Read Southern Kisi Nɔ̍mbāā 10 Bible Online

Nɔ̍mbāā 10 - Southern Kisi bible

Nɔ̍mbāā 10

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

²“Bɛ̍ɛ̍ndi̍a̍a̍ ka̍ni̍i̍ hu̍mbūe̍i̍ a̍ ha̍mɛ̄i̍yo̍ mā to̍o̍si̍a̍a̍ pūtɛ̍nɛ̍i̍la̍ŋ lā tīɔ̍ɔ̍ŋ a̍ ndi̍. Pūtɛ̍nɛ̍i̍la̍ŋ nda᷅ŋ la̍ŋ la̍ cho̍ wā le̍ wāŋnda̍ I̍sɔ̄lūɛ̍i̍ chūūŋgi̍a̍a̍ nāa̍ pi᷅lɛ̍ ni̍, ndu̍yɛ̍ a̍ le̍ nda̍ dīmūllo̍ le̍ mā pūūsi̍a̍a̍ dɔ̍ɔ̍ŋgɔ̍ɔ̍ mā hīōū lāchī a̍ kɔ̄la̍ŋ.

³Pūtɛ̍nɛ̍i̍la̍ŋ nda᷅ŋ le̍ te̍le̍ŋ o̍ te̍le̍ŋ, tē la̍ hɔ̍ŋnu̍ŋ la̍ŋ ti̍ɔ̍ɔ̍ŋ dīōm pīlɛ̍ pɛ̍, wāŋnda̍ I̍sɔ̄lūɛ̄ī kpo̍u̍ ā nɔ̄ mā chūūŋgi̍āŋ nāa̍ ŋ̄ chō wā o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ dīō wa̍.

⁴Kɛ̄ tē ō hɔ̄ŋnu̍ŋ o̍ pi᷅lɛ̍ pɛ̍, mɛ̄ɛ̍ wāŋ bɛ̄ndūa̍a̍ a̍ cho̍ bōlīī lāyu̍ŋgu̍e̍i̍ ya̍ nda̍ ko̍ni̍ nɔ̍ ni̍ mā chūūŋgi̍āŋ nāa̍ ŋ̄ cho̍ wa̍.

⁵Ndu̍yɛ̍, tē ā hɔ᷄ŋ pūtɛ̍nɛ̍i̍la̍ŋ nda᷅ŋ lēpīlɛ̍ŋ pi̍lɛ̍ŋ pɛ̍, mɛ̄ɛ̍ chɔ̄mndo̍ cho̍ ko̍ŋ ni̍ māā wāŋnda̍ I̍sɔ̄lūɛ̄ī a̍ nɔ̍ mā pūūsi̍a̍a̍ dɔ̍ɔ̍ŋgɔ̍ɔ̍ mā hīōū lāchī a̍ kɔ̄la̍ŋ. Tē ā hɔ᷄ŋ nda̍ŋ hɔ̄ŋɔ̄ɔ̄ tāso̍o̍ pɛ̍, yu̍ŋgu̍la̍ cho̍ o̍ tɛ̍ndīi̍yo̍ bā pāa̍le̍ŋ lā chāŋndo̍ la̍ŋ ā nɔ̄ mā pūūsi̍a̍a̍ tɛ̍ndīi̍la̍ ndāla̍ŋ, mā fūla̍ mā kāndu̍ kɔ̄la̍ŋ. O̍ ko̍ŋ kɔ̍ɔ̍lī, tē ā hɔ᷄ŋ nda̍ŋ hɔ̄ŋɔ̄ɔ̄ di̍i̍ŋ ndɔ̄ɔ̍ pɛ̍, yu̍ŋgu̍la̍ cho̍ o̍ tɛ̍ndīi̍yo̍ bā tōūwo̍ la̍ŋ, ā nɔ̄ mā pūūsi̍a̍a̍ tɛ̍ndīi̍la̍ ndāla̍ŋ mā fūla̍ mā tōl yu̍ŋgu̍la̍ tāse̍le̍ fu̍la̍ la̍ŋ kɔ̄ɔ̄lī.

⁶

⁷Kɛ̍ tē ō wa̍ le̍ wāŋnda̍ chūūŋgi̍a̍a̍ nāa̍ pi᷅lɛ̍ pɛ̍, lā nɔ̄ mī lā hɔ᷄ŋ pūtɛ̍nɛ̍i̍la̍ŋ nda᷅ŋ yɔ̍ŋge̍le̍ŋ.

