Read Southern Kisi Nɔ̍mbāā 15 Bible Online

Nɔ̍mbāā 15 - Southern Kisi bible

Nɔ̍mbāā 15

¹O̍ ko̍ŋ Kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl Mūu̍sē āā,

²“Di̍mu̍l wa᷅ŋnda̍ I̍sɔ̄lūɛ̄ī māā nyɛ̄ ya̍ I̍ di̍mi̍ wo̍ ndu̍ cho̍ ho̍ō ni̍. Tē lā fūūlu̍u̍ o̍ lɛ̄ŋndē ya̍ I̍ cho̍ nya̍ kīo̍o̍ le̍ŋ ni᷄ŋ pɛ̍,

³mī lā yēēma̍ le̍ sa̍lāla̍ŋ sōlīo̍o̍ o̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍, ō wa̍ sa̍lālā lūāmāā, ɔ̄ɔ̄ ō wa̍ sa̍lālā wāŋnda̍ ō chūā būŋga᷄ŋ le̍ sōlīo̍o̍ la̍ŋ, ɔ̄ɔ̄ ō wa̍ sa̍lālā wāŋnda̍ pīla̍ a̍ kɛ̍ɛ̍si̍a̍a̍ a̍ kɔ̄ltā ndāla̍ŋ le̍ sōlīo̍o̍ la̍ŋ, ɔ̄ɔ̄ ō wa̍ sa̍lālā nya̍ nɔ̄ le̍ sōlīo̍o̍ o̍ bɔ̄ŋa᷅ŋndā nyāla̍ŋ chōo̍ la̍ŋ, sa̍lāla̍ŋ ndāŋ ki̍nɛ̍i̍, lā nɔ̄ mī lā sōli̍ la̍ŋ a̍ nāūwāā nyāā to̍o̍yīa̍a̍, ɔ̄ɔ̄ sāa̍ nyāa̍, ɔ̄ɔ̄ chūīŋāā nyāa̍. Sa̍lāla̍ŋ ndāŋ ki̍nɛ̍i̍, tē chūŋ ndɔ̄ɔ̍ ō kōma̍l la̍ pɛ̍, ya̍ Mɛ̄lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄.

⁴Ndu̍yɛ̍ wānā o̍ wāna̍ wa̍ sa̍lā lūāmāa̍ sōlīo̍o̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ a̍ sāa̍, ɔ̄ɔ̄ chūīŋndo̍ pɛ̍, wānā ko̍ŋ ō nɔ̄ mbō hīŋ a̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā tīɔ̍ɔ̍ŋ, mbō līnda̍ ndu̍ a̍ chūɛ̄īmā ɔ̄li̍fīi̍ya̍ŋ pa̍ŋtīi̍la̍ŋ lā tīɔ̍ɔ̍ŋ, ndu̍ cho̍ sa̍lā tɔ̄lɔ̄ɔ̄ ku̍llo̍ ni̍. O̍ ko̍ŋ kɔ̍ɔ̍lī mbō hīŋ a̍ mūɛ̄īmā kīle̍pīi̍ya̍ŋ pa̍ŋtīi̍la̍ŋ lā tīɔ̍ɔ̍ŋ le̍ sa̍lā māmūɛ̄īyo̍ sōlīo̍o̍. O̍ ko̍ŋ, mā mɔ̄sɔ̍ŋa̍ chɔ̄lu̍ cho̍ ko̍ŋ le̍ sa̍lā lūāmāa̍ sōlīo̍o̍ wo̍ sa̍lāa̍ sōlī a̍ kōlō ko̍ŋ ndu̍yɛ̍ a̍ mūɛ̄īmā kīle̍pīi̍ma̍ ma̍ŋ.

⁵

⁶Ndu̍yɛ̍, tē ō wa̍ pɛ̍ māā a̍ sāā fɔ̍ŋndɔ̍ɔ̍ wāŋndo̍ ō chō sa̍lāa̍ sōlīo̍o̍ ni̍, wānā ko̍ŋ ō nɔ̄ mbō hīŋ a̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā hīɔ̍ɔ̍lu̍, mbō līnda̍ ndu̍ a̍ chūɛ̄īmā ɔ̄li̍fīi̍ya̍ŋ pa̍ŋtīi̍la̍ŋ lā yāa̍, le̍ sa̍lā tɔ̄lɔ̄ɔ̄ ku̍llo̍, mbō mɔ̄sɔ̍ŋa̍ sāā fɔ̍ŋndɔ̍ ko̍ŋ sa̍lāa̍ sōlī a̍ kōlō li̍ndāā kōŋ,

⁷lātūlu̍ a̍ mūɛ̄īmā mākīle̍pīi̍ya̍ŋ pa̍ŋtīi̍la̍ŋ lā yāa̍ le̍ sa̍lā māmūɛ̄īyo̍. Sa̍lālā wāā le̍nde̍ tē chūŋ ndɔ̄ɔ̍ kōma̍l la̍ pɛ̍, ya̍ Mɛ̍lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄.

