Read Southern Kisi Nɔ̍mbāā 2 Bible Online

Nɔ̍mbāā 2 - Southern Kisi bible

Nɔ̍mbāā 2

¹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē nda̍ E̍lɔ̄ŋ āā,

²“Bā o̍ bā nya̍ kēlū dɔ̍ɔ̍ŋgɔ̍ɔ̍ pɛ̍, yu̍ŋgu̍ o̍ yu̍ŋgu̍ o̍ nɔ̍ mbō nɔ̄ fo̍ndāa̍ o̍ ndɔ̄ɔ̍ o̍ dɔ̍ɔ̍ŋgɔ̍ kōŋ ni᷄ŋ, mī wānā o̍ wānā o̍ ta̍ŋgu̍l tɛ̍ndīi̍yo̍ o̍ ndɔ̄ɔ̍ o̍ bēēndi̍ɛ̍ī yu̍ŋgu̍ ndāa̍ bɛ̄ŋgu̍, ndu̍yɛ̍ mī chīɛ̄ī o̍ chīɛ̄ī nɔ̄ bēēndi̍ɛ̍īyo̍ o̍ bɛ̄ɛ̄ndīāā yu̍ŋgu̍ ndāa̍ bɛ̄ŋgu̍. Ndu̍yɛ̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ō nɔ̄ mbō wa̍ o̍ dɔ̍ɔ̍ŋgɔ̍ɔ̍ tɛ̄ɛ̄ŋ kpe̍e̍kpe̍i̍, mī tɛ̍ndīi̍ yu̍ŋgu̍ o̍ yu̍ŋgu̍ o̍ mu̍lūl ndu̍ hɔ̄lla̍.

³“Yu̍ŋgu̍ Chu̍dā wo̍ nda̍ nɔ̍ ni̍ mā wa̍ o̍ dɔ̍ɔ̍ŋgɔ̍ɔ̍ kūmbū pāa̍le̍ŋ lē chāŋndo̍ o̍ bēēndi̍ɛ̍ī ndāa̍ bɛ̄ŋgu̍ a̍ chīɛ̄īlā ndāla̍ŋ le̍nde̍ kpɛ̍ kpɛ̍. Na̍a̍sīɔ̄ŋ, po̍ Āmi̍na̍da̍bī wo̍, ndu̍ cho̍ bōllē yu̍ŋgu̍ Chu̍dā wo̍ ni̍.

⁴Pūa̍a̍ o̍ yu̍ŋgu̍ ko̍ŋ chōo̍ ā chō wāa̍la̍ŋ be̍le̍-ŋɔ̍mmɛ̍ū a̍ lā hīɔ̍ɔ̍lu̍ a̍ kɛ̄mɔ̄ɔ̍ lē ŋɔ᷄mpu᷅m (74,600).

⁵“Yu̍ŋgu̍ I̍sa̍a̍kā wo̍ nda̍ nɔ̍ ni̍ mā tāŋgu̍l yu̍ŋgu̍ Chu̍dā wo̍ īkɛ̄i̍. Nɛ̄ta̍a̍nīɛ̄ɛ̄l, po̍ Su̍a̍ā wo̍, ndu̍ cho̍ bōllē yu̍ŋgu̍ I̍sa̍a̍kā wo̍ ni̍.

⁶Pūa̍a̍ o̍ yu̍ŋgu̍ ko̍ŋ chōo̍ ā chō wāa̍la̍ŋ be̍le̍-ŋu̍ɛ̍ɛ̍nu̍ a̍ lā hīɔ̍ɔ̍lu̍ a̍ kɛ̄mɔ̄ɔ̍ lē hi̍ɔ̍ɔ̍lu̍ (54,400).

