Read Southern Kisi Cho̍nā 2 Bible Online

Cho̍nā 2 - Southern Kisi bible

Cho̍nā 2

¹O̍ ko̍ŋ kɔ̍ɔ̍lī, mi̍ Cho̍nā pi̍ɛ̍ī Mɛ̄lɛ̄ka̍ ndɔ̄ɔ̍ Ya̍a̍wɛ̄ɛ̄ nāa̍ o̍ wa̍ sūūwo̍ o̍ dēmbē wa̍. Mbo̍ dīmī āā,

²“O̍o̍ Mɛ̄lɛ̄ka̍ Ya̍a̍wɛ̄ɛ̄, I̍ wa̍ o̍ dɛ̍nɛ̍ pa̍lāā bɛ̄ndōo̍ ni᷄ŋ, mi̍ ve̍e̍lū nu̍m le̍ ya̍ mālāa̍, ndu̍yɛ̍ ma̍ mālā ya̍. I̍ wa̍ chi̍e̍e̍ pīɔ̍m pɔ̍ɔ̍li̍, mi̍ pi̍ɛ̍ī nu̍m ndu̍yɛ̍, ma̍ mūlī ya̍ dīōm.

³Ā bīī ma̍ māl la̍ o̍ Pēe̍ Mɛ̄ŋmā Īhɛ᷄llo̍ bɛ̄ŋgu̍, nāa̍ yi̍ŋgi̍lɛ̍i̍ya̍a̍ bɛ̍ndūa̍a̍. Mi̍ tu̍āl o̍ mɛ̄ŋnda̍ŋ bɛ̄ŋgu̍ di̍. Mi̍ mɛ̄ŋnda̍ŋ mā wā kpo᷅ku̍ kpo᷅ku̍ bɛ̍ndōo̍ ya̍ chōo̍.

⁴I̍ wa̍ ni᷅ŋ ko̍ kɔ̍l māā tōūwɔ̄ɔ̍ nūm o̍o̍ chi̍i̍ ya̍ ni᷅ŋ nu̍a̍ā ni̍ le̍ mī fa̍ŋa̍ŋ nu̍m o̍ hɔ̄l. Ndu̍yɛ̍ mi̍ yi̍ya᷄ŋ māā i̍i̍ chi᷅ lɛ̍ ni̍ŋ chi̍ɛ̍ī nūm so̍līāā lāsa̍la̍ cho̍ ō yɔ̄ŋga᷄ŋ o̍ nūmndo̍ wo̍ le̍.

⁵Mi̍ mɛ̄ŋnda̍ŋ mā kēī ya̍ chōo̍. I̍ wa̍ ni᷅ŋ le̍ wu̍ kāni̍, mi̍ Pēe̍ Mɛ̄ŋmā Īhɛ᷄llo̍ mīāl la̍ chɔ̍ŋgɔ̍mu̍ bɛ̍ndū. Mi̍ bi᷄l wu᷅l o̍ mɛ̄ŋnda̍ŋ bɛ̄ŋgu̍ wo̍ ō yīū yi̍u̍ŋ ya̍ o̍ lēbōl.

⁶Mi̍ tu̍āl o̍ pēmbu᷄ŋ cho̍ o̍ mɛ̄ŋnda̍ŋ bɛ̄ŋgu̍ wo̍ŋ tūmndo̍ di̍. Mi̍ tu̍āl o̍ fo̍ndāŋndā dīōla̍ŋ lā wa̍ ya̍ lā kīīndīāā kɔ̄ɔ̄lī la̍ŋ, nāa̍ ya̍ i̍i̍ fu̍lā lɛ̍ le̍ fɛ̍ɛ̍ŋ a̍ fɛ̍ɛ̍ŋ te̍ wa̍. Kɛ̍ nūm Mɛ̄lɛ̄ka̍ Ya̍a̍wɛ̄ɛ̄, ma̍ sōlī ya̍ nāa̍ yi̍ŋgi̍lɛ̍i̍ya̍a̍ ka̍ŋ, ma̍ mīŋgī ya̍ yōōmōo̍ o̍ mīli̍ŋ.

⁷I̍ wa̍ ni᷅ŋ tēndu̍ pīɔ̍m mi̍ pi̍ɛ̍ī nu̍m, ndu̍yɛ̍ ma̍ tūɛ̄ī pīɛ̄īlē nīle̍ŋ nāa̍ ŋ̄ chō o̍ chīɛ̄ī nūm so̍līāā lāsa̍lāa̍ ni᷄ŋ nda̍.

⁸Wānāa̍ so̍o̍lūū pi̍ɔ̍māā fo̍ndūa̍a̍ wa̍, ā ma᷄l wāna̍ tu̍i̍i̍nūŋ nda̍ īnyi̍ɛ̍ɛ̍ yo̍.

⁹Kɛ̍ ya̍ ya̍, I̍ cho̍ nu̍m sāŋgālā o̍ chōndo̍ŋ ni᷄ŋ. I̍ cho̍ nyɛ̄ ya̍ I̍ chu̍e̍l nu̍m būŋgɛ̄i̍ yo̍ tōsā. Ndu̍yɛ̍ I̍ cho̍ sa̍lāa̍ sōlī o̍ nūm ndo̍, kāni̍ fo̍ndōle̍, nūm Mɛ̄lɛ̄ka̍ Ya̍a̍wɛ̄ɛ̄, nūm ko̍ni̍ chi̍i̍ndīāā ya̍ ni̍.”

¹⁰O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl sūūwo̍ mbo̍ kɔ̍ ku̍i̍sī Cho̍nā o̍ si̍o̍ōŋnde̍ chōo̍.