⁸Ndu̍yɛ̍ tē ō wa̍ pɛ̍ māā a̍ nāū tōōyōo̍ wāŋndo̍ ō chō sa̍lāa̍ sōlīo̍o̍ ni̍, ō wa̍ sa̍lā lūāmāā, ō wa̍ sa̍lā wāŋndo̍ ō chūa̍ ībūŋgā le̍ sōlī, ɔ̄ɔ̄ ō wa̍ sa̍lā kɔ̄l nyūlū wāŋndo̍ chō sōlīo̍o̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ ni̍,

⁹wānā ko̍ŋ ō nɔ̄ mbō hīŋ a̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā ŋɔ᷄mpu᷅m, mbō līnda̍ ndu̍ a̍ chūɛ̄īmā ɔ̄li̍fīi̍ya̍ŋ pa̍ŋtīi̍la̍ŋ lā hīɔ̍ɔ̍lu̍, le̍ sa̍lā tɔ̄lɔ̄ɔ̄ ku̍llo̍, mā mɔ̄sɔ̍ŋa̍ nāū kōŋ sa̍lāa̍ sōlī, a̍ kōlō li̍ndāā kōŋ,

¹⁰lātūlu̍ a̍ mūɛ̄īmā mākīle̍pīi̍ya̍ŋ pa̍ŋtīi̍la̍ŋ lā hīɔ̍ɔ̍lu̍ le̍ sa̍lā māmūɛ̄īyo̍. Sa̍lā wāā le̍nde̍ tē chūŋ ndɔ̄ɔ̍ ō kōma̍l la̍ pɛ̍, ya̍ Mɛ̍lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄.

¹¹“Chɔ̄lūa̍a̍ ha̍ā ki̍nɛ̍i̍, nāū tōōyē ni̍, sāā ni̍, chūīŋ ni̍, tē lā wa̍ sa̍lāa̍ sōlīo̍o̍ a̍ ō pīlɛ̍ pɛ̍, nu̍a̍ā nya̍ nɔ̄ ni̍ mī lā tōsa̍.

¹²Chɔ̄lūa̍a̍ ha̍ā ki̍nɛ̍i̍, chɔ̄lū o̍ chɔ̄lū, nyɛ̄m nya̍ nɔ̄ mī lā mɔ̄sɔ̍ŋa̍ sa̍lāa̍ sōlī a̍ ndu̍ wo̍ŋ, mu̍ŋ cho̍ mu̍ŋ ni̍. Ndu̍yɛ̍ mɛ̄ɛ̍ kpɛ̍ chɔ̄lūāā nya̍ wā sa̍lāla̍ŋ sōlīo̍o̍ wa̍ ā wā ku̍ndā yɛ̍, le̍nde̍ ko̍ni̍ nyɛ̄m mu᷅ŋ bɛ̍ɛ̍ ŋ̍ nɔ̍ ni̍ mī ŋ̄ wa̍ ku̍ndā.

¹³Wānā o̍ wāna̍ cho̍ I̍sɔ̄lūɛ̍i̍nɔ̍ɔ̍, tē ō wa̍ sa̍lāa̍ lōmɔ̄ɔ̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ pɛ̍, mbō wa̍ sa̍lā ya̍ Mɛ̍lɛ̄ka̍ tūɛ̄ī chu᷅ŋ ndɔ̄ɔ̍ mī hi̍ni̍ kɔ̄l lo̍ pɛ̍, ō nɔ̄ mbō tōl sāwāla̍ŋ ndāŋ kɔ̄ɔ̄lī.

