Read Southern Kisi Nɔ̍mbāā 17 Bible Online

Nɔ̍mbāā 17 - Southern Kisi bible

Nɔ̍mbāā 17

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl Mūu̍sē āā,

²“Di̍mu̍l wa᷅ŋnda̍ I̍sɔ̄lūɛ̄ī mā ke᷄ nu̍m tīnda̍la̍ŋ tɔ̍ a̍ lā tīɔ̍ɔ̍ŋ, bōllē yu̍ŋgu̍ o̍ bōllē yu̍ŋgu̍ I̍sɔ̄lūɛ̄ī tīnda̍a̍ ō pīlɛ̍. Ndu̍yɛ̍ bōllē yu̍ŋgu̍ o̍ bōllē yu̍ŋgu̍ a̍ nɔ̄ mā pōōnyi̍a̍a̍ dīōlā ndɔ̄la̍ŋ o̍ tīnda̍ ndɔ̄ɔ̍.

³Tīnda̍ cho̍ le̍ yu̍ŋgu̍ Li̍va̍īyo̍ wo̍, dīōla̍ E̍lɔ̄ŋ nda̍ŋ ŋ̄ nɔ̄ ni̍ mā po̍o̍nyi̍a̍a̍ lēchōo̍. Wānā o̍ wāna̍ cho̍ yu̍ŋgu̍ fi̍nyā ndɔ̄ɔ̍ bōlle̍ŋ, ō nɔ̄ mbō yɔ̄ŋgu̍ tīnda̍a̍ ō pīlɛ̍.

⁴Tē ā bīī tīnda̍la̍ŋ ndāŋ pɛ̍ kpo̍u̍, ā kūɛ̄ a̍ la̍ŋ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ni᷄ŋ a̍ kɔ̍ yɛ̍ɛ̍mbūū la̍ŋ o̍ kɔ̍fū kpe̍ma̍a̍, nāa̍ ya̍ I̍ chɔ̍mnu̍ŋ nu̍m nda̍.

⁵Wāna̍ tīnda̍ ndɔ̄ɔ̍ ō chō pūīyo̍, mɛ̄ɛ̍ wānā ko̍ŋ ya̍ I̍ hɛ̍li̍ ni̍. Ko̍ŋ cho̍ tōsā ni̍ mī ŋɔ̄ɔ̄chīa̍ŋnda̍ wāŋnda̍ I̍sɔ̄lūɛ̄ī a̍ cho̍ la᷅ŋ a̍ nūm nda̍ŋ kpo̍u̍ mī lā chūū.”

⁶O̍ ko̍ŋ kɔ̍ɔ̍lī, mi̍ Mūu̍sē o̍ su̍a̍ā nāa̍ wāŋnda̍ I̍sɔ̄lūɛ̄ī chūa̍, mi̍ wānāa̍ wa̍ yu̍ŋgu̍la̍ ndāla̍ŋ bōlle̍ wa̍ ā kē ndu̍ tīnda̍la̍ŋ tɔ̍ a̍ lā tīɔ̍ɔ̍ŋ, tīnda̍ o̍ tīnda̍ le̍ yu̍ŋgo̍o̍ ō pīlɛ̍. Ndu̍yɛ̍ tīnda̍ E̍lɔ̄ŋ ndo̍ bɛ̍ɛ̍ o̍ wa̍ tīnda̍la̍ la̍ŋ tɛ̄ɛ̄ŋ.

⁷Mi̍ Mūu̍sē o̍ chu̍ā tīnda̍la̍ la̍ŋ mbo̍ kūā a̍ la̍ŋ o̍ tɛ̍ndīi̍ Mɛ̄lɛ̄ka̍a̍ ni᷄ŋ mbo̍ kɔ̍ yɛ̍ɛ̍mbūū la̍ŋ kɔ̍fu̍ kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ lāchī.

