Read Southern Kisi Nɔ̍mbāā 11 Bible Online

Nɔ̍mbāā 11 - Southern Kisi bible

Nɔ̍mbāā 11

¹Pāa̍le̍ pi᷅lɛ̍, mi̍ wāŋnda̍ I̍sɔ̄lūɛ̄ī a̍ ka̍ndū ŋɔ̄ɔ̄chīa̍ŋnda̍ŋ a̍ Mɛ̄lɛ̄ka̍ Ya̍a̍wɛ̄ɛ̄, le̍ nyɛ̄ kīndīlāa̍ wa̍ nda̍ chōo̍ wo̍. Ndu̍yɛ̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍e̍ī ŋɔ̄ɔ̄chīa̍ŋnda̍ wāŋnda̍ ha̍ā ā wa̍ la̍ŋ, mbo̍ dūāūnu᷄ŋ tu̍mbe̍ a̍ nda̍ o̍ ka̍lā ka̍lā. O̍ ko̍ŋ, mbo̍ yɔ̄ŋ yīŋnde̍ŋ nda̍ tɛ̄ɛ̄ŋ, mi̍ lē hu᷄ŋ lo᷅m dɔ̍ɔ̍ŋgɔ̍ nda̍ wa̍ wo̍ da̍ŋga̍la̍a̍.

²O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ cha᷅ŋ nāa̍ Mūu̍sē chu̍a̍ le̍ mālāa̍. Ndu̍yɛ̍ mi̍ Mūu̍sē o̍ pi̍ɛ̍ī Mɛ̄lɛ̄ka̍ Ya̍a̍wɛ̄ɛ̄, o̍ ko̍ŋ mi̍ Mɛ̄lɛ̄ka̍ tōsā mi̍ yīŋnde̍ŋ lē nyūm.

³O̍ ko̍ŋ, ma̍ kē fo̍ndāŋ kōŋ dīōla̍ŋ āā, Ta̍bɛ̍lūā,[2] kāni̍ fo̍ndōle̍, o̍ fo̍ndāŋ kōŋ Mɛ̄lɛ̄ka̍ Ya̍a̍wɛ̄ɛ̄ o̍ yɔ̍ŋ yīŋnde̍ŋ I̍sɔ̄lūɛ̍i̍ya̍ tɛ̄ɛ̄ŋ ni̍.

⁴Pāa̍le̍ pi᷅lɛ̍, wānāā lēkāa̍wa̍a̍ wa̍ I̍sɔ̄lūɛ̍i̍ya̍ tɛ̄ɛ̄ŋ nda̍, nda̍ I̍sɔ̄lūɛ̍i̍ya̍ lātūlu̍ ma̍ kāndū ŋɔ̄ɔ̄chīa̍ŋnda̍ŋ vēllāa̍ vēllē āā, “Kpo̍u̍, nyɛ̄ māhīlōo̍ bɛ̍ɛ̍ ŋ̄ sɔ̍lā lɛ̍ ndu̍ mī ŋ̄ dē le̍?

⁵Bōōndi̍i̍ nāā ŋ̄ wa̍ I̍chi̍pī ve̍, sūū o̍ sūū na̍a̍ ŋ̍ ye̍e̍ma̍ le̍ dīo̍o̍ pɛ̍, sɔ̄lāa̍ na̍a̍ ŋ̍ sɔ̍lā ni̍. Ndu̍yɛ̍ fo̍ndō na̍a̍ ŋ̍ sɔ̍lā nda̍ ni̍, na̍a̍ ŋ̍ pi̍ndū le̍. Ndu̍yɛ̍ ŋ̄ wa̍ vɛ̄lɛ̄ kɔ̄ku̍mbɛ̄i̍la̍ŋ dīo̍o̍, a̍ wa̍ta̍mi̍lɛ̍i̍la̍ŋ, a̍ yāāwāŋ yɛ̍ yɔ̍ŋ, a̍ yāāwāŋ nɛ̍ya᷄ŋ.

