Read Southern Kisi Nɔ̍mbāā 25 Bible Online

Nɔ̍mbāā 25 - Southern Kisi bible

Nɔ̍mbāā 25

¹Bōōndi̍i̍ wāŋnda̍ I̍sɔ̄lūɛ̄ī a̍ wa̍ o̍ dɔ̍ɔ̍ŋgɔ̍ɔ̍ o̍ lɛ̄ŋndē dɛ̍ŋgbɛ̍le̍ŋ Si̍tīm, mi̍ wāŋ pīāāndūa̍a̍ I̍sɔ̄lūɛ̄ī a̍ ka̍ndū tīɔ̄mɔ̄ɔ̍ a̍ wāŋ lāāndūāā Mo̍wa̍bi̍tīi̍ya̍.

²O̍ ko̍ŋ, mi̍ wāŋ lāāndūa̍a̍ ha̍ā ā kāndū wāŋ pīāāndūa̍a̍ I̍sɔ̄lūɛ̍i̍ vēēlōo̍ o̍ sa̍lālā ndāla̍ŋ sōlīo̍o̍ o̍ mɛ̄lɛ̄ka̍a̍ ndāa̍ lo̍. O̍ ko̍ŋ kɔ̍ɔ̍lī, mi̍ wāŋ pīāāndūa̍a̍ I̍sɔ̄lūɛ̄ī a̍ ka̍ndū nyɛ̄ ndīāā lāsa̍lāa̍ ho̍ō dīo̍o̍ ndu̍yɛ̍ mā sōōlūū mɛ̍lɛ̄ka̍ wāŋnda̍ ha̍ā.

³Mɛ̄ɛ̍ mi̍ wāŋnda̍ I̍sɔ̄lūɛ̄ī bɛ̍ɛ̍ a̍ mu̍li᷄ŋ mɛ̍lɛ̄ka̍ Bāāl o̍ wa̍ o̍ Pēmbīī Pi̍ɔ̍ɔ̄ve̍ wo̍ sōōlūūwo̍ māā mɛ̄lɛ̄ka̍ ndā. Le̍ he̍ī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ o̍ ka̍lā ka̍lā a̍ wāŋnda̍ I̍sɔ̄lūɛ̄ī.

⁴Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā, “Wānāa̍ cho̍ wāŋnda̍ ha̍ā chīla̍ŋ nda̍ ki̍nɛ̍i̍, kɔ̍ a̍ nda̍ mā kɔ̍ di̍ū nda̍ ya̍ Mɛ̍lɛ̄ka̍ Ya̍a̍wɛ̄ɛ̍ lāchī īpāla̍ de̍ŋ. Ko̍ŋ to̍sā ni̍ tu̍mbe̍ ya̍ Mɛ̍lɛ̄ka̍ Ya̍a̍wɛ̄ɛ̄ dɔ̍u̍nu᷄ŋ a̍ nya̍ wo̍, mī pɔ̍lu̍l kɔ̄l.”

⁵O̍ ko̍ŋ, mi̍ Mūu̍sē o̍ dīmūl chɔ̍ɔ̍chi̍a̍a̍ I̍sɔ̄lūɛ̄ī āā, “Nya̍ chɔ̍ɔ̍chi̍a̍a̍, wānā o̍ wānā, wānā nu̍mndo̍ ō wa̍ mɛ̄lɛ̄ka̍ Bāāl, ho̍ō Pi̍ɔ̍ɔ̍ sōōlūūwo̍ pɛ̍, ā nɔ̄ mā dīī wānā nu̍m kōŋ.”

⁶Mūu̍sē a̍ I̍sɔ̄lūɛ̍i̍ya̍ ā pīli̍a̍a̍ ā wa̍ ā chūūŋgi̍āŋ kpo̍u̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ a̍ nya̍ lātūlu̍ wo̍ sōndōo̍, ā wa̍ cha᷄ŋndo̍ kpe̍e̍kpe̍i̍ Mɛ̍lɛ̄ka̍ lāchī. Mi̍ ī yɔ̄nu᷄ŋ ki̍nɛ̍i̍ mi̍ po̍ I̍sɔ̄lūɛ̍i̍nɔ̍ pi᷅lɛ̍ ō hūŋ a̍ chūā Mīdīāna̍tīi̍nɔ̍ɔ̍ o̍ tɛ̍ndīi̍ ndɔ̄ɔ̍ nda̍ hɔ̄l lo̍ŋ.

⁷Mɛ̄ɛ̍ Fi̍ni̍ha̍a̍sī, po̍ Ɛ̄li̍a̍a̍sā wo̍ ō chē sūɛ̍i̍ he̍ī, ndu̍ yɔ̍nūŋ māā po̍ ma̍ma̍ E̍lɔ̄ŋ, wa̍nā so̍līāā lāsa̍lāa̍ ni̍, mbo̍ mɛ̄ī wāŋnda̍ ā dīīna᷄ŋ ku̍ndāa̍ lo̍ŋ. Mbo̍ chūā ba̍l ndɔ̄ɔ̍

⁸mbo̍ tūāl pōo̍ ho̍ō kɔ̄ɔ̄lī, nda̍ chūā kōŋ o̍ tɛ̍ndīi̍ pōo̍, mbo̍ chūkū pōo̍ a̍ ba̍llo̍, o̍ ko̍ŋ kɔ̍ɔ̍lī, mbo̍ chūkū vɛ̄lɛ̄ chūa̍a̍, mbo̍ dīī nda̍. O̍ ko̍ŋ, mi̍ nāā kpūndɛ̍ Mɛ̄lɛ̄ka̍ tūsi̍ I̍sɔ̄lūɛ̍i̍ya̍ chōo̍ mbo̍ wā nda̍ dīūwo̍ wo̍ ō pɛ̄ŋgī.