¹⁴Ndu̍yɛ̍ chɔ̍ŋ a̍ hāū mbō kūɛ̄ a̍ lāchī kɛ᷅, ō wa̍ mi̍a̍lāa̍ hu᷅ŋ nya̍ tɛ̄ɛ̄ŋ nda̍ ni̍, ō wa̍ wa̍nāā lēkāa̍wa̍a̍ cho̍ ni᷅ŋ nya̍ tɛ̄ɛ̄ŋ pāāndū wa̍ ni̍, tē ō pīlɛ̍ ō yēēma̍ le̍ sa̍lā wāā nu̍a̍ā lōmɔ̄ɔ̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ pɛ̍, mbō wa̍ sa̍lā ya̍ Mɛ̍lɛ̄ka̍ tūɛ̄ī chu᷅ŋ ndɔ̄ɔ̍ mī hi̍ni̍ kɔ̄l lo̍, wānā ko̍ŋ ō nɔ̄ mbō tōl sāwāla̍ la̍ŋ nda᷅ŋ kɔ̄ɔ̄lī.

¹⁵Chɔ̍ŋ a̍ hāū mbō kūɛ̄ a̍ lāchī kɛ᷅, sāwāla̍ cho̍ a̍ sa̍lāla̍ŋ ndāŋ sōlīo̍o̍ o̍kɔ̄ɔ̄ la̍ŋ, sāwāla̍ cho̍ le̍ fɛ̍ɛ̍ŋ a̍ fɛ̍ɛ̍ŋ nda̍ŋ la̍ cho̍ ni̍, ndu̍yɛ̍ lā chō le̍ nya̍ fa̍ū, I̍sɔ̄lūɛ̍i̍nɔ̍ ni̍, wāna̍ lēkāa̍ ni̍. Nya̍ kpo̍u̍ nyɔ̄ɔ̍ pīlɛ̍ kpe̍ nya̍ chō ya̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l ni̍.

¹⁶Sāwā o̍ sāwa̍ cho̍ le̍ nya̍, ndu̍yɛ̍ a̍ pɛ̄ɛ̄kū o̍ pɛ̄ɛ̄kū cho̍ le̍ nya̍, wānāā lēkāa̍wa̍a̍ cho̍ nya̍ tɛ̄ɛ̄ŋ nda̍ bɛ̍ɛ̍, ā nɔ̄ mā chu̍a̍ pɛ̄ɛ̄kūlā lāŋ, ndu̍yɛ̍ mā wa̍ o̍ sāwāla̍ la̍ŋ bɛ̄ŋgu̍.”

¹⁷Mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl vɛ̄lɛ̄ Mūu̍sē āā,

¹⁸“Di̍mu̍l wa᷅ŋnda̍ I̍sɔ̄lūɛ̄ī māā, tē lā fūūlu̍u̍ o̍ lɛ̄ŋndē ya̍ I̍ cho̍ nya̍ kīo̍o̍ le̍ŋ ni᷄ŋ pɛ̍,

¹⁹lā wā ni̍ŋ tɔ̍lɔ̄ɔ̄la̍ cho̍ o̍ lɛ̄ŋndē lēŋ ni᷄ŋ nda̍ŋ dīo̍o̍. Kɛ̍ ndu̍yɛ̍ tɔ̄lɔ̄ɔ̄la̍ŋ nda᷅ŋ lā nɔ̄ mī lā sōli̍ lā ti᷄ŋ, le̍ mī lā yɔ̄ŋgu̍ la̍ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ māā kē.

²⁰Tē lā kāndu̍ chīɔ̄ɔ̄ŋ nyāa̍ŋ kōūwɔ̄ɔ̍, ɔ̄ɔ̄ kēndīo̍o̍ pɛ̍, kpūŋgbɛ̄ī bēe̍dīi̍ tāse̍i̍ nya̍ chō tōōsīāā a̍ kōlo̍ tɔ̄lɔ̄ɔ̄ ko̍ŋ nde̍, lā nɔ̄ mī lā yɔ̄ŋgu̍ ndi̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍. Lā nɔ̄ mī lā yɔ̄ŋgu̍ kpūŋgbɛ̄ī bēe̍dīi̍ ke̍ŋ o̍ ya̍ lo̍, mɛ̄ɛ̍ nya̍ yɔ̄ŋgū wi̍tīi̍ŋ tāse̍ŋ nya̍ nɛ̄ī o̍ fo̍ndā nyā lu̍a̍ā ŋ̄wi̍tīi̍yo̍ wo̍ yɛ̍.

