Read Southern Kisi Nɔ̍mbāā 8 Bible Online

Nɔ̍mbāā 8 - Southern Kisi bible

Nɔ̍mbāā 8

¹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē āā,

²“Di̍mu̍l E̍lɔ̄ŋ māā te̍le̍ŋ o̍ te̍le̍ŋ te̍ ō kɛ̄si̍ la̍mbūi̍la̍ ŋɔ̍mmɛ̍ūla̍ŋ o̍ nyɛ̄lā kɛ̄sīāā lāla̍mbūi̍yo̍ chōo̍ pɛ̍, ō nɔ̄ mbō kɛ̄si̍ la̍ŋ mbō tōsa̍ mī nyɛ̄ wa̍wo̍ŋndo̍ ō wa̍ dīōndɔ̄ɔ̍ nyɛ̄ kɛ̄sīāā lāla̍mbūi̍yo̍ lāchī.”

³Ndu̍yɛ̍, mi̍ E̍lɔ̄ŋ to̍sā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍. Mbo̍ kɛ̄sī la̍ŋ mbo̍ mūlī la̍ŋ hɔ̄lla̍ lāchī, le̍ mī lā wa̍ sānde̍i̍ mi̍ nyɛ̄ wa̍wo̍ŋndo̍ ō wa̍ dīōndɔ̄ɔ̍ la̍chi̍.

⁴Ndu̍yɛ̍ nyɛ̄ kɛ̄sīāā lāla̍mbūi̍yo̍ ho̍ō, a̍ ko̍o̍līi̍ye̍ kpo̍sōŋ o̍ wa̍ ō tōōsīāā ni̍, chɔ̍ŋ le̍bɛ̍ŋgu̍ mbo̍ hēl a̍ nyɛ̄lā nda̍ tūūli̍a̍a̍ māā pe̍e̍ŋge̍la̍ pɛ̍ɛ̍ŋgāā la̍ŋ. Ko̍o̍līi̍ye̍ nda̍ lo̍ lɔ̄ɔ̍ a̍ ha̍mɛ̄i̍yo̍ ni̍ ma̍ bɛ̄ɛ̄ndīāā ndu̍. Ndu̍yɛ̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē le̍ ndu̍ bɛ̄ɛ̄ndīa̍a̍ yɛ̍, le̍nde̍ nda̍ bɛ̄ɛ̄ndi̍a̍a̍ ndu̍ ni̍.

⁵Mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl Mūu̍sē āā,

⁶“So̍li̍ Li̍va̍īya̍ I̍sɔ̄lūɛ̍i̍ya̍a̍ tu̍a̍a̍ tɛ̄ɛ̄ŋ, mā to̍sa̍ mā sɔ̄la̍ dīndīo̍o̍ ya̍ Mɛ̍lɛ̄ka̍ o̍ hɔ̄l.

⁷Ndu̍yɛ̍ mɛ̄ɛ̍ ŋ̄ nɔ̄ mā to̍sa̍ yɛ̍ cho̍ ho̍ō ni̍. Fa̍sa̍ŋi̍a̍a̍ nda̍ mɛ̄ŋma̍ cho̍ le̍ wāŋndo̍ dīndīo̍o̍ wa̍ŋ, o̍ ko̍ŋ kɔ̍ɔ̍lī, mā to̍sa̍ mā sēndi̍ yīīŋnde̍ nda̍ lēkɔ̄ɔ̍ kpo̍u̍, mā di̍mu̍l nda̍ mā tɔ̄ɔ̄ nyɛ̄lā ndāla̍ŋ. Mɛ̄ɛ̍ o̍ nɛ̄īyo̍ ho̍ō ni᷄ŋ nda̍ lōōkū di̍ndīo̍o̍ sɔ̄lā ya̍ Mɛ̍lɛ̄ka̍ o̍ hɔ̄l ni̍.

⁸O̍ ko̍ŋ kɔ̍ɔ̍lī, mā di̍mu̍l nda̍ mā hīŋ a̍ nāū tōōyē fɔ̍ŋndɔ̍ɔ̍, lātūlu̍ a̍ kōlo̍ kɛ̍ndɛ̄ kɛ̍ndɛ̍ cho̍ ō mūūli̍āŋ a̍ chūɛ̄īmā ɔ̄li̍fīi̍ya̍ŋ ndo̍, le̍ sa̍lā tɔ̄lɔ̄ɔ̄ ku̍llo̍ sōlīo̍o̍. O̍ ko̍ŋ kɔ̍ɔ̍lī, mī nūm Mūu̍sē hi᷅ŋ vɛ̄lɛ̄ a̍ nāū chēle̍ŋ le̍ sa̍la̍ fa̍ŋā yɔ̄ŋ wɔ̄ɔ̍ŋndo̍ wo̍ sōlīo̍o̍.

⁹O̍ ko̍ŋ kɔ̍ɔ̍lī, mā si̍mi̍ Li̍va̍īya̍ kpo̍u̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ sōndōo̍, ndu̍yɛ̍, mā ve̍e̍lu̍ I̍sɔ̄lūɛ̍i̍ya̍ kpo̍u̍ mā chūūŋgi̍āŋ lo̍ŋ.

¹⁰Tē a̍ si̍mi̍ Li̍va̍īya̍ ya̍ Mɛ̍lɛ̄ka̍ Ya̍a̍wɛ̄ɛ̍ lāchī pɛ̍, a̍ di̍mu̍l I̍sɔ̄lūɛ̍i̍ya̍ nda̍ kpo̍u̍ ā hāndu̍ nda̍ bāla̍ŋ o̍ lēbōl.

¹¹O̍ ko̍ŋ kɔ̍ɔ̍lī, mī E̍lɔ̄ŋ o̍ ma̍l Li̍va̍īya̍ ya̍ Mɛ̍lɛ̄ka̍ o̍ bā māā sa̍lā kpe̍e̍kpe̍i̍yo̍, ō wāŋnda̍ I̍sɔ̄lūɛ̄ī a̍ yɔ̍ŋgu̍ o̍ ya̍ Mɛ̍lɛ̄ka̍ lo̍ wo̍, le̍ mā wa̍ ā bɛ̄ɛ̄ndīa̍ŋ le̍ wa̍li̍ ya̍ Mɛ̍lɛ̄ka̍ Ya̍a̍wɛ̄ɛ̄ wo̍ tōsāa̍.

¹²O̍ ko̍ŋ kɔ̍ɔ̍lī, nāūwāā tōōyīāā ŋīɔ̍ɔ̍ŋāa̍ cho̍ le̍ sa̍lāla̍ŋ sōlīo̍o̍ le̍ nda̍ wa̍, mī Li̍va̍īya̍ ā hāndu̍ nda̍ bāla̍ŋ o̍ lēbōl. Nāūwāā ŋīɔ̍ɔ̍ŋ nda̍ ha̍ā, ō pīlɔ̍ɔ̍ lā nɔ̄ mī lā sōli̍ ndu̍ sa̍la̍ fa̍ŋā yɔ̄ŋ wɔ̄ɔ̍ŋndo̍ wo̍, ō pīlɔ̍ɔ̍ mī lā sōli̍ ndu̍ sa̍lā lūāmāa̍. Sa̍lāla̍ŋ nda᷅ŋ la̍ŋ la̍ cho̍ le̍ Li̍va̍īya̍ dīndīo̍o̍ ya̍ Mɛ̍lɛ̄ka̍ o̍ hɔ̄l ni̍.

¹³“O̍ ko̍ŋ kɔ̍ɔ̍lī, mā si̍mi̍ Li̍va̍īya̍, E̍lɔ̄ŋ nda̍ pūa̍a̍ ndūa̍a̍ lāchī, le̍ nda̍ yɔ̄ŋgōo̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍, māā sa̍lā kpe̍e̍kpe̍i̍yo̍.

¹⁴Mɛ̄ɛ̍ o̍ nɛ̄īyo̍ ho̍ō ni᷄ŋ ŋ̄ nɔ̄ ni̍ mā fa̍ŋa̍ Li̍va̍īya̍ I̍sɔ̄lūɛ̍i̍ya̍a̍ tu̍a̍a̍ chōo̍ mā yɔ̍ŋgu̍ nda̍ o̍ ya̍ Mɛ̍lɛ̄ka̍ lo̍, mā wa̍ ni᷅ŋ le̍ ya̍ Mɛ̍lɛ̄ka̍.

¹⁵Tē a̍ chi̍i̍ Li̍va̍īya̍ dīndī pɛ̍, ndu̍yɛ̍ mā ma̍l nda̍ ya̍ Mɛ̍lɛ̄ka̍ o̍ bā, māā sa̍lā kpe̍e̍kpe̍i̍ pɛ̍, mɛ̄ɛ̍ ā cho̍ ni᷅ŋ ā bɛ̄ndāā le̍ mā lūɛ̄ī o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ ni᷄ŋ, le̍ mā tōsa̍ wa̍lta̍ nda̍ nɔ̄ le̍ to̍sāa̍ la̍ŋ.

¹⁶I̍sɔ̄lūɛ̍i̍ya̍ tɛ̄ɛ̄ŋ ki̍nɛ̍i̍, nda̍ cho̍ ā hɛ̄līāā ni̍, ma̍ wa̍ ā yɔ̄ŋga᷄ŋ o̍ ya̍ Mɛ̍lɛ̄ka̍ lo̍. Nda̍ ya̍ I̍ chu̍a̍ ni̍ ma̍ wa̍ ni᷅ŋ le̍ ya̍, le̍ sɔ̍ŋgɔ̍ po̍ tāse̍ o̍ po̍ tāse̍ fu̍la̍ wānā la̍nɔ̍ɔ̍ o̍ dēmbē I̍sɔ̄lūɛ̄ī.

¹⁷Chūāūwāā pīāāndūāā tāsi̍a̍a̍ I̍sɔ̄lūɛ̄ī ki̍nɛ̍i̍, ndu̍yɛ̍ a̍ chɔ̄lūāā pīāāndūāā tāsi̍a̍a̍ chɔ̄lūāā I̍sɔ̄lūɛ̍i̍ya̍ a̍ kūām nda̍, le̍ ya̍ Mɛ̍lɛ̄ka̍ nda̍ chō ni̍. Bōōndi̍i̍ ya̍ I̍ di̍u̍ chūāūwāā pīāāndūāā tāsi̍a̍a̍ I̍chi̍pī, ndu̍yɛ̍ a̍ chɔ̄lūāā pīāāndūāā tāsi̍a̍a̍ I̍chi̍pī ve̍, bōōndi̍i̍ ke̍ŋ ya̍ I̍ hɛ̍li̍ chūāūwāā pīāāndūāā tāsi̍a̍a̍ I̍sɔ̄lūɛ̄ī ni̍, a̍ chɔ̄lūāā pīāāndūāā tāsi̍a̍a̍ chɔ̄lūa̍a̍ I̍sɔ̄lūɛ̄ī a̍ ku̍ām nda̍.

¹⁸Kɛ̍ I̍ chu̍a̍ ni̍ko̍ Li̍va̍īya̍ le̍ sɔ̍ŋgɔ̍ chūāūwāā pīāāndūāā tāsi̍a̍a̍ I̍sɔ̄lūɛ̄ī.

¹⁹I̍sɔ̄lūɛ̍i̍ya̍ tɛ̄ɛ̄ŋ ki̍nɛ̍i̍, yu̍ŋgu̍ Li̍va̍īyo̍ ndu̍ ya̍ I̍ hɛ̍li̍ ni̍ mi̍ yɔ̍ŋgū ndu̍ o̍ E̍lɔ̄ŋ nda̍ pūa̍a̍ ndūa̍a̍ lo̍, le̍ mā tōsa̍ wa̍lta̍ŋ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ni᷄ŋ, ndu̍yɛ̍ mā mānda̍ I̍sɔ̄lūɛ̍i̍ya̍. Ko̍ŋ to̍sā ni̍ I̍sɔ̄lūɛ̍i̍ya̍ ā sɔ̍ɔ̍ŋgūū lɛ̍ o̍ tɛ̍ndīi̍ ko̍ŋ īkɛ̄i̍ le̍, o̍ ko̍ŋ kpūndɛ̍ ndu̍ o̍o̍ nɔ̍ le̍ nda̍ kōmāllo̍ le̍ sɔ̄ɔ̄ŋgūūwo̍ o̍ tɛ̍ndīi̍ ko̍ŋ īkɛ̄i̍ yo̍, mī kpūndɛ̍ kōŋ ō kpɛ̄kpɛ̍la̍ nda̍.”

²⁰O̍ ko̍ŋ, nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē le̍ tōsāa̍ le̍ Li̍va̍īya̍ mālɔ̄ɔ̍ Mɛ̄lɛ̄ka̍ o̍ bā, mi̍ Mūu̍sē nda̍ E̍lɔ̄ŋ a̍ I̍sɔ̄lūɛ̍i̍ya̍a̍ tu̍a̍a̍ kpo̍u̍ a̍ to̍sā ndu̍.

²¹Mi̍ Li̍va̍īya̍ ā pūlū nda̍ pi̍la̍ le̍ dīndīo̍o̍ sɔ̄lāa̍ Mɛ̄lɛ̄ka̍ o̍ hɔ̄l, ndu̍yɛ̍ ma̍ tūāā nyɛ̄lā ndāla̍ŋ. O̍ ko̍ŋ kɔ̍ɔ̍lī, mi̍ E̍lɔ̄ŋ o̍ ma᷅l nda̍ Mɛ̄lɛ̄ka̍ Ya̍a̍wɛ̄ɛ̄ o̍ bā māā sa̍lā kpe̍e̍kpe̍i̍yo̍, o̍ Mɛ̄lɛ̄ka̍ Ya̍a̍wɛ̄ɛ̄ lo̍. Sa̍lā o̍ sa̍lā ndu̍ o̍o̍ nɔ̍ le̍ sōlīo̍o̍ le̍ nda̍ dīndīo̍o̍ Mɛ̄lɛ̄ka̍ o̍ hɔ̄l, mbo̍ sōlī sa̍lālā lāŋ kpo̍u̍.

²²Mɛ̄ɛ̍ yu̍ŋgu̍ Li̍va̍īyo̍ ā sɔ̄la̍ dīndīo̍o̍, ma̍ kāndū ni̍ko̍ wa̍llo̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ni᷄ŋ, E̍lɔ̄ŋ nda̍ pūa̍a̍ ndūa̍a̍ o̍ bā bɛ̄ŋgu̍. Mɛ̄ɛ̍ nu̍a̍ā Mūu̍sē nda̍ I̍sɔ̄lūɛ̍i̍ya̍ ā tōsa̍ nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē le̍ tōsāa̍ a̍ Li̍va̍īya̍ o̍kɔ̄ɔ̄ ni̍.

²³O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl Mūu̍sē āā,

²⁴“Sāwāa̍ le̍ Li̍va̍īya̍, ndu̍ cho̍ ho̍ō ni̍. Li̍va̍īnɔ̍ o̍ Li̍va̍īnɔ̍ cho̍ ō hɛ̄līāā le̍ wa̍llo̍ to̍sāa̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ni᷄ŋ, mɛ̄ɛ̍ mbō chīŋa̍ wɔ̄sīla̍ŋ bi̍di̍i̍ŋ a̍ lā ŋūɛ̍ɛ̍nu̍ ɔ̄ɔ̄ hīōūwɔ̄ɔ̍ ko̍ŋ cho̍o̍, ma̍lāŋ o̍ ka̍ndū wa̍llo̍.

²⁵Ndu̍yɛ̍ tē ō fūūlu̍u̍ wɔ̄sīla̍ŋ be̍le̍-ŋu̍ɛ̍ɛ̍nu̍ pɛ̍, ō nɔ̍ lɛ̍ mbō hīōū lāchī a̍ wa̍llo̍ le̍, ō nɔ̄ mbō pɛ̄ŋgi̍.

²⁶Wānā wa̍ā le̍nde̍ ō nɔ̄ di̍ mbō hīōū lāchī a̍ chāāŋāā ndūāā I̍sɔ̄lūɛ̍i̍ya̍ wa̍llo̍ mālāa̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ni᷄ŋ, kɛ̍ ō nɔ̍ lɛ̍ mbō tōsa̍ wa̍li̍ o̍ wa̍li̍ a̍ bā ndɔ̄ māā pāāndū le̍. Mɛ̄ɛ̍ nu̍a̍ā ŋ̄ nɔ̄ ni̍ mā ke̍ Li̍va̍īya̍ wa̍lta̍ nda̍ nɔ̄ le̍ tōsāa̍ la̍ŋ.”