Read Southern Kisi Nɔ̍mbāā 27 Bible Online

Nɔ̍mbāā 27 - Southern Kisi bible

Nɔ̍mbāā 27

¹Pāa̍le̍ pi᷅lɛ̍, mi̍ chūāūwāā wāŋ lāāndūa̍a̍ Sɛ̄lōfɛ̍ha̍dī wa̍, nda̍ yɔ̍nūŋ māā Ma̍a̍lāā, a̍ No̍wā, a̍ Hɔ̍ki̍lāā, a̍ Mi̍li̍kāā ndu̍yɛ̍ a̍ Tɛ̍sāā ni̍, ā cha᷄ŋ ma̍ kōmāl Mūu̍sē nda̍ Ɛ̄li̍a̍a̍sā wānā so̍līāā lāsa̍lāa̍, a̍ wāŋ bɛ̄ndūāā I̍sɔ̄lūɛ̍i̍ya̍ ndu̍yɛ̍ a̍ wāŋnda̍ I̍sɔ̄lūɛ̄ī kpo̍u̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ a̍ nya̍ lātūlu̍ wo̍ sōndōo̍. Ndu̍yɛ̍ Sɛ̄lōfɛ̍ha̍dī ko̍ŋ yɛ̄, fi̍nyā ndɔ̍ wa̍ Hɛ̍fā ni̍, Hɛ̍fā fi̍nyā ndɔ̍ wa̍ Ki̍li̍a̍a̍dī ni̍, Ki̍li̍a̍a̍dī fi̍nyā ndɔ̍ wa̍ Māka̍yā ni̍, Māka̍yā fi̍nyā ndɔ̍ Mānāa̍sē ni̍, Mānāa̍sē yɛ̍ fi̍nyā ndɔ̍ wa̍ Chōo̍sɛ̍ ni̍. O̍ ko̍ŋ, mi̍ chūāūwāa̍ Sɛ̄lōfɛ̍ha̍dī wa̍ ha̍ā ā kɔ̍ di̍mūl Mūu̍sē nda̍ Ɛ̄li̍a̍a̍sā a̍ wāŋ bɛ̄ndūāā I̍sɔ̄lūɛ̍i̍ya̍ kpo̍u̍ āā,

³“Nya̍ pi̍la̍ lā sīnā māā fi̍nyā nāa̍ ō vī o̍ lɛ̄ŋndē po̍lte̍ŋ ni᷄ŋ. Kɛ̍ ndu̍ ndu̍ pīɔ̍m ndɔ̄ɔ̍ le̍ yɔ̄ŋ wɔ̄ɔ̍ŋ ndɔ̍ o̍ to̍sa̍ wo̍ o̍ sɔ̍la̍ ndu̍ ni̍. Ndu̍ ve̍ wa̍nāa̍ to᷅l Ko̍lūāā kɔ̄ɔ̄lī, ma̍ sōlī Mɛ̄lɛ̄ka̍ Ya̍a̍wɛ̄ɛ̍ dīōm, ndu̍yɛ̍ ma̍ sɔ̄lā pīɔ̍mndo̍ wa̍ chōo̍ le̍. Ndu̍yɛ̍ fi̍nyā nāa̍ ō vīlu̍ chu̍ā wānā pɔ̍nɔ̍ le̍.

⁴Le̍la̍ŋ mɛ̄ɛ̍ o̍ vi̍lu̍ chu̍ā wānā pɔ̍nɔ̍ le̍ yɛ̍, yāndi̍i̍ dīōlā ndɔ̄la̍ŋ lā nyu᷅m o̍ yu̍ŋgu̍ ndāa̍ chōo̍ le̍. Na̍a̍ bɛ̍ɛ̍ lā ke̍ na̍a̍ lɛ̄ŋnde̍ŋ le̍ na̍a̍ le̍ŋ wānāya᷅ŋ fi̍nyā nāa̍ tɛ̄ɛ̄ŋ.”

