Read Southern Kisi Nɔ̍mbāā 29 Bible Online

Nɔ̍mbāā 29 - Southern Kisi bible

Nɔ̍mbāā 29

¹“ ‘Pāa̍le̍ tāse̍le̍ŋ o̍ pāŋgi̍i̍ ŋɔ̍mmɛ̍ūve̍ ni᷄ŋ, lā nɔ̄ mī lā bɔ̄ɔ̄ŋi̍āŋ kpo̍u̍ na̍a̍ pi᷅lɛ̍ le̍ ya̍ Mɛ̄lɛ̄ka̍ sōōlūūwo̍. Lā nɔ̍ mī lā tōsa̍ wa̍li̍ o̍ wa̍li̍ pa̍a̍le̍ le̍ŋ te̍. Pāa̍le̍ le̍ŋ lā nɔ̄ mī lā hɔ᷄ŋ pūtɛ̍nɛ̍i̍la̍ŋ.

²Pāa̍le̍ le̍ŋ lā nɔ̄ mī lā sōli̍ sa̍lālā lūāmāāla̍ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ a̍ nāū tōōyē fɔ̍ŋndɔ̍ɔ̍ ō pīlɛ̍, ndu̍yɛ̍ a̍ sāā ko̍ndo̍o̍ o̍ pīlɛ̍, o̍ ko̍ŋ kɔ̍ɔ̍lī, a̍ sāā ko̍ndu̍a̍a̍ fɔ̍ŋndu̍a̍a̍, a̍ chi̍i̍ wɔ̄sīo̍o̍ ō pīlɛ̍ wa̍ ā ŋɔ᷄mmɛ̍ū. Ndu̍yɛ̍ chɔ̄lūa̍a̍ ha̍ā ā nɔ̍ mā nɔ̄ sɔ̄ŋ o̍ sɔ̄ŋ te̍. Sa̍lāla̍ŋ ndāŋ tē chūŋ ndɔ̄ɔ̍ ō kōma̍l la̍ pɛ̍, ya̍ Mɛ̄lɛ̄ka̍ Ya̍a̍wɛ̄ɛ̄ I̍ hīni̍ kɔ̄l nyɛ̄ kɛ̄ndɛ̄ kɛ̍ndɛ̄.

³Ndu̍yɛ̍ nāū tōōyē fɔ̍ŋndɔ̍ nya̍ chō ho̍ō sa̍lāa̍ sōlī a̍ ndu̍ wo̍, sa̍lā tɔ̄lɔ̄ɔ̄ ku̍l nya̍ nɔ̄ mī lā mɔ̄sɔ̍ŋa̍ sōlī a̍ ndu̍ la̍tu̍lu̍ wo̍, ō nɔ̄ mbō wa̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā ŋɔ᷄mpu᷅m, mī lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ. Ndu̍yɛ̍ sāā ko̍ndo̍ nyā chō ho̍ō sa̍lāa̍ sōlī wo̍, sa̍lā tɔ̄lɔ̄ɔ̄ ku̍l nya̍ nɔ̄ mī lā mɔ̄sɔ̍ŋa̍ sōlī a̍ ndu̍ la̍tu̍lu̍ wo̍, ō nɔ̄ mbō wa̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā hīɔ̍ɔ̍lu̍, mī lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ.

⁴O̍ ko̍ŋ kɔ̍ɔ̍lī, sāā ko̍ndu̍a̍a̍ fɔ̍ŋndu̍a̍a̍ ŋɔ̍mmɛ̍ūwāā ka̍ŋ, ō kɛ᷅ o̍ kɛ᷅ lā nɔ̄ mī lā mɔ̄sɔ̍ŋa̍ ndu̍ sa̍lāa̍ sōlī a̍ sa̍lā tɔ̄lɔ̄ɔ̄ ku̍llo̍, kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā tīɔ̍ɔ̍ŋ, mī lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ.

⁵Ō fūla̍ o̍ sa̍lālā lāŋ kɔ̄ɔ̄lī, lā nɔ̄ vɛ̄lɛ̄ mī lā sōli̍ chūīŋ tōōyōo̍ ō pīlɛ̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍. Chūīŋ tōōyē kōŋ, ndu̍ cho̍ le̍ yɔ̄ŋndā nyāla̍ wɔ̍ɔ̍ŋnda̍ŋ fāŋāa̍ ni̍.

