Read Southern Kisi Nɔ̍mbāā 1 Bible Online

Nɔ̍mbāā 1 - Southern Kisi bible

Nɔ̍mbāā 1

¹Mɛ̄ɛ̍ I̍sɔ̄lūɛ̍i̍ya̍ fūla̍ I̍chi̍pī, ā tōsa̍ wɔ̄sīo̍o̍ ō pīlɛ̍, o̍ mūu̍ŋ ndɔ̄ɔ̍ o̍ pāa̍le̍ tāse̍le̍ŋ chōo̍ o̍ pāŋgi̍i̍ di̍i̍ŋ ndūɛ̍i̍ ni᷄ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ Mūu̍sē chu̍a̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ni᷄ŋ nāa̍ I̍sɔ̄lūɛ̍i̍ya̍ wa̍ o̍ dɔ̍ɔ̍ŋgɔ̍ɔ̍ o̍ po̍llo̍ ni᷄ŋ Sa̍a̍nāī wa̍. Mi̍ Mɛ̄lɛ̄ka̍ dīmūl Mūu̍sē āā,

²“I̍ ye̍e̍ma̍ mā chɔ̍m I̍sɔ̄lūɛ̍i̍ya̍ mɛ̄ɛ̍ nda̍ chō bōllē pīlɛ̍ yɛ̍, mā chɔ̍m nda̍ a̍ yu̍ŋgu̍la̍ŋ ndu̍yɛ̍ a̍ chīɛ̄īla̍ŋ kpɛ̍ kpɛ̍. Wānā pɔ̍nɔ̍ o̍ wānā pɔ̍nɔ̍ cho̍ I̍sɔ̄lūɛ̄ī,

³mbo̍ wā wɔ̍sīla̍ŋ bi̍di̍i̍ŋ kɛ̄lɛ̄ŋgāā hīōūwɔ̄ɔ̍ o̍ ko̍ŋ cho̍o̍, ndu̍yɛ̍ mbo̍ wā te̍le̍ŋ ku̍a̍ā o̍ chɔ̄ū, po̍o̍nyi̍a̍a̍ nda̍ dīōla̍ŋ kpo̍u̍ o̍ yāu̍ chōo̍.

⁴Hɛ̍li̍ bo̍līī lāyu̍ŋgu̍e̍i̍ o̍ yu̍ŋgu̍ o̍ yu̍ŋgu̍ chōo̍ I̍sɔ̄lūɛ̄ī le̍ mā māla̍ nu̍m wāŋnda̍ chɔ̄mndo̍.

⁵Bōlīī lāyu̍ŋgu̍i̍i̍ ke̍ŋ ndi̍ cho̍ he̍ī ni̍ a̍ yu̍ŋgu̍la̍ ndāla̍ yɛ̍ yɛ̍la̍ nda̍ chō bōlle̍ la̍ŋ. Ɛ̄li̍sɔ̄ɔ̄, po̍ Si̍ɛ̍dīɔ̄ɔ̄ wo̍, ndu̍ cho̍ yu̍ŋgu̍ Lūbɛ᷅ŋ ndo̍ bōlle̍ŋ ndo̍,

⁶a̍ Si̍ɛ̍lu̍mīɛ̄l, po̍ Sɔ̄lūīsi̍a̍dāī wo̍, o̍ cho̍ yu̍ŋgu̍ Si̍mīɔ̄ŋ ndo̍ bōlle̍ŋ ndo̍,

⁷a̍ Na̍a̍sīɔ̄ŋ, po̍ Āmi̍na̍da̍bī wo̍, o̍ cho̍ yu̍ŋgu̍ Chu̍dā wo̍ bōlle̍ŋ ndo̍,

⁸a̍ Nɛ̄ta̍a̍nīɛ̄ɛ̄l, po̍ Su̍a̍ā wo̍, o̍ cho̍ yu̍ŋgu̍ I̍sa̍a̍kā wo̍ bōlle̍ŋ ndo̍,

⁹a̍ Ɛ̄li̍a̍a̍bī, po̍ Hɛ̍lɔ̄ŋ ndo̍, o̍ cho̍ yu̍ŋgu̍ Sɛ̍bu̍lɔ̄ŋ ndo̍ bōlle̍ŋ ndo̍,

¹⁰a̍ bōlīī lāyu̍ŋgu̍i̍i̍ yu̍ŋgu̍la̍ pūa̍a̍ Chōo̍sīa̍a̍, Īlīsi̍a̍mā, po̍ Āmi̍hu̍dī wo̍, o̍ cho̍ yu̍ŋgu̍ E̍fi̍lūēm ndo̍ bōlle̍ŋ ndo̍, a̍ Ka̍ma̍līɛ̄l, po̍ Pɛ̄da̍a̍sɔ̄ wo̍, o̍ cho̍ yu̍ŋgu̍ Mānāa̍sē wo̍ bōlle̍ŋ ndo̍,