⁵O̍ ko̍ŋ, mi̍ Mūu̍sē o̍ nyu̍nā Mɛ̄lɛ̄ka̍ Ya̍a̍wɛ̄ɛ̄ dīōm a̍ sūɛ̍i̍ he̍ī o̍kɔ̄ɔ̄.

⁶Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl ndu̍ āā,

⁷“Chūāūwāa̍ Sɛ̄lōfɛ̍ha̍dī wa̍ ā nɔ̄ di̍ mā nyūna̍ le̍ lɛ̄ŋnde̍ŋ le̍ nda̍le̍ŋ. Ke̍ nda̍ lɛ̄ŋnde̍ŋ le̍ nda̍le̍ŋ wānāya᷅ŋ fi̍nyā ndā wo̍ŋ tɛ̄ɛ̄ŋ māā nyɛ̄m nda̍ŋ ŋ̄kɛ᷅. Ke̍ nda̍ nyɛ̄m ke᷅ŋ fi̍nyā ndā wo̍ŋ mī ŋ̄ wa̍ le̍ nda̍.

⁸Ndu̍yɛ̍ di̍mu̍l wa᷅ŋnda̍ I̍sɔ̄lūɛ̄ī māā sāwa̍ ya̍ Mɛ̍lɛ̄ka̍ dɔ̄ū wo̍ cho̍ ho̍ō ni̍. Tē ō wa̍ pɛ̍ mī wānā pɔ̍nɔ̍ I̍sɔ̄lūɛ̍i̍nɔ̍ɔ̍ ō vī, ndu̍yɛ̍ mbō mɛ̄i̍ chu̍ā wānā pɔ̍nɔ̍ o̍ chūā wānā pɔ̍nɔ̍ le̍, po̍ vi᷅ ko̍ŋ ndo̍ nyɛ̄m ndɔ̍ŋ ki̍ɔ̍ɔ̍ŋ lā nɔ̄ mī lā ke̍ chūā ndɔ̄ wa̍nā la̍nɔ̍ o̍ mɛ̍i̍ yo̍.

⁹Tē po̍ ko̍ŋ ō mɛ̄i̍ chu̍ā wānā la̍nɔ̍ o̍ chūā wānā la̍nɔ̍ le̍, mɛ̄ɛ̍ nyɛ̄m ke᷅ŋ po̍ ko̍ŋ ŋ̄ nɔ̄ mī ŋ̄ wa̍ le̍ pɔ̄mbɔ̄ ndɔ̄ kɛ̄lɛ̄ŋgāā bɛ̄ ndɔ̄.

¹⁰Tē po̍ ko̍ŋ ō nɔ̍ pɔ̍mbɔ̄ kɛ̄lɛ̄ŋgāā bɛ̄ndū le̍, mɛ̄ɛ̄ nyɛ̄m ndɔ̍ŋ ki̍ɔ̍ɔ̍ŋ ŋ̄ nɔ̄ mī ŋ̄ wa̍ le̍ fi̍nyā ndɔ̄ pɔ̄mbɔ̄ ndɔ̄, kɛ̄lɛ̄ŋgāā bɛ̄ ndɔ̄.

¹¹Tē po̍ ko̍ŋ fi̍nyā ndɔ̄ o̍ nɔ̍ pɔ̍mbɔ̄ kɛ̄lɛ̄ŋgāā bɛ̄ndū le̍, wāna̍ po̍ ko̍ŋ nda̍ ndu̍ ā chō wānāyɛ̍i̍ kpɛ̍ɛ̍lūŋ o̍ yu̍ŋgu̍ ndāa̍ chōo̍ wo̍, lā nɔ̄ mī lā ke̍ wānā ko̍ŋ nyɛ̄m kɛ̍ŋ po̍ ko̍ŋ. Wāŋnda̍ I̍sɔ̄lūɛ̄ī a̍ nɔ̍ mā chūa̍ sūɛ̍i̍ he̍ī māā sāwā kpe̍e̍kpe̍i̍, mɛ̄ɛ̍ ya̍ Mɛ̍lɛ̄ka̍ Ya̍a̍wɛ̄ɛ̄ I̍ di̍mu̍l nūm Mūu̍sē yɛ̍.”

¹²O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā, “He̍l o̍ pēmbūŋ A̍ba̍lūīm ndo̍ŋ chōo̍ mā mɛ̍ɛ̍nda̍ŋ lɛ᷅ŋndē Ke̍nāŋnde̍ŋ kɔ̄ɔ̄lī kɔ̄ɔ̄lī kpo̍u̍, lɛ̄ŋndē ya̍ I̍ cho̍ I̍sɔ̄lūɛ̍i̍ya̍ kīo̍o̍ nyɛ̄ ndā le̍ŋ.

¹³Tē a̍ mɛ̍ɛ̍nda̍ŋ le̍ŋ pɛ̍ kpo̍u̍, a̍ cho̍ lɛ̍ tōlɔ̄ɔ̄ le̍, lo̍ŋ ŋ̄ chō lō ni̍ mā vī mɛ̄ɛ̍ E̍lɔ̄ŋ bɛ̍ nūm o̍ vi᷅ nɛ̄ī tɛ̍ɛ̄ŋ yɛ̍.

¹⁴Le̍ sa̍bū he̍ī ī chō yɔ̄nɔ᷄ŋndo̍ cho̍ ni̍, le̍ mɛ̄ɛ̍ nya̍ sōli̍ ya̍ dīōm, nya̍ E̍lɔ̄ŋ bɛ̍ nūm I̍sɔ̄lūɛ̍i̍ya̍ o̍ hɔ̄l o̍ lɛ̄ŋndē po̍lte̍ŋ ni᷄ŋ Si᷅ŋ, nāa̍ nya̍ sɔ̄la̍ mɛ̄ŋnda̍ŋ le̍ kōlɔ̄ɔ̍ wa̍ yɛ̍. Bōōndi̍i̍ wāŋnda̍ I̍sɔ̄lūɛ̄ī kpo̍u̍ a̍ wa̍ ŋɔ̄ɔ̄chīa̍ŋndo̍ a̍ ya̍ ve̍, lā ke̍ ya̍ lēbɛ̄ɛ̄ I̍sɔ̄lūɛ̍i̍ya̍ o̍ hɔ̄l lo̍ŋ, mī lā chɔ᷄m nda̍ māā Mɛ̄lɛ̄ka̍ dīāndāa̍ le̍ ya̍ I̍ cho̍ le̍.” (Mɛ̄ŋnda̍ŋ Mɛ̍lu̍i̍bā, o̍ fo̍ndāa̍ Ka̍dɛ̍sī, ma̍ŋ nda̍ chō ma᷅ŋ dīmīo̍o̍ ni̍.)

¹⁵O̍ ko̍ŋ kɔ̍ɔ̍lī, mi̍ Mūu̍sē o̍ pi̍ɛ̍ī Mɛ̄lɛ̄ka̍ mbo̍ dīmī āā,

¹⁶“O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ yōōmū wāna̍ chi̍o̍o̍ o̍ bā wo̍, yāndi̍i̍ mɛ̄ɛ̍ yu̍lu̍ wa̍nā mbō mīīŋgu̍ wāŋnda̍ ha̍ā chīla̍ŋ.

¹⁷Ke̍ nda̍ wāŋndo̍ o̍ si᷅m nda̍ lāchī mbō kūɛ̄ a̍ nda̍ o̍ chɔ̄ūwo̍, ndu̍yɛ̍ mbō mīīŋgu̍ a̍ nda̍ kɛ̍ndi̍a̍a̍ wo̍. Ko̍ŋ to̍sā ni̍ wānāā nūmnda̍ ā ve᷅ mɛ̄ɛ̍ sāa̍ ā wā nu̍a̍ā ā nɔ᷅ wa̍nā ma̍ndāā le̍ yɛ̍ le̍.”

¹⁸Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā, “Chɔ̄ɔ̍sūāā, po̍ Nu᷅ŋ ndo̍ ō nɔ̄lā mbō tōsa̍ kpe̍ku̍ ko̍ŋ. Ha̍ndu̍ ndu̍ bāa̍ o̍ lēbōl le̍ mbō mīīŋgu̍ o̍ fōōfō nu̍mndo̍.

¹⁹Kɔ̍ a̍ ndu̍ mā kɔ̍ si̍mī ndu̍ Ɛ̄li̍a̍a̍sā wānā so̍līāā lāsa̍lāa̍ lāchī a̍ I̍sɔ̄lūɛ̍i̍ya̍a̍ tu̍a̍a̍ kpo̍u̍, mā lo̍ o̍ ko̍ŋ mā ke̍ ndu̍ kpāāyāa̍ nda̍ kpo̍u̍ o̍ hɔ̄l lo̍ŋ le̍ mbō mīīŋgu̍ o̍ fōōfō nu̍mndo̍ mbō wa̍ nda̍ chīla̍ŋ.

²⁰Kpāāya̍ nūm o̍o̍ nɔ̍ le̍ wāa̍ I̍sɔ̄lūɛ̍i̍ya̍ chīla̍ŋ ndo̍, ke̍ ndu̍ kpāāyā ko̍ŋ le̍ mī I̍sɔ̄lūɛ̍i̍ya̍ kpo̍u̍ a̍ tu̍si̍ŋ ndu̍ o̍ bā bɛ̄ŋgu̍.

²¹I̍sɔ̄ɔ̍ o̍ īsɔ̄ɔ̍ i̍ wa̍ pɛ̍ le̍ ya̍ Mɛ̍lɛ̄ka̍ dīōmndo̍ nyūnāa̍ a̍ ndi̍ o̍kɔ̄ɔ̄, Ɛ̄li̍a̍a̍sā wānā so̍līāā lāsa̍lāa̍ ō chō wā a̍ ndu̍ la̍tu̍lu̍. Ō nɔ̄lā mbō nyūna̍ ya̍ dīōm sa̍na̍a̍ a̍ pōūtā tīɔ̍ɔ̍ŋnda̍ cho̍ le̍ ya̍ dīōmndo̍ nyūnāa̍ la̍ŋ, la̍ŋ la̍ yɔ̍nūŋ māā Yu̍lūīm a̍ Tu̍mīm ni̍. Chɔ̄ɔ̍sūāā ni̍ a̍ wāŋnda̍ I̍sɔ̄lūɛ̄ī kpo̍u̍, Ɛ̄li̍a̍a̍sā wa᷅ ni̍ŋ nda̍ nyɛ̄ nda̍ nɔ̄ le̍ tōsāa̍ wo̍ chɔ̄mndo̍ ni̍. O̍ īsɔ̄ɔ̍ o̍ īsɔ̄ɔ̍ ni̍ŋ nyɛ̄ o̍ nyɛ̄ o̍ di̍mu̍l nda̍ pɛ̍ le̍ tōsāa̍, ndu̍ nda̍ nɔ̄ ni̍ mā tōsa̍.”

²²O̍ ko̍ŋ kɔ̍ɔ̍lī, mi̍ Mūu̍sē o̍ to̍sā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍. Mbo̍ kūā a̍ Chɔ̄ɔ̍sūāā, mbo̍ kɔ̍ si̍mī ndu̍ Ɛ̄li̍a̍a̍sā, wānā so̍līāā lāsa̍lāa̍ lāchī, a̍ ku̍ndā I̍sɔ̄lūɛ̍i̍ya̍ kpo̍u̍.

²³O̍ ko̍ŋ kɔ̍ɔ̍lī, mbo̍ hāndū ndu̍ bāa̍ o̍ lēbōl, mbo̍ kē ndu̍ kpāāyāa̍ le̍ mbō mīīŋgu̍ o̍ fōōfo̍ ndɔ̄ɔ̍ mɛ̄ɛ̍ Mɛ̄lɛ̄ka̍ o̍ di̍mu̍l ndu̍ Mūu̍sē yɛ̍.