²¹Chɔ̍ŋ a̍ hāū mbō kūɛ̄ a̍ lāchī kɛ᷅, tē lā kōū chīɔ̄ɔ̄ŋ nyāa̍ŋ pɛ̍, kpūŋgbɛ̄ī bēe̍dīi̍ ta̍se̍i̍ nya̍ chō tōōsīāā a̍ kōlo̍ tɔ̄lɔ̄ɔ̄ ko̍ŋ nde̍, lā nɔ̄ mī lā yɔ̄ŋgu̍ ndi̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍.

²²“Kɛ̍ ndu̍yɛ̍ mī ī yɔ̄nu̍ŋ dɔ̍ɔ̍, sāwāla̍ ya̍ Mɛ̄lɛ̄ka̍ Ya̍a̍wɛ̄ɛ̄ cho̍ Mūu̍sē kīo̍o̍ la̍ŋ, mī lā tɛ̄ɛ̄mbu̍u̍ la̍ŋ, kɛ̍ mī lā sīna̍ le̍.

²³Ɔ̄ɔ̄ mī ī yɔ̄nu̍ŋ dɔ̍ɔ̍ o̍ sīɔ̄dīi̍ lāchīo̍o̍ ni᷄ŋ, nyɛ̄ o̍ nyɛ̄ ya̍ I̍ di̍mu̍l Mūu̍sē mbo̍ dīmūl nya̍ le̍ tōsāa̍, mī chūāā nyāā ma̍māa̍ ā tōsa̍ ndu̍ le̍.

²⁴Tē ō wa̍ pɛ̍, māā bīōndɔ᷄ŋndo̍ yɔ̍nu̍ŋ a̍ ku̍ndāa̍ kpo̍u̍ ni̍, māā ā sīna̍ ndi̍ pɛ̄ŋgu̍ le̍ ni̍, mɛ̄ɛ̍ ku̍ndāa̍ kpo̍u̍ ā nɔ̄ mā hīŋ a̍ nāū tōōyē fɔ̍ŋndɔ̍ɔ̍, le̍ sa̍lā lūāmāa̍ sōlīo̍o̍ o̍ ya̍ Mɛ̍lɛ̄ka̍ lo̍, sa̍lā chūŋ ndɔ̄ɔ̍ ō kōmāl la̍ mī hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄ wo̍. Ndu̍yɛ̍, sa̍lā lūāmāā kōŋ, ā nɔ̄ mā sōli̍ ndu̍ a̍ sa̍lā tɔ̄lɔ̄ɔ̄ ku̍llo̍, ndu̍yɛ̍ a̍ sa̍lā mūɛ̄īmā kīle̍pīi̍yo̍ lātūlu̍, mɛ̄ɛ̍ i̍ cho̍ ī tūwāā yɛ̍. O̍ ko̍ŋ kɔ̍ɔ̍lī, ā nɔ̄ vɛ̄lɛ̄ mā sōli̍ chūīŋ tōōyōo̍ sa̍la̍ fa̍ŋā yɔ̄ŋ wɔ̄ɔ̍ŋndo̍ wo̍.

²⁵Wānā so̍līāā lāsa̍lāa̍ o̍ nɔ̄ mbō sōli̍ sa̍lāa̍ le̍ I̍sɔ̄lūɛ̍i̍ya̍ kpo̍u̍, ko̍ŋ to̍sā ni̍, mī ya̍ Mɛ̍lɛ̄ka̍ ma᷄l nda̍ le̍ yɔ̄ŋ ndā wɔ̍ɔ̍ŋ kōŋ. Kāni̍ fo̍ndōle̍, ō cho̍ yɔ̍ŋ wɔ̄ɔ̍ŋ nda̍ kɛ̄ɛ̄si̍a̍a̍ le̍ tōsā le̍. Nyɛ̄ kōŋ nda̍ hūŋ a̍ sa̍lā kōŋ ni̍, ma̍ lōm ndu̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍, ndu̍yɛ̍ ma̍ sōlī vɛ̄lɛ̄ sa̍la̍ fa̍ŋā yɔ̄ŋ wɔ̄ɔ̍ŋndo̍ wo̍, le̍ bīōndɔ᷄ŋ nda̍ tōsa̍ wo̍.

