ̄la̍ le̍, kāni̍ fu̍u̍le̍, mi̍ hūēīye̍ ī chɔ̄ɔ̄lū hɔ̄ŋ mbo̍ hīāū ī tāse̍i̍.

¹⁴O̍ ko̍ŋ, ma̍ pīɛ̄ī Mɛ̄lɛ̄ka̍ Ya̍a̍wɛ̄ɛ̄ āā, “Yāndi̍i̍, Mɛ̄lɛ̄ka̍ Ya̍a̍wɛ̄ɛ̄, tu̍sī na̍a̍ dɛ̍nɛ̍ pa̍lāā chōo̍ le̍ mɛ̄ɛ̍ na̍a̍ ŋ̄ chō pōo̍ ho̍ō mālɔ̄ɔ̍ o̍ pēēlo̍ yɛ̍ le̍. Di̍ī na̍a̍ le̍ pīɔ̍m ndɔ̄ɔ̍ le̍. Bi̍ī na̍a̍ tɛ̄ɛ̄ māā ŋ̄ chō wāna̍ tɛ̍ɛ̍mbu̍u̍ i̍sɔ̍ɔ̍ le̍ wo̍ dīyɔ̄ɔ̄ le̍. Kāni̍ fu̍u̍le̍, nyɛ̄ ŋ̄ hɛ̄na̍ŋ ndo̍, ndu̍ yɔ̍nu̍ŋ ho̍ō ni̍.”

¹⁵O̍ ko̍ŋ kɔ̍ɔ̍lī, ma̍ chūā Cho̍nā ma̍ māl ndu̍ o̍ pēēlo̍. Ndu̍yɛ̍ dīmīo̍o̍ nu̍a̍ā ma̍ māl ndu̍ o̍ pēēlo̍, mi̍ hūēīyīī bɛ̄ndūi̍i̍ wa̍ hɔ̄ŋndo̍ ve̍ ī pɛ̄ŋgī bɛ̍ɛ̍ hɔ᷅ŋndo̍.

¹⁶Mɛ̄ɛ̍ pūa̍a̍ wa̍ kɔ̄la̍ŋ a̍ dɛ̄ndɔ̄ɔ̍ wa̍ ā chē nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ wo̍, mi̍ sīōōŋnde̍ ī bīī nda̍ a̍ ndu̍ ta̍u̍. Ma̍ sōlī sa̍lāa̍ o̍ ndu̍ lo̍ ma̍ chūēl ndu̍ būŋgɛ̄i̍.

¹⁷Mālɔ̄ɔ̄ kōŋ Cho̍nā o̍ pēēlo̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ yɔ᷅ŋ sūū bɛ̄ndōo̍ mbo̍ hu᷄ŋ mi̍ōl ndu̍. Le̍ pālɛ̍i̍ ī yāa̍ a̍ nyūmnda̍ŋ mā yāa̍ Cho̍nā wa̍ sūūwo̍ o̍ dēmbē.