⁹Kɛ̍ nāā kpūndɛ̍ kōŋ ndu̍ o̍o̍ di̍u̍ ni᷅ŋ wāŋnda̍ wāa̍la̍ŋ bi̍di̍i̍ŋ a̍ lā hīɔ̍ɔ̍lu̍ (24,000) I̍sɔ̄lūɛ̍i̍ya̍ tɛ̄ɛ̄ŋ.

¹⁰Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

¹¹“Ya̍ i̍i̍ dɔ̍u̍nu᷄ŋ tu̍mbe̍ a̍ nya̍ wāŋnda̍ I̍sɔ̄lūɛ̄ī. Kɛ̍ le̍ tu̍mbe̍ Fi̍ni̍ha̍a̍sī, po̍ Ɛ̄li̍a̍a̍sā wo̍ ō dɔ̄ɔ̄nu᷄ŋ ho̍ō sɔ̍ŋgɔ̍ nūu̍ wo̍, ndu̍ yɔ̍nūŋ māā po̍ ma̍ma̍ E̍lɔ̄ŋ wa̍nā so̍līāā lāsa̍lāa̍ ni̍, ō tōsa̍ I̍ tɛ̍ɛ̍mbu̍u̍ lɛ̍ nya̍ le̍.

¹²Le̍la̍ŋ di̍mu̍l ndu̍ māā I̍ cho̍ kpe̍ma̍ kɔ̄l nyūlōo̍ yīī a̍ ndu̍.

¹³Kpe̍ma̍ ko̍ŋ ndu̍ yɔ̍nūŋ ni̍ māā, chɔ̍ŋ a̍ te̍le̍ŋndo̍ ho̍ō mbō kūɛ̄ a̍ lāchī kɛ᷅, le̍ fɛ̍ɛ̍ŋ a̍ fɛ̍ɛ̍ŋ o̍ pūlālē ndɔ̄le̍ŋ chōo̍ wānāā sōlīāā lāsa̍lāa̍ ā fūlā ni̍ŋ ni̍. Kāni̍ fo̍ndōle̍, le̍ tu̍mbe̍ o̍ dɔ̍u̍nu᷄ŋ le̍ ya̍ Mɛ̍lɛ̄ka̍, ndu̍yɛ̍ mbo̍ tōsā mi̍ ma᷅l wāŋnda̍ I̍sɔ̄lūɛ̄ī le̍ yɔ̄ŋ ndā wɔ̍ɔ̍ŋndo̍ wo̍.”

¹⁴Ndu̍yɛ̍ I̍sɔ̄lūɛ̍i̍nɔ̍ nda̍ dīī ko̍ŋ nda̍ chūā Mīdīāna̍tīi̍nɔ̍ɔ̍ lātūlu̍ wo̍, dīōlā ndɔ̄la̍ŋ la̍ wa̍ ni̍ āā Si̍mi̍lī, po̍ Sa̍lū wo̍. Ndu̍yɛ̍ Si̍mi̍lī ko̍ŋ ō wa᷄ bōllē chīɛ̄īyo̍ ō pīlɛ̍ o̍ yu̍ŋgu̍ Si̍mīɔ̄ŋndo̍ chōo̍.

¹⁵Chūā Mīdīāna̍tīi̍nɔ̍ nda̍ dīī ko̍ŋ ndo̍ yɛ̄ dīōlā ndɔ̄la̍ŋ la̍ wa̍ ni̍ āā Ko̍si̍bī, chūa̍ Sɔ̍ū wo̍. Ndu̍yɛ̍ Sɔ̍ū fi̍nyā ndɔ̄ ko̍ŋ, ndu̍ wa̍ yu̍ŋgu̍la̍ Mīdīāna̍tīi̍la̍ŋ ō pīlɛ̍ bōlle̍ŋ ni̍.

¹⁶O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

¹⁷“Lā chīŋa̍la᷅ŋ Mīdīāna̍tīi̍ya̍ mī lā tɛ̄ɛ̄mbu̍u̍ nda̍.

¹⁸Kāni̍ fo̍ndōle̍ le̍ mɛ̄ɛ̍ nda̍ tōsa̍l nya̍ kāŋgālāa̍, ma̍ hūī nya̍ mi̍ lā mūli᷄ŋ mɛ̍lɛ̄ka̍ Ba̍a̍l, ho̍ō Pi̍ɔ̍ɔ̄ sōōlūūwo̍ māā mɛ̄lɛ̄ka̍ nyā yɛ̍, ndu̍yɛ̍ a̍ le̍ sa̍bu̍ Ko̍si̍bī wo̍, ndu̍ yɔ̍nu̍ŋ māā chūā wānā bɛ̍ndōo̍ Mi̍dīāŋ ni̍, chūa̍ sɔ̍la̍ pīɔ̍mndo̍ o̍ pāa̍le̍ nāā kpūndɔ̍ɔ̍ ō tōl nya̍ chōo̍ le̍ŋ ndo̍.”