⁸Ndu̍yɛ̍ wānāā sōlīāā lāsa̍lāa̍ fu̍la̍ o̍ pūlāle̍ E̍lɔ̄ŋnde̍ŋ chōo̍ wa̍, nda̍ ko̍ni̍ nɔ̍ ni̍ mā hɔ᷄ŋ Pūtɛ̍nɛ̍i̍la̍ŋ nda᷅ŋ. Sāwa̍ cho̍ le̍ fɛ̍ɛ̍ŋ a̍ fɛ̍ɛ̍ŋ a̍ pūtɛ̍nɛ̍i̍la̍ŋ nda᷅ŋ o̍kɔ̄ɔ̄, mbo̍ wā le̍ nya̍, ndu̍yɛ̍ a̍ yu̍ŋgu̍la̍ nyāla̍ŋ mbō kūɛ̄ a̍ lāchī kɛ᷅ wo̍ ndu̍ cho̍ ko̍ŋ ni̍.

⁹“Tē ō wa̍ pɛ̍ mī ya̍a̍mɔ̍ɔ̍wa̍a̍ nyāa̍ ā hu᷄ŋ sa̍ā nya̍ a̍ sɔ̍ŋgɔ̄ɔ̍ o̍ lɛ̄ŋndē nyāle̍ŋ ni᷄ŋ, mī lā wa̍ sɔ̍ŋgɔ̍ɔ̍ a̍ nda̍ pɛ̍, lā hɔ᷄ŋ pu̍tɛ̍nɛ̍i̍la̍ŋ nda᷅ŋ hɔ̄ŋɔ̄ɔ̄ chɔ̄ūwo̍. Ya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ tē I̍ tu̍e̍ī dɔ̍ɔ̍ la̍ŋ pɛ̍, I̍ ba̍ŋa̍ nya̍ ya̍a̍mɔ̍ɔ̍wa̍a̍ nyāā ka̍ŋ o̍ bā.

¹⁰Ndu̍yɛ̍, o̍ chūūŋgi̍āŋndā nyāla̍ kɔ̄l kɛ̄ndɛ̄la̍ŋ chōo̍ ni̍, a̍ bɔ̄ŋa᷅ŋndā nyāla̍ pāŋgi̍i̍ sɛ̍nɛ̄īla̍ŋ, ndu̍yɛ̍ a̍ bɔ̄ŋa᷅ŋndā nyāla̍ che᷅le̍ŋ nda̍ŋ, tē lā wa̍ sa̍lālā nyāla̍ lu̍a̍māā la̍ŋ, a̍ sa̍lālā nyāla̍ kɔ̄l nyūlūla̍ŋ sōlīo̍o̍ a̍ te̍le̍ŋnda̍ la̍ŋ pɛ̍, lā nɔ̄ mī lā hɔ᷄ŋ pūtɛ̍nɛ̍i̍la̍ŋ nda᷅ŋ. Pūtɛ̍nɛ̍i̍la̍ŋ nda᷅ŋ lā chō māchūāā le̍ ya̍ Mɛ̍lɛ̄ka̍ yīyāla᷄ŋndo̍ a̍ nya̍ o̍kɔ̄ɔ̄. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.”

¹¹O̍ ko̍ŋ kɔ̍ɔ̍lī, mi̍ yu̍mbu̍ yu̍mbu̍ i̍kpu̍ŋgbāa̍ ō fāŋa᷄ŋ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ chōo̍, mbo̍ bīī kɔ̄la̍ŋ I̍sɔ̄lūɛ̍i̍ya̍ lāchī le̍ nda̍ nɛ̄īyo̍ chɔ̄mndo̍. O̍ ko̍ŋ, mi̍ I̍sɔ̄lūɛ̍i̍ya̍ ā pūūsīāā tɛ̍ndīi̍la̍ ndāla̍ŋ ma̍ fāŋa᷄ŋ nāa̍ nda̍ wa̍ ka̍ŋ o̍ Pēmbīī Sa̍a̍nāīve̍ wa̍, ma̍ tūāl yu̍mbu̍ yu̍mbu̍ ko̍ŋ kɔ̄ɔ̄lī. Mi̍ yu̍mbu̍ yu̍mbu̍ ko̍ŋ ō lō bālɔ̄ɔ̍ a̍ nda̍ o̍ fo̍ndāŋ ndā yɛ̍ yɛ̍la̍ŋ ha̍a̍a̍ mbo̍ hūŋ a̍ nda̍ o̍ lɛ̄ŋndē po̍lte̍ŋ Pa̍lūāŋ. O̍ ko̍ŋ, mbo̍ sīm a̍ nda̍ lo̍ŋ. Mālɔ̄ɔ̄ I̍sɔ̄lūɛ̍i̍ya̍ ā ma᷄l I̍chi̍pī wo̍, wɔ̄sī dīi̍ŋ ndɔ̄ɔ̍ o̍ pāŋgi̍i̍ di̍i̍ŋ ndūɛ̍i̍ ni᷄ŋ, mālɔ̄ bi̍di̍i̍ŋ, pāa̍le̍ le̍ŋ yu̍mbu̍ yu̍mbo̍o̍ ho̍ō o̍ fāŋa̍ŋ o̍ tɛ̍ndīi̍yo̍ chōo̍ ni̍, mbo̍ kāndū kɔ̄la̍ŋ I̍sɔ̄lūɛ̍i̍ya̍ lāchī.

¹²

¹³Ndu̍yɛ̍ mālɔ̄ɔ̄ ndāa̍ I̍chi̍pī, te̍le̍ŋ tāso̍o̍ o̍ wa̍ ko̍ŋ ni̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nda̍ sa̍na̍a̍ a̍ Mūu̍sē le̍ mā ma᷄l nāa̍ nda̍ wa̍ īchāli̍ wa̍ mā kāndu̍ kɔ̄la̍ŋ.

¹⁴Ndu̍yɛ̍ yu̍ŋgu̍ Chu̍dā wo̍ a̍ yu̍ŋgu̍la̍ nda̍ chīɛ̄ɛ̄li̍āŋnda̍ŋ, la̍ŋ la̍ yɔ̍nūŋ ni̍ māā yu̍ŋgu̍ I̍sa̍a̍kā wo̍, a̍ yu̍ŋgu̍ Sɛ̍bu̍lɔ̄ŋndo̍, nda̍ wa̍ wānāā tāsi̍a̍a̍ le̍ fūlāa̍ ni̍ o̍ bēēndi̍ɛ̍ī yu̍ŋgu̍la̍ ndāla̍ŋ bɛ̄ŋgu̍, a̍ chīɛ̄īlā ndāla̍ŋ le̍nde̍ kpɛ̍ kpɛ̍. Na̍a̍sīɔ̄ŋ, po̍ Āmi̍na̍da̍bī wo̍, ndu̍ wa̍ yu̍ŋgu̍ Chu̍dā wo̍ bōlle̍ŋ ni̍. Nɛ̄ta̍a̍nīɛ̄ɛ̄l, po̍ Su̍a̍ā wo̍, ndu̍ wa᷅ yu̍ŋgu̍ I̍sa̍a̍kā wo̍ bo̍lle̍ŋ ni̍. Ɛ̄li̍a̍a̍bī, po̍ Hɛ̍lɔ̄ŋ ndo̍, ndu̍ wa̍ yu̍ŋgu̍ Sɛ̍bu̍lɔ̄ŋ ndo̍ bōlle̍ŋ ni̍.

¹⁵

¹⁶

¹⁷Mɛ̄ɛ̍ yu̍ŋgu̍la̍ŋ nda᷅ŋ lā fūla̍, o̍ ko̍ŋ, ma̍ pūūsīāā tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍. Mi̍ yu̍ŋgu̍ Ka̍a̍sīɔ̄ŋ ndo̍, a̍ yu̍ŋgu̍ Mɛ̍lu̍a̍lī wo̍, ā nda̍ a̍a̍ nɔ̍ le̍ kɔ̄la̍ŋ a̍ tɛ̍ndīi̍yo̍ ho̍ō wa̍, ma̍ chūā tɛ̍ndīi̍yo̍, nda̍ bɛ̍ɛ̍ ma̍ fūlā ma̍ bīī kɔ̄la̍ŋ.

¹⁸O̍ ko̍ŋ kɔ̍ɔ̍lī, yu̍ŋgu̍ Lūbɛ᷅ŋ ndo̍, a̍ yu̍ŋgu̍la̍ nda̍ chīɛ̄ɛ̄li̍āŋnda̍ŋ, la̍ŋ la̍ yɔ̍nūŋ ni̍ māā, yu̍ŋgu̍ Si̍mīɔ̄ŋ ndo̍, a̍ yu̍ŋgu̍ Ka̍a̍dī wo̍, mi̍ nda̍ fūlā vɛ̄lɛ̄ o̍ bɛ̄ɛ̄ndīāā yu̍ŋgu̍la̍ ndāla̍ŋ bɛ̄ŋgu̍ a̍ chīɛ̄īlā ndāla̍ŋ le̍nde̍ kpɛ̍ kpɛ̍, ma̍ bīī kɔ̄la̍ŋ. Ɛ̄li̍sɔ̄ɔ̄, po̍ Si̍ɛ̍dīɔ̄ɔ̄ wo̍, ndu̍ wa̍ yu̍ŋgu̍ Lūbɛ᷅ŋ ndo̍ bōlle̍ŋ ni̍. Si̍ɛ̍lu̍mīɛ̄l, po̍ Sɔ̄lūīsi̍a̍dāī wo̍, ndu̍ wa̍ yu̍ŋgu̍ Si̍mīɔ̄ŋ ndo̍ bōlle̍ŋ ni̍. I̍līa̍a̍sa̍fī, po̍ Du̍ɛ̄l wo̍, ndu̍ wa̍ yu̍ŋgu̍ Ka̍a̍dī wo̍ bōlle̍ŋ ni̍.

¹⁹

²⁰

²¹O̍ ko̍ŋ kɔ̍ɔ̍lī, mi̍ yu̍ŋgu̍ Ko̍ha̍tī wo̍, a̍ wa̍ ā yūlāā le̍ nyɛ᷄m wa̍ ŋ̄ yɔ̄ŋa᷄ŋ o̍ Mɛ̄lɛ̄ka̍ lo̍ wo̍ŋ chūa̍a̍ wa̍, ma̍ chūā nyɛ̄m mu᷅ŋ, ma̍ fūlā ma̍ tūāl yu̍ŋgu̍la̍ŋ lā pīlɛ̍la̍ŋ kɔ̄ɔ̄lī. Ndu̍yɛ̍ bā o̍ bā dɔ̍ɔ̍ŋgɔ̍ɔ̍ ndu̍ o̍o̍ nɔ̍ le̍ kīōlɔ᷄ŋndo̍ pɛ̍, lɔ̍ɔ̍ pa̍ mī wānāā nda̍ a̍a̍ ku̍ā a̍ nyɛ̄m mu᷅ŋ nda̍ nda̍ a̍a̍ fu̍u̍lu̍u̍ lo̍ŋ, tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ndu̍ o̍o̍ nɔ̍ fɛ̍lɛ̍ŋ mbō wa̍ ō tāŋgūlāā.

²²O̍ ko̍ŋ kɔ̍ɔ̍lī, mi̍ yu̍ŋgu̍ E̍fi̍lūēm ndo̍, a̍ yu̍ŋgu̍la̍ nda̍ chīɛ̄ɛ̄li̍āŋnda̍ŋ, la̍ŋ la̍ yɔ̍nūŋ ni̍ māā, yu̍ŋgu̍ Mānāa̍sē wo̍, a̍ yu̍ŋgu̍ Bɛ̍ŋnja̍mīŋndo̍, mi̍ nda̍ fūlā vɛ̄lɛ̄ o̍ bēēndi̍ɛ̍ī yu̍ŋgu̍la̍ ndāla̍ŋ bɛ̄ŋgu̍ a̍ chīɛ̄īlā ndāla̍ŋ le̍nde̍ kpɛ̍ kpɛ̍, ma̍ tūāl ha̍ā kɔ̄ɔ̄lī. Īlīsi̍a̍mā, po̍ Āmi̍hu̍dī wo̍, ndu̍ wa̍ yu̍ŋgu̍ E̍fi̍lūēm ndo̍ bo̍lle̍ŋ ni̍. Ka̍ma̍līɛ̄l, po̍ Pɛ̄da̍a̍sɔ̄ wo̍, ndu̍ wa̍ yu̍ŋgu̍ Mānāa̍sē wo̍ bōlle̍ŋ ni̍. A̍bi̍dāŋ, po̍ Ki̍di̍ɔ̍nī wo̍, ndu̍ wa̍ yu̍ŋgu̍ Bɛ̍ŋnja̍mīŋ ndo̍ bōlle̍ŋ ni̍.

²³

²⁴

²⁵O̍ ko̍ŋ kɔ̍ɔ̍lī, yu̍ŋgu̍la̍ wa̍ kɔ̄ɔ̄lī kpɔ̍ŋ, le̍ I̍sɔ̄lūɛ̍i̍ya̍ māndāa̍ a̍ mākɔ̄ɔ̄ la̍ŋ, yu̍ŋgu̍ Da᷅ŋ ndo̍, a̍ yu̍ŋgu̍la̍ nda̍ chīɛ̄ɛ̄li̍āŋnda̍ŋ, la̍ŋ la̍ yɔ̍nūŋ ni̍ māā, yu̍ŋgu̍ A̍sīɛ̄ɛ̄ wo̍, a̍ yu̍ŋgu̍ Nāfi̍ta̍lī wo̍, mi̍ nda̍ mɛ̄ɛ̄lu̍ ni̍ko̍ fu̍lā o̍ bēēndi̍ɛ̍ī yu̍ŋgu̍la̍ ndāla̍ŋ bɛ̄ŋgu̍ a̍ chīɛ̄īlā ndāla̍ŋ le̍nde̍ kpɛ̍ kpɛ̍, ma̍ tūāl yu̍ŋgu̍la̍ŋ lā pīlɛ̍ la̍ŋ kɔ̄ɔ̄lī. Āhi̍ɛ̍ɛ̍sā, po̍ Āmi̍si̍a̍dāī wo̍, ndu̍ wa̍ yu̍ŋgu̍ Da᷅ŋ ndo̍ bōlle̍ŋ ni̍. Pa̍kīɛ̄l, po̍ O̍chi̍lūāŋ ndo̍, ndu̍ wa̍ yu̍ŋgu̍ A̍sīɛ̄ɛ̄ wo̍ bōlle̍ŋ ni̍. A̍hi̍lūā, po̍ Ɛ̍nāŋ ndo̍, ndu̍ wa̍ yu̍ŋgu̍ Nāfi̍ta̍lī yo̍ bōlle̍ŋ ni̍.

²⁶

²⁷

²⁸Mɛ̄ɛ̍ te̍le̍ŋ o̍ te̍le̍ŋ te̍ I̍sɔ̄lūɛ̍i̍ya̍ nda̍ a̍a̍ pu̍u̍si̍a̍a̍ dɔ̍ɔ̍ŋgɔ̍ɔ̍ pɛ̍, mā wa̍ hīōūwɔ̄ɔ̍ lāchī a̍ kɔ̄la̍ŋ, nu̍a̍ā nda̍ a̍a̍ ku̍ā a̍ ku̍ndāla̍ŋ kpɛ̍ kpɛ̍ ni̍.

²⁹Pāa̍le̍ pi᷅lɛ̍, mi̍ Mūu̍sē di̍mūl Ho̍ba̍bī le̍fū ndɔ̄, ndu̍ yɔ̍nūŋ ni̍ māā Chɛ̍tu̍lō Mīdīāna̍tīi̍nɔ̍ po̍ ndɔ̄ɔ̍, āā, “Ŋ̄ chō kɔ̄la̍ŋ o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄ o̍ chu̍e̍l na̍a̍ būŋgɛ̄i̍ le̍ na̍a̍ kīo̍o̍ le̍ŋ ni᷄ŋ. Le̍la̍ŋ ŋ̄ kɔ̄ŋnu᷅ŋ na̍a̍ nya̍ā, ŋ̄ chō nu̍m bīyɔ̄ɔ̄ nyɛ̄ kɛ̄ndɛ̍ī. Mɛ̄lɛ̄ka̍ Ya̍a̍wɛ̄ɛ̄ o̍ chu̍e̍l na̍a̍ būŋgɛ̄i̍ le̍ na̍a̍ nyɛ̄m kɛ̄ndɔ᷄ŋ kīo̍o̍ o̍ lɛ̄ŋndē le̍ŋ ni᷄ŋ.”

³⁰Kɛ̍ mi̍ Ho̍ba̍bī o̍ di̍mūl ndu̍ āā, “Sāko̍, I̍ cho̍ la̍kɔ̍ le̍. I̍ cho̍ mīīŋgɔ᷄ŋ o̍ lɛ̄ŋndē nīle̍ŋ ni᷄ŋ o̍ wānāā nīa̍a̍ lo̍.”

³¹Kɛ̍ mi̍ Mūu̍sē nyɔ̍ɔ̍lū ndu̍ āā, “Yāndi̍i̍ ma᷅l na̍a̍ le̍, ŋ̄ kɔ̄ŋnu᷅ŋ na̍a̍ nya̍ā. Kāni̍ fo̍ndōle̍, nūm sīnā a̍ lɛ̄ŋndē po̍lte̍ŋ o̍kɔ̄ɔ̄, ndu̍yɛ̍ ā sīnā vɛ̍lɛ̄ nāa̍ na̍a̍ ŋ̄ kīālū dɔ̍ɔ̍ŋgɔ̍la̍ŋ o̍ lɛ̄ŋndē po̍lte̍ŋ ni᷄ŋ nda̍. Le̍la̍ŋ ŋ̄ kɔ̄ŋnu᷅ŋ, mī nūm wa̍ na̍a̍ to᷄lta̍ŋ chɔ̄mndo̍.

