Read Southern Kisi Nɔ̍mbāā 34 Bible Online

Nɔ̍mbāā 34 - Southern Kisi bible

Nɔ̍mbāā 34

¹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

²“Di̍mu̍l wa᷅ŋnda̍ I̍sɔ̄lūɛ̄ī māā ya̍ Mɛ̍lɛ̄ka̍ dīmi̍ āā, ‘Tē lā lūɛ̄ī o̍ lɛ̄ŋndē Ke̍nāŋnde̍ŋ ni᷄ŋ pɛ̍, lɛ̄ŋndē ya̍ I̍ cho̍ nya̍ kīo̍o̍ le̍ŋ, pɛ̄ŋgɛ̍la̍ lɛ̄ŋndē lēŋ la̍ŋ la̍ wa᷅ ni̍ŋ la᷅ŋ ni̍.

³Pɛ̄ŋgu̍la̍ lɛ̄ŋndē lēŋ bā tōūwo̍ lā kūā ni̍ŋ a̍ lɛ̄ŋndē po̍lte̍ŋ Sɛ᷅ŋ, o̍ lɛ̄ŋndē I̍dɔ̄mnde̍ŋ hōlnɔ᷄ŋndo̍ chɛ̍chɛ̍. Pɛ̄ŋgu̍la̍ lɛ̄ŋndē nyāle̍ŋ bā tōūwo̍, lā kāndūŋ ni̍ŋ nāa̍ Pēe̍ Mɛ̄ŋmā Īhɛ᷄llo̍ ō mɛ̄ɛ̄lu̍ bā pāa̍le̍ŋ lē chāŋndo̍ wa̍.

⁴Tē lā kāndu̍ŋ lo̍ŋ pɛ̍, lā tūndū lā tūūsu̍ kūmbū Pēmbīī Ākīla̍bīmnde̍ bā tōūwo̍, lā kūɛ̄ a̍ lɛ̄ŋndē po̍lte̍ŋ Si᷅ŋ ndi̍. O̍ ko̍ŋ kɔ̍ɔ̍lī, mī lā chɛ᷄ŋ lo̍ŋ mī lā kūɛ̄ Ka̍dɛ̍sī Ba̍a̍nīāā chi̍e̍e̍ ba᷅ tōūwo̍. Mī lā chɛ᷄ŋ vɛ̍lɛ̄ lo̍ŋ mī lā hēēlu̍ mī lā kūɛ̄ Hāsāā A̍dā chi̍e̍e̍, ndu̍yɛ̍ mī lā kūɛ̄ a̍ A̍si̍mɔ̄ŋ chi̍e̍e̍.

⁵O̍ ko̍ŋ kɔ̍ɔ̍lī, mī lā tūndū mī lā kūɛ̄ kūmbū lɛ̄ŋndē dɛ̍ŋgbɛ̍le̍ŋ o̍ pɛ̄ŋgu̍la̍ŋ a̍ lɛ̄ŋndē I̍chi̍pīle̍ŋ, ndu̍yɛ̍ mī lā kɔ̍ mɛ̍ɛ̍lū a̍ Pēe̍ Mɛ̄ŋmā Īhɛ᷄llo̍ Mɛ̄dītālu̍e̍e̍nīāā.

⁶“ ‘Pēe̍ Mɛ̄ŋmā Īhɛ᷄llo̍ Mɛ̄dītālu̍e̍e̍nīāā chɛ̍chɛ̍ ndu̍ wa᷅ ni̍ŋ pɛ̍ŋgu̍la̍ lɛ̄ŋndē nyāle̍ŋ ni̍ bā pāa̍le̍ŋ lē dēl lo̍ ni̍.

⁷“ ‘Pɛ̄ŋgu̍la̍ lɛ̄ŋndē nyāle̍ŋ bā lūāŋndo̍ lā kāndūŋ ni̍ŋ o̍ pēe̍ Mɛ̄ŋmā Īhɛ᷄llo̍ Mɛ̄dītālu̍e̍e̍nīāā mī lā hēēlu̍ a̍ Pēmbīī Hɔ̍ɔ̄ve̍.

⁸Mī lā chɛ᷄ŋ o̍ Pēmbīī Hɔ̍ɔ̄ve̍, mī kūɛ̄ a̍ Lēbō Ha̍ma̍tī chi̍e̍e̍, ndu̍yɛ̍ mī lā fūūlu̍u̍ a̍ Si̍da̍dī chi̍e̍e̍.

⁹O̍ ko̍ŋ kɔ̍ɔ̍lī, mī lā chɛ᷄ŋ lo̍ŋ, mī lā kūɛ̄ a̍ Si̍fi̍lɔ̄ŋ chi̍e̍e̍, ndu̍yɛ̍ mī lā kɔ̍ mɛ̍ɛ̍lū a̍ Hāsāā Ɛ̍nāŋ chi̍e̍e̍.

¹⁰“ ‘Pɛ̄ŋgu̍la̍ lɛ̄ŋndē nyāle̍ŋ bā pāa̍le̍ŋ lē chāŋndo̍ lā kāndūŋ ni̍ŋ Hāsāā Ɛ̍nāŋ chi̍e̍e̍, mī lā kūɛ̄ a̍ Si̍ɛ̍fām chi̍e̍e̍.

¹¹O̍ ko̍ŋ kɔ̍ɔ̍lī, mī lā chɛ᷄ŋ lo̍ŋ, mī lā tūūsu̍ a̍ Lu̍i̍bi̍lā chi̍e̍e̍, le̍ kɔ̄la̍ŋ A̍ yīŋ chi̍e̍e̍ ku̍mbū pāa̍le̍ŋ lē chāŋndo̍, mī lā kūɛ̄ a̍ pēmbo᷄ŋ o̍ Mɛ̄ŋmā Ībūŋga᷄ŋ Kāli̍lī kɔ̍ŋgɔ̍ bā pāa̍le̍ŋ lē chāŋndo̍.

¹²O̍ ko̍ŋ kɔ̍ɔ̍lī, mī lā chɛ᷄ŋ lo̍ŋ mī lā tūūsu̍ a̍ Chɔ̍ɔ̍dāŋ nda̍ŋ, mī lā kɔ̍ fu̍la̍ a̍ Pēe̍ Mɛ̄ŋmā Īhɛ᷄llo̍. “ ‘Lɛ̄ŋndē nya̍ sɔ̄lā ni̍ŋ nde̍ŋ, pɛ̄ŋgu̍la̍ ndɔ̄la̍ŋ la̍ŋ la̍ wa᷅ ni̍ŋ la̍ŋ chɛ̍chɛ̍ ni̍.’ ”

¹³Mi̍ Mūu̍sē o̍ di̍mūl wāŋnda̍ I̍sɔ̄lūɛ̄ī āā, “Lɛ̄ŋndē nya̍ sɔ̄lā ni̍ŋ nde̍ŋ le̍ŋ le̍ wa᷅ ni̍ŋ le᷅ŋ ni̍. Lɛ̄ŋnde̍ŋ nde᷅ŋ Mɛ̄lɛ̄ka̍ Ya̍a̍wɛ̄ɛ̄ o̍ ke̍ yu̍ŋgu̍la̍ ŋɔ̄ma̍hīɔ̍ɔ̍lu̍la̍ŋ ni̍, a̍ yu̍ŋgo̍o̍ pīlɔ̍ɔ̍ tɛ̄ndāa̍ tɛ̄ɛ̄ŋ. Lā nɔ̄ mī lā pīɔ̍u̍ yu̍ŋgu̍la̍ la᷅ŋ nda᷅ŋ lɛ̄ŋnde̍ŋ nde᷅ŋ a̍ kōo̍ŋ wūūwo̍ le̍ sīnāa̍ būŋgɛ̄ī yu̍ŋgu̍ o̍ yu̍ŋgu̍ o̍ nɔ̍ le̍ sɔ̄lāa̍ ve̍.

¹⁴Yu̍ŋgu̍ Lūbɛ᷅ŋndo̍ ni̍, a̍ yu̍ŋgu̍ Ka̍a̍dī wo̍, a̍ yu̍ŋgu̍ Mānāa̍sē wo̍ tɛ̄ndāa̍ tɛ̄ɛ̄ŋ, nda̍ sɔ̄la̍ ni᷅ŋ lɛ̄ŋnde̍ŋ le̍ nda̍le̍ŋ a̍ yu̍ŋgu̍la̍ŋ kpɛ̍ kpɛ̍

¹⁵Chɔ̍ɔ̍dāŋ le̍e̍lōo̍ na̍nu᷄ŋ, Chɛ̄lu̍i̍kō ndu̍ cho̍ Chɔ̍ɔ̍dāŋ le̍e̍lōo̍ bā pāa̍le̍ŋ lē dēl lo̍.”

¹⁶Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

¹⁷“Ɛ̄li̍a̍a̍sā wānā so̍līāā lāsa̍lāa̍, a̍ Chɔ̄ɔ̍sūāā po̍ Nu᷅ŋ ndo̍, nda̍ nɔ̍ ni̍ mā pīɔ̍u̍ I̍sɔ̄lūɛ̍i̍ya̍ lɛ̄ŋnde̍ŋ a̍ yu̍ŋgu̍la̍ŋ kpɛ̍ kpɛ̍.

¹⁸Ō fūla̍ o̍ ko̍ŋ kɔ̍ɔ̍lī, o̍ yu̍ŋgu̍ o̍ yu̍ŋgu̍ cho̍o̍ ā nɔ̄ mā hɛ̄li̍ wāŋndo̍ ō pīlɛ̍, wāna̍ cho̍ yu̍ŋgo̍o̍ chīla̍ŋ ndo̍ le̍ lɛ̄ŋnde̍ŋ nde᷅ŋ pīɔ̄ūwo̍.

¹⁹Wānāā nda̍ nɔ̄ mā hɛ̄li̍ wa̍ nda̍ cho̍ ha̍ā ni̍ a̍ yu̍ŋgu̍la̍ ndāla̍ŋ. Ke̍lɛ̍bī, po̍ Chɛ̍fu̍nɛ̄ɛ̄ wo̍, fūlāa̍ o̍ yu̍ŋgu̍ Chu̍dā wo̍ chōo̍.

²⁰Si̍ɛ̍mūɛ̄l, po̍ Āmi̍hu̍dī wo̍ fūlāa̍ o̍ yu̍ŋgu̍ Si̍mīɔ̄ŋndo̍ chōo̍.

²¹Ɛ̄li̍da̍dī, po̍ Chi̍si̍lɔ̄ŋ ndo̍, fūlāa̍ o̍ yu̍ŋgu̍ Bɛ̍ŋnja̍mīŋ ndo̍ chōo̍.

²²Bu̍kī, po̍ Chɔ̍ki̍lī wo̍, fūlāa̍ o̍ yu̍ŋgu̍ Da᷅ŋ ndo̍ chōo̍.

²³Ha̍nīɛ̄l, po̍ Ɛ̍fɔ̍dī wo̍, fūlāa̍ o̍ yu̍ŋgu̍ Mānāa̍sē, po̍ Chōo̍sɛ̍ wo̍ chōo̍.

²⁴Kɛ̍mūɛ̄l, po̍ Si̍fi̍tāŋ ndo̍, fūlāa̍ o̍ yu̍ŋgu̍ E̍fi̍lūēm ndo̍ chōo̍.

²⁵Ɛ̄līsa̍fāŋ, po̍ Pa̍a̍na̍kī wo̍, fūlāa̍ o̍ yu̍ŋgu̍ Sɛ̍bu̍lɔ̄ŋ ndo̍ chōo̍.

²⁶Pa̍li̍tīɛ̄l, po̍ A̍sāŋ ndo̍, fūlāa̍ o̍ yu̍ŋgu̍ I̍sa̍a̍kā wo̍ chōo̍.

²⁷A̍hi̍hu̍dī, po̍ Si̍ɛ̍lo̍mī wo̍, fūlāa̍ o̍ yu̍ŋgu̍ A̍sīɛ̄ɛ̄ wo̍ chōo̍.

²⁸Pɛ̍da̍hɛ̄l, po̍ Āmi̍hu̍dī wo̍, fūlāa̍ o̍ yu̍ŋgu̍ Nāfi̍ta̍lī wo̍ chōo̍.”

²⁹Wāŋnda̍ ha̍ā Mɛ̄lɛ̄ka̍ Ya̍a̍wɛ̄ɛ̄ o̍ hɛ̍li̍ ni̍, le̍ mā pīɔ̍u̍ wāŋnda̍ I̍sɔ̄lūɛ̍i̍ lɛ̄ŋndē Ke̍nāŋnde̍ŋ.