¹¹a̍ A̍bi̍dāŋ, po̍ Ki̍di̍ɔ̍nī wo̍, o̍ cho̍ yu̍ŋgu̍ Bɛ̍ŋnja̍mīŋ ndo̍ bōlle̍ŋ ndo̍,

¹²a̍ Āhi̍ɛ̍ɛ̍sā, po̍ Āmi̍si̍a̍dāī wo̍, o̍ cho̍ yu̍ŋgu̍ Da᷅ŋ ndo̍ bōlle̍ŋ ndo̍,

¹³a̍ Pa̍kīɛ̄l, po̍ O̍chi̍lūāŋ ndo̍, o̍ cho̍ yu̍ŋgu̍ A̍sīɛ̄ɛ̄ wo̍ bōlle̍ŋ ndo̍,

¹⁴a̍ Ɛ̄li̍a̍a̍sa̍fī, po̍ Du̍ɛ̄l wo̍, o̍ cho̍ yu̍ŋgu̍ Ka̍a̍dī wo̍ bōlle̍ŋ ndo̍,

¹⁵a̍ A̍hi̍lūā, po̍ Ɛ̍nāŋ ndo̍, o̍ cho̍ yu̍ŋgu̍ Nāfi̍ta̍lī wo̍ bōlle̍ŋ ndo̍.”

¹⁶Pūa̍a̍ ha̍ā nda̍ wa̍ ā hɛ̄līāā ni̍ le̍ mā wa̍ hɔ̄ltē I̍sɔ̄lūɛ̍i̍ya̍ kpo̍u̍, ndu̍yɛ̍ le̍ mā wa̍ yu̍ŋgu̍la̍ fi̍nyāā ndāā ma̍māa̍ chīla̍ŋ. Nda̍ wa̍ bōlīī lāyu̍ŋgu̍e̍i̍ o̍ yu̍ŋgu̍la̍ I̍sɔ̄lūɛ̍i̍la̍ŋ chōo̍ ni̍.

¹⁷O̍ ko̍ŋ kɔ̍ɔ̍lī, Mūu̍sē ni̍, a̍ E̍lɔ̄ŋ, a̍ bōlīī lāyu̍ŋgu̍i̍i̍ wa̍ he̍ī ī hɛ̄līāā ve̍,

¹⁸ma̍ vēēlū I̍sɔ̄lūɛ̍i̍ya̍ kpo̍u̍ na̍a̍ pi᷅lɛ̍ o̍ pāa̍le̍ tāse̍le̍ le̍ŋ chōo̍ o̍ pāŋgi̍i̍ di̍i̍ŋ ndūɛ̄ī kēŋ ni᷄ŋ. Ndu̍yɛ̍ ma̍ pōōnyīāā nda̍ dīōla̍ŋ a̍ yu̍ŋgu̍la̍ nda̍ fūla̍ chōo̍ la̍ŋ ndu̍yɛ̍ a̍ chīɛ̄īla̍ŋ kpɛ̍ kpɛ̍. Wānā pɔ̍nɔ̍ o̍ wānā pɔ̍nɔ̍ wa̍ I̍sɔ̄lūɛ̄ī mbo̍ wā wɔ̄sīla̍ŋ bi̍di̍i̍ŋ kɛ̄lɛ̄ŋgāā hīōūwɔ̄ɔ̍ o̍ ko̍ŋ chōo̍, ma̍ pōōnyīāā nda̍ dīōla̍ŋ kpo̍u̍ a̍ pi̍lɛ̍ŋ pi̍lɛ̍ŋ nda̍.

¹⁹Mi̍ Mūu̍sē o̍ po̍o̍nyīāā wāŋnda̍ dīōla̍ŋ le̍nde̍ kpɛ̍ kpɛ̍ nāa̍ nda̍ wa̍ o̍ po̍llo̍ ni᷄ŋ Sa̍a̍nāī wa̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ le̍ tōsāa̍ yɛ̍.