⁶Lā nɔ̄ mī lā wa̍ sa̍lāla̍ŋ nda᷅ŋ sōlīo̍o̍, lātūlu̍ a̍ sa̍lālā lūāmāālā nya̍ sōlī o̍ pāa̍le̍ tāse̍le̍ŋ chōo̍ o̍ īpāŋgu̍ o̍ īpāŋgu̍ ni̍ŋ nda̍ŋ, ndu̍yɛ̍ a̍ sa̍lālā tɔ̄lɔ̄ɔ̄ ku̍l nya̍ sōlī la̍ŋ, a̍ sa̍lālā lūāmāālā nya̍ sōlī le̍pa̍a̍ o̍ lēpāa̍ lātūlu̍ a̍ sa̍lā tɔ̄lɔ̄ɔ̄ ku̍llo̍ ndu̍yɛ̍ a̍ sa̍lālā mūɛ̄īmā kīle̍pīi̍ya̍ŋ ndo̍. Sa̍lāla̍ŋ ndāŋ tē chūŋ ndɔ̄ɔ̍ ō kōma̍l la̍ pɛ̍, ya̍ Mɛ̄lɛ̄ka̍ Ya̍a̍wɛ̄ɛ̄ I̍ hīni̍ kɔ̄l nyɛ̄ kɛ̄ndɛ̄ kɛ̍ndɛ̄.

⁷“ ‘O̍ pāŋgi̍i̍ ŋɔ̍mmɛ̍ūve̍ ni᷄ŋ mālɔ̄ tɔ̍, pāa̍le̍ le̍ŋ wānā o̍ wānā nɔ̍ mbō dē nyɛ̄ dīāā o̍ nyɛ̄ dīāā le̍, nya̍ kpo̍u̍ lā nɔ̄ mī lā chūūŋgi̍āŋ na̍a̍ pi᷅lɛ̍ le̍ ya̍ sōōlūūwo̍. Wānā o̍ wānā nɔ̍ mbō tōsa̍ wa̍li̍ o̍ wa̍li̍ o̍ pāa̍le̍ le̍ŋ chōo̍ le̍.

⁸Pāa̍le̍ le̍ŋ lā nɔ̄ mī lā sōli̍ sa̍lālā lūāmāāla̍ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ a̍ nāū tōōyē fɔ̍ŋndɔ̍ɔ̍ ō pīlɛ̍, ndu̍yɛ̍ a̍ sāā ko̍ndo̍o̍ o̍ pīlɛ̍, o̍ ko̍ŋ kɔ̍ɔ̍lī, a̍ sāā ko̍ndu̍a̍a̍ fɔ̍ŋndu̍a̍a̍, a̍ chi̍i̍ wɔ̄sīo̍o̍ ō pīlɛ̍ wa̍ ā ŋɔ᷄mmɛ̍ū. Ndu̍yɛ̍ chɔ̄lūa̍a̍ ha̍ā ā nɔ̍ mā nɔ̄ sɔ̄ŋ o̍ sɔ̄ŋ te̍. Sa̍lāla̍ŋ ndāŋ tē chūŋ ndɔ̄ɔ̍ ō kōma̍l la̍ pɛ̍, ya̍ Mɛ̄lɛ̄ka̍ Ya̍a̍wɛ̄ɛ̄ I̍ hīni̍ kɔ̄l nyɛ̄ kɛ̄ndɛ̄ kɛ̍ndɛ̄.

⁹Ndu̍yɛ̍ nāū tōōyē fɔ̍ŋndɔ̍ nya̍ chō ho̍ō sa̍lāa̍ sōlī a̍ ndu̍ wo̍, sa̍lā tɔ̄lɔ̄ɔ̄ ku̍l nya̍ nɔ̄ mī lā mɔ̄sɔ̍ŋa̍ sōlī a̍ ndu̍ la̍tu̍lu̍ wo̍, ō nɔ̄ mbō wa̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā ŋɔ᷄mpu᷅m, mī lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ. Ndu̍yɛ̍ sāā ko̍ndo̍ nyā chō ho̍ō sa̍lāa̍ sōlī wo̍, sa̍lā tɔ̄lɔ̄ɔ̄ ku̍l nya̍ nɔ̄ mī lā mɔ̄sɔ̍ŋa̍ sōlī a̍ ndu̍ la̍tu̍lu̍ wo̍, ō nɔ̄ mbō wa̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā hīɔ̍ɔ̍lu̍ mī lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ.

¹⁰O̍ ko̍ŋ kɔ̍ɔ̍lī, sāā ko̍ndu̍a̍a̍ fɔ̍ŋndu̍a̍a̍ ŋɔ̍mmɛ̍ūwāā ka̍ŋ, ō kɛ᷅ o̍ kɛ᷅ lā nɔ̄ mī lā mɔ̄sɔ̍ŋa̍ ndu̍ sa̍lāa̍ sōlī a̍ sa̍lā tɔ̄lɔ̄ɔ̄ ku̍llo̍, kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā tīɔ̍ɔ̍ŋ, mī lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ.

¹¹Ndu̍yɛ̍ vɛ̍lɛ̄, lā nɔ̄ mī lā sōli̍ chūīŋ tōōyōo̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍, a̍ sa̍lā Mɛ̄lɛ̄ka̍ māl wa᷅ŋnda̍ le̍ yɔ̄ŋndā wɔ̍ɔ̍ŋndo̍ wo̍, ndu̍yɛ̍ a̍ sa̍lālā lūāmāālā nya̍ nɔ̄ le̍ sōlīo̍o̍ le̍pāa̍ o̍ lēpāa̍ lātūlu̍ a̍ sa̍lālā tɔ̄lɔ̄ɔ̄ ku̍llo̍, ndu̍yɛ̍ a̍ sa̍lā mūɛ̄īmā kīle̍pīi̍ya̍ŋ nda̍ŋ.

¹²“ ‘Pāŋgi̍i̍ ŋɔ̍mmɛ̍ūve̍ o̍ wɔ̄sīo̍o̍ ni᷄ŋ mālɔ̄ tɔ̍ a̍ lē ŋūɛ̍ɛ̍nu̍, nya̍ kpo̍u̍ lā nɔ̄ mī lā bɔ̄ɔ̄ŋi̍āŋ na̍a̍ pi᷅lɛ̍ le̍ bɔ̄ŋa᷅ŋ lābāfɛ̄i̍yo̍. Wānā o̍ wānā a̍ nɔ̍ mā to̍sa̍ wa̍li̍ o̍ wa̍li̍ pa̍a̍le̍ le̍ŋ te̍. Ndu̍yɛ̍ bɔ̄ŋa᷅ŋndo̍ ho̍ō ō nɔ̄ mbō wa̍ le̍ pālɛ̍i̍ ī ŋɔ᷄mmɛ̍ū le̍ ya̍ Mɛ̄lɛ̄ka̍ Ya̍a̍wɛ̄ɛ̍ bɛ̄ɛ̄le̍ŋ kīo̍o̍.

¹³O̍ pāa̍le̍ tāse̍le̍ bɔ̄ŋa᷅ŋndo̍ ho̍ō chōo̍, lā nɔ̄ mī lā sōli̍ sa̍lālā lūāmāāla̍ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ a̍ nāūwāā tōōyīāā fɔ̍ŋndu̍a̍a̍ tɔ̍ a̍ ā yāa̍, ndu̍yɛ̍ a̍ sāā ko̍ndu̍a̍a̍ ā ŋīɔ̍ɔ̍ŋ, o̍ ko̍ŋ kɔ̍ɔ̍lī, a̍ sāā ko̍ndu̍a̍a̍ fɔ̍ŋndu̍a̍a̍, a̍ chi̍i̍ wɔ̄sīo̍o̍ ō pīlɛ̍ wa̍ tɔ̍ a̍ ā hīɔ̍ɔ̍lu̍. Ndu̍yɛ̍ chɔ̄lūa̍a̍ ha̍ā ā nɔ̍ mā nɔ̄ sɔ̄ŋ o̍ sɔ̄ŋ te̍. Sa̍lāla̍ŋ ndāŋ tē chūŋ ndɔ̄ɔ̍ ō kōma̍l ya̍ Mɛ̄lɛ̄ka̍ Ya̍a̍wɛ̄ɛ̄ pɛ̍, I̍ hīni̍ kɔ̄l nyɛ̄ kɛ̄ndɛ̄ kɛ̍ndɛ̄.

¹⁴Ndu̍yɛ̍ nāūwāā tōōyīāā fɔ̍ŋndu̍a̍a̍ nya̍ chō ha̍ā sa̍lāa̍ sōlī wa̍, ō kɛ᷅ o̍ kɛ᷅, sa̍lā tɔ̄lɔ̄ɔ̄ ku̍l nya̍ nɔ̄ mī lā mɔ̄sɔ̍ŋa̍ sōlī a̍ ndu̍ la̍tu̍lu̍ wo̍, ō nɔ̄ mbō wa̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā ŋɔ᷄mpu᷅m, mī lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ. Sāā ko̍ndu̍a̍a̍ ŋi̍ɔ̍ɔ̍ŋāā nya̍ nɔ̄ ha̍ā le̍ sa̍lāa̍ sōlīo̍o̍ wa̍, ō kɛ᷅ kɛ᷅, sa̍lā tɔ̄lɔ̄ɔ̄ ku̍l nya̍ nɔ̄ mī lā mɔ̄sɔ̍ŋa̍ sōlī a̍ ndu̍ la̍tu̍lu̍ wo̍, ō nɔ̄ mbō wa̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍, pa᷅ŋnda̍ŋ lā hīɔ̍ɔ̍lu̍, mī lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ.

¹⁵Ndu̍yɛ̍ sāā ko̍ndu̍a̍a̍ fɔ̍ŋndu̍a̍a̍ tɔ̍ a̍ ā hīɔ̍ɔ̍lu̍a̍a̍ nyā chō ka̍ŋ sa̍lāa̍ sōlī wa̍, ō kɛ᷅ o̍ kɛ᷅, sa̍lā tɔ̄lɔ̄ɔ̄ ku̍l nya̍ nɔ̄ mī lā mɔ̄sɔ̍ŋa̍ sōlī a̍ ndu̍ la̍tu̍lu̍ wo̍, ō nɔ̄ mbō wa̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā tīɔ̍ɔ̍ŋ mī lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ.

¹⁶Ndu̍yɛ̍ vɛ̍lɛ̄, lā nɔ̄ mī sōli̍ chūīŋ tōōyōo̍ sa̍la̍ fa̍ŋā yɔ᷅ŋ wɔ̄ɔ̍ŋndo̍, lātūlu̍ a̍ sa̍lālā lūāmāālā nya̍ nɔ̄ mī lā sōli̍ lēpāa̍ o̍ lēpāa̍ la̍ŋ, a̍ sālālā tɔ̄lɔ̄ɔ̄ ku̍llo̍, ndu̍yɛ̍ a̍ sa̍lā mūɛ̄īmā mākīle̍pīi̍ya̍ŋ.

¹⁷“ ‘O̍ ko̍ŋ kɔ̍ɔ̍lī, o̍ pāa̍le̍ di̍i̍ŋ ndɔ̄le̍ŋ chōo̍, lā nɔ̄ mī lā sōli̍ sa̍lālā lūāmāāla̍ŋ a̍ nāūwāā tōōyīāā fɔ̍ŋndu̍a̍a̍ tɔ̍ a̍ ā ŋīɔ̍ɔ̍ŋ, ndu̍yɛ̍ a̍ sāā ko̍ndu̍a̍a̍ ā ŋīɔ̍ɔ̍ŋ, a̍ sāā ko̍ndu̍a̍a̍ fɔ̍ŋndu̍a̍a̍, a̍ chi̍i̍ wɔ̄sīo̍o̍ ō pīlɛ̍ wa̍ tɔ̍ a̍ ā hīɔ̍ɔ̍lu̍. Ndu̍yɛ̍ chɔ̄lūa̍a̍ ha̍ā ā nɔ̍ mā nɔ̄ sɔ̄ŋ o̍ sɔ̄ŋ te̍.

¹⁸Nāūwāā tōōyīāā fɔ̍ŋndu̍a̍a̍ tɔ̍ a̍ ā ŋīɔ̍ɔ̍ŋāā ka̍ŋ ni̍, a̍ sāā ko̍ndu̍a̍a̍ ŋi̍ɔ̍ɔ̍ŋāā kāŋ, a̍ sāā ko̍ndu̍a̍a̍ fɔ̍ŋndu̍a̍a̍ tɔ̍ a̍ ā hīɔ̍ɔ̍lu̍a̍a̍ kāŋ, ō kɛ᷅ o̍ kɛ᷅ lā nɔ̄ mī lā so̍li̍ ndu̍ sa̍lāa̍ a̍ sa̍lā tɔ̄lɔ̄ɔ̄ ku̍llo̍ lātūlu̍, ndu̍yɛ̍ a̍ sa̍lā māmūɛ̄īyo̍ mɛ̄ɛ̍ i̍ cho̍ ī tūwāā le̍ la̍ŋ sōlīo̍o̍ yɛ̍.

¹⁹Ndu̍yɛ̍ vɛ̍lɛ̄ lā nɔ̄ mī sōli̍ chūīŋ tōōyōo̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍, ō fūla̍ o̍ sa̍lālā lūāmāālā nya̍ nɔ̄ mī lā sōli̍ lēpāa̍ o̍ lēpāa̍ lātūlu̍ a̍ sālālā tɔ̄lɔ̄ɔ̄ ku̍llo̍, ndu̍yɛ̍ a̍ sa̍lā mūɛ̄īmā mākīle̍pīi̍ya̍ŋ ndo̍ kɔ̄ɔ̄lī.

²⁰“ ‘O̍ ko̍ŋ kɔ̍ɔ̍lī, o̍ pāa̍le̍ ya̍a̍ ndɔ̄le̍ŋ chōo̍, lā nɔ̄ mī lā sōli̍ sa̍lālā lūāmāāla̍ŋ a̍ nāūwāā tōōyīāā fɔ̍ŋndu̍a̍a̍ tɔ̍ a̍ ō pīlɛ̍, a̍ sāā ko̍ndu̍a̍a̍ ā ŋīɔ̍ɔ̍ŋ, ndu̍yɛ̍ a̍ sāā ko̍ndu̍a̍a̍ fɔ̍ŋndu̍a̍a̍, a̍ chi̍i̍ wɔ̄sīo̍o̍ ō pīlɛ̍ wa̍ tɔ̍ a̍ ā hīɔ̍ɔ̍lu̍. Ndu̍yɛ̍ chɔ̄lūa̍a̍ ha̍ā ā nɔ̍ mā nɔ̄ sɔ̄ŋ o̍ sɔ̄ŋ te̍.

²¹Nāūwāā tōōyīāā fɔ̍ŋndu̍a̍a̍ tɔ̍ a̍ ō pīli̍a̍a̍ ka̍ŋ ni̍, a̍ sāā ko̍ndu̍a̍a̍ ŋi̍ɔ̍ɔ̍ŋāā ka̍ŋ, a̍ sāā ko̍ndu̍a̍a̍ fɔ̍ŋndu̍a̍a̍ tɔ̍ a̍ ā hīɔ̍ɔ̍lu̍a̍a̍ ka̍ŋ, ō kɛ᷅ o̍ kɛ᷅ lā nɔ̄ mī lā so̍li̍ ndu̍ sa̍lāa̍ a̍ sa̍lā tɔ̄lɔ̄ɔ̄ ku̍llo̍ lātūlu̍, ndu̍yɛ̍ a̍ sa̍lā mūɛ̄īmā mākīle̍pīi̍ya̍ŋ mɛ̄ɛ̍ i̍ cho̍ ī tūwāā le̍ la̍ŋ sōlīo̍o̍ yɛ̍.

²²Ndu̍yɛ̍ vɛ̍lɛ̄ lā nɔ̄ mī sōli̍ chūīŋ tōōyōo̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍, ō fūla̍ o̍ sa̍lālā lūāmāālā nya̍ nɔ̄ mī lā sōli̍ lēpāa̍ o̍ lēpāa̍ lātūlu̍ a̍ sālālā tɔ̄lɔ̄ɔ̄ ku̍llo̍, ndu̍yɛ̍ a̍ sa̍lā mūɛ̄īmā mākīle̍pīi̍ya̍ŋ ndo̍ kɔ̄ɔ̄lī.

²³“ ‘O̍ ko̍ŋ kɔ̍ɔ̍lī, o̍ pāa̍le̍ hi̍ɔ̍ɔ̍lu̍le̍ŋ chōo̍, lā nɔ̄ mī lā sōli̍ sa̍lālā lūāmāāla̍ŋ a̍ nāūwāā tōōyīāā fɔ̍ŋndu̍a̍a̍ tɔ̍, a̍ sāā ko̍ndu̍a̍a̍ ā ŋīɔ̍ɔ̍ŋ, ndu̍yɛ̍ a̍ sāā ko̍ndu̍a̍a̍ fɔ̍ŋndu̍a̍a̍, a̍ chi̍i̍ wɔ̄sīo̍o̍ ō pīlɛ̍ wa̍ tɔ̍ a̍ ā hīɔ̍ɔ̍lu̍. Ndu̍yɛ̍ chɔ̄lūa̍a̍ ha̍ā ā nɔ̍ mā nɔ̄ sɔ̄ŋ o̍ sɔ̄ŋ te̍.

²⁴Nāūwāā tōōyīāā fɔ̍ŋndu̍a̍a̍ tu̍a̍a̍ ka̍ŋ ni̍, a̍ sāā ko̍ndu̍a̍a̍ ŋi̍ɔ̍ɔ̍ŋāā ka̍ŋ, a̍ sāā ko̍ndu̍a̍a̍ fɔ̍ŋndu̍a̍a̍ tɔ̍ a̍ ā hīɔ̍ɔ̍lu̍a̍a̍ ka̍ŋ, ō kɛ᷅ o̍ kɛ᷅ lā nɔ̄ mī lā so̍li̍ ndu̍ sa̍lāa̍ a̍ sa̍lā tɔ̄lɔ̄ɔ̄ ku̍llo̍ lātūlu̍, ndu̍yɛ̍ a̍ sa̍lā mūɛ̄īmā mākīle̍pīi̍ya̍ŋ mɛ̄ɛ̍ i̍ cho̍ ī tūwāā le̍ la̍ŋ sōlīo̍o̍ yɛ̍.

²⁵Ndu̍yɛ̍ vɛ̍lɛ̄ lā nɔ̄ mī sōli̍ chūīŋ tōōyōo̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍, ō fūla̍ o̍ sa̍lālā lūāmāālā nya̍ nɔ̄ mī lā sōli̍ lēpāa̍ o̍ lēpāa̍ lātūlu̍ a̍ sālālā tɔ̄lɔ̄ɔ̄ ku̍llo̍, ndu̍yɛ̍ a̍ sa̍lā mūɛ̄īmā mākīle̍pīi̍ya̍ŋ ndo̍ kɔ̄ɔ̄lī.

²⁶“ ‘O̍ pāa̍le̍ ŋu̍ɛ̍ɛ̍nu̍le̍ŋ chōo̍, lā nɔ̄ mī lā sōli̍ sa̍lālā lūāmāāla̍ŋ a̍ nāūwāā tōōyīāā fɔ̍ŋndu̍a̍a̍ ā ŋɔ̄ma̍hīɔ̍ɔ̍lu̍, a̍ sāā ko̍ndu̍a̍a̍ ā ŋīɔ̍ɔ̍ŋ, ndu̍yɛ̍ a̍ sāā ko̍ndu̍a̍a̍ fɔ̍ŋndu̍a̍a̍, a̍ chi̍i̍ yɔ̄ wɔ̄sīo̍o̍ ō pīlɛ̍ wa̍ tɔ̍ a̍ ā hīɔ̍ɔ̍lu̍. Ndu̍yɛ̍ chɔ̄lūa̍a̍ ha̍ā ā nɔ̍ mā nɔ̄ sɔ̄ŋ o̍ sɔ̄ŋ te̍.

²⁷Nāūwāā tōōyīāā fɔ̍ŋndu̍a̍a̍ ŋɔ̄ma̍hīɔ̍u̍lu̍a̍a̍ ka̍ŋ ni̍, a̍ sāā ko̍ndu̍a̍a̍ ŋi̍ɔ̍ɔ̍ŋāā ka̍ŋ, a̍ sāā ko̍ndu̍a̍a̍ fɔ̍ŋndu̍a̍a̍ tɔ̍ a̍ ā hīɔ̍ɔ̍lu̍a̍a̍ ka̍ŋ, ō kɛ᷅ o̍ kɛ᷅ lā nɔ̄ mī lā so̍li̍ ndu̍ sa̍lāa̍ a̍ sa̍lā tɔ̄lɔ̄ɔ̄ ku̍llo̍ lātūlu̍, ndu̍yɛ̍ a̍ sa̍lā mūɛ̄īmā mākīle̍pīi̍ya̍ŋ mɛ̄ɛ̍ i̍ cho̍ ī tūwāā le̍ la̍ŋ sōlīo̍o̍ yɛ̍.

²⁸Ndu̍yɛ̍ vɛ̍lɛ̄ lā nɔ̄ mī lā sōli̍ chūīŋ tōōyōo̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍, ō fūla̍ o̍ sa̍lālā lūāmāālā nya̍ nɔ̄ mī lā sōli̍ lēpāa̍ o̍ lēpāa̍ lātūlu̍ a̍ sālālā tɔ̄lɔ̄ɔ̄ ku̍llo̍, ndu̍yɛ̍ a̍ sa̍lā mūɛ̄īmā mākīle̍pīi̍ya̍ŋ ndo̍ kɔ̄ɔ̄lī.

²⁹“ ‘O̍ ko̍ŋ kɔ̍ɔ̍lī, o̍ pāa̍le̍ ŋɔ̍mpu᷅m nde̍ŋ chōo̍, lā nɔ̄ mī lā sōli̍ sa̍lālā lūāmāāla̍ŋ a̍ nāūwāā tōōyīāā fɔ̍ŋndu̍a̍a̍ ā ŋɔ̄ma̍a̍, a̍ sāā ko̍ndu̍a̍a̍ ā ŋīɔ̍ɔ̍ŋ, ndu̍yɛ̍ a̍ sāā ko̍ndu̍a̍a̍ fɔ̍ŋndu̍a̍a̍, a̍ chi̍i̍ wɔ̄sīo̍o̍ ō pīlɛ̍ wa̍ tɔ̍ a̍ ā hīɔ̍ɔ̍lu̍. Ndu̍yɛ̍ chɔ̄lūa̍a̍ ha̍ā ā nɔ̍ mā nɔ̄ sɔ̄ŋ o̍ sɔ̄ŋ te̍.