²⁶Mɛ̄ɛ̍ o̍ nɛ̄īyo̍ ho̍ō ni᷄ŋ, ya̍ Mɛ̍lɛ̄ka̍ lōōkū I̍sɔ̄lūɛ̍i̍ya̍ kpo̍u̍, a̍ wānāā lēkāa̍wa̍a̍ cho̍ nda̍ tɛ̄ɛ̄ŋ nda̍ mālɔ̄ɔ̄ le̍ yɔ̍ŋ ndā wɔ̍ɔ̍ŋndo̍ ni̍. Kāni̍ fo̍ndōle̍, bīōndɔ᷄ŋ to̍sa̍ŋ ndo̍, I̍sɔ̄lūɛ̍i̍ya̍, a̍ wānāā lēkāa̍wa̍a̍ cho̍ nda̍ tɛ̄ɛ̄ŋ nda̍ kpo̍u̍, nda̍ to̍sa̍ ndu̍ ni̍.

²⁷“Kɛ̍ ndu̍yɛ̍ tē ō wa̍ pɛ̍ māā wāŋndo̍ ndu̍ pīlɛ̍ to̍sa̍ bīōndɔ᷄ŋndo̍ ni̍, mbo̍ tōsā yɔ̄ŋ wɔ̄ɔ̍ŋ ko̍ŋ, mɛ̄ɛ̍ wānā ko̍ŋ ō nɔ̄ mbō hīŋ a̍ chūīŋ lāāndōo̍ o̍ chi̍i̍ wɔ̄sīo̍o̍, le̍ sa̍la̍ fa̍ŋā yɔ̄ŋ wɔ̄ɔ̍ŋndo̍ wo̍.

²⁸O̍ ko̍ŋ, mī wānā so̍līāā lāsa̍lāa̍ ō sōli̍ sa̍lā kōŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍, le̍ bīōndɔ᷄ŋ wānā ko̍ŋ ō tōsa̍, mbo̍ tōsā yɔ̄ŋ wɔ̄ɔ̍ŋndo̍ wo̍. Ko̍ŋ to̍sā ni̍, mī wānā ko̍ŋ ō sɔ̄la̍ mālɔ̄ɔ̍ le̍ yɔ̄ŋ ndɔ̄ wɔ̍ɔ̍ŋ kōŋ.

²⁹Sāwāa̍ ho̍ō ō chō le̍ wānā o̍ wānā, ō wa̍ I̍sɔ̄lūɛ̍i̍nɔ̍, ō wa̍ wa᷅na̍ lēkāa̍ cho̍ nya̍ tɛ̄ɛ̄ŋ ndo̍.

³⁰“Kɛ̍ wānā o̍ wāna̍ to̍sa̍ sūɛ̍i̍ o̍ si̍na̍ o̍ kɔ̄l ndɔ̄ɔ̍ ni᷄ŋ cha̍la̍ŋ māā yɔ̄ŋ wɔ̄ɔ̍ŋndo̍ i̍ cho̍ ni̍ ve̍ pɛ̍, ō wa̍ I̍sɔ̄lūɛ̍i̍nɔ̍, ō wa̍ wa᷅na̍ lēkāa̍, mɛ̄ɛ̍ ō ke᷄ ya̍ Mɛ̍lɛ̄ka̍ Ya̍a̍wɛ̄ɛ̄ lēbɛ̄ɛ̄ le̍. Ndu̍yɛ̍ wānā ko̍ŋ ō nɔ̄ mbō sɔ̄la̍ pīɔ̍mndo̍.

³¹Kāni̍ fo̍ndōle̍, le̍ mɛ̄ɛ̍ o̍ sōli̍ ya̍ Mɛ̍lɛ̄ka̍ Ya̍a̍wɛ̄ɛ̍ dīōm, mbo̍ tɛ̄ɛ̄mbūū sāwāla̍ nīla̍ŋ yɛ̍. Wānā ko̍ŋ ō nɔ̄ mbō sɔ̄la̍ pīɔ̍mndo̍. Ndu̍yɛ̍ ndu̍ pi̍la̍ tɔ̍ɔ̍ya̍ŋ pīɔ̍m ndɔ̄ɔ̍ ō wā cho̍o̍ ni̍.”

³²Bōōndi̍i̍ I̍sɔ̄lūɛ̍i̍ya̍ a̍ wa̍ o̍ lɛ̄ŋndē po̍lte̍ŋ ni᷄ŋ nde̍, pāa̍le̍ pi᷅lɛ̍ mi̍ wāŋnda̍ ā kōmāl pōo̍ yɔ̄mnde̍ tīŋgɔ̄ɔ̍ o̍ pāa̍le̍ pɛ̍ŋgīāāle̍ŋ chōo̍.