²⁰Wāŋ pīāāndūa̍a̍ wa̍ wɔ̄sīla̍ŋ bi̍di̍i̍ŋ kɛ̄lɛ̄ŋgāā hīōūwɔ̄ɔ̍ o̍ ko̍ŋ chōo̍, ndu̍yɛ̍ ma̍ wā te̍le̍ŋ ku̍a̍ā o̍ chɔ̄ū wa̍, ma̍ pōōnyīāā nda̍ dīōla̍ŋ ā pīlɛ̍ŋ pi̍lɛ̍ŋ nda̍ a̍ yu̍ŋgu̍la̍ nda̍ fūla̍ chōo̍ la̍ŋ, ndu̍yɛ̍ a̍ chīɛ̄īla̍ŋ, kāndɔ᷄ŋndo̍ a̍ yu̍ŋgu̍ Lūbɛ᷅ŋ ndo̍, po̍ tāse̍ Che̍kɔ̍pū wo̍, mbo̍ kūā a̍ yu̍ŋgu̍la̍ŋ lā pīlɛ̍ la̍ŋ. Wāŋ pīāāndūāā kāŋ nda̍ cho̍ ha̍ā bōllē pīlɛ̍ o̍ yu̍ŋgu̍ o̍ yu̍ŋgu̍ cho̍o̍ ni̍. Yūŋgu̍ Lūbɛ᷅ŋ ndo̍ wāa̍la̍ŋ be̍le̍-hi̍ɔ̍ɔ̍lu̍ a̍ lā ŋɔ᷄mpu᷅m a̍ kɛ̄mɔ̄ɔ̍ lē ŋūɛ̍ɛ̍nu̍ (46,500). Yu̍ŋgu̍ Si̍mīɔ̄ŋ ndo̍ wāa̍la̍ŋ be̍le̍-ŋu̍ɛ̍ɛ̍nu̍ a̍ lā ŋɔ̍ma̍hīɔ̍ɔ̍lu̍ a̍ kɛ̄mɔ̄ɔ̍ lē yāa̍ (59,300). Yu̍ŋgu̍ Ka̍a̍dī wo̍ wāa̍la̍ŋ be̍le̍-hi̍ɔ̍ɔ̍lu̍ a̍ lā ŋūɛ̍ɛ̍nu̍ a̍ kɛ̄mɔ̄ɔ̍ lē ŋɔ᷄mpu᷅m a̍ be̍le̍-ŋu̍ɛ̍ɛ̍nu̍ (45,650). Yu̍ŋgu̍ Chu̍dā wo̍ wāa̍la̍ŋ be̍le̍-ŋɔ̍mmɛ̍ū a̍ lā hīɔ̍ɔ̍lu̍, a̍ kɛ̄mɔ̄ɔ̍ lē ŋɔ᷄mpu᷅m (74,600). Yu̍ŋgu̍ I̍sa̍a̍kā wo̍ wāa̍la̍ŋ be̍le̍-ŋu̍ɛ̍ɛ̍nu̍ a̍ lā hīɔ̍ɔ̍lu̍ a̍ kɛ̄mɔ̄ɔ̍ lē hīɔ̍ɔ̍lu̍ (54,400). Yu̍ŋgu̍ Sɛ̍bu̍lɔ̄ŋ ndo̍ wāa̍l(...)

⁴⁷Kɛ̍ pūa̍a̍ fu̍la̍ o̍ yu̍ŋgu̍ Li̍va̍īyo̍ chōo̍ ki̍nɛ̍i̍ ya̍, a̍ chīɛ̄īlā ndāla̍ŋ ā chɔ᷅m ka̍ŋ te̍.

⁴⁸Kāni̍ fo̍ndōle̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl Mūu̍sē āā,

⁴⁹“Tē a̍ wa̍ wāŋnda̍ chɔ̄mndo̍ pɛ̍, yu̍ŋgu̍ Li̍va̍īyo̍ ndu̍ chɔ᷅m ko̍ŋ te̍. Nda̍ ā wa᷅ ā chɔ̄māā a̍ I̍sɔ̄lūɛ̍i̍ya̍a̍ tu̍a̍a̍ lātūlu̍ le̍.

