Read Southern Kisi Ma̍kāl 3 Bible Online

Ma̍kāl 3 - Southern Kisi bible

Ma̍kāl 3

¹O̍ ko̍ŋ kɔ̍ɔ̍lī, mi̍ Ma̍kāl dīmī āā, “Nya̍ wāŋ bānāa̍ I̍sɔ̍lūɛ̄ī, lā ya᷄ŋ ya̍ nīla̍ŋ. Nya̍ wāŋ bɛ̄ndūa̍a̍ I̍sɔ̄lūɛ̄ī, lā tūe̍i̍ nyɛ᷅ ya̍ I̍ cho̍ dīmīo̍o̍ wo̍. Nya̍ kpe̍e̍kpe̍i̍ nɔ̍ ni̍ mī lā sīna̍ īkɛ̄ndɛ̄i̍ a̍ īwɔ̄ɔ̍ŋnde̍.

²Kɛ̍ mi̍ lā tūl sūɛ̍i̍ kɛ̄ndɛ̄i̍ lēyɛ̄, ndu̍yɛ̍ mi̍ lā kāālā dɛ̍nɛ̍ wɔ̄ɔ̍ŋndo̍. Sɔ̄ɔ̍ŋ wɔ̍ɔ̍ŋ nya̍ tōsa̍l wānāā nīa̍a̍ wo̍ŋ, ō chō ko̍ māā yāu̍la̍ŋ nda̍ sōlīo̍o̍ ā kīyɛ̍i̍, mi̍ lā sīāŋ nda̍ ā kīyɛ̍i̍.

³Ō chō ko̍ māā vīsīŋ wānāā nīa̍a̍ nya̍ dē ni̍, mɛ̄ɛ̍ nya̍ būūvi̍a̍a̍ vīsīŋ nda̍ŋ o̍ pāāla̍ŋ, mi̍ lā pēsī pāālā ndāla̍ŋ, mi̍ lā kīli̍ ki̍li̍ vīsīŋ mu᷅ŋ mi̍ lā yāū o̍ kpɛ̍ɛ̍nɛ̍i̍ ni᷄ŋ.

⁴Te̍le̍ŋ cho̍ fūūlūū mī nyɛ̄ pālāa̍ kōma̍l nya̍ mī lā cha᷄ŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ le̍ mālāa̍, kɛ̍ ō mu̍lī ni̍ŋ nya̍ dīōm te̍. Ō chō nya̍ hɔ̄lāā ndūa̍a̍ vīŋ kpi̍ŋ a̍ te̍le̍ŋ ko̍ŋ. Kāni̍ fu̍u̍le̍, le̍ yɔ̄ŋ wɔ̄ɔ̍ŋ nya̍ tōsa̍ wo̍.

⁵“Wānāā lāchōōwāa̍ su̍a̍ā le̍ Mɛ̄lɛ̄ka̍ wa̍ ā chō wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍ hūīyo̍. Tē wāŋnda̍ ā pāāwa̍ nda̍ pɛ̍, ā dīmu̍l wānāā kāŋ yōōŋgūlā lāchōōwāla̍ŋ māā ā chō wā a̍ kɔ̄l nyūlū, kɛ̍ mā dīmūl wānāa̍ pa̍a̍wā nda̍ le̍ wa̍ māā chɔ̄ūwo̍ chō nda̍ kōmāl. Kɛ̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ nya̍ wānāa̍ su̍a̍ā ha̍ā le̍ Mɛ̄lɛ̄ka̍ wa̍ o̍kɔ̄ɔ̄ wo̍ ndu̍ cho̍ ho̍ō ni̍. Ō dīmi̍ māā,

⁶te̍le̍ŋ cho̍ hūnɔ̄ɔ̄ fūūlūū, ī yɔ̄nūŋ ni̍ŋ nya̍ ko̍ mɛ̄ɛ̍ nyūmnda̍ŋ mā tūāl nu̍a̍ā wāŋndo̍ o̍ hɔ̄l ō chi᷅ le̍ yɛ̍, lā chi᷅ lɛ̍ ni̍ŋ yi̍lāŋ o̍ yi̍lāŋ te̍. I̍ yɔ̄nūŋ ni̍ŋ ko̍ mɛ̄ɛ̍ nyūmnda̍ŋ mā tūāl nu̍a̍ā wāŋndo̍ o̍ hɔ̄l kpi᷅ŋgbi̍ bɛ̍ndū yɛ̍, lā nɔ̍lā lɛ̍ ni̍ŋ mī lā sīna̍ nyɛ᷄ nɔ̍ le̍ hūnɔ̄ɔ̄ yɔ̄nɔ᷄ŋndo̍ wo̍ le̍. Kāni̍ fo̍ndōle̍, le̍ mɛ̄ɛ̍ nya̍ fāŋa̍ wānāā nīa̍a̍ o̍ nɛ̄i̍ tōnya̍a̍ chōo̍ yɛ̍.”

⁷Wānāa̍ di̍mī ha̍ā sɔ̄ɔ̍ŋ wa̍ā lāchīo̍ŋ nda̍, ā chō hūnɔ̄ɔ̄ si̍ɔ̍mbu̍la̍ŋ tōlnɔ᷄ŋ. Wānāa̍ vi̍ām ha̍ā yāwāla̍ŋ nda̍ŋ, si̍ɔ̍mbu̍la̍ŋ lā chō nda̍ hūnɔ̄ɔ̄ bīyɔ̄ɔ̄. Nda̍ kpo̍u̍, ā chō hūnɔ̄ɔ̄ sōndōla̍ŋ kīndā, kāni̍ ā nyūnā ni̍ŋ Mɛ̄lɛ̄ka̍ dīōm le̍ īsɔ̄ɔ̍, kɛ̍ ō mu̍lī ni̍ŋ nda̍ dīōm te̍.

⁸“Kɛ̍ ya̍ Ma̍kāl, kpāāya̍ Nyi̍na̍ Mɛ̄lɛ̄ka̍ Ya̍a̍wɛ̄ɛ̄ wo̍ ō chō ya̍ kɔ̄ɔ̄lī ta̍u̍ ta̍u̍. Ndu̍yɛ̍ Mɛ̄lɛ̄ka̍ ke᷄ ya̍ kɔ̄l kālo̍o̍ le̍ tōnya̍a̍ dīmīo̍o̍ a̍ kɔ̄l sīmūlāa̍ le̍ mī di̍mu̍l wāŋnda̍ I̍sɔ̄lūɛ̄ī a̍ yɔ̄ŋndā ndāla̍ wɔ̍ɔ̍ŋnda̍ŋ o̍kɔ̄ɔ̄.

⁹Nya̍ wānāā bɛ̄ndūa̍a̍ I̍sɔ̄lūɛ̄ī, lā ya̍ŋ ya̍ nīla̍ŋ, nya̍ tu̍l ha̍ā sa̍kpōyɛ̍i̍ lēyɛ̄, ndu̍yɛ̍ mi̍ lā mūlī tōnya̍a̍ bāla̍ŋ a̍ mākɔ̄ɔ̄ wa̍.

¹⁰Lā chō chi̍e̍e̍ bɛ̍ndu̍ Mɛ̄lɛ̄ka̍a̍ tāŋgūllo̍, ndu̍ yɔ̍nūŋ māā Chūlu̍sɛ̄lɛ̄m ni̍ o̍ ka̍fāla̍ŋ chōo̍, ndu̍yɛ̍ a̍ wāŋndā chīe̍e̍ya̍ dīūwo̍.

¹¹Nya̍ wānāā bɛ̄ndūa̍a̍ I̍sɔ̄lūɛ̄ī, lā chō lūɛ̄īyɔ̄ɔ̄ lāni᷄ŋnda̍ŋ bīyɔ̄ɔ̍ mī lā kīlūl wāŋnda̍ yāma᷅ŋ lā ka̍fa᷄ŋ. Nya̍ wānāā sōlīāā lāsa̍lāa̍ mi̍ lā wā wāŋnda̍ nyɛ̄ sɔ̄lāa̍ bīyɔ̄ɔ̍ o̍ lābā le̍ nda̍ sāwāla̍ Mɛ̄lɛ̄ka̍ la̍ŋ pɛ̄ɛ̄kōo̍. O̍ ko̍ŋ kɔ̍ɔ̍lī, nya̍ wānāa̍ su̍a̍ā le̍ Mɛ̄lɛ̄ka̍ wa̍, mi̍ lā wā wāŋnda̍ pāāwāla̍ŋ bīyɔ̄ɔ̍ o̍ lābā le̍ nda̍ yōōŋgūla̍ Mɛ̄lɛ̄ka̍la̍ŋ dīmūllo̍. Kɛ̍ a̍ ko̍ŋ kpo̍u̍, mi̍ lā wā chūānɔ᷄ŋndo̍ māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍, mī lā dīmūl wa᷅ŋnda̍ māā, lā si̍nā nu̍a̍ā māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ na̍a̍ la̍tu̍lu̍ le̍? Nyɛ̄ o̍ nyɛ̄ wɔ̄ɔ̍ŋ cho̍ na̍a̍ yɔ̄nɔ᷄ŋ te̍.”

¹²Nya̍ wāŋ bɛ̄ndūa̍a̍ I̍sɔ̄lūɛ̄ī, le̍ sa̍bū nyāa̍, Sa̍a̍yɔ̄ŋ cho̍ hūnɔ̄ɔ̄ sīmnɔ᷄ŋ mɛ̄ɛ̍ nda̍ wāā nu̍a̍ā kpe̍lo̍o̍ yɛ̍. Chūlu̍sɛ̄lɛ̄m o̍ cho̍ sīmnɔ᷄ŋ be̍mbe̍la̍ŋ kpo̍sōŋ. Ndu̍yɛ̍ mī pēmbīī chīɛ̍i̍ Mɛ̄lɛ̄ka̍a̍ ō si᷄m lēchōo̍ ve̍ ī si̍mnu᷄ŋ bu̍ndɛ̍ bɛ̍ndū.