⁶Kɛ̍ na̍nu̍ŋ ndu̍ ndu̍, nyɛ̄ dīāā o̍ nyɛ̄ dīāā chēle̍ŋ ŋ̄ sɔ̍lā lɛ̍ le̍, mɛ̄ɛ̍ ma̍nɛ̄i̍yo̍ ho̍ō. Nyɛ̄ ko̍ŋ to̍sa̍ ni̍, ŋ̄ nɔ̍ lɛ̍ māyōōmū o̍ māyōōmū le̍.”

⁷(Ma̍nɛ̄i̍yo̍ ho̍ō yɛ̍, māā ku̍lu̍la̍ mu̍i̍mu̍i̍la̍ tɔ̄lɔ̄ɔ̄ pūm o̍ wa̍ ni̍, ti᷄ŋ o̍ hūmbū, vɛ̄lɛ̄ mbo̍ nɔ̄ kɔ̄ɔ̍le̍ ba̍si̍le̍ŋ.

⁸Ma̍nɛ̄i̍yo̍ ho̍ō yɛ̍, a̍ mɔ᷄mndo̍ lātūlu̍ ndu̍ o̍o̍ hu᷅ŋ i̍chɔ̍l ni̍, mbō chūchu᷄ŋ o̍ dɔ̍ɔ̍ŋgɔ̍ I̍sɔ̄lūɛ̍i̍ya̍ ā wā wo̍. Tē pāa̍le̍ŋ lē sɛ̄ pɛ̍, wāŋnda̍ ā kɔ̍ chɔ̍ɔ̍vīāā mɛ̄ɛ̍ kpɛ̍ wānā o̍ wānā o̍ nɔ̍ le̍ chɔ̄ɔ̄vīāā yɛ̍, ā chūi̍ ndu̍ kōlōo̍. Tē ā chūi̍ ndu̍ pɛ̍, ā yāu̍ ndu̍, tē ko̍ŋ te̍ ā tōōsi̍a̍a̍ bēe̍dīi̍ fɛ̍fɛ̍dɛ̍ɛ̍ fɛ̍fɛ̍dɛ̍ɛ̍ wo̍ a̍ ndu̍. Tē ā chīi̍ ndu̍ tōōsīāā pɛ̍, mɛ̄ɛ̍ bēe̍dīi̍ nda̍ tōōsīāā ho̍ō a̍ chūɛ̄īmā ɔ̄li̍fīi̍ya̍ŋ ndo̍ ō yēēlā nu̍a̍ā yɛ̍, le̍nde̍ ndu̍ o̍o̍ ye̍e̍lā ni̍.)

⁹

¹⁰Mi̍ Mūu̍sē tu̍ɛ̍ī wāŋnda̍ ŋɔ̄ɔ̄chīa̍ŋnda̍ŋ kpe̍e̍kpe̍i̍, yu̍ŋgu̍ o̍ yu̍ŋgu̍ wa̍ īchāli̍ o̍ tɛ̍ndīi̍ ndāa̍ dīō mā ŋɔ̄ɔ̄chīāŋ. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ o̍ ka̍lā ka̍lā a̍ wāŋnda̍ I̍sɔ̄lūɛ̄ī. Mūu̍sē bɛ̍ɛ̍ mbo̍ tāmbū kɔ̄l ta̍u̍ ta̍u̍.

¹¹O̍ ko̍ŋ, mi̍ Mūu̍sē ko̍ŋūl nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍, mbo̍ dīmī āā, “Mɛ̄lɛ̄ka̍, vɛ᷅ ma̍ chūū ya̍ bu̍ɛ̍ī nūmndo̍ kpūndɛ̍ wāā nu̍a̍ā? Ō yɛ̄ɛ̍nɛ̍ ya̍ I̍ to̍sa̍ yɛ̄ mi̍ tɛ̍ɛ̍mbūū nu̍m kɔ̄l, ma̍ hāndū ya̍ wōlɔ̄ɔ̄lā lūsu̍lɛ̍i̍la̍ wāŋnda̍ ha̍ā kpo̍u̍ o̍ lēbōl?