⁵⁰Nda̍ nda̍, tɛ̍ndi̍i̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍, ā nɔ̄ mā kɛ̍si̍ nda̍ tɛ̍ndīi̍ ko̍ŋ chīla̍ŋ, ndu̍yɛ̍ a̍ wōlɔ̄ɔ̄lā tɛ̍ndīi̍ ko̍ŋ. Bā o̍ bā nya̍ wa̍ kɔ̄la̍ŋ pɛ̍, nda̍ nɔ̍ ni̍ mā chūa̍ tɛ̍ndīi̍ ko̍ŋ a̍ wōlɔ̄ɔ̄lā ndɔ̄la̍ŋ, mā kūɛ̄ a̍ la̍ŋ le̍ mā kɔ̍ ta̍ŋgūl ndu̍ nāa̍ nya̍ nɔ̄ le̍ dɔ̍ɔ̍ŋgɔ̍ɔ̍ kīōlɔ̄ɔ̍ wa̍. Ndu̍yɛ̍ nda̍ pīlɛ̍ kpe̍ nɔ̍ ni̍ mā tōsa̍ wa̍llo̍ o̍ tɛ̍ndīi̍ ko̍ŋ ni᷄ŋ, ndu̍yɛ̍ ā nɔ̄ mā tāŋgu̍l tɛ̍ndīi̍la̍ ndāla̍ mālɔ̄ la̍ŋ tɛ̍ndīi̍ ko̍ŋ ō bālāā.

⁵¹Tē lā wa̍ fāŋa᷄ŋndo̍ nāa̍ nya̍ chō wa̍ pɛ̍ mī lā wa̍ hīōūwɔ̄ɔ̍ lāchī, nda̍ nɔ̍ ni̍ mā chūa̍ wōlɔ̄ɔ̄lā tɛ̍ndīi̍ ko̍ŋ mā kɔ̍ mi̍ŋgī ndu̍ tāŋgūl nāa̍ nya̍ nɔ̄ le̍ dɔ̍ɔ̍ŋgɔ̍ɔ̍ kīōlɔ̄ɔ̍ wa̍. Ō fūla̍ o̍ nda̍ kɔ̄ɔ̄lī, tē wānā o̍ wānā che᷅le̍ŋ ō sɔ̄ɔ̄ŋgu̍u̍ o̍ tɛ̍ndīi̍ ko̍ŋ īkɛ̄i̍ pɛ̍, wānā ko̍ŋ lā nɔ̄ mī lā dīī ndu̍.

⁵²Bā o̍ bā nya̍ kēlū dɔ̍ɔ̍ŋgɔ̍ɔ̍ pɛ̍, yu̍ŋgu̍la̍ I̍sɔ̄lūɛ̍i̍la̍ŋ lā pīlɛ̍ la̍ŋ lā nɔ̄ mī lā sɔ̄la̍ fo̍ndāŋnda̍ŋ kpɛ̍ kpɛ̍, mī yu̍ŋgu̍ o̍ yu̍ŋgu̍ o̍ ta̍ŋgu̍l o̍ fo̍ndāa̍ o̍ ndɔ̄ɔ̍ a̍ bōlīī lāchīɛ̄īye̍ kpɛ̍ kpɛ̍, ndu̍yɛ̍ mī yu̍ŋgu̍ o̍ yu̍ŋgu̍ nɔ̍ bēēndi̍ɛ̍ī si̍m le̍ yu̍ŋgu̍ ndāa̍ wo̍.

⁵³Kɛ̍ wānāa̍ fu̍la̍ o̍ yu̍ŋgu̍ Li̍va̍īyo̍ chōo̍ wa̍ nda̍, ā nɔ̄ mā tāŋgu̍l tɛ̍ndīi̍la̍ ndāla̍ŋ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ bālɔ̄ɔ̍ chɛ̍ chɛ̍, le̍ ndu̍ māndāa̍. Ko̍ŋ to̍sā ni̍ wānā o̍ wānā che᷅le̍ŋ ō sɔ̍ɔ̍ŋgūū tɛ̍ndīi̍ ko̍ŋ īkɛ̄i̍, mbō tōsa̍ mī ya̍ Mɛ̍lɛ̄ka̍ dɔ̄ɔ̄nu᷄ŋ tu̍mbe̍ a̍ nya̍ I̍sɔ̄lūɛ̍i̍ya̍ mī tu̍si̍ nya̍ nyɛ̄ pālāa̍ chōo̍ le̍.”

⁵⁴O̍ ko̍ŋ, mi̍ I̍sɔ̄lūɛ̍i̍ya̍ ā tōsā nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē.