Read Southern Kisi Ma̍kāl 2 Bible Online

Ma̍kāl 2 - Southern Kisi bible

Ma̍kāl 2

¹Nyɛ̄ pālāa̍ ō wā ni̍ŋ le̍ wānāa̍ hi̍nī ha̍ā ā lɔ᷅l te̍, ā wā sɔ̍ɔ̍ŋ wɔ̍ɔ̍ŋndo̍ŋ tūūnɔ᷄ŋndo̍ o̍ lākɔ̄l le̍ wāŋnda̍ yɔ̄ŋ wɔ̄ɔ̍ŋndo̍ tōsāllo̍ wa̍. Dīmīo̍o̍ nu̍a̍ā mī pāa̍le̍ŋ lē sɛ̄ īdīi̍yo̍, mā sɔ̄la̍ fo̍ndāa̍ le̍ sɔ̄ɔ̍ŋ wɔ̍ɔ̍ŋ nda̍ kɛ̄ɛ̄sīa̍a̍ wo̍ŋ tōsāa̍, ā tōsa̍ mu̍ŋ bɛ̍ɛ̍.

²Tē ā yēēma̍ chīɔ̍ɔ̍ŋ wāŋnda̍ pɛ̍, ā pōōndi̍a̍a̍ nda̍ o̍ lābā, tē ā yēēma̍ chīɛ̄īlā wāŋnda̍ pɛ̍, ā chūa̍ a̍ ka̍ka̍. Ma̍ wā wāŋnda̍ nyɛ̄ pālāa̍ tūsīo̍o̍ chōo̍ a̍ chīɛ̄īlā ndāla̍ŋ, mā pōōndīāā wa᷅ŋnda̍ nyɛ̄m nda̍ ŋ̄kīɔ̍ɔ̍ŋ o̍ lābā.

³Le̍ sa̍bōo̍ ho̍ō, Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “I̍ cho̍ kɛ̄ɛ̄sīa̍a̍ le̍ mī tu̍si̍ nya̍ dɛ̍nɛ̍ pa̍lāa̍ chōo̍, nya̍ yu̍ŋgu̍ dɛ̍nɛ̍ wɔ̍ɔ̍ŋndo̍ ho̍ō. Ndu̍yɛ̍ lā nɔ̍lā ni̍ŋ mī lā kpɛ̄kpɛ̍la̍ dɛ̍nɛ̍ pa̍lāā kōŋ te̍. O̍ ko̍ŋ, lā be̍lū lɛ̍ ni̍ŋ a̍ yōŋgā le̍, kāni̍ fo̍ndōle̍, ō wā ni̍ŋ te̍le̍ŋ kpūndɛ̍ bɛ̄ndū le̍ nya̍.

⁴Tē pāa̍le̍ le̍ŋ lē fūūlu̍u̍ pɛ̍, wāŋnda̍ chɔ̄m ni̍ŋ nya̍ māā tāāmāsi̍ le̍ dɛ̍nɛ̍ pa̍lāā wā ni̍ŋ ndo̍. Ndu̍yɛ̍, wāŋnda̍ sōlī ni̍ŋ chōnde̍i̍ mā ma̍m nya̍ le̍ dɛ̍nɛ̍ pa̍lāā Mɛ̄lɛ̄ka̍ tūsī ni̍ŋ nya̍ chōo̍ wo̍, mā dīmi̍ āā, “Mbɔ̄ na̍a̍ ŋ̄ chu̍u̍ kpe̍nde̍ fɔ̍. Mɛ̄lɛ̄ka̍ Ya̍a̍wɛ̄ɛ̄ o̍ pu̍u̍ lɛ̄ŋndē nāā le̍ŋ, mbo̍ kē wānāa̍ de̍l na̍a̍ chōo̍ ma̍ yām na̍a̍ wa̍.”

⁵Le̍la̍ŋ nya̍ wānāa̍ cho̍ ha̍ā wāŋnda̍ dɛ̍nɛ̍ pa̍lāa̍ tūsīo̍o̍ chōo̍ wa̍, wānā o̍ wānā lo᷅ ni̍ŋ yo̍o̍mū mbō sɔ̄la̍ lɛ̄ŋnde̍ŋ nyɛ̄ pɔ̄mbɔ̄ bɛ̍ɛ̍ wa̍nāa̍ Mɛ̄lɛ̄ka̍ Ya̍a̍wɛ̄ɛ̄ wa̍ tɛ̄ɛ̄ŋ te̍.

⁶Wāŋnda̍ chō ya̍ dīmūllo̍ āā, “Di̍mūl na̍a̍ yōōŋgū wāā le̍nde̍ le̍. Di̍mūl na̍a̍ yōōŋgūla̍ Mɛ̄lɛ̄ka̍lā lāŋ te̍. Mɛ̄lɛ̄ka̍ cho̍ na̍a̍ lāsi̍ɔ̍mbu̍ tu̍sī le̍.

⁷A̍ yi̍ya᷄ŋ māā na̍a̍ wāŋnda̍ I̍sɔ̄lūɛ̄ī sēndi̍o̍o̍ cho̍ na̍a̍ chōo̍ ni̍? Bāā a̍ ye̍e̍ma̍ mā di̍mu̍l na̍a̍ māā Mɛ̄lɛ̄ka̍ Ya̍a̍wɛ̄ɛ̄ ō bi̍u̍nūŋ ndɛ̍ wānāā ndūa̍a̍ le̍? A̍ la̍a̍la̍ŋ māā Mɛ̄lɛ̄ka̍ tōsā sɔ̍ɔ̍ŋ ŋ̄ chō mu̍ŋ di̍mīo̍o̍ wo̍ŋ? A̍ la̍a̍la̍ŋ māā Mɛ̄lɛ̄ka̍ ō do̍ū wānāa̍ cho̍ sa̍kpo̍ ndu̍ o̍ hɔ̄l la̍ sa̍lā le̍?”

⁸Mɛ̄lɛ̄ka̍ Ya̍a̍wɛ̄ɛ̄ o̍ mu̍lī āā, “Lā lo̍ o̍ ko̍ŋ mi̍ lā sāā wānāā nīa̍a̍ a̍ sɔ̍ŋgɔ̄ɔ̍ māā ya̍a̍mɔ̍ɔ̍wa̍a̍ nyā. Mi̍ lā pōōndīāā dōmāla̍ kɛ̍ndɛ̄ kɛ̍ndɛ̄la̍ŋ wāŋnda̍ lēkɔ̄ɔ̍, a̍ wa᷄ ke̍e̍kōo̍ ō lɛ̄ŋndē nyāle̍ŋ ni᷄ŋ a̍ kɔ̄l nyūlū, mā yīyāŋ māā chɔ̄ū o̍ chɔ̄ū cho̍ lɛ̍ le̍.

⁹Wāŋ lāāndūāā wānāā nīa̍a̍ bɛ̍ɛ̍, mi̍ lā sōlī nda̍ o̍ chīɛ̄īlā ndāla̍ nda̍ hɛ̄na̍ŋ nda̍ŋ ni᷄ŋ. Mi̍ lā pōōndīāā chūāūwāā ndāa̍ lɛ̄ŋndē ya̍ ke̍ nda̍ le̍ŋ o̍ bā.

¹⁰Lā chɔ᷄ŋ mī lā kūɛ̄, fo̍ndāŋndo̍ ho̍ō ō cho̍ lɛ̍ fo̍ndāŋ nya̍ pɛ̄ŋgi̍ le̍. Kāni̍ fu̍u̍le̍, yɔ̄ŋndā wɔ̄ɔ̍ŋndā nya̍ tōsa̍ la̍ŋ lā tōsa̍ mi̍ fo̍ndāŋndo̍ ho̍ō wā hūnɔ̄ɔ̄ tɛ̄ɛ̄mbūūwo̍ sɔ̄lā.

¹¹“Wāŋnda̍ ha̍ā nyɛ̄ nda̍ yēēma̍ wo̍ cho̍ ni̍, ā yēēma̍ wāna̍ su̍a̍ā le̍ Mɛ̄lɛ̄ka̍ wo̍, o̍ ba̍lū a̍ chōōla̍ŋ mbō hūī wāŋnda̍ wo̍, ‘Lā chō mūɛ̄īmā mākīle̍pīi̍ya̍ŋ, a̍ mūɛ̄īmā nɛ̄īya᷄ŋ sɔ̄lā ta̍u̍,’ wo̍.

¹²“Kɛ̍ nya̍ wāŋnda̍ I̍sɔ̄lūɛ̄ī, nya̍ lo̍ yōōmū wa̍, I̍ cho̍ nya̍ chūūŋgīāā nāa̍ pi᷅lɛ̍, mɛ̄ɛ̍ wānā ma̍ndāā lāsāa̍ ō chu̍u̍ŋgi̍a̍a̍ na̍a̍ū sāa̍ ndūa̍a̍ o̍ kpākīo̍o̍ ni᷄ŋ yɛ̍. I̍ cho̍ nya̍ chūūŋgīāā nāa̍ pi᷅lɛ̍, mɛ̄ɛ̍ wāŋndo̍ ō chūūŋgīāā nu̍a̍ā sāa̍ mbō kūɛ̄ a̍ nda̍ nāa̍ ndā kūā a̍ sāa̍ le̍ di̍o̍la̍ŋ nda̍ yɛ̍. O̍ ko̍ŋ kɔ̍ɔ̍lī, mī lɛ̄ŋndē nyāle̍ŋ lē mīīŋgu̍ vɛ̄lɛ̄ mi̍ lē pɛ̄ cha̍ a̍ wāŋndā chīe̍e̍ya̍.”

¹³O̍ ko̍ŋ kɔ̍ɔ̍lī, mi̍ Ma̍kāl dīmī āā, “Mɛ̍lɛ̄ka̍ chō hūnɔ̄ɔ̄ nɛ̄īyo̍ kūmbī mī wānāā ndūa̍a̍ fūla̍ nāa̍ nda̍ chō o̍ bīyɔ̄ɔ̍ ni᷄ŋ nda̍. Ā chō hūnɔ̄ɔ̄ dīōlā sāāsāa̍ pēsī o̍ chi̍e̍e̍ nda̍ chō o̍ bīyɔ̄ɔ̍ ni᷄ŋ ndo̍, mā fūla̍ mā sɔ̄la̍ bāŋa᷄ŋndo̍. Māsā nda̍ Bɛ̄ndōo̍, ndu̍ yɔ̍nūŋ ni̍ māā Mɛ̄lɛ̄ka̍ Ya̍a̍wɛ̄ɛ̄, ndu̍ pi̍la̍ cho̍ nda̍ īsīsi̍ la̍chi̍ le̍ nda̍ sōlīo̍o̍ o̍ bīyɔ̄ɔ̍ ni᷄ŋ ni̍.”