⁸Mɛ̄ɛ̍ pāa̍le̍ lē sɛ̄ dīi̍mā ndɔ̄ɔ̍, mi̍ Mūu̍sē o̍ ku̍ā o̍ tɛ̍ndīi̍ Mɛ̄lɛ̄ka̍a̍ ni᷄ŋ, mbo̍ sāālu᷄ŋ māā E̍lɔ̄ŋ tīnda̍ ndɔ̄ɔ̍, o̍ si̍m le̍ yu̍ŋgu̍ Li̍va̍īyo̍ wo̍ ō pūī ndu̍yɛ̍ mbo̍ sōlī lɛ̄ūwo̍ŋ, o̍ ko̍ŋ kɔ̍ɔ̍lī, mbo̍ yāndū ndu̍yɛ̍ mbo̍ kūām a̍lmɔ̍ŋ nda̍ŋ. Mūu̍sē o̍ ko̍ma̍l a̍lmɔ̍ŋ mā dīūwa᷄ŋ mā lɛ̄ɛ̄nda᷄ŋ o̍ tīnda̍a̍ ho̍ō.

⁹O̍ ko̍ŋ kɔ̍ɔ̍lī, mi̍ Mūu̍sē o̍ chu̍ā tīnda̍la̍ la̍ŋ kpo̍u̍ Mɛ̍lɛ̄ka̍ Ya̍a̍wɛ̄ɛ̍ lāchī, mbo̍ kūā a̍ la̍ŋ o̍ bɛ̍ɛ̄ I̍sɔ̄lūɛ̍i̍ya̍ kpo̍u̍ o̍ hɔ̄l. Bōlīī lāyu̍ŋgu̍e̍i̍ ki̍nɛ̍i̍, mi̍ wānā o̍ wānā o̍ kɔ̍ mɛ̍ɛ̍nda᷄ŋ mbo̍ chūā tīnda̍ ndɔ̄ɔ̍.

¹⁰Mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl Mūu̍sē āā, “Mi̍ŋgi̍ ti̍nda̍ E̍lɔ̄ŋ ndo̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ni᷄ŋ, mā kɔ̍ kɛ̍sī ndu̍ kɔ̍fu̍ kpe̍ma̍a̍ lāchī. Tīnda̍ ko̍ŋ ō nɔ̄ mbō wa̍ ō kɛ̄sīāā lo̍ŋ māā tāāmāsi̍ le̍ I̍sɔ̄lūɛ̍i̍ya̍a̍ si̍mu̍l la̍ ha̍ā wa̍ sīlāa̍. Ko̍ŋ to̍sā ni̍ mā pɛ̄ŋgi̍ ŋɔ̄ɔ̄chīa̍ŋnda̍ŋ a̍ ya̍ Mɛ̍lɛ̄ka̍, yɔ̄ŋi̍ nda̍ sɔ̄la̍ pi̍ɔ̍mndo̍.”

¹¹Ndu̍yɛ̍ mi̍ Mūu̍sē o̍ to̍sā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍.

¹²Mi̍ wāŋnda̍ I̍sɔ̄lūɛ̄ī a̍ di̍mūl Mūu̍sē āā, “Mbɔ̄ na̍a̍ ŋ̄ hīŋ pīɔ̍mndo̍ sɔ̄lā fɔ̍! Na̍a̍ ŋ̄ hīŋ chūū! Mɛ̄ɛ̄lu̍la̍ nāāla̍ŋ lā fūūlu̍u̍!

¹³Sɔ̄ɔ̄ŋgūūwo̍ bɛ̍ɛ̍ wānā sɔ̍ɔ̍ŋgu̍u̍ ni᷅ŋ tɛ̍ndīi̍ Mɛ̄lɛ̄ka̍a̍ īkɛ̄i̍ pɛ̍ ā vī. Mɛ̄ɛ̍ na̍a̍ kpo̍u̍ ŋ̄ hīŋ pīɔ̍mndo̍ sɔ̄lā.”