Read Southern Kisi Cho̍nā 4 Bible Online

Cho̍nā 4 - Southern Kisi bible

Cho̍nā 4

¹Kɛ̍ mi̍ Cho̍nā ta̍mbū kɔ̄l ta̍u̍ a̍ nyɛ̍ yɔ̍nu̍ŋ ndo̍, mbo̍ dūa̍a̍ŋ tu̍mbe̍.

²O̍ ko̍ŋ, mbo̍ pīɛ̄ī Mɛ̄lɛ̄ka̍ Ya̍a̍wɛ̄ɛ̄ āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, lɔ̍ɔ̍pa̍ bɛ̍ɛ̍ mi̍ ma᷅l lɛ̄ŋndē nīle̍ŋ nyɛ̄ ya̍ I̍ di̍mu̍l nu̍m ndo̍ ndu̍ yɔ̍nu᷅ŋ ho̍ō ni̍. Ndu̍yɛ̍, nyɛ̄ kōŋ bɛ̍ɛ̍ to̍sa̍ ni̍ mi̍ wa᷅ nyāānɔ᷄ŋndo̍ Ta̍a̍sī chi̍e̍e̍. Kāni̍ fu̍u̍le̍, I̍ si̍nā māā nūm wāna̍ ka̍a̍la̍ wāŋndā chīe̍e̍ya̍, ma̍ nɔ̍ nyīɛ̍ɛ̍ye̍ le̍ nda̍ wo̍ ŋ̄ chō ni̍. A̍ cho̍ wa᷅na̍ dɔ̍ɔ̍ŋ tu̍mbe̍ chɔ̍ chɔ̍ le̍. Wāna̍ īkɛ̄ndɔ̄ɔ̍ ŋ̄ chō ni̍. Le̍ te̍le̍ŋ o̍ te̍le̍ŋ ā chō ō bɛ̄ɛ̄ndīa̍ŋ le̍ kɔ̄l nūmndo̍ māŋgālāa̍ mā ma̍l wānā le̍ yɔ̄ŋ ndɔ̄ wɔ̍ɔ̍ŋndo̍, a̍ tu̍sī ndu̍ nyɛ̄ pālāā chōo̍ le̍.

³Le̍la̍ŋ chu̍a̍ yo̍o̍mū nūu̍ Mɛ̄lɛ̄ka̍ Ya̍a̍wɛ̄ɛ̄. Ō wā o̍ kɛ̍ndɛ̄ mī vi᷅, mbo̍ hīāū a̍ wāa̍ yōōmū.”

⁴Mi̍ Mɛ̄lɛ̄ka̍ Ya̍a̍wɛ̄ɛ̄ lo᷅ o̍ ko̍ŋ mbo̍ nyūnā ndu̍ āā, “Ā nɔ̄ pa̍ di̍ mā dɔ̄ɔ̍ŋ tu̍mbe̍?”

⁵O̍ ko̍ŋ kɔ̍ɔ̍lī, mi̍ Cho̍nā ku̍ā chi̍e̍e̍ le̍kɔ̍ɔ̍ bā pāa̍le̍ŋ lē chāŋ ndo̍. Mbo̍ tāŋgūl yɛ̄kpɔ̍ɔ̍ mbo̍ chāl lēbɛ̄ŋgu̍, ō wa̍ chūmndo̍ le̍ mī ndu̍ o̍o̍ che᷅ nyɛ᷄ wa̍ hūnɔ̄ɔ̄ yɔ̄nɔ᷄ŋ a̍ Ni̍ni̍vɛ̄ɛ̄ wo̍.

⁶O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mi̍ tɔ̄lɔ̄ɔ̄ pūm ō wūl nāa̍ Cho̍nā wa̍ ka̍ŋ i̍cha̍li̍ wa̍, le̍ mī tɔ̄lɔ̄ɔ̍ ho̍ō ndu̍ o̍o̍ yɔ̍ŋgu̍ ndu̍ wūndu̍le̍ŋ mī kɔ̄llo̍ ndu̍ o̍o̍ nyu̍lu̍l ndu̍. Ndu̍yɛ̍ mi̍ Cho̍nā na᷅ŋ kɔ̄l ta̍u̍ a̍ tɔ̄lɔ̄ɔ̍ ho̍ō.

