Read Southern Kisi Nɔ̍mbāā 35 Bible Online

Nɔ̍mbāā 35 - Southern Kisi bible

Nɔ̍mbāā 35

¹Bōōndi̍i̍ I̍sɔ̄lūɛ̍i̍ya̍ ā wa̍ o̍ dɛ̍ŋgbɔ̍ɔ̍ Mo̍wa̍bī, Chɔ̍ɔ̍dāŋ kɔ̍ŋgɔ̍ bā pāa̍le̍ŋ lē chāŋndo̍, mi̍ Chɛ̄lu̍i̍kō ndu̍ wa᷅ lēe̍lo̍ō bā pāa̍le̍ŋ lē dēl lo̍ ve̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

²“Di̍mu̍l I̍sɔ̄lūɛ̍i̍ya̍ māā ā nɔ̄ mā hɛ̄li̍ chi̍o̍o̍ŋ ŋ̄ ti᷄ŋ o̍ būŋgāŋ nda̍ chō sɔ̄lā wo̍ŋ ni᷄ŋ, chi̍e̍e̍ŋ nɔ̍ fo̍ndāŋnda̍ŋ lā bālāā le̍ chɔ̄lūa̍a̍ dīo̍la̍ŋ ndo̍ŋ, mā ke᷄ Li̍va̍īya̍.

³Chi̍e̍e̍ŋ nda̍ chō mu̍ŋ hɛ̍lī wo̍ŋ, Li̍va̍īya̍ nda̍ nɔ̍ mu̍ŋ ni̍. Fo̍ndāŋnda̍ cho̍ chi̍e̍e̍ŋ mu̍ŋ lā bālāā le̍ chɔ̄lūa̍a̍ dīo̍la̍ŋ nda̍ŋ, la̍ŋ la̍ cho̍ wā le̍ nāūwāā ndāa̍ ni̍, a̍ sāa̍ ndāa̍, a̍ chūīŋāā ndāa̍ ndu̍yɛ̍ a̍ chɔ̄lūāā ndāa̍ ā pīli̍a̍a̍ kpo̍u̍.

⁴Chi̍e̍e̍ŋ nya̍ chō mu̍ŋ Li̍va̍īya̍ kē wo̍ŋ, chīe̍e̍ o̍ chi̍e̍e̍ ō nɔ̄ mbō nɔ̄ fo̍ndāa̍ o̍ bālāā chɛ̍chɛ̍, le̍ chɔ̄lūa̍a̍ dīo̍la̍ŋ, chɔ̄nɔ᷄ŋndo̍ o̍ sāāsa̍ chi̍o̍o̍ mbō kūɛ̄ le̍ nɛ̄īyo̍ wāa̍ ō pīlɛ̍ a̍ kɛ̄mɔ̄ɔ̍ lē ŋūɛ̍ɛ̍nu̍ (1,500), ve̍llāa̍ vēllē.

⁵O̍ chi̍e̍e̍ o̍ chi̍e̍e̍ hōlnɔ᷄ŋndo̍ lā nɔ̄ mī lā tūu̍ fo̍ndāa̍ o̍ kpēŋgūŋ hi̍ɔ̍ɔ̍lo̍ŋ vēlāa̍ vēllē mī chi̍o̍o̍ o̍ wa̍ tɛ̄ɛ̄ŋ. Kūmbū pāa̍le̍ŋ lē chāŋndo̍ lā nɔ̄ mī lā tūu̍ fo̍ndāa̍ le̍ nɛ̄īyo̍ wāa̍la̍ŋ lā yāa̍ (3,000), kūmbū pāa̍le̍ŋ lē dēllo̍ nɛ̄īyo̍ wāa̍la̍ŋ lā yāa̍ (3,000), kūmbū tōūwo̍ nɛ̄īyo̍ wāa̍la̍ŋ lā yāa̍ (3,000), o̍ ko̍ŋ kɔ̍ɔ̍lī kūmbū lūāŋndo̍ nɛ̄īyo̍ wāa̍la̍ŋ lā yāa̍ (3,000). Fo̍ndā nya̍ chō ko̍ŋ tu̍ū o̍ chi̍o̍o̍ vēllāa̍ vēllē wo̍, ndu̍ cho̍ wā le̍ chɔ̄lūāā ndāa̍ dīo̍la̍ŋ lo̍ŋ ni̍.

⁶O̍ ko̍ŋ kɔ̍ɔ̍lī, lā nɔ̄ mī lā ke᷄ Li̍va̍īya̍ chi̍e̍e̍ŋ vi̍a̍ŋna᷄ŋndo̍ŋ ŋ̄ ŋɔ᷄mpu᷅m, tē sūlɛ̍i̍ fūla̍ wāŋndo̍ bā pɛ̍ mbō dīī wāna̍ chi̍o̍o̍, nāa̍ o̍ nya̍a̍nūŋ mbō vēŋnu᷄ŋ nda̍. Ō fūla̍ o̍ chi̍e̍e̍ŋ mu̍ŋ kɔ̄ɔ̄lī, lā nɔ̄ mī lā ke᷄ nda̍ chi̍e̍e̍ŋ be̍le̍-hi̍ɔ̍ɔ̍lu̍ a̍ ŋ̄ mūu̍ŋ nāa̍ nda̍ wā wa̍.

⁷Mɛ̄ɛ̍ kpo̍u̍ kpo̍u̍, lā nɔ̄ mī lā ke᷄ nda̍ chi̍o̍o̍ŋ be̍le̍-hi̍ɔ̍ɔ̍lu̍ a̍ ŋ̄ ŋɔ̄ma̍a̍, lātūlu̍ a̍ fo̍ndāŋnda̍ ba̍lu̍ chi̍e̍e̍ŋ mu̍ŋ nda̍ŋ le̍ chɔ̄lūa̍a̍ dīo̍la̍ŋ.

⁸Ndu̍yɛ̍ tē lā wa̍ chi̍o̍o̍ŋ mu᷅ŋ hɛ̄līo̍o̍ o̍ būŋgāŋ nyāa̍ŋ ni᷄ŋ le̍ Li̍va̍īya̍ kīo̍o̍ pɛ̍, mɛ̄ɛ̍ yu̍ŋgu̍ o̍ yu̍ŋgu̍ būŋgɛ̄ī ndɛ̄i̍ ī wā yɛ̍, le̍nde̍ nya̍ nɔ̄ ni̍ mī lā hɛ̄li̍ chi̍o̍o̍ŋ o̍ būŋgɛ̄ī ndɛ̄i̍ ni᷄ŋ. Yu̍ŋgu̍ būŋgɛ̄ī ndɛ̄i̍ ī wa̍ pɛ̍ ta̍u̍, lā hɛ̄li̍ chi̍o̍o̍ŋ ta̍u̍ o̍ būŋgɛ̄ī ndɛ̄i̍ ni᷄ŋ, yu̍ŋgu̍ būŋgɛ̄ī ndɛ̄i̍ ī wa̍ pɛ̍ i̍ pɔ̍mbɔ̄, lā hɛ̄li̍ chi̍o̍o̍ŋ ŋ̄ pɔ̄mbɔ̄ o̍ būŋgɛ̄ī ndɛ̄i̍ ni᷄ŋ.”

⁹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

¹⁰“Di̍mu̍l I̍sɔ̄lūɛ̍i̍ya̍ māā nyɛ̄ ya̍ Mɛ̍lɛ̄ka̍ dīmi̍ wo̍ cho̍ ho̍ō ni̍. Tē lā ta᷄ŋ Chɔ̍ɔ̍dāŋ nda̍ŋ pɛ̍, mī lā lūɛ̄ī o̍ lɛ̄ŋndē Ke̍nāŋnde̍ŋ ni᷄ŋ,

¹¹lā nɔ̄ mī lā hɛ̄li̍ chi̍o̍o̍ŋ ŋ̄ ti᷄ŋ mī mu̍ŋ wa̍ te̍ŋge̍ŋ. Le̍ tē sūlɛ̍i̍ fūla̍ wāŋndo̍ o̍ bā pɛ̍ mbō dīī wāŋndo̍ ndɔ̍, wānā ko̍ŋ ō nyāānu̍ŋ o̍ chi̍e̍e̍ŋ mu̍ŋ ō pīlɛ̍ ni᷄ŋ nāa̍ wānā yɔ᷅ŋ ndu̍ nyɛ̄ le̍ wa̍. Yɔ̄ŋi̍ wāna̍ o̍ di̍ī ko̍ŋ ndo̍ wāna̍ ndɔ̄ɔ̍ ō yɔ̍ŋ ndu̍ nyɛ̄ sɔ̍ŋgɔ̍ ko̍ŋ.

¹²Chi̍e̍e̍ŋ nya̍ chō mu᷅ŋ hɛ̄lī wo̍ŋ, mu̍ŋ cho̍ wā le̍ vīōŋnɔ᷄ŋndo̍ ni̍, yɔ̄ŋi̍ wa᷅na̍ nda̍ dīī ko̍ŋ ndo̍ wāna̍ ndɔ̄ɔ̍ ō dīi̍ wa᷅na̍ sūlɛ̍i̍ ī fūla̍ ko̍ŋ o̍ bā wo̍. Ko̍ŋ to̍sa̍ ni̍ wāna̍ sūlɛ̍i̍ ī fūla̍ ko̍ŋ o̍ bā mbo̍ dīī chāa̍ŋ ndɔ̍ wo̍, ō sɔ̍lā pi̍ɔ̍mndo̍ le̍, ha̍a̍a̍ mɛ̄ɛ̍ mbō lo̍ ko̍ŋ mā kɔ̄ɔ̄sa̍ fɛ̍lɛ̍ŋ a̍ ndu̍ wa᷅ŋnda̍ kpo̍u̍ o̍ hɔ̄l mbō sɔ̄la̍ wɔ̄ūle̍ŋ.

¹³Chi̍o̍o̍ŋ ŋ̄ ŋɔ᷄mpu᷅m nya̍ nɔ̄ ni̍ mī lā hɛ̄li̍,

¹⁴Chɔ̍ɔ̍dāŋ le̍e̍lōo̍ bā pāa̍le̍ŋ lē chāŋndo̍ ŋ̄ ŋgāa̍, o̍ lɛ̄ŋndē Ke̍nāŋnde̍ŋ ni᷄ŋ ŋ̄ ŋgāa̍.

¹⁵Chi̍e̍e̍ŋ ŋɔ᷄mpu᷅m nya̍ chō mu̍ŋ hɛ̍lī le̍ vīōŋnɔ᷄ŋndo̍ wo̍ŋ, ŋ̄ nɔ̄ mī ŋ̄ wa̍ le̍ I̍sɔ̄lūɛ̍i̍ya̍, a̍ mīālāa̍ hu᷅ŋ nya̍ cha᷄lle̍ tɛ̄ɛ̄ŋ nda̍, ndu̍yɛ̍ a̍ wānāā lēkāa̍wa̍a̍ cho̍ nya̍ tɛ̄ɛ̄ŋ nda̍. Le̍ tē sūlɛ̍i̍ fūla̍ wāŋndo̍ o̍ bā pɛ̍ mbō dīī wāŋndo̍, wānā ko̍ŋ ō nyāānu̍ŋ o̍ chi̍e̍e̍ŋ mu̍ŋ ō pīlɛ̍ ni᷄ŋ nāa̍ wānā yɔ᷅ŋ ndu̍ nyɛ̄ le̍ wa̍.

¹⁶“Tē ī yɔ̄nu̍ŋ pɛ̍ mi̍ wāŋndo̍ ō lūāā chāa̍ŋ ndɔ̍ a̍ chīli̍ŋnde̍, kɛ̄lɛ̄ŋgāā mbo̍ vīā chāa̍ŋ ndɔ̍ a̍ pōūwo̍, ɔ̄ɔ̄ mbo̍ lūāā ndu̍ a̍ yɔ̄mndo̍ mbo̍ dīī chāa̍ŋ ndɔ̄ ko̍ŋ pɛ̍, wānā ko̍ŋ wānā di̍yāa̍ o̍ cho̍ ni̍. Ndu̍ bɛ̍ɛ̍ ō nɔ̄ mbō sɔ̄la̍ pīɔ̍mndo̍.

¹⁷

¹⁸

¹⁹Wāna̍ o̍ di̍ī ko̍ŋ ndo̍ tē wāna̍ ndɔ̄ɔ̍ ō sāālu̍ŋ ndu̍ pɛ̍, ō nɔ̄ di̍ mbō mīŋgi̍ māa̍ ndu̍ bɛ̍ɛ̍ mbō dīī ndu̍.

²⁰“Tē wāŋndo̍ ō tu᷄l chāa̍ŋ ndɔ̍ yɛ̄le̍ŋ pɛ̍, mbō chu᷄m chāa̍ŋ ndɔ̄ ko̍ŋ īnɛ̍, mbō nyīndū ndu̍, kɛ̄lɛ̄ŋgāā mbō ma᷄l ndu̍ nyɛ̄ chōo̍,

²¹ɔ̄ɔ̄ mbō lɔ̄ɔ̄ ndu̍ a̍ bɔ̄ta̍a̍ mi̍ chāa̍ŋ ndɔ̄ ko̍ŋ ō vī pɛ̍, wānā ko̍ŋ wānā di̍yāa̍ o̍ cho̍ ni̍. Ndu̍ bɛ̍ɛ̍ ō nɔ̄ mbō sɔ̄la̍ pīɔ̍mndo̍. Wāna̍ o̍ di̍ī ko̍ŋ ndo̍ tē wāna̍ ndɔ̄ɔ̍ ō sāālu̍ŋ ndu̍ pɛ̍, ō nɔ̄ di̍ mbō mīŋgi̍ māa̍ ndu̍ bɛ̍ɛ̍ mbō dīī ndu̍.

²²“Kɛ̍ tē ō wa̍ pɛ̍ māā sūlɛ̍i̍ fu̍la̍ wāŋndo̍ o̍ bā ni̍ mbo̍ dīī chāa̍ŋ ndɔ̍ ō ve̍ o̍ yɛ̄lē tūlāā ni᷄ŋ mbō chu᷄m ndu̍ o̍ nɛ̄ī le̍ pɛ̍, ō wa̍ nyi̍ndɔ̄ɔ̄ o̍ nyi̍ndū wānā ko̍ŋ ni̍ ō ve᷄ kɔ̍l te̍, kɛ̄lɛ̄ŋgāā nyɔ̄ɔ̍ o̍ wu̍u̍ ni̍ ō ve᷄ kɔ̍l te̍ mi̍ nyɛ̄ kōŋ ō kɔ̍ vi̍ɔ̄ chāa̍ŋ ndɔ̄ ko̍ŋ,

²³ɔ̄ɔ̄ mbō wa᷄ māā pōūwo̍ o̍ ma̍l ni̍ ō ve᷄ cha̍a̍ŋ ndɔ̄ ko̍ŋ chɔ̄ le̍ mi̍ pōū kōŋ ō kɔ᷄ de᷅l chāa̍ŋ ndɔ̄ ko̍ŋ chōo̍, mi̍ chāa̍ŋ ndɔ̄ ko̍ŋ ō wū pɛ̍,

²⁴wānā ko̍ŋ ā nɔ̄ mā kɔ̄ɔ̄sa̍ a̍ ndu̍. Ku̍ndāa̍ nɔ̄ mā dīmi̍ nda̍ sūɛ̍i̍ ke̍ŋ tɛ̄ɛ̄ŋ nda̍ wāna̍ o̍ di̍ī ko̍ŋ ndo̍ wāna̍ ndɔ̍ nɔ̍ le̍ māa̍ mīŋgīo̍o̍ wo̍ mɛ̄ɛ̍ i̍ cho̍ ī dīmīāā o̍ sāwāla̍ŋ nda᷅ŋ ni᷄ŋ yɛ̍.

²⁵Ku̍ndāa̍ ō nɔ̄ mbō mānda̍ wāna̍ sūlɛ̍i̍ ī fūla̍ ho̍ō o̍ bā wo̍, yɔ̄ŋi̍ wa᷅na̍ o̍ di̍ī yo̍ wāna̍ ndɔ̄ɔ̍ ō dīi̍ ndu̍. Tē ku̍ndāa̍ ō kɔ̄ɔ̄sa̍ a̍ ndu̍ pɛ̍ mā sāālu̍ŋ māā sūlɛ̍i̍ lēkɛ̍ndɛ̍ī fu̍la̍ ndu̍ o̍ bā ni̍, ā nɔ̄ mā mīŋgi̍ ndu̍ o̍ chi̍e̍e̍ vi̍a̍ŋna᷄ŋ ko̍ŋ ni᷄ŋ pi̍la̍ mbō wa᷄ o̍ vīōŋnɔ᷄ŋndo̍ ni᷄ŋ lo̍ŋ. Lo̍ŋ o̍ nɔ̍ ni̍ mbō wa̍ ha̍a̍a̍ mbō lo᷄ o̍ ko̍ŋ mī wāna̍ cho̍ wānā bɛ̍ndū wānāā sōlīāā lāsa̍lāa̍ a̍ te̍le̍ŋ ko̍ŋ, ma̍ tālā ndu̍ chūɛ̄īya̍ŋ o̍ lēbōl le̍ ndu̍ hɛ̄līo̍o̍ wo̍ ō vī.

²⁶Kɛ̍ tē wāna̍ sūlɛ̍i̍ ī fūla̍ ko̍ŋ o̍ bā wo̍ ō fāŋa̍ŋ o̍ chi̍e̍e̍ o̍ cho̍ o̍ vīōŋnɔ᷄ŋndo̍ ni᷄ŋ ndo̍ pɛ̍ mbō kūɛ̄ bā o̍ bā,

²⁷ndu̍yɛ̍ mī wāna̍ o̍ di̍ī yo̍ wāna̍ ndɔ̄ɔ̍ ō sāālu̍ŋ ndu̍ mbō dīī ndu̍, wāna̍ di̍ī ndu̍ ko̍ŋ ndo̍ ō tɛ̄ɛ̄mbu̍u̍ sāwa̍ di̍mi̍ māā wānā di̍ī wa̍nā le̍ wo̍ le̍.

²⁸Wāna̍ sūlɛ̍i̍ ī fūla̍ ko̍ŋ o̍ bā wo̍ ō nɔ̄ mbō lo᷄ o̍ chi̍e̍e̍ o̍ kɔ̍ vi̍o̍ŋnu᷄ŋ ko̍ŋ ndo̍, ha̍a̍a̍ mī wāna̍ cho̍ wānā bɛ̍ndū wānāā sōlīāā lāsa̍lāa̍ a̍ te̍le̍ŋ ko̍ŋ ō vī. Tē ō vī pɛ̍, wānā ko̍ŋ ō mīīŋgu̍ ni̍ko̍ o̍ ndu̍ lo̍ chi̍e̍e̍.

²⁹Sāwāla̍ŋ nda᷅ŋ lā chō le̍ nya̍ ndu̍yɛ̍ a̍ chūāūwāā nyāa̍ mbō kūɛ̄ a̍ lāchī kɛ᷅, bā o̍ bā nya̍ wa̍.

³⁰“Wānā o̍ wāna̍ di̍ī wāŋndo̍ pɛ̍, ndu̍ bɛ̍ɛ̍ lā nɔ̄ mī lā dīī ndu̍. Kɛ̍ ndu̍yɛ̍, lɔ̍ɔ̍ pa̍, nya̍ dīī ndu̍ mɛ̄ɛ̍ mī wānāā ŋīɔ̍ɔ̍ŋ kɛ̄lɛ̄ŋgāā a̍ yāa̍ a̍ tɛ̍nda̍ se̍īle̍ŋ mā fūla̍ kɔ̄ɔ̄lī māā ī chō tōnya̍. Kɛ̍ ō ve᷅ le̍ se̍īlē wānā pi᷅lɛ̍ le̍ nya̍ dīī ndu̍ le̍.

³¹Tē wāŋndo̍ ō tɛ̄ɛ̄mbu̍u̍ yōōmū wāŋndo̍ pɛ̍, ndu̍ bɛ̍ɛ̍ lā nɔ̄ mī lā dīī ndu̍. Lā bi̍ī wānā ko̍ŋ nyɛ̄ sɔ̄lāā o̍ bā le̍ hāli̍ kpe̍ŋ lā di̍ī ndu̍ le̍ le̍.

³²Tē wāŋndo̍ sūlɛ̍i̍ fūla̍ ndu̍ o̍ bā pɛ̍ mbo̍ dīī wāŋndo̍, ndu̍yɛ̍ mbo̍ nyāānu᷄ŋ mbo̍ kɔ̍ vi̍o̍ŋnu᷄ŋ o̍ chi̍e̍e̍ŋ cho̍ le̍ vīōŋnɔ᷄ŋndo̍ wo̍ŋ o̍ pīlɛ̍, wānā ko̍ŋ o̍ ke᷄ nya̍ bɛ̍ɛ̍ nyɛ̍ sɔ̄lāa̍ le̍ mī lā chɛ᷄l ndu̍ mbō mīīŋgu̍ o̍ ndu̍lo̍, lā bīī nyɛ̄ sɔ̄lāā kōŋ mī lā chɛ᷄l ndu̍ dīōm te̍. Wānā ko̍ŋ ō nɔ̄ mbo̍ lo̍ o̍ chi̍e̍e̍ o̍ cho̍ ko̍ŋ o̍ vīōŋnɔ᷄ŋndo̍ ni᷄ŋ ndo̍ ha̍a̍a̍ mɛ̄ɛ̍ mbō lo̍ o̍ ko̍ŋ mī wāna̍ cho̍ wānā bɛ̍ndū wānāā sōlīāā lāsa̍lāa̍ a̍ te̍le̍ŋ ko̍ŋ ndo̍ ō vī, ma̍lāŋ wānā ko̍ŋ ō mīīŋgū o̍ ndu̍lo̍.

³³Tē lā tōsa̍ le̍nde̍ le̍, mɛ̄ɛ̍ lɛ̄ŋndē lē sīmnu᷄ŋ le̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Kōo̍ma̍ wāna̍ chi̍o̍o̍ sōlīo̍o̍ o̍ fo̍ndō fu̍u̍ wo̍ chōo̍ ō tōsa̍ mī lɛ̄ŋnde̍ŋ lē sīmnu᷄ŋ le̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Wānā o̍ wāna̍ di̍ī wāŋndo̍ pɛ̍ o̍ fo̍ndō fu̍u̍ wo̍ chōo̍, ndu̍ bɛ̍ɛ̍ lā nɔ̄ mī lā dīī ndu̍. Sa̍lā o̍ sa̍lā cho̍ mbō sōli̍ŋ le̍ lɛ̄ŋnde̍ŋ dīndi̍o̍o̍ ya̍ Mɛ̍lɛ̄ka̍ o̍ hɔ̄l te̍, mɛ̄ɛ̍ mī wānā ko̍ŋ ō sɔ̄la̍ pīɔ̍mndo̍.

³⁴Lā to̍sā mī lɛ̄ŋndē nya̍ chō kɔ̄la̍ŋ cha᷄lle̍ ni᷄ŋ nde̍ŋ lē sīmnu᷄ŋ le̍ nɔ̍ɔ̍lɛ̍i̍ ya̍ Mɛ̄lɛ̄ka̍ o̍ hɔ̄l te̍. Kāni̍ fo̍ndōle̍, ya̍ Mɛ̍lɛ̄ka̍ Ya̍a̍wɛ̄ɛ̄ I̍ cho̍ wā nya̍ I̍sɔ̄lūɛ̍i̍ya̍ tɛ̄ɛ̄ŋ o̍ lɛ̄ŋndē lēŋ ni᷄ŋ.”