Read Southern Kisi Nɔ̍mbāā 14 Bible Online

Nɔ̍mbāā 14 - Southern Kisi bible

Nɔ̍mbāā 14

¹Mɛ̄ɛ̍ wāŋnda̍ I̍sɔ̄lūɛ̄ī a̍ tu̍e̍ī ko̍na̍ su̍a̍ŋsu̍a̍ŋnda̍ ā dōōnu̍ŋ nda̍ wo̍, ma̍ lɔ̄ɔ̄lū cha᷄ŋndo̍ īchɔ̄l ko̍ŋ pi̍i̍ pi̍i̍.

²O̍ ko̍ŋ kɔ̍ɔ̍lī, nda̍ kpo̍u̍ ma̍ kāndū ŋɔ̄ɔ̄chīa̍ŋndo̍ a̍ Mūu̍sē nda̍ E̍lɔ̄ŋ, ma̍ dīmūl nda̍ āā, “Ndu̍ o̍o̍ bɛ̍ndā bɛ̍ɛ̍ mī na̍a̍ ŋ̍ chu̍u̍ I̍chi̍pī, ɔ̄ɔ̄ mī na̍a̍ ŋ̄ chu̍u̍ o̍ po̍llo̍ ho̍ō ni᷄ŋ na̍ŋnu᷄ŋ.

³Mɛ̄ɛ̍ le̍ mī ya̍a̍mɔ̍ɔ̍wa̍a̍ nāa̍ ā kɔ̍ di̍ū na̍a̍ o̍ chɔ̄ūwo̍ ni᷄ŋ, ndu̍yɛ̍, mā bīu̍ lāāndāā nāa̍ a̍ chūāūwāā nāa̍ le̍la̍ŋ Mɛ̄lɛ̄ka̍ Ya̍a̍wɛ̄ɛ̄ o̍ cho̍ kɔ̄la̍ŋ a̍ na̍a̍ o̍ lɛ̄ŋndē Ke̍nāŋnde̍ŋ ni᷄ŋ ni̍? Vɛ̍ ŋ̄ mi̍i̍ŋgūŋ ni̍ko̍ I̍chi̍pī le̍?”

⁴O̍ ko̍ŋ kɔ̍ɔ̍lī, ma̍ dīmu̍la᷅ŋ āā, “Ŋ̄ hɛ̄li᷅ŋ wāŋndo̍ mbō si᷅m na̍a̍ lāchī, le̍ mbō mīīŋgu̍ a̍ na̍a̍ I̍chi̍pī.”

⁵Mɛ̄ɛ̍ Mūu̍sē nda̍ E̍lɔ̄ŋ a̍ tu̍e̍ī dīōmndā wāŋnda̍ wa̍ dīmīo̍o̍ la̍ŋ, ma̍ hīnī lɛ̄ŋ sa̍kpō I̍sɔ̄lūɛ̍i̍ya̍ kpo̍u̍ o̍ hɔ̄l.

⁶O̍ ko̍ŋ kɔ̍ɔ̍lī, mi̍ Chɔ̄ɔ̍sūāā, po̍ Nu᷅ŋ ndo̍, a̍ Ke̍lɛ̍bī, po̍ Chɛ̍fu̍nɛ̄ɛ̄ wo̍, a̍ nda̍ a̍a̍ kɔ̍ mɛ̍ɛ̍ndīa̍ŋ lɛ᷅ŋnde̍ŋ nda̍ su̍a̍ŋsu̍a̍ŋnda̍ ā pīli̍a̍a̍ wa̍, ma̍ sɛ̄ɛ̄sīa̍ŋ nyɛ᷅la̍ŋ lēkɔ̄ɔ̍ le̍ kɔ̄l ndā ta̍mbɛ̍i̍yo̍ chɔ̄mndo̍.

⁷Ma̍ dīmūl I̍sɔ̄lūɛ̍i̍ya̍ kpo̍u̍ āā, “Lɛ̄ŋndē na̍a̍ ŋ̄ bālu̍ lēni᷄ŋ mi̍ ŋ̄ mɛ̄ɛ̄nda᷄ŋ le̍ŋ nde̍ŋ ki̍nɛ̍i̍, lɛ̄ŋndē kɛ̄ndɛ̄le̍ŋ pīla̍ le̍ cho̍ ni̍.

⁸Lɛ̄ŋnde̍ cho̍ lē pīāā a̍ nyɛ̄m kɛ̄ndɔ᷄ŋ, ndu̍yɛ̍ mi̍ lē nɔ̄ fo̍ndāŋndā kɛ̄ndɛ̄lā tɔ̄lɔ̄ɔ̄la̍ŋ lā nāŋ nda̍ŋ nde̍ŋ le̍ cho̍ ni̍. Tē Mɛ̄lɛ̄ka̍ Ya̍a̍wɛ̄ɛ̄ o̍ hi̍ni̍ kɔ̄l a̍ na̍a̍ pɛ̍, ō nɔ̄lā mbō ke̍ na̍a̍ lɛ̄ŋndē lēŋ.

⁹Lā si̍mūl Mɛ̄lɛ̄ka̍ Ya̍a̍wɛ̄ɛ̍ le̍, wāŋnda̍ I̍sɔ̄lūɛ̄ī. Ndu̍yɛ̍ sīōōŋīī bi̍ī nya̍ le̍ wānāa̍ cho̍ o̍ lɛ̄ŋndē lēŋ ni᷄ŋ nda̍ le̍. Ŋ̄ nɔ̄lā mī ŋ̄ yēm nda̍ bɛ̍ɛ̍ŋ bɛ̍ɛ̍ŋ. Wānāā kāŋ nyɛ̄ nda̍ a̍a̍ ti̍i̍nda̍ŋ le̍ nda̍ māndāa̍ wo̍ ō chūū fāŋa᷄ŋ. Ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ na̍a̍ kɔ̄ɔ̄lī. Le̍la̍ŋ lā yɔ᷅ŋ īsīōōŋ le̍ nda̍ le̍.”

¹⁰Kɛ̍ I̍sɔ̄lūɛ̍i̍ya̍ kpo̍u̍ ā ye̍ŋ nda̍ lānī le̍, ma̍ kɔ̄ŋgɔ̄līa̍ŋ nda̍ le̍ nda̍ vīīyo̍ a̍ pōūta̍ŋ. Kɛ̍ o̍ lēpīlɛ̍ ni᷄ŋ kpe̍, mi̍ pa̍ŋgēle̍ chɔ᷅m na̍ŋɔ̄ɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍, ō tūāl o̍ tɛ̍ndīi̍ chɔ᷅m māā Mɛ̄lɛ̄ka̍ chō a̍ nya̍ lātūlu̍ wo̍ chōo̍, nāa̍ nda̍ wa̍ wa̍.

¹¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl Mūu̍sē āā, “Vɛ̍ mi̍ wāŋnda̍ ha̍ā ā wā wɔ̄ hīōūwɔ̄ɔ̍ lāchī kɛ᷅ a̍ ya̍ Mɛ̍lɛ̄ka̍ kīɔ̍ɔ̍? A̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndūŋ ya̍ I̍ to̍sa̍ mu᷅ŋ nda̍ tɛ̄ɛ̄ŋ ndo̍ kpo̍u̍, ā chō wɔ̄ hīōūwɔ̄ɔ̍ lāchī kɛ᷅ a̍ ya̍ kīɔ̍ɔ̍?

¹²I̍ cho̍ wāŋnda̍ ha̍ā nāa̍ tūsī chōo̍, mī tɛ̍ɛ̍mbu̍u̍ nda̍ kpo̍u̍. Ndu̍yɛ̍ mī to̍sa̍ nu̍m mā sīmnu᷄ŋ ka̍a̍le̍ bɛ̍ndū, mī lē nɔ̄ kpāāyāa̍ mī lē hīōū mɛ̄ɛ̍ nda̍ wa̍ yɛ̍.”

¹³Kɛ̍ mi̍ Mūu̍sē di̍mūl Mɛ̄lɛ̄ka̍ Ya̍a̍wɛ̄ɛ̄ āā, “Tē a̍ to̍sa̍ ke̍ŋ pɛ̍, wāŋnda̍ I̍chi̍pī a̍ cho̍ tūēīyɔ̄ɔ̄ a̍ ndi̍ o̍kɔ̄ɔ̄. Nu̍m so̍li̍ wāŋnda̍ ha̍ā I̍chi̍pī ni̍ a̍ kpāāya̍ nu̍m bɛ̄ndōo̍.

¹⁴Tē wāŋnda̍ I̍chi̍pī a̍ tu̍e̍ī a̍ ī wāā le̍nde̍ a̍ nda̍ o̍kɔ̄ɔ̄ pɛ̍, ā chō wāŋnda̍ o̍ lɛ̄ŋnde̍ŋ nde᷅ŋ ni᷄ŋ di̍mūl. Ndu̍yɛ̍ wāŋnda̍ ha̍ā ā chīi̍ ni᷅ŋ tūēīyɔ̄ɔ̄ māā nūm Mɛ̄lɛ̄ka̍ Ya̍a̍wɛ̄ɛ̄ ā chō a̍ na̍a̍ lātūlu̍, māā a̍ chɔ̍mnu̍ŋ na̍a̍ kpe̍nde̍ke̍le̍ o̍ yu̍mbu̍ yu̍mbu̍ i̍kpu̍ŋgbāa̍ ni᷄ŋ, mi̍ ŋ̄ chā nu̍m. Ā tūēī māā nu̍m si̍m na̍a̍ lāchī ni̍ ma̍ wā kɔ̄la̍ŋ a̍ na̍a̍, māā īpāla̍ o̍ yu̍mbu̍ yu̍mbu̍ i̍kpu̍ŋgbāa̍ ni᷄ŋ ŋ̄ kūā na̍a̍ lāchī ni̍, ndu̍yɛ̍, īchɔ̄l mā kūɛ̄ na̍a̍ lāchī o̍ pa̍ŋgēle̍ lēyīŋndo̍ ni᷄ŋ.

¹⁵Le̍la̍ŋ, tē a̍ chi̍i̍ wāŋnda̍ ha̍ā dīū na̍nu᷄ŋ pɛ̍ kpo̍u̍, lɛ̄ŋīi̍ tu̍e̍ī he̍ī a̍ nūm o̍kɔ̄ɔ̄ ve̍ ī chō dīmī āā,

¹⁶‘Ō cho̍ fu̍u̍le̍ Mɛ̄lɛ̄ka̍ Ya̍a̍wɛ̄ɛ̄ o̍ di̍u̍ wāŋnda̍ ha̍ā o̍ po̍llo̍ ni᷄ŋ te̍, būmbāa̍ o̍ bu̍mba̍ le̍ kɔ̄la̍ŋ a̍ nda̍ o̍ lɛ̄ŋndē o̍ chu̍e̍l nda̍ būŋgɛ̄i̍ le̍ nda̍ kīo̍o̍ le̍ŋ ni᷄ŋ ni̍.’

¹⁷Le̍la̍ŋ yāndi̍i̍ Mɛ̄lɛ̄ka̍ Ya̍a̍wɛ̄ɛ̄, chɔ̍m kpa̍a̍yā nu̍m bɛ̄ndōo̍, mā to̍sa̍ mɛ̄ɛ̍ ŋ̄ chūa̍ būŋgɛ̄i̍ yɛ̍. Ma̍ dīmī o̍ būŋgɛ̄ī ŋ̄ chu̍a̍ ve̍ ni᷄ŋ āā,

¹⁸‘Ya̍ Mɛ̍lɛ̄ka̍ Ya̍a̍wɛ̄ɛ̄, I̍ cho̍ wa᷅na̍ dɔ̍u̍nu᷄ŋ tu̍mbe̍ chɔ̍chɔ̍ le̍. Wāna̍ ka̍a̍la̍ wāŋndā chīe̍e̍ya̍ ta̍u̍, ndu̍yɛ̍ mī ma᷅l wa᷅ŋnda̍ le̍ yɔ̄ŋndā ndāla̍ wɔ̍ɔ̍ŋnda̍ŋ, a̍ le̍ ya̍ sīmūllo̍ ya̍ I̍ cho̍ ni̍. Kɛ̍ ndu̍yɛ̍ wānā o̍ wāna̍ to̍sa̍ yɔ̄ŋ wɔ̄ɔ̍ŋndo̍ pɛ̍ mbō mūli̍ŋ te̍, dɛ̍nɛ̍ pa̍lāa̍ ya̍ I̍ tu̍sī wa᷅nā ko̍ŋ chōo̍ le̍ yɔ̄ŋ ndɔ̄ wɔ̍ɔ̍ŋndo̍ ni̍. Ndu̍yɛ̍ wānā ko̍ŋ chūāā ndūa̍a̍ ni̍, a̍ chūāā ndūāā ma̍māa̍, ndu̍yɛ̍ a̍ chūāā ndūāā ma̍māā kāŋ chūāā ndāa̍ ma̍māa̍ kɛ᷅, dɛ̍nɛ̍ pa̍lāa̍ ya̍ I̍ tu̍sī nda̍ chōo̍ le̍ yɔ̄ŋ wɔ̄ɔ̍ŋ wānā ko̍ŋ ni̍.’

¹⁹Le̍la̍ŋ yāndi̍i̍ Mɛ̄lɛ̄ka̍ Ya̍a̍wɛ̄ɛ̄, mɛ̄ɛ̍ ŋ̄ chō wāna̍ ka̍a̍la̍ ŋ̄wāŋndā chīe̍e̍ ta̍u̍ wo̍ yɛ̍, ma̍l wa᷅ŋnda̍ ha̍ā le̍ yɔ̄ŋ ndā wɔ̍ɔ̍ŋndo̍, mɛ̄ɛ̍ ŋ̄ lo̍ nda̍ mālɔ̄ɔ̍, chɔ̍ŋ a̍ te̍le̍ŋ ŋ̄ sōli̍ nda̍ I̍chi̍pī wo̍ mbo̍ bīya᷅ŋ a̍ pāa̍le̍ hāūle̍ŋ nde᷅ŋ yɛ̍.”

²⁰O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ mu̍lī āā, “Le̍ mɛ̄ɛ̍ ŋ̄ pīɛ̍i̍ le̍ nda̍ yɛ̍, I̍ ma̍l nda̍ le̍ yɔ̄ŋ ndā wɔ̍ɔ̍ŋndo̍.

²¹Kɛ̍ ndu̍yɛ̍ I̍ me̍na̍ŋ po̍, ha̍a̍a̍ ya̍ Mɛ̍lɛ̄ka̍ mi̍ wa᷅ Mɛ̄lɛ̄ka̍ cho̍ yōōmū le̍ fɛ̍ɛ̍ŋ a̍ fɛ̍ɛ̍ŋ ndo̍, ndu̍yɛ̍ mi̍ nāŋɔ̄ɔ̄ nūu̍ ō wā ō tīūwāā o̍ chi̍e̍ēŋndo̍ chōo̍ kpo̍u̍,

²²wa̍nāa̍ che᷅ ha̍ā pa̍ŋgēle̍ chɔ᷅m na̍ŋɔ̄ɔ̍ ya̍ Mɛ̍lɛ̄ka̍a̍, ndu̍yɛ̍ ma̍ chā sɔ̄ɔ̍ŋ kɔ̄ndɔ̄fi̍li̍ŋ bɛ̄ndūŋ ya̍ I̍ to̍sa̍ I̍chi̍pī, a̍ o̍ lɛ̄ŋndē po̍lte̍ŋ ni᷄ŋ nda̍, kɛ̍ ma̍ kɛ̄ɛ̄ le̍ ya̍ dīōmndo̍ tūēīyɔ̄ɔ̍, ma̍ wā ya̍ tɔ̄ɔ̄nda᷄ŋndo̍ le̍ te̍le̍ŋnda̍ fa̍ŋā wa̍ ki̍nɛ̍i̍,

²³o̍ pīlɛ̍ bɛ̍ɛ̍ de᷅l lɛ᷅ŋndē ya̍ I̍ chu̍e̍l fi̍nyāā ndāā ma̍māa̍ būŋgɛ̄i̍ le̍ nya̍ kīo̍o̍ le̍ŋ hɔ̄lte̍ŋ te̍. Wānāa̍ pɛ̍ɛ̍sa̍ ya̍ ka̍ŋ nda̍ ki̍nɛ̍i̍, ō pīlɛ̍ bɛ̍ɛ̍ ō chi᷅ lɛ᷅ŋndē lēŋ te̍.

²⁴Kɛ̍ bu̍ɛ̍ī nūu̍ Ke̍lɛ̍bī ndu̍ ndu̍, le̍ yīya᷄ŋ kɛ̍ndɛ̄ o̍ nɔ̍ a̍ ya̍ o̍kɔ̄ɔ̄, mbo̍ dūāū tīīnda᷄ŋ ndɔ̄ɔ̍ kpo̍u̍ o̍ ya̍ ni̍ŋ ndo̍, I̍ cho̍ tōsā mbō lūɛ̄ī o̍ lɛ̄ŋndē lēŋ ni᷄ŋ, ndu̍yɛ̍ mī wānāa̍ fu̍la̍ o̍ pūlālē ndɔ̄le̍ŋ chōo̍ wa̍ ā cha᷄l lo̍ŋ.

²⁵Le̍la̍ŋ mɛ̄ɛ̍ Āma̍la̍kāi̍tīi̍ya̍, a̍ Ke̍na̍na̍i̍tīi̍ya̍ ā chō o̍ dɛ̍ŋgbɛ̍la̍ŋ Ke̍nāŋ yɛ̍, sīɔ̄dīi̍ lā mūli̍ŋ mī lā kūɛ̄ kūmbū po̍llo̍, a̍ nɛ̄i̍ ku̍ɛ̄ o̍ Pēe̍ Mɛ̄ŋmā Īhɛ᷄l Si̍a̍ŋāa̍ wo̍.”

²⁶Mi̍ Mɛ̍lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē nda̍ E̍lɔ̄ŋ āā,

²⁷“I̍ sa̍ŋga̍ ni᷅ŋ a̍ ŋɔ̄ɔ̄chīa̍ŋnda̍ wānāā dɛ̍nɛ̍ wɔ̍ɔ̍ŋnda̍ ha̍ā tūēīyɔ̄ɔ̍. I̍ tu̍e̍ī ni᷅ŋ bɔ̄ɔ̍ ŋɔ̄ɔ̄chīa̍ŋnda̍ wāŋnda̍ I̍sɔ̄lūɛ̄ī a̍ cho̍ la̍ŋ.

²⁸Le̍la̍ŋ di̍mu̍l nda̍ māā ya̍ Mɛ̍lɛ̄ka̍ dīmi̍ āā, ‘I̍ me̍na̍ŋ po̍, ha̍a̍a̍ mi̍ wa᷅ Mɛ̄lɛ̄ka̍ cho̍ yōōmū le̍ fɛ̍ɛ̍ŋ a̍ fɛ̍ɛ̍ŋ ndo̍, nyɛ̄ nya̍ yēēma̍ wo̍ I̍ cho̍ nya̍ ndu̍ kē. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.

²⁹Mɛ̄ɛ̍ mī to̍sa̍ mī dīāllūŋ nyāŋ vi̍lɛ̍i̍yo̍ŋ ŋ̄ wa̍ ŋ̄ tīūwāā o̍ po̍llo̍ ho̍ō ni᷄ŋ kpo̍u̍. Le̍ ŋɔ̄ɔ̄chīa̍ŋnda̍ nya̍ ŋɔ̄ɔ̄chīa̍ŋ nda᷅ŋ a̍ ya̍ la̍ŋ, nya̍ ki̍nɛ̍i̍,

³⁰wāŋndo̍ ō pīlɛ̍ bɛ̍ɛ̍ ō lu̍e̍ī o̍ lɛ̄ŋndē ya̍ I̍ chu̍e̍l nya̍ būŋgɛ̄i̍ le̍ nya̍ kīo̍o̍ nyɛ̄ nyā le̍ŋ ni᷄ŋ te̍, mɛ̄ɛ̍ Ke̍lɛ̍bī, po̍ Chɛ̍fu̍nɛ̄ɛ̄ wo̍ nda̍ Chɔ̄ɔ̍sūāā, po̍ Nu᷅ŋ ndo̍ mā lūɛ̄ī o̍ lɛ̄ŋndē lēŋ ni᷄ŋ.

³¹Chūāūwāā nyāa̍ nya̍ dīmi̍ ka̍ŋ māā ā chō nda̍ pōōndīāā nya̍ o̍ lābā wa̍, I̍ cho̍ lākɔ̄ a̍ nda̍ o̍ lɛ̄ŋndē ya̍ I̍ chu̍e̍l nya̍ būŋgɛ̄i̍ le̍ŋ ni᷄ŋ, mā kɔ̍ di̍ō lɛ̄ŋndē nya̍ kɛ̄ɛ̍ le̍ŋ nde̍ŋ tɔ̄nɔ̄.

³²Kɛ̍ nya̍ nya̍ ki̍nɛ̍i̍, o̍ po̍llo̍ ho̍ō ni᷄ŋ nya̍ chō wu᷄ ni̍.

³³Ndu̍yɛ̍ chūāūwāā nyāa̍ ā wā ni̍ŋ ba̍lɔ̄ɔ̍ o̍ po̍llo̍ ho̍ō ni᷄ŋ le̍ wɔ̄sīla̍ŋ be̍le̍ hi̍ɔ̍ɔ̍lu̍, māā wānāā māndāā lāsāā, mā sāŋga̍ le̍ mɛ̄ɛ̍ nya̍ kɛ̄ɛ̍ wāa̍ sa̍kpō yɛ̍, ha̍a̍a̍ mbō lo̍ o̍ ko̍ŋ nya̍ nɔ̍ le̍ wūo̍o̍ o̍ po̍llo̍ ho̍ō ni᷄ŋ nda̍ ki̍nɛ̍i̍ mī lā chūu̍.

³⁴Lā chō sāŋgā o̍ po̍llo̍ ho̍ō ni᷄ŋ le̍ wɔ̄sīlā be̍le̍-hi̍ɔ̍ɔ̍lu̍, fo̍ndōle̍, le̍ yɔ̄ŋndā nyāla̍ wɔ̍ɔ̍ŋnda̍ŋ. Pālɛ̍i̍ be̍le̍-hi̍ɔ̍ɔ̍lu̍i̍i̍ su̍a̍ŋsu̍a̍ŋnda̍ ā chīi̍ o̍ lɛ̄ŋnde̍ŋ mɛ̄ɛ̄nda᷄ŋndo̍ ni᷄ŋ nde̍, lēpāa̍ o̍ lēpāa̍ le̍ si̍m le̍ wɔ̄sīo̍o̍ ō pīlɛ̍. O̍ ko̍ŋ, mī lā sīna̍ māā ya̍ Mɛ̍lɛ̄ka̍ I̍ dɔ̍u̍nu᷄ŋ tu̍mbe̍ a̍ nya̍.

³⁵Ya̍ Mɛ̍lɛ̄ka̍ Ya̍a̍wɛ̄ɛ̄ I̍ me̍na̍ŋ po̍, wānāā dɛ̍nɛ̍ wɔ̍ɔ̍ŋāa̍ yi̍īna᷅ŋ ha̍ā le̍ ya̍ sīmūllo̍ wa̍, mɛ̄ɛ̍ mī to̍sa̍ he̍ī a̍ nda̍. Nda̍ kpo̍u̍ o̍ po̍llo̍ ho̍ō ni᷄ŋ nda̍ chō chūū ni̍. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.’ ”

³⁶O̍ ko̍ŋ, su̍a̍ŋsu̍a̍ŋa̍a̍ Mūu̍sē ve᷅m le̍ lɛ̄ŋnde̍ŋ mɛ̄ɛ̄nda᷄ŋndo̍ wa̍, a̍ hu̍ŋ do̍u̍nu᷄ŋ wa᷅ŋnda̍ ko̍na̍ lāchōōwāa̍ a̍ lɛ̄ŋndē Ke̍nāŋnde̍ŋ o̍kɔ̄ɔ̄, ma̍ tōsā mi̍ wāŋnda̍ ā kāndū ŋɔ̄ɔ̄chīa̍ŋnda̍ŋ a̍ Mɛ̄lɛ̄ka̍ Ya̍a̍wɛ̄ɛ̄ wa̍, mi̍ Mɛ̄lɛ̄ka̍ tūsī nda̍ nāa̍ chōo̍, nda̍ kpo̍u̍ ma̍ wū.

³⁷

³⁸Su̍a̍ŋsu̍a̍ŋa̍a̍ tɔ̍ a̍ ā ŋīɔ̍ɔ̍ŋāā ku̍ɛ̄ lɛ̄ŋnde̍ŋ mɛ̄ɛ̄nda᷄ŋndo̍ wa̍, mɛ̄ɛ̍ Chɔ̄ɔ̍sūāā po̍ Nu᷅ŋndo̍, nda̍ Ke̍lɛ̍bī po̍ Chɛ̍fu̍nɛ̄ɛ̄ wo̍ ma̍ lō yōōmū.

³⁹Mɛ̄ɛ̍ Mūu̍sē o̍ chi̍i̍ I̍sɔ̄lūɛ̍i̍ya̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ ko̍na̍ do̍u̍nɔ᷄ŋ kpo̍u̍, ma̍ chāŋ cha᷄ŋndo̍ pīla̍.

⁴⁰Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, ma̍ pēnā bɛ̄ɛ̄ndīa̍ŋ le̍ kɔ̄la̍ŋ lɛ̄ŋndē ŋ̄pēmbūle̍ŋ Ke̍nāŋ chīŋa̍la᷅ŋndo̍ a̍ sɔ̍ŋgɔ̄ɔ̍. Ma̍ dīmūl Mūu̍sē āā, “Ŋ̄ tōsa̍ yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍ Ya̍a̍wɛ̄ɛ̄. Le̍la̍ŋ ŋ̄ bɛ̄ɛ̄ndi̍a̍ŋ ni᷅ŋ le̍ mī ŋ̄ kɔ̍ bi̍ī lɛ̄ŋndē o̍ chu̍e̍l na̍a̍ būŋgɛ̄i̍ le̍ŋ ni᷄ŋ.”

⁴¹Kɛ̍ mi̍ Mūu̍sē di̍mūl nda̍ āā, “Le̍ yɛ̄ɛ̍nɛ̍ nya̍ chō yɛ̄ vɛ̄lɛ̄ Mɛ̄lɛ̄ka̍ Ya̍a̍wɛ̄ɛ̍ dīōmndo̍ sōlīo̍o̍ kɛ᷅? Lā kɔ̍ bɛ̍ɛ̍ lā cho̍ ba᷅ tīū le̍.

⁴²Le̍la̍ŋ lā ku̍ā le̍, kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ nya̍ kɔ̄ɔ̄lī le̍. Tē lā fūla̍ kɔ̄ɔ̄lī pɛ̍ mī lā kūɛ̄, ya̍a̍mɔ̍ɔ̍wa̍a̍ nyāa̍ chō nya̍ lākɔ̄ yōmɔ̄ɔ̄.

⁴³Tē lā kūɛ̄ pɛ̍, Āma̍la̍kāi̍tīi̍ya̍, a̍ Ke̍na̍na̍i̍tīi̍ya̍ ā chō nya̍ lākɔ̄ chīŋa̍la᷅ŋ mā dīu̍ nya̍ a̍ mɔ̄ɔ̄ŋ nda̍ŋ fāŋndo̍ŋ. Lā kɔ̍ bɛ̍ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ nya̍ wā kɔ̄ɔ̄lī le̍, fo̍ndōle̍, le̍ mɛ̄ɛ̍ nya̍ kɛ̄ɛ̍ ndu̍ dīōm yɛ̍.”

⁴⁴Kɛ̍ wāŋnda̍ ha̍ā ā ye᷄ŋ Mūu̍sē lānī le̍, ma̍ bāŋ ka̍ŋga̍la̍ŋ māā mɛ̄ɛ̍ mā kūɛ̄ o̍ lɛ̄ŋndē ŋ̄pēmbūle̍ŋ ma̍ kɔ̍ chi᷅ŋa̍la᷅ŋ wa̍nāa̍ cho̍ lo̍ŋ nda̍. Ma̍ mɛ̄ī Kɔ̍fu̍ kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ o̍ dɔ̍ɔ̍ŋgɔ̍ɔ̍, kɛ̍ Mūu̍sē ō fēŋa̍ŋ o̍ dɔ̍ɔ̍ŋgɔ̍ɔ̍ mbō tōl nda̍ kɔ̄ɔ̄lī le̍.

⁴⁵Kɛ̍ mi̍ Āma̍la̍kāi̍tīi̍ya̍, a̍ Ke̍na̍na̍i̍tīi̍ya̍a̍ wa̍ o̍ lɛ̄ŋndē ŋ̄pēmbūle̍ŋ nda̍, ā kɔ̍ yo᷅m nda̍. Ma̍ chūā nda̍ tōūwɔ̄ɔ̍ lo̍ŋ ma̍ hūŋ a̍ nda̍ pɔ̍ɔ̍li̍ Hɔ̍ɔ̍māā chīe̍e̍.