³⁰Ndu̍yɛ̍ nāūwāā tōōyīāā fɔ̍ŋndu̍a̍a̍ ŋɔ̄ma̍a̍ ka̍ŋ ni̍, a̍ sāā ko̍ndu̍a̍a̍ ŋi̍ɔ̍ɔ̍ŋāā ka̍ŋ, a̍ sāā ko̍ndu̍a̍a̍ fɔ̍ŋndu̍a̍a̍ tɔ̍ a̍ ā hīɔ̍ɔ̍lu̍a̍a̍ ka̍ŋ, ō kɛ᷅ o̍ kɛ᷅ lā nɔ̄ mī lā so̍li̍ ndu̍ sa̍lāa̍ a̍ sa̍lā tɔ̄lɔ̄ɔ̄ ku̍llo̍ lātūlu̍, ndu̍yɛ̍ a̍ sa̍lā mūɛ̄īmā mākīle̍pīi̍ya̍ŋ mɛ̄ɛ̍ i̍ cho̍ ī tūwāā le̍ la̍ŋ sōlīo̍o̍ yɛ̍.

³¹Ndu̍yɛ̍ vɛ̍lɛ̄ lā nɔ̄ mī lā sōli̍ chūīŋ tōōyōo̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍, ō fūla̍ o̍ sa̍lālā lūāmāālā nya̍ nɔ̄ mī lā sōli̍ lēpāa̍ o̍ lēpāa̍ lātūlu̍ a̍ sālālā tɔ̄lɔ̄ɔ̄ ku̍llo̍, ndu̍yɛ̍ a̍ sa̍lā mūɛ̄īmā mākīle̍pīi̍ya̍ŋ ndo̍ kɔ̄ɔ̄lī.

³²“ ‘O̍ pāa̍le̍ ŋɔ̍mmɛ̍ūle̍ŋ chōo̍, lā nɔ̄ mī lā sōli̍ sa̍lālā lūāmāāla̍ŋ a̍ nāūwāā tōōyīāā fɔ̍ŋndu̍a̍a̍ ā ŋɔ̍mmɛ̍ū, a̍ sāā ko̍ndu̍a̍a̍ ā ŋīɔ̍ɔ̍ŋ, ndu̍yɛ̍ a̍ sāā ko̍ndu̍a̍a̍ fɔ̍ŋndu̍a̍a̍, a̍ chi̍i̍ wɔ̄sīo̍o̍ ō pīlɛ̍ wa̍ tɔ̍ a̍ ā hīɔ̍ɔ̍lu̍. Ndu̍yɛ̍ chɔ̄lūa̍a̍ ha̍ā ā nɔ̍ mā nɔ̄ sɔ̄ŋ o̍ sɔ̄ŋ te̍.

³³Ndu̍yɛ̍ nāūwāā tōōyīāā fɔ̍ŋndu̍a̍a̍ ŋɔ̍mmɛ̍ūwāā kāŋ ni̍, a̍ sāā ko̍ndu̍a̍a̍ ŋi̍ɔ̍ɔ̍ŋāā ka̍ŋ, a̍ sāā ko̍ndu̍a̍a̍ fɔ̍ŋndu̍a̍a̍ tɔ̍ a̍ ā hīɔ̍ɔ̍lu̍a̍a̍ ka̍ŋ, ō kɛ᷅ o̍ kɛ᷅ lā nɔ̄ mī lā so̍li̍ ndu̍ sa̍lāa̍ a̍ sa̍lā tɔ̄lɔ̄ɔ̄ ku̍llo̍ lātūlu̍, ndu̍yɛ̍ a̍ sa̍lā mūɛ̄īmā mākīle̍pīi̍ya̍ŋ mɛ̄ɛ̍ i̍ cho̍ ī tūwāā le̍ la̍ŋ sōlīo̍o̍ yɛ̍.

³⁴Ndu̍yɛ̍ vɛ̍lɛ̄ lā nɔ̄ mī lā sōli̍ chūīŋ tōōyōo̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍, ō fūla̍ o̍ sa̍lālā lūāmāālā nya̍ nɔ̄ mī lā sōli̍ lēpāa̍ o̍ lēpāa̍ lātūlu̍ a̍ sālālā tɔ̄lɔ̄ɔ̄ ku̍llo̍, ndu̍yɛ̍ a̍ sa̍lā mūɛ̄īmā mākīle̍pīi̍ya̍ŋ ndo̍ kɔ̄ɔ̄lī.

³⁵“ ‘O̍ pāa̍le̍ ŋɔ̄ma̍a̍le̍ŋ chōo̍, nya̍ kpo̍u̍ lā nɔ̄ mī lā chūūŋgi̍āŋ na̍a̍ pi᷅lɛ̍ le̍ ya̍ Mɛ̍lɛ̄ka̍ sōōlūūwo̍. Pāa̍le̍ le̍ŋ wānā o̍ wānā nɔ̍ mbō tōsa̍ wa̍li̍ o̍ wa̍li̍ le̍.

³⁶Pāa̍le̍ le̍ŋ, lā nɔ̄ mī lā sōli̍ sa̍lālā lūāmāā la̍ŋ a̍ nāū tōōyē fɔ̍ŋndɔ̍ɔ̍ ō pīlɛ̍, ndu̍yɛ̍ a̍ sāā ko̍ndo̍o̍ ō pīlɛ̍, o̍ ko̍ŋ kɔ̍ɔ̍lī, a̍ sāā ko̍ndu̍a̍a̍ fɔ̍ŋndu̍a̍a̍ a̍ chi̍i̍ wɔ̄sīo̍o̍ ō pīlɛ̍ wa̍ ā ŋɔ᷄mmɛ̍ū o̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍. Ndu̍yɛ̍ chɔ̄lūa̍a̍ ha̍ā ā nɔ̍ mā nɔ̄ sɔ̄ŋ o̍ sɔ̄ŋ te̍. Sa̍lāla̍ŋ nda᷅ŋ tē chūŋ ndɔ̄ɔ̍ ō kōma̍l ya̍ Mɛ̄lɛ̄ka̍ Ya̍a̍wɛ̄ɛ̄ pɛ̍, ō hīni̍ kɔ̄l ta̍u̍ nyɛ̄ kɛ̄ndɛ̄ kɛ̍ndɛ̄.

³⁷Ndu̍yɛ̍ nāū tōōyē fɔ̍ŋndɔ̍ ko̍ŋ ni̍, a̍ sāā ko̍ndo̍ ko̍ŋ, o̍ ko̍ŋ kɔ̍ɔ̍lī, a̍ sāā ko̍ndu̍a̍a̍ fɔ̍ŋndu̍a̍a̍ ŋɔ̍mmɛ̍ūwāā ka̍ŋ, ō kɛ᷅ o̍ kɛ᷅, lā nɔ̄ mī lā sōli̍ nda̍ sa̍lāla̍ŋ lātūlu̍ a̍ sa̍lālā tɔ̄lɔ̄ɔ̄ ku̍llo̍, ndu̍yɛ̍ a̍ sa̍lālā mūɛ̄īmā mākīle̍pīi̍ya̍ŋ mɛ̄ɛ̍ i̍ cho̍ ī tūwāā le̍ la̍ŋ sōlīo̍o̍ yɛ̍.

³⁸Ndu̍yɛ̍ vɛ̍lɛ̄ lā nɔ̄ mī lā sōli̍ chūīŋ tōōyōo̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍, ō fūla̍ o̍ sa̍lālā lūāmāālā nya̍ nɔ̄ mī lā sōli̍ lēpāa̍ o̍ lēpāa̍ lātūlu̍ a̍ sālālā tɔ̄lɔ̄ɔ̄ ku̍llo̍, ndu̍yɛ̍ a̍ sa̍lā mūɛ̄īmā mākīle̍pīi̍ya̍ŋ ndo̍ kɔ̄ɔ̄lī.

³⁹“ ‘Ō fūla̍ o̍ sa̍lālā nya̍ chūā bu̍ŋga᷄ŋ o̍ ya̍ Mɛ̄lɛ̄ka̍ lo̍ le̍ sōlīo̍o̍ la̍ŋ kɔ̄ɔ̄lī, ndu̍yɛ̍ a̍ sa̍lālā nya̍ pi̍la̍ kɛ̄ɛ̄sīāā a̍ kɔ̄ltā nyāla̍ŋ nda̍ŋ, lā nɔ̄ mī lā wa̍ sa̍lāla̍ŋ nda᷅ŋ sōlīo̍o̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍ a̍ te̍le̍ŋnda̍ nyāla̍ bɔ̄ŋa᷅ŋnda̍ŋ, la̍ŋ la̍ yɔ̍nūŋ ni̍ māā sa̍lālā lūāmāāla̍ŋ nda᷅ŋ, a̍ sa̍lālā tɔ̄lɔ̄ɔ̄ ku̍llo̍, a̍ sa̍lālā mūɛ̄īmā mākīle̍pīi̍ya̍ŋ, ndu̍yɛ̍ a̍ sa̍lālā kɔ̄l nyūlūla̍ŋ.’ ”

⁴⁰Ndu̍yɛ̍ nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē, mi̍ Mūu̍sē o̍ di̍mūl I̍sɔ̄lūɛ̍i̍ya̍ ndu̍ kpo̍u̍.