¹²Bāā mbō wa̍ chūāūwāā nīa̍a̍ wāŋnda̍ ha̍ā ā chō ni̍? Bāā mbō wa̍ ya̍ cho̍ fi̍nyā ndā ni̍? Vɛ᷅ ma̍ kē ya̍ kpe̍ku̍ wa̍ā nu̍a̍ā, le̍ wāŋnda̍ ha̍ā chūa̍a̍ mī ku̍ɛ̄ a̍ nda̍ o̍ lɛ̄ŋndē ŋ̄ chūe̍l fi̍nyāā ndāā ma̍māa̍ būŋgɛ̄i̍ le̍ŋ ni᷄ŋ, mi̍ wa᷅ nda̍ māndāa̍ mɛ̄ɛ̍ kāla̍ chūa̍a̍ ō bīī nu̍a̍ā chɛ̄lɛ̄kpɔ̍ɔ̍ o̍ chōŋgu̍ mbō wa̍ kɔ̄la̍ŋ a̍ ndu̍ yɛ̍?

¹³Tu̍e̍i̍ yɔ̍ ŋɔ̍ɔ̍chīa̍ŋnda̍ wāŋnda̍ ha̍ā ā chō la̍ŋ, mā nyūna̍ ya̍ le̍ mī ke̍ nda̍ nyɛ̄ māhīlōo̍, le̍ mā dē. Kūɛ̍ɛ̍nɛ̍ ya̍ I̍ cho̍ yɛ̍ nyɛ̄ māhīlōo̍ sɔ̄lā mī ke̍ nda̍ ndu̍?

¹⁴Ya̍ pīlɛ̍ I̍ nɔ̍lā kɔ᷅la̍ŋ a̍ wāŋnda̍ ha̍ā kpo̍u̍ le̍. Wōlɔ̄ɔ̄la̍ŋ nda᷅ŋ lā lūsu̍l bɔ̄ɔ̍ le̍ ya̍.

¹⁵Tē nu̍a̍ā ŋ̄ chō ya̍ bīyɔ̄ɔ̄ ni̍, mɛ̄ɛ̍ yāndi̍i̍ yi̍ya̍ŋ ya̍ chōo̍, mā chu̍a̍ yōōmū nūu̍ lēpīlɛ̍ kpe̍. Yi̍ya̍ŋ ya̍ chōo̍ mā to̍sa̍l la̍ ke̍ŋ, I̍ ye̍e̍ma̍ mī che᷅ nyɛ̄ pālāā wāā nu̍a̍ā le̍.”

¹⁶O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl Mūu̍sē āā, “Hɛ̍li̍ ŋ̍wa᷅ŋ be̍le̍-ŋɔ̍mmɛ̍ū I̍sɔ̄lūɛ̍i̍ya̍ tɛ̄ɛ̄ŋ, wānāā ŋ̄ sīnā nu̍a̍ā māā nda̍ cho̍ wāŋ bɛ̄ndūāā lēlɛ̄ŋnda̍ ni̍, ndu̍yɛ̍ ma̍ wā vɛ̄lɛ̄ wānāā bɛ̄ndūa̍a̍ wāŋnda̍ chōo̍ wa̍, mā hīŋ a̍ nda̍ ya̍ lāchī o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ sōndōo̍, mā to̍sa̍ mā si᷄m nu̍m īkɛ̄i̍ lo̍ŋ.

¹⁷I̍ cho̍ tōlɔ̄ɔ̄ mī hu̍ŋ so̍ō nāa̍ nūm chu̍a̍ lo̍ŋ, ndu̍yɛ̍ mī to̍sa̍ mī nyi̍na̍ ya̍ I̍ ke̍ nu̍mndo̍, ō ti᷄ŋ ō tōl nda̍ kɔ̄ɔ̄lī. Nda̍ cho̍ nu̍m wōlɔ̄ɔ̄lā lūsu̍lɛ̍i̍la̍ wāŋnda̍ ha̍ā mālā chūā ni̍, ō ve᷅ lɛ̍ ni̍ŋ nu̍m pīlɛ̍ le̍, la̍ wa᷅ lɛ̍ ni̍ŋ o̍ lēbōl te̍.

¹⁸Ndu̍yɛ̍ di̍mu̍l wa᷅ŋnda̍ I̍sɔ̄lūɛ̄ī māā ya̍ Mɛ̄lɛ̄ka̍, I̍ dīmi̍ a̍a̍, ‘Lā di̍ndi̍ nya̍ pi̍la̍, mī lā bɛ̄ɛ̄ndi̍a̍ŋ le̍ sīɔ̄dīi̍, fo̍ndōle̍, I̍ cho̍ tōsā mī lā dē nyɛ̄ māhīlōo̍ sīɔ̄dīi̍. Ŋɔ̄ɔ̄chīa̍ŋnda̍ nya̍ wa̍ māā lā yēēma̍ nyɛ̄ māhīlōo̍ le̍ dīo̍o̍, mi̍ lā wā dīmīo̍o̍ māā ndu̍ o̍o̍ wa᷅ i̍kɛ̍ndɛ̄ mī nya̍ a̍a̍ wa̍ŋnu̍ŋ I̍chi̍pī wo̍, ya̍ Mɛ̄lɛ̄ka̍ Ya̍a̍wɛ̄ɛ̄ I̍ tu̍e̍ī ŋɔ̄ɔ̄chīa̍ŋnda̍ la̍ŋ.

¹⁹Ndu̍yɛ̍ nyɛ̄ māhīlū ya̍ I̍ cho̍ nya̍ ho̍ō kē wo̍, lā di᷅ ndu̍ ni̍ŋ le̍ pāa̍le̍ pi᷅lɛ̍, ɔ̄ɔ̄ pālɛ̍i̍ ī ŋīi̍ŋ, ɔ̄ɔ̄ ī ŋūɛ̍ɛ̍nu̍, ɔ̄ɔ̄ pālɛ̍i̍ tɔ̍, ɔ̄ɔ̄ le̍ pālɛ̍i̍ bi̍di̍i̍ŋ ko̍ni̍ le̍.

²⁰Le̍ pāŋge̍i̍ ī pīlɛ̍ kpu̍lu̍ku̍u̍ nya̍ chō ndu̍ wā dīo̍o̍ ni̍. Mɛ̄ɛ̍ mī lā dē ndu̍ mbō fūla̍ nya̍ chūŋ wɔ̄ɔ̍ŋndo̍ o̍ mīli̍ŋ, ndu̍yɛ̍ mbō fūla̍ŋ nya̍ īyēēma̍. Kāni̍ fo̍ndōle̍ le̍ mɛ̄ɛ̍ nya̍ kɛ̄ɛ̍ ya̍ Mɛ̍lɛ̄ka̍ Ya̍a̍wɛ̄ɛ̄, ya̍ cho̍ ho̍ō nya̍ tɛ̄ɛ̄ŋ le̍ te̍le̍ŋ o̍ te̍le̍ŋ ndo̍, mi̍ lā wā ŋɔ̄ɔ̄chīa̍ŋnda̍ŋ a̍ ya̍ mī lā dīmī māā ndu̍ o̍o̍ wa᷅ i̍kɛ̍ndɛ̄ mī na̍a̍ ŋ̍ wa̍ŋnu̍ŋ I̍chi̍pī yɛ̍.’ ”

²¹Kɛ̍ mi̍ Mūu̍sē o̍ di̍mūl Mɛ̄lɛ̄ka̍ Ya̍a̍wɛ̄ɛ̄ āā, “Mɛ̄lɛ̄ka̍, wāŋnda̍ I̍sɔ̄lūɛ̄ī, a̍ cho̍ kɔ̄la̍ŋ a̍ ŋ̄pēlū, mi̍ wa᷅ kɔ̄la̍ŋ a̍ nda̍ wa̍, ā chō wāa̍la̍ŋ kɛ̄mɔ̄ɔ̍ lē ŋɔ᷄mpu᷅m (600,000). Nda̍ ŋ̄ dīmi̍ ni̍ māā ā chō nda̍ nyɛ̄ māhīlōo̍ kē le̍ pāŋge̍i̍ ī pīlɛ̍ kpu̍lu̍ku̍u̍?

²²Ā yɔ᷄ŋ bɛ̍ɛ̍ mī ŋ̄ dīu̍ nāūwāā nāa̍, a̍ chūīŋāā nāa̍, a̍ sāa̍ nāa̍ kpo̍u̍, nyɛ̄ māhīlū kōŋ ō ve᷅ le̍tu̍u̍ le̍ nda̍ le̍. Ā yɔ᷄ŋ bɛ̍ɛ̍ mī ŋ̄ bīu̍ sūūwa̍ kpo̍u̍ o̍ pēe̍ mɛ̄ŋmā īhɛ᷄llo̍ ni᷄ŋ, ā nɔ̍lā mā wa̍ lētūu̍ le̍ nda̍ le̍.”

²³Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ dīmūl Mūu̍sē āā, “Ō yɛ̄ɛ̍nɛ̍ cho̍ yɛ̍ mī ya̍ Mɛ̍lɛ̄ka̍ Ya̍a̍wɛ̄ɛ̄ bu̍mba̍ ndu̍ tōsā a̍ kpāāya̍ nūu̍? Cha̍l mā to̍fa̍, tē nyɛ̄ ya̍ I̍ di̍mi̍ wo̍ ō yɔ̄nūŋ ni̍ŋ, ɔ̄ɔ̄ tē ō yɔ̍nūŋ ni̍ŋ te̍, mā chē.”

²⁴O̍ ko̍ŋ, mi̍ Mūu̍sē ku̍ā mbo̍ kɔ̍ di̍mūl wāŋnda̍ I̍sɔ̄lūɛ̍i̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍. O̍ ko̍ŋ kɔ̍ɔ̍lī, mbo̍ hɛ̄lī wāŋ bɛ̄ndūāā I̍sɔ̄lūɛ̍i̍ya̍ ŋ̄wāŋ be̍le̍-ŋɔ̍mmɛ̍ū, mbo̍ kūā a̍ nda̍ o̍ tɛ̍ndīi̍ Mɛ̄lɛ̄ka̍ Ya̍a̍wɛ̄ɛ̄ wo̍, mbo̍ kɔ̍ si̍mī nda̍ tɛ̍ndīi̍yo̍ bālɔ̄ɔ̍ chɛ̍ chɛ̍.

²⁵O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍āl o̍ yu̍mbu̍ yu̍mbu̍ īkpūŋgbāa̍ ni᷄ŋ, mbo̍ hu᷄ŋ so̍ō nāa̍ Mūu̍sē chu̍a̍. Ndu̍yɛ̍ mi̍ Mɛ̄lɛ̄ka̍ tōsā mi̍ nyi̍na̍ wa̍ Mūu̍sē kɔ̄ɔ̄lī wo̍, ō ti᷄ŋ ō tūāl wāŋ bɛ̄ndūa̍a̍ ha̍ā kɔ̄ɔ̄lī. Ndu̍yɛ̍ dīmīo̍o̍ nu̍a̍ā mi̍ nyi̍nā kōŋ ō tūāl nda̍ kɔ̄ɔ̄lī, ma̍ kāndū sɔ̄ɔ̍ŋ wa̍ā lāchīo̍ŋ dīmīo̍o̍ māā wānāa̍ su̍a̍ā le̍ Mɛ̄lɛ̄ka̍. Kɛ̍ le̍ pāa̍le̍ le̍ŋ ko̍ni̍. Chɔ̍ŋ ni᷅ŋ a̍ pāa̍le̍ le̍ŋ, ā hīu̍ lɛ̍ lāchī a̍ sɔ̄ɔ̍ŋ wa̍ā lāchī dīmī le̍.

