Read Southern Kisi Cho̍nā 3 Bible Online

Cho̍nā 3 - Southern Kisi bible

Cho̍nā 3

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl vɛ̄lɛ̄ Cho̍nā o̍ dīi̍ŋ ndɔ̄ɔ̍

²āā, “Chɔ̍ŋ mā kūɛ̄ o̍ chi̍e̍e̍ bɛ̍ndōo̍ Ni̍ni̍vɛ̄ɛ̄, mā kɔ̍ di̍mūl nda̍ yōōŋgū ya̍ I̍ cho̍ nu̍m kīo̍o̍ wo̍.”

³O̍ ko̍ŋ, mi̍ Cho̍nā to̍sā nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ wo̍, mbo̍ kūā Ni̍ni̍vɛ̄ɛ̄. Ndu̍yɛ̍, chi̍e̍e̍ bɛ̍ndōo̍ pīla̍ Ni̍ni̍vɛ̄ɛ̄ o̍ wa̍ ni̍. Ndu̍ o̍o̍ chu̍ā wa᷅ŋndo̍ pālɛ̍i̍ ī yāa̍ le̍ ndu̍ kīōlɔ̄ɔ̍ tɛ̄ɛ̄ŋ.

⁴Mi̍ Cho̍nā ka̍ndū kɔ̄la̍ŋ o̍ chi̍e̍e̍ bɛ̍ndōo̍ ho̍ō ni᷄ŋ. Mɛ̄ɛ̍ o̍ ku̍ɛ̄ le̍ pāa̍le̍ŋ kpɛ᷅ŋ, mbo̍ kāndū yōndāa̍ āā, “Chɔ̍ŋ a̍ hāū mbō kūɛ̄ a̍ pālɛ̍i̍ be̍le̍-hi̍ɔ̍ɔ̍lu̍ (40), Mɛ̄lɛ̄ka̍ chō hūnɔ̄ɔ̄ Ni̍ni̍vɛ̄ɛ̄ tɛ̄ɛ̄mbūū.”

⁵Mɛ̄ɛ̍ wāŋnda̍ Ni̍ni̍vɛ̄ɛ̄ a̍ tu̍e̍ī nyɛ̄ Cho̍nā di̍mu̍l nda̍ wo̍, ma̍ lāāla̍ŋ a̍ Mɛ̄lɛ̄ka̍. O̍ ko̍ŋ, ma̍ yōndā māā wāŋndā bi̍i̍ su᷅mndo̍, nda̍ kpo̍u̍, mā wōūnu̍ŋ nyɛ̍lā lābɛ̍kīla̍ŋ, wānā bɛ̍ndū ni̍ wānā pɔ̍mbɔ̄ ni̍, le̍ chɔ̄mndo̍ māā nyīɛ̍ɛ̍ye̍ bīī nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ.

⁶Mɛ̄ɛ̍ māsā bɛ̍ndōo̍ Ni̍ni̍vɛ̄ɛ̄ o̍ tu̍e̍ī nyɛ̍ yɔ̍nu̍ŋ ndo̍, mbo̍ cha᷄ŋ nya̍ o̍ kpe̍ŋgbe̍i̍ ndɔ̍ lēmāsāa̍ chōo̍. Mbo̍ sōlī dōma̍ ndɔ̍ lēmāsāa̍, mbo̍ wōōnu᷄ŋ nyɛ̍lā lābɛ̍kīla̍ŋ, mbo̍ chāl lɛ̄ŋ o̍ pūlta̍ŋ ni᷄ŋ.

⁷O̍ ko̍ŋ kɔ̍ɔ̍lī, mbo̍ yɔ̄ŋgū yōndāa̍ nāa̍ wāŋnda̍ chūā kpo̍u̍. Ma̍ yōndā āā, “Māsā bɛ̍ndōo̍ nda̍ wānāā bɛ̄ndūa̍a̍ ā dīmi̍ māā wānā o̍ wānā lā bīi̍ su᷅mndo̍. Lā di̍ā nyɛ̄ ndīāā le̍, lā ko᷅l te̍. Chɔ̍ŋ a̍ wāŋndā chīe̍e̍ya̍ mbō kūɛ̄ a̍ chɔ̄lūa̍a̍, kpo̍u̍.

⁸Wānā o̍ wānā lā wōūnu̍ŋ nyɛ᷅lā lābɛ̍kīla̍ŋ, o̍ ko̍ŋ kɔ̍ɔ̍lī, mī lā wōu̍ vɛ̄lɛ̄ chɔ̄lūa̍a̍. Na̍a̍ kpo̍u̍ mī wānā o̍ wānā o̍ pīɛ̍i̍ Mɛ̍lɛ̄ka̍ a̍ kɔ̄l ndɔ̄ɔ̍ kpo̍u̍, ndu̍yɛ̍, mbō ma᷄l yɔ̄ŋ wɔ̄ɔ̍ŋndo̍ tōsāa̍, a̍ wāŋnda̍ sɔ̄ɔ̍ŋ wɔ̍ɔ̍ŋndo̍ŋ tōsāllo̍.

⁹Kɛ̄lɛ̄ŋgāā mī Mɛ̄lɛ̄ka̍ māŋga̍la̍ kɔ̄l ndɔ̄ɔ̍, mbō pɔ̄lu̍l kɔ̄l, ō to̍sā lɛ̍ mī ŋ̄ sɔ̄la̍ pīɔ̍mndo̍ le̍.”

¹⁰Mɛ̄ɛ̍ Mɛ̄lɛ̄ka̍ chē nyɛ̄ wāŋnda̍ Ni̍ni̍vɛ̄ɛ̄ a̍ to̍sa̍ wo̍, mbo̍ sīnā māā a̍ nya̍ kpe̍e̍kpe̍i̍ ā ma᷄l yɔ̄ŋndā ndāla̍ wɔ̍ɔ̍ŋnda̍ŋ ma̍ mūli᷄ŋ. O̍ ko̍ŋ, mbo̍ māŋgālā kɔ̄l ndɔ̄ɔ̍ ō tūsi̍ lɛ̍ nda̍ dɛ̍nɛ̍ pa̍lāa̍ chōo̍ mɛ̄ɛ̍ ndu̍ o̍o̍ di̍mi̍ yɛ̍ le̍.