⁷Kɛ̍ mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, mi̍ Mɛ̄lɛ̄ka̍ yɔ̄ŋ dɛ̄lōo̍ mbo̍ hu᷄ŋ di̍ō tɔ̄lɔ̄ɔ̍ ho̍ō tūmndo̍, mbo̍ wū.

⁸O̍ ko̍ŋ kɔ̍ɔ̍lī, mɛ̄ɛ̍ pāa̍le̍ŋ lē fūla̍, mi̍ Mɛ̄lɛ̄ka̍ tōsā mi̍ hāŋgu̍l tūū bɛ̄ndōo̍ ō fūlā bā pāa̍le̍ŋ lē chāŋ ndo̍. Mi̍ pāa̍le̍ŋ lē lūāā ndu̍ bōlle̍ŋ lɔ̄ɔ̍ pīla̍. Cho̍be̍ mī ndu̍ o̍o̍ wo̍u̍ kpa̍nɛ̍i̍, a̍ lɔ̄ɔ̄ pāa̍le̍ŋ lē wa̍ ndu̍ bōlle̍ŋ ndo̍. Pīɔ̍mndo̍ ndu̍ o̍o̍ hi̍o̍ū ni᷅ŋ yēēmā a̍ wāa̍ yōōmū. Mbo̍ dīmī, āā, “Ō wā i̍ kɛ̍ndɛ̄ mī vi᷅, mbo̍ hīāū a̍ wāa̍ yōōmū.”

⁹Kɛ̍ mi̍ Mɛ̄lɛ̄ka̍ nyūnā ndu̍ āā, “Ā nɔ̄ pa̍ di̍ mā dɔ̄ɔ̍ŋ tu̍mbe̍ le̍ mɛ̄ɛ̍ tɔ̄lɔ̄ɔ̍ ho̍ō vī yɛ̍?” Mi̍ Cho̍nā mu̍lī āā, “I̍ nɔ̍ di̍ mī dɔ̍ɔ̍ŋ tu̍mbe̍. I̍ ta̍mbu̍ kɔ̄l bɔ̄ɔ̍, I̍ ye̍e̍ma̍ mī vi᷅.”

¹⁰O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl ndu̍ āā, “Vɛ᷅ mī nyīɛ̍ɛ̍ye̍ bīī nu̍m le̍ wu̍ tɔ̄lɔ̄ɔ̍ ho̍ō ō vī wo̍? Ō cho̍ nu᷅m te̍ to̍sa̍ mbo̍ wūl te̍. O̍ nyūmnda̍ŋ mā pīlɛ̍ bɛ̄ŋgu̍ tɔ̄lɔ̄ɔ̍ ho̍ō ō vīl ni̍, mbo̍ wū o̍ nyūmnda̍ŋ mā pīlɛ̍ bɛ̄ŋgu̍.

¹¹Ni̍ni̍vɛ̄ɛ̄ yɛ̍ chi̍e̍e̍ bɛ̍ndōo̍ pīla̍ o̍ cho̍ ni̍. Chūāāmbūāā pɔ̄mbūa̍a̍ cho̍ Ni̍ni̍vɛ̄ɛ̄ ā si̍nā wɔ̍ nyɛ̄ o̍ nyɛ̄ le̍ wa̍ ā chō wāa̍la̍ŋ kɛ̄mɛ̄ a̍ bi̍dīi̍ŋ (120,000). O̍ ko̍ŋ kɔ̍ɔ̍lī chɔ̄lūa̍a̍ pīla̍ cho̍ vɛ̄lɛ̄ lo̍ŋ ni̍. Tē nyīɛ̍ɛ̍ye̍ bīī yɔ̄ nu̍m pɛ̍ le̍ tɔ̄lɔ̄ɔ̍ ho̍ō, ɔ̍ɔ̄ ni᷅ŋ Ni̍ni̍vɛ̄ɛ̄, bāā nyīɛ̍ɛ̍ye̍ ī bi̍ī ya̍ le̍ chi̍e̍e̍ bɛ̍ndū kōŋ te̍?”