Read Southern Kisi Nɔ̍mbāā 32 Bible Online

Nɔ̍mbāā 32 - Southern Kisi bible

Nɔ̍mbāā 32

¹Yu̍ŋgu̍ Lūbɛ᷅ŋndo̍ a̍ yu̍ŋgu̍ Ka̍a̍dī wo̍, nda̍ a̍a̍ nɔ̍ chɔ̄lūa̍a̍ ta̍u̍ ta̍u̍, nāūwa̍, a̍ sāa̍, a̍ chūīŋnda̍. Mi̍ wāŋnda̍ ha̍ā ā sāālu̍ŋ māā būŋgɛ̄ī Cha̍sɛ̄ɛ̄ ve̍, a̍ būŋgɛ̄ī Ki̍li̍a̍a̍dī ve̍ nɔ̄ fo̍ndāŋndā kɛ̄ndɛ̄ kɛ̍ndɛ̄lā māndāā lāchɔ̄lūla̍ŋ.

²O̍ ko̍ŋ, ma̍ kōmāl Mūu̍sē nda̍ Ɛ̄li̍a̍a̍sā wānā so̍līāā lāsa̍lāa̍, a̍ wāŋ bɛ̄ndūāā I̍sɔ̄lūɛ̍i̍ya̍, ma̍ dīmūl nda̍ āā,

³“Lɛ̄ŋndē Mɛ̄lɛ̄ka̍ Ya̍a̍wɛ̄ɛ̄ o̍ ye᷅m le᷅ŋ le̍ na̍a̍ I̍sɔ̄lūɛ̍i̍ya̍ mi̍ lē sīmnu᷄ŋ lɛ᷅ŋndē nāā le̍ŋ, chi̍e̍e̍ŋ cho̍ o̍ lɛ̄ŋndē lēŋ ni᷄ŋ ndo̍ŋ, mu̍ŋ yɔ̍nūŋ ni̍, māā Ātālɔ̍tī, a̍ Di̍bɔ̄ŋ, a̍ Cha̍sɛ̄ɛ̄, a̍ Ni̍mi̍lūā, ā Hɛ̍si̍bɔ̄ŋ, a̍ Īlīa̍a̍lɛ̄ɛ̄, a̍ Si̍bi̍mā, a̍ Ni̍bɔ̄, a̍ Bi̍ɔ̄ŋ, ŋ̄ nɔ̄ bɔ̄ɔ̍ fo̍ndāŋndā kɛ̄ndɛ̄ kɛ̍ndɛ̄lā māndāā lāchɔ̄lū la̍ŋ. Ndu̍yɛ̍ na̍a̍ ŋ̄ nɔ̄ chɔ̄lūa̍a̍ ta̍u̍ ta̍u̍.

⁴

⁵Le̍la̍ŋ yāndi̍i̍ fāllo̍, ke̍ na̍a̍ lɛ̄ŋndē lēŋ mī lē wa̍ le̍ na̍a̍. Ŋ̄ ku̍ā Chɔ̍ɔ̍dāŋ le̍e̍lōo̍ le̍ cha᷄lle̍ le̍.”

⁶Mi̍ Mūu̍sē o̍ di̍mūl nda̍ āā, “Lā yēēma̍ mī nya̍ wa̍ ā chālna᷄ŋ na̍ŋ mī chāāŋāā nyāā I̍sɔ̄lūɛ̍i̍ya̍ nda̍ wa̍ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍?

⁷Lā yēēma̍ mī lā tɛ̄ɛ̄mbu̍u̍ chāāŋāā nyāā I̍sɔ̄lūɛ̍i̍ya̍ kɔ̄lta̍ŋ, mī lā tōsa̍ ā te᷅ŋ Chɔ̍ɔ̍dāŋ nda̍ŋ mā kūɛ̄ o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄ o̍ ke̍ nda̍ le̍ŋ ni᷄ŋ te̍?