³²Tē ŋ̄ kūɛ̄ na̍a̍ nya̍ā pɛ̍, nyɛ̄ o̍ nyɛ̄ kɛ̄ndɛ̄ Mɛ̄lɛ̄ka̍ Ya̍a̍wɛ̄ɛ̄ o̍ kɔ̍ ke᷅ na̍a̍ o̍ lɛ̄ŋndē lēŋ ni᷄ŋ pɛ̍, ŋ̄ pīɔ̄ūvi̍āŋ na̍a̍ nya̍ā.”

³³Mɛ̄ɛ̍ nu̍a̍ā wāŋnda̍ I̍sɔ̄lūɛ̄ī a̍ fa̍ŋa̍ŋ o̍ Pēmbīī Sa̍a̍nāīve̍ ni̍, pēmbīi̍ Mɛ̄lɛ̄ka̍ Ya̍a̍wɛ̄ɛ̄ ve̍, ma̍ bīī kɔ̄la̍ŋ. Ā kūɛ̄ le̍ pālɛ̍i̍ ī yāa̍ ma̍lāŋ nda̍ pɛ̄ŋgī. Ndu̍yɛ̍ kɔ̍fu̍ si̍m le̍ kpe̍ma̍ Mɛ̄lɛ̄ka̍a̍ Ya̍a̍wɛ̄ɛ̄ wo̍ wo̍, ndu̍ wa̍ nda̍ lāchī ni̍, le̍ mbō chɔ᷄m nda̍ nāa̍ nda̍ a̍a̍ nɔ̄ le̍ dɔ̍ɔ̍ŋgɔ̍ɔ̍ kīōlɔ̄ɔ̍ mā pɛ̄ŋgi̍ wa̍.

³⁴Ndu̍yɛ̍ te̍le̍ŋ o̍ te̍le̍ŋ nda̍ a̍a̍ fa̍ŋa̍ŋ o̍ dɔ̍ɔ̍ŋgɔ̍ nda̍ wa̍ wo̍ pɛ̍, mā wa̍ hīōūwɔ̄ɔ̍ lāchī a̍ kɔ̄la̍ŋ, īpāla̍ ki̍nɛ̍i̍, yu̍mbu̍ yu̍mbu̍ i̍kpu̍ŋgba̍ Mɛ̄lɛ̄ka̍ Ya̍a̍wɛ̄ɛ̄ wo̍ ō wa̍ nda̍ chōo̍.

³⁵Ndu̍yɛ̍ dīmīo̍o̍ nu̍a̍ā mī wānāā sōlīāā lāsa̍lāa̍ ā chūa̍ kɔ̍fū kpe̍ma̍ Mɛ̄lɛ̄ka̍a̍ le̍ kɔ̄la̍ŋ, mī Mūu̍sē o̍ de̍ŋī chōo̍ cho̍o̍ kpe̍le̍ŋ āā, “Chɔ̍ŋ Mɛ̄lɛ̄ka̍ Ya̍a̍wɛ̄ɛ̄, mī ya̍a̍mɔ̍ɔ̍wa̍a̍ nu̍mnda̍ ā sɛ̄ŋi̍ŋ. Chɔ̍ŋ mī wānāa̍ tu̍l nu̍m yɛ̄le̍ŋ nda̍ ā nyāānu̍ŋ, mā fāŋa̍ŋ nu̍m lāchī.”

³⁶O̍ ko̍ŋ kɔ̍ɔ̍lī, tē kɔ̍fu̍ Mɛ̄lɛ̄ka̍ Ya̍a̍wɛ̄ɛ̄ wo̍ ō si᷄m vɛ̄lɛ̄ pɛ̍, Mūu̍sē o̍ di̍mi̍ chōo̍ cho̍o̍ āā, “Ōo̍ Mɛ̄lɛ̄ka̍ Ya̍a̍wɛ̄ɛ̄, ā chāā mi̍i̍ŋgū I̍sɔ̄lūɛ̍i̍ya̍a̍ cho̍ wāa̍la̍ŋ o̍ wāa̍la̍ŋ ni᷄ŋ nda̍ chōo̍.”