³³O̍ ko̍ŋ, mi̍ wānāa̍ ko̍ma̍l ndu̍ wa̍, ā bīī ndu̍ ma̍ hūŋ a̍ ndu̍ nāa̍ Mūu̍sē chu̍a̍ nda̍ E̍lɔ̄ŋ, a̍ I̍sɔ̄lūɛ̍i̍ya̍a̍ tu̍a̍a̍ kpo̍u̍.

³⁴Mɛ̄ɛ̍ nda̍ hīŋ a̍ ndu̍, ma̍ kɛ̄sī ndu̍ o̍ bīyɔ̄ɔ̍ ni᷄ŋ, fo̍ndōle̍, nda̍ a̍a̍ si̍na̍ wɔ̍ nyɛ̍ nda̍ a̍a̍ to̍sā a̍ ndu̍ wo̍ le̍.

³⁵Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ dīmūl Mūu̍sē āā, “Po̍ ko̍ŋ ō nɔ̄ mbō sɔ̄la̍ pīɔ̍mndo̍. Lā nɔ̄ mī lā sōli̍ ndu̍ o̍ dɔ̍ɔ̍ŋgɔ̍ɔ̍ ni᷄ŋ, mī I̍sɔ̄lūɛ̍i̍ya̍ kpo̍u̍ a̍ lo̍ ndu̍ vīī vīīyo̍ a̍ pōūta̍ŋ mbō vī.”

³⁶O̍ ko̍ŋ, ma̍ tōsā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nda̍ yɛ̍, ma̍ sōlī pōo̍ ho̍ō o̍ dɔ̍ɔ̍ŋgɔ̍ɔ̍ ni᷄ŋ, ma̍ lō ndu̍ vīī vīīyo̍ a̍ pōūta̍ŋ ha̍a̍a̍, mbo̍ wu̍.

³⁷O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

³⁸“Di̍mu̍l I̍sɔ̄lūɛ̍i̍ya̍ kpo̍u̍, māā chɔ̍ŋ a̍ hāū mbō kūɛ̄ a̍ lāchī kɛ᷅, dōmāla̍ nyāla̍ŋ lā nɔ̄ mī lā nɔ̄ mīsāla̍ŋ lēbɛ̄ŋgu̍ chɛ̍chɛ̍, a̍ yūēī būli̍īye̍ ī yīyāā lo̍ŋ.

³⁹Mīsāla̍ nya̍ chō la᷅ŋ dɔ̄wɔ̄ɔ̄ o̍ dōmāla̍ nyāla̍ŋ nda̍ŋ, lā chō māchūāā le̍ nya̍ yīya᷄ŋndo̍ a̍ sāwāla̍ nīla̍ŋ o̍kɔ̄ɔ̄. Te̍le̍ŋ o̍ te̍le̍ŋ nya̍ chē mīsāla̍ŋ nda᷅ŋ o̍ dōmāla̍ nyāla̍ŋ pɛ̍, lā lōōnu̍ŋ ndɔ̍ɔ̍ a̍ sāwāla̍ nīla̍ŋ o̍kɔ̄ɔ̄ kpo̍u̍, ndu̍yɛ̍ mī lā tōsa̍ nyɛ̄ la̍ di̍mi̍ le̍ tōsāa̍ wo̍. Ko̍ŋ to̍sā ni̍, lā fe̍ŋāŋ o̍ nɛ̄i̍ nūu̍ chōo̍ mī lā tōl yēēma̍ŋ nyāa̍ŋ, a̍ nyɛ̄m nya̍ chō chɔ̄ɔ̍ a̍ hɔ̄ltā nyāla̍ŋ mi̍ lā hɛ̄na̍ŋ mu̍ŋ ndo̍ŋ kɔ̄ɔ̄lī le̍.

⁴⁰Mīsāla̍ŋ nda᷅ŋ, lā chō māchūāā le̍ nya̍ yīyāla᷄ŋndo̍, le̍ mī lā tōsa̍ nyɛ̄ o̍ nyɛ̄ sāwāla̍ nīla̍ŋ lā dīmu̍l nya̍ le̍ tōsāa̍, le̍ mī lā wa̍ ā dīāndāā ya̍ Mɛ̍lɛ̄ka̍ nyāa̍ o̍ hɔ̄l.

⁴¹Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍. Ya̍ so̍li̍ nya̍ o̍ lɛ̄ŋndē I̍chi̍pīle̍ŋ ni᷄ŋ ni̍ mi̍ hu᷅ŋ a̍ nya̍, le̍ mī wa̍ Mɛ̄lɛ̄ka̍ nyā. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.”