²⁶Kɛ̍, wāŋ bɛ̄ndūāā be̍le̍-ŋɔ̍mmɛ̍ūwāā Mūu̍sē o̍ hɛ̍li̍ ha̍ā wa̍, ā ŋīɔ̍ɔ̍ŋ nda̍ ā pīli̍a̍a̍, Ɛ̄li̍da̍dī nda̍ Mɛ̍da̍dī, nda̍ kūe̍ o̍ tɛ̍ndīi̍ Mɛ̄lɛ̄ka̍a̍, bōōndi̍i̍ wāŋ bɛ̄ndūa̍a̍ ā pīli̍a̍a̍ ā kūɛ̄ ve̍ le̍. Mi̍ nda̍ lō kɔ̄ɔ̄lī o̍ dɔ̍ɔ̍ŋgɔ̍ɔ̍. Kɛ̍ nda̍ bɛ̍ɛ̍ mi̍ nyi̍na̍ Mɛ̄lɛ̄ka̍a̍ ō tūāl nda̍ kɔ̄ɔ̄lī, ma̍ kāndū sɔ̄ɔ̍ŋ wa̍ā lāchīo̍ŋ dīmīo̍o̍ māā wānāa̍ su̍a̍ā le̍ Mɛ̄lɛ̄ka̍.

²⁷O̍ ko̍ŋ, mi̍ po̍ chu̍a̍ pīāāndū pūm ō mālnu᷄ŋ a̍ kīlta̍ŋ mbo̍ kɔ̍ di̍mūl Mūu̍sē āā, “Ɛ̄li̍da̍dī nda̍ Mɛ̍da̍dī, a̍ cho̍ sɔ̄ɔ̍ŋ wa̍ā lāchīo̍ŋ dīmīo̍o̍ o̍ dɔ̍ɔ̍ŋgɔ̍ɔ̍ ni᷄ŋ.”

²⁸O̍ ko̍ŋ, mi̍ Chɔ̄ɔ̍sūāā, po̍ Nu᷅ŋ ndo̍, o̍ wa̍ wānā ma̍lāa̍ Mūu̍sē wo̍ wo̍, chɔ̍ŋ a̍ chūā pīāāndūyɛ̍ī ndūɛ̍i̍ yo̍, ō dīmūl Mūu̍sē āā, “Fāllo̍, di̍mu̍l nda̍ mā pɛ̄ŋgi̍.”

²⁹Kɛ̍ mi̍ Mūu̍sē o̍ di̍mūl ndu̍ āā, “Bāā pāŋālāa̍ ŋ̄ chō le̍ ya̍ ni̍? Ya̍ i̍i̍ ye̍e̍mā bɛ̍ɛ̍ ko̍ mī Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ to̍sa̍ mī nyīnā ndɔ̄ɔ̍ ndu̍ o̍o̍ to᷅l wāŋnda̍ kpo̍u̍ kɔ̍ɔ̍lī, mī ndu̍ o̍o̍ to̍sa̍ mī wāŋnda̍ kpo̍u̍ nda̍ a̍a̍ si̍mnu᷄ŋ wa̍nāa̍ su̍a̍ā le̍ Mɛ̄lɛ̄ka̍.”

³⁰O̍ ko̍ŋ kɔ̍ɔ̍lī, mi̍ Mūu̍sē nda̍ wāŋ bɛ̄ndūāā o̍ hɛ̍li̍ wa̍ ā mīīŋgū o̍ dɔ̍ɔ̍ŋgɔ̍ɔ̍ ni᷄ŋ.

³¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mi̍ hūēīyīī bɛ̄ndūe̍i̍ ī sūŋgū hɔ̄ŋndo̍ o̍ lēpīlɛ̍ ni᷄ŋ, mi̍ hūēīyīī kēŋ ī wā hūnɔ̄ɔ̍ a̍ wɔ̄lla̍, chɔ̄nɔ᷄ŋndo̍ bā Pēe̍ Mɛ̄ŋmā Īhɛ᷄llo̍. Mi̍ wɔ̄lla̍ ha̍ā tīū si̍lɔ̍. Ndu̍yɛ̍ lɛ̄ŋ lɛ᷅ŋ nu̍a̍ā nda̍ wa̍ bālɔ̄ɔ̍ o̍ hūēīye̍ ni᷄ŋ ni̍. Chɔ̍ŋ o̍ dɔ̍ɔ̍ŋgɔ̍ɔ̍ le̍ kɔ̄la̍ŋ nāa̍ wɔ̄lla̍ ha̍ā ā wa̍ wa̍, ndu̍ o̍o̍ wa᷅ le̍ kɔ̄la̍ŋ pāa̍le̍ kpɛ᷅ŋ.

³²Mi̍ wāŋnda̍ I̍sɔ̄lūɛ̄ī a̍ ni̍i̍lū wɔ̄lla̍ ha̍ā bīyɔ̄ɔ̍ pāa̍le̍ le̍ŋ kpɛ᷅ŋ, īchɔ̄llo̍ vɛ̄lɛ̄ pi̍i̍ pi̍i̍ ma̍ lɔ̄ɔ̄lū nda̍ bīyɔ̄ɔ̍, ndu̍yɛ̍ ma̍ nīīlū vɛ̄lɛ̄ nda̍ bīyɔ̄ɔ̍ dīi̍mā ndɔ̄ɔ̍ pīlɔ̍ɔ̍ kpɛ᷅ŋ. Wānā o̍ wānā o̍ ve̍ lo̍ŋ mbō bīī wɔ̄lla̍ ha̍ā, mā kɛ̄ɛ̍ chīŋā bu̍sɛ̄la̍ŋ be̍le̍-ŋu̍ɛ̍ɛ̍nu̍ le̍. O̍ ko̍ŋ kɔ̍ɔ̍lī, ma̍ tīū wɔ̄lla̍ ha̍ā tɛ̄īyo̍ o̍ bɛ̍ɛ̄la̍ŋ, o̍ dɔ̍ɔ̍ŋgɔ̍ɔ̍ ni᷄ŋ kpo̍u̍.

³³Kɛ̍ lɔ̍ɔ̍ pa̍ mā chīi̍ wɔ̄lla̍ ha̍ā dīo̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ nda̍, mbo̍ to̍sā mi̍ nāa̍ ō dēl nda̍ tɛ̄ɛ̄ŋ, mbo̍ tīū o̍ dɔ̍ɔ̍ŋgɔ̍ɔ̍ ni᷄ŋ kpo̍u̍.

³⁴Ndu̍yɛ̍, wānāa̍ wa̍ ka̍ŋ ŋɔ̍ɔ̍chīa̍ŋndo̍ le̍ nyɛ̄ māhīlōo̍ wa̍, ā bɔ̍ɔ̍ bɔ̍ɔ̍ ma̍ wū, ma̍ chɔ̄ nda̍ lo̍ŋ. Le̍ he̍ī, ma̍ kē fo̍ndā kōŋ dīōla̍ŋ āā, Kībīlɔ̄tī Hāta̍a̍vāā, ko̍ŋ cho̍ ni̍, sɛ̄īla̍ wānāā ŋɔ̄ɔ̄chīa̍ŋnda̍.

³⁵O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ ma᷅l nāa̍ nda̍ wa̍ ka̍ŋ Kībīlɔ̄tī Hāta̍a̍vāā, ma̍ hīāū lāchī a̍ kɔ̄la̍ŋ, ma̍ fūūlūū o̍ fo̍ndāŋndo̍ dīōla̍ŋ āā Hāsɛ̍lɔ̍tī, ma̍ kīālū dɔ̍ɔ̍ŋgɔ̍ɔ̍ lo̍ŋ.