⁸Sūɛ̍i̍ wa̍ā nu̍a̍ā ko̍ni̍ fi̍nyāā nyāā ma̍māa̍ ā tōsa̍ sīndɛ̄ ni̍ bōōndi̍i̍ ya̍ I̍ ve᷅m nda̍ lɛ̄ŋnde̍ŋ mɛ̄ɛ̄nda᷄ŋndo̍ chɔ̄nɔ᷄ŋndo̍ Ka̍dɛ̍sī Ba̍a̍nīāā ve̍ ni̍.

⁹Mɛ̄ɛ̍ ya̍ I̍ ve᷅m nda̍, ma̍ mālnu᷄ŋ ma̍ fūūlūū o̍ lɛ̄ŋndē dɛ̍ŋgbɛ̍le̍ŋ Ɛ̍si̍kɔ̄ɔ̄ di̍, ma̍ kɔ̍ mɛ̍ɛ̍nda᷄ŋ lɛ᷅ŋnde̍ŋ mɛ̄ɛ̍ le̍ cho̍ yɛ̍. Kɛ̍ mɛ̄ɛ̍ nda̍ mīīŋgu̍ a̍ ko̍na̍a̍, ma̍ hu᷄ŋ tɛ̍ɛ̍mbūū wāŋnda̍ kɔ̄lta̍ŋ a̍ ko̍na̍ nda̍ hu᷄ŋ dɔ̍u̍nu᷄ŋ ndo̍, ma̍ tōsā mi̍ wāŋnda̍ wō le̍ lūɛ̄īyɔ̄ɔ̍ o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄ o̍ ke̍ nda̍ le̍ŋ ni᷄ŋ.

¹⁰Le̍ nyɛ̄ nda̍ tōsa̍ ko̍ŋ ndo̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ nda̍ o̍ ka̍lā ka̍lā pāa̍le̍ le̍ŋ, mbo̍ tīāŋnu᷄ŋ mbo̍ dīmī āā,

¹¹‘Le̍ tīīnda᷄ŋ wāŋnda̍ ha̍ā ā kɛ̄ɛ̍ dɔ̄wɔ̄ɔ̍ o̍ ya̍ ni̍ŋ ndo̍, nda̍ fu̍la̍ ka̍ŋ I̍chi̍pī ki̍nɛ̍i̍, ndu̍yɛ̍ ma̍ wā chɔ̍ŋ wɔ̍sīla̍ŋ bi̍di̍i̍ŋ mbo̍ kūā a̍ lāchī kɛ᷅ wa̍, wāŋndo̍ ō pīlɛ̍ bɛ̍ɛ̍ ō lu̍e̍ī o̍ lɛ̄ŋndē ya̍ I̍ chu̍e̍l fi̍nyāā nyāā ma̍māa̍ būŋgɛ̄i̍ le̍ nda̍ kīo̍o̍ le̍ŋ ni᷄ŋ te̍, nda̍ yɔ̍nūŋ ni̍ māā E̍bīlāha᷅m, a̍ Āa̍se̍, a̍ Che̍kɔ̍pū.

¹²Nda̍ ki̍nɛ̍i̍, wānā o̍ wānā lu̍e̍ī lo̍ŋ, te̍ mɛ̄ɛ̍ Ke̍lɛ̍bī, po̍ Chɛ̍fu̍nɛ̄ɛ̄ Kēnīsa̍i̍tīi̍nɔ̍ wo̍, nda̍ Chɔ̄ɔ̍sūāā, po̍ Nu᷅ŋ ndo̍ mā lūɛ̄ī o̍ lɛ̄ŋndē lēŋ ni᷄ŋ. Kāni̍ fo̍ndōle̍, le̍ mɛ̄ɛ̍ nda̍ dɔ̄ū tīīnda᷄ŋ ndāa̍ kpo̍u̍ o̍ ya̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ yɛ̍.’

¹³Mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ o̍ ka̍lā ka̍lā a̍ wāŋnda̍ I̍sɔ̄lūɛ̍i̍. Mbo̍ tōsā, le̍ wɔ̄sīla̍ŋ be̍le̍-hi̍ɔ̍ɔ̍lu̍ ā wa̍ bālɔ̄ɔ̍ o̍ lɛ̄ŋndē po̍lte̍ŋ ni᷄ŋ. Ā lo̍ bālɔ̄ɔ̍ o̍ lɛ̄ŋndē po̍lte̍le̍ŋ ni᷄ŋ ha̍a̍a̍ mi̍ wānāa̍ to̍sa̍ ka̍ŋ yɔ᷅ŋ wɔ̄ɔ̍ŋndo̍ a̍ Mɛ̄lɛ̄ka̍ Ya̍a̍wɛ̄ɛ̄ wa̍ ā chūū kpo̍u̍.

¹⁴Nya̍ bɛ̍ɛ̍ lā yēēma̍ mī lā mīŋgi̍ pēlo̍ŋ o̍ kɔ̄vɛ̄i̍la̍ fi̍nyāā nyāa̍ ni᷄ŋ, mɛ̄ɛ̍ nya̍ chō chūāūwāā wānāā yɔ̄ŋ wɔ̄ɔ̍ŋ yɛ̍, mī lā tōsa̍ mī Mɛ̄lɛ̄ka̍ Ya̍a̍wɛ̄ɛ̄ o̍ chɔ̍ɔ̍lu̍ tu̍mbe̍ dɔ̍u̍nɔ᷄ŋ a̍ wāŋnda̍ I̍sɔ̄lūɛ̍i̍.

¹⁵Ndu̍yɛ̍ tē lā kɛ̄ɛ̍ ndu̍ pɛ̍, ō chō vɛ̄lɛ̄ wāŋnda̍ ha̍ā mālɔ̄ɔ̄ o̍ lɛ̄ŋndē po̍lte̍ŋ nde᷅ŋ ni᷄ŋ. Ndu̍yɛ̍ tē yōōmūlā ndāla̍ŋ lā tāmbu̍ pɛ̍, nya̍ tɔ̍ɔ̍ya̍ŋ pīɔ̍m ndāa̍ ō wā cho̍o̍ ni̍.”

¹⁶Mi̍ wānāa̍ fu̍la̍ o̍ yu̍ŋgu̍ Lūbɛ᷅ŋndo̍ chōo̍ a̍ o̍ yu̍ŋgu̍ Ka̍a̍dī wo̍ chōo̍ wa̍ a̍ ko̍māl Mūu̍sē ma̍ dīmūl ndu̍ āā, “Fāllo̍, ŋ̄ chō ā bɛ̄ɛ̄ndīa̍ŋnda̍ le̍ mī ŋ̄ chūa̍ wōlɔ̄ɔ̄lā nāāla̍ chɔ̄ūla̍ŋ, mī ŋ̄ si᷄m wāŋnda̍ I̍sɔ̄lūɛ̍i̍ lāchī le̍ sɔ̍ŋgɔ̍ɔ̍ a̍ ya̍a̍mɔ̍ɔ̍wa̍ ha̍a̍a̍ mbō lo̍ o̍ ko̍ŋ mī ŋ̄ fūūlu̍u̍ a̍ nda̍ o̍ lɛ̄ŋndē ndāle̍ŋ ni᷄ŋ. Kɛ̍ ŋ̄ yēēma̍ mī ŋ̄ tāŋgu̍l fɛ̍lɛ̍ŋ kpa̍kīla̍ chɔ̄lūa̍a̍ a̍ pōūta̍ŋ, le̍ sāa̍ nāa̍, a̍ chūīŋāā nāa̍, ndu̍yɛ̍ mī ŋ̄ bɛ̄ɛ̄ndi̍a̍a̍ chi̍o̍o̍ŋ ŋ̄ kālā ka̍lā le̍ yɔ̄ŋi̍ ya̍a̍mɔ̍ɔ̍wa̍ ā lūɛ̍i̍, le̍ mī ŋ̄ mɛ̄i̍ lāāndāā nāa̍, a̍ chūāūwāā nāa̍ lo̍ŋ. Ko̍ŋ to̍sā ni̍ wānāa̍ cho̍ o̍ lɛ̄ŋnde̍ nde᷅ŋ ni᷄ŋ nda̍ ā nɔ̍lā mā kōma̍ yɔ᷅ŋ nda̍ nyɛ̄ le̍.

¹⁷

¹⁸Ŋ̄ chō nda̍ lō sɔ̍ŋgɔ̄ɔ̍ mālāa̍ ha̍a̍a̍ mbō lo̍ o̍ ko̍ŋ mī wānā o̍ wānā o̍ sɔ̍la̍ cha᷄lta̍ŋ la̍ ndɔ̄la̍ŋ ma̍lāŋ na̍a̍ ŋ̄ mīīŋgū mī ŋ̄ hu᷄ŋ cha᷅l o̍ lɛ̄ŋndē nāāle̍ŋ ni᷄ŋ.

¹⁹Ŋ̄ yēēma̍ le̍lɛ᷅ŋ o̍ lēlɛ̄ŋ Chɔ̍ɔ̍dāŋ le̍e̍lōo̍, mī ŋ̄ cha᷄l lo̍ŋ na̍a̍ nda̍ā le̍. Kāni̍ fo̍ndōle̍ na̍a̍ Chɔ̍ɔ̍dāŋ le̍e̍lōo̍ na̍ŋ, bā pāa̍le̍ŋ lē chāŋndo̍ cha᷄lta̍ nāāla̍ŋ lā chō ni̍.”

²⁰Mi̍ Mūu̍sē o̍ di̍mūl nda̍ āā, “Tē lā lo̍ o̍ lēdīōm pɛ̍, mī lā bɛ̄ɛ̄ndi̍a̍ŋ le̍ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ Mɛ̄lɛ̄ka̍ Ya̍a̍wɛ̄ɛ̄ wa̍,

²¹ndu̍yɛ̍ mī pūa̍a̍ nyāa̍ chɔ̄ūwāa̍ cho̍ wā ka̍ŋ a̍ bɛ̍ɛ̍ndīa̍ŋ nda̍ ā ta᷄ŋ Chɔ̍ɔ̍dāŋ nda̍ŋ mā lo̍ sɔ̍ŋgɔ̄ɔ̍ ha̍a̍a̍ mī Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ ya̍a̍mɔ̍ɔ̍wa̍a̍ ndūa̍a̍ tōūwɔ̄ɔ̍,

²²ndu̍yɛ̍ mī lā chīi̍ lɛ̄ŋnde̍ŋ bīyɔ̄ɔ̄ pɛ̍, lā nɔ̄lā ni᷅ŋ mī lā mīīŋgu̍ o̍ lɛ̄ŋnde̍ŋ nde᷅ŋ ni᷄ŋ. Kāni̍ fo̍ndōle̍, lā chīi̍ būŋgɛ̄ī nya̍ chūe̍l Mɛ̄lɛ̄ka̍ Ya̍a̍wɛ̄ɛ̄, ndu̍yɛ̍ a̍ chāāŋāā nyāā I̍sɔ̄lūɛ̍i̍ya̍ ve̍ pēēlū. Mɛ̄lɛ̄ka̍ Ya̍a̍wɛ̄ɛ̄ o̍ nɔ̍lā mbō ke᷄ nya̍ lɛ̄ŋnde̍ŋ nde᷅ŋ Chɔ̍ɔ̍dāŋ le̍e̍lōo̍ na̍nu᷄ŋ māā nyɛ̄ nyā.

²³Kɛ̍ tē lā pēēlu̍ bu̍ŋgɛ̄ī nyɛ̄i̍ le̍, mɛ̄ɛ̍ lā tōsa̍ yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍ Ya̍a̍wɛ̄ɛ̄, ndu̍yɛ̍ lā sīna̍ pɛ̍ŋgu̍ māā lā chō dɛ̍nɛ̍ pa̍lāa̍ sɔ̄lā le̍ yɔ̄ŋ wɔ̄ɔ̍ŋ nya̍ tōsa̍ ko̍ŋ ndo̍.

²⁴Le̍la̍ŋ lā tāŋgu̍l chi̍e̍e̍ŋ bɛ̍ndūŋ nya̍ dīmi̍ le̍ tāŋgūllo̍ le̍ lāāndāā nyāa̍ a̍ chūāūwāā nyāa̍ wo̍ŋ, ndu̍yɛ̍ mī lā tāŋgu̍l kpākīla̍ nya̍ dīmi̍ le̍ tāŋgūllo̍ le̍ chɔ̄lūāā nyāa̍ la̍ŋ. Kɛ̍ ndu̍yɛ̍ būŋgɛ̄ī nya̍ chūa̍ ve̍ lā nɔ̍ mī lā pēēlu̍ būŋgɛ̄ī kēŋ.”

²⁵Mi̍ yu̍ŋgu̍ Ka̍a̍dī wo̍ a̍ yu̍ŋgu̍ Lūbɛ᷅ŋ ndo̍ ā dīmūl Mūu̍sē āā, “Fāllo̍, na̍a̍ bu̍ɛ̍īyāā nūmnda̍ chō nyɛ̄ ŋ̄ di̍mu̍l na̍a̍ wo̍ tōsā.

²⁶Chūāūwāā nāā pɔ̍mbūa̍a̍ ni̍, lāāndāā nāa̍ ni̍, a̍ sāa̍ nāa̍, a̍ chūīŋāā nāa̍, ndu̍yɛ̍ a̍ nāūwāā nāa̍ kpo̍u̍ ŋ̄ chō mɛ̄ī Ki̍li̍a̍a̍dī chi̍e̍e̍.

²⁷Kɛ̍ nāā tūa̍a̍ cho̍ ā bɛ̄ɛ̄ndīa̍ŋ le̍ sɔ̍ŋgɔ̄ɔ̍ wa̍ ki̍nɛ̍i̍, ŋ̄ chō wōlɔ̄ɔ̄lā nāāla̍ chɔ̄ūla̍ŋ chūā mī ŋ̄ ta᷄ŋ le̍ kɔ̄la̍ŋ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ Mɛ̄lɛ̄ka̍ Ya̍a̍wɛ̄ɛ̄ wa̍, mɛ̄ɛ̍ ŋ̄ dīmu̍l na̍a̍ yɛ̍ fāllo̍.”

²⁸O̍ ko̍ŋ kɔ̍ɔ̍lī, mi̍ Mūu̍sē o̍ di̍mūl Ɛ̄li̍a̍a̍sā, a̍ Chɔ̄ɔ̍sūāā, po̍ Nu᷅ŋ ndo̍ ndu̍yɛ̍ a̍ wānāa̍ wa̍ yu̍ŋgu̍la̍ I̍sɔ̄lūɛ̍i̍la̍ŋ chīla̍ŋ nda̍, a̍ wāŋnda̍ ha̍ā o̍kɔ̄ɔ̄.

²⁹Mbo̍ dīmūl nda̍ āā, “Tē pūa̍a̍ fu̍la̍ o̍ yu̍ŋgu̍ Ka̍a̍dī wo̍ chōo̍ a̍ o̍ yu̍ŋgu̍ Lūbɛ᷅ŋ ndo̍ chōo̍, ma̍ wā ā bɛ̄ɛ̄ndīa̍ŋ le̍ sɔ̍ŋgɔ̄ɔ̍ wa̍ ā ta᷄ŋ Chɔ̍ɔ̍dāŋ nda̍ŋ nya̍ nda̍ā lātūlu̍ le̍ nya̍ kɔ̄la̍ŋ sɔ̍ŋgɔ̄ɔ̍ mālāa̍ a̍ ya̍a̍mɔ̍ɔ̍wa̍a̍ Mɛ̄lɛ̄ka̍ Ya̍a̍wɛ̄ɛ̄ wa̍ pɛ̍, ndu̍yɛ̍ mā māla̍ nya̍ lɛ̄ŋndē lēŋ chūā pɛ̍, lā nɔ̄ mī lā ke᷄ nda̍ lɛ̄ŋndē Ki̍li̍a̍a̍dīle̍ŋ mī lē wa̍ le̍ nda̍.

³⁰Kɛ̍ tē ā kɛ̄ɛ̍ pɛ̍ le̍ tāŋɔ̄ɔ̍ le̍ nya̍ kɔ̄la̍ŋ sɔ̍ŋgɔ̄ɔ̍ mālāa̍, lā ke᷅ nda̍ lɛ̄ŋndē Ki̍li̍a̍a̍dīle̍ŋ te̍, nda̍ bɛ̍ɛ̍ lā ke̍ nda̍ lɛ̄ŋnde̍ŋ le̍ nda̍le̍ŋ Ke̍nāŋ nāa̍ I̍sɔ̄lūɛ̍i̍ya̍ tūa̍a̍ ā chō wā wa̍.”

³¹Mi̍ pūa̍a̍ fu̍la̍ o̍ yu̍ŋgu̍ Ka̍a̍dī wo̍ chōo̍ a̍ o̍ yu̍ŋgu̍ Lūbɛ᷅ŋ ndo̍ chōo̍ wa̍ ā mūlī āā, “Na̍a̍ bu̍ɛ̍i̍yāā nūmnda̍ ŋ̄ chō tōsā nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l na̍a̍ wo̍ fāllo̍.

³²Ŋ̄ chō bɛ̄ɛ̄ndīa̍ŋ a̍ wōlɔ̄ɔ̄lā nāāla̍ chɔ̄ūla̍ŋ mī ŋ̄ ta᷄ŋ Chɔ̍ɔ̍dāŋ nda̍ŋ, le̍ kɔ̄la̍ŋ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ Mɛ̄lɛ̄ka̍ Ya̍a̍wɛ̄ɛ̄ wa̍. Kɛ̍ na̍a̍ na̍a̍ Chɔ̍ɔ̍dāŋ le̍e̍lōo̍ na̍ŋ na̍a̍ ŋ̄ yēēma̍ ni̍ mī cha᷄lta̍ nāāla̍ŋ lā wa̍.”

³³O̍ ko̍ŋ, būŋgɛ̄ī Māsāa̍ Si̍hɔ̄ŋ, māsa̍ A̍mɔ̍lu̍a̍i̍tīi̍ya̍ ō wa̍ chōo̍ ve̍ ni̍, a̍ būŋgɛ̄ī Māsāa̍ Ɔ̍kū, māsāa̍ Ba̍a̍sīāŋ o̍ wa̍ chōo̍ ve̍, mi̍ Mūu̍sē o̍ ke᷅ yu̍ŋgu̍ Ka̍a̍dī wo̍, a̍ yu̍ŋgu̍ Lūbɛ᷅ŋ ndo̍, a̍ yu̍ŋgu̍ Mānāa̍sē wo̍ tɛ̄ndāa̍ tɛ̄ɛ̄ŋ, ndu̍ yɔ̍nūŋ māā pūa̍a̍ Chōo̍sɛ̍ wa̍ ō pīlɔ̍ɔ̍ ni̍. Būŋgāŋ māsāā ŋi̍ɔ̍ɔ̍ŋāā kāŋ ā wa̍ chōo̍ wo̍ŋ ki̍nɛ̍i̍, lātūlu̍ a̍ chi̍e̍e̍ŋ wa̍ o̍ būŋgāŋ mu᷅ŋ ni᷄ŋ ndo̍ŋ, ndu̍yɛ̍ a̍ lɛ̄ŋnde̍ ba̍lu̍ būŋgāŋ mu᷅ŋ nde̍ŋ kpo̍u̍, mi̍ Mūu̍sē o̍ ke᷅ wa᷅ŋnda̍ ha̍ā.

³⁴O̍ ko̍ŋ, chi̍o̍o̍ŋ mu᷅ŋ ki̍nɛ̍i̍, mī yūŋgu̍ Ka̍a̍dī wo̍ o̍ mīŋgī mu̍ŋ tāŋgūl, ndu̍yɛ̍ mbo̍ bɛ̄ɛ̄ndīāā mu̍ŋ ō kālā ka̍lā le̍ yɔ̄ŋi̍ ya̍a̍mɔ̍ɔ̍wa̍ ā lūɛ̍i̍, mu̍ŋ yɔ̍nūŋ ni̍ māā Di̍bɔ̄ŋ, a̍ Ātālɔ̍tī, a̍ A̍lo̍yā, a̍ Ātīlɔ̍tī, a̍ Si̍ɔ̍fāŋ, a̍ Cha̍sɛ̄ɛ̄, a̍ Cho̍kpɛ̍hāā, a̍ Bɛ̄tī Ni̍mi̍lūā, a̍ Bɛ̄tī Ha̍lūāŋ. O̍ ko̍ŋ kɔ̍ɔ̍lī, ma̍ tāŋgūl vɛ̄lɛ̄ kpākīla̍ŋ le̍ chɔ̄lūāā ndāa̍.

³⁵

³⁶

³⁷O̍ ko̍ŋ kɔ̍ɔ̍lī, mi̍ yu̍ŋgu̍ Lūbɛ᷅ŋ ndo̍ nda̍ mīŋgī chi̍o̍o̍ŋ ŋ̄ pīlɔ̍ŋ ta̍ŋgūl, ndu̍yɛ̍ ma̍ bɛ̄ɛ̄ndīāā mu᷅ŋ o̍ kālā ka̍lā le̍ yɔ̄ŋi̍ ya̍a̍mɔ̍ɔ̍wa̍ ā bīi̍ mu̍ŋ. Chi̍e̍e̍ŋ mu̍ŋ yɔ̍nūŋ ni̍ māā Hɛ̍si̍bɔ̄ŋ, a̍ Īlīa̍a̍lɛ̄ɛ̄, a̍ Kīlīa̍a̍tīm, a̍ Ni̍bɔ̄, a̍ Bāāl Mīɔ̄ŋ, a̍ Si̍bi̍mā. Chi̍e̍e̍ŋ nda̍ mīŋgi̍ mu᷅ŋ tāŋgūllo̍ŋ ki̍nɛ̍i̍, mā kē mu̍ŋ dīōlā chēle̍ŋ.

³⁸

³⁹Māka̍yā, po̍ Mānāa̍sē wo̍, wānāa̍ fu̍la̍ o̍ pūlālē ndɔ̄le̍ŋ chōo̍ wa̍, ma̍ lūɛ̄ī o̍ būŋgɛ̄ī Ki̍li̍a̍a̍dī ve̍ ni᷄ŋ a̍ sɔ̍ŋgɔ̍ɔ̍ ma̍ tūāū A̍mɔ̍lu̍a̍i̍tīi̍ya̍a̍ wa̍ lo̍ŋ nda̍, ndu̍yɛ̍ ma̍ bīī būŋgɛ̄ī kēŋ.

⁴⁰Mi̍ Mūu̍sē o̍ ke᷅ wānāa̍ fu̍la̍ o̍ pūlāle̍ Māka̍yā le̍ŋ chōo̍ wa̍ būŋgɛ̄ī Ki̍li̍a̍a̍dī ve̍ le̍ mā cha᷄l lo̍ŋ.

⁴¹Mi̍ po̍ pi᷅lɛ̍ dīōla̍ŋ āā Cha̍ā, wānāa̍ fu̍la̍ o̍ pūlāle̍ Mānāa̍sē le̍ŋ chōo̍ wa̍ ō pīlɛ̍ ō chīŋa̍la᷅ŋ sɔ̍ndɔ̄kɔ̍lta̍ŋ lā pūm o̍ būŋgɛ̄ī Ki̍li̍a̍a̍dīve̍ ni᷄ŋ, mbo̍ yām nda̍ŋ ndu̍yɛ̍ mbo̍ bīī la̍ŋ. O̍ ko̍ŋ kɔ̍ɔ̍lī, mbo̍ kē la̍ŋ dīōla̍ŋ āā, “Sɔ̄ndɔ̄kɔ̍lta̍ Cha̍ā la̍ŋ.”

⁴²O̍ ko̍ŋ kɔ̍ɔ̍lī, po̍ pi᷅lɛ̍ dīōla̍ŋ āā No̍bāā, mi̍ ndu̍ bɛ̍ɛ̍ o̍ chi᷅ŋa̍la᷅ŋ Ke̍na̍sī chi̍e̍e̍, ndu̍yɛ̍ mbo̍ bīī ndu̍ a̍ sɔ̄ndɔ̄kɔ̍lta̍ ba̍lu̍ ndu̍ la̍ŋ, ndu̍yɛ̍ mbo̍ hāndū ndu̍ dīōlā ndɔ̄la̍ŋ chōo̍.