⁷“O̍ ko̍ŋ kɔ̍ɔ̍lī, yu̍ŋgu̍ Sɛ̍bu̍lɔ̄ŋ ndo̍ nda̍ nɔ̍ ni̍ mā tāŋgu̍l yu̍ŋgu̍ I̍sa̍a̍kā wo̍ īkɛ̄i̍. I̍li̍a̍a̍bī, po̍ Hɛ̍lɔ̄ŋ ndo̍, ndu̍ cho̍ bōllē yu̍ŋgu̍ Sɛ̍bu̍lɔ̄ŋ ndo̍ ni̍.

⁸Pūa̍a̍ o̍ yu̍ŋgu̍ ko̍ŋ chōo̍ ā chō wāa̍la̍ŋ be̍le̍-ŋu̍ɛ̍ɛ̍nu̍ a̍ lā ŋɔ᷄mmɛ̍ū, a̍ kɛ̄mɔ̄ɔ̍ lē hīɔ̍ɔ̍lu̍ (57,400).

⁹“Mɛ̄ɛ̍ fa̍ū fa̍ū, pūa̍a̍ o̍ yu̍ŋgu̍ Chu̍dā wo̍ chōo̍, a̍ yu̍ŋgu̍ I̍sa̍a̍kā wo̍, a̍ yu̍ŋgu̍ Sɛ̍bu̍lɔ̄ŋ ndo̍, ā chō wāa̍la̍ŋ kɛ̄mɛ̄ a̍ be̍le̍-ŋɔ̍ma̍a̍ a̍ lā ŋɔ᷄mpu᷅m a̍ kɛ̄mɔ̄ɔ̍ lē hīɔ̍ɔ̍lu̍ (186,400). Te̍le̍ŋ o̍ te̍le̍ŋ tē I̍sɔ̄lūɛ̍i̍ya̍ ā ma᷄l dɔ̍ɔ̍ŋgɔ̍ nda̍ chō wo̍ pɛ̍ mā wa̍ hīōūwɔ̄ɔ̍ lāchī, yu̍ŋgu̍ Chu̍dā wo̍ a̍ yu̍ŋgu̍la̍ ti̍ɔ̍ɔ̍ŋnda̍ŋ nda᷅ŋ, nda̍ nɔ̍ ni̍ mā si᷄m I̍sɔ̄lūɛ̍i̍ya̍a̍ tu̍a̍a̍ lāchī le̍ kɔ̄la̍ŋ.

¹⁰“Yu̍ŋgu̍ Lūbɛ᷅ŋ ndo̍, nda̍ nɔ̍ ni̍ mā tāŋgu̍l o̍ dɔ̍ɔ̍ŋgɔ̍ɔ̍ kūmbū tōūwo̍ o̍ bēēndi̍ɛ̍ī ndāa̍ bɛ̄ŋgu̍ a̍ chīɛ̄īlā ndāla̍ŋ le̍nde̍ kpɛ̍ kpɛ̍. Ɛ̄li̍sɔ̄ɔ̄, po̍ Si̍ɛ̍dīɔ̄ɔ̄ wo̍, ndu̍ cho̍ bōllē yu̍ŋgu̍ Lūbɛ᷅ŋ ndo̍ ni̍.

¹¹Pūa̍a̍ o̍ yu̍ŋgu̍ ko̍ŋ chōo̍ ā chō wāa̍la̍ŋ be̍le̍-hi̍ɔ̍ɔ̍lu̍ a̍ lā ŋɔ᷄mpu᷅m, a̍ kɛ̄mɔ̄ɔ̍ lē ŋūɛ̍ɛ̍nu̍ (46,500).

¹²“O̍ ko̍ŋ kɔ̍ɔ̍lī, yu̍ŋgu̍ Si̍mīɔ̄ŋ ndo̍, nda̍ nɔ̍ ni̍ mā tāŋgu̍l yu̍ŋgu̍ Lūbɛ᷅ŋ ndo̍ īkɛ̄i̍. Si̍ɛ̍lu̍mīɛ̄l, po̍ Sɔ̄lūīsi̍a̍dāī wo̍, ndu̍ cho̍ bōllē yu̍ŋgu̍ Si̍mīɔ̄ŋ ndo̍ ni̍.

¹³Pūa̍a̍ o̍ yu̍ŋgu̍ ko̍ŋ chōo̍ ā chō wāa̍la̍ŋ be̍le̍-ŋu̍ɛ̍ɛ̍nu̍ a̍ lā ŋɔ̄ma̍hīɔ̍ɔ̍lu̍ a̍ kɛ̄mɔ̄ɔ̍ lēyāa̍ (59,300).

¹⁴“O̍ ko̍ŋ kɔ̍ɔ̍lī, yu̍ŋgu̍ Ka̍a̍dī wo̍ nda̍ nɔ̍ ni̍ mā tāŋgu̍l yu̍ŋgu̍ Si̍mīɔ̄ŋ ndo̍ īkɛ̄i̍. I̍līa̍a̍sa̍fī, po̍ Du̍ɛ̄l wo̍, ndu̍ cho̍ yu̍ŋgu̍ ko̍ŋ bōlle̍ŋ ni̍.

¹⁵Pūa̍a̍ o̍ yu̍ŋgu̍ ko̍ŋ chōo̍ ā chō wāa̍la̍ŋ be̍le̍-hi̍ɔ̍ɔ̍lu̍ a̍ lā ŋūɛ̍ɛ̍nu̍ a̍ kɛ̄mɔ̄ɔ̍ lē ŋɔ᷄mpu᷅m a̍ be̍le̍-ŋu̍ɛ̍ɛ̍nu̍ (45,650).

¹⁶“Mɛ̄ɛ̍ fa̍ū fa̍ū, pūa̍a̍ o̍ yu̍ŋgu̍ Lūbɛ᷅ŋ ndo̍ chōo̍, a̍ yu̍ŋgu̍ Si̍mīɔ̄ŋ ndo̍, a̍ yu̍ŋgu̍ Ka̍a̍dī wo̍, ā chō wāa̍la̍ŋ kɛ̄mɛ̄, a̍ be̍le̍-ŋu̍ɛ̍ɛ̍nu̍ a̍ ō pīlɛ̍, a̍ kɛ̄mɔ̄ɔ̍ lē hīɔ̍ɔ̍lu̍ a̍ be̍le̍-ŋu̍ɛ̍ɛ̍nu̍ (151,450). “Te̍le̍ŋ o̍ te̍le̍ŋ tē I̍sɔ̄lūɛ̍i̍ya̍ ā ma᷄l dɔ̍ɔ̍ŋgɔ̍ nda̍ chō wo̍ pɛ̍ mā wa̍ hīōūwɔ̄ɔ̍ lāchī, yu̍ŋgu̍ Lūbɛ᷅ŋ ndo̍, a̍ yu̍ŋgu̍la̍ ti̍ɔ̍ɔ̍ŋnda̍ŋ nda᷅ŋ, nda̍ nɔ̍ ni̍ mā wa̍ ku̍ndā dīi̍ŋ ndɔ̄ɔ̍ le̍ fūlāa̍.

¹⁷“O̍ ko̍ŋ kɔ̍ɔ̍lī, tē yu̍gu̍la̍ ya̍a̍la̍ŋ nda᷅ŋ lā fūla̍ pɛ̍, wānāa̍ fu̍la̍ o̍ yu̍ŋgu̍ Li̍va̍īyo̍ chōo̍ ma̍ nɔ̄ tɛ̍ndīi̍la̍ ndāla̍ŋ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ a̍ nya̍ lātūlu̍ wo̍ lā bālāā wa̍, nda̍ fūla̍ vɛ̄lɛ̄. Mɛ̄ɛ̍ dɔ̍ɔ̍ŋgɔ̍ɔ̍ ō chō ō pīɔ̄ūwāā a̍ yu̍ŋgu̍la̍ŋ yɛ̍, le̍nde̍ ko̍ni̍ nda̍ nɔ̄ vɛ̄lɛ̄ ni̍ mā fūla̍ a̍ yu̍ŋgu̍la̍ŋ le̍nde̍ kpɛ̍ kpɛ̍ le̍ kɔ̄la̍ŋ, wānā o̍ wānā o̍ bēēndi̍ɛ̍ī yu̍ŋgu̍ ndɔ̄ɔ̍ bɛ̄ŋgu̍.

¹⁸“Yu̍ŋgu̍ E̍fi̍lūēm ndo̍, nda̍ nɔ̍ ni̍ mā tāŋgu̍l o̍ dɔ̍ɔ̍ŋgɔ̍ɔ̍ kūmbū pāa̍le̍ŋ lē dēllo̍ o̍ bēēndi̍ɛ̍ī ndāa̍ bɛ̄ŋgu̍, a̍ kāa̍la̍ŋ ndāla̍ŋ le̍nde̍ kpɛ̍ kpɛ̍. Īlīsi̍a̍mā, po̍ Āmi̍hu̍dī wo̍, ndu̍ cho̍ bōllē yu̍ŋgu̍ E̍fi̍lūēm ndo̍ ni̍.

¹⁹Pūa̍a̍ o̍ yu̍ŋgu̍ ko̍ŋ chōo̍ ā chō wāa̍la̍ŋ be̍le̍-hi̍ɔ̍ɔ̍lu̍, a̍ kɛ̄mɔ̄ɔ̍ lē ŋūɛ̍ɛ̍nu̍ (40,500).

²⁰“O̍ ko̍ŋ kɔ̍ɔ̍lī, yu̍ŋgu̍ Mānāa̍sē wo̍, nda̍ nɔ̍ ni̍ mā tāŋgu̍l yu̍ŋgu̍ E̍fi̍lūēm ndo̍ īkɛ̄i̍ o̍ bēēndi̍ɛ̍ī ndāa̍ bɛ̄ŋgu̍. Ka̍ma̍līɛ̄l, po̍ Pɛ̄da̍a̍sɔ̄ wo̍, ndu̍ cho̍ yu̍ŋgu̍ ko̍ŋ bōlle̍ŋ ni̍.

²¹Pūa̍a̍ o̍ yu̍ŋgu̍ ko̍ŋ chōo̍ ā chō wāa̍la̍ŋ be̍le̍-ya̍a̍ a̍ lā tīɔ̍ɔ̍ŋ a̍ kɛ̄mɔ̄ɔ̍ lē dīi̍ŋ (32,200).

²²“O̍ ko̍ŋ kɔ̍ɔ̍lī, yu̍ŋgu̍ Bɛ̍ŋnja̍mīŋ ndo̍ nda̍ nɔ̍ ni̍ mā tāŋgu̍l yu̍ŋgu̍ Mānāa̍sē wo̍ īkɛ̄i̍ o̍ bēēndi̍ɛ̍ī ndāa̍ bɛ̄ŋgu̍. A̍bi̍dāŋ, po̍ Ki̍di̍ɔ̍nī wo̍, ndu̍ cho̍ yu̍ŋgu̍ Bɛ̍ŋnja̍mi᷅ŋ ndo̍ bōlle̍ŋ ni̍.

²³Pūa̍a̍ o̍ yu̍ŋgu̍ ko̍ŋ chōo̍ ā chō wāa̍la̍ be̍le̍-ya̍a̍ a̍ lā ŋūɛ̍ɛ̍nu̍ a̍ kɛ̄mɔ̄ɔ̍ lē hīɔ̍ɔ̍lu̍ (35,400).

²⁴“Mɛ̄ɛ̍ fa̍ū fa̍ū, pūa̍a̍ o̍ yu̍ŋgu̍ E̍fi̍lūēm ndo̍ chōo̍, a̍ Mānāa̍sē, a̍ yu̍ŋgu̍ Bɛ̍ŋnja̍mīŋ ndo̍ ā chō wāa̍la̍ŋ kɛ̄mɛ̄ a̍ lā ŋɔ̄ma̍a̍, a̍ kɛ̄mɔ̄ɔ̍ lēpīlɛ̍ (108,100). Te̍le̍ŋ o̍ te̍le̍ŋ tē I̍sɔ̄lūɛ̍i̍ya̍ ā wa̍ fāŋa᷄ŋndo̍ nāa̍ nda̍ chō wa̍ pɛ̍, mā wa̍ hīōūwɔ̄ɔ̍ lāchī, yu̍ŋgu̍la̍ ya̍a̍la̍ŋ nda᷅ŋ nda̍ nɔ̍ ni̍ mā wa̍ ku̍ndā yāa̍ ndɔ̄ɔ̍ le̍ fūlāa̍.

²⁵“Yu̍ŋgu̍ Da᷅ŋ ndo̍, nda̍ nɔ̍ ni̍ mā tāŋgu̍l o̍ dɔ̍ɔ̍ŋgɔ̍ɔ̍ kūmbū bā lūāŋndo̍ o̍ bēēndi̍ɛ̍ī ndāa̍ bɛ̄ŋgu̍, a̍ chīɛ̄īlā ndāla̍ŋ le̍nde̍ kpɛ̍ kpɛ̍. Āhi̍ɛ̍ɛ̍sā, po̍ Āmi̍si̍a̍dāī wo̍, ndu̍ cho̍ bōllē yu̍ŋgu̍ Da᷅ŋ ndo̍ ni̍.

²⁶Pūa̍a̍ o̍ yu̍ŋgu̍ ko̍ŋ chōo̍ ā chō wāa̍la̍ŋ be̍le̍-ŋɔ̍mpu᷅m a̍ lā tīɔ̍ɔ̍ŋ a̍ kɛ̄mɔ̄ɔ̍ lē ŋɔ᷄mmɛ̍ū (62,700).

²⁷“O̍ ko̍ŋ kɔ̍ɔ̍lī, yu̍ŋgu̍ A̍sīɛ̄ɛ̄ wo̍ nda̍ nɔ̍ ni̍ mā tāŋgu̍l yu̍ŋgu̍ Da᷅ŋ ndo̍ īkɛ̄i̍ o̍ bēēndi̍ɛ̍ī ndāa̍ bɛ̄ŋgu̍. Pa̍kīɛ̄l, po̍ O̍chi̍lūāŋ ndo̍, ndu̍ cho̍ yu̍ŋgu̍ ko̍ŋ bōlle̍ŋ ni̍.

²⁸Pūa̍a̍ o̍ yu̍ŋgu̍ ko̍ŋ chōo̍ ā chō wāa̍la̍ŋ be̍le̍ hi̍ɔ̍ɔ̍lu̍ a̍ ō pīlɛ̍ a̍ kɛ̄mɔ̄ɔ̍ lē ŋūɛ̍ɛ̍nu̍ (41,500).

²⁹“O̍ ko̍ŋ kɔ̍ɔ̍lī, yu̍ŋgu̍ Nāfi̍ta̍lī wo̍ nda̍ nɔ̍ ni̍ mā tāŋgu̍l yu̍ŋgu̍ A̍sīɛ̄ɛ̄ wo̍ īkɛ̄i̍ o̍ bēēndi̍ɛ̍ī ndāa̍ bɛ̄ŋgu̍. A̍hi̍lūā, po̍ Ɛ̍lāŋ ndo̍ ndu̍ cho̍ yu̍ŋgu̍ ko̍ŋ bōlle̍ŋ ni̍.

³⁰Pūa̍a̍ o̍ yu̍ŋgu̍ ko̍ŋ chōo̍ ā chō wāa̍la̍ŋ be̍le̍-ŋu̍ɛ̍ɛ̍nu̍ a̍ lā yāa̍ a̍ kɛ̄mɔ̄ɔ̍ lē hīɔ̍ɔ̍lu̍ (53,400).

³¹“Mɛ̄ɛ̍ fa̍ū fa̍ū pūa̍a̍ o̍ yu̍ŋgu̍ Da᷅ŋ ndo̍ chōo̍, a̍ yu̍ŋgu̍ A̍sīɛ̄ɛ̄ wo̍, a̍ yu̍ŋgu̍ Nāfi̍ta̍lī wo̍ ā chō wāa̍la̍ŋ kɛ̄mɛ̄ a̍ be̍le̍-ŋu̍ɛ̍ɛ̍nu̍ a̍ lā ŋɔ᷄mmɛ̍ū a̍ kɛ̄mɔ̄ɔ̍ lē ŋɔ᷄mpu᷅m (157,600). Te̍le̍ŋ o̍ te̍le̍ŋ tē I̍sɔ̄lūɛ̍i̍ya̍ ā wa̍ fāŋa᷄ŋndo̍ nāa̍ nda̍ chō wa̍ pɛ̍ mā wa̍ hīōūwɔ̄ɔ̍ lāchī, yu̍ŋgu̍la̍ŋ nda᷅ŋ nda̍ nɔ̍ ni̍ mā mɛ̄ɛ̄lu̍ fūlā kpɔ̍ŋ, a̍ chīɛ̄īlā ndāla̍ŋ le̍nde̍ kpɛ̍ kpɛ̍, wānā o̍ wānā o̍ bēēndi̍ɛ̍ī yu̍ŋgu̍ ndɔ̄ɔ̍ bɛ̄ŋgu̍.”

³²Mɛ̄ɛ̍ nu̍a̍ā nda̍ chɔ᷄m I̍sɔ̄lūɛ̍i̍ya̍ a̍ yu̍ŋgu̍la̍ŋ le̍nde̍ kpɛ̍ kpɛ̍ ni̍, yu̍ŋgu̍la̍ fi̍nyāā ndāa̍. Ā wa̍ bōllē pīlɛ̍ fa̍ū fa̍ū o̍ dɔ̍ɔ̍ŋgɔ̍ɔ̍ ni᷄ŋ wāa̍la̍ŋ kɛ̄mɔ̄ɔ̍ lē ŋɔ᷄mpu᷅m, a̍ lā yāa̍, a̍ kɛ̄mɔ̄ɔ̍ lē ŋūɛ̍ɛ̍nu̍ a̍ be̍le̍-ŋu̍ɛ̍ɛ̍nu̍ (603,550).

³³Kɛ̍ wānāa̍ fu̍la̍ o̍ yu̍ŋgu̍ Li̍va̍īyo̍ chōo̍ wa̍ nda̍ ki̍nɛ̍i̍, ā chɔ᷄m ka̍ŋ mɛ̄ɛ̍ nda̍ chɔ᷄m yu̍ŋgu̍la̍ŋ lā pīlɛ̍ la̍ŋ yɛ̍ le̍. Kāni̍ fo̍ndōle̍, le̍nde̍ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ di̍mu̍l Mūu̍sē ni̍.

³⁴Mi̍ I̍sɔ̄lūɛ̍i̍ya̍ tōsā nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē. Bā o̍ bā nda̍ a̍a̍ ke̍lū dɔ̍ɔ̍ŋgɔ̍ɔ̍ pɛ̍, a̍ yu̍ŋgu̍la̍ŋ le̍nde̍ kpɛ̍ kpɛ̍ nda̍ a̍a̍ ta̍ŋgūl fo̍ndāŋnda̍ŋ ni̍ yu̍ŋgu̍ o̍ yu̍ŋgu̍ o̍ bēēdi̍ɛ̍ī ndāa̍ bɛ̄ŋgu̍ mā cha᷄l, ndu̍yɛ̍ tē nda̍ a̍a̍ wa̍ vɛ̄lɛ̄ fāŋa᷄ŋndo̍ pɛ̍ le̍ hīōūwɔ̄ɔ̍ lāchī, a̍ yu̍ŋgu̍la̍ŋ le̍nde̍ nda̍ a̍a